རྒྱ་བལ་མཚམས་ཀྱི་དབེན་གནས་ཚེ་རིང་ལྗོངས་ལ་བསྔགས་པ་རོལ་མོ་དབྱངས་སྙན།
རྒྱ་བལ་མཚམས་ཀྱི་དབེན་གནས་ཚེ་རིང་ལྗོངས་ལ་བསྔགས་པ་རོལ་མོ་དབྱངས་སྙན་ཞེས་བྱ་བ་བཞུགས་སོ། །ན་མོ་གུ་རུ་བྷྱ། རྩ་བརྒྱུད་བླ་མ་ཡི་དམ ལྷ། །གནས་ཡུལ་ཞིང་སྐྱོང་མཁའ་འགྲོ་མར། །གུས་པས་འདུད་དོ་བརྩེར་དགོངས་ལ། །བྱིན་རླབས་དབང་དང་དངོས་གྲུབ་སྩོལ། །རྒྱལ་བས་བསྔགས་པའི་དབེན་གནས་མཆོག །ཚེ་རིང་ལྗོངས་ཞེས་མཚན་གསོལ་བ། །གནས་སའི་དཔྱད་བཟང་ཡོན་ཏན་ཀུན། །མ་ཚང་མེད་པས་རབ་བརྒྱན། །རྒྱབ་རི་བྲག་དཀར་རྩེ་རྒྱལ་མཐོ། །ལྷོ་རི་མདུན་ནས་འདུད་པའི་དབྱིབས། །ཤར་རི་མདའ་སྟོང་ཡོན་ཏན་སྒོ། །ནུབ་རི་ནོར་བུའི་གཟུགས་སུ་ཟླུམ། །ལྗོན་ཤིང་ནགས་ཚལ་ལྷུན་འཐུག་རྒྱས། །རྫ་ཆབ་སྔོན་མོ་ལྷུང་ལྷུང་འབབ། །བྱ་དང་བྱིའུས་སྐད་སྙན་སྒྲོགས། །གཅན་གཟན་རི་དྭགས་བག་
ཕེབས་གནས། །སྨན་སྤོས་མེ་ཏོག་དྲི་བསུང་འཐུལ། །སྟག་ཆུང་བུང་བ་འཕུར་ལྡིང་རྩེ། །དགྲ་རྐུན་འཇིགས་པའི་འཚེ་བ་དབེན། །ཟྭ་དང་རུག་པ་དྭ་བ་སོགས། །ཆོས་མཐུན་ཟས་སྣ་མཐུན་རྐྱེན་འཛོམས། །ཆུ་ཤིང་འབད་མེད་ལྷུན་གྱིས་གྲུབ། །ཉམས་དགའ་བག་ཕེབས་རིག་པ་དྭངས། །ནམ་མཁའ་དམའ་བའི་ཕྱོགས་གསལ་བས། །འོད་གསལ་ཐོད་རྒལ་ལྟ་བ་དང་། །ནམ་མཁའ་སུམ་ཕྲུག་ཉམས་ལེན་ཚེ། ནམ་མཁའ་སུམ་ཕྲུག་ཉམས་ལེན་ཚེ། །འདི་འདྲའི་གནས་ཤིག་མེད་ཐབས་མེད། །སྤྱིར་ན་བྱང་ཆུབ་བསྒྲུབ་པ་ལ། །གནས་འདི་ལྷ་ཡུལ་ལས་ཀྱང་ལྷག །རི་ཁྲོད་འགྲིམ་པའི་ཆ་རྐྱེན་དུ། །ད་རེས་འབད་མེད་སྟེས་དབང་རྙེད། །སླད་ནས་ས་འདིར་སྒྲུབ་པ་པོས། །རི་སུལ་གང་བའི་རྟེན་འབྲེལ་ཡོད། སྲོང་རི་ཡི་ནགས་ཁྲོད་འདི། །སྔོན་ཆད་རྒྱལ་དང་རྒྱལ་བའི་
སྲས། །དྲང་སྲོང་རིག་འཛིན་གྲུབ་པ་ཡིས། །བྱིན་གྱིས་བརླབས་པས་བཀྲ་ཤིས་ལ། །ཞལ་དྲོ་ཚེ་རིང་ནད་དཀོན་ཞིང་། །བག་དྲོ་བྱིན་ཆགས་ཉམས་རྟོགས་འཕེལ། །ལྷ་དང་སྲུང་མ་ནགས་གཞིའི་བདག །དཀར་ཕྱོགས་སྐྱོང་བས་དུས་རྟག་ཏུ། །མགོན་སྐྱབས་སྡོང་གྲོགས་མེལ་ཚེ་བྱེད། །གྲོགས་དག་འདི་སྣང་འཁོར་བ་ལ། །སྙིང་པོ་མེད་པ་རྩྭ་རྩེའི་ཟིལ། །མཚུངས་ལ་མ་ཆགས་མ་ཞེན་པར། །གནས་མཆོག་ངོ་མཚར་ཁྱད་འཕགས་པ། །འདི་འདྲར་མྱུར་ལམ་རྫོགས་པ་ཆེ། །བསྒོམ་སྟེ་ཚེ་གཅིག་ལུས་གཅིག་ལ། །ཟག་བཅས་འོད་སྐུར་སྒྲུབས་ཤིག་ཅེས། །སྤྲང་རྒན་ཁོ་བོས་གཞེན་བསྐུལ་འདེབས། །དགེ་བས་མ་རྒན་ཁམས་གསུམ་འགྲོ། །ཐམས་ཅད་ཕྱམ་གཅིག་རྫོགས་འཚང་རྒྱས། །སྲིད་པ་ལན་གཅིག་
སྟོངས་གྱུར་ནས། །ཆོས་སྐུའི་རྒྱལ་སྲིད་བརྟན་གྱུར་ཅིག །ཅེས་རབ་ཚེས་ལྕགས་ལུག་ཟླ་༢ཚེས་༦ལ་བྱ་བྲལ་རིག་པ་འཛིན་པ་ཁྲོ་རྒྱལ་རྡོ་རྗེས་ཐོལ་བྱུང་དུ་ཤར་མར་བྲིས་པ་དགེ་ལེགས་འཕེལ།།
ན་མོ་གུ་རུ། རྗེ་མཚན་ལྡན་གྱི་བླ་མ་རྡོ་རྗེ་འཛིན། །ཕ་དྲན་མཆོག་ངག་དབང་དཔལ་བཟང་པོ། །བུ་ལེ་ལོ་ཅན་ལ་བརྩེར་དགོངས་ནས། །རྒྱུད་སྨིན་ཅིང་གྲོལ་བར་བྱིན་གྱིས་རློབས། །སྤྲང་རྣལ་འབྱོར་ངས་མ་ཕྱིན་དགུ་ཅིག་ཕྱིན། །སྤྲེལ་གནམ་ལྕགས་ཁམས་སུ་རྩེ་བའི་ལོ། །དུས་སྟོན་གྱི་རྒྱལ་མོའི་ཐ་ཆུང་ལ། །ཡུལ་སྔར་མ་མཐོང་བ་འདི་འདྲར་སླེབས། །གནས་བལ་བོད་གཉིས་ཀྱི་སོ་མཚམས་ན། །སྔོན་ཨོ་རྒྱན་མཚོ་སྐྱེས་རྡོ་རྗེ་དང་། །རྗེ་མི་ལ་བཞད་པ་རྡོ་རྗེའི་ཞབས། །དཔལ་རྒོད་ཚང་མགོན་པོ་རྡོ་རྗེ་སྟེ། །ཁོང་རྡོ་རྗེའི་མཚན་ཅན་རྣམ་གསུམ་དང་། དེར་མ་ཟད་རང་རིག་རས་པ་རྗེ། །རྗེ་བྱ་བཏང་སྟག་རྩེ་མི་ཕམ་ཞབས། །མཆོག་གྲུབ་བརྙེས་སྒྲུབ་བརྒྱུད་གོང་མ་ཡིས། །ཞབས་བཅགས་ཤིང་བྱིན་གྱིས་བརླབས་པའི་གནས། །
མཚན་གསོལ་ན་ཨོ་རྒྱན་ཆོས་སྡིངས་ཟེར། །གནས་འདི་ཡི་ཡོན་ཏན་ཆ་ཤས་ཙམ། །ཡིད་དྭངས་སྤྲོས་བསྐུལ་ནས་དབྱངས་སུ་ལེན། །དབུས་རྒྱབ་རི རྒྱལ་པོ་གདན་བཞུགས་འདྲ། །བྲག་བརྗིད་མཐོ་ནམ་མཁའི་མཐོངས་ལ་སྙེགས། །གཡས་རིན་ཆེན་སྤུངས་པ་ལྟ་བུ་དང་། །གཡོན་མཚོན་ཆ་གནམ་དུ་བསྒྲེང་འདྲའི་རི། །མདུན་གཉའ་ནང་གཙང་ཆབ་སྔོ་ལྗང་རྒྱུན། །ཆུ་རྦ་རླབས་མཁའ་ལ་འཕྱོ་བཞིན་དུ། ྋ །བྱང་དེ་ནས་རྒྱ་བལ་ཕྱོགས་སུ་འགྲོ། །མདུན་ཕྱོགས་ཀྱི་ཤར་རི་ནགས་ཀླུང་འཐུག །མི་ཕལ་པས་བགྲོད་དཀའ་འཇིགས་ཟིལ་ཆེ། །ལྷོ་བྱང་གི་རི་ཕྲན་ཕྱག་རྒྱ་བསྣོལ། །འོག་སྲ་མཁྲེགས་བྲག་གི་བ་གམ་སྟེང་། །ཐང་རྒྱ་ཁྱོན་མཉམ་པ་བདེ་ཞིང་ཡངས། །གནས་འདི་ཡི་གཡས་དང་གཡོན་ཕྱོགས་ཀྱི། །གཤོངས་གཉིས་ནས་གཙང་ཞིང་བསིལ་བའི་
ཆུ། །སྒྲ་ལྷུང་ལྷུང་དང་བཅས་དབང་ཕྱོགས་འབབས། །གཞན་ཕྱོགས་ཀྱི་རི་རྣམས་སྤང་དང་ནགས། །བྲག་གཟུགས་བརྙན་སྣ་ཚོགས་སྤེལ་མར་མཛེས། །བྱ་བྱིའུའི་མགྲིན་གླུ་རོལ་མོ་སྙན། །མདངས་མཛེས་སྡུག་མེ་ཏོག་སྣ་ཚོགས་འཁྲུངས། །འབུ་བུང་བ་དགའ་བའི་འཕུར་ལྡིང་གཡོ། །དགྲ་རྐུན་དང་གཅན་གཟན་འཚེ་བ་བྲལ། །ས་བསིལ་དྲོད་རན་པས་གོས་སློག་གི། །རྩོལ་སྒྲུབ་ལ་ཤ་ཐང་ཆད་མི་དགོས། །ཡུལ་རོང་འབྲོག་གཉིས་ཀའི་ཟས་སྣ་འཛོམས། །ལར་ལྟོ་ཕྱིར་རྒྱུག་འདུར་ཆེར་མི་དགོས། །ཆུ་མེ་ཤིང་འབོལ་འདི་སོ་རེ་གསོད། །གནས་མོས་པའི་ཡོན་ཏན་ཀུན་ཚང་བ། །ཕྱོགས་གང་ནའང་འདི་འདྲ་རྙེད་པར་དཀའ། །དོན་དེ་ཕྱིར་ཆོས་མཛད་ཕོ་མོ་རྣམས། །ཡུད་ཙམ་གྱི་འདི་སྣང་འཁོར་བ་ལ། །ཞེ་ཆགས་ཞེན་འཁྲི་
བ་རྦད་བཅད་ནས། །ཚེ་མི་རྟག་འཆི་དྲན་གྱི་བསྐུལ་ལྕག་ཐོབ། །བློ་ཙབ་ཙུབ་མང་པོའི་ཁ་ན་མེད། །འཁོར་འདས་ཀྱི་འཁྲུན་ཐག་ཆོད་པ་ལ། །ཆོས་བྱར་མེད་རྫོགས་པ་ཆེན་པོ་ཡི། །དོན་བློ་འདས་གཉུག་མའི་རང་ཞལ་བསྐྱང་། །ལམ་འདི་ལས་ཉེ་བ་ཞིག་རྒྱལ་བས་ཀྱང་། །ཞིང་ཀུན་ཏུ་བཙལ་ཀྱང་རྙེད་མ་ཡིན། །དུས་ད་རེས་སྔོན་བསགས་ལས་དབང་གིས། །འདི་ལན་གཅིག་འཕྲད་པ་སྐལ་བ་བཟང་། །དེ་ཡིན་པར་ཤེས་ནས་ཕུགས་གསུམ་གཏོད། །དེང་སྙིགས་མ་བས་ཀྱང་ཆེས་ཡང་སྙིགས། །མིང་ཆོས་པར་བཏགས་ཀྱང་ཆོས་བརྒྱད་འདིས། །བློ་མ་བསྒྱར་ཆོས་པ་ཉིན་སྐར་ཙམ། །མགོན་པད་འབྱུང་རྗེས་འཇུག་མཆེད་ལྕམ་ཚོ། །ད་སྙིང་ལ་རུས་པ་མ་བཅུག་ན། །ཕྱི་ཡུལ་གྱི་དངོས་པོ་གང་ལའང་། །དོན་སྙིང་པོ་མེད་པ་མ་མཐོང་ངམ། །འདིར་
ཁོ་བོས་གཞེན་བསྐུལ་ཤུགས་ཀྱིས་ཐལ། །གླུ་མཆོད་པར་འབུལ་ལོ་གནས་གཞིའི་བདག །ཐུགས་དགྱེས་པར་མཛོད་ལ་ཕྲིན་ལས་སྒྲུབས། །ཆོས་བྱང་ཆུབ་གོ་འཕང་སྒྲུབ་པ་ལ། །རྐྱེན་བར་ཆད་མེད་པའི་བཀྲ་ཤིས་ཤོག །ཅེས་པའང་ཀུ་སཱ་ལི་སངས་རྒྱས་རྡོ་རྗེས་དྲག་པོ་ལྕགས་སྤེར་ལོའི་ཐ་སྐར་ཟླ་བའི་ཤེས་རབ་ཕྱོགས་ཀྱི་ཚེས་༢༩ དགེ་བ་ལ་གཉའ་ནང་གཙང་འགྲམ་ཏཱ་ཏོ་པ་ནི་ཞེས་པར་གུ་ཡངས་རིག་པའི་རྩེ་འཇོ་རུ་བྲིས་པ་མངྒ་ལཾ།། །།
ཤོག་སྟོང་།