གནམ་ཆོས་སྨེ་བརྩེགས་ཀྱི་ལས་མཐའ་གྲིབ་སེལ་རྟ་ནག་མ་ཟབ་ཅིང་སྟབས་བདེ་བ་བལྟས་ཆོག་འདོན་འགྲིགས།
གནམ་ཆོས་སྨེ་བརྩེགས་ཀྱི་ལས་མཐའ་གྲིབ་སེལ་རྟ་ནག་མ་ཟབ་ཅིང་སྟབས་བདེ་བ་བལྟས་ཆོག་འདོན་འགྲིགས་བཞུགས་པའི་དབུའོ།
ན་མོ་བྷུརྑུང་དྷི་ཁ་ཡེ། ཁྲོ་རྒྱལ་སྨེ་བ་བརྩེགས་ལ་ཕྱག་འཚལ་ནས། །གནམ་ཆོས་སྨེ་བརྩེགས་ལྗང་ཁུའི་ལས་སྐོར་བྲི། །ཆོས་བདག་མཁའ་འགྲོས་བཀའ་ཡི་གནང་བ་སྩོལ། །དགོངས་འདུས་གུ་དྲག་མ་ནིང་ལ་སོགས་པས༔ གཏེར་རྙིང་མཁའ་འགྲོའི་གྲིབ་སེལ་མང་གསུངས་ཀྱང་༔ བཅའ་ཚོགས་ཕྱག་ལེན་དཀའ་ཞིང་བཀའ་ཡང་གཉན༔ ཐ་མར་སྡིག་ཅན་དང་ནི་བྱིས་པ་སོགས༔ དེ་ལ་མཁའ་འགྲོའི་གྲིབ་སེལ་རུང་བ་མིན༔ འདི་ནི་ཕྲུག་ཡང་ཀུན་ལ་བྱ་བར་རུང་༔ སྣོད་གཅིག་ནང་དུ་ཟན་ནག་ལས་བྱས་པའི༔ མི་ནག་རྟ་ནག་བྱ་ནག་ཀླད་ན་ལྡིང་༔ ཁྱི་ནག་རྗེས་སུ་འབྲང་བའི་འཁོར་ལྔ་ནི༔ མི་ལུས་བྱ་མགོ་སྦྲུལ་མགོ་ཕག་གི་མགོ༔ སྦལ་པའི་མགོ་ཅན་བཞི་ནི་ཟུར་བཞིར་བཞག༔
གཏོར་མ་ཟུར་གསུམ་ནག་པོ་ཏིང་ལོ་དང་༔ ངར་མི་དཀར་པོ་གཅིག་ནི་རྟེན་མདུན་བཞག༔ ཁྲུས་ཆུ་གཏོར་འགུ་ནང་དུ་འོ་ཆབ་དང་༔ མདའ་དར་དཀར་པོ་ཁབ་གཅིག་གཙུགས་ལ་བཞག༔ དེ་ནས་ནད་པ་མདུན་དུ་བོས་བྱས་ལ༔ རང་ཉིད་སྐད་ཅིག་དྲན་རྫོགས་ཧཱུྃ་སྨུག་ལས༔ འོད་འཕྲོས་འཕགས་མཆོད་སེམས་ཅན་དོན་བྱས་ནས༔ ཚུར་འདུས་ཡོངས་གྱུར་སྐད་ཅིག་དེ་ཉིད་ལ༔ ཁྲོ་བོ་སྨེ་བ་བརྩེགས་པ་སྐུ་མདོག་སྨུག༔ ཞལ་གསུམ་ཕྱག་དྲུག་གཡས་དཀར་གཡོན་སྔོ་བ༔ དབུས་སྨུག་ཕྱག་ན་དང་པོ་དེ་གཉིས་ཀྱིས༔ ཐུགས་ཀར་སྡིགས་མཛུབ་བསྣོལ་ཞིང་དེ་འོག་གཉིས༔ རྡོ་རྗེ་དྲིལ་བུ་འཛིན་ཏེ་དེ་འོག་གཉིས༔ རྡོ་རྗེ་
ལྕགས་ཀྱུ་འཛིན་པ་གསལ་བར་གྱུར༔ ཐུགས་ཀར་ཉི་སྟེང་ཧཱུྃ་སྨུག་མཐའ་བསྐོར་དུ༔ སྔགས་ཀྱིས་གཡས་སུ་འཁོར་ལས་འོད་དཀར་པོ༔ འཕྲོས་པས་གྲིབ་དང་མི་གཙང་བ་རྣམས་ཀུན༔ བ་མོར་ཉི་ཟེར་ཕོག་པ་བཞིན་དུ་བསམ༔ སྔགས་ཀྱི་འོད་ཟེར་འོ་ཆབ་ལ་ཐིམ་པས༔ གྲིབ་སེལ་ཡེ་ཤེས་བདུད་རྩི་ཆེན་པོར་གྱུར༔ ཨོཾ་ཨརྩི་མརྩི་བྷར་ཁུང་མ་ཧ་སྲ་ན་ཏ་ཡ་ཧཱུྃ་ཧཱུྃ་ཕཊ་ཕཊ་སྭཱ་ཧཱཿ ཞེས་པ་བདུན་ནམ་ཅི་འགྲུབ་བརྗོད། དེས་ནི་གྲིབ་གླུད་སྟེང་དུ་ནད་པ་དེས་ཁྲུས་བྱ། ཁ་ལག་བཀྲུ་ཁ་བཤལ་ལ་གླུད་ནང་དུ་བླུག དེ་ཆེ་གོང་གི་སྨེ་བརྩེགས་སྔགས་ཤམ་དུ། ཨོཾ་ཨེ་ཧོ་ཤུདྡྷེ་ཤུདྡྷེ། ཡཾ་ཧོ་ཤུདྡྷེ་ཤུདྡྷེ། རཾ་ཧོ་ཤུདྡྷེ་ཤུདྡྷེ། བི་ཧོ་ཤུདྡྷེ་ཤུདྡྷེ། ལོ་ཧོ་ཤུདྡྷེ་ཤུདྡྷེ། ཨེ་ཡཾ་རཾ་བཾ་ལཾ་ཤུདྡྷེ་ཤུདྡྷེ། ཨ་ཨ་སྭཱ་ཧཱཿ ཨོཾ་སྭ་བྷ་ཝ་སོགས། སྟོང་པའི་ངང་ལས་ཏྲི་ཡིག་ཡོངས་སུ་གྱུར་པ་ལས༔ གྲིབ་བདག་མི་ནག་རྟ་ནག་གོས་ནག་གྱོན༔ སྒོ་ང་ནག་པོ་ཁུར་ཤིང་དར་ནག་ཕྱར༔ འཕྲུ་ནག་བཙུགས་ཤིང་བྱ་ནག་ཀླད་ན་ལྡིང་༔ ཁྱི་ནག་རྗེས་སུ་འབྲང་བའི་འཁོར་དུ་ནི༔ མདུན་གཡས་མི་ལུས་འདོད་ཆགས་བྱ་ཡི་མགོ༔ མདུན་གཡོན་མི་ལུས་ཞེ་སྡང་སྦྲུལ་གྱི་མགོ༔ རྒྱབ་གཡས་མི་ལུས་གཏི་མུག་ཕག་གི་མགོ༔ རྒྱབ་
གཡོན་མི་ལུས་མ་རིག་སྦལ་པའི་མགོ༔ ཀུན་ཀྱང་ཐལ་སྦྱར་བཀའ་ཉན་གསུང་སྡོད་གྱུར༔ ༈ ཀྱཻ། ཉི་མ་ནུབ་ཕྱོགས་ཕ་ཀི་ན། །མུན་པ་ནག་པོའི་སྟེང་རུམ་ནས། །གྲིབ་མཁར་ནག་པོའི་ནང་རོལ་ནས། །ཕ་ནི་མུན་པ་ནག་པོ་དང་། །གླུད་བདག་རྒྱལ་མོ་བཤོས་པའི་སྲས། །བུ་ནི་གྲིབ་བདག་རྒྱལ་པོ་སྟེ། །མུན་པ་ནག་པོ་གོས་སུ་གྱོན། །གྲིབ་རྟ་ནག་པོ་འོག་ཏུ་ཞོན། །གྲིབ་དར་ནག་པོ་ལག་ཏུ་ཐོགས། །གྲིབ་འཕྲུ་ནག་པོ་མགོ་ལ་བཙུགས། །གྲིབ་བྱ་ནག་པོ་ཀླད་ན་ལྡིང་། །གྲིབ་ཁྱི་ནག་པོ་རྗེས་སུ་འབྲང་། །ཡས་དང་གླུད་ལ་སྤྱན་འདྲེན་ན། །འཁོར་ནི་བྱ་སྦྲུལ་ཕག་གི་མགོ །སྦལ་པའི་མགོ་ཅན་བཞི་དང་བཅས། །གྲིབ་གླུད་ལེན་ཕྱིར་མྱུར་དུ་ཤོག །ཁྱེད་རྣམས་གྲིབ་ཀྱི་བདག་པོ་སྟེ། །སེམས་ཅན་ཡོངས་ལ་གྲིབ་ཡམས་གཏོང་། ། གཟའ་ཀླུ་རྣམས་ཀྱི་སྡོང་ཡ་བྱེད། །དམེ་ནལ་སྨུག་གི་སྣ་ཡང་འདྲེན། །སྔོན་ཚེ་རིགས་གསུམ་མགོན་པོ་དང་། །ཁྲོ་རྒྱལ་སྨེ་བ་བརྩེགས་པ་ཡི། །བཀའ་དང་དམ་ལ་བཏགས་པའི་ཚེ། །ཁྱོད་ཀྱིས་ཁས་བླངས་དམ་བཅས་པ། །འདི་ལྟར་གྲིབ་གླུད་བྱིན་པ་ན། །གྲིབ་རྣམས་སེལ་
བར་དམ་བཅས་པའི། །ཁས་བླངས་དམ་ཚིག་དྲན་པར་གྱིས། །རིན་ཆེན་མང་དང་གཟུགས་མཛེས་དང་། །འབྱམས་ཀླས་འཇིགས་ཀུན་བྲལ་བ་ཡི། །དེ་བཞིན་གཤེགས་ལ་ལྟཕྱག་འཚལ་ལོ། །གླུད་དང་ཡས་སྟགས་འདོད་ཡོན་ལྔ། །གཏོར་མ་ཆངས་བུ་འབྲུ་ནག་སོགས། །རང་རང་མཐུན་རྫས་གླུད་གཏོར་འདི། །གྲིབ་བདག་ཀུན་གྱིས་ཐོབ་གྱུར་ནས། །ཐམས་ཅད་ངོམ་ཞིང་ཚིམ་གྱུར་ཏེ། །ལན་ཆགས་བུ་ལོན་བྱང་གྱུར་ནས། །དགའ་མགུ་ཡི་རང་ལྡན་གྱུར་ཅིག །ན་མསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སམྦྷ་ར་སམྦྷ་ར། ཧཱུྃ༔ གྲིབ་བདག་རྒྱལ་པོ་ཆེན་པོ་ཁྱོད། །སྐུ་མདོག་ནག་པོ་མུན་པ་འདྲ། །ཆིབས་སུ་དྲེལ་རྟ་ནག་པོ་ཆིབས། །གྲིབ་གོས་ནག་པོ་ལུས་ལ་གྱོན། །གྲིབ་དར་ནག་པོ་ལག་ན་ཐོགས། །གྲིབ་འཕྲུ་ནག་པོ་དབུ་ལ་བཙུགས། །གྲིབ་བྱ་ནག་པོ་ཀླད་ན་ལྡིང་། །གྲིབ་ཁྱི་ནག་པོ་རོལ་དུ་ཁྲིད། །མཐུན་རྫས་རང་གཟུགས་གཏོར་མ་དང་། །མཐུན་རྫས་ཡས་གླུད་འདི་བཞེས་ལ། །གྲིབ་བདག་ཆེན་པོས་གྲིབ་སོལ་ཅིག །བདག་དང་རྒྱུ་སྦྱོར་ཡོན་བདག་གི །ཟས་གྲིབ་གོས་གྲིབ་ནོར་གྱི་གྲིབ། །གྲིབ་གདོན་ངན་པ་སངས་གྱུར་
ཅིག །རྒྱལ་པོ་བསེན་མོ་འབྱུང་པོའི་གྲིབ། །ལྷ་འདྲེའི་གྲིབ་ནད་སངས་གྱུར་ཅིག །དྲི་ཟ་གྲུལ་བུམ་ཀླུ་ཡི་གྲིབ། །གནོད་སྦྱིན་གྲིབ་རྣམས་སངས་གྱུར་ཅིག །ཐེའུ་རང་འགོང་པོ་མི་ལ་དང་། །སྲིད་པའི་འདྲེ་དགུ་ཐམས་ཅད་ཀྱི། །གྲིབ་གདོན་ངན་པ་སངས་གྱུར་ཅིག །ཉོན་མོངས་དུག་ལྔ་དུག་གསུམ་གྱི། །ལས་ཀྱི་གྲིབ་རྣམས་སངས་གྱུར་ཅིག །མི་གཙང་འཁོན་གྲིབ་བཙོག་ནལ་གྲིབ། །གྲིབ་བདག་ཆེན་པོས་གྲིབ་སོལ་ཅིག །མ་རིག་བཞི་ལས་གྲུབ་པ་ཡི། །སེམས་ལས་ལྷ་འདྲེ་གཉིས་འཛིན་བྱུང་། །རྣམ་རྟོག་ཁ་ཡན་ནད་དུ་གྱུར། །ཐོག་མར་མ་རིག་གདོས་བཅས་གྲིབ། །རྒྱུ་ནི་ཉོན་མོངས་རང་རྒྱུད་གྲིབ། །སྡུག་བསྔལ་ན་ཚ་རྐྱེན་གྱི་གྲིབ། །དེ་གསུམ་ལས་ཀྱི་དུག་ཡིན་ཏེ། །མདའ་དར་གཡབ་ཅིང་། གྲིབ་དེ་དར་དཀར་གཡབ་ཀྱིས་ཕྱགས། །ནད་དེ་མདའ་ཡི་རྒྱུད་ནས་དྲོངས། །གདོན་དེ་ངར་མི་ཁྱོད་ལ་སྤྲོ། །དམ་ཚིག་ཆག་ཉམས་བཀའ་ཡི་གྲིབ། །བཀའ་བཅག་དམ་བཀྲལ་ལྷ་སྲུང་གྲིབ། །གསང་སྔགས་མཆེད་བཙོག་མནོལ་གྱི་གྲིབ། །དེ་གསུམ་ཉམས་ཀྱི་གྲིབ་ཡིན་ཏེ། །གྲིབ་དེ་དར་དཀར་གཡབ་ཀྱིས་ཕྱགས། །
ནད་དེ་མདའ་ཡི་རྒྱུད་ནས་དྲོངས། །གདོན་དེ་ངར་མི་ཁྱོད་ལ་སྤོ། །འཁྲུལ་པ་གདུག་སེམས་ཞེ་སྡང་གྲིབ། །དམོད་པ་རུ་ཏྲ་ཕྲག་དོག་གྲིབ། །རགས་པ་ང་རྒྱལ་གནོད་སེམས་གྲིབ། །དེ་གསུམ་རྒྱུ་ལས་བྱུང་བ་སྟེ། །གྲིབ་དེ་དར་དཀར་གཡབ་ཀྱིས་ཕྱགས། །ནད་དེ་མདའ་ཡི་རྒྱུད་ནས་དྲོངས། །གདོན་དེ་ངར་མི་ཁྱོད་ལ་སྤོ། །སྟེང་ན་གཟའ་དང་འབྱུང་པོའི་གྲིབ། །འོག་ན་ཀླུ་དང་ས་བདག་གྲིབ། །བར་ན་ལྷ་སྲིན་སྡེ་བརྒྱད་གྲིབ། །དེ་གསུམ་གནོད་པའི་གྲིབ་ཡིན་ཏེ། །གྲིབ་དེ་དར་དཀར་གཡབ་ཀྱིས་ཕྱགས། །ནད་དེ་མདའ་ཡི་རྒྱུད་ནས་དྲོངས། །གདོན་དེ་ངར་མི་ཁྱོད་ལ་སྤྲོ། །ཕོ་ལྷ་རིགས་ཀྱི་མནོལ་བའི་གྲིབ། །དགྲ་ལྷ་མལ་དུ་གཏོར་བའི་གྲིབ། །མ་ལྷ་མེ་འབར་བོར་གྱུར་གྲིབ། །ཞང་ལྷ་ཐབ་ཀྱི་བོར་བའི་གྲིབ། །ཡུལ་ལྷ་བསང་མཆོད་ཞན་པའི་གྲིབ། །དེ་ལྔ་རང་ལུས་ལྷ་ཡི་གྲིབ། །གྲིབ་དེ་དར་དཀར་གཡབ་ཀྱིས་ཕྱགས། །ནད་དེ་མདའ་ཡི་རྒྱུད་ནས་དྲོངས། །གདོན་དེ་ངར་མི་ཁྱོད་ལ་སྤོ། །བན་བོན་མུ་སྟེགས་བྱད་ཀྱི་གྲིབ། །མི་ལ་བསེ་རག་གདོན་གྱི་གྲིབ། །དམེ་སོགས་བཙོག་བྱུར་བུད་མེད་གྲིབ། །ཆོ་འཕྲུལ་བརྡ་ཐན་
མཐོང་བའི་གྲིབ། །དེ་བཞི་རྐྱེན་གྱི་གྲིབ་ཡིན་ཏེ། །གྲིབ་དེ་དར་དཀར་གཡབ་ཀྱིས་ཕྱགས། །ནད་དེ་མདའ་ཡི་རྒྱུད་ནས་དྲོངས། །གདོན་དེ་ངར་མི་ཁྱོད་ལ་སྤོ། །ཕ་ཁུ་དམེ་དང་རྨུག་གི་གྲིབ། །མ་ཕྱི་མདུན་དང་ནལ་གྱི་གྲིབ། །མཛའ་བོ་ཤག་རལ་མནའ་ཡི་གྲིབ། །ཉེ་བ་ཁྱིམ་མཚེས་ཟས་ཀྱི་གྲིབ། །རོགས་ངན་སྡིག་ཅན་གྲོགས་ཀྱི་གྲིབ། །དེ་ལྔ་འགྲོགས་པའི་གྲིབ་ཡིན་ཏེ། །གྲིབ་དེ་དར་དཀར་གཡབ་ཀྱིས་ཕྱགས། །ནད་དེ་མདའ་ཡི་རྒྱུད་ནས་དྲོངས། །གདོན་དེ་ངར་མི་ཁྱོད་ལ་སྤོ། །དར་ཟབ་དབྱི་སྤྱང་གོས་ཀྱི་གྲིབ། །གསེར་གཡུ་ཟངས་ལྕགས་རྫས་ཀྱི་གྲིབ། །བྱིན་ཆས་ཕུང་པོ་རོ་ཡི་གྲིབ། །དེ་གསུམ་འཁྲུལ་པའི་གྲིབ་ཡིན་ཏེ། །གྲིབ་དེ་དར་དཀར་གཡབ་ཀྱིས་ཕྱགས། །ནད་དེ་མདའ་ཡི་རྒྱུད་ནས་དྲོངས། །གདོན་དེ་ངར་མི་ཁྱོད་ལ་སྤོ། །རི་སློང་སྤྱང་ཐོད་ཤ་དམར་གྲིབ། །བག་སྣ་སྐྱེས་སྣ་མགྲོན་གྱི་གྲིབ། །ཕྲ་མ་ཚིག་རྩུབ་འཁོན་གྱི་གྲིབ། །རྣམ་རྟོག་ཆེ་བ་སེམས་ཀྱི་གྲིབ། །དེ་བཞི་རྣམ་རྟོག་གྲིབ་ཡིན་ཏེ། །གྲིབ་དེ་དར་དཀར་གཡབ་ཀྱིས་ཕྱགས། །ནད་དེ་མདའ་ཡི་རྒྱུད་ནས་དྲོངས། །གདོན་དེ་ངར་
མི་ཁྱོད་ལ་སྤོ། །ལྷ་དང་ལེ་གུ་རྒྱལ་འགོང་གྲིབ། །སྔ་ཆོམ་ལྷག་ཆད་ཐན་གྱི་གྲིབ། །བདུན་ཟུར་བཞི་གཤེད་ལོ་ཡི་གྲིབ། །ཟླ་ཟུར་བྱ་བྱེད་ཞག་གི་གྲིབ། །དེ་བཞི་དུས་ཀྱི་གྲིབ་ཡིན་ཏེ། །གྲིབ་དེ་དར་དཀར་གཡབ་ཀྱིས་ཕྱགས། །ནད་དེ་མདའ་ཡི་རྒྱུད་ནས་དྲོངས། །གདོན་དེ་ངར་མི་ཁྱོད་ལ་སྤྲོ། །གནམ་ལོ་སྤར་ཁ་དགྲ་གཤེད་གྲུབ། །ཐེའུ་རང་ཀླུ་དང་ཕྱོགས་ངན་གྲིབ། །སྲོག་ལུས་ཀླུང་རྟ་འབྱུང་བའི་གྲིབ། །དཀར་ནག་དགུ་མིག་སྨེ་བའི་གྲིབ། །གཅོད་འདྲལ་མི་མཐུན་གཟའ་གྲོགས་གྲིབ། །དེ་ལྔ་གནམ་ལོའི་གྲིབ་ཡིན་ཏེ། །གྲིབ་དེ་དར་དཀར་གཡབ་ཀྱིས་ཕྱགས། །ནད་དེ་མདའ་ཡི་རྒྱུད་ནས་དྲོངས། །གདོན་དེ་ངར་མི་ཁྱོད་ལ་སྤོ། །རྨི་ལམ་བག་ཆགས་ཐེར་གཟུགས་གྲིབ། །ལས་ངན་འཕྲོ་མཐུད་འཁོར་བའི་གྲིབ། །བག་ཆགས་འཁོར་ངན་ངན་འགྲོའི་གྲིབ། །དེ་གསུམ་བག་ཆགས་སྔོན་ལས་གྲིབ། །གྲིབ་དེ་དར་དཀར་གཡབ་ཀྱིས་ཕྱགས། །ནད་དེ་མདའ་ཡི་རྒྱུད་ནས་དྲོངས། །གདོན་དེ་ངར་མི་ཁྱོད་ལ་སྤོ། །གསང་སྔགས་ཆོ་ག་ཉམས་ཆག་གྲིབ། །ལྷ་ལ་ཉེས་པ་བྱས་པའི་གྲིབ། །བཀའ་ལ་བར་ཆད་བྱེད་པའི་གྲིབ། །
ལུང་ལ་ལོག་པར་རྟོག་པའི་གྲིབ། །ཕན་གནོད་རེ་དོགས་བཏང་སྙོམས་གྲིབ། །གཡོ་སྒྱུ་ཐེ་ཚོམ་ཟོས་པའི་གྲིབ། །ལེ་ལོ་ལྷག་ཆད་ནོར་འཁྲུལ་གྲིབ། །དེ་རྣམས་ཤེས་བྱའི་གྲིབ་ཡིན་ཏེ། །གྲིབ་དེ་དར་དཀར་གཡབ་ཀྱིས་ཕྱགས། །ནད་དེ་མདའ་ཡི་རྒྱུད་ནས་དྲོངས། །གདོན་དེ་ངར་མི་ཁྱོད་ལ་སྤོ། །བདག་དང་རྒྱུ་སྦྱོར་ཡོན་བདག་གི།ལུས་ངག་ཡིད་གསུམ་ཕྱི་ནང་གི །གྲིབ་དང་ནད་གདོན་ཀུན་སངས་ནས། །ཤེལ་སྒོང་བཞིན་དུ་དག་གྱུར་ཅིག །དངོས་པོ་གཉིས་འཛིན་དག་གྱུར་ཅིག །དག་པའི་ས་ལ་གནས་པར་ཤོག །ཨོཾ་ཨརྩི་མརྩི་བྷར་ཁུང་མ་ཧ་སྲ་ན་ཏ་ཡ་ཧཱུྃ་ཧཱུྃ་ཕཊ་ཕཊ་སྭཱ་ཧཱཿ གྲིབ་དང་མི་གཙང་བ་ཐམས་ཅད་ཨ་པ་ན་ཡེ་སྭཱ་ཧཱ། དེ་ནས་ལག་ཏུ་ཁབ་ཐོགས་ལ། ཀྱེ། དེ་བ་རིང་རྒྱུ་སྦྱོར་ཡོན་བདག་གི །སྐུ་གླུད་ངར་མི་རྒྱན་ཅན་འདི། །ཤ་ནི་བསེ་ལ་ཁྲག་ནི་མཚལ། །རུས་པ་དུང་ལ་ལྤགས་པ་སྐྱིན། །ཟེར་མོ་སྐུ་ལ་ལུང་ཐང་མིག །ཁོང་བཅུད་རིན་ཆེན་སྣ་ལྔ་བཅུག །དར་ཟབ་སྣ་ལྔའི་རྒྱན་གྱིས་བརྒྱན། །འབྲུ་སྣ་དགུ་ཡི་རྒྱུ་ལས་བྱས། །མི་བས་གླུད་བཟང་སྤུ་ཡིས་དྲོ། །ཡོན་བདག་འདི་ཡི་གླུད་དུ་གཏོང་། །བདག་
དང་རྒྱུ་སྦྱོར་ཡོན་བདག་གི །ཡ་ཀི་སྐྲ་ཡི་ཕྱི་ཟུར་ནས། །རྐང་པའི་སེན་སྣེ་ཡན་ཆད་ཀྱི། །ནད་དང་གཟེར་དང་གདོན་བགེགས་རྣམས། །སྐུ་གླུད་ངར་མི་ཁྱོད་ལ་སྤོ། །ནད་ཀྱི་མདངས་ཕྱུང་ཚེར་མར་དྲོངས། །བསྲུང་བྱའི་ནད་འདི་ཁྱོད་ལ་སྤོ། །ན་ཤིང་འཐོམ་པ་མགོ་ཡི་ནད། །སྐུ་གླུད་ངར་མི་ཁྱོད་ལ་སྤོ། །ནད་ཀྱི་མདངས་ཕྱུང་ཚེར་མར་དྲོངས། །ཁྱོད་ཀྱིས་ནད་འདི་ཁྱེར་ལ་སོང་། །འོན་ཤིང་འཐིབ་པ་རྣ་བའི་ནད། །ཚ་ཞིང་བྱེར་བ་ས་ཡི་ནད། །སྐུ་གླུད་ངར་མི་ཁྱོད་ལ་སྤོ། །ནད་ཀྱི་མདངས་ཕྱུང་ཚེར་མར་དྲོངས། །ཁྱོད་ཀྱིས་ནད་འདི་ཁྱེར་ལ་སོང་། །གཟེར་ཞིང་ཁོལ་བ་ཀླད་པའི་ནད། །ལོང་ཞིང་འགྲིབ་པ་མིག་གི་ནད། །སྐུ་གླུད་ངར་མི་ཁྱོད་ལ་སྤྲོ། །ནད་ཀྱི་མདངས་ཕྱུང་ཚེར་མར་དྲོངས། །ཁྱོད་ཀྱིས་ནད་འདི་ཁྱེར་ལ་སོང་། །འཚུབས་ཤིང་འཚང་བ་སྣ་ཡི་ནད། །དག་པར་བྱེད་པ་ལྕེ་ཡི་ནད། །སྐུ་གླུད་ངར་མི་ཁྱོད་ལ་སྤྲོ། །ནད་ཀྱི་མདངས་ཕྱུང་ཚེར་མར་དྲོངས། །ཁྱོད་ཀྱིས་ནད་འདི་ཁྱེར་ལ་སོང་། །འགགས་པར་བྱེད་པ་མགུལ་པའི་ནད། །རིམས་ནད་ཁྲག་ནད་མ་མོའི་ནད། །སྐུ་གླུད་ངར་མི་ཁྱོད་ལ་སྤོ། །ནད་ཀྱི་མདངས་ཕྱུང་ཚེར་མར་
དྲོངས། །ཁྱོད་ཀྱིས་ནད་འདི་ཁྱེར་ལ་སོང་། །ཞ་ཞིང་གྲུམ་པ་རྐང་པའི་ནད། །ན་ཞིང་སྒྲུང་པ་གཉན་གྱི་ནད། །སྐུ་གླུད་ངར་མི་ཁྱོད་ལ་སྤོ། །ནད་ཀྱི་མདངས་ཕྱུང་ཚེར་མར་དྲོངས། །ཁྱོད་ཀྱིས་ནད་འདི་ཁྱེར་ལ་སོང་། །སྨྲ་ཞིང་མྱོས་པ་འབྱུང་པོའི་ནད། །འཕྱོ་ཞིང་གཡེང་བ་གཡོ་སྒྱུའི་ནད། །སྐུ་གླུད་ངར་མི་ཁྱོད་ལ་སྤོ། །ནད་ཀྱི་མདངས་ཕྱུང་ཚེར་མར་དྲོངས། །ཁྱོད་ཀྱིས་ནད་འདི་ཁྱེར་ལ་སོང་། །གཟུགས་ཀྱི་ཕུང་པོ་སྐུ་ཡི་ནད། །ལུས་ཀྱི་ཕུང་པོ་སྐུ་ཡི་ནད། །སྐུ་གླུད་ངར་མི་ཁྱོད་ལ་སྤོ། །ནད་ཀྱི་མདངས་ཕྱུང་ཚེར་མར་དྲོངས། །ཁྱོད་ཀྱིས་ནད་འདི་ཁྱེར་ལ་སོང་། །བཀྲག་གསལ་མདངས་མེད་སྤྱན་གྱི་ནད། །མྱོས་ཤིང་འབྱུང་བ་འབྱུང་པོའི་ནད། །སྐུ་གླུད་ངར་མི་ཁྱོད་ལ་སྤོ། །ནད་ཀྱི་མདངས་ཕྱུང་ཚེར་མར་དྲོངས། །ཁྱོད་ཀྱིས་ནད་འདི་ཁྱེར་ལ་སོང་། །ཁོང་ཁྲག་དམར་པོ་རྩ་ཡི་ནད། །གཡེང་ཞིང་རེངས་པ་གཞུང་པའི་ནད། །སྐུ་གླུད་ངར་མི་ཁྱོད་ལ་སྤོ། །ནད་ཀྱི་མདངས་ཕྱུང་ཚེར་མར་དྲོངས། །ཁྱོད་ཀྱིས་ནད་འདི་ཁྱེར་ལ་སོང་། །རྒྱས་ཤིང་སྦོས་པ་ཕོ་བའི་ནད། །ལུ་ཞིང་བརྒྱལ་བ་གློ་བའི་ནད། །སྐུ་གླུད་ངར་
མི་ཁྱོད་ལ་སྤྲོ། །ནད་ཀྱི་མདངས་ཕྱུང་ཚེར་མར་དྲོངས། །ཁྱོད་ཀྱིས་ནད་འདི་ཁྱེར་ལ་སོང་། །ཤ་སེར་མིག་སེར་མཁྲིས་པའི་ནད། །ཞ་ཞིང་འཁུམ་པ་མཁལ་མའི་ནད། །སྐུ་གླུད་ངར་མི་ཁྱོད་ལ་སྤྲོ། །ནད་ཀྱི་མདངས་ཕྱུང་ཚེར་མར་དྲོངས། །ཁྱོད་ཀྱིས་ནད་འདི་ཁྱེར་ལ་སོང་། །བཤལ་ཞིང་འཁྲོགས་པ་རྒྱུ་མའི་ནད། །ལྐུགས་ཤིང་རེངས་པ་སྲོག་རྩའི་ནད། །སྐུ་གླུད་ངར་མི་ཁྱོད་ལ་སྤོ། །ནད་ཀྱི་མདངས་ཕྱུང་ཚེར་མར་དྲོངས། །ཁྱོད་ཀྱིས་ནད་འདི་ཁྱེར་ལ་སོང་། །གཟེར་ཞིང་ཁོལ་བ་སྲོག་རྩའི་ནད། །ནད་རིགས་སུམ་བརྒྱ་དྲུག་ཅུའི་ནད། །སྐུ་གླུད་ངར་མི་ཁྱོད་ལ་སྤོ། །ནད་ཀྱི་མདངས་ཕྱུང་ཚེར་མར་དྲོངས། །ཁྱོད་ཀྱིས་ནད་འདི་ཁྱེར་ལ་སོང་། །སྤྱི་བོ་ཀླད་པའི་རྒྱ་སྲུབ་ནས། །སྤྱན་མིག་གཡས་དང་གཡོན་པ་ནས། །ནད་ཀྱི་མདངས་ཕྱུང་ཚེར་མར་དྲོངས། །རྣ་བ་གཡས་དང་གཡོན་པ་ནས། །སྣ་བུག་གཡས་དང་གཡོན་པ་ནས། །ནད་ཀྱི་མདངས་ཕྱུང་ཚེར་མར་དྲོངས༔ །དུང་སོ་བ་ལེ་སུམ་ཅུའི་ནད། །སྐུ་གླུད་ངར་མི་ཁྱོད་ལ་སྤྲོ། །ནད་ཀྱི་མདངས་ཕྱུང་ཚེར་མར་དྲོངས། །ཁྱོད་ཀྱིས་ནད་འདི་ཁྱེར་ལ་སོང་། །གྲིབ་བདག་རྒྱལ་པོས་
གྲིབ་ལོངས་ཤིག །ཡས་བདག་ཆེན་པོས་ཡས་བཞེས་ཤིག །རྐྱེན་བདག་ཆེན་པོས་རྐྱེན་སོལ་ཅིག །མི་འདི་ཐོངས་ལ་ཡས་འདི་ཁྱེར། །ཉི་མ་དེ་རིང་ཕྱིན་ཆད་ནས། །ཡོན་བདག་འདི་ལ་གནོད་མ་བྱེད། །བཟུང་བ་ཐོངས་ལ་བཅིངས་པ་ཁྲོལ། །བསྡམས་པ་གློད་ལ་མནན་པ་ཁྱོག །རིམས་ནད་ཡམས་ནད་གྲིབ་བདག་རྣམས། །གླུད་ཀྱི་གཏོར་མ་འདི་ལོངས་ལ། །དེ་བཞིན་གཤེགས་པའི་བཀའ་ལ་ཉོན། །གལ་ཏེ་བཀའ་ལ་མི་ཉན་ན། །ཤིན་ཏུ་སྟོབས་ཆེན་གཟི་བརྗིད་ཅན། །སྨེ་བ་བརྩེགས་པ་ཁྲོས་ནོས་ནི། །ཕྱག་མཚན་རྡོ་རྗེ་འབར་བ་ཡིས། །ལུས་ནི་དུམ་བུ་སྟོང་དུ་བཏང་། །མགོ་ནི་ཚལ་པ་བརྒྱ་རུ་འགས། །སེམས་ནི་རྡོ་རྗེའི་དམྱལ་བར་འགྲོ། །རྡུལ་ཕྲན་བཞིན་དུ་བརླག་པར་འགྱུར། །དེ་བས་གྲིབ་བདག་རྒྱལ་པོས་གྲིབ་སོལ་ཅིག །ནད་འདི་ཁྱོད་ཀྱིས་ཁྱེར་ལ་སོང་། །ཨོཾ་ཨརྩི་མརྩི་བྷུར་ཁུང་མ་ཧཱ་པྲ་ན་ཏ་ཡ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། དེ་ནས་གྲིབ་༈ གླུད་ཁ་ཕར་བསྒྱུར་ལ། རྫོངས་འདེབས་བྱའོ། །ཧཱུྃ། གྲིབ་བདག་རྒྱལ་པོ་རྟ་ནག་ཅན། །བྱ་སྦྲུལ་ཕག་གི་མགོ་ཅན་དང་། །སྦལ་པའི་མགོ་ཅན་ལ་སོགས་པའི། །གྲིབ་ཀྱི་བདག་པོ་
བདག་མོ་ཀུན། །ད་ནི་འགྲོ་རན་ཆས་རེ་རན། །གྲིབ་རྫས་ཆེ་དགུ་རྫོངས་སུ་འདེབས། །བྲ་སྲན་འབྲུ་ནག་རྫོངས་སུ་འདེབས། །ཡོས་བཀྲ་ཆིགས་ཕྱེ་རྫོངས་སུ་འདེབས། །ཚྭ་དང་གཡེར་མ་རྫོངས་སུ་འདེབས། །སྦང་རམ་ཤ་ཤུན་རྫོངས་སུ་འདེབས། །གྲིབ་གླུད་གོས་དུམ་རྫོངས་སུ་འདེབས། །ཟ་འཕྲོ་འཐུང་ལྷག་རྫོངས་སུ་འདེབས། །རྫོངས་འདེབས་འདི་ཡིས་ཚིམ་གྱིས་ལ། །ཕྱིན་ཆད་གནས་འདིར་མ་གནོད་ཅིག །གྲིབ་བདག་ཁྱོད་ལ་ལམ་བསྟན་པ། །ཉི་མ་ནུབ་ཕྱོགས་ཕ་ཀི་ན། །བ་གླང་སྤྱོད་ཀྱི་ཚུར་མཐའ་ན། །འཛམ་བུ་གླིང་གི་ཕར་མཐའ་ན། །རྒྱ་མཚོ་ཆེན་པོའི་ཕར་འགྲམ་ན། །ཉི་མ་ཟླ་བའི་ཟེར་མེད་ཅིང་། །མུན་པ་ནག་པོའི་ཀློང་དཀྱིལ་ནས། །གྲིབ་ཡུལ་ནག་པོ་གནས་རེ་འདེབས། །གྲིབ་མཁར་ནག་པོ་རྫོང་རེ་བཙན། །གྲིབ་མི་སྨྲ་མཁས་ས་ལ་ལ། །གྲིབ་རྟ་འཚེར་དང་སི་ལི་ལི། །གྲིབ་བྱ་ལྡིང་དང་ལྷབས་སེ་ལྷུབ། །གྲིབ་ཁྲི་ཟུག་དང་ལྷངས་སེ་ལྷང་། །གྲིབ་རྫས་སྣ་ཚོགས་སྤུངས་སེ་སྤུང་། །དེ་འདྲའི་གྲིབ་ཡུལ་གནས་རེ་བཟང་། །གྲིབ་བདག་ལམ་བསྟན་དེ་རུ་བསྟན། །ཉི་མ་བྱང་ཕྱོགས་གནས་དག་ཏུ། །
གྲིབ་ཁང་ནག་པོའི་གཏིང་རུམ་ནས། །གྲིབ་བདག་ཕོས་ནི་འབོད་དང་རྒྱངས་སེ་རྒྱང་། །གྲིབ་བདག་མོས་ནི་གཡབ་དང་ལིངས་སེ་ལིང་། །གྲིབ་བདག་ལམ་བསྟན་དེ་རུ་བསྟན། །གྲིབ་བདག་ཕོ་མོ་དེ་རུ་སོང་། །རྒྱུ་སྦྱོར་ཡོན་གྱི་བདག་པོ་ལ། །ཕྱིན་ཆད་གནོད་པ་མ་བྱེད་ཅིག །དེ་ནས་ལོ་བདུད་སྟེང་ངམ་ཕྱོགས་གཙང་སར་འབུལ་བཅུག་ཅིང་། ཧཱུྃ༔ ང་ནི་ཁྲོ་བོ་སྨེ་བ་བརྩེགས། །སྐུ་ལས་མེ་དཔུང་ཁྲོ་ཆུང་ཚོགས། །སེར་རྒོད་བབ་པ་ལྟར་འཕྲོས་པས། །གྲིབ་དང་གྲིབ་བདག་གདོན་གྱི་ཚོགས། །རྒྱ་མཚོ་ཆེན་པོའི་ཕར་འགྲམ་བསྐྲད། །ཨོཾ་སུམྦྷ་ནི་སུམྦྷ་ནི་སོགས། བརྗོད་ཅིང་རོལ་མོ་བསྒྲགས། མེ་དཔུང་ཁྲོ་ཚོགས་ཚུར་འདུས་པས། །སྟེང་འོག་རྡོ་རྗེའི་གུར་ཁང་ལས། །ཡེ་ཤེས་མེ་དཔུང་འབར་བས་གཏམས། །བདག་དང་བསྲུང་བྱ་ཐམས་ཅད་ལ། །ཕྱིན་ཆད་གྲིབ་ཀྱིས་མི་ཚུགས་པར། །སྨེ་བ་བརྩེགས་པས་བསྲུང་དུ་གསོལ། །ཨོཾ་ཨརྩི་མརྩི་བྷར་ཁུང་མ་ཧཱ་པྲ་ན་ཏ་ཡ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། བཛྲ་རཀྵ་རཀྵ་ཧཱུྃ། རང་ཉིད་སྨེ་བ་བརྩེགས་པ་དང་། །ནད་པ་མི་དམིགས་འཇའ་ལྟར་ཡལ། །གདོད་ནས་རྣམ་དག་ཆོས་ཀྱི་སྐུ། །མི་གཙང་གྲིབ་སོགས་
མིང་ཡང་མེད། །ཀ་དག་ཀུན་བཟང་ཀློང་དུ་ཐིམ། །བགེགས་རིགས་སྟོང་ཕྲག་བརྒྱད་ཅུ་སོགས། བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །དགོངས་འདུས་གུ་དྲག་མ་ནིང་ལ་སོགས་པར། །གཞུང་ཆེན་རྣམས་ནས་གྲིབ་སེལ་རྒྱས་པར་གསུངས། །བསྡུས་པ་གྲིབ་སེལ་རྟ་ནག་མ་འདི་ནི། །དམ་པ་བདེ་གཤེགས་སོགས་ཀྱིས་མཛད་པ་དང་། །དག་དང་མ་དག་རྒྱས་བསྡུས་མང་དུ་མཐོང་། །སྔོན་ཚེ་བདག་ཉིད་བྱིས་སྤ་ཡིན་པའི་དུས། །ནད་པ་འགའ་ལ་གྲིབ་སེལ་འདི་བྱས་པས། །འཕྲལ་དུ་ཕན་ཐོགས་ཆེ་བ་མྱོང་བས་གྲུབ། །དབུལ་ཕོངས་རྒས་འཁོགས་བྱིས་པ་ལྷ་མེད་སོགས། །ཟས་གྲིབ་གོས་གྲིབ་སོགས་ཀྱི་རྐྱེན་བྱས་ནས། །གྲ་ལིང་རྐྱེར་དང་སོ་ནད་ཨོཾག་མ་སྒྲུང་། །སྐྱུག་དང་ཡི་ག་ཆད་པ་ལ་སོགས་པ། །གཉོམ་ཆུང་ནད་པ་འགའ་ལ་ཕན་པའི་ཕྱིར། །ཚིག་ཉུང་དོན་གསལ་རཱ་ག་ཨ་སྱས་བསྡེབས། །དགེ་སློང་བརྩོན་འགྲུས་ཞེས་བྱས་ཡི་གེར་བཀོད། །འདི་ནི་སྔར་དང་མི་འདྲ་རྣོ་བ་སྟེ། །བདག་བསྐྱེད་གནམ་ཆོས་སྨེ་བ་བརྩེགས་པ་ནི། །སྔགས་ཀྱང་གཞན་དང་ཅུང་ཞིག་མི་འདྲ་སྟེ། །བརྒྱུད་པ་ཉེ་ཞིང་གཞན་ལས་རྣོ་བ་ཡིན། །གཏོར་མཆོད་ལྷ་གཞུང་ཚོགས་ཀྱང་མི་དགོས་ཏེ། །ནད་པ་རྣམས་ལ་འཕྲལ་དུ་བྱེད་ཆོག་པས། །གཉོམ་ཆུང་དབུལ་ཕོངས་རྣམས་ལ་ཕན་ཐོགས་ཆེ། །དེ་ཕྱིར་གཞན་ཕན་སྙིང་རྗེའི་སེམས་ཀྱིས་བྲིས། །སྦ་འོས་གསལ་བཀོད་ཉེས་པ་མཆིས་སྲིད་ན། །གནམ་ཆོས་བཀའ་ཡི་སྲུང་མ་རྣམས་ལ་བཤགས། །དགེ་བས་
གཉོམ་ཆུང་ནད་པ་མང་པོ་ལ། །མི་འཇིགས་སྐྱབས་ཀྱི་སྦྱིན་པར་འགྱུར་བར་ཤོག། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།