ན་རགས་དོང་སྤྲུགས་ཀྱི་ཆོ་ག་འཁོར་བ་ཀུན་སྒྲོལ་གྱི་ཟུར་འདེབས་ལྷན་ཐབས་ངོ་མཚར་རིན་ཆེན་ཕྲེང་བ། ཨོ་རྒྱན་བསྟན་འཛིན་རྡོ་རྗེ།
ན་རགས་དོང་སྤྲུགས་ཀྱི་ཆོ་ག་འཁོར་བ་ཀུན་སྒྲོལ་གྱི་ཟུར་འདེབས་ལྷན་ཐབས་ངོ་མཚར་རིན་ཆེན་ཕྲེང་བ་ཞེས་བྱ་བ་བཞུགས། །ཨོ་རྒྱན་བསྟན་འཛིན་རྡོ་རྗེ། བླ་མ་དཔལ་ལྡན་རྡོ་རྗེ་སེམས་དཔའ་ལ་ཕྱག་འཚལ་ལོ། །འདིར་ཞི་ཁྲོ་དམ་པ་རིགས་བརྒྱའི་སྒྲུབ་ཐབས་ན་རག་དོང་སྤྲུགས་འཁོར་བ་ཀུན་སྒྲོལ་གྱི་ཆོ་གའི་ལྷན་ཐབས་ཅུང་ཟད་སྤྲོས་པ་ངོ་མཚར་རིན་ཆེན་ཕྲེང་བ་ཞེས་བྱ་བ་འདི་ལ་དོན་གསུམ། ཕྱག་རྒྱའི་མཆོད་པ་དང་། འཛབ་བཟླས་ཀྱི་བཅུ་ཆ་བརྩི་ཚུལ། གཞི་བསྟོད་བྱ་བ་དང་གསུམ། དང་པོ་ནི། ཕྱག་རྒྱའི་མཆོད་པའི་སྐབས་རྒྱས་པར་འདོད་ན་དཀྱིལ་འཁོར་འདིའི་ལྷ་གྲངས་དང་མཉམ་པའི་ཕྱག་རྒྱའི་མཆོད་པ་སྤྲོས་ཆོག་པར་གསུངས་པས། དེའི་ཕྱིར་དུ་ཆོ་ག་ཤིན་ཏུ་རྒྱས་པ་ལ་མོས་པ་དག་གི་བཞེད་པ་སྐོང་ཕྱིར་དུ་སྒྱུ་འཕྲུལ་དྲ་བ་ཞི་བ་འབྲིང་པོ་དང་ཁྲོ་བོ་བསྡུས་པའི་ལས་གཞུང་གཉིས་ལ་བསྟེན་པ་ཅུང་ཟད་འབྲི་བ་ལ་གཉིས། ཞི་བ་དང་ཁྲོ་བོའོ། །དང་པོ་ཞི་བའི་ཕྱག་རྒྱ་ལའང་། སྤྱི་དང་ཁྱད་པར་གཉིས་ལས། དང་པོ་ནི། ཐབས་དང་ཤེས་རབ་ཀྱི་ཕྱག་རྒྱ་རྡོ་རྗེ་དང་དྲིལ་བུ་བཟུང་ལ། ལག་པ་གཡས་ཀྱི་སོར་མོའི་བྲེ་ཁ་ལྔ་ལ་ཉི་མའི་དཀྱིལ་འཁོར་རེ་རེ་རྣམས་ཀྱི་སྟེང་དུ་ཧཱུྃ་ཨཱོཾ་སྭཱ་ཨཾ་ཧཱ་གཡོན་གྱི་སོར་མོའི་བྲེ་ཁ་ལྔ་ལ་ཟླ་བའི་དཀྱིལ་འཁོར་རེ་རེ་དེ་དག་གི་སྟེང་དུ་མཱུཾ་ལཱཾ་མཱཾ་པཱཾ་ཏཱཾ་རྣམས་ཀྱིས་མཚན་པར་གྱུར། ཧཱུྃསྒྱུ་འཕྲུལ་དྲ་བ་མངོན་རྫོགས་པའི། །ཐམས་ཅད་བྱང་ཆུབ་མཆོག་གི་རྒྱ། །གསང་བ་དེ་ཉིད་ངེས་པ་ཡི། །སྙིང་པོའི་ཕྱག་རྒྱ་འདའ་དཀའོ། །མི་བསྐྱོད་ཉི་མའི་དཀྱིལ་ཡི་གེ །རིན་ཆེན་ཟླ་བའི་དཀྱིལ་ཡི་གེ །ལྔ་གཉིས་ཟུང་དུ་སྤྲད་པ་ལས། །སྦྱར་བས་ཕྱག་རྒྱ་འབྱུང་བའི་རྒྱུ། །ༀ་དང་མཱུཾ་གཉིས་རྩེ་
སྦྱར་ཏེ། །འབྲུ་བརྒྱད་བསྣོལ་ནས་རྩེ་སྤྲད་པ། །རྒྱལ་བ་ཀུན་དང་མཉམ་སྦྱོར་བའི། །བདེ་བ་ཆེན་པོ་སྦྱིན་པའི་རྒྱ། །གཉིས་པ་ནི། དཀྱིལ་འཁོར་ཀུན་གྱི་ཁྱབ་བདག་ཆེ། །ཀུན་བཟང་མཉམ་བཞག་ཡེ་ཤེས་འཕྲོ། །ཧཱུྃ་ཧཱུྃ་ཧཱུྃ་བཛྲ་ཙིཏྟ་ༀ། ཡུམ་ནི་དམིགས་མེད་ཆོས་ཀྱི་དབྱིངས། །ཡུམ་གྱུར་མཉམ་རྫོགས་པདྨོའི་དཀྱིལ། །ཨ་ཨ་ཨ་བཛྲ་བྷ་ཏྲ་ས་མནྟ་ཨ། འབྲུ་བཞི་སྦས་ནས་ཐུགས་ཀར་བཀན། །ཧཱུྃ་སྒྲེང་རྩེ་མོར་རྡོ་རྗེ་འབར། །ཟླ་བཏུལ་འབྲུ་སྦས་དྲིལ་བསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། ཧཱུྃ་བཛྲ་དྷྲྀཀ། འབྲུ་བཞི༴མཱུཾ་སྒྲེང་རྩེ་མོར་དྲིལ་བསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །མཱུཾ་དྷཱ་ཏཱི་ཤྭ་རཱི། འབྲུ་བཞི༴ༀ་སྒྲེང་རྩེ་མོར་འཁོར་ལོ་འབར། །ཟླ་བརྟུལ་བཞི༴འཁྲིལ་བའི༴ༀ་ཛི་ན་ཛིཀ། འབྲུ་བཞི༴ལཱཾ་སྒྲེང་རྩེེ་མོར༴ཉི་མ༴བཏུད་དེ༴ལཱཾ་དྭེ་ཤྭ་ར་ཏཱི། འབྲུ་བཞི༴སྭཱ་བསྒྲེང་རྩེ་མོར་རིན་ཆེན་འབར། །ཟླ་བཏུལ༴འཁྲིལ་བའི༴སྭཱ་རཏྣ་དྷྲྀཀ྄། འབྲུ་བཞི་སྦས་ནས༴མཱཾ་བསྒྲེང་རྩེ་མོར༴ཉི་མ༴བཏུད་དེ༴མཱཾ་མོ་ཧ་ར་ཏཱི། འབྲུ་བཞི༴ཨཱཾ་བསྒྲེང་རྩེ་མོར་པདྨ་འབར། །ཟླ་བཏུལ༴འཁྲིལ་བའི༴ཨཱཾ་ཨ་རོ་ལྀཀ྄། འབྲུ་བཞི༴སཱཾ་སྒྲེང་རྩེ་མོར༴ཉི་མ༴བཏུད་དེ༴སཱཾ་ར་ག་ར་ཏཱི། འབྲུ་བཞི༴ཧཱ་སྒྲེང་རྩེ་མོར་རལ་གྲི་འབར། །ཟླ་བཏུལ༴འཁྲིལ་བའི༴ཧཱ་པྲཛྙཱ་དྷྲྀཀ྄། འབྲུ་བཞི༴ཏཱཾ་སྒྲེང་རྩེ་མོར་དྲིལ་བསིལ་འབར། ཉི་མ༴བཏུད་དེ༴ཏཱཾ་བཛྲ་རཱ་ཏི། ནང་སེམས་བཞི་ཡི་ཕྱག་རྒྱ་ནི། །རིན་ཆེན་མྱུ་གུ་རལ་གྲི་འབར། །པདྨ་དཀར་པོ་རྡོ་རྗེ་འབར། །ལས་ལ་འཁྲིལ་ཞིང་ཆོས་ལ་བརྟེན། །ནང་སེམས་ཡུམ་གྱི་ཕྱག་རྒྱ་ནི། །གཟུགས་མཛེས་རིན་ཆེན་ཕྲེང་བ་དང་། །པི་ཝཾ་གར་མཁན་མཆོག་ཉིད་དེ། །དབུ་རྣམས་འཇོ་ཞིང་འདུད་པའི་ཚུལ། །པདྨའི་གདན་ལ་བཞེངས་ནས་ཀྱང་། །མཆོད་བཞེས་དམ་སྐོངས་དངོས་གྲུབ་སྩོལ། །ཨ་ལ་ལ་ཧོ། །ཕྱི་སེམས་བཞི་ཡི་ཕྱག་རྒྱ་ནི། །ཀླུ་ཤིང་ཡལ་ག་གླེགས་བམ་དང་། །རིན་ཆེན་སྙེ་མ་ཨུཏྤལ་འཛིན། །ལས་ལ་འཁྲིལ་ཞིང་ཆོས་ལ་བརྟེན། །ཕྱི་སེམས་ཡུམ་བཞིའི་ཕྱག་རྒྱ་ནི། །མེ་ཏོག་ཕྲེང་དང་སྤོས་མཆོད་མ། །མར་མེ་བྱུག་པ་ལ་སོགས་འཛིན། །དབུ་རྣམས་འཇོ་ཞིང་འདུད་པའི་ཚུལ། །པདྨའི་གདན་ལ༴མཆོད་བཞེས་
དམ་སྐོང་༴ཨ་ལ་ལ་ཧོ། ཐུབ་དྲུག་ཕྱག་རྒྱ་སྣ་ཚོགས་ཏེ། །མདོར་བསྡུས་ཕྱག་རྒྱ་དྲུག་ཡིན་ནོ། །གསེག་པར་པི་ཝཾ་གོ་ཆ་པོད། །རིན་ཆེན་སྒྲོམ་བུ་མེ་ཆུ་འཛིན། །པདྨའི་གདན༴། མཆོད་བཞེས༴ཨ་ལ་ལ་ཧོ། སྒོ་བཞི་ཁྲོ་བོའི་ཕྱག་རྒྱ་ནི། །ནྲྀ་མགོ་གདེངས་དང་རྡོ་རྗེ་གནོན། །ཐོད་སྦྲུལ་ཆེན་པོ་གནོན་པ་དང་། །རྡོ་རྗེ་རྒྱ་གྲམ་ལས་ཀྱིས་གནོན། ལྕགས་ཀྱུ་ཞགས་པ་སྥོ་ཊ་ཧོཿ། འབར་བའི་གདན་ལ་བཞེངས་ནས་ཀྱང་། །མཆོད་བཞེས༴ཨ་ལ་ལ་ཧོ༔འདི་ནི་རྒྱལ་བ་ཐམས་ཅད་ཀུན། །དགྱེས་པ་ཆེན་པོ་བསྐྱེད་པའི་ཕྱིར། །ཕྱག་རྒྱའི་མཆོད་པ་ཆེན་པོ་ཡིན། །ཨ་ལ་ལ་སྟེ་མཆོད་པར་རོལ། །ཨ་ལ་ལ་སྟེ་དགྱེས་པར་མཛོད། །གཉིས་པ་ཁྲོ་བོའི་ཕྱག་རྒྱ་ལའང་སྤྱི་དང་ཁྱད་པར་གཉིས་ལས། དང་པོ་ནི། ཁྲག་འཐུང་རྒྱལ་པོ༴སྐུ༴སྐུ་ཡི༴ཕྱག༴གཉིས་པ་ནི། ཧཱུྃརྣམ་པར་གྲོལ་བ་མཚོན་པའི་ཕྱིར། །དབུས་ཀྱི་ཁྲོ་བོའི་ཕྱག་རྒྱ་ནི། །མཐིང་ནག་ཞལ་གཅིག་ཕྱག་གཉིས་པ། །གཡས་པ་རྡོ་རྗེ་རྩེ་ལྔ་འཛིན། །གཡོན་པ་དུང་དམར་ཡུམ་ལ་འཁྱུད། །དཔལ་ཆེན་ཆེ་མཆོག་ཐབས་ཀྱི་རྒྱ། །གནམ་ཞལ་དབྱིངས་ཕྱུག་ཕྱག་རྒྱ་ནི། །ཞལ་གཅིག་ཕྱག་གཉིས་སྐུ་མདོག་མཐིང་། །གཡས་པ་ཤེས་རབ་ཐབས་ལ་བརྟེན། །གཡོན་པ་དུང་དམར་གཙོ་བོ་རྟེན། །ཀྲོ་དྷཱི་ཤྭཱ་རི་དབྱིངས་ཀྱི་རྒྱ། །འབར་བའི༴མཆོད༴ཨ་ལ་ལ་ཧོ༔རིགས་ཀྱི་ཁྲོ་བོའི་ཕྱག་རྒྱ་ལས། །བཛྲ་ཧེ་རུ་ཀའི་ཕྱག་རྒྱ་ནི། །མཐིང་ནག་རྡོ་རྗེ་དུང་དམར་འཛིན། །དཔལ་ཆེན་བཛྲ་ཐབས་ཀྱི་རྒྱ། །བུདྡྷ་ཧེ་རུ་ཀའི་ཕྱག་རྒྱ་ནི། །སྨུག་ནག་འཁོར་ལོ་དུང་དམར་འཛིན། །དཔལ་ཆེན་བུདྡྷ་ཐབས་ཀྱི་རྒྱ། །རཏྣ་ཧེ་རུ་ཀའི་ཕྱག་རྒྱ་ནི། །སེར་ནག་རིན་ཆེན་དུང་དམར་འཛིན། །དཔལ་ཆེན་རཏྣ་ཐབས་ཀྱི་རྒྱ། །པདྨ་ཧེ་རུ་ཀའི་ཕྱག་རྒྱ་ནི། །དམར་ནག་པདྨ་དུང་དམར་འཛིན། །དཔལ་ཆེན་པདྨ་ཐབས་ཀྱི་རྒྱ། །ཀརྨ་ཧེ་རུ་ཀའི་ཕྱག་རྒྱ་ནི། །ལྗང་ནག་རྒྱ་གྲམ་དུང་དམར་འཛིན། །དཔལ་ཆེན་ཀརྨ་ཐབས་ཀྱི་རྒྱ། །རཀྴ་ཧེ་རུ་ཀའི་ཕྱག་རྒྱ་ནི། །མཐིང་ནག་རྡོ་རྗེ་དུང་དམར་འཛིན། །དཔལ་ཆེན་རཀྴ་ཐབས་ཀྱི་རྒྱ། །ས་ནུ་ཧེ་རུ་ཀའི་ཕྱག་རྒྱ་ནི། །སེར་ནག་དགྲ་སྟ་དུང་དམར་འཛིན། །དཔལ་ཆེན་ས་ནུ་ཐབས་ཀྱི་རྒྱ། །གུ་ཡ་ཧེ་རུ་ཀའི་ཕྱག་རྒྱ་ནི། །དུད་ཁ་རལ་གྲི་དུང་
དམར་འཛིན། །དཔལ་ཆེན་གུ་ཡ་ཐབས་ཀྱི་རྒྱ། །ཡཀྴ་ཧེ་རུ་ཀའི་ཕྱག་རྒྱ་ནི། །ལྗང་ནག་བེ་ཅོན་དུང་དམར་འཛིན། །དཔལ་ཆེན་ཡཀྴ་ཐབས་ཀྱི་རྒྱ། །རིགས་ཀྱི་ཡུམ་རྣམས་ཕྱག་རྒྱ་ནི། །ཞལ་གཅིག་ཕྱག་གཉིས་རིགས་ཀྱི་མདོག །གཡས་པ་ཤེས་རབ་ཐབས་ལ་བརྟེན། །གཡོན་པ་དུང་དམར་གཙོ་ལ་སྟོབས། །ཀྲོ་དྷཱི་རིགས་རྣམས་དབྱིངས་ཀྱི་རྒྱ། །འབར་བའི༴མཆོད་པ༴ཨ་ལ་ལ་ཧོ༔གནས་མ་བརྒྱད་ཀྱི་ཕྱག་རྒྱ་ནི། གཽ་རི་བྷན་དམར་ཞིང་དབྱུག་སྔོ། །ཙཽ་རཱི་མདའ་གཞུ་འགེངས་མ་སེར། །པྲ་མོ་ཆུ་སྲིན་རྒྱལ་མཚན་དམར། །བེ་ཏ་བྱིས་ཟ་རྡོར་འཕྱར་ནག །པུཥྐ་དམར་སེར་རྒྱུ་འདྲེན་སེར། །གྷསྨ་དུང་དམར་དཀྲུག་འཐུང་ལྗང་། སྨ་ཤ་མཐིང་ནག་བྱིས་སྙིང་ཟ། །ཙཎྜ་སེར་སྐྱ་མཆོག་ལུས་འདྲལ། །འབར་བའི༴མཆོད་བཞེས༴ཨ་ལ་ལ་ཧོཿཡུལ་མ་བརྒྱད་ཀྱི་ཕྱག་རྒྱ་ནི། །སེངྷ་ཁ་རོ་བསྣོལ་སེར་སིང་། །བྱ་གྷྲྀ་གནས་བལྟ་བསྣོལ་མ་སྟག །སྲི་ལ་ནག་མོ་བྱའི་ལྡག་ཝ། །ཤྭ་ན་འདྲལ་བལྟ་མཐིང་ག་སྤྱང་། །གྷྲྀ་དྷ་མགྲིན་དམར་རྒྱུ་འདྲེན་རྒོད། །ཀངྐ་རྐང་ཕྲག་སྣར་མགོ་རིང་། །ཀཱ་ཀ་ཁ་རོ་བྷན་གྲི་ནག །ཨུ་ལུ་ལྕགས་ཀྱུ་མཐིང་ཚོགས་འུག །འབར་བའི༴མཆོད་བཞེས༴ཨ་ལ་ལ་ཧོ༔སྒོ་མ་བཞི་ཡི་ཕྱག་རྒྱ་ནི། །རྟ་གདོང་སྔོན་པོ་ལྕག་ཀྱུ་འཛིན། །ཕག་གདོང་ནག་མོ་མཆེ་ཞགས་ཅན། །སེང་གདོང་དམར་མོ་ལྕགས་སྒྲོག་སྡོམ། །སྤྱང་གདོང་ལྗང་ནག་དྲིལ་འཁྲོལ་དགྱེས། །འབར་བའི༴མཆོད་བཞེས༴ཨ་ལ་ལ་ཧོ༔འཇིག་རྟེན་འདས་དང་མ་འདས་པའི། །ཡེ་ཤེས་ཐོབ་པར་བྱ་བའི་ཕྱིར། །མ་མོ་རྣམས་ཀྱི་ཕྱག་རྒྱ་ནི། །སྲིན་མོ་སྨུག་ནག་ཐོད་རློན་འཆང་། །ཚངས་མ་དམར་སེར་པདྨ་བསྣམས། །ལྷ་ཆེན་དཀར་ལྗང་ཏྲི་ཤུ་ལ། །རྟོག་འདོད་སྔོན་མོ་འཁོར་ལོ་འཆང་། །གཞོན་ནུ་དམར་མོ་མདུང་ཐུང་འཕེན། །བརྒྱ་བྱིན་དཀར་མོ་ཨནྟ་གདོང་། །རྡོ་རྗེ་སེར་མོ་ཙན་དན་འཐུང་། །བདུད་རྩི་དམར་མོ་པདྨ་བསྣམས། །ཟ་བ་དཀར་མོ་པུཎྜ་རཱི༔། བེ་ཅོན་ལྗང་ནག་དབྱུག་ཐོ་འཕྱར། །སྲིན་མོ་དམར་མོ་དུང་ཁྲག་འཐུངས། །ཟ་བ་ལྗང་ནག་བ་སུ་འདྲེན། །དགའ་བ་དམར་མོ་ཀ་དར་འཕྱར། །སྟོབས་ཆེན་དཀར་མོ་གཤོལ་མདའ་འཛིན། །རྡོ་རྗེ་སེར་མོ་སྤུ་གྲིས་གཅོད། །འདོད་པ་དམར་མོ་མདའ་གཞུ་འགེངས། །ནོར་
སྲུང་དཀར་མོ་བུམ་པ་འཛིན། །རླུང་ལྷ་སྔོན་མོ་བ་དན་འཕྱར། །གསོད་བྱེད་དཀར་མོ་རལ་གྲི་འཛིན། །མེ་ལོང་དམར་མོ་གསལ་ཤིང་འཕྱར། །ཕག་གདོང་ནག་མོ་མཆེ་ཞགས་ཅན། །རྒན་བྱེད་དམར་མོ་ཞིང་ཆུང་ཟ། །སྣ་ཆེན་དཀར་ལྗང་ཐོད་ཁྲག་འཐུང་། །ཆུ་ལྷ་སྔོན་མོ་སྦྲུལ་ཞགས་ཅན། །རྡོ་རྗེ་ནག་མོ་ལྕགས་ཀྱུ་འཛིན། །རྡོ་རྗེ་སེར་མོ་ར་མགོ་ཞགས། །རྡོ་རྗེ་དམར་མོ་ལྕགས་སྒྲོག་སྡོམ། །རྡོ་རྗེ་ལྗང་ནག་དྲིལ་འཁྲོལ་དགྱེས། །འབར་བའི༴མཆོད་བཞེས༴ཨ་ལ་ལ་ཧོ༔འདི་ནི་རྒྱལ་བ་ཐམས་ཅད་ཀུན། །དགྱེས་པ་ཆེན་པོ་བསྐྱེད་པའི་ཕྱིར། །ཕྱག་རྒྱའི་མཆོད་པ་ཆེན་པོ་ཡིན། །ཨ་ལ་ལ་སྟེ་མཆོད་པར་འབུལ། །ཨ་ལ་ལ་སྟེ་དགྱེས་པར་མཛོད། །ཞེས་རིམ་པ་བཞིན་ལྷ་སོ་སོའི་ཕྱག་རྒྱ་བྱ་བ་སྟེ། དེ་ཡང་ཕྱག་རྒྱ་མདུན་ཏུ་བསྒྱུར་ནས་ཡབ་གཡོན་དང་ཡུམ་གཡས་སུ་འཁྲོལ། དེའི་ཚེ་ལྷ་གང་དང་གང་གི་སྐུ་སྒྱུ་མ་ལྟ་བུར་གསལ་བ་ཕྱག་ཆེན། ས་བོན་དང་མཆོད་པ་ཆོས་རྒྱ། བཅའ་བ་དམ་རྒྱ། དགྲོལ་བ་ལས་རྒྱ་སྟེ་ཕྱག་རྒྱ་བཞིའོ། །དེ་ཡང་ཇི་སྐད་དུ་གསལ་བཀྲ་ལས། དམ་ཚིག་ལས་དང་ཆོས་དང་ནི། སྐུ་ཉིད་ཕྱག་རྒྱ་ཆེན་པོའོ། །ཞེས་གསུངས་པ་བཞིན་ནོ། །གཉིས་པ་ནི། ཀུན་བཟང་སོགས་ཞི་བ་དང་། ཆེ་མཆོག་སོགས་ཁྲོ་བོ་སོ་སོའི་བསྐྱེད་སྔགས་རྣམས་གཙོ་འཁོར་གྱི་འགྲོས་སྲོལ་སྦྱར་ཏེ་ཇི་ལྟར་རིགས་པ་བཟླས་ནས། ཞེས་གསུངས་པ་ལ་བཟླས་པའི་གྲངས་ཀྱི་བཅུ་ཆ་གཅིག་ཚུལ་ནི། དཔེར་ན། བསྙེན་པ་ལྟ་བུའི་དུས་གཙོ་བོ་ཀུན་བཟང་ཡབ་ཡུམ་དང་། ཆེ་མཆོག་ཡབ་ཡུམ་རྣམས་འབུམ་ཚོ་རེ་རེ་ཙམ་ལ། རིགས་ལྔ་ཡབ་ཡུམ་དང་། ཁྲོ་བོ་ཡབ་ཡུམ་དགུ་ལ་ཁྲི་ཚོ་ཙམ་དང་། སེམས་དཔའ་བརྒྱད་ལ་སྟོང་ཕྲག་ལྔ་རེ། དེ་ཕྱིན་ཐམས་ཅད་སྟོང་ཕྲག་རེ། ཞི་ཁྲོ་སྤྱི་སྔགས་སོ་སོར་ཆིག་འབུམ་ཙམ་རེ་ཅི་ནུས་བཟླའོ། །ཡང་ཉིན་ཆོག་རྐྱང་པ་ལྟ་བུའི་སྐབས། གཙོ་བོ་ཡབ་ཡུམ་དང་། ཆེ་མཆོག་ཡབ་ཡུམ་བརྒྱ་རྩ་རེ། རིགས་ལྔ་དང་། ཁྲོ་བོ་དགུ་སུམ་ཅུ་རེ། སེམས་དཔའ་བརྒྱད་ཉི་ཤུ་རེ། དེ་ཕྱིན་ཐམས་ཅད་བཅུ་ཕྲག་ཏེ། ཞི་ཁྲོ་སྤྱི་སྔགས་ཅི་ནུས་པ་རེ་བཟླས་བརྗོད་བྱའོ། །གསུམ་པ་ནི། བཟླས་པའི་སྐབས་ཀྱི་མཇུག་བསྡུའི་བསྟོད་པ་ལ། ཡང་ན་ཞི་ཁྲོའི་གཞི་བསྟོད་གཉིས་སྦྲེལ་ནས་བྱ་ཞིང་གསུངས་པ་སྤྲོ་
བར་འདོད་ན་དེ་ལ་གཉིས། ཞི་བ་དང་ཁྲོ་བོའོ། །དང་པོ་ནི། ཧཱུྃ། ཆོས་ཉིད་དྲིལ་སྟབས་སྟོང་པའི་ངང་ལས་མ་གཡོས་ཀྱང་། །ཆོས་ཉིད་པད་སྐོར་ཀུན་ཏུ་བཟང་པོ་འདུ་འབྲལ་མེད། །ཆོས་ཉིད་མཉམ་བཞག་ཁྱབ་བརྡལ་ཆེན་པོའི་ཡེ་ཤེས་ཀྱི། གར་ཐལ་ཀུན་བཟང་ཡབ་ཡུམ་གཉིས་ལ་ཕྱག་འཚལ་ལོ། །རྣམ་ཤེས་རྣམ་དག་བཅོམ་ལྡན་རྡོ་རྗེ་སེམས། །ཞེ་སྡང་རྣམ་དག་ཆོས་དབྱིངས་ཡེ་ཤེས་ངང་། །མཐིང་ག་ས་གནོན་ཕྱག་ན་རྡོ་རྗེ་འབར་བ་བསྣམས། །ཐུགས་མཆོག་རྡོ་རྗེ་སེམས་ལ༴གཟུགས་ཕུང་རྣམ་དག་བཅོམ་ལྡན་རྣམ་སྣང་མཛད། གཏི་མུག་རྣམ་དག་མེ་ལོང་ཡེ་ཤེས་ངང་། །དུང་མདོག་རྣམ་སྣང་ཕྱག་ན་འཁོར་ལོ་འབར་བ་བསྣམས། །སྐུ་མཆོག་རྣམ་སྣང་མཛད་ལ༴ཚོར་བ་རྣམ་དག་བཅོམ་ལྡན་རིན་ཆེན་འབྱུང་། །ང་རྒྱལ་རྣམ་དག་མཉམ་ཉིད་ཡེ་ཤེས་ངང་། །གསེར་མདོག་མཆོག་སྦྱིན་ཕྱག་ན་རིན་ཆེན་འབར་བ་བསྣམས། །ཡོན་ཏན་རིན་ཆེན་འབྱུང་ལ༴འདུ་ཤེས་རྣམ་དག་བཅོམ་ལྡན་སྣང་མཐའ་ཡས། །འདོད་ཆགས་རྣམ་དག་ཀུན་རྟོག་ཡེ་ཤེས་ངང་། །ལེ་བརྒན་མཉམ་བཞག་ཕྱག་ན་པདྨ་འབར་བ་བསྣམས། །གསུང་མཆོག་སྣང་མཐའ་ཡས་ལ༴འདུ་བྱེད་རྣམ་དག་བཅོམ་ལྡན་དོན་ཡོད་གྲུབ། །ཕྲག་དོག་རྣམ་དག་བྱ་གྲུབ་ཡེ་ཤེས་ངང་། །ལྗང་ཁུ་སྐྱབས་སྦྱིན་ཕྱག་ན་རལ་གྲི་འབར་བུ་བསྣམས། །ཕྲིན་ལས་དོན་ཡོད་གྲུབ་ལ༴འབྱུང་བ་རྣམ་དག་རིགས་ཀྱི་ཡུམ་ཆེན་ལྔ། །ཀུན་བཟང་སྤྱན་མ་མ་མཱ་གོས་དཀར་སྒྲོལ། །ཐབས་ཀྱི་སྐུ་ལ་འཁྱུད་རྒྱ་ཤེས་རབ་དགྱེས་འཁྲིལ་མ། །རིགས་ཀྱི་ཡུམ་ཆེན་ལྔ་ལ༴བསྐལ་བཟང་བྱང་ཆུབ་སེམས་དཔའ་བརྒྱད་རྣམས་ནི། །བདེ་བར་གཤེགས་པ་ཀུན་གྱི་སྲས་མཆོག་སྟེ། །ཡོན་ཏན་མི་བཟད་གཡས་སྐྱབས་སྦྱིན་སྤྲུལ་པ་བསམ་ཡས་པའི། །སེམས་དཔའ་ཆེན་པོ་བརྒྱད་ལ༴སྒེག་མོ་ཕྲེང་ཐོག་རིན་ཆེན་གླུ་གར་ཅན། །བདུག་པ་མེ་ཏོག་མར་མེ་དྲི་ཆབ་མ། །རྒྱལ་བ་རྒྱ་མཚོ་གཡོན་སྐྱབས་སྦྱིན་རྣམས་ལ་མཆོད་འབུལ་མ། །མཆོད་པའི་ལྷ་མོ་བརྒྱད་ལ༴ཡེ་ཤེས་སྒོ་བ་ཆེན་པོ་ཡབ་ཡུམ་བརྒྱད། །གཤིན་རྗེ་སྟོབས་ཆེན་རྟ་མགྲིན་བདུད་རྩི་འཁྱིལ། །ལྕགས་ཀྱུ་ཞགས་པ་སྒོ་བཞིའི་ཕྱག་རྒྱ་ལྕགས་སྒྲོགས་དྲིལ་བུ་མ། །སྒོ་བ་ཡབ་ཡུམ་བརྒྱད་ལ༴ཡེ་ཤེས་བཞི་ལས་རིགས་བཞིའི་ཕྲིན་ལས་ཀྱིས། །འཇིག་
རྟེན་དྲུག་གི་བྱེ་བ་ཕྲག་བརྒྱ་རུ། །སྤྲུལ་པ་བྱེ་བ་སྤྱི་ཕྱག་ཕྲག་བརྒྱས་འགྲོ་དྲུག་གི །དོན་མཛད་ཐུབ་པ་དྲུག་ལ༴ཐལ་སྦྱར་ལྷུག་རྒྱལ་བ་སྲས་བཅས་བཞི་བཅུ་རྩ་གཉིས་ཀྱི། །ཆེ་བའི་ཡོན་ཏན་བརྗོད་ཀྱིས་མི་ལང་ཡང་། །ཡོན་ཏན་ཆ་ཤས་བརྗོད་པའི་བྱིན་རླབས་ཀྱིས། །རིག་འཛིན་སྔགས་འཆང་རྣལ་འབྱོར་བདག་ཅག་གི །ལས་དང་ཉོན་མོངས་བག་ཆགས་གཏན་སྦྱངས་ནས། །ཚེ་འདི་ཉིད་ལ་རིག་འཛིན་ས་ཐོབ་སྟེ། །དཔལ་ལྡན་རྡོ་རྗེ་སེམས་དཔའི་གནས་ཐོབ་ཤོག །གཉིས་པ་ནི། ཧཱུྃཆོས་ཉིད་མི་འགྱུར་ཀུན་གཞིའི་ཡེ་ཤེས་སྐུ། །མི་ཤེས་གནས་གྱུར་ཆེ་མཆོག་ཧེ་རུ་ཀ། སྟོང་ཉིད་ཆོས་ཀྱི་དབྱིངས་ཕྱུག་གྲི་ཁུག་ཐོད་རྒྱ་གནམ་ཞལ་ཡུམ། །ཆེ་མཆོག་ཧེ་རུ་ཀ་ལ་ཕྱག་འཚལ་བསྟོད། །དུས་གསུམ་མི་འགྱུར་རྣམ་ཤེས་རྡོ་རྗེའི་སྐུ། །ཞེ་སྡང་མཐར་ཕྱིན་བཛྲ་ཧེ་རུ་ཀ། དབྱིངས་ནས་རྒྱས་འདེབས་རྡོ་རྗེ་རྩེ་ལྔ་བཛྲ་ཁྲོས་པའི་ཡུམ། །བཛྲ་ཧེ་རུ་ཀ་ལ༴མ་འགགས་རང་གསལ་གཟུགས་ཕུང་ཆོས་ཀྱི་སྐུ། །གཏི་མུག་མཐར་ཕྱིན་བུདྡྷ་ཧེ་རུ་ཀ། །དབྱིངས་ནས་རྨོངས་འཁོར་ལོའི་རྒྱ་སེལ་བུདྡྷ་ཁྲོས་པའི་ཡུམ། །བུདྡྷ་ཧེ་རུ་ཀ་ལ༴ཟ་བྱེད་གཏེར་ཚོགས་ཚོར་བ་རིན་འབྱུང་སྐུ། །ང་རྒྱལ་མཐར་ཕྱིན་རཏྣ་ཧེ་རུ་ཀ། དབྱིངས་ནས་ཚེ་འཕེལ་རཏྣ་ཁྲོས་པའི་ཡུམ། །རཏྣ་ཧེ་རུ་ཀ་ལ༴ཆགས་མེད་དག་པ་འདུ་ཤེས་པདྨའི་སྐུ། །འདོད་ཆགས་མཐར་ཕྱིན་པདྨ་ཧེ་རུ་ཀ། དབྱིངས་ནས་རྫོགས་བྱེད་པདྨའི་རྒྱ་པདྨ་ཁྲོས་པའི་ཡུམ། །པདྨ་ཧེ་རུ་ཀ་ལ༴དོན་རྣམས་མཐར་ཕྱིན་འདུ་བྱེད་སྤྲུལ་པའི་སྐུ། །ཕྲག་དོག་མཐར་ཕྱིན་ཀརྨ་ཧེ་རུ་ཀ། དབྱིངས་ནས་རལ་གྲིའི་རྒྱ་ཟ་བྱེད་ཀརྨ་ཁྲོས་པའི་ཡུམ། །ཀརྨ་ཧེ་རུ་ཀ་ལ༴སྐྱེ་གནས་རྣམ་བཞིའི་རྟོག་པ་གནས་གྱུར་སྐུ། །ཉོན་མོངས་མཐར་ཕྱིན་ཁྲག་འཐུང་རྣམ་པ་བཞི། །དབྱིངས་ནས་གྲི་ཁུག་ཐོད་རྒྱ་འཛིན་ཞེན་འཇོམས་མཛད་དབྱིངས་ཕྱུག་ཡུམ། །ཧེ་རུ་ཀ་བཞིའི་སྐུ་ལ༴འཇིག་རྟེན་བཞད་པའི་དུར་ཁྲོད་གནས་བརྒྱད་ནས། །ཐུགས་མཆོག་རྣམ་དག་ཡེ་ཤེས་དཀར་མོའི་ཚོགས། །ཐུགས་རྗེ་ཆེན་པོས་གཡས་སྐྱབས་སྦྱིན་རྣལ་འབྱོར་གྲོགས་མཛད་མ། །གནས་ཀྱི་གཽ་རཱི་བརྒྱད་ལ༴ཡོན་ཏན་རྟགས་ཀྱི་དུར་ཁྲོད་གནས་བརྒྱད་ནས། །འཇིགས་བྱེད་རྩལ་འཕགས་སེང་གདོང་ཕྲ་མེན་ཚོགས། །ཐུགས་རྗེ་ཆེན་པོས་གཡོན་སྐྱབས་སྦྱིན་རྣལ་འབྱོར་
སྲེགས་མཛད་མ། །ཡུལ་གྱི་ཕྲ་མེན་བརྒྱད་ལ༴ཕྱིན་ཅི་ལོག་བཞི་དུར་ཁྲོད་གནས་བཞི་ནས། །ཚད་མེད་བཞི་ཡིས་འགྲོ་བའི་དོན་མཛད་པའི། །ལྕགས་ཀྱུ་སྒོ་བཞིའི་རྒྱ་ཞགས་པ་ལྕགས་སྒྲོག་དྲིལ་བུ་མ། །ཡེ་ཤེས་སྒོ་མ་བཞི་ལ༴ལྷ་ཆེན་རྣམས་ཀྱི་ཆུང་མ་དབང་པོའི་ཚོགས། །འཁོར་བའི་ཆོས་ལ་མངའ་བརྙེས་སྲིན་མོའི་གཟུགས། །མྱ་ངན་འདས་པའི་སྤྱི་ཕྱག་སྤྲུལ་སྐུ་མགོ་བརྙན་ཅན། །དབང་ཕྱུག་ཉི་ཤུ་བརྒྱད་ལ༴ཐལ་སྦྱར་ལྷུག་ཚིག་ཡེ་ཤེས་ཞི་བའི་ངང་ནས་མ་གཡོས་ཀྱང་། །གདུག་པ་འདུལ་ཕྱིར་འབར་བའི་སྐུར་སྟོན་པ། །ཁྲག་འཐུང་རོལ་པའི་ལྷ་ཚོགས་ལྔ་བཅུ་བརྒྱད། །གདོད་ནས་མ་སྐྱེས་རང་བྱུང་གྲུབ་པའི་ལྷ། །ཚེ་རབས་སྔོན་ནས་བསྒྲུབ་པའི་འཕྲོ་མཆིས་ཀྱི། །ད་ལྟ་ཉིད་དུ་བདག་ལ་མངོན་གྱུར་ཅིག ། ད་ནི་གོང་དུ་བསྟན་པའི་ཕྱག་རྒྱ་དེ་རྣམས་བློ་རྨོངས་པ་བདག་དང་བདག་འདྲའི་ཚོགས་ཀྱིས་ཕྱག་རྒྱ་བཅའ་ཚུལ་ལ་ཐེ་ཚོམ་དུ་གྱུར་ན་དེ་བསལ་པའི་ཐབས་ཅུང་ཟད་ཕྱེ་ན། ལག་པ་གཡས་སོགས་ཀྱི་སྐབས་སོར་མོ་གཡས་པ་ལྔ་སྒྲེང་། ལག་པ་གཡོན་སོགས་ཀྱི་སྐབས་སོར་མོ་གཡོན་པ་ལྔ་སྒྲེང་། ཧཱུྃ་སྒྱུ་འཕྲུལ་དྲ་བས་མངོན་རྫོགས་པའི། སོགས་ཚིག་རྐང་བརྒྱད་པོར་ཐལ་མོ་སྦྱར་ལ་སོར་མོ་རྣམས་བསྣོལ་བ་ཁོ་ན་ཡིན། ༀ་དང་མཱུཾ་གཉིས་རྩེ་སྦྱར་ཏེ། །འབྲུ་བརྒྱད་བསྣོལ་ནས་རྩེ་སྤྲད་པ། །ལ་དེའི་ངང་ནས་སྲིན་ལག་གཉིས་རྡོར་བསྡམས། གཡས་ཀྱི་གུང་མོ་དང་གཡོན་གྱི་མཛུབ་མོ་སྒྲེང་བར་རྩེེ་སྦྱར། གཡས་ཀྱི་མཛུབ་མོ་དང་གཡོན་གྱི་གུང་མོ་སྒྲེང་བ་རྩེ་སྦྱར། གཉིས་ཀའི་མཐེ་བོང་དང་མཐེ་ཆུང་སོ་སོར་རྩེ་སྤྲད་པ་བསྣོལ་ནས་ཐལ་མོའི་བར་དུ་སྦས་པ་སྟེ། རྒྱལ་བ་ཀུན་དང་མཉམ་སྦྱོར་བའི། །བདེ་བ་ཆེན་པོ་སྦྱིན་པའི་རྒྱ། །ཞེས་དོན་བསྒོམ་དེའི་ངང་ནས། དཀྱིལ་འཁོར་ཀུན་གྱི་ཁྱབ་བདག་ཆེ། །ཞེས་པ་ལ་སྔར་གྱི་རྒྱ་འགྲོལ་ནས། ལག་གཉིས་ཀྱི་སྲིན་ལག་གི་རྩ་བ་མཐེ་བོང་གིས་མནན་པ་སོར་མོ་གཞན་རྣམས་ཀྱིས་སྒྲིལ་བའི་ཁུ་ཚུར་སོ་སོར་བཅངས་པ་ཁ་སྦྱར་དཀུ་གཡོན་པར་བཞག་པ་ཕྱག་རྒྱ་འབྱུང་བའི་རྒྱུ་ཡིན། ཀུན་བཟང་མཉམ་བཞག་ཡེ་ཤེས་འཕྲོ། །ལ་པད་སྐོར་ལས། ལག་གཡས་སྟེང་དུ་བྱས་པའི་མཉམ་བཞག་གི་རྒྱ་བཅའ། ཧཱུྃ་ཧཱུྃ་ཧཱུྃ་བཛྲ་ཙིཏྟ་ༀ་ལ་ཕྱག་རྒྱ་
གཡས་སུ་བཅས་པ་གཡོན་དུ་འགྲོལ་ཞིང་སེ་གོལ་གཏོགས། ཡུམ་ནི་དམིགས་མེད་ཆོས་ཀྱི་དབྱིངས། །ལ་ལག་གཉིས་ཁུ་ཚུར་ཁ་སྦྱར་དཀུ་གཡོན་དུ་བཞག །ཡུམ་གྱུར་མཉམ་རྫོགས་པདྨའི་དཀྱིལ། །ལ་ལག་གཉིས་གཡོན་སྟེང་དུ་བཞག་པའི་མཉམ་ཞག །ཨ་ཨ་ཨ་བཛྲ་བྷ་ཏྲ་ས་མནྟ་ཨཿལ་ཕྱག་རྒྱ་གཡོན་ཏུ་བཅས་པ་གཡས་སུ་འགྲོལ་ལ་སེ་གོལ་གཏོགས། འབྲུ་བཞི་སྦས་ནས་ཐུགས་ཀར་བཀན། །ཐམས་ཅད་ལ་ལག་གཉིས་ཁུ་ཚུར་ཁ་སྦྱར་དཀུ་གཡོན་དུ་བཞག །ཧཱུྃ་སྒྲེང་རྩེ་མོར་རྡོ་རྗེ་འབར། །ལ་ལག་གཡས་ཀྱི་ཁུ་ཚུར་བཏེག་པའི་གུང་མོ་སྙིང་གར་སྒྲེང་། ལག་གཡོན་དཀུར་བརྟེན་ཁོ་ན། ཟླ་བཏུལ་འབྲུ་སྦས་དྲིལ་བསིལ་ཞིང་། །ལ་གཡས་སྔར་བཞིན་ནས་གཡོན་པས་དྲིལ་བུ་དཀྲོལ་ལ། འཁྲིལ་བའི་ཚུལ་གྱིས་ཆོས་ལ་བརྟེན། །ཞེས་སྔར་ལྟར་དཀུར་བརྟེན། ཧཱུྃ་བཛྲ་དྷྲིཀ྄ལ་ཕྱག་རྒྱ་གཡས་སུ་བཅས་པ་གཡོན་དུ་འགྲོལ་ཞིང་སེ་གོལ་གཏོགས། འབྲུ་བཞི་སྦས་ནས་ཐུགས་ཀར་བཀན། །ལ་ཁུ་ཚུར་ཁ་སྦྱར་དཀུ་གཡོན་སྔར་བཞིན། མཱུཾ་སྒྲེང་རྩེ་མོ་དྲིལ་བསིལ་འབར། །ལག་གཡས་ཁུ་ཚུར་ཅུང་ཟད་ཁ་ཕྱེ་བ་དཀུ་གཡས་སུ་བརྟེན། གཡོན་ཁུ་ཚུར་ལས་གུང་མོ་སྙིང་གར་སྒྲེང་། ཚིག་རྐང་འོག་མ་གཉིས་ལ་རྒྱ་དེ་ཁ་མི་འགྲོལ། མཱུཾ་དྷཱ་ཏི་ཤྭ་རཱི་ལ་ཕྱག་རྒྱ་གཡོན་དུ་བཅས་པ་གཡས་སུ་འགྲོལ་ལ་སེ་གོལ་གཏོགས། དེ་བཞིན་ཏུ་རིགས་གཞན་བཞི་ལའང་ཐོག་མཐའ་རྣམས་དེ་དང་འདྲ་བ་ལས། ཁྱད་པར་ནི། ༀ་སྒྲེང་རྩེ་མོར་འཁོར་ལོ་འབར། །ལ་ལག་གཡས་ཁུ་ཚུར་གྱི་མཛུབ་མོ་སྙིང་གར་སྒྲེང་། མཱཾ་སྒྲེང་རྩེ་མོར་དྲིལ་བསིལ་འབར། །ལ་ལག་གཡོན་ཁུ་ཚུར་གྱི་མཛུབ་མོ་སྙིང་ཀར་སྒྲེང་། སྭཱ་སྒྲེང་རྩེ་མོར་རིན་ཆེན་འབར། ལ་གཡས་ཁུ་ཚུར་གྱི་སྲིན་ལག་སྙིང་གར་སྒྲེང་། མཱཾ་སྒྲེང་རྩེ་མོར་དྲིལ་བསིལ་གནས། ལ་གཡོན་པའི་ཁུ་ཚུར་གྱི་སྲིན་ལག་སྙིང་གར་སྒྲེང་། ཨཱཾ་སྒྲེང་རྩེ་མོར་པདྨ་འབར། ལ་གཡས་ཁུ་ཚུར་གྱི་མཐེ་བོང་སྙིང་གར་སྒྲེང་། པཾ་སྒྲེང་རྩེ་མོར་དྲིལ་བསིལ་འབར། །ལ་ལག་གཡོན་ཁུ་ཚུར་གྱི་མཐེ་བོང་སྙིང་གར་སྒྲེང་། སྭཱ་སྒྲེང་རྩེ་མོར་རལ་གྲི་འབར། །ལ་གཡས་ཁུ་ཚུར་གྱི་མཐེའུ་ཆུང་སྙིང་གར་སྒྲེང་། ཏཱཾ་སྒྲེང་རྩེ་མོར་དྲིལ་བསིལ་འབར། །ལ་གཡོན་པའི་ཁུ་ཚུར་གྱི་མཐེའུ་ཆུང་སྙིང་གར་བསྟན་པ་རྣམས་
སོ། །དེ་ནས། ནང་སེམས་ཡུམ་བཞིའི་ཕྱག་རྒྱ་ནི། ལ་ལག་གཉིས་ཁུ་ཚུར་ཁ་སྦྱར་དཀུ་དཔྱད་གཡོན་དུ་བཞག །རིན་ཆེན་མྱུ་གུ་རལ་གྲི་འབར། །པདྨ་དཀ། ར་པོ་རྡོ་རྗེ་འབར། །ལ་ལག་གཡས་ཁུ་ཚུར་དེ་ལས་མཛུབ་མོ་སྒྲེང་བ་ལ་མཐེ་བོང་སྦྱར་ནས་རིན་པོ་ཆེའི་མྱུ་གུ་སོགས་འཛིན་ཚུལ་སྙིང་གར་བཅའ། ལས་ལ་འཁྲིལ་ཞིང་། ལ་དྲིལ་བུ་དཀྲོལ་ཞིང་། ཆོས་ལ་བརྟེན། །ལ་གཡོན་དཀུར་བརྟེན། ནང་སེམས་ཡུམ་བཞིའི་ཕྱག་རྒྱ་ནི། ལ་པད་བསྐོར་བྱ། གཟུགས་མཛེས་རིན་ཆེན་ཕྲེང་བ་དང་། །པི་ཝཾ་གར་མཁན་མཆོག་ཉིད་ཏེ། །ལ་ལག་གཡོན་ཁུ་ཚུར་སྙིང་གར་ཁ་ཕྱེ་ནས་གུང་སྲིན་གཉིས་ཅུང་ཟད་ནང་དུ་བཀུག་པའི་རྩ་བར་མཐེ་བོང་སྦྱར་བ་མེ་ལོང་སོགས་འཛིན་ཚུལ་དང་ལག་གཡས་འཁྱུད་རྒྱ་བཅའ་ཞིང་། དབུ་རྣམས་འཇོ་ཞིང་འདུད་པའི་ཚུལ། །ཞེས་བསྒོམ། པདྨའི་གདན་ལ་བཞེངས་ནས་ཀྱང་། །ལ་པད་སྐོར་བྱ། མཆོད་བཞེས་དམ་སྐོང་དངོས་གྲུབ་སྩོལ། །ལ་ཕྱག་རྒྱ་གཡས་སུ་བཅས་པ་གཡོན་ཏུ་འགྲོལ་ལ་སེ་གོལ་གཏོགས། ཕྱི་སེམས་བཞི་ཡི་ཕྱག་རྒྱ་ནི། སོགས་ལ་ཡབ་ཡུམ་ཐམས་ཅད་ནང་སེམས་བཞིས་རིགས་འགྲེ་ཤེས་པར་བྱས་ནས་དེ་ཁོ་ན་བཞིན་ཏུ་སྦྱར་རོ། །ཐུབ་དྲུག་ཕྱག་རྒྱ་སྣ་ཚོགས་ཏེ། ཁུ་ཚུར་ཁ་སྦྱར་དཀུ་གཡོན་དུ་བཞག །མདོར་བསྡུས་ཕྱག་རྒྱ་དྲུག་ཡིན་ནོ། །ལ་པད་བསྐོར་བྱ། གསེག་པར་པི་ཝཾ་གོ་ཆ་པོད། རིན་ཆེན་སྒྲོམ་བུ་མེ་ཆུ་འཛིན། །ལ་ལག་གཡས་ཐལ་མོ་ཕྱིར་བསྟན་སྐྱབས་སྦྱིན་དང་། གཡོན་དེའི་རྩར་ཐལ་མོ་གྱེན་བསྟན་གཉིས་སྙིང་གར་བཅའ། པདྨའི་གདན་ལ་བཞེངས་ནས་ཀྱང་། །ལ་པད་སྐོར་བྱ། མཆོད་བཞེས་དམ་སྐོང་དངོས་གྲུབ་སྩོལ། ཨ་ལ་ལ་ཧོ༔ལ་ཕྱག་རྒྱ་གཡས་སུ་བཅས་པ་གཡོན་དུ་འགྲོལ་ཞིང་སེ་གོལ་གཏོགས། སྒོ་བཞི་ཁྲོ་བོའི་ཕྱག་རྒྱ་ནི། །ལ་ཁུ་ཚུར་ཁ་སྦྱར་དཀུ་གཡོན་དུ་བཞགནྲྀ་མགོ་གདེངས་དང་རྡོ་རྗེ་གནོན། །ཐོད་སྦྲུལ་ཆེན་པོ་གནོན་པ་དང་། །རྡོ་རྗེ་རྒྱ་གྲམ་ལས་ཀྱིས་གནོན། །ལ་ལག་གཡས་ཁུ་ཚུར་ལས་མཛུབ་མོ་དང་མཐེས་ཆུང་སྒྲེང་བའི་སྡིག་མཛུབ་གྱིས་ཐོད་དབྱུག་སོགས་དཔུང་པ་གཡས་པའི་ཐད་དུ་གདེངས་ཚུལ་དང་གཡོན་སྡིག་མཛུབ་ཕྱིར་བསྟན་སྙིང་གར་བཅའ། ལྕགས་ཀྱུ་ཞགས་པ་སྥོ་ཊ་ཧོ། །ལ་དགུག་གཞུག་བཅིང་དགྱེས་
ཀྱི་རྒྱ་སྤྱི་ལྟར་བྱ། འབར་བའི་གདན་ལ་བཞེངས་ནས་ཀྱང་། ལ་པད་སྐོར། མཆོད་བཞེས་དམ་སྐོང་དངོས་གྲུབ་སྩོལ། །ཨ་ལ་ལ་ཧོ༔ལ་གཡས་སུ་བཅས་པ་གཡོན་དུ་བཀྲོལ་ཞིང་སེ་གོལ་གཏོགས། འདི་ནི་རྒྱལ་བ་ཐམས་ཅད་ཀྱི། སོགས་ཚིག་རྐང་བཞི་ལ་པད་བསྐོར་ཚར་རེ། ཨ་ལ་ལ་སྟེ་དགྱེས་པར་མཛོད། །ལ་པད་སྐོར་མདུན་ཏུ་ཁ་ཕྱེ་ནས་ཐལ་མོ་སྙིང་གར་སྦྱར་རོ། །ཁྲག་འཐུང་རྒྱལ་པོ་གར་ལ་དགྱེས། །ལ་ལག་གཉིས་ཁུ་ཚུར་ཁ་སྦྱར་དཀུ་གཡོན་ཏུ་བཞག །སྐུ་མདོག་ཞལ་ནི་རྣམ་པར་འགྱུར། །ལ་པད་བསྐོར་བྱ། སྐུ་ཡི་གར་སྟབས་གློག་འགྱུ་བ། ལ་ལག་གཡས་གཡོན་གཉིས་ཀྱི་ཐུགས་ཀར་རྡོ་རྗེ་དང་ཐོད་ཁྲག་སྟེང་འོག་ཏུ་འཛིན་ཚུལ་འོག་གི་ཆེ་མཆོག་བཞིན་བྱ། ཕྱག་རྒྱ་གར་གྱི་མཆོད་པ་བཞེས། །ལ་ཕྱག་རྒྱ་གཡས་སུ་བཅས་པ་གཡོན་ཏུ་འགྲོལ་ལ་སེ་གོལ་གཏོགས། ཧཱུྃ། རྣམ་པར་གྲོལ་བ་མཚོན་པའི་ཕྱིར། དབུས་ཀྱི་ཁྲོ་བོའི་ཕྱག་རྒྱ་ནི། །ལ་ཁུ་ཚུར་ཁ་སྦྱར་དཀུ་གཡོན་ཏུ་བཞག །མཐིང་ནག་ཞལ་གཅིག་ཕྱག་གཉིས་པ། ལ་པད་བསྐོར། གཡས་པ་རྡོ་རྗེ་རྩེ་ལྔ་འཛིན། །ལ་རྡོ་རྗེ་སྙིང་ཀར་གདེངས་སྟབས་སུ་འཛིན། གཡོན་པ་དུང་དམར་ཡུམ་ལ་འཁྱུད། །ལ་གཡོན་ཁུ་ཚུར་སྙིང་གར་ཁ་བྱེ་བའི་མཐེ་བོང་ཅུང་ཟད་དགུག་པས་དུང་དམར་འཛིན་ཚུལ་བྱ། དཔལ་ཆེན་ཆེ་མཆོག་ཐབས་ཀྱི་རྒྱ། །ལ་གཡོན་དྲིལ་བུ་བསིལ་ཞིང་གཡོ་བ་རྡོ་རྗེའི་རྩེ་དེའི་ནང་ཕྱོགས་སུ་བསྐོར་བའི་ཕྱག་རྒྱ་བཅའ། གནམ་ཞལ་དབྱིངས་ཕྱུག་ཕྱག་རྒྱ་ནི། །ལ་ཁུ་ཚུར་ཁ་སྦྱར་དཀུ་གཡོན། ཞལ་གཅིག་ཕྱག་གཉིས་སྐུ་མདོག་མཐིང་། ལ་པད་བསྐོར། གཡས་པ་ཤེས་རབ་ཐབས་ལ་བརྟེན། །ལ་གཡས་འཁྱུད་ཚུལ། གཡོན་པ་དུང་དམར་གཙོ་ལ་སྟོབས། །ལ་གཡོན་ཐོད་ཁྲག་ཞལ་དུ་སྟོབ་ཚུལ། ཀྲོ་དྷཱི་ཤྭ་རཱི་དབྱིངས་ཀྱི་རྒྱ། །ལ་དྲིལ་བུ་བསིལ་ཞིང་རྡོ་རྗེ་ནང་བསྐོར། །འབར་བའི་གདན་ལ་བཞེངས་ནས་ཀྱང་། །ལ་པད་བསྐོར། མཆོད་བཞེས་དམ་སྐོངས་དངོས་གྲུབ་སྩོལ། །ཨ་ལ་ལ་ཧོ༔ལ་ཕྱག་རྒྱ་གཡས་སུ་བཅས་པ་གཡོན་དུ་འགྲོལ་ཞིང་སེ་གོལ་གཏོགས། རིགས་ཀྱི་ཁྲོ་བོའི་ཕྱག་རྒྱ་ལས། །བཛྲ་ཧེ་རུ་ཀའི་ཕྱག་རྒྱ་ནི། །ལ་ལག་གཉིས་ཁུ་ཚུར་ཁ་སྦྱར་དཀུ་གཡོན་ཏུ་བཞག་པ་ལས། མཐིང་ནག་རྡོ་རྗེ་དུང་དམར་
འཛིན། ལ་གཡས་རྡོ་རྗེ་གདེངས་ཐབས་སུ་འཛིན་ཚུལ་དང་། གཡོན་ཁུ་ཚུར་སྙིང་གར་ཁ་ཕྱེ་བའི་མཐེ་བོང་ཅུང་ཟད་དགུག་པས་དུང་དམར་འཛིན་ཚུལ། དཔལ་ཆེན་བཛྲ་ཐབས་ཀྱི་རྒྱ། །ལ་དྲིལ་བསིལ་དང་རྡོ་རྗེ་ནང་བསྐོར་སྔར་བཞིན། དེ་བཞིན་ཏུ། བུདྡྷ་ཧེ་རུ་ཀའི་ཕྱག་རྒྱ་ནི། །ལ་ཁུ་ཚུར་ཁ་སྦྱར་དཀུ་གཡོན་ཏུ་བཞག །སྨུག་ནག་འཁོར་ལོ་དུང་དམར་འཛིན། །ལ་གཡས་འཁོར་ལོ་གདེང་ཚུལ་དང་། གཡོན་དུང་དམར་འཛིན་ཚུལ། དཔལ་ཆེན་བུདྡྷ་ཐབས་ཀྱི་རྒྱ། །ལ་དྲིལ་བསིལ་དང་རྡོ་རྗེ་ནང་བསྐོར། དེས་རིགས་འགྲེས་ཤེས་པར་བྱས་ལ། གཡས་པ། རིན་ཆེན། པདྨ། རྒྱ་གྲམ། དབྱུག་ཐོ། དགྲ་སྟ། རལ་གྲི། བེ་ཅོན་རྣམས་འཛིན་ཚུལ་བྱ་བ་ལས་གཞན་གོང་མ་བཞིན་སྦྱོར་རོ། །ཡུམ་རྣམས་ཀྱང་གཙོ་བོའི་ཡུམ་ཇི་ལྟ་བུ་བཞིན་ཤེས་པར་བྱའོ། །གནས་མ་བརྒྱད་ཀྱི་ཕྱག་རྒྱ་ནི། །ལ་ཁུ་ཚུར་ཁ་སྦྱར་དཀུ་གཡོན་ཏུ་བཞགགཽ་རཱི་བྷན་དམར་ཞིང་དབྱུག་སྔོ། །ལ་གཡས་སྡིགས་མཛུབ་ཀྱིས་ཞིང་དབྱུག་གདེངས་སྟབས་དང་། གཡོན་དུང་དམར་སྙིང་གར་འཛིན་ཚུལ་གོང་བཞིན། ཙཽ་རཱི་མདའ་གཞུ་འགེངས་མ་སེར། །ལ་ལག་གཡོན་ཁུ་ཚུར་ལས་མཛུབ་མོ་དང་མཐེའུ་ཆུང་ཅུང་ཟད་སྒྲེང་བས་དཔུང་པ་གཡོན་པའི་ཐད་གཞུ་འཛིན་ཚུལ། གཡས་ཕྱག་རྒྱ་དང་འདྲ་བས་སྙིང་ག་ན་གཡོན་ཕྱོགས་སུ་མདའ་འཕེན་ཚུལ། པྲ་མོ་ཆུ་སྲིན་རྒྱལ་མཚན་དམར། །ལ་ལག་ཐལ་མོ་རྡོར་བསྡམ་ལས་མཐེ་བོང་དང་མཐེའུ་ཆུང་གཉིས་སྦྱར་ནས་མཐུར་དུ་སྒྲེང་བ། བེ་ཏ་བྱིས་ཟ་རྡོར་འཕྱར་ནག །ལ་གཡས་རྡོ་རྗེ་དཔུང་གཡས་ཐད་དུ་གདེངས་ཚུལ་དང་། གཡོན་ཁུ་ཚུར་ལས་མཐེ་ཆུང་སྒྲེང་བས་བྱིས་པའི་རོ་བཟུང་ནས་ཞལ་ཏུ་གསོལ་ཚུལ། པུཀྐ་དམར་སེར་བྱིས་རྒྱུ་འདྲེན། །ལ་ལག་ཁུ་ཚུར་གཉིས་ཀ་ཁ་ཕྱེ་བའི་མཛུབ་མོ་དང་མཐེ་བོང་རྩེ་སྤྲད་པ། གཡོན་པས་པུས་མོ་གཡོན་པའི་སྟེང་བྱིས་རོ་བཟུང་བའི་རྒྱུ་མ་གཡས་པས་གྱེན་དུ་སྒྲེང་ཚུལ། གྷསྨ་དུང་དམར་དཀྲུག་འཐུང་ལྗང་། །ལ་གཡོན་དུང་དམར་སྙིང་གར་འཛིན་ཚུལ་གོང་བཞིན་བཅས་པ་གཡས་པའི་རྡོ་རྗེས་དཀྲུགས་ནས་ཞལ་ཏུ་འཐུང་ཚུལ། སྨ་ཤ་མཐིང་ནག་བྱིས་སྙིང་ཟ། ལ་ལག་གཉིས་ཁུ་ཚུར་ཁ་ཕྱེ་བའི་གུང་སྲིན་མཐེ་བོང་གསུམ་རྩེ་ནང་བཀུག་པས་བྱིས་རོ་བཟུང་ནས་
སྙིང་ཟ་ཚུལ་བྱ། ཙཎྜ་སེར་སྐྱ་མཆོག་ལུས་འདྲལ། །ལ་ལག་གཉིས་ཁུ་ཚུར་གྱིས་གཡོན་པས་ཞིང་ཆུང་བཟུང་བའི་མགོ་གཡས་པས་བཅད་ནས་ཟ་ཚུལ་གྱིས་གྱེན་དུ་འདྲེན། འབར་བའི་གདན་ལ་པད་སྐོར། མཆོད་བཞེས་དམ་སྐོང་དངོས་གྲུབ་སྩོལ། །ལ་ཕྱག་རྒྱ་གཡོན་ཏུ་བཅས་པ་གཡས་སུ་འགྲོལ་ཞིང་སེ་གོལ་གཏོགས། ཡུལ་མ་བརྒྱད་ཀྱི་ཕྱག་རྒྱ་ནི། །ལ་ལག་གཉིས་ཁུ་ཚུར་ཁ་སྦྱར་དཀུ་གཡོན་ཏུ་བཞག །སིདྷ་ཁ་རོ་བསྣོལ་སེར་སེང་། །ལ་ལག་གཉིས་ཁུ་ཚུར་ཁ་ཕྱེ་བའི་གུང་སྲིན་ཅུང་ཟད་གུག་པའི་ཚིགས་གཉིས་བར་མཐེ་བོང་རྩེ་སྦྱར་བའི་མཁྲིག་མ་བསྣོལ་ནས་རོ་ཟ་ཚུལ། བྱཱ་གྷྲྀ་གནས་བལྟ་བསྣོལ་མ་སྟག །ལ་ལག་གཉིས་ཁུ་ཚུར་ཁ་ཕྱེ་བའི་མཁྲིག་མ་གཉིས་ཐུར་དུ་བསྣོལ་བ་བལྟ་ཚུལ། སྲྀ་ལ་ནག་མོ་བྱིས་ལྡག་ཝ། །ལ་གོང་གི་སྨེ་ཤ་ནི་སོར་བཞག་ཡིན། ཤྭ་ན་འདྲལ་བལྟ་མཐིང་ག་སྤྱང་། །ལ་ལག་གཉིས་ཐལ་མོ་ཁ་བྱེ་བའི་མཐེ་བོང་གཉིས་གུག་པ་ཁ་ཕྱིར་བསྟན་ནས་ཞིང་ཆུང་བཟུང་བ་འདྲལ་ཚུལ་བྱ་བ་ལ་བལྟ། གྷྲྀ་དྷ་མགྲིན་དམར་རྒྱུ་འདྲེན་རྒོད། །ལ་པུཀྐ་བཞིན་རྒྱུ་མ་འདྲེན་ཚུལ། ཀངྐ་རྐང་ཕྲག་སྣར་མགོ་རིང་། །ལ་ཞིང་ཆུང་ཕྲག་པར་ཁུར་བའི་མགོ་དང་རྐང་པ་གཉིས་ཁུ་ཚུར་གྱིས་བཟུང་བ་མདུན་ཏུ་སྣར་ཚུལ་བྱ། ཀཱ་ཀ་ཁ་རོ་བྷན་གྲི་ནག །ལ་གཡོན་བྷན་དྷ་སྙིང་ག་དང་། གཡས་རལ་གྲི་གདེངས་ཚུལ་སྔ་མ་བཞིན། ཨཱུ་ལུ་ལྕགས་ཀྱུ་མཐིང་ནག་འུག །ལ་གཡོན་སྡིགས་མཛུབ་ཀྱིས་མི་སྙིང་སྙིང་གར་འཛིན་ཚུལ་དང་། གཡས་ཁུ་ཚུར་ལས་མཛུབ་མོ་ལྕགས་ཀྱུ་ལྟར་བྱས་པ་གདེངས་སྟབས། འབར་བའི་གདན་ལ་བཞེངས་ནས་ཀྱང་། །ལ་པད་བསྐོར། མཆོད་བཞེས་དམ་སྐོངས་དངོས་གྲུབ་སྩོལ། །ཨ་ལ་ལ་ཧོཿལ་ཕྱག་རྒྱ་གཡོན་ཏུ་བཅས་པ་གཡས་སུ་འགྲོལ་ལ་སེ་གོལ་གཏོགས། །སྒོ་མ་བཞི་ཡི་ཕྱག་རྒྱ་ནི། །ལ་ཁུ་ཚུར་ཁ་སྦྱར། རྟ་གདོང་སྔོན་མོ་ལྕགས་ཀྱུ་འཛིན། །ལ་གཡོན་པའི་ཁུ་ཚུར་གྱི་མཐེའུ་ཆུང་གཡས་པའི་མཛུབ་མོས་དགུག་པ། ཕག་གདོང་ནག་མོ་མཆེ་ཞགས་ཅན། །ལ་ལག་གཉིས་ཁུ་ཚུར་བཅས་པ་རྒྱབ་སྤྲད་ཀྱིས་མཛུབ་མོས་གཡོན་གྱི་མཛུབ་མོ་དང་། གཡས་ཀྱི་མཐེའུ་ཆུང་གིས་གཡོན་ཀྱི་མཐེའུ་ཆུང་བཀུག་ནས་སྦྲེལ། སེང་གདོང་དམར་མོ་ལྕགས་སྒྲོགས་སྡོམ། །ལ་
ལག་གཉིས་ཁུ་ཚུར་གྱེན་བསྟན་གྱི་མཛུབ་མོ་གཉིས་དང་། མཐེ་ཆུང་གཉིས་སོ་སོར་སྦྲེལ་བ། སྤྱང་གདོང་ལྗང་ནག་དྲིལ་འཁྲོལ་དགྱེས། །ལ་ལག་གཉིས་ཁུ་ཚུར་གྱི་མཁྲིག་མ་གཉིས་རྒྱབ་སྤྲད་པ། འབར་བའི་གདན་ལ་བཞེངས་ནས་ཀྱང་། མཆོད་བཞེས་དམ་སྐོངས་དངོས་གྲུབ་སྩོལ། ཨ་ལ་ལ་ཧོ༔ལ་སྔར་བཞིན་པད་བསྐོར་དང་བཅའ་འགྲོལ་སེ་གོལ་གཡས་སུ་གཏོགས། འདི་ནས་རྡོར་དྲིལ་བཞག་ལ། འཇིག་རྟེན་འདས་དང་མ་འདས་པའི། །ཡེ་ཤེས་ཐོབ་པར་བྱ་བའི་ཕྱིར། །མ་མོ་རྣམས་ཀྱི་ཕྱག་རྒྱ་ནི། །ལ་ལག་གཉིས་ཁུ་ཚུར་ཁ་སྦྱར་གཡོན་དུ་བཞག་ལ། སྲིན་མོ་སྨུག་ནག་ཐོད་རློན་འཆང་། །ལ་ལག་གཉིས་ཀའི་གུང་སྲིན་གཤིབས་ཕན་ཚུན་དུ་བསྣོལ་བའི་རྩ་བ་མཐེ་བོང་དང་མཛུབ་མོ་རྩེ་སྤྲད་པས་འཁྱུད་པ་མིག་དང་སྣ། མཐེ་ཆུང་གཉིས་སྦྱར་བས་ཁའི་ཚུལ་དུ་བྱས་པ་ཐོད་རློན་གྱི་རྒྱ་བཅའ། ཚངས་མ་དམར་མོ་པདྨ་བསྣམས། །ལ་ལག་གཉིས་པདྨ་ལྟར་ཐལ་མོ་ཁ་གྱེན་དུ་ཕྱེ་བ། ལྷ་ཆེན་དཀར་ལྗང་ཏྲི་ཤུ་ལ། །ལ་ལག་གཡས་ཁུ་ཚུར་གྱི་གུང་མཛུབ་སྲིན་ལག་རྩེ་གསུམ་གྱི་ཚུལ་དུ་སྒྲེང་བ། རྟོག་འདོད་སྔོན་མོ་འཁོར་ལོ་འཆང་། །ལ་ཐལ་མོ་གཉིས་རྒྱབ་སྤྲད། སོར་མོ་རྣམས་བསྣོལ་བ། གཞོན་ནུ་དམར་མོ་མདུང་ཐུང་འཕེན། །ལ་མདུང་ཐུང་འཕེན་ཚུལ་གོང་གི་ཙཽ་རཱི་མ་སོར་བཞག །བརྒྱ་བྱིན་དཀར་མོ་ཨནྟ་གདེངས། །ལ་གཡས་གཡོན་གཉིས་ཀའི་མཛུབ་མོ་དང་མཐེ་བོང་རྩེ་སྤྲད་པའི་ཐལ་མོ་གཡས་ཕྱིར་བསྟན་དང་། གཡོན་གྱེན་བསྟན། རྡོ་རྗེ་སེར་མོ་ཙན་དན་འཐུང་། །ལ་ཐལ་མོ་གཉིས་ཁ་ཕྱེ་བའི་མཛུབ་གུང་སྲིན་ཆུང་བཞི་ཕན་ཚུན་དུ་བསྣོལ། མཐེ་བོང་གཉིས་མཛུབ་མོའི་འགྲོ་དུ་གཉིས་སུ་སྦྱར་བས་ཐོད་པའི་རྒྱ་ནས་འཐུང་ཚུལ་བྱ། བདུད་རྩི་དམར་མོ་པདྨ་བསྣམས། །ལ་གོང་གི་ཚངས་མ་དང་རིགས་འགྲེ། ཟླ་བ་དཀར་མོ་པུཎྜ་རཱི། །ལ་གཡོན་གྱི་ཐལ་མོ་ཕྱིར་བསྟན་གྱི་སོར་མོ་རྣམས་ཡིད་ཙམ་ནང་དུ་རུབ་པའི་རྩ་བར་གཡས་ཀྱི་དེ་ཁ་ལྟར་བྱས་པ་གྱེན་བསྟན་དུ་སྦྱང་བ། བེ་ཅོན་ལྗང་ནག་དབྱུག་ཐོ་འཕྱར། །ལ་ལག་གཉིས་རྡོར་བསྡམས་ལས་གུང་མོ་གཉིས་སྦྲེང་བའི་རྩེ་སྦྱར་ནས་ཚིགས་ཅུང་ཟད་བཀུག་པ། སྲིན་མོ་དམར་མོ་དུང་ཁྲག་འཐུང་། །ལ་རྡོ་རྗེ་སེར་མོ་ཙཎྜ་སོར་བཞག །ཟ་བ་
ལྗང་ནག་བ་སུ་འདྲེན། །ལ་གོང་གི་པུཀྐ་རྒྱུ་འདྲེན་སོར་བཞག །དགའ་བ་དམར་མོ་ཀ་དར་འཕྱར། །ལ་ཁུ་ཚུར་གཡས་ཀྱི་གུང་མཛུབ་གཤིབས་ནས་རལ་གྲི་ལྟར་སྒྲེང་བ། སྟོབས་ཆེན་དཀར་མོ་གཤོལ་མདའ་འཛིན། །ལ་ལག་གཡས་ཀྱི་གུང་མོའི་རྩེ་ཅུང་ཟད་བཀུག་པ་སྒྲེང་། དེའི་ཚིགས་དབུས་མར་མཛུབ་མོ་དང་སྲིན་ལག་གི་རྩེ་བཀུག་པ་སྦྱར་མཐེ་བོང་དང་མཐེ་ཆུང་ཀྱང་དེའི་གཡས་གཡོན་དུ་རྩེ་བཀུག་པ། རྡོ་རྗེ་སེར་མོ་སྤུ་གྲིས་གཅོད། །ལ་དགའ་བ་དཀར་མོ་སོར་བཞག །འདོད་པ་དམར་མོ་མདའ་གཞུ་འགེངས། །ལ་གོང་གི་ཙཽ་རཱི་མ་སོར་བཞག །ནོར་སྲུང་དཀར་མོ་བུམ་པ་འཛིན། །ལ་ལག་པ་གཉིས་གུང་སྲིན་གཤིབས་པ་ཕན་ཚུན་བསྣོལ་བ་མཐེ་བོང་གིས་མནན་མཛུབ་མོ་དང་མཐེའུ་ཆུང་སོ་སོར་རྩེ་སྦྱར་བ་སྒྲེང་། རླུང་ལྷ་སྔོན་མོ་བ་དན་འཕྱར། །ལ་གོང་གི་ལྷ་ཆེན་སོར་བཞག །གསོད་བྱེད་དཀར་མོ་རལ་གྲི་འཛིན། །ལ་དགའ་བ་དམར་མོ་སོར་བཞག །མི་མོ་དམར་མོ་གསལ་ཤིང་འཕྱར། །ལ་གཡས་ཁུ་ཚུར་གྱི་མཐེ་བོང་གྱེན་དང་མཛུབ་མོ་ཕྲེད་དུ་ཁ་ཕྱེ་ནས་སྒྲེང་བ། ཕག་གདོང་ནག་མོ་མཆེེ་ཞགས་ཅན། །ལ་ཁུ་ཚུར་གཉིས་ཁ་འགྲམ་གཡས་གཡོན་དུ་བཞག་པའི་མཐེའུ་ཆུང་མཆེ་བ་ལྟར་སྒྲེང་བ། རྒན་བྱེད་དམར་མོ་ཞིང་ཆུང་ཟ། །ལ་གོང་གི་སྨ་ཤ་ནི་སོར་བཞག །སྣ་ཆེན་དཀར་ལྗང་ཐོད་ཁྲག་འཐུང་། །ལ་རྡོ་རྗེ་སོར་མོ་ཙནྟན་སོར་བཞག །ཆུ་ལྷ་སྔོན་མོ་སྦྲུལ་ཞགས་ཅན། །ལ་གཡས་སྡིག་མཛུབ་ཀྱིས་བར་སྣང་ལ་སྦྲུལ་ཞགས་ཀྱིས་ཁྱོག་འགྲོས་འབྲི་ཚུལ་ཐུར་བསྟན་གཅིག་དང་གྱེན་བསྟན་ཀྱང་བྱ། རྡོ་རྗེ་ནག་མོ། སེར་མོ། དམར་མོ། ལྗང་ནག་བཞི་ལ་གོང་གི་སྒོ་མ་བཞིའི་ཕྱག་རྒྱ་སོར་བཞག་ལས་བསྒྱུར་ཁ་མེད། དབང་ཕྱུག་མའི་ཕྱག་རྒྱ་དེ་རྣམས་ཀྱི་སྐབས་ལག་གཡས་གཡོན་གཉིས་ཀས་ཕྱག་རྒྱ་བཅའ་དགོས་པ་རྣམས་ལ་དོགས་པ་མི་ཟ་ཡང་། ལག་གཡས་ཁོ་ནས་ཕྱག་རྒྱ་བཅའ་དུས་གཡོན་ཐོད་ཁྲག་སྙིང་གར་འཛིན་ཚུལ་ཀྱང་བྱ་དགོས་པ་ཡིན་ནོ། །འདི་ནི་རྒྱལ་བ་ཐམས་ཅད་ཀྱི། སོགས་ལ་ཞི་བ་བཞིན་ཏུ་སྦྱར་རོ། །ཞེས་ཞི་ཁྲོ་རབ་འབྱམས་ཀྱི་དཀྱིལ་འཁོར་ཆེན་པོའི་སྒྲུབ་ཐབས་འཁོར་བ་ཀུན་སྒྲོལ་གྱི་ལྷན་ཐབས་ངོ་མཚར་རིན་ཆེན་ཕྲེང་བ་ཞེས་བྱ་བ་འདི་ཡང་། མདོ་ཁམས་
ཞེ་ཆེན་དགོན་གྱི་མཆོག་སྤྲུལ་ཤེས་བྱ་ཀུན་ལ་མ་ཐོགས་པའི་མཁྱེན་པ་ཅན། པདྨ་གསང་སྔགས་བསྟན་འཛིན་ཆོས་རྒྱལ་གྱིས་དུས་མཐའི་སེམས་ཅན་རྣམས་ལ་ཕན་པའི་ཐུགས་བསྐྱེད་རྣམ་པར་དག་པས། ལྷ་ཚོགས་རྣམས་ལ་ཕྱག་རྒྱའི་མཆོད་པས་དགྱེས་པ་བསྐྱེད་ཚུལ་དང་། ཆེ་བའི་ཡོན་ཏན་རྗེས་སུ་དྲན་པའི་གཞི་བསྟོད་རྒྱས་པར་བྱ་ཚུལ། བཟླས་བརྗོད་ཀྱི་ཐུགས་དམ་བསྐུལ་བའི་གྲངས་ཚད་སོགས་ལྷན་ཐབས་སུ་སྦྱར་ཆོག་པ་ཞིག་དགོས་པའི་བཀའ་ནན་ཡང་ཡང་ཕེབས་པའི་དགོངས་པ་སྐོང་ཕྱིར་རྨོངས་བརྟུལ་ཨོ་ཌཱི་ཡ་ནས་དམ་པ་གོང་མ་རྣམས་ཀྱི་གསུང་རབས་ལས། རྒྱལ་བའི་བཀའ་འགྱུར་རིན་པོ་ཆེའི་ལུང་ཞུ་དུས་ཕྱོགས་གཅིག་ཏུ་བཀོད་པ་ཤིན་ཏུ་བཀྲ་ཤིས་པར་གྱུར་ཅིག །།