གཉིས་པ་རང་ལུགས་བཤད་པ།

གཉིས་པ་རང་ལུགས་བཤད་པ་ལ།

ཡུལ་དང་ཡུལ་ཅན་གྱི་མཚན་ཉིད་ཡོད་དེ། གཏན་ཚིགས་རིགས་པའི་དོན་བསྡུས་ལས། ཡུལ་དང་ཡུལ་ཅན་དུ་དབྱེ་བ་ལ། མཚན་ཉིད་རིམ་པ་ལྟར་རིག་པར་བྱ་བ་དང༌། རིག་བྱེད་དམ་སྟོན་བྱེད་ཡིན་པའོ། །ཞེས་གསུངས་པའི་ཕྱིར། དེ་ལས། ཡུལ་ལ་དབྱེ་ན། ཡུལ་དུ་བྱས་ཚུལ་མི་འདྲ་བའི་སྒོ་ནས་དང༌། རྟོགས་དཀའ་སླའི་སྒོ་ནས་དབྱེ་ཚུལ་དང་གཉིས། དང་པོ་ལ་དབྱེ་ན། སྣང་ཡུལ། བཟུང་ཡུལ། ཞེན་ཡུལ། འཇུག་ཡུལ་དང་བཞིའོ། །མཚན་ཉིད་ནི་རིམ་པ་ལྟར། སྣང་ནས་རིག་པར་བྱ་བ་དང༌། རང་འཛིན་ཤེས་པ་མ་འཁྲུལ་བ་ལ་རང་འདྲ་བའི་རྣམ་པ་དངོས་སུ་སྐྱེད་བྱེད་ཀྱི་བེམ་པོ་དང༌། ཞེན་ནས་རིག་པར་བྱ་བ་དང༌། ཚད་མའི་གཞལ་བ་ལས་བླང་དོར་བྱར་རུང་བའོ། །སྣང་ཡུལ་ཤེས་པ་ཀུན་ལ་ཡོད། །བཟུང་ཡུལ་དོན་རིག་གཉིས་ཀྱིས་འཛིན། །ཞེན་ཡུལ་རྟོག་པ་ཁོ་ནས་ཞེན། །འཇུག་ཡུལ་ལ་ནི་ཚད་མ་དང༌། །དཔྱད་ཤེས་སྐྱེས་བུ་གསུམ་གྱིས་འཇུག །ཅེས་གསུངས་པའི་ཕྱིར། གཞན་ལུགས་ལ་རྟོག་པའི་སྣང་ཡུལ་དེ་བཟུང་ཡུལ་དུ་བཞེད་ཀྱང་གོང་གི་མཚན་ཉིད་བཞག་ཚུལ་དང་བསྟུན་ན་བཟུང་ཡུལ་ལ་རྟོག་མེད་ཤེས་པའི་གཟུང་དོན་དགོས་པའོ། །དེ་ལས། རྟོགས་དཀའ་སླའི་སྒོ་ནས་དབྱེ་ན། གཞལ་བྱ་མངོན་གྱུར་ལྐོག་གྱུར་ཤིན་ཏུ་ལྐོག་གྱུར་གསུམ་མོ། །མཚན་ཉིད་རིམ་པ་ལྟར། རྟོགས་པ་པོའི་མངོན་སུམ་དང༌། རྗེས་དཔག་མཚན་ཉིད་པས་དང༌། ལུང་ཙམ་གྱིས་གྲུབ་པའི་དོན་ཞེས་པའོ། །ཞེས་གསུངས་སོ། །ཡང་ཡུལ་ལ་དབྱེ་ན། ཕུང་པོ་ཁམས་སྐྱེ་མཆེད་དང་གསུམ། དེ་དག་གི་མཚན་ཉིད་སོགས་ནི། གཏན་ཚིགས་རིགས་པའི་དོན་བསྡུས་ལས། ཕུང་པོ་དང་ཁམས་དང་སྐྱེ་མཆེད་ལ་མཚན་ཉིད་རིམ་པ་ལྟར་དུ་མ་སྤུངས་པའི་དངོས་པོ་དང༌། རིགས་ཀྱི་དོན་བྱེད་པ་དང༌། རྣམ་ཤེས་སྐྱེ་བའི་སྒོར་གྱུར་པ་ཞེས་པའོ། ། དང་པོ་ཕུང་པོ་ནི་ལྔ་སྟེ། གཟུགས་ཀྱི་ཕུང་པོ་དང༌། ཚོར་བའི་དང༌། འདུ་ཤེས་ཀྱི་དང༌། འདུ་བྱེད་ཀྱི་དང༌། རྣམ་པར་ཤེས་པའི་ཕུང་པོ་དང་ལྔའོ། ། མཚན་ཉིད་རིམ་པ་ལྟར། དུ་མ་སྤུངས་པ་གང་ཞིག འབྱུང་བ་བཞིའམ་འབྱུང་བཞི་རྒྱུར་བྱས་པའི་བེམ་དངོས་དང༌། གང་ཞིག རང་ཡུལ་ཉམས་སུ་མྱོང་བའི་སེམས་བྱུང་དང༌། གང་ཞིག ཡུལ་ལ་ཚད་མར་འཛིན་པའི་སེམས་བྱུང་དང༌། གང་ཞིག གཟུགས་སེམས་ཚོར་འདུ་བཞི་ལས་གཞན་དུ་གྱུར་བའི་འདུས་བྱས་དང༌། གང་ཞིག དོན་གྱི་ངོ་བོ་རང་སྟོབས་ཀྱིས་རིག་པ་ཞེས་པའོ། །དབྱེ་ན། དང་པོ་ལ། དབང་པོ་ལྔ་དང༌། དོན་ལྔ་དང༌། རྣམ་པར་རིག་བྱེད་མ་ཡིན་པའི་གཟུགས་དང་བཅུ་གཅིག་གོ །གཉིས་པ་ཚོར་བ་བདེ་སྡུག་བཏང་སྙོམས་གསུམ་མོ། །གསུམ་པ་ཆུང་ངུ་དང་རྒྱ་ཆེན་པོར་གྱུར་བ་དང་ཚད་མེད་པ་གསུམ་མོ། །བཞི་བ་ལ་ལྡན་པའི་འདུ་བྱེད་རྣམས་དང༌། ལྡན་པ་མ་ཡིན་པའི་འདུ་བྱེད་གཉིས་སོ། ། ལྔ་བ་རྣམ་ཤེས་ཚོགས་དྲུག་གམ་བརྒྱད་དེ་སྔ་མ་བཞིན་ནོ། །ཞེས་གསུངས་པའི་ཕྱིར། མཚན་ཉིད་དེ་དག་དང་དབྱེ་བ་ལ་ཅུང་ཟད་ཞིབ་ཆ་དགོས་སོ། །རང་རིག་འདུ་བྱེད་ཀྱི་ཕུང་པོའི་ནང་དུ་འདུས་ཀྱང་མཚུངས་ལྡན་འདུ་བྱེད་དང་མཚུངས་ལྡན་མ་ཡིན་པའི་འདུ་བྱེད་གང་ཡིན་མཁས་པ་རྣམས་བཞེད་པ་མི་འཐུན་མོད། བདག་གི་རྣམ་པར་རྟོག་པ་ལ་ཕུང་པོ་ལྔའི་རྣམ་བཞག་གཙོ་ཆེར་འཁོར་ལོ་དང་པོའི་སྐབས་སུ་གསུངས་ལ། འཁོར་ལོ་དང་པོའི་སྐབས་སུ་རང་རིག་གསལ་བར་མ་བསྟན་ལ། དེའི་དབང་དུ་བྱས་ན་རང་རིག་ཕུང་པོ་གང་ཡིན་དཔྱད་མི་དགོས་ལ། བཀའ་འཁོར་ལོ་ཐ་མའི་དགོངས་འགྲེལ་རྣམས་ལས་རང་རིག་གསུངས་པས་དེ་ལྟར་ན་རང་རིག་མཚུངས་པར་ལྡན་པ་མ་ཡིན་པའི་འདུ་བྱེད་ཡིན་ཀྱང་གཟུགས་ཤེས་གང་རུང་མ་ཡིན་པའི་ལྡན་མིན་མ་ཡིན་ནམ་སྙམ། རང་རིག་ཡིན་ན་འདུ་བྱེད་ཀྱི་ཕུང་པོ་ཡིན་པས་མ་ཁྱབ་སྟེ། དོན་དམ་སོ་སོར་རང་རིག་པའི་ཡེ་ཤེས་གཞི་གྲུབ་པའི་ཕྱིར། ལྡན་མིན་འདུ་བྱེད་ཀྱི་མཚན་ཉིད་ཡོད་དེ། གཟུགས་དང་སེམས་དང་སེམས་ལས་བྱུང་བ་གང་རུང་གི་གནས་སྐབས་ལ་བཏགས་པའི་དེ་ཉིད་གཞན་བརྗོད་མེད་པའི་དངོས་པོ་དེ་ཡིན་པའི་ཕྱིར། གཉིས་པ་ཁམས་ལ་དབྱེ་ན། གཟུགས་ཀྱི་ཁམས་དང༌། སྒྲའི་ཁམས་དང། དྲིའི་ཁམས་དང༌། རོའི་ཁམས་དང༌། རེག་བྱའི་ཁམས་དང༌། ཆོས་ཁམས་དང་བཟུང་བ་ཡུལ་གྱི་ཁམས་དྲུག མིག་གི་ཁམས་དང༌། རྣ་བའི་ཁམས་དང༌། སྣའི་ཁམས་དང༌། ལྕེའི་ཁམས་དང༌། ལུས་ཀྱི་ཁམས་དང༌། ཡིད་ཀྱི་ཁམས་ཏེ་རྟེན་དབང་པོའི་ཁམས་དྲུག མིག་གི་རྣམ་པར་ཤེས་པའི་ཁམས་དང༌། རྣ་བའི་རྣམ་པར་ཤེས་པའི་ཁམས་དང༌། སྣའི་རྣམ་པར་ཤེས་པའི་ཁམས་དང༌། ལྕེའི་རྣམ་པར་ཤེས་པའི་ཁམས་དང༌། ལུས་ཀྱི་རྣམ་པར་ཤེས་པའི་ཁམས་དང༌། ཡིད་ཀྱི་རྣམ་པར་ཤེས་པའི་ཁམས་ཏེ་བརྟེན་པ་རྣམ་ཤེས་ཀྱི་ཁམས་དྲུག་དང་བཅོ་བརྒྱད་དོ། །གསུམ་པ་སྐྱེ་མཆེད་ལ་དབྱེ་ན། གཟུགས་ཀྱི་སྐྱེ་མཆེད་ནས་ཆོས་ཀྱི་སྐྱེ་མཆེད་བར་ཕྱིའི་སྐྱེ་མཆེད་དྲུག་དང༌། མིག་གི་སྐྱེ་མཆེད་ནས། ཡིད་ཀྱི་སྐྱེ་མཆེད་བར་ནང་གི་སྐྱེ་མཆེད་དྲུག་སྟེ་བཅུ་གཉིས་སོ། །རྒྱས་པར་ཆོས་མངོན་པ་སོགས་ལས་ཤེས་པར་བྱའོ། །ཡུལ་ཅན་ལ་དབྱེ་ན། གཏན་ཚིགས་རིགས་པའི་དོན་བསྡུས་ལས། ཡུལ་ཅན་ལ་བློ་མིན་པ་དང་ཡིན་པའི་ཡུལ་ཅན་གཉིས་སོ། །དང་པོ་ལ་གང་ཟག་དང་རྗོད་བྱེད་གཉིས་སོ། །ཞེས་གསུངསལ། ལྡན་མིན་འདུ་བྱེད་དུ་གྱུར་བའི་ཡུལ་ཅན་ཡོད་དེ། གང་ཟག་དེ་ཡིན་པའི་ཕྱིར། གཟུགས་སུ་གྱུར་བའི་ཡུལ་ཅན་ཡོད་དེ། དབང་པོ་གཟུགས་ཅན་པ་དང༌། རྗོད་བྱེད་ཀྱི་སྒྲ་དེ་ཡིན་པའི་ཕྱིར། བློ་ཡིན་པའི་ཡུལ་ཅན་ལ། རྟོག་པ་དང་རྟོག་མེད་གཉིས་དང༌། ཚད་མ་དང་ཚད་མིན་གྱི་བློ་གཉིས་དང༌། སེམས་སེམས་བྱུང་གཉིས་དང་གསུམ། དང་པོ་རྟོག་པ་དང་རྟོག་མེད་ཀྱི་ཤེས་པ་གཉིས་ཀྱི་མཚན་ཉིད་ནི་རིམ་པ་ལྟར། བརྗོད་བྱ་རྗོད་བྱེད་འདྲེས་རུང་དུ་སྣང་བའི་ཞེན་རིག་དང༌། རང་ཡུལ་གྱི་རྣམ་པ་གསལ་བར་སྣང་བའི་བློའོ། །གཉིས་པ་ཚད་མ་དང་ཚད་མིན་གྱི་ཤེས་པའི་མཚན་ཉིད་རིམ་པ་ལྟར། རང་གི་གཞལ་བྱ་ལ་གསར་དུ་མི་བསླུ་བའི་ཤེས་པ་དང༌། རང་གི་གཞལ་བྱ་ལ་གསར་དུ་མི་བསླུ་བ་མིན་པའི་ཤེས་པའོ། །དང་པོ་ལ་དབྱེ་ན། མངོན་སུམ་ཚད་མ་དང༌། རྗེས་དཔག་ཚད་མ་གཉིས། དེ་གཉིས་ཀའི་མཚན་ཉིད་ནི་རིམ་པ་ལྟར། རྟོག་པ་དང་བྲལ་ཞིང་འཕྲལ་རྐྱེན་གྱིས་མ་འཁྲུལ་བའི་གསར་དུ་མི་བསླུ་བའི་ཤེས་པ་དང༌། ཚུལ་གསུམ་པའི་རྟགས་ལས་རང་གི་གཞལ་བྱ་ལྐོག་གྱུར་ལ་གསར་དུ་མི་བསླུ་བའི་ཤེས་པའོ། །དང་པོ་ལ་མངོན་སུམ་ཡང་དག་དང་མངོན་སུམ་ལྟར་སྣང་གཉིས། དང་པོ་ལ། དབང་པོའི་མངོན་སུམ་ཚད་མ་དང༌། ཡིད་ཀྱི་དང༌། རང་རིག་དང༌། རྣལ་འབྱོར་མངོན་སུམ་ཚད་མ་དང་བཞི། མཚན་ཉིད་ནི་རིམ་པ་ལྟར། རྟོག་པ་དང་བྲལ་ཞིང་འཕྲལ་རྐྱེན་གྱིས་མ་འཁྲུལ་བའི་གསར་དུ་མི་བསླུ་བའི་དབང་པོའི་ཤེས་པ་དང༌། རྟོག་པ་དང་བྲལ་ཞིང་འཕྲལ་རྐྱེན་གྱིས་མ་འཁྲུལ་བའི་གསར་དུ་མི་བསླུ་བའི་ཡིད་ཀྱི་ཤེས་པ་དང༌། རྟོག་པ་དང་བྲལ་ཞིང་འཕྲལ་རྐྱེན་གྱིས་མ་འཁྲུལ་བའི་གསར་དུ་མི་བསླུ་བའི་ཁ་ནང་ལྟས་ཀྱི་ཤེས་པ་དང༌། རང་གི་བདག་རྐྱེན་ཞི་ལྷག་ཟུང་འབྲེལ་ལ་བརྟེན་ནས་རང་ཡུལ་ཡང་དག་པའི་དོན་ལ་རྟོག་པ་དང་བྲལ་ཞིང་འཕྲལ་རྐྱེན་གྱིས་མ་འཁྲུལ་བའི་གསར་དུ་མི་བསླུ་བའི་ཤེས་པའོ། །དང་པོ་ལ་མིག་གི་མངོན་སུམ་ཚད་མ་སོགས་ལྔའོ། །མཚན་ཉིད་ནི་རིམ་པ་ལྟར། རང་གི་ཐུན་མོང་མ་ཡིན་པའི་བདག་རྐྱེན་མིག་དབང་ལ་བརྟེན་ནས་རྟོག་པ་དང་བྲལ་ཞིང་འཕྲལ་རྐྱེན་གྱིས་མ་འཁྲུལ་བའི་གསར་དུ་མི་བསླུ་བའི་ཤེས་པ་ཞེས་སོགས་འདོན་པ་བསྒྱུར་རོ། །གཉིས་པ་མངོན་སུམ་ལྟར་སྣང་གི་མཚན་ཉིད་ནི། གཏན་ཚིགས་རིགས་པའི་དོན་བསྡུས་ལས། མངོན་སུམ་ལྟར་སྣང་ལ་མཚན་ཉིད། རང་གི་སྣང་ཡུལ་ལ་འཁྲུལ་བའི་བློ། དབྱེ་ན་རྟོག་པ་དང་རྟོག་མེད་མངོན་སུམ་ལྟར་སྣང་གཉིས་སོ། །མཚན་ཉིད་ནི་རིམ་པ་ལྟར། རང་གི་སྣང་ཡུལ་ལ་འཁྲུལ་བའི་ཞེན་བློ་དང༌། རང་གི་བདག་རྐྱེན་དབང་པོ་སླད་པ་ལས་སྐྱེས་པའི་ཞེན་བྲལ་གྱི་བློའོ། །དབྱེ་ན། དང་པོ་ལ། འཁྲུལ་དང་ཀུན་རྫོབ་ཤེས་པ་དང༌། །རྗེས་དཔག་རྗེས་སུ་དཔག་ལས་བྱུང༌། །དྲན་དང་མངོན་འདོད་ཅེས་བྱའོ། །ཞེས་པ་ལྟར་དྲུག་གོ །གཉིས་པ་ལ་ཡིད་ཤེས་དང༌། དབང་ཤེས་ཀྱི་དབང་གིས་གཉིས་སོ། །ཞེས་གསུངས་སོ། །གཉིས་པ་རྗེས་དཔག་ཚད་མ་ལ་དབྱེ་ན་གསུམ་ཡོད་དེ། དངོས་སྟོབས་རྗེས་དཔག་ཚད་མ་དང༌། གྲགས་པའི་རྗེས་དཔག་ཚད་མ་དང༌། ཡིད་ཆེས་ཀྱི་རྗེས་དཔག་དང་གསུམ་ཡོད་པའི་ཕྱིར། དངོས་སྟོབས་རྗེས་དཔག་ཚད་མ་བཞག་ཏུ་ཡོད་དེ། སྡུག་བདེན་མི་རྟག་པ་རྟོགས་པའི་རྗེས་དཔག་ལྟ་བུའོ། །གཉིས་པ་གྲགས་པའི་རྗེས་དཔག་བཞག་ཏུ་ཡོད་དེ། རི་བོང་ཅན་ལ་ཟླ་བ་ཞེས་བརྗོད་པའི་སྒྲས་བརྗོད་རུང་དུ་རྟོགས་པའི་རྗེས་དཔག་ཚད་མ་ལྟ་བུའོ། །ཡིད་ཆེས་རྗེས་དཔག་ཚད་མ་བཞག་ཏུ་ཡོད་དེ། ལུང་གི་ཚད་མ་དེ་ཡིན་པའི་ཕྱིར། གཉིས་པ་ཚད་མིན་ལ་དབྱེ་ན། མ་རྟོགས་ལོག་རྟོག་ཐེ་ཚོམ་དཔྱད་ཤེས་དང་བཞི། མ་རྟོགས་པའི་བློའི་མཚན་ཉིད། རང་ཡུལ་ལ་ངེས་པ་འདྲེན་མི་ནུས་པའི་བློ། ལོག་རྟོག་གི་མཚན་ཉིད་ཡོད་དེ། དེ་མ་ཡིན་ལ་དེར་ཞེན་པའི་བློ། ཐེ་ཚོམ་གྱི་བློའི་མཚན་ཉིད། རང་ཡུལ་གཏན་ལ་མ་ཕབ་པར་ཡིད་གཉིས་གྱུར་བའི་བློ། དཔྱད་ཤེས་ཀྱི་མཚན་ཉིད། རང་གི་ཚད་མ་སྔ་མའི་བཟུང་ཟིན་གྱི་དོན་ལ་བསྣན་ནས་འཇུག་པའི་ཤེས་པ་དེའོ། །གསུམ་པ་སེམས་སེམས་བྱུང་གཉིསཀྱི་མཚན་ཉིད་ནི། ། གཏན་ཚིགས་དོན་བསྡུས་ལས། སེམས་སེམས་བྱུང་གི་མཚན་ཉིད་ནི་རིམ་པ་ལྟར། དོན་གྱི་ངོ་བོ་རང་སྟོབས་ཀྱིས་རིག་ཅིང་དོན་གྱི་ཁྱད་པར་གཞན་སྟོབས་ཀྱིས་རིག་པའི་བློ་དང༌། དོན་གྱི་ཁྱད་པར་རང་སྟོབས་ཀྱིས་རིག་ཅིང་དོན་གྱི་ངོ་བོ་གཞན་སྟོབས་ཀྱིས་རིག་པའི་བློ་ཞེས་པའོ། །ཞེས་གསུངས་པའི་ཕྱིར། ས་བཟང་གི་ཀུན་བཏུས་འགྲེལ་བ་ལྟར་ན་མཚན་ཉིད་དེ་གཉིས་ལ་ཞིབ་ཆ་དགོས་སོ། །དང་པོ་སེམས་ལ་དབྱེ་ན། མིག་གི་རྣམ་ཤེས་ནས་ཡིད་ཀྱི་རྣམ་ཤེས་བར་རྣམ་ཤེས་ཚོགས་དྲུག་དང༌། ཀུན་གཞིའི་རྣམ་ཤེས་དང་ཉོན་ཡིད་དང་བརྒྱད་དོ། །མིག་གི་རྣམ་པར་ཤེས་པའི་མཚན་ཉིད་ཡོད་དེ། རང་གི་ཐུན་མོང་མ་ཡིན་པའི་བདག་རྐྱེན་མིག་དབང་ལ་བརྟེན་ནས་གཟུགས་ཀྱི་སྐྱེ་མཆེད་ཀྱི་ངོ་བོ་མཐོང་བའི་གཙོ་སེམས་དེ་ཡིན་པའི་ཕྱིར། རྣ་བའི་རྣམ་པར་ཤེས་པ་སོགས་གཞན་ལྔ་ལ་རང་གི་ཐུན་མོང་མ་ཡིན་པའི་བདག་རྐྱེན་རྣ་བའི་དབང་པོ་དང༌། སྣ་དབང་དང༌། ལྕེ་དབང་དང༌། ལུས་དབང་དང༌། ཡིད་དབང་ཞེས་སོགས་རིགས་འགྲེས་སྦྱར། ཀུན་གཞི་རྣམ་པར་ཤེས་པའི་མཚན་ཉིད་ཡོད་དེ། རང་གི་ངོ་བོ་མ་བསྒྲིབས་ལུང་མ་བསྟན་གྱི་བག་ཆགས་བགོ་བའི་གཞིར་གྱུར་བའི་འཁོར་ཀུན་འགྲོ་ལྔ་ཁོ་ན་དང་མཚུངས་པར་ལྡན་པའི་རྣམ་སྨིན་རྣམ་ཤེས་དེ་ཡིན་པའི་ཕྱིར། ཉོན་ཡིད་ཀྱི་མཚན་ཉིད་ཡོད་དེ། རང་གི་ངོ་བོ་བསྒྲིབས་ལུང་མ་བསྟན་དམིགས་པ་ཀུན་གཞི་ལ་དམིགས་ནས་བདག་ཏུ་རློམ་སེམས་ཀྱི་འཁོར་ཉོན་མོངས་པ་བཞི་དང་མཚུངས་པར་ལྡན་པའི་རྣམ་པར་ཤེས་པ་དེ་ཡིན་པའི་ཕྱིར། གཉིས་པ་སེམས་བྱུང་ལ་དབྱེ་ན་ལྔ་བཅུ་རྩ་གཅིག་སྟེ། སྡོམ་ནི། གཏན་ཚིགས་རིགས་པའི་དོན་བསྡུས་ལས། ཚོར་བ་འདུ་ཤེས་སེམས་པ་དང༌། །རེག་པ་ཡིད་བྱེད་ཀུན་འགྲོ་ལྔའོ། །འདུན་མོས་དྲན་དང་ཏིང་འཛིན་དང༌། །ཤེས་རབ་ཅེས་བྱ་ཡུལ་ངེས་ལྔའོ། །དད་དང་ཁྲེལ་ཡོད་ངོ་ཚ་ཤེས། །བརྩོན་འགྲུས་ཤིན་ཏུ་སྦྱངས་བ་དང༌། །འདོད་ཆགས་ཞེ་སྡང་གཏི་མུག་མེད། །བག་ཡོད་བཏང་སྙོམས་རྣམ་མི་འཚེ། །དེ་རྣམས་བཅུ་གཅིག་དགེ་བའོ། །འདོད་ཆགས་ཁོང་ཁྲོ་ང་རྒྱལ་དང༌། །མ་རིག་ཐེ་ཚོམ་ལྟ་བ་སྟེ། །དེ་དྲུག་རྩ་བའི་ཉོན་མོངས་སོ། །ཁྲོ་བ་འཁོན་འཛིན་འཆབ་པ་དང༌། །འཚིག་པ་ཕྲག་དོག་སེར་སྣ་དང༌། །གཡོ་སྒྱུ་རྒྱགས་པ་རྣམ་འཚེ་དང༌། །ངོ་ཚ་མེད་དང་ཁྲེལ་མེད་དང༌། །རྨུགས་དང་རྒོད་དང་མ་དད་དང༌། །ལེ་ལོ་བག་མེད་བརྗེད་ངས་དང༌། ཤེས་བཞིན་མ་ཡིན་རྣམ་གཡེང་སྟེ། །ཉི་ཤུ་ཉེ་བའི་ཉོན་མོངས་སོ། །གཉིད་དང་འགྱོད་དང་རྟོག་དཔྱོད་དེ། །བཞི་ནི་གཞན་དུ་འགྱུར་བའོ། །དེ་ལྟར་སེམས་བྱུང་ལྔ་བཅུ་གཅིག །དམིགས་རྣམ་རྫས་དུས་རྟེན་དང་ལྔས། །སེམས་དང་སེམས་བྱུང་མཚུངས་ལྡན་ནོ། །ཞེས་གསུངས་པའི་ཕྱིར་རོ། །ལྟ་བ་ལ་དབྱེ་ན་ལྔ་སྟེ། འཇིག་ལྟ་དང༌། མཐར་ལྟ་དང༌། ལོག་ལྟ་དང༌། ལྟ་བ་མཆོག་འཛིན་དང༌། ཚུལ་ཁྲིམས་བརྟུལ་ཞུགས་མཆོག་འཛིན་གྱི་ལྟ་བ་དང་ལྔ་ཡོད་པའི་ཕྱིར་རོ། །