དབང་ཁྲིད་ནོར་བུ་སྒྲོན་གསལ།
དབང་ཁྲིད་ནོར་བུ་སྒྲོན་གསལ་བཞུགས་པ་ལགས་སོ༔ གསང་དབང་བཞུགས་སོ༔ ཨམྱམ།ཏྲ༔ རིགས་ཀྱི་ཌཱཀྐི་ལྔ་ལ་ཕྱག་འཚལ་ལོ༔ རིགས་ལྡན་སྐྱེས་བུ་དག་ལ་ནི༔ མཁའ་འགྲོ་སྙིང་ཐིག་ཏི་ཀ་ཡི༔ དབང་བསྐུར་ལམ་དུ་འཇུག་པ་ནི༔ ཀློང་གསལ་ཉི་མའི་རྒྱུད་དག་ལས༔ སྐལ་ལྡན་སྨིན་བྱེད་དབང་བསྐུར་བ༔ སྤྲོས་བཅས་དང་ནི་སྤྲོས་མེད་དང༔ ཤིན་ཏུ་ཡོངས་སུ་སྤྲོས་མེད་ཀྱི༔ སྐལ་བ་ལྡན་པ་སྨིན་པར་བྱ༔ ཞེས་པས༔ བུམ་དབང་བསྐུར་ཐབས་ལོགས་ན་ཡོད༔ འདིར་ནི་མཆོག་ཅན་འཇུག་པའི་ཕྱིར༔ གསང་དབང་མན་ཆད་བསྐུར་བའི་ཐབས༔ ཨོ་རྒྱན་པདྨ་བདག་གིས་བསྟན༔ ལས་ཅན་ཅིག་དང་འཕྲད་པར་ཤོག༔ ས་མ་ཡ༔ རྒྱ་རྒྱ་རྒྱ༔ དཀྱིལ་འཁོར་སྟེགས་བུ་མཐར་རྫོགས་ནས༔ ཆོ་གའི་རིམ་པ་མ་ནོར་བར༔ བུམ་པའི་དབང་ཉིད་ཚར་རྗེས་སུ༔ དཀྱིལ་འཁོར་དེ་ཡི་ལྷོ་ཕྱོགས་སུ༔ དུས་ནི་སྲོད་
ཀྱི་དུས་དག་ཏུ༔ བདུད་རྩི་རྣམ་པ་ལྔ་བཤམས་ལ༔ ངག་སྒྲིབ་དག་དང་ནུས་ལྡན་ཕྱིར༔ གསང་བའི་དབང་ནི་བསྐུར་བྱས་ཏེ༔ བླ་མ་མཚན་ཉིད་ལྡན་པ་ལ༔ སློབ་མ་མཚན་ཉིད་ལྡན་པ་ཡིས༔ ཕྱག་དང་གསེར་གྱི་མཎྜལ་དབུལ༔ གསང་བའི་དབང་གི་ཕྱག་རྒྱ་མོ༔ མཚན་དང་ལྡན་པའི་རིག་མ་ལ༔ ཁྲུས་བྱས་སྤོས་བལྟམས་རྒྱན་གྱིས་གདགས༔ བླ་མ་དག་ལ་དབུལ་བ་ནི༔ ཨེ་མ་ཧོ༔ ཁྱོད་ནི་བདེ་བ་ཆེ༔ བདེ་ཆེན་པདྨ་ཧེ་རུ་ཀ༔ བདེ་གཤེགས་རྣམས་ཀྱི་བདེ་ཆེན་ཡབ༔ བདེ་བའི་དབང་ཕྱུག་བདེ་རྩོལ་མཛད༔ བྱང་ཆུབ་སེམས་ཅན་ཡང་དག་དོན༔ རྣམ་དག་མཆོག་ནི་ཡང་དག་པའི༔ དྲི་མེད་བདུད་རྩི་དམ་པ་ཡིས༔ བླ་མེད་མཆོག་གི་དབང་བསྐུར་ལྟར༔ དེ་བཞིན་རིགས་ཀྱི་བུ་དག་ལ༔ འཁོར་བའི་སྡུག་བསྔལ་ཀུན་བསལ་མཛོད༔ དྲི་མེད་བདེ་ཆེན་བདུད་རྩི་ཡིས༔ མ་རིག་ཉེས་པའི་དྲི་མ་འཇོམས༔ བླ་མེད་བྱང་ཆུབ་བདེ་ཆེན་ཉིད༔ དུས་འདིར་བདག་གིས་ཐོབ་མཛོད་ཅིག༔ ཅེས་བརྗོད་བླ་མ་དག་ལ་དབུལ༔ དེ་ལྟར་གསོལ་བ་བཏབ་རྗེས་ལ༔ བླ་མས་མངོན་པར་རྟོགས་པ་བསྒོམ༔ གསོལ་
བ་བཏབ་ཅིང་མཆོད་བསྟོད་བྱ༔ དེ་ནས་སློབ་མ་དག་ལ་ནི༔ དར་རམ་རས་ཀྱིས་གདོང་པ་བཅིངས༔ ལག་ཏུ་མེ་ཏོག་ཐོགས་ནས་ནི༔ སྐོར་བ་དང་ནི་ཕྱག་གསུམ་བྱ༔ བླ་མ་ཡབ་ཡུམ་གཉིས་ལ་དབུལ༔ དེ་ནས་བླ་མས་སློབ་མ་ལ༔ ཡེ་ཤེས་དག་ནི་དབབ་བྱ་སྟེ༔ བླ་མའི་མདུན་དུ་སློབ་མ་ནི༔ ལངས་ཏེ་རྐང་པའི་ལོང་བུ་གཤིབས༔ གུས་པས་ཐལ་མོ་སྙིང་ཁར་སྦྱར༔ དེ་ནས་བླ་མས་ཏིང་འཛིན་བརླབ༔ ཀྱེ་མ་རིགས་ཀྱི་བུ་ཁྱོད་ཉོན་ཅིག༔ རང་ཉིད་སངས་རྒྱས་མཁའ་འགྲོ་མ༔ རྡོ་རྗེ་ཕག་མོ་གསལ་བར་བསྒོམ༔ དེ་ལྟར་གསལ་བའི་ལྟེ་བ་རུ༔ ཆོས་འབྱུང་དམར་པོ་སུམ་བརྩེགས་བསྒོམ༔ དེ་ཡི་ལྟེ་བར་ཕག་མོ་ནི༔ ཤིན་ཏུ་ཆུང་ལ་གསལ་བར་བསྒོམ༔ དེ་ལྟར་དམིགས་པ་དྲག་ཏུ་གཏད༔ གསོལ་གདབ་བྱིན་དབབ་རོལ་མོ་དཀྲོལ༔ འཕར་འཁྲབ་བདེ་གསལ་ཉམས་མྱོང་སྐྱེས༔ བདེ་སྟོང་དབྱེར་མེད་ངང་དེ་ལ༔ མ་ཡེངས་པ་རུ་སྒོམ་དུ་གཞུག༔ དེ་ནས་གདོང་གཡོགས་བཀྲོལ་བྱས་ལ༔ བུམ་དབང་དུས་སུ་བསྟན་པ་ནི༔ རྡུལ་ཚོན་དག་གི་དལ་ཡིན་ཏེ༔ དེ་ནི་དཔེ་ཡི་མཚོན་
བྱ་སྟེ༔ རང་ལུས་རྒྱལ་བའི་དཀྱིལ་འཁོར་ཡིན༔ ཡེ་ནས་རང་ལུས་དཀྱིལ་འཁོར་དུ༔ གནས་པ་ངོ་ཡང་སྤྲད་པར་བྱ༔ འཁོར་ལོ་ལྔ་རུ་རིགས་ལྔ་ཡི༔ སངས་རྒྱས་ཡབ་ཡུམ་ལྔ་གནས་པ༔ ཕུང་པོ་ཁམས་དང་སྐྱེ་མཆེད་ཀུན༔ ལྷ་ཡི་དཀྱིལ་འཁོར་ངོ་ཡང་སྤྲད༔ སློབ་མ་མེ་ཏོག་ཕོག་པ་ཡི༔ ལྷ་ཡི་མིང་ནི་འདི་ཡིན་ཞེས༔ སློབ་དཔོན་ཉིད་ཀྱིས་བསྟན་པར་བྱ༔ དེ་ནས་བླ་མའི་མདུན་དག་ཏུ༔ དར་གྱི་ཡོལ་བ་བྲེས་པའི་ནང༔ ཡུམ་ནི་ཕག་མོ་དངོས་སུ་བསྐྱེད༔ ཁམས་དང་སྐྱེ་མཆེད་བྱིན་གྱིས་བརླབ༔ ཡི་གེ་པཾ་ལས་ཡུམ་གྱི་མཁའ༔ པདྨ་འདབ་མ་བརྒྱད་དུ་བསམ༔ བདེ་གཤེགས་བཞུགས་གནས་ངོ་བོར་བསྐྱེད༔ ཡི་གེ་ཧཱུྃ་ལས་ཡབ་ཀྱི་གསང༔ རྡོ་རྗེ་རྩེ་ལྔ་དག་ཏུ་བསྐྱེད༔ དེ་ཡང་བུདྡྷའི་ངོ་བོར་བསྐྱེད༔ ཐབས་ཤེས་ཡབ་ཡུམ་སྙོམས་འཇུག་བྱ༔ དེ་ནས་ཁམས་དང་སྐྱེ་མཆེད་ལྷ༔ སྦྱོར་བས་བསྐུལ་ཏེ་མཉེས་བྱས་ནས༔ ཁམས་ཀྱི་དྭངས་མའི་ཐིག་ལེ་ནི༔ ཡུམ་གྱི་བྷ་གར་ཕབ་བྱས་ཏེ༔ མེ་ལོང་དག་གིས་བླངས་ནས་སུ༔ མངར་གསུམ་རྩ་ལྡན་སྦྱར་བ་ནི༔ རང་ཉིད་ཏིང་
འཛིན་ལྡན་པས་སུ༔ སློབ་མའི་ལྕེ་ཐོག་བཞག་བྱས་ནས༔ རྡོ་རྗེའི་ཚིག་འདིས་དབང་བསྐུར་བྱ༔ ཀྱེ་མ་ཀྱེ་མ་རིགས་ཀྱི་བུ༔ དུས་གསུམ་རྒྱལ་བ་ཀུན་གྱིས་ནི༔ བྱང་ཆུབ་སྲས་པོ་དམ་པ་ལ༔ ཇི་ལྟར་དབང་བསྐུར་བྱས་པ་ལྟར༔ དེ་བཞིན་གསང་བའི་བྱང་སེམས་ཀྱིས༔ ད་ལྟ་ཁྱོད་ལ་དབང་བསྐུར་རོ༔ ཨོཾ་གུ་རུ་ཌཱཀྐི་ནི་ཧ་རི་ནི་ས་ར་ཙ་ཧྲཱི་ཡ་བྷོ་དྷི་ཙིཏྟ་ཨ་མྲ྇་ཏ་པཉྩ་ཧཱུྃ༔ ཞེས་རྡོ་རྗེའི་གསུང་དེ་ལན་གསུམ་བརྗོད་དོ༔ དེ་རྟིང་དབུ་མ་གསལ་ཡང་གདབ༔ དབུ་མ་གསང་བའི་ནང་ན་མར༔ སོང་བས་བདེ་བ་རྒྱས་པར་བསྒོམ༔ དེ་ཉིད་ལྟོས་དང་ངོས་བཟུང་བྲལ༔ བདེ་དང་སྟོང་པ་དབྱེར་མེད་དེ༔ སྐལ་ལྡན་ཁྱོད་ཀྱིས་སྒོམས་ཤིག་བྱ༔ དེ་རྗེས་དམ་ཚིག་འབོག་པ་ནི༔ ཀྱེ་མ་རིགས་ཀྱི་བུ་ཁྱོད་ཀྱི༔ གསང་བའི་དམ་ཚིག་ཆེན་པོ་ནི༔ ཡེ་ཤེས་སྒྲུབ་རྫས་བདུད་རྩི་ལྔ༔ དམར་ཆེན་ག་བུར་ཙནྡན་སྦྱར༔ རྡོ་རྗེའི་ཆུ་ནི་ཀུན་ཏུ་བསྲེ༔ དུས་གསུམ་རྒྱལ་བ་ཀུན་མཐུན་མཚུངས༔ འདི་དང་འདོད་པའི་ཡོན་ཏན་ལྔ༔ རྒྱུན་དུ་ཡང་དང་ཡང་དུ་བརྟེན༔ འདི་ནི་དམ་ཚིག་བླ་ན་མེད༔
མ་ཉམས་སྐལ་ལྡན་ཁྱོད་ཀྱིས་སྲུངས༔ རྡོ་རྗེའི་དམ་ཚིག་དེ་དབོག་བྱ༔ དེས་ནི་ངག་གི་སྒྲིབ་པ་དག༔ ངག་ཉིད་ནུས་པ་དང་ལྡན་འགྱུར༔ བརྟེན་བྱ་ཤ་ལྔ་བདུད་རྩི་ལྔ༔ རྫོགས་རིམ་བསྒོམ་པར་རྗེས་སུ་གནང༔ སྐལ་བ་ས་དགུ་དག་དང་མཉམ༔ ཕྲིན་ལས་དབང་གི་ལས་རྣམས་འགྲུབ༔ འབྲས་བུ་ལོངས་སྤྱོད་རྫོགས་སྐུ་ཐོབ༔ སྐལ་ལྡན་སྨིན་བྱེད་གསང་བའི་དབང༔ ལས་ཅན་ཅིག་དང་འཕྲད་པར་ཤོག༔ ས་མ་ཡ༔ རྒྱ་རྒྱ་རྒྱ༔ ཁ་ཐམ༔