བཅུ་དགུ་པ། སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ངེས་པར་བསྟན་པའི་ལེའུ།
དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་ལས་ཡོན་ཏན་གྱི་ཕན་ཡོན་བསམ་གྱིས་མི་ཁྱབ་ཅིང་དཔག་ཏུ་མེད་པ་ཐོས་ནས་མི་སྐྲག་པར་འདོད་པ་དང་མི་དངང་བར་འདོད་པ་དང་དངང་བར་མི་འགྱུར་བར་འདོད་པས་སངས་རྒྱས་ཀྱི་ཆོས་བསམ་གྱིས་མི་ཁྱབ་པ་བསྟན་པ་ལ་མཁས་པར་བྱའོ། །སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ལ་མོས་པར་བྱའོ། །སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ཡོངས་སུ་དྲི་བ་ལ་མཁས་པར་བྱའོ། །སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ཡོངས་སུ་བཙལ་བ་ལ་མཁས་པར་བྱའོ། །སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ཐོས་ནས་མི་སྐྲག །མི་དངང་དངང་བར་མི་འགྱུར་བར་བྱའོ། །དེ་སྐད་ཅེས་བཀའ་
སྩལ་པ་དང་། ཟླ་འོད་གཞོན་ནུར་གྱུར་པས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟ་ཇི་ལྟ་བུར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཆོས་བསམ་གྱིས་མི་ཁྱབ་པ་བསྟན་པ་ལ་མཁས་པ་ལགས། སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ལ་མོས་པ་དང་སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ཡོངས་སུ་འདྲི་བ་ལ་མཁས་པ་དང་སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ཐོས་ན་མི་སྐྲག་མི་དངང་དངང་བར་མི་འགྱུར་བ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་འདི་ཉན་ཅིང་ཐོས་ནས་ཀྱང་འཛིན་པ་དང་ཀུན་ཆུབ་པར་བྱེད་པ་དང་འཆང་བ་དང་ཀློག་པ་དང་རབ་ཏུ་འདོན་པ་དང་ཉོན་མོངས་པ་མེད་པར་བསྒོམ་པས་སྒོམ་པར་བྱེད་པ་དང་། མང་དུ་བྱེད་པ་དང་། གཞན་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་ན་གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་སངས་རྒྱས་ཀྱི་ཆོས་བསམ་གྱིས་མི་ཁྱབ་པ་བསྟན་པ་ལ་མཁས་པར་འགྱུར་རོ། །སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ལ་མོས་པ་དང་སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ཡོངས་སུ་འདྲི་བ་ལ་མཁས་པ་དང་སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ཐོས་ན་མི་སྐྲག་མི་དངང་དངང་བར་མི་འགྱུར་རོ། །ཡང་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་ལས་ཡོན་ཏན་གྱི་ཕན་ཡོན་བསྒྲུབ་པའི་ཚིག་འདི་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་ངེས་པར་བསྟན་པ་ན་ཟླ་འོད་གཞོན་ནུར་གྱུར་པས་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་ལས་ཡོན་ཏན་གྱི་ཕན་ཡོན་བསྒྲུབ་པའི་ཚིག་དཔག་ཏུ་མེད་པ་བསམ་གྱིས་མི་ཁྱབ་པ་བཅོམ་ལྡན་འདས་ལས་ཐོས་ནས་དེའི་ཚེ་ཟླ་འོད་གཞོན་ནུར་གྱུར་པས་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་གྱི་རྒྱལ་པོ་འདི་རབ་ཏུ་ཐོབ་བོ། །བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་དཔག་ཏུ་མེད་པ་ཡང་མངོན་པར་ཤེས་
པ་ཆེན་པོ་ཐོབ་པར་གྱུར་ཏོ། །སེམས་ཅན་དཔག་ཏུ་མེད་པ་ཡང་སྙིང་རྗེ་ཆེན་པོར་འཇུག་པ་ལ་མངོན་དུ་ཕྱོགས་པའི་སེམས་སྐྱེས་སོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་རྣམ་པ་དྲུག་ཏུ་གཡོས། རབ་ཏུ་གཡོས། ཀུན་ཏུ་རབ་ཏུ་གཡོས། འགུལ་རབ་ཏུ་འགུལ་ཀུན་ཏུ་རབ་ཏུ་འགུལ། ལྡེག་རབ་ཏུ་ལྡེག་ཀུན་ཏུ་རབ་ཏུ་ལྡེག །འཁྲུགས་རབ་ཏུ་འཁྲུགས་ཀུན་ཏུ་རབ་ཏུ་འཁྲུགས། ཆེམ་ཆེམ་རབ་ཏུ་ཆེམ་ཆེམ་ཀུན་ཏུ་རབ་ཏུ་ཆེམ་ཆེམ། འུར་འུར་རབ་ཏུ་འུར་འུར་ཀུན་ཏུ་རབ་ཏུ་འུར་འུར། ཤར་ཕྱོགས་དམའ་ན་ནུབ་ཕྱོགས་མཐོ། ནུབ་ཕྱོགས་དམའ་ན་ཤར་ཕྱོགས་མཐོ། བྱང་ཕྱོགས་དམའ་ན་ལྷོ་ཕྱོགས་མཐོ། ལྷོ་ཕྱོགས་དམའ་ན་བྱང་ཕྱོགས་མཐོ། མཐའ་དམའ་ན་དབུས་མཐོ། དབུས་དམའ་ན་མཐའ་མཐོ་ཞིང་། སྣང་བ་དཔག་ཏུ་མེད་པ་ཡང་འཇིག་རྟེན་དུ་བྱུང་། ལྷའི་སྤོས་ཀྱི་ཆར་ཆེན་པོ་ཡང་མངོན་པར་བབ་བོ། །ལྷ་དང་ལྷའི་བུ་ཇི་སྙེད་ཆོས་མཉན་པའི་ཕྱིར་འདུས་ཏེ་ལྷགས་པ་དེ་དག་ནམ་མཁའ་ལ་མངོན་པར་འཕགས་ནས་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་ལས་ཡོན་ཏན་གྱི་ཕན་ཡོན་གྱི་ཚིག་དཔག་ཏུ་མེད་པ་འདི་དག་ཐོས་ནས་ལྷ་དང་ལྷའི་བུ་དེ་དག་ཐམས་ཅད་དགའ་མགུ་ཡི་རངས་ཏེ། རབ་ཏུ་དགའ་བ་དང་ཚིམ་པ་དང་ཡིད་བདེ་བ་སྐྱེས་ནས་ཨ་ལ་ལ་ཞེས་ག་ཞ་སྒྲོགས་པའི་སྒྲ་བྱེད་དོ། །ལྷའི་མེ་ཏོག་རྣམ་པ་སྣ་ཚོགས་ཀྱི་མེ་ཏོག་གི་ཆར་ཆེན་པོ་འབེབས་སོ། །ལྷའི་སིལ་སྙན་བྱེ་བ་ཁྲག་ཁྲིག་བརྒྱ་སྟོང་དུ་མ་ཡང་རབ་ཏུ་རྡུང་ངོ་། །བརྗོད་པ་གཅིག་པའི་དབྱངས་ཀྱིས་ཚིག་འདི་སྐད་ཅེས་འཛེར་ཏོ། །ཨ་ལ་ལ་བདག་ཅག་གིས་ནི་རྙེད་པ་ལེགས་པར་རྙེད་དེ། འདི་ལྟར་བདག་ཅག་གིས་བཅོམ་ལྡན་འདས་ལས་ཡོན་ཏན་གྱི་ཕན་ཡོན་བསྒྲུབ་པའི་ཚིག་དཔག་ཏུ་མེད་པ་འདི་དག་ཐོས་ནས་བཅོམ་ལྡན་འདས་བདག་ཅག་ཐམས་ཅད་ཀྱང་ཅིག་ཆར་འཐུན་པར་བྱང་ཆུབ་སེམས་དཔའ་སེམས་དཔའ་ཆེན་པོ་ཟླ་འོད་གཞོན་ནུར་གྱུར་པས་ཇི་ལྟར་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་འདི་ཐོབ་པ་དེ་བཞིན་དུ། བཅོམ་ལྡན་འདས་བདག་ཅག་ཐམས་ཅད་ཀྱིས་ཀྱང་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་འདི་
ཐོབ་པར་བགྱིའོ། །དེ་ནས་དེའི་ཚེ་བྱ་རྒོད་ཀྱི་ཕུང་པོའི་རི་ལ་བཅོམ་ལྡན་འདས་འཁོར་རྒྱ་མཚོའི་ནང་ན་ཆོས་སྟོན་པ་ལ་དྲི་ཟའི་བུ་གཙུག་ཕུད་ལྔ་ཅན་ཞེས་བྱ་བ་རིམ་གྲོ་དང་བསྙེན་བཀུར་བྱ་བའི་ཕྱིར་སིལ་སྙན་ལྔ་བརྒྱ་དང་བཅས་ཏེ་ནམ་མཁའ་ལས་བབས་ནས་བཅོམ་ལྡན་འདས་ཀྱི་སྤྱན་སྔར་འདུག་གོ །དེ་ནས་དྲི་ཟའི་བུ་གཙུག་ཕུད་ལྔ་ཅན་འདི་སྙམ་དུ་སེམས་ཏེ། བདག་ཅག་གིས་སུམ་ཅུ་རྩ་གསུམ་པའི་ལྷ་རྣམས་དང་ལྷའི་དབང་པོ་བརྒྱ་བྱིན་གྱི་ལྷའི་མདུན་ས་ཆོས་བཟང་ན་ཇི་ལྟ་བ་བཞིན་དུ་རིམ་གྲོ་དང་བསྙེན་བཀུར་བྱའོ། །གླུ་དབྱངས་དག་ཇི་ལྟར་ལེན་པ་དེ་བཞིན་དུ་དེང་ལྷའི་ལྷ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཡང་མཆོད་པའི་ཕྱིར་གླུ་དབྱངས་རབ་ཏུ་སྦྱར་རོ། །དེ་ནས་དྲི་ཟའི་བུ་གཙུག་ཕུད་ལྔ་ཅན་སིལ་སྙན་ཐོགས་པ་ལྔ་བརྒྱ་པོ་དེ་དག་དང་སྒྲ་གཅིག་ཏུ་སྦྱར་ཏེ། པི་བང་གི་ཁོག་པ་བཻ་དཱུཪྱ་ལས་བྱས་པ་དག་ཀྱང་ཐོགས་ནས་བཅོམ་ལྡན་འདས་ཀྱི་སྤྱན་སྔར་བླངས་སོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། རྫུ་འཕྲུལ་མངོན་པར་འདུ་བྱ་བ་ཇི་ལྟ་བུ་མངོན་པར་འདུ་བྱས་པས་ཟླ་འོད་གཞོན་ནུར་གྱུར་པ་སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ངེས་པར་རྟོགས་པ་ལ་མཁས་པ་འཐོབ་པ་དང་། ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་ལས་མི་གཡོ་བ་དང་། དྲི་ཟའི་བུ་གཙུག་ཕུད་ལྔ་ཅན་ལ་ཡང་རྒྱུད་ཀྱི་སྒྲ་དང་གླུའི་སྒྲ་ལ་མཁས་པ་བསྟན་པར་འགྱུར་བ་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་ངས་བྱའོ་སྙམ་མོ། །དེ་ནས་བཅོམ་ལྡན་འདས་ཀྱིས་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་མཛད་དེ། སངས་རྒྱས་ཀྱི་མཐུས་སིལ་སྙན་ལྔ་བརྒྱ་པོ་ཤིན་ཏུ་ལེགས་པར་སྦྱར་བ། ལེགས་པར་བླངས་པ་དེ་དག་ལས་བསམ་གྱིས་མི་ཁྱབ་པའི་དོན་དང་ལྡན་པ་ཆོས་ཉིད་དང་ལྡན་པའི་སྒྲ་བྱུང་ངོ་། །སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ངེས་པར་རྟོགས་པའི་ཚིགས་སུ་བཅད་པ་འདི་དག་ཀྱང་བྱུང་ངོ་། །སྐྲ་གཅིག་ཁྱོན་ལ་སངས་རྒྱས་མང་པོ་ནི། །གང་གཱའི་ཀླུང་གི་བྱེ་མ་ཅི་ཡོད་སྙེད། །རྒྱལ་བ་དེ་དག་ཞིང་ཡང་དེ་སྙེད་དེ། །དེ་དག་མཚན་ཉིད་མི་འདྲ་སྐལ་མི་མཉམ། །སྐྲ་ཡི་ཁྱོན་ལ་འགྲོ་བ་ལྔ་རྣམས་ཏེ། །སེམས་ཅན་དམྱལ་དང་དུད་འགྲོར་
འགྲོ་བ་དང་། །གཤིན་རྗེའི་འཇིག་རྟེན་ལྷ་དང་མི་རྣམས་ཞུགས། །འདྲེས་པ་མེད་ཅིང་གནོད་པར་འགྱུར་བའང་མེད། །དེ་ཡི་གནས་སུ་མཚོ་དང་རྒྱ་མཚོར་བཅས། །ཆུ་ཀླུང་དེ་བཞིན་མཚེའུ་དང་ལྟེང་ཀ་རྣམས། །འདྲེས་པ་མེད་ཅིང་གནོད་པར་མི་འགྱུར་ཏེ། །དེ་ལྟར་རྒྱལ་བའི་ཆོས་ནི་བསམ་མི་ཁྱབ། །དེ་ཡི་གནས་སུ་རི་བོ་དུ་མ་སྟེ། །ཁོར་ཡུག་དང་ནི་ལྷུན་པོ་རབ་ལྷུན་དང་། །བཏང་བཟུང་དང་ནི་བཏང་བཟུང་ཆེན་པོ་དང་། །འབིགས་བྱེད་བྱ་རྒོད་ཕུང་པོ་གངས་ཀྱི་རི། ། གནས་དེར་སེམས་ཅན་དམྱལ་བ་མི་བཟད་པ། །ཚ་དང་རབ་ཏུ་ཚ་བ་ཉམས་མི་དགའ། །དེ་ན་སེམས་ཅན་དམྱལ་སྐྱེས་ཚོར་བ་ཡི། །སྡུག་བསྔལ་དེ་དག་རྗེས་སུ་མྱོང་བར་བྱེད། །དེ་ཡི་གནས་ན་ལྷ་ཡི་གཞལ་མེད་ཁང་། །དེ་དག་དཔག་ཚད་བཅུ་གཉིས་དབྱངས་དགའ་བ། །ལྷ་རྣམས་སྟོང་ཕྲག་མང་པོ་དེ་དག་ཀྱང་། །ལྷ་ཡི་དགའ་བ་ཤིན་ཏུ་བདེ་བ་མྱོང་། །དེ་ཡི་གནས་སུ་སངས་རྒྱས་རྣམས་སྐྱེ་ཞིང་། །འཇིག་རྟེན་རིག་པའི་བསྟན་པ་འབར་བ་སྣང་། །གང་གིས་རྣམ་དག་སྤྱོད་པ་མ་སྦྱངས་པ། །ཡེ་ཤེས་བྲལ་བ་དག་གིས་དེ་མི་མཐོང་། །དེ་ཡི་གནས་ཉིད་ན་ཡང་ཆོས་ནུབ་ཅིང་། །འདྲེན་པ་མྱ་ངན་འདས་པའི་སྒྲ་ཡང་ཐོས། །དེ་ཡི་གནས་ཉིད་ན་ཡང་ལ་ལ་ཡིས། །འདྲེན་པ་བཞུགས་ཏེ་ཆོས་ཀྱང་སྟོན་ཅེས་ཐོས། །དེ་ཡི་གནས་ཉིད་ན་ཡང་ལ་ལ་དག །ཚེ་ཚད་ལོ་ནི་བསམ་ཡས་བཞུགས་སྙམ་འཛིན། །དེ་ཡི་གནས་ནའང་འཆི་བའི་དུས་བྱེད་ཅིང་། །རིང་དུ་མི་འཚོ་ཞེས་ནི་སྒྲ་ཡང་ཐོས། །གནས་དེར་ལ་ལ་འདི་སྙམ་འདུ་ཤེས་ཏེ། །ཡིད་ཀྱི་འདུ་ཤེས་དང་ནི་འཛིན་པ་ཡིས། །བདེ་གཤེགས་མཐོང་མཆོད་སངས་རྒྱས་མཉེས་བྱས་སྙམ། །སྐྱེས་པ་མེད་ཅིང་མཆོད་པ་བྱས་པའང་མེད། །མི་དག་བདག་གི་ཁྱིམ་ན་རྨི་ལམ་བཞིན། །འདོད་པའི་ཡོན་ཏན་དག་ལ་དགའ་མྱོང་ནས། །ཕྱིར་སད་ནས་ཀྱང་དེ་ཡིས་གདོད་མ་མཐོང་། །དེ་ནི་རྨི་ལམ་ཡིན་པར་དེ་ཡིས་ཤེས། །དེ་བཞིན་མཐོང་ཐོས་རིག་དང་བྱེ་བྲག་ཕྱེད། །འདི་དག་ཐམས་ཅད་མི་བདེན་རྨི་ལམ་བཞིན། །གང་གིས་ཏིང་འཛིན་འདི་ཡང་ཐོབ་གྱུར་པ། །དེས་ནི་ཆོས་ཀྱི་རང་བཞིན་འདི་དག་ཤེས། །སུ་ལའང་སྡུག་དང་མི་སྡུག་མེད་པ་ནི། །མི་དེ་འཇིག་རྟེན་ན་ཡང་བདེ་
སྐྱིད་རྟག །སུ་དག་ནགས་ཁྲོད་མངོན་པར་དགའ་བ་ཡི། །དགེ་སྦྱོང་དེ་ནི་ཤིན་ཏུ་བདེ་བ་མྱོང་། །སུ་དག་ཅི་ལའང་བདག་གིར་བྱ་བ་མེད། །ཡོངས་སུ་འཛིན་པ་རྣམ་པ་ཀུན་ཏུ་སྤངས། །བསེ་རུ་བཞིན་དུ་འཇིག་རྟེན་འདི་ན་གནས། །ནམ་མཁའ་ལ་ནི་རླུང་དག་རྒྱུ་བ་བཞིན། །ལམ་རྣམས་བསྒོམས་ཤིང་ཡེ་ཤེས་རབ་ཏུ་ཞུགས། །ཆོས་རྣམས་ཐམས་ཅད་སྟོང་པ་བདག་མེད་པར། །ཆོས་རྣམས་འདི་དག་གང་གིས་རབ་བསྒོམས་པ། །དེ་ཡི་སྤོབས་པ་དག་ནི་མཐའ་ཡས་འགྱུར། །སུ་དག་འཇིག་རྟེན་ན་ནི་ཡིད་ཆགས་མེད། །དེ་དག་སེམས་ནི་རྟག་ཏུ་རླུང་དང་འདྲ། །སྡུག་དང་མི་སྡུག་ལ་ཡང་ཆགས་པ་མེད། །འཇིག་རྟེན་ན་ནི་མི་དེ་ཤིན་ཏུ་སྐྱིད། །མི་སྡུག་པ་དང་འགྲོགས་པ་སྡུག་བསྔལ་ཏེ། །སྡུག་པ་དང་ཡང་བྲལ་བ་སྡུག་བསྔལ་ཡིན། །མཐར་བྱས་འདི་གཉིས་རབ་ཏུ་སྤངས་ནས་ནི། །མི་གང་ཆོས་ལ་དགའ་བ་དེ་དག་སྐྱིད། །གང་ཞིག་ཆོས་འདི་ཐོས་ནས་ཆགས་བྱེད་ཅིང་། །ཆོས་མ་ཡིན་པ་ཐོས་ནས་ཁོང་ཁྲོ་བྱེད། །ང་རྒྱལ་རྒྱགས་པས་བཅོམ་པ་ལོག་པ་དེ། །ང་རྒྱལ་དབང་གིས་སྡུག་བསྔལ་རྗེས་སུ་མྱོང་། །སུ་དག་མཉམ་པ་ཉིད་ལ་རབ་གནས་ཏེ། །རྟག་ཏུ་ཁེངས་པ་མེད་ཅིང་འདུད་པ་མེད། །སྡུག་དང་མི་སྡུག་པ་ལས་རབ་གྲོལ་བ། །དེ་དག་རྟག་ཏུ་གྲོལ་ཡིད་ལེགས་པར་གནས། །ཚུལ་ཁྲིམས་ཡོངས་སུ་དག་པར་རབ་གནས་ཏེ། །བསམ་གཏན་བསམ་མི་ཁྱབ་ལ་རྟག་གནས་ཤིང་། །སུ་དག་ནགས་ཁྲོད་ཞི་བར་དགའ་བ་ནི། །དེ་དག་ནམ་ཡང་ཡིད་གཉིས་ཡོང་མི་འགྱུར། །མི་བདེན་པ་ལ་སུ་དག་རབ་ཞུགས་ཤིང་། །བྱིས་པ་འདོད་པའི་ཡོན་ཏན་རྟག་ཏུ་དགའ། །བྱ་རྒོད་དག་ནི་རོ་ལ་མོས་པ་བཞིན། །དེ་དག་རྟག་པར་བདུད་ཀྱི་དབང་དུ་འགྲོ། །ཡང་པི་བང་གི་སྒྲ་དེ་ལས་ཚིགས་སུ་བཅད་པ་མངོན་པར་བསྒྲུབ་པ་འདི་བྱུང་ནས་ཟླ་འོད་གཞོན་ནུར་གྱུར་པས་སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ཟབ་མོ་ངེས་པར་རྟོགས་པ་ལ་མཁས་པ་རྗེས་སུ་ཐོབ་བོ། །དྲི་ཟའི་བུ་གཙུག་ཕུད་ལྔ་ཅན་ཡང་སྒྲའི་རྗེས་སུ་འགྲོ་བའི་བཟོད་པ་ཐོབ་པར་གྱུར་ཏོ། །ལྷ་དང་མི་ཡི་སྐྱེ་དགུ་སེམས་ཅན་དཔག་ཏུ་མེད་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་
སྐྱེས་སོ། །སེམས་ཅན་དཔག་ཏུ་མེད་པ་རྣམས་ཀྱི་ཡང་དོན་བྱས་པར་གྱུར་ཏོ། །སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ངེས་པར་བསྟན་པའི་ལེའུ་སྟེ་བཅུ་དགུ་པའོ།། །།