སྒྱུ་འཕྲུལ་མེ་ལོང་འོད་ཕྲེང་། བི་མ་ལ།
སྒྱུ་འཕྲུལ་མེ་ལོང་འོད་ཕྲེང་བཞུགས། རྡོ་རྗེ་མི་བསྐྱོད་པ་ལ་འདུད། །སྒྱུ་འཕྲུལ་མེ་ལོང་འོད་ལྡན་བཤད། །གཞི་པོ་དངོས་པོའི་གཤིས་ཉིད་དང་། །དོན་དུ་གཉེར་བའི་ལམ་ཉིད་དང་། །སྨིན་སྟོབས་མངོན་བྱས་འབྲས་ཉིད་གསུམ། །རྩ་བའི་ལུས་སུ་ཤེས་པར་བྱ། ༈ །རང་སེམས་མ་བཅོས་ལྷུན་གྲུབ་ལས། །འཁྲུལ་སྣང་གཉིས་བསྡུས་བརྟག་གཞིར་བཤད། ༈ །ལམ་གྱི་བྱེ་བྲག་རྣམ་བཤད་པ། །ཐུན་མོང་ཁྱད་པར་དེ་ཕྱི་ནང་། །ཉིད་ལ་ཐབས་དང་ཤེས་རབ་ལམ། །ཅིག་ཅར་རིམ་པ་ལ་ཡང་གཉིས། །ཐོད་རྒལ་མཐར་ཆགས་དབྱེ་བའི་སྒོ། །རྣལ་འབྱོར་དགུ་བཅུ་འམ་ལམ་ལྔ་སྟེ། །མཚན་ཉིད་གསུམ་ལ་ཟག་དང་ལྡོག །ཡོད་མེད་གཉིས་སུ་བསྡུད་ཏེ་བསྟན། ༈ །དང་པོ་རྒྱུ་ཤེས་རྣལ་འབྱོར་དང་། །སྟོང་སྒྱུ་གཅིག་སྤྲོས་ཚོགས་རྐྱེན་འཇུག །རྣམ་སྨིན་དབང་སྒྱུར་ཕྱག་རྒྱ་གྲུབ། །སྐབས་འབྲས་རྣལ་འབྱོར་རིམ་པའོ། །རྩ་བ་ཚོགས་སྦྱོར་མཐོང་སྒོམ་མཐར། །ལམ་ལྔར་བསྡུས་ཏེ་བྱེ་སྒོ་བརྒྱད། །རྟེན་ལུས་སྒྲིབ་བྱང་ལྟ་བ་སེམས། །བསྐུར་ཐོབ་བདུད་བཏུལ་ཡོན་ཏན་རྫོགས། །ལམ་རྟེན་འབྱུང་ལུས་རྣམ་སྨིན་ལུས། །རྡོ་རྗེའི་ཡེ་ཤེས་ལུས་སུ་གྲུབ། ༈ །ལས་སྒྲིབ་ཉོན་མོངས་ཀུན་འགྲོ་དང་། །ལྷན་ཅིག་གནས་དང་བག་ཉལ་བྱང་། །དབང་པོའི་རང་མཚན་བར་ཆད་མེད། །དབང་བསྒྱུར་མི་གཡོ་ཀུན་མཁྱེན་ཆུབ། །གཡོ་སྨིན་འཇུག་གནས་མཐར་ཕྱིན་པར། །ཆོས་ཉིད་ཡེ་ཤེས་ལ་སེམས་པ། །ཕན་ནུས་གསང་དབང་ཤེས་རབ་དབང་། །བདེ་ཆེན་དབང་གི་རིམ་བསྐུར་ནས། །རྨི་ལམ་སྒྲ་བརྙན་ས་ཁམས་ལུང་། །ཞིང་ཁམས་སངས་རྒྱས་ཉིད་དུ་བསྟན། །ལྷ་བདུད་ཉོན་མོངས་འཆི་བདག་དང་། །ཕུང་པོའི་བདུད་ཀུན་བཅོམ་ནས་ནི། །དྲོད་དང་རྟགས་དང་ཆོ་འཕྲུལ་དང་། །མངོན་ཤེས་ཡེ་ཤེས་རྫོགས་པར་འབྱུང་། །ལམ་པ་བྱང་ཆུབ་སེམས་དཔའ་ནི། །དབང་ལུང་བཏོན་ནས་བཅོམ་ལྡན་འདས། །འབྲས་བུ་ཐོབ་ཚུལ་གནས་མཁྱེན་མཛད། །རང་སྣང་ལྷུན་གྲུབ་བཙལ་མེད་རྫོགས། །བཀའ་རྒྱུད་ལུང་རིགས་བཅུད་བསྡུས་པ། །ཀུན་གྱིས་རྡོ་རྗེ་འཛིན་ཐོབ་ཤོག །སྒྱུ་འཕྲུལ་མེ་ལོང་འོད་ཕྲེང་ཞེས་བྱ་བའི་མན་ངག་བི་མ་ལས་མཛད་པ་རྫོགས་སོ། །འདི་ལ་སློབ་དཔོན་ཛྙཱ་ནའི་འགྲེལ་པ་ཡོད་དོ།། །།