སྐྱེ་ཕྲེང་གསོལ་འདེབས་མེ་ཏོག་ཕྲེང་མཛེས།
༄༅། །སྐྱེ་ཕྲེང་གསོལ་འདེབས་མེ་ཏོག་ཕྲེང་མཛེས་བཞུགས་སོ། །ན་མོ་ཤྲཱི་གུ་ར་ཝེ། བདེ་གཤེགས་སྙིང་པོ་ཀུན་བྱེད་རྒྱལ་པོ་ཡིས། །སྲིད་ཞི་ཡོངས་ལ་ཁྱབ་ཕྱིར་རིགས་དྲུག་འགྲོ། །ཀུན་བཟང་ཉིད་ལས་མི་གཞན་དེ་ཡི་ཕྱིར། །འཁོར་འདས་མཉམ་རྟོགས་པས་ཕྱག་བགྱིའོ། །ཨེ་མ། གདོད་ནས་རྣམ་དག་བྱང་ཆུབ་སེམས་ཉིད་དེ། །དམྱལ་མེས་མ་ཚིག་པྲེ་ཏས་མ་ཕོངས་ཤིང་། །དུད་འགྲོས་མ་འཐོམ་བདུད་སྡེས་མ་ཐུལ་བའི། །སྟོང་ཉིད་སྙིང་རྗེར་འབྲེལ་དེར་གསོལ་བ་འདེབས། །དེ་ལས་མཆེད་པའི་སྒྱུ་མའི་རྣལ་འབྱོར་པ། །འདས་དུས་བསྐལ་པར་ལུང་བསྟན་རྡོ་རྗེ་དང་། །སྐུ་གསུམ་ཞིང་དུ་མ་ངེས་སྣ་ཚོགས་སྟོན། །གཉིས་ལྡན་འོག་ཏུ་བྲམ་ཟེ་དཔལ་རབ་ལྡན། །བོད་རྗེ་སྙན་ཤལ་རྒྱལ་པོར་གསོལ་བ་འདེབས། །ཁྲི་སྲོང་སྲས་གྱུར་མུ་རུབ་བཙད་པོ་དང་། །ཐུགས་རྗེ་ཆེན་པོའི་རྣལ་འབྱོར་བསམ་གཏན་པ། །དྭགས་སྟོད་སྔགས་འཆང་རྡོ་རྗེ་རབ་བརྟན་ཞེས། །བུདྡྷ་དྭི་བར་བཅས་ལ་གསོལ་བ་འདེབས། །ཚ་རོང་ཆུ་མཚོར་ནཱ་གའི་སེམས་དཔའ་ཆེ། །ཡུལ་དེའི་དཔོན་བླ་སྙིང་པོ་སྣང་མཛད་དང་། །རྡོ་ཡུལ་སྟོད་དུ་སོ་སྐྱེས་འཕགས་པའི་ཚུལ། །ཀུན་བཟང་གཞན་ལ་ཕན་དེར་གསོལ་བ་འདེབས། །གཞན་ཡང་དཀར་ནག་ལས་ཀྱི་ཚོན་སྣ་ཡིས། །སྦགས་པའི་རང་གཟུགས་བརྗོད་པའི་མཐར་འདས་ཀྱང་། །བྱང་སེམས་དངུལ་ཆུ་དམན་དྲིས་མ་གོས་པའི། །ཕན་བདེའི་རྩ་ལག་དེ་ལ་གསོལ་བ་འདེབས། །འདི་འོག་ཏིང་འཛིན་རྣམ་གསུམ་རོལ་རྩལ་ལས། །སྐུ་གསུམ་སྟོན་པའི་ཕྲིན་ལས་ཕོ་ཉ་བ། །སྣ་ཚོགས་འཕྲུལ་གྱི་བྱེད་པོ་ཕན་བདེའི་བདག །ཕུན་ཚོགས་འབྱུང་གནས་དེ་ལ་གསོལ་བ་འདེབས། །གདོད་མ་ཆོས་སྐུ་དག་པའི་གཞི་དབྱིངས་ནས། །སྣ་ཚོགས་ལོངས་སྐུའི་བཀོད་པ་ཕྱོགས་བཅུར་འཕྲོ། །སྤྲུལ་སྐུ་རྒྱུན་ཆད་མེད་པས་འགྲོ་དོན་མཛད། །འཇིག༵༷ས་མེ༷ད་བསྟན༷་པའི༷་རྒྱལ་མཚ༷ན་ལ་གསོལ་བ་འདེབས། །དེ་ལྟར་གསོལ་བ་བཏབ་པའི་མཐུ་ནུས་ཀྱིས། །སྐྱེ་བའི་ཕྲེང་བར་བླ་མ་དམ་པ་དང་། །འབྲལ་མེད་རིམ་དགུའི་ཐེག་པར་ལོངས་སྤྱོད་ནས། །ས་བཅུ་ལམ་ལྔའི་དཔལ་ཡོན་མཐར་ཕྱིན་ཤོག །འདི་ཉིད་དབུ་མཛད་འཇིགས་མེད་ཆོས་དར་གྱིས་བསྐུལ་ངོར། ཀུན་བཟང་གཞན་ཕན་གྱིས་བྲིས་པ་ཀུན་ཏུ་དགེ་བར་གྱུར་ཅིག །དགེའོ།། །།