སྙིང་རྗེ་ནི་བྱང་སེམས་ཀྱི་རྒྱུ་གཞན་གཉིས་ཀྱིའང་རྩ་བ་ཡིན་པ།
གཉིས་པ་སྙིང་རྗེ་ནི་བྱང་སེམས་ཀྱི་རྒྱུ་གཞན་གཉིས་ཀྱིའང་རྩ་བ་ཡིན་པ་ནི།
རྩ་བར། གང་ཕྱིར་བརྩེ་ཉིད་རྒྱལ་བའི་ལོ་ཏོག་ཕུན་ཚོགས་འདིའི། །
ས་བོན་དང་ནི་སྤེལ་ལ་ཆུ་འདྲ་ཡུན་རིང་དུ། །
ལོངས་སྤྱོད་གནས་ལ་སྨིན་པ་ལྟ་བུར་འདོད་གྱུར་པ། །
དེ་ཕྱིར་བདག་གིས་ཐོག་མར་སྙིང་རྗེ་བསྟོད་པར་བགྱི། །
ཞེས་དཔལ་ལྡན་ཟླ་བས་ཉན་རང་དང་སངས་རྒྱས་དང་བྱང་སེམས་ཀྱི་རྩ་བ་ཡིན་པ་མ་ཟད་བྱང་སེམས་ཀྱི་རྒྱུ་བྱང་ཆུབ་ཀྱི་སེམས་དང་གཉིས་སུ་མེད་པའི་ཡེ་ཤེས་གཉིས་ཀྱི་རྩ་བ་ཡང་སྙིང་རྗེ་ཡིན་པའི་ཕྱིར་ན། བྱང་སེམས་ཀྱི་རྒྱུ་གསུམ་གྱི་ནང་ནས་སྙིང་རྗེ་དེ་རྒྱུའི་གཙོ་བོ་ཉིད་དུ་བསྟན་པར་བཞེད་པ་ཡིན་ལ། སྙིང་རྗེ་ཉིད་རྒྱུའི་གཙོ་བོ་ཡིན་པ་རྒྱུ་མཚན་ག༷ང་གི་ཕྱི༷ར་ཞེ་ན། སྙིང་བརྩེ༷་བ་ཉི༷ད་ནི་སྐུ་བཞི་དང་མཚན་དཔེ་ལ་སོགས་པའི་རྒྱ༷ལ་བ༷འི་ལོ༷་ཏོ༷ག་ཕུ༷ན་སུམ་ཚོ༷གས་པ་འདི༷འི་ཐོག་མར་བསྐྱེད་པ་ལ་གལ་ཆེ་བ་ས༷་བོ༷ན་ད༷ང་ནི༷་འདྲ་ལ། བར་དུ་གོང་ནས་གོང་དུ་སྤེ༷ལ་བ་ལ༷་ཆུ༷་དང་འདྲ༷་ལ། ཐ་མར་གདུལ་བྱས་རྒྱལ་བའི་ལོ་ཏོག་ལ་ཡུ༷ན་རི༷ང་དུ༷་ལོ༷ངས་སྤྱོ༷ད་པའི་གན༷ས་ལ༷་འབྲས་བུ་སྨི༷ན་པ༷་ལྟ༷་བུ༷ར་འདོ༷ད་པར་གྱུ༵ར་པ༷་དེ༷འི་ཕྱི༷ར་ན་ཟླ་བའི་ཞབས་བད༷ག་གི༷ས་ཉན་རང་སངས་རྒྱས་དང་བྱང་སེམས་དང༌། བྱང་སེམས་ཀྱི་རྒྱུ་གཞན་གཉིས་ལས་ཀྱང་བསྟན་བཅོས་རྩོམ་པའི་ཐོ༷ག་མ༷ར་སྙི༷ང་རྗེ༷་ཆེན་པོ་ལ་བསྟོ༷ད་པ༷ར་བགྱི༷་བ་ཡིན་ནོ། །
སྙིང་རྗེ་ནི་རྒྱལ་བའི་ལོ་ཏོག་བསྐྲུན་པ་ལ་ཐོག་མཐའ་བར་གསུམ་དུ་གལ་ཆེ་བར་བསྟན་པ་དེ་ཉིད་སྙིང་རྗེ་ལ་བསྟོད་པ་ཡིན་ཏེ། རིན་པོ་ཆེའི་ཕྲེང་བ་ལས། ཐེག་པ་ཆེན་པོ་གང་ཞིག་ལས། །
སྙིང་རྗེ་སྔོན་བཏང་སྤྱོད་པ་ཀུན། །ཡེ་ཤེས་དྲི་མ་མེད་བཤད་པ། །སེམས་ཡོད་སུ་ཞིག་དེ་ལ་སྨོད། །ཅེས་དང༌། རང་འགྲེལ་ལས། བྱང་ཆུབ་ཀྱི་སེམས་བསྐྱེད་དུ་ཟིན་ཀྱང༌། གལ་ཏེ་དུས་ཕྱིས་སྙིང་རྗེའི་ཆུས་ཡང་དང་ཡང་དུ་བཅུས་པར་མ་གྱུར་ན། འབྲས་བུའི་ཚོགས་ཡངས་པ་མ་བསགས་པ་འདི་ངེས་པར་ཉན་ཐོས་དང་རང་སངས་རྒྱས་ཀྱིས་ཡོངས་སུ་མྱ་ངན་ལས་འདས་པས་མྱ་ངན་ལས་འདའ་བར་འགྱུར་རོ། །འབྲས་བུ་མཐའ་ཡས་པའི་གནས་སྐབས་ཐོབ་ཏུ་ཟིན་ཀྱང་གལ་ཏེ་དུས་ཕྱིས་སྙིང་རྗེ་ཡོངས་སུ་སྨིན་པ་དང་བྲལ་བར་གྱུར་ན་ནི་འདི་དུས་རིང་པོར་ཉེ་བར་ལོངས་སྤྱོད་པར་མི་འགྱུར་ལ། འཕགས་པའི་འབྲས་བུའི་ཚོགས་ཆེན་པོ་རིམ་པ་གཅིག་ནས་གཅིག་ཏུ་བརྒྱུད་པ་རྣམ་པ་བར་མ་ཆད་པ་ཡུན་རིང་པོར་མངོན་པར་འཕེལ་བར་ཡང་མི་འགྱུར་རོ། །ཞེས་གསུངས་པས་སོ། །སྙིང་རྗེ་ཆེན་པོ་དེ་ལ་སེམས་ཅན་སྡུག་བསྔལ་དང་བྲལ་ན་སྙམ་པའི་འདོད་པ་གཅིག་དང༌། བྲལ་བར་གྱུར་ཅིག་སྙམ་དུ་སྨོན་པ་གཅིག་དང༌། བདག་གིས་དབྲལ་བར་བྱའོ་སྙམ་པའི་ཁུར་དུ་ཁྱེར་བའི་སྙིང་རྗེ་ཆེན་པོ་དང་གསུམ་ཡོད་དོ། །དྲུག་པ་ལྷག་བསམ་པ་ཡན་ཆད་ཀྱི་རྒྱུད་ཀྱི་དམིགས་པ་སེམས་ཅན་ཐམས་ཅད་ལ་དམིགས་ནས་རྣམ་པ་སྡུག་བསྔལ་གྱིས་མཚོན་པའི་ཕོངས་པ་མཐའ་དག་ལས་སྐྱོབ་འདོད་ཀྱི་བརྩེ་བ་དེ། སྐྱེས་བུ་ཆེན་པོའི་སྙིང་རྗེ་ཆེན་པོའི་མཚན་ཉིད། དམིགས་པ་སེམས་ཅན་ཐམས་ཅད་ལ་དམིགས་ནས་རྣམ་པ་སྡུག་བསྔལ་དང་བྲལ་ན་དང་སྡུག་བསྔལ་དང་བྲལ་བར་གྱུར་ཅིག་དང་སྡུག་བསྔལ་དང་དབྲལ་བར་བྱའོ་གང་རུང་གི་རྣམ་པ་ཅན་མས་བུ་གཅིག་པ་ལ་བརྩེ་བ་ལྟ་བུའི་ཡིད་འགྱུར་གྱི་མྱོང་བ་ཐོན་པའི་བརྩེ་བ་དེ། སྙིང་རྗེ་ཆེན་པོའི་མཚན་ཉིད། དབྱེ་ན་ཐེག་པ་གསུམ་གྱི་སྙིང་རྗེ་གསུམ་དང༌། ལམ་མ་ཞུགས་ཀྱི་དང༌། ལམ་ཞུགས་ཀྱི་སྙིང་རྗེ་ཆེན་པོ་གཉིས་དང༌། ཆོས་ལ་དམིགས་པའི་སྙིང་རྗེ་ཆེན་པོ་སོགས་གསུམ་རྣམས་ཡོད། ཐེག་པ་ཆེ་ཆུང་གི་སྙིང་རྗེ་ལ་ཁྱད་པར་ཡོད་དེ། གཟུངས་རྒྱལ་གྱིས་ཞུས་པ་ལས། ཉན་ཐོས་དང་རང་སངས་རྒྱས་ཀྱི་སྙིང་རྗེ་ནི་པགས་པའི་རྣམ་པ་ལྟ་བུའོ། །བྱང་ཆུབ་སེམས་དཔའ་རྣམས་ཀྱི་སྙིང་རྗེ་ནི་ཤའི་རྣམ་པ་ལྟ་བུའོ། །ཞེས་གསུངས་པའི་ཕྱིར་རོ། །སྙིང་རྗེ་ཆེན་པོ་དང་སྙིང་རྗེ་ཚད་མེད་གཉིས་ལ་མུ་བཞི་ཡོད་དེ། ཞི་ལྷག་མ་ཐོབ་པའི་བྱང་ཆུབ་སེམས་དཔའི་རྒྱུད་ཀྱི་སྙིང་རྗེ་ཆེན་པོ་ལྟ་བུ་ནི་སྙིང་རྗེ་ཆེན་པོ་ཡིན་ལ་སྙིང་རྗེ་ཚད་མེད་མ་ཡིན་པའི་མུ་དང༌། ཕྱི་རོལ་བའི་རྒྱུད་ཀྱི་ཞི་ལྷག་དང་མཚུངས་ལྡན་གྱི་སྙིང་རྗེ་དེ་སྙིང་རྗེ་ཚད་མེད་ཡིན་ལ་སྙིང་རྗེ་ཆེན་པོ་མ་ཡིན་པའི་མུ་དང༌། ཞི་ལྷག་ཐོབ་པའི་བྱང་སེམས་ཀྱི་རྒྱུད་ཀྱི་ཞི་ལྷག་དང་མཚུངས་ལྡན་གྱི་སྙིང་རྗེ་ཆེན་པོ་དེ་སྙིང་རྗེ་ཚད་མེད་དང་སྙིང་རྗེ་ཆེན་པོ་གཉིས་ཀ་ཡིན་པའི་མུ་དང༌། ཚིག་སྤྱི་ཙམ་གྱི་སྙིང་རྗེ་དང་ཕུག་རོན་གྱིས་བུ་ལ་བརྩེ་བ་ལྟ་བུ་ནི་གཉིས་ཀ་མ་ཡིན་པའི་མུ་ཡིན་ནོ། །ཚདམེད་བཞིའི་སེམས་རྟེན་ལ་བསམ་གཏན་དགོས་པའི་དབང་དུ་བྱས་པའོ། །