གཉིས་པ་རྩོམ་པ་ལ་འཇུག་པ་ཐོག་མའི་དོན་དངོས་འཆད་པ།

གཉིས་པ་རྩོམ་པ་ལ་འཇུག་པ་ཐོག་མའི་དོན་དངོས་འཆད་པ་ལ།

བརྩམ་པར་དམ་བཅའ་བའི་དོན་དུ་མཆོད་པར་བརྗོད་པ་བཤད་པ། བསྟན་བཅོས་ལ་གཞན་འཇུག་པའི་དོན་དུ་དགོས་འབྲེལ་བཤད་པ་དང་གཉིས། དང་པོ་ལ། བསྟོད་པ་དང༌། ཕྱག་འཚལ་བ་གཉིས། དང་པོ་ལ་མཁྱེན་གསུམ་གྱིས་གང་ཟག་གསུམ་གྱི་བཞེད་དོན་སྒྲུབ་པའི་སྒོ་ནས་དང༌། དོན་བསྡུས་ཏེ་ཤེར་ཕྱིན་འཕགས་བཞིའི་ཡུམ་དུ་བསྟན་པས་བསྟོད་པ་དང་གཉིས། དང་པོ་ལ་གཞི་ཤེས་ཀྱི་སྒོ་ནས་ཉན་རང་ཉེར་ཞིར་ཁྲིད་ཅེས་བསྟོད་པ་དང༌། ལམ་ཤེས་ཀྱི་སྒོ་ནས་བྱང་སེམས་འགྲོ་དོན་བསྒྲུབ་པར་བསྒྲུབས་ཞེས་བསྟོད་པ་དང༌། རྣམ་མཁྱེན་གྱི་སྒོ་ནས་ཐུབ་པས་ཆོས་འཁོར་བསྐོར་བར་བསྐྲུན་ཞེས་བསྟོད་པ་དང་གསུམ། དང་པོ་ལ།རྩ་བར། ཉན་ཐོས་ཞི་བ་ཚོལ་རྣམས་ཀུན་ཤེས་ཉིད་ཀྱིས་ཉེར་ཞིར་ཁྲིད་མཛད་གང་ཡིན་དང༌། །ཞེས་པའི་དོན་འཆད་པ་ལ། ཁྲིད་པར་མཛད་པའི་གང་ཟག་གང༌། ཐབས་གང་གིས།འབྲས་བུ་གང་དུ་ཁྲིད་པ་བཤད་པ་དང་གསུམ། དང་པོ་གང་ཟག་དེ་ངོས་བཟུང་བ་དང་དབྱེ་བ་གཉིས།། དང་པོ་ནི། ཉན་ཐོས་ཞེས་པའི་སྐད་དོད་ཤྲ་བ་ཀ་ཞེས་པའི་ཤྲ་བ་ཐོས་པ། ཀ་ལ་སྒྲོགས་པ་སྟེ་ཐོས་སྒྲོགས་ཞེས་པར་འགྱུར་བའོ། །སྐབས་འདི་གང་ཟག་དེ་ལ་ཉན་རང་གཉིས་ལས། དང་པོ་ནི། ཉན་ཐོས་ཀྱི་ལམ་རྒྱུད་ལྡན་གྱི་གང་ཟག་གམ་ཐེག་པ་གསུམ་གྱི་ནང་ནས་རང་བཞིན་གྱིས་དབང་རྟུལ་གྱི་གང་ཟག་དེ། ཉན་ཐོས་ཀྱི་མཚན་ཉིད་ཡིན་ཏེ། ཉ་ཊཱིཀ་ལས། ཐེག་པ་གསུམ་གྱི་ནང་ནས་རང་བཞིན་གྱིས་དབང་རྟུལ་གྱི་གང་ཟག་ཅེས་པ་མཚན་ཉིད་དོ། །ཞེས་གསུངས་པའི་ཕྱིར་རོ། །ཉན་ཐོས་སམ་ཐོས་སྒྲོགས་ཀྱི་སྒྲ་བཤད་ནི། མདོ་ལུགས་མ་ལས། ཉ༷ན་ཐོ༷ས་ཞེས་པ་ནི་བྱང་སེམས་ཀྱི་སྡེ་སྣོད་ལས། ཉན་ཐོས་རྣམས་ནི་རྣམ་གྲོལ་སྒྲ་ཕྱིར་འགྲོ། ཞེས་པའི་ཚུལ་གྱིས་ཉན་ཐོས་དེ་སྲིད་པ་ཐ་མའི་ཚེའང་གཞན་གྱི་སྒྲ་ཕྱིར་འབྲང་བའི་ཕྱིར་ཐོས་སྒྲོགས་དེ་ཉན་ཐོས་སོ། །ཐེག་པ་དམན་པ་ཉིད་དུ་མཚུངས་པའི་རང་སངས་རྒྱས་རྣམས་ཀྱང་དེའི་ཕྱོགས་སུ་བསྡུའོ། །ཞེས་དང༌། ཉ་ཊཱིཀ་ལས། དེ་ཡང་དང་པོ་ལམ་ལ་ཞུགས་པ་ནས་བཟུང་སྟེ་སྲིད་པ་ཐ་མ་པའི་བར་དུ་སྒྲ་བཅས་སུ་ཆོས་ཉན་ཅིང་རང་གི་བྱང་ཆུབ་ཐོབ་ནས་ཀྱང་ངག་གིས་སྒྲ་བཅས་སུ་ཆོས་སྒྲོགས་པས་ཉན་ཐོས་སམ་ཐོས་སྒྲོགས་ཏེ། ཉན་ཅིང་སྒྲོགས་པས་ན་ཉན་ཐོས་ཞེས་དགོངས་འགྲེལ་གྱི་འགྲེལ་བ་བམ་པོ་བཞི་བཅུ་བར་རོ། །བློ་གྲོས་མི་ཟད་པས་བསྟན་པའི་མདོ་འགྲེལ་ལས། དེ་ཡང་སངས་རྒྱས་སམ་མཁན་པོའམ་སློབ་དཔོན་གྱིས་བཤད་པའི་སྒྲ་ཉན་ནས་གང་ཟག་ལ་བདག་མེད་པར་དམིགས་པར་བྱེད་པས་ན་ཕ་རོལ་གྱི་སྒྲའི་རྗེས་སུ་འགྲོ་བ་ཞེས་བྱ་སྟེ་ཞེས་སོ། །དེ་ཉིད་ཀྱི་ཕྱིར་ཉན་ཐོས་རྣམས་ཀྱི་རྣམ་གྲོལ་སྒྲ་ཕྱིར་འགྲོ །ཞེས་བྱང་སེམས་ཀྱི་སྡེ་སྣོད་ལས་གསུངས་སོ། །ཡང་འཇུག་པར། ཡང་དག་པའི་གདམས་ངག་གི་འབྲས་བུ་༼ཟད་མི་སྐྱེ་ཤེས་གཞན་དག་ལས་༽ཐོས་པར་བྱེད་པས་ཉན་ཐོས་དག་སྟེ། འདི་ལྟར་བྱ་བ་བྱས་སོ་ཞེས་སོགས་འབྱུང་བ་བཞིན་ནོ། །ཡང་ན་འབྲས་བུ་མཆོག་གམ་བླ་མེད་རྫོགས་སངས་རྒྱས་ཀྱི་ལམ་དེ་བཞིན་གཤེགས་པ་རྣམས་ལས་ཐོས་ནས་དེ་དོན་དུ་གཉེར་བ་རྣམས་ལ་སྒྲོགས་པར་བྱེད་པས་ན་ཉན་ཐོས་དག་སྟེ། དམ་ཆོས་པད་དཀར་ལས། མགོན་པོ་དེ་རིང་བདག་ཅག་ཉན་ཐོས་གྱུར། །བྱང་ཆུབ་དམ་པ་ཡང་དག་བསྒྲགས་པར་བགྱི། །བྱང་ཆུབ་པ་ཡི་སྒྲ་ཡང་རབ་ཏུ་བརྗོད། །དེ་བས་བདག་ཅག་ཉན་ཐོས་མི་ཟད་འདྲ། །ཞེས་གསུངས་པ་ལྟ་བུའོ། །བྱང་སེམས་ཡང་དེ་ལྟ་ཡིན་མོད་ཀྱི་ཉན་ཐོས་ནི་སྒྲོགས་པར་བྱེད་ཀྱི་རྗེས་སུ་མཐུན་པ་ཙམ་ཡང་མི་སྒྲུབ་པས་བྱང་སེམས་དེར་མི་འགྱུར་རོ། །ཞེས་གསུངས་པ་ལྟར་རོ། །