ཨོ་རྒྱན་མཁའ་འགྲོ་ནོར་ལྷའི་གཡང་འབོད།
ཨོ་རྒྱན་འཕྲིན་ལས་གླིང་བ།
༁ྃ༔ འཛད་མེད་རིན་ཆེན་གཏེར་ལ་དབང་༔ ཨོ་རྒྱན་ནོར་ལྷའི་སྐུ་ལ་འདུད༔ བདག་ཉིད་ཨོ་རྒྱན་ཆེན་པོའི་སྐུ་གསལ་ལ༔ ཐུགས་རྗེ་འོད་ཀྱི་ཕྱྭ་དང་གཡང་འགུགས་བསམ༔ ཧྲཱི༔ དུས་གསུམ་རྒྱལ་ཀུན་མཁྱེན་ནུས་བརྩེ་བའི་དངོས༔ འཛད་མེད་རིན་ཆེན་གཏེར་ལ་མངའ་དབང་འབྱོར༔ ཨོ་རྒྱན་མཁའ་འགྲོ་ནོར་ལྷའི་ཐུགས་རྗེ་ཡི༔ སྟོང་གསུམ་ཕྱཱ་གཡང་མ་ལུས་འདི་རུ་ཁུག༔ ས་གསུམ་གནས་སུ་བསོད་ནམས་ལོངས་སྤྱོད་ལྡན༔ དཔལ་འབྱོར་བདེ་ལེགས་བཀྲ་ཤིས་ཇི་སྙེད་དང་༔ སྲས་བཅས་རྒྱལ་བའི་བྱིན་རླབས་དངོས་གྲུབ་རྣམས༔ ཕྱཱ་གཡང་གཏེར་གྱི་རྣམ་པར་འདི་རུ་ཁུག༔ ཚེ་རིང་རྣམ་དྲུག་མཐུན་པ་སྤུན་བཞི་དང་༔ བཙན་ཕྱུག་འཕན་གསུམ་མཁས་བཙུན་བཟང་པོ་སོགས༔ བདེ་ལེགས་ཡོན་ཏན་དཔག་བསམ་རིན་ཆེན་བཞིན༔ འབད་མེད་ལྷུན་གྲུབ་ཕྱྭ་གཡང་འདི་རུ་ཁུག༔ གནས་སྐབས་ནོར་དང་མཐར་ཐུག་དམ་པའི་ཆོས༔ ཕུང་པ་ཀུན་གྲོལ་རང་གཞན་དོན་གཉིས་འགྲུབ༔ ཨོ་རྒྱན་ཆེན་པོའི་གསང་གསུམ་དབྱེར་མེད་གྱུར༔ ཁམས་གསུམ་འགྲོ་ཀུན་སྒྲོལ་བའི་དཔལ་ཐོབ་ཤོག༔ དེ་ལྟར་མཁའ་འགྲོ་ནོར་ལྷ་ཡི༔ ཕྱཱ་གཡང་འགུགས་པའི་དཔལ་ཐོབ་འགྱུར༔ ཐེ་ཚོམ་མེད་དོ་ཕྱི་རབས་བུ༔ ནོར་བདག་གསུམ་གྱིས་ཐུབ་པར་བསྲུང་༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ ཅེས་རྒྱ་རོང་བ་སྐུ་སྐྱེས་དོན་འགྲུབ་དང་རྒྱ་ཤུལ་འབོམ་མའི་ངོར༔ ཨོ་རྒྱན་འཕྲིན་ལས་གླིང་བས་སོ༔ བཀྲ་ཤིས༔ སརྦ་མངྒ་ལཾ།