གཉན་ཆེན་ཐང་ལྷའི་མཆོད་ཕྲེང་།
གཉན་ཆེན་ཐང་ལྷའི་མཆོད་ཕྲེང་བཞུགས་སོ། །དཔལ་ཕྱག་ན་རྡོ་རྗེའི་སྤྲུལ་པ་སློབ་དཔོན་པདྨ་འབྱུང་གནས་མཐའ་ཁོབ་བོད་ཡུལ་དུ་བྱོན་པའི་དུས་སུ། བོད་ཀྱི་ལྷ་འདྲེ་མཐོ་མཐོ་མཆིས་ཏེ། ཐང་ལྷ་ཡར་བཞུད་ཀྱིས་སློབ་དཔོན་ལ་ཁ་བ་ཕབ་ཅིང་ཞབས་སུ་བུ་ཡུག་འཚུབ་ཅིང་སྨུག་པས་ཤུལ་ལམ་བཀག་པ་ལ། སློབ་དཔོན་པདྨ་ཐུགས་ཁྲོས་ཏེ། ཕྱག་ན་རྡོ་རྗེའི་ཏིང་ངེ་འཛིན་ལ་བཞུགས་ནས། །ལྷ་སྲིན་ཐམས་ཅད་བྲད་ཅིང་རྒྱལ་བའི་ཚེ། དེའི་ཚེ་ཐང་ལྷ་ཡར་བཞུད་བཏུལ་ནས་དམ་ལ་བཏགས། སློབ་དཔོན་གྱིས་གསུངས་པས། ལྷ་ཆེན་ཐང་ལྷ་ཡར་བཞུད་ཁྱོད་ཀྱི་སྲོག་གི་སྙིང་པོ་གང་ཡིན། ནུས་པའི་ཕྲིན་ལས་ཅི་ནུས་གསུངས་པས། ཐང་ལྷས་སྲོག་གི་སྙིང་པོ་རང་དབང་མེད་པར་ཕུལ་ནས། དེ་ནས་གསང་བའི་མཚན་ཕུལ་བ་ནི། རྡོ་རྗེ་འབར་བ་རྩལ་ས་མ་ཡ་ཛ་ཛ༔ ཀྱི་སློབ་དཔོན་ལགས་བདག་གི་ཕྲིན་ལས་ནི། སྨྱོ་བའི་འདྲེ་འདུལ་ཞིང་སྡང་བའི་དགྲ་གསོད་པ་ལགས་སོ། །སློབ་དཔོན་ཉིད་ཀྱི་བཀའ་མི་ཉན་པའི་དབང་མེད་ཀྱིས། བདག་ལ་ཟས་སྐལ་ཅིག་སྩོལ། ཞེས་ཞུས་སོ། །ཁྱོད་ཀྱི་ཟས་སྐལ་ཅི་ལྟར་སྦྱིན་གསུངས་པས། སློབ་དཔོན་ལགས་བདག་གི་ཟས་སྐལ་འབྲུའི་ཟན་སོར་བཅུ་གཉིས་པ། ཟུར་གསུམ་ལ་གསེར་གཡུའི་རིན་པོ་ཆེ་སྣ་ལྔ་ལྡན་པ་ལ་རྔོག་ཅིག་
གཙང 
་ལུག་ཆ་གཅིག །ཆང་ཕུད་ གཙང ་མ་གྲ་ཕྱིང་ གཙང ་མའི་ནང་དུ་བཞག་ལ། དེ་ནས། ཨོཾ་བཛྲ་ཐང་ཀ་ར་མུན་ཉིད་ཁུ་ཤ་ལི་ཨ་མྲྀ་ཏ་ཁ་ཁ་ཁཱ་ཧི་ཁཱ་ཧི༔ ཞེས་
པས་གསོལ་བ་ཟེར་ནས་ཐང་ལྷ་མི་ལྡང་བར་འགྱུར་རོ༔ དེ་ནས་སློབ་དཔོན་གྱི་རྔ་ཆུང་ཕྱག་ཏུ་བཞེས་ཏེ་ཕྱི་རབས་དོན་དུ་འདི་སྐད་གསུངས་སོ༔ ཀྱཻ༔ ཡེ་ཤེས་གཞལ་ཡས་བསྐྱེད་ཅིང་རྒྱ་མ་ཆུང་༔ སེང་གེ་གླང་ཆེན་ཁྲི་བཤམས་འཕང་མ་དམའ༔ ཉི་ཟླ་པདྨའི་གདན་བཏིང་བཀྲག་མ་ཞན༔ ཡེ་ཤེས་ལྷ་མཆོག་བརྟེན་ཅིང་རྒྱང་མ་རིང་༔ འཇིག་རྟེན་སྲུང་མ་བསྒྲུབ་ཅིང་མཐུ་མ་ཆུང་༔ འདིར་བྱོན་ཉི་ཟླའི་གདན་ལ་བཞུགས་སུ་གསོལ༔ རྡོ་རྗེ་འབར་བ་རྩལ་ལ་ས་མ་ཡ་ཛ་ཛ༔ ཧཱུྃ༔ སྐུ་ལྷའི་ཡབ་སྨོས་པ༔ འོ་དེ་གུང་རྒྱལ་ལགས༔ སྐུ་ལྷའི་ཡུམ་སྨོས་པ༔ གཡུ་བྱ་གཤོག་གཅིག་ལགས༔ སྐུ་ལྷ་ཉིད་སྨོས་པ༔ ཡོར་བཞུད་གཉན་གྱི་ལྷ༔ བཞུགས་ཡུལ་མཚན་གསོལ་བ༔ འདམ་ཤོད་སྣར་མོ་ལགས༔ ཁྲི་རྒོད་གཡུ་ལྗང་འཁྲིལ༔ དབྱར་སྔོ་དགུན་ཡང་སྔོ༔ བཞུགས་ཡུལ་ཉམས་རེ་དགའ༔ དགྱེས་སོ་ལྷ་ཡི་ཡུལ༔ མི་ཆོས་མཚན་གསོལ་བ༔ ཐང་ལྷ་ཡར་བཞུད་ལགས༔ ལྷ་ཆོས་མཚན་གསོལ་བ༔ དྲི་ཟའི་རྒྱལ་པོ་ནི༔ ཟུར་ཕུད་ལྔ་པ་ལགས༔ གསང་བའི་མཚན་གསོལ་བ༔ རྡོ་རྗེ་འབར་བ་རྩལ༔ སྐུ་ལ་ཅི་གསོལ་བ༔ དར་དཀར་རལ་ག་གསོལ༔ ཆིབས་སུ་ཅི་ཆིབས་ན༔ ལྷ་
རྟ་ངང་དཀར་ཆིབས༔ ཁམས་གསུམ་ཀུན་ཏུ་རྒྱུགས༔ མདོག་དཀར་འོད་ཟེར་འབར༔ གཡས་པས་སྦ་ལྕག་ཕྱར༔ མ་བདུན་ལས་ལ་འགྱེད༔ གཡོན་པས་ཤེལ་འཕྲེང་འདྲེན༔ ཐུགས་དམ་དབྱིངས་སུ་ཟློས༔ སྤྲུལ་པ་ཅི་འགྱེད་ན༔ ལྷ་དམག་འབུམ་སྡེ་འགྱེད༔ བྲན་གཡོག་འཁོར་དང་བཅས༔ འདིར་སྤྱོན་ཕྲིན་ལས་མཛོད༔ དམ་ཅན་ཀུན་གྱི་ལྷ༔ དམ་མེད་ཀུན་གྱི་གཤེད༔་གནའ་ཟན་ཀུན་གྱི་བདུད་རྣལ་འབྱོར་ཀུན་གྱི་དཔལ༔ སྒྲུབ་མཆོག་བདག་གི་གྲོགས༔ ཕྲིན་ལས་བཀའ་ཕོག་པ༔ སྨོ་བའི་འདྲེ་འདུལ་ཞིང་༔ སྡང་བའི་དགྲ་སྲོག་ཆོད༔ མགྱོགས་སུ་རྟ་སྟོད་ཀྱིས༔ རྨིག་ཐོག་ཟོར་མ་རྫི༔ རྣོ་རུ་མཚོན་བདར་གྱིས༔ རྩེ་མོ་དབལ་མ་ཞན༔ ཅི་དང་དོ་བསྡོ་ན༔ དོ་ཐག་ཁྱོད་ལ་རེ༔ མགྱོགས་སུ་ཀྱུས་འདྲེན་ནོ༔ སྐྱུད་ཐོགས་ཤོར་ར་རེ་སྡང་དགྲ་ཁྱེར་ར་རེ༔ བྱམས་ཀྱིས་སྐྱོང་ལ་རེ༔ དུས་ལ་བབ་བོ་ས་མ་ཡ༔ དམ་ཚིག་རྗེས་སུ་དྲན་པར་མཛོད༔ ལས་ལ་བབ་བོ་བགེགས་ཀྱི་ཚོགས༔ བཅོལ་བའི་ཕྲིན་ལས་འགྲུབ་པར་མཛོད༔ དབུས་ གཙང ་རུ་བཞིའི་ཡུལ་ལྷ་ཁྱོད༔ ཆོས་སྐྱོང་རྒྱལ་པོ་ལྷ་ཡི་
སྲས༔ ཁྲི་སྲོང་ལྡེའུ་བཙན་སྐུ་ལྷ་ཡིན༔ ཨོ་རྒྱན་པདྨ་འབྱུང་གནས་ཀྱིས༔ དམ་ལ་བཏགས་པའི་དམ་ཚིག་ཅན༔ ད་ལྟ་ཅི་མནོའི་ལས་རྣམས་ཉོན༔ ཕྱི་རབས་བསྟན་པའི་ཐ་མ་ལ༔ ཨོ་རྒྱན་པདྨ་འབྱུང་གནས་ཀྱི༔ རྗེས་སུ་འཇུག་པའི་སྔགས་འཆང་དང་༔ ཆོས་རྒྱལ་ཁྲི་སྲོང་ལྡེའུ་བཙན་གྱི༔ ལྷ་བརྒྱུད་ཆགས་པའི་རྗེ་རིགས་རྣམས༔ མཐོ་བ་དགུང་ལ་རེག་པ་དང་༔ དམའ་བ་བུ་བཞིན་སྐྱོངས་བར་གྱིས༔ བོད་ཁམས་རུ་བཞི་ཆོས་བཞིན་སྐྱོངས༔ བསམ་ཡས་ལྷ་ཁང་དཀོར་བཞིན་སྲུངས༔ བསྐལ་པ་ཐ་མའི་སེམས་ཅན་ལ་ཁྱོད་ཀྱིས་སྲུང་སྐྱོབ་མི་བྱེད་ན༔ དང་པོ་བྱང་ལམ་བར་མ་རུ༔ གསང་བདག་ཕྱག་ན་རྡོ་རྗེ་ཡིས༔ སྲོག་སྙིང་གཟིར་བ་མི་དྲན་ནམ༔ བར་དུ་བསམ་ཡས་ཧས་པོ་རིར༔ དབང་ཆེན་པདྨ་ཧེ་རུ་ཀས༔ དབང་དུ་བསྡུས་པ་མི་དྲན་ནམ༔ ཐ་མ་རི་རྒྱལ་བཀྲག་བཟང་དུ༔ རྩེ་མོར་ལྷ་སྲིན་ཀུན་འཚོགས་ནས༔ དཔལ་ཆེན་རྡོ་རྗེ་གཞོན་ནུ་ཡིས༔ དམ་ཚིག་ཕོག་པ་མི་དྲན་ནམ༔ ང་ནི་པདྨ་འབྱུང་གནས་ཡིན༔ ཁྱོད་ནི་གཉན་ཆེན་ཐང་ལྷ་ཡིན༔ ཡུལ་ནི་དབུས་ གཙང ་རུ་བཞི་ཡིན༔ བྱིན་རླབས་སྤྲིན་ཕུང་ཐིབས་སེ་ཐེབ༔ ཐུགས་
རྗེའི་ཆར་ལྟར་ཤ་ར་ར༔ དམ་ཚིག་མདངས་ལྡན་ཡ་ལ་ལ༔ ཐང་ལྷ་གཉན་པོ་གཤེགས་སུ་གསོལ༔ སྐུ་ལྷ་གཉན་པོ་འཁོར་བཅས་ལ༔ བརྗིད་ལྡན་བཟང་རིང་བཤོས་ཀྱིས་མཆོད༔ གཡའ་ཆུ་གངས་ཆུ་ གཙང ་མས་མཆོད༔ དྲི་ཞིམ་སྤོས་དཀར་དུད་པས་མཆོད༔ གསེར་དངུལ་རིན་ཆེན་སྣ་ལྔས་མཆོད༔ སྣ་ཚོགས་དར་དང་ཟ་འོག་མཆོད༔ གསང་ལུག་འབྲས་དཀར་ གཙང ་མས་མཆོད༔ ཨོཾ་བཛྲ་ཐང་ཀ་ར་མུན་ཉིད་ཁུ་ཤ་ལི་ཨ་མྲྀ་ཏ་སྭཱ་ཧཱ༔ ཞེས་དགོངས་སྔོན་མཐོངས་བར་རྫོགས་སོ༔ དེ་ནས་བསྐུལ་གཏོར་ཕུལ་ལ༔ དཀར་གཏོར་དུས་བཏོན་ཀྱང་རུང་༔ ཀྱཻ༔ དྲག་པོའི་ལས་ལ་མྱུར་དུ་བསྐུལ་བའི་ཚེ༔ རྟ་མཆོག་ངང་ཞུར་རླུང་གི་ཤུགས་ཅན་སོགས༔ སྤྲུལ་པའི་ཞོན་པ་འབུམ་སྟེང་དེ་དག་ན༔ སྐྲ་བཙན་ཡ་ལད་འཇིགས་མེད་གཞན་རྒོལ་གྱིས༔ དཔུང་གཞོམ་མཚོན་ཆའི་རི་བོ་བསྙིལ་བའི་སྒྲ༔ ནད་དང་མཚོན་གྱི་བསྐལ་པ་སྟོང་པ་དང་༔ གཟུགས་ཅན་གཟུགས་མེད་འཚེ་བའི་གནོད་པ་ཟློག༔ གཞན་ཡང་གང་བརྩམ་ཅི་བཅོལ་ལས་ཀུན་སྒྲུབས༔ ཞེས་བསྐུལ་ལོ། རྒྱལ་འགོང་གི་གནོད་པ་དང་འཚུབ་ཆ་ཆེ་ན་འདི་འདོན༔ ཧཱུྃ་ཧཱུྃ་ཧཱུྃ༔ བཞུགས་ཡུལ་འདམ་ཤོད་སྣེ་
མོ་ནས༔ ཡར་བཞུད་གཉན་པོ་སྐུ་བཞེངས་ཤིག༔ བླ་མཚོ་འཁྱིལ་བའི་ནང་ཤེད་ནས་གཉན་ཆེན་ཐང་ལྷ་སྐུ་བཞེངས་ཤིག༔ བྲག་དཀར་གཉན་པོའི་རྩེ་མོ་ནས༔ དྲི་ཟའི་རྒྱལ་པོ་སྐུ་བཞེངས་ཤིག༔ གངས་དཀར་མཐོན་པོའི་རྩེ་མོ་ནས༔ ཡུལ་ལྷ་གཉན་པོ་སྐུ་བཞེངས་ཤིག༔ སྤྲིན་དང་ན་བུན་གསེབ་ཤེད་ནས༔ ཟུར་ཕུད་ལྔ་པ་སྐུ་བཞེངས་ཤིག༔ སྡང་བའི་དགྲ་འདུལ་སྐུ་བཞེངས་ཤིག༔ གནོད་པའི་བགེགས་འདུལ་སྐུ་བཞེངས་ཤིག༔ སྨྱོ་བའི་འདྲེ་འདུལ་སྐུ་བཞེངས་ཤིག༔ སྤྲུལ་པའི་ཚུལ་དུ་སྐུ་བཞེངས་ཤིག༔ སྤྲུལ་པ་འཇིགས་པའི་ལུས་པོ་དེ༔ ལྷ་གཡག་དཀར་པོ་གཅིག༔ དུང་རུ་གནམ་དུ་གཡུག༔ དུང་རུ་དཀར་པོ་གཅིག༔ གནམ་གྱི་བདུད་ལ་བསྒྱུར༔ མིག་བཞི་ས་ལ་འཁྲབ༔ དུང་རྨིག་དཀར་པོ་ཡིས༔ ལྷ་སྲིན་དམྱལ་ཐག་གཅོད༔ རྔ་མ་ནམ་མཁར་གཡུགས༔ རྔ་དཀར་སྤྲུགས་པ་ཡིས༔ ལྷ་བཙན་བྲན་དུ་འཁོར༔ ངར་སྐད་ཐང་གསུམ་ངར༔ ཁམས་གསུམ་དབང་དུ་སྡུད༔ རུ་གསིགས་ལན་གསུམ་སྤྲུགས༔ སྲིད་གསུམ་དབང་དུ་སྡུས༔ མཐོན་པོ་གངས་གསུམ་ནས༔ དུང་ཁྲ་མེལ་ཚེ་བཞིན༔ དུང་ཁྲ་དཀར་པོ་གཅིག༔
ཉ་ལེ་ཁྲི་ལི་ལི༔ ར་དང་ཕྲག་མགོ་ནས་དུང་རྐྱང་དཀར་པོ་གཅིག༔ དགྲ་བགེགས་བླ་ལ་རྒྱུགས༔ དྲག་ཏུ་བསྐུལ་བའི་ཚེ༔ སྡང་བའི་དགྲ་བོ་སོད༔ གནོད་པའི་བགེགས་རྣམས་ཐུལ་རྒྱལ་འགོང་དམ་སྲི་ཐུལ༔ གདུག་འདྲེ་འགོང་པོ་ཐུལ༔ སྨྱོ་འབོག་བརྒྱལ་ནད་ཐུལ༔ བཅོལ་བའི་ཕྲིན་ལས་མཛོད༔ ཨོཾ་བཛྲ་ཀྲོ་ཏ་ན་ཤི་ལི་ཤི་ལི༔ དུ་དགྲ་བགེགས་མཱ་ར་ཡ་ཕཊ༔ ཅེས་སྔགས་ལན་བདུན་དང་༔ ཨོཾ་ཨཱཿཧཱུྃ་ཧྲཱིབཛྲ་འབར་བ་རྩལ་བིག་ནཱན་རཱ་ཛ་མཱ་ར་ཡ་ཕཊ༔ ཅི་ནུས་བཟླའོ༔ སྐུ་དང་རྟེན་རྫས་ལ་བསྟིམ་མམ༔ གཤེགས་པ་གང་འདོད་དམིགས༔ དགོངས་གཏེར་སྒྲུབ་ཐབས་ལ་གཞི་བྱས༔ བྱང་གཏེར་དང་ནམ་མཁའ་འཇིགས་མེད་གནམ་ཆོས་དང་༔ ཞྭ་དམར་དྲུག་པས་མཛད་པ་སོགས་གོ་བསྟུན་ཏེ༔ ཤིང་སྦྲུལ་གྲོ་ཞུན་ཟླ་བའི་ཡར་ཚེས་བཅུའི་ཉིན་ལ་དམ་སྲིས་གནོད་པས་གྲྭ་སློབ་རྣམས་ལ་སྙིང་རླུང་ལྡང་བ་མང་པོ་དུས་གཅིག་བྱུང་བས་བྲིས་པ་ལ་ཉེས་འགལ་གང་མཆིས་ན་སྡེ་བརྒྱད་ཤན་པ་དམར་པོར་བཤགས་ཤིང་༔ དགེ་བས་སེམས་ཅན་ཐམས་ཅད་སྨྱོ་འབོག་གི་གནོད་པ་ཞི་བར་གྱུར་ཅིག༔ ཅེས་སྔགས་འཆང་རཱ་ག་ཨ་སྱས་བསྒྲིགས་པ་མངྒ་ལཾ༔
སྔོན་ཚེ་རྒྱལ་བའི་ཞལ་མཐོང་རྫུ་འཕྲུལ་ཅན། །གངས་ཅན་སྲུང་མ་ཐང་ལྷ་གཉན་པོ་ལ། །རྟག་ཏུ་གུས་པས་མཆོད་ཅིང་བསྟོད་ལགས་ན། །སྲུང་སྐྱོབ་སྡོང་གྲོགས་ཡིད་བཞིན་འགྲུབ་པར་མཛོད། །ཨ་རཱ་གས་སོ།། ༧ །ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།