གསོལ་འདེབས་ཟློག་པ།
ན་མོ་གུ་རུ་པྲ་ཝ་ཀ་ར་ཡེ། པད་འབྱུང་རྗེ་ལ་གསོལ་བ་འདེབས། །དེ་ནས་འགའ་རེ་འདོད་གསུངས་པ། །འདི་ལ་ཉམས་མཚར་ཚིག་འགའ་ཞུ། །བདག་ཏུ་འཛིན་པའི་རྩ་བ་དེ། །ཤེས་རབ་མཚོན་ཆས་བཅད་པ་ན། །འཁོར་བའི་འཁོར་ལོ་རྒྱུན་ཆད་ནས། །སྤང་བྱའི་སྒྲིབ་པ་མཐའ་དག་གཏོར། །འཁོར་བ་མྱ་ངན་གནས་སུ་ཟློག ། མཚོན་ཆ་འཁོར་ལོའི་གཏོར་ཟློག་ཡིན། །རང་ཉིད་དྲག་པོའི་སྐུར་གསལ་ནས། །ཐ་མལ་གཟུགས་ཀྱི་ཕུང་པོ་འདི། །སྣང་སྟོང་ལྷ་ཡི་སྐུ་རུ་ཟློག །གུ་རུ་དྲག་པོའི་ཟློག་པ་ཡིན། །སྣང་བ་སྐུ་ཡི་ཁྱེར་སོ་ལ། །མཐོང་ཚད་ལྷ་ཡི་སྐུར་གསལ་ནས། །ཐ་མལ་གཟུགས་ཀྱི་སྣང་བ་ཟློག །འཇམ་དཔལ་སྐུ་ཡི་ཟློག་པ་ཡིན། །གྲག་པ་གསུང་གི་ཁྱེར་སོ་ཡི། །སྒྲ་གྲག་སྔགས་ཀྱི་སྒྲ་གསལ་བས། །སྟོད་སྨད་ཆགས་སྡང་སྣང་བ་ཟློག །རྟ་མགྲིན་གསུང་གི་ཟློག་པ་ཡིན། །དྲན་རྟོག་ཐུགས་ཀྱི་ཁྱེར་སོ་ཡི།་།གང་ཤར་བཟོ་མེད་རང་ངོ་ལྟ། །དྲན་ཚད་ཕྱག་རྒྱ་ཆེན་པོར་ཟློག །ཕྱག་རྡོར་ཐུགས་ཀྱི་ཟློག་པ་ཡིན། །གཏུམ་མོ་འབར་འཛགས་གདམས་པ་ཡི། །ཁམས་ལྔ་ཌཱ་ཀི་ལྔ་རུ་བསྒྱུར། །ཡོན་ཏན་ཌཱ་
ཀིའི་ཟློག་པ་ཡིན། །ལྷ་སྔགས་འབྲེལ་པའི་ཏིང་འཛིན་གྱི། །ལས་ཚོགས་གང་འདོད་ཐམས་ཅད་འགྲུབ། །བདུད་དང་བར་ཆད་ཐམས་ཅད་ཟློག །ཡཀྵ་མེ་དབལ་ཟློག་པ་ཡིན། །རང་ངོ་ཤེས་པར་མཁའ་ལྡིང་གི །མ་རིག་དུག་སྦྲུལ་ཞལ་དུ་གསོལ། །རྣམ་རྟོག་ཐམས་ཅད་ཆོས་སྐུར་ཟློག །བྱ་ཁྱུང་རྒྱལ་པོའི་ཟློག་པ་ཡིན། །འདོད་ཆགས་མ་མོ་སྲིན་མོ་ལ། །ཡེ་རིག་ཡེ་ཤེས་རཀྟ་མཆོད། །འདོད་ཆགས་བདེ་སྟོང་ངང་དུ་ཟློག །སྲིན་མོ་ཟ་ལམ་ཟློག་པ་ཡིན། །དྲག་པོའི་གཏོར་ཟློག་དེ་ལྟར་མཛོད། །འདྲེ་ངན་བརྡུང་བའི་གཏོར་ཟློག་དེ། །སེམས་བསྐྱེད་སྙིང་རྗེས་མ་ཟིན་ན། །ཕ་མ་བརྡུང་དང་ཁྱད་པར་མེད། །དེ་ཕྱིར་སྙིང་རྗེའི་སེམས་བསྐྱེད་གཟོབ། །ཁྲོ་བོའི་བཞུགས་གནས་དུང་ཁང་ནས། །བྱང་ཆུབ་སེམས་ཀྱི་ཆུ་རྒྱུན་བབ། །གནས་སྐབས་བཞི་ཡི་སྒྲིབ་པ་སྟོང་། །འབྲས་བུ་སྐུ་བཞིའི་ངང་དུ་ཟློག །ཁྲོ་ཆུའི་གཏོར་ཟློག་དེ་ལ་ཟེར། །ཁྲོ་དང་འདོད་ཆགས་གཏི་མུག་གསུམ། །བྱང་ཆུབ་སེམས་ཀྱི་ཆུ་རྒྱུན་གྱིས། །དུག་ལྔ་འཁོར་བའི་སྡོང་པོ་ལྔ། །སྐུ་ལྔ་ཡེ་ཤེས་ལྔ་རུ་ཟློག །ཁྲོ་ཆུ་དུག་གདོང་ཟློག་པ་ཡིན། །ཚོགས་གཉིས་ཟུང་དུ་
འཇུག་པ་ཡིས། །ཚེ་བསོད་འཕེལ་ཞིང་བདག་འཛིན་ཞི། །ནག་པོ་བདུད་ཀྱི་གཡུལ་ངོ་ཟློག །ཚེ་བདག་ནག་པོའི་ཟློག་པ་ཡིན། །སྐྱེ་འཆི་མེད་པའི་དོན་རྟོགས་ནས། །ཤི་ཡང་བདག་ཉིད་སྐྲག་པ་མེད། །ངན་སོང་ནག་པོའི་ལུས་ངན་ཟློག །འཆི་བདག་ནག་པོའི་ཟློག་པ་ཡིན། །སྲོག་དང་རྩོལ་བའི་རླུང་ལ་སྦྱངས། །རྡོར་བཟླས་དག་པའི་ངག་ནུས་འབར། །ནག་པོ་བདུད་ཀྱི་བར་ཆད་ཟློག །སྲོག་བདག་ནག་པོའི་ཟློག་པ་ཡིན། །བེ་བྷ་སྭ་ཏ་ཡོན་ཏན་ཏེ། །མདོ་རྒྱུད་མན་ངག་གནད་ཤེས་པས། །བླུན་སྒོམ་གོལ་ས་དེ་ཡིས་ཟློག །བེ་བྷ་སྭ་ཏ་ཟློག་པ་ཡིན། །ཤུགས་འབྱུང་དཀོར་ཟས་ཅི་ཟ་བ། །རང་བྱུང་ལྗང་དམར་མེ་ལ་བསྲེགས། །ཕུང་པོས་ལྷ་མཆོད་དཀོར་སྒྲིབ་ཟློག །ཟ་བ་ལྗང་དམར་མེ་ལ་བསྲེགས། །ཟློག་པ་འདོན་ན་དེ་ལ་མཛོད། །ཡ་མཚན་དག་པའི་ཞིང་ཁམས་སུ། །མ་འགྱུར་འགྲོ་རྣམས་འདྲེན་པའི་ཕྱིར། །ནུབ་ཤེས་ར་ལྟར་འབྲལ་མེད་ཅིན། །རྩ་དང་རླུང་སྒོམ་འཁྲུལ་པ་ཟློག །ཡ་མ་རཱ་ཙའི་ཟློག་པ་ཡིན། །གྱེར་སྒོམ་རྔ་སྒྲོག་ཅི་བརྡུང་ཡང་། །གོང་མའི་ཕ་རབས་མི་ཟིན་པས། །གཏོར་ཟློག་
དེ་ལྟར་བྱེད་སྙིང་འདོད། །ཚེ་ལུང་ཁྲུས་ལུང་མི་ཤེས་པས། །དམིགས་ངན་སྒོམ་ཞིང་དགུག་གཞུག་བྱེད། །ཞེ་སྡང་བསྐྱེད་ཅིང་ཕུར་པ་འདེབས། །དམིགས་ངན་དེ་འདྲ་དམྱལ་བར་སྐྱེ། །དེ་འདྲའི་ལས་འགྲིགས་དགོས་པ་མེད། །སྐུ་གསུམ་རང་ཤར་ཧོམ་ཁུང་དུ། །དུག་ལྔ་དུག་གསུམ་དགྲ་དང་བགེགས། །བདག་མེད་རྟོགས་པའི་ཕུར་པས་བསྒྲལ། །བསྒྲལ་ལས་དེ་འདྲ་བྱེད་སྙིང་འདོད། །རྣམ་ཤེས་ཆོས་ཉིད་བསྟིམ་མི་ཤེས། །ལིངྒ་ཤ་དུམ་ཁྲག་ཐིགས་རྣམས། །ང་རྒྱལ་བསྐྱེད་ཅིང་བསྟབ་པ་བྱེད། །དགྲ་བགེགས་ཟོས་བསམ་གཏོར་མར་བླུག །ཕྱི་མར་རང་ཉིད་གཤིན་རྗེས་ཟ། །དེ་འདྲའི་བསྟབ་པ་ངས་མི་འདོད། །ཆོས་ཉིད་སྐྱེ་མེད་ཞལ་ནང་དུ། །གང་སྐྱེས་སྣ་ཚོགས་རང་ཞིར་བསྟབ། །ལྷན་སྐྱེས་ཡེ་ཤེས་རང་ཞལ་མཐོང་། །དེ་འདྲའི་བསྟབ་པ་བྱེད་སྙིང་འདོད། །བརྡའ་དོན་རྟེན་འབྲེལ་མི་ཤེས་པའི། །དུག་གི་ཤིང་སྐྱེར་རྩང་ཁྲིས་དེས། །བཟོ་ན་ཕྱག་ཚ་ཁུར་བ་དཀའ། །འཁོར་ལོ་བཞི་ཡི་རྩ་འདབ་རྣམས། །དྲྭ་བ་དྲྭ་ཕྱེད་འཚུབས་མ་རིས། །རང་བྱུང་རྡུང་སླས་ངོ་མཚར་ཆེ། །སྟོང་རའི་རྩང་ར་བསྐོར་སྙིང་འདོད། །ཨ་
མྱེས་གསོལ་ལྷག་མ་སྐྱུར་ཏེ། ཡོན་བདག་ནས་ལ་ཟན་པའི་རྒྱུ། །འཐུང་ན་འདུལ་བའི་ཁྲིམས་དང་འགལ། །མ་བསྒྱུར་བདུད་རྩིའི་ཅི་ལ་ཕན། །སྤྱི་བོར་ཚངས་པའི་ཡུལ་ས་ནས། །ཧཾ་ཡིག་ཀུནྡའི་བདུད་རྩིའི་ཨས། །ཧེ་རུ་ཀ་རྣམས་དེ་ལ་དགྱེས། །དེ་འདྲའི་ཆང་བཟང་བཙག་ན་བསམ། །འཁྱག་ཁྲག་གཏར་བའི་སྐྱེ་ཁྲག་དེ། །རྣམ་སྨིན་ཆེ་བའི་མིང་གྱེད་མཉེས། །ལྟེ་བ་སྤྲུལ་པའི་འཁོར་ལོ་ལ། །རཀྟ་ཀུན་གྱི་དྭངས་མ་ནི། །ཨ་ཐུང་པདྨ་རཱ་གའི་མདོག །མ་རྒྱུད་མཁའ་འགྲོ་དེ་ལ་འཁོར། །དེ་འདྲའི་རཀྟ་སྤེལ་ན་བསམ། །ཟས་སུ་ཁ་རའི་གཏོར་འདུག་དེ། །ཁྱེར་ན་ཡོན་བདག་སེར་སྣ་སྐྱེ། །དབུ་མ་ལུས་ཀྱི་སྲོག་ཤིང་དེ།་།བདེ་ཆེན་འཁོར་ལོའི་རྩ་འདབ་རྣམས། །རང་བྱུང་གདུགས་ཀྱི་རྩ་འདབ་རྣམས། །གཙུག་ཏོར་རྩ་བཞི་ཏོག་གི་ཚུལ། །དེ་འདྲའི་གཏོར་གདུགས་ཕུབ་སྙིང་འདོད། །གཟའ་དང་དབང་ཕྱུག་མཁའ་འགྲོ་སོགས། །ཐེབས་ལྡོག་བསྒྱུར་དུས་མི་ཤེས་པའི། །གཏོར་འཕེན་ཕན་པའི་གནོད་པ་ལ། །གང་ཤར་རྒྱུ་བའི་གཏོར་མ་དེ། །རང་གྲོལ་དབྱིངས་སུ་འཕེན་ཤེས་ན། །ཉོན་མོངས་བདུད་བགེགས་ཐམས་
ཅད་ཐུལ། །དེ་འདྲའི་གཏོར་མ་འཕེན་སྙིང་འདོད། །ལྔ་སེར་ལྟོ་འཕྱེ་ལ་སོགས་པ། །མི་ཤེས་མི་མཆོད་གནོད་པ་ཆེ། །ཟང་ཟིང་རྫས་རྣམས་སྣང་བ་སྤུན། །ཀུན་རྟོག་བསྲེག་རྫས་སྣ་ཚོགས་པ། །མི་རྟོག་ངང་དུ་བསྲེག་ཤེས་ན། །ཡེ་ཤེས་མེ་ཆེན་རབ་ཏུ་འབར། །དེ་འདྲའི་མེ་མཆོད་བླུག་སྙིང་འདོད། །ཨ་ནུ་ཨ་ཏི་ཡོ་གའི་ལུགས། །གཏོར་ཟློག་སྦྱིན་སྲེག་བྱ་ཚུལ་ནི། །འཕྲལ་དུ་ཉམས་ལ་ཤར་ནས་བྲིས། །མ་གྱུར་འགྲོ་བ་ཐམས་ཅད་ཀྱི། །གཏོར་ཟློག་དེ་འདྲ་བཅའ་བར་ཤོག །ཨ་རཱ་གས་སྦྱར་བའོ།། ༧ ཁམས་སྟོད་སྒོམ་སྡེ་ནང་ཆེན་འབང་སྒང་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།