ཁང་དམར་ཕོ་བྲང་ལེགས་གྲུབ་བྱུང་བ་ལ་ཕུལ་བའི་བསྟོད་ཚིག
ཁང་དམར་ཕོ་བྲང་ལེགས་གྲུབ་བྱུང་བ་ལ་ཕུལ་བའི་བསྟོད་ཚིག
རྟ་བབས་ཀ་གདུང་རྟེན་གྱི་རང་བཞིན་མཛེས། །མི་གཡོ་གསུམ་ལྡན་བཅུད་ཀྱི་ཉིང་ཁུ་རྒྱས། །ཨེ་ཝྃ་རོལ་བའི་རྣལ་འབྱོར་འདུ་ར་ཆེ། །ཁང་དམར་ཕོ་བྲང་སྲིད་པའི་རྩེ་ན་འཕགས། །མདོ་སྨད་ཇོ་ནང་ཆོས་སྡེ་ཡོངས་ཀྱི་ཐོག་མའི་གདན་ས་ཆེན་མོ་༧ཆོས་རྗེ་དགོན་གྱི་ཁང་དམར་ངེས་དོན་ཐུབ་བསྟན་བཤད་སྒྲུབ་གླིང་ལེགས་པར་གྲུབ་པ་ལ་ངག་དབང་༧དངོས་གྲུབ་དཔལ་གྱིས་སོ། །དཔལ་ལྡན་ཀ་ལ་ཙཀྲའི་ངེས་དོན་གྱི། །རིམ་གཉིས་རྣལ་འབྱོར་བྱེ་བའི་གཙུག་ལག་ཁང༌། །ཐུབ་བསྟན་བཤད་སྒྲུབ་བསྟན་པ་རྒྱས་གྱུར་ནས། །བསྐལ་བ་ཇི་སྲིད་བར་ཏུ་རབ་གནས་སྨོན། །མདོ་སྨད་ཇོ་ནང་ཆོས་སྡེ་ཡོངས་ཀྱི་ཐོག་མའི་གདན་ས་ཆེན་མོ་༧ཆོས་རྗེ་དགོན་གྱི་ཁང་དམར་ངེས་དོན་ཐུབ་བསྟན་བཤད་སྒྲུབ་གླིང་ལེགས་པར་གྲུབ་པ་ལ་དགའ་སྤྲོ་དང་བཅས་དངོས་གྲུབ་དཔལ་གྱིས་བྲིས་པའོ། །ཨོཾ་སྭ་སྟི། སྐུ་ཚེ་འཇིགས་མེད་རྟག་བརྟན་ལྷུན་རྫོགས་པའི། །མི་འགྱུར་བདེ་བའི་གསང་ཆེན་དཔལ་ལྡན་གྱི། །མཛད་འཕྲིན་འོད་སྟོང་འཛིན་མར་ཁྱབ་པ་དང༌། །ངེས་དོན་བསྟན་པ་འཛིན་པའི་མགོན་སྐྱབས་ཤོག ། ཅེས་པ་འདི་གནས་མཆོག་བྱ་ཡུལ་དགོན་གྱི་༢༠༡༨ལོའི་སྦྱོར་དྲུག་ལོ་གསུམ་མཐར་ཕྱིན་པའི་ཆོས་ཚན་གྱི་ངོར་དངོས་གྲུབ་དཔལ་ནས་གུས་ཕུལ། ཨོཾ་སྭ་སྟི། མཁྱེན་པས་མདོ་རྒྱུད་ངེས་གསང་ཀུན་མཁྱེན་པའི། །ཐུགས་རྗེས་འགྲོ་རྣམས་མ་ནོར་ལམ་བཟང་སྟོན། །མདོ་རྒྱུད་དུ་མར་རྒྱལ་བས་ལུང་གིས་བསྔགས། །མཐའ་བྲལ་གཞན་སྟོང་སྲོལ་འབྱེད་ཇོ་ནང་བ། །རྒྱལ་བསྟན་ལུང་རྟོགས་དམ་ཆོས་རིན་ཆེན་དང༌། །ཁྱད་པར་ངེས་དོན་གཞན་སྟོང་དབུ་མ་ཆེ། །ཐོས་བསམ་སྒོམ་པའི་ཉིན་མཚན་འདའ་བ་ཡི། །དགེ་འདུན་འདུས་པས་ས་གསུམ་ཁྱབ་པར་ཤོག ། ཅེས་པ་འདི་ནི་ཇོ་ནང་གི་ཞལ་འདོན་པར་བསྐྲུན་སྐབས་གྲྭ་ལྷག་བསམ་པ་བདུད་འདུལ་གྱི་བསྐུལ་ངོར་ངག་དབང་དངོས་གྲུབ་དཔལ་གྱིས་བྲིས་པའོ། །སརྦ་མངྒཾ། །