བཀའ་བསྡུ་གཉིས་པ་དང་གསུམ་པ་ཐེག་པ་ཆེ་ཆུང་གི་བཀའ་དེ་དག་དར་རྒྱས་སུ་མཛད་ཚུལ།
༈ དེ་ནས་སྟོན་པ་མྱ་ངན་ལས་འདས་ནས་ལོ་བརྒྱ་དང་བཅུ་སོང་བ་ན་ཡངས་པ་ཅན་དུ་དགྲ་བཅོམ་པ་གྲགས་པ་ལ་སོགས་པ་བདུན་བརྒྱ་འདུས་ནས་དགེ་སློང་ལྷ་ཆེན་པོ་ཅན་གྱིས་རུང་བ་མ་ཡིན་པའི་གཞི་བཅུ་སོགས་འདུལ་བའི་ལག་ལེན་དྲི་མ་ཅན་རྣམས་སུན་ཕྱུངས་པའི་ཆེད་དུ་དགེ་འདུན་རྣམས་ཀྱིས་སྡེ་སྣོད་གསུམ་ཚར་གཅིག་ཞལ་འདོན་མཛད་ནས་བཀྲ་ཤིས་པའི་གསོ་སྦྱོང་མཛད་དེ་བཀའི་བསྡུ་བ་གཉིས་པ་མཛད་དོ། ༈ །དེ་ནས་སྟོན་པ་མྱ་ངན་ལས་འདས་ནས་ལོ་བཞི་བརྒྱ་འདས་པ་ན། མཉན་ཡོད་དུ་བྱང་ཆུབ་སེམས་དཔའ་ལྔ་བརྒྱ། སོ་སོ་སྐྱེ་བོའི་པཎྜི་ཏ་དྲུག་ཁྲི་བདུན་སྟོང་འདུས་ནས་བདུད་སྡིག་ཅན་གྱི་སྤྲུལ་པ་དགེ་སློང་བཟང་པོ་སློབ་མར་བཅས་པས་ཆོས་ལོག་བསྟན་པ་དང་། སྡེ་པ་བཅོ་བརྒྱད་ཕན་ཚུན་རྩོད་པར་གྱུར་པའི་ཚེ། ཆོས་ལོག་རྣམས་སུན་ཕྱུངས། སྡེ་པ་བཅོ་བརྒྱད་བསྟན་པ་རྣམ་དག་ཏུ་བསྒྲུབས་ནས་སྡེ་སྣོད་གསུམ་ཡི་གེར་བཀོད་པ་ནི་བཀའ་བསྡུ་གསུམ་པའོ། །
༈ དེའི་རྗེས་སུ་རྒྱལ་པོའི་ཁབ་ཀྱི་ལྷོའི་ཕྱོགས་བི་མ་སྭ་བྷ་ཝ་ཞེས་པའི་རི་ལ། རྒྱལ་སྲས་འབུམ་ཕྲག་བཅུ་འདུས་ཏེ། འཇམ་དཔལ་གྱིས་མངོན་པ། བྱམས་པས་འདུལ་བ། ཀུན་ཏུ་བཟང་པོས་མདོ་སྡེ་སྟེ་ཐེག་ཆེན་གྱི་སྡེ་སྣོད་རྣམས་བསྡུས་པར་བཤད་ཅིང་། ཕྱག་ན་རྡོ་རྗེ་སངས་རྒྱས་སྟོང་གི་བཀའི་བསྡུ་བ་པོར་གསང་བ་བསམ་གྱིས་མི་ཁྱབ་པའི་མདོ་དང་། ཕྱག་ན་རྡོ་རྗེ་དབང་བསྐུར་བའི་རྒྱུད་ལས་བཤད་པས་ཕལ་ཆེར་ཕྱག་རྡོར་གྱིས་བསྡུས་པར་བཞེད་དོ། །