འཇམ་དཔལ་གཤིན་རྗེའི་བསྐང་བ།
འཇམ་དཔལ་གཤིན་རྗེའི་བསྐང་བ་བཞུགས་སོ། །
འཇམ་དཔལ་གཤིན་རྗེའི་ལྷ་ཚོགས་ལ། །སྒོ་གསུམ་གུས་པས་ཕྱག་འཚལ་ལོ། །བཀའ་གནང་སྩོལ་ལ་བར་ཆད་སོལ། །བླ་མ་ཡི་དམ་མཁའ་འགྲོའི་བསྐང་བ་རྒྱས་བསྡུས་གང་རུང་བྱས་ལ། གཤིན་རྗེའི་གཏོར་མདོས་བསྐང་བ་ལ་སོགས་བཤམས་ལ། སྨན་རཀ་གཏོར་གསུམ་ལ་སོགས་བྱིན་གྱིས་བརླབས་ལ། དབྱངས་དང་བཅས་པས་འདི་སྐད་དོ། །ཧཱུྃ། བསྐང་ངོ་བསྐལ་པར་ཐུགས་དམ་བསྐང་། །ཐུགས་དམ་གཉན་པོ་བསྐང་བའི་དམ་རྫས་ནི། །རྩ་བརྒྱད་སྟོང་ལ་སྦྱར་བའི་བདུད་རྩི་དང་། །ཁྱད་པར་རྨད་དུ་བྱུང་བའི་གཏོར་མ་དང་། །འཁོར་བ་རྒྱུ་ལས་བསྒྲལ་བའི་རཀྟ་དང་། །རྣམ་རྟོག་རྒྱུ་ལས་བསྒྲལ་བའི་བམ་
ཆེན་དང་། །འབྲུ་བཅུད་སྟོང་ལ་སྦྱར་བའི་བདུད་རྩི་དང་། །འདོད་ཡོན་ལྔ་ལྡན་མཆོད་པ་སྣ་ཚོགས་དང་། །ཕྱི་ནང་གསང་བ་ཚོགས་ཀྱི་ཡོ་བྱད་ཀྱིས། །བསྐང་ངོ་བསྐལ་པར་ཐུགས་དམ་བསྐང་། །ཧཱུྃ། འོག་མིན་ཆོས་དབྱིངས་ཕོ་བྲང་ནས། །རྩ་བརྒྱུད་བླ་མའི་ཐུགས་དམ་བསྐང་། །ལོངས་སྤྱོད་རྫོགས་སྐུའི་ཞིང་ཁམས་ནས། །དུས་གསུམ་སངས་རྒྱས་ཐུགས་དམ་བསྐང་། །སྤྲུལ་པ་སྐུ་ཡི་གཞལ་ཡས་ནས། །འཇམ་དཔལ་རིགས་ལྔའི་ཐུགས་དམ་བསྐང་། །རང་སྣང་དག་པའི་གཞལ་ཡས་ནས། །རིགས་གསུམ་མགོན་པོའི་ཐུགས་དམ་བསྐང་། །སྤྱི་
གཙུག་པད་ཟླའི་གདན་སྟེང་ནས། །རྩ་བའི་བླ་མའི་ཐུགས་དམ་བསྐང་། །ཧཱུྃ། སངས་རྒྱས་ཀུན་གྱི་སྐུ་གསུང་ཐུགས། །བདེ་གཤེགས་ཀུན་གྱི་སྤྲུལ་པ་སྟེ། །ཁྲོ་ཆུ་དུག་གདོང་ཐུགས་དམ་བསྐང་། །བདུད་དང་མུ་སྟེགས་འདུལ་མཛད་པ། །གཤིན་རྗེ་ནག་པོའི་ཐུགས་དམ་བསྐང་། །ཕྱི་ནང་ཆོས་སྐྱོང་འདུལ་མཛད་པ། །སྤྱི་གཤེད་དུག་གདོང་ཐུགས་དམ་བསྐང་། །དགྲ་བགེགས་མ་ལུས་འདུལ་མཛད་པའི། །ལས་ཀྱི་གཤིན་རྗེའི་ཐུགས་དམ་བསྐང་། །རྦད་འདྲེ་དྲོད་གཏོང་འདུལ་མཛད་པ། །འཁོར་གྱི་གཤིན་རྗེའི་ཐུགས་དམ་བསྐང་། །སྣང་སྲིད་ཕོ་རྒྱུད་འདུལ་བའི་ཕྱིར། །འཆི་བདག་ནག་པོའི་ཐུགས་དམ་བསྐང་། །སྣང་སྲིད་མོ་རྒྱུད་འདུལ་བའི་ཕྱིར། །ཚེ་བདག་ནག་པོའི་ཐུགས་དམ་བསྐང་། །ལྷ་སྲིན་སྡེ་བརྒྱུད་འདུལ་བའི་ཕྱིར། །སྲོག་བདག་ནག་པོའི་ཐུགས་དམ་བསྐང་། །བདུད་དང་མུ་སྟེགས་འདུལ་མཛད་པ། །བེ་བྷི་སྭ་ཏའི་ཐུགས་དམ་བསྐང་། །སྣང་སྲིད་ལྷ་འདྲེ་འདུལ་མཛད་པ། །ཟ་བ་ལྗང་ནག་ཐུགས་དམ་བསྐང་། །དགྲ་བགེགས་མ་ལུས་འདུལ་མཛད་པ། །ཡ་མ་རཱ་ཛའི་ཐུགས་དམ་བསྐང་། །གཤེད་ཆེན་སྡེ་བཞི་
འདུལ་མཛད་པ། །མོན་པ་སྡེ་བཞིའི་ཐུགས་དམ་བསྐང་། །བདུད་པོ་སྡེ་བཞི་འདུལ་མཛད་པ། །འཆི་བདག་བཅུ་གཉིས་ཐུགས་དམ་བསྐང་། །ཕོ་གཤེད་སུམ་བརྒྱ་དྲུག་ཅུའི་ཐུགས་དམ་བསྐང་། །མོ་གཤེད་སུམ་བརྒྱ་དྲུག་ཅུའི་ཐུགས་དམ་བསྐང་། །སྒོ་བ་དྲེགས་པ་སྡེ་བཞིའི་ཐུགས་དམ་བསྐང་། །སྲོག་གཅོད་རུ་ཏྲ་སྡེ་བཞིའི་ཐུགས་དམ་བསྐང་། །གཤིན་རྗེ་དགུ་ཁྲི་དགུ་འབུམ་ཐུགས་དམ་བསྐང་། །གཤིན་རྗེ་བདུན་བརྒྱ་ཉི་ཤུའི་ཐུགས་དམ་བསྐང་། །ཕོ་ཉ་ལས་མཁན་འཁོར་བཅས་ཐུགས་དམ་བསྐང་། །བསེ་ཡི་སྦལ་པ་དམར་པོའི་ཐུགས་དམ་བསྐང་། །ལྕགས་ཀྱི་སྡིག་པ་ནག་པོའི་ཐུགས་དམ་བསྐང་། །དུག་གི་ཕག་རྒོད་ནག་པོའི་ཐུགས་དམ་བསྐང་། །ཐུགས་དམ་བསྐངས་བའི་བྱིན་རླབས་ཀྱིས། །བྱད་ཁ་ཕུར་ཁ་བཟློག་ཏུ་གསོལ། །ཆག་ཆེན་ཉམ་ང་བཟློག་ཏུ་གསོལ། །ཕྱི་ནང་བར་ཆད་བཟློག་ཏུ་གསོལ། །ཕྲིན་ལས་རྣམ་བཞི་འགྲུབ་པར་མཛོད། །ཧཱུྃ། བཅོམ་ལྡན་འཇམ་དཔལ་མཐའ་བྲལ་ཆོས་ཀྱི་སྐུ། །ཉག་གཅིག་ཆོས་སྐུ་སྐྱེ་མེད་ལོངས་སྤྱོད་རྫོགས། །གང་ཤར་འགགས་མེད་སྣ་ཚོགས་སྤྲུལ་པའི་སྐུ། །བཅོམ་ལྡན་
གཤིན་རྗེ་འཁོར་བཅས་དགོངས་སུ་གསོལ། །བདག་དང་འཁོར་བའི་སེམས་ཅན་ཐམས་ཅད་ཀྱི། །གཏི་མུག་འཁྲུལ་སེམས་དཔག་མེད་བླངས་བྱས་ནས། །ད་ལྟ་ཚེ་འདིའི་ལུས་བླངས་ཡན་ཆད་དུ། །རིག་དང་མ་རིག་འཁྲུལ་པའི་ལས་དབང་གིས། །སྐུ་གསུང་ཐུགས་ཡོན་ཕྲིན་ལས་ཡན་ལག་གི། །དམ་ཚིག་ཉམས་ཆག་ནོར་འཁྲུལ་གྱུར་པ་ཀུན། །མི་གསང་མི་སྦེད་གནོང་འགྱོད་མཐོལ་ལོ་བཤགས། །ཀློང་ཡངས་ཆེན་པོའི་ངང་དུ་བཟོད་པར་གསོལ། །ཕྲིན་ལས་རྣམ་བཞིའི་དངོས་གྲུབ་སྩལ་ཏུ་གསོལ། །ཅེས་ཡི་གེ་བརྒྱ་པ་བརྗོད། ཁྲོ་ཆུ་དུག་གདོང་གི་ཟློག་མདོས་བཅས་དུས། རྒྱལ་ཕུར་འཛོམས་ཉིན་སྔ་དྲོའི་ཐུན་མཚམས་ཤིག་ལ། རིག་སྔགས་འཆང་བའི་རྣལ་འབྱོར་པ་ཨ་རཱ་གས་སྦྱར་བས། འགལ་འཁྲུལ་མཆིས་ན་འཇམ་དཔལ་ཚོགས་ལ་བཤགས་ཤིང་། དགེ་བས་བར་ཆད་བདུད་བཞིའི་གཡུལ་ལས་རྒྱལ་བར་ཤོག །དགེའོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།