གནོད་སྦྱིན་དཀོར་གྱི་བདག་པོའི་ཕྲིན་བཅོལ་བསྡུས་པ་བསམ་དོན་ལྷུན་གྲུབ།

གནོད་སྦྱིན་དཀོར་གྱི་བདག་པོའི་ཕྲིན་བཅོལ་བསྡུས་པ་བསམ་དོན་ལྷུན་གྲུབ་བཞུགས་སོ༔

ན་མོ་གུ་རུ་པདྨ་ཀཱ་ར་ཡེ༔ བརྡ་ཡིག །གཏོར་མ་དམར་གྱི་བརྒྱན་པ་ལ༔ ཟུར་གསུམ་མཆོད་རྫས་དྲག་པོའི་བསྐོར༔ དེ་ནས་གདུང་ཤུགས་གུས་བསྐུལ་གྱིས༔ རྣམ་པ་ཀུན་ཏུ་འདི་ལྟར་བྱེད༔ ན་མོ༔ དུས་གསུམ་རྒྱལ་བའི་གསུང་དབང་ཕྱུག༔ ཁྱབ་བདག་པདྨ་ཧེ་རུ་ཀ༔ རྟ་མཆོག་རོལ་བ་གདུལ་ཐབས་གར༔ མཛད་པ་རྨད་བྱུང་དབང་གི་རྒྱལ༔ དྲེགས་པའི་གཟུགས་ཀྱིས་བསྟན་པ་སྐྱོངས༔ རྣལ་འབྱོར་བདག་གི་ལེའུའི་ལྷ༔ བརྩེ་བ་ཆེན་པོའི་ཐུགས་རྗེའི་དགོངས༔ རྒྱུན་གྱི་གཏོར་མ་ཆད་མདོ་བཞེས༔ ཐུགས་འགལ་ཉམས་ཆགས་བག་རྡུལ་གྱིས༔ ཡེ་ཤེས་དྲི་བྲལ་ཤེལ་སྒོང་ལ༔ གཤིས་ལ་ཞུགས་པ་མི་སྲིད་མོད༔ འོན་ཀྱང་རང་རྒྱུད་ནོངས་པ་བཤགས༔ ལྷ་ལ་རྣམ་རྟོག་མི་མངའ་ཡང་༔ རྟེན་འབྲེལ་དབང་གིས་ཕྱུག་པས་ན༔ ལས་ལ་སྲ་ལྟས་ཤེས་མིན་གྱིས༔ འབྲས་བུ་བསྐྱེད་པའི་ནུས་སོ་གཞོམ༔ ལྔ་བདོའི་རྒུད་པའི་ཉོན་མོངས་ཀྱིས༔ འཁྲུལ་བ་རང་བརྒྱུད་ཤོར་བའི་ཕྱིར༔ ལྷ་དང་དགོངས་སྤྱོད་མ་འདྲེས་པའི༔ ཉམས་ཆགས་ཞེན་སྣང་གོལ་སྒྲིབ་བཤགས༔ ཁ་ན་མ་ཐོ་སྨྲ་གཞན་གྱིས༔ རྣམ་པར་རྟོག་པ་སླངས་པ་ཡི༔ རྒྱུད་འཁྲུལ་རྟོག་པ་གདོན་དུ་ལྡང་༔ དེ་ཡི་ལྷ་ལ་སྙད་བཏགས་བཤགས༔ འཁོར་གྱི་དྲེགས་པ་ཐམས་ཅད་ཀྱང་༔ ལེགས་ཉེས་སྟངས་འཛིན་དམ་ཚིག་ཅན༔ ཐུགས་འགལ་རྟོག་སྒྲིབ་ཉེས་སྤྱོད་ཀུན༔ གནོང་འགྱོད་དྲག་པོའི་མཐོལ་ལོ་བཤགས༔ ཆོས་ཉིད་བདེན་པ་དབང་བཙན་ལ༔ ཆོས་ཅན་རྒྱུ་འབྲས་བཀའ་བཙན་པས༔ ཆོས་སྐྱོང་བསྲུང་མ་ཐུགས་དཀྱིལ་ཡངས༔ ཆོས་བཞིན་སྤྱོད་ལ་དགོངས་པར་མཛོད༔ ཁྱད་པར་དགྲ་ལ་དཔའ་རྟགས་འདི༔ སངས་རྒྱས་བསྟན་བའི་རྭ་བ་ཡིན༔ སྒྲུབ་པ་པོ་ལ་བརྩེ་བྱམས་དེ༔ བྱང་ཆུབ་སེམས་ཀྱིས་མངོན་རྟགས་ཡིན༔ ཕྲིན་ལས་རྣམ་བཞི་རྫོགས་པ་དེ༔ དབང་བཅུ་གྲུབ་པའི་སྤྱི་གཟུགས་ཡིན༔ འཁུ་ལྡོག་གདུག་རྩུབ་ཚ་བ་ན༔ གཞུང་ངན་སྐྱེ་བོའི་ཆ་ལུགས་ལགས༔ ཚར་གཅོད་རྗེས་འཛིན་གོ་ལྡོག་ན༔ གང་ཟག་ངན་པའི་ངང་ཚུལ་ལགས༔ དགྲ་ལ་རྦད་རྟགས་མ་ཡོད་ན༔ ལང་ཤོར་བསྟན་འཛིན་སྤྱི་ལ་གཟེ༔ རང་ལ་ཤོང་རྒྱ་མ་ཆེ་ན༔ ཆོས་ཉིད་མཉམ་པའི་དོན་ལ་གཟེ༔ ཡང་གཞན་ཚིག་གཞར་རྒྱུར་གྱུར་ན༔ ཁྲེལ་དང་ངོ་ཚའི་གནས་སུ་གཟེ༔ ཀྱཻ༔ སྔོན་ཚེ་པདྨ་ཐོད་ཕྲེང་དང་༔ རྗེས་འཇུག་ཀློང་གསལ་བདུད་འཇོམས་གླིང་༔ གྲུབ་ཐོབ་ག་གཱ་ཨ་བྷྱེ་ཡི༔ སྟོང་ཉིད་གྲུབ་པའི་གཟི་བྱིན་གྱིས༔ བཀའ་བསྒོས་དམ་བཞག་གཡར་དམ་འདི༔ བསྒྲགས་པ་རྣལ་འབྱོར་བདག་གི་སྟེ༔ བྲོ་བོར་ལྷ་ཁྱོད་གཡར་དམ་ལོངས༔ ཐོགས་མེད་ལྷར་དག་གཟི་བྱིན་དང་༔ དམ་ཚིག་དེ་ཡི་རྒྱུད་སྦྲེལ་བ༔ བསྒྲགས་པ་རྣལ་འབྱོར་བདག་གི་སྟེ༔ བྲོ་བོར་ལྷ་ཁྱོད་གཡར་དམ་ལོངས༔ བཟང་ངན་རྣམ་རྟོག་དབྱེ་བསལ་རྐྱེན༔ ཐམས་ཅད་ལྟག་ཤལ་རྒྱན་གྱི་བཀྲམ༔ བསྒྲགས་པ་རྣལ་འབྱོར་བདག་གི་སྟེ༔ བྲོ་བོར་ལྷ་ཁྱོད་གཡར་དམ་ལོངས༔ བྱ་བྱེད་ཐམས་ཅད་ཕྱག་རྒྱར་བབས༔ ཡེ་ནས་དོན་མ་ཡིན་མེད་དམ༔ བསྒྲགས་པ་རྣལ་འབྱོར་བདག་གི་སྟེ༔ བྲོ་བོར་ལྷ་ཁྱོད་གཡར་དམ་ལོངས༔ ཉམས་འདའ་བྲལ་བའི་དམ་ཚིག་བྱིན༔ རྫོང་དུ་རྡོ་རྗེའི་མཁར་གྱི་བཟུང་༔ བསྒྲགས་པ་རྣལ་འབྱོར་བདག་གི་སྟེ༔ བྲོ་བོར་ལྷ་ཁྱོད་གཡར་དམ་ལོངས༔ སེམས་དང་སེམས་བྱུང་སྒྱུ་མའི་ངང་༔ དབུ་མ་ཆེན་པོའི་དམ་ཚིག་དེ༔ བསྒྲགས་པ་རྣལ་འབྱོར་བདག་གི་སྟེ༔ བྲོ་བོར་ལྷ་ཁྱོད་གཡར་དམ་ལོངས༔ ཐམས་ཅད་རྡོ་རྗེ་སེམས་དཔའི་བསྡུས༔ ཕྱག་རྒྱ་ཆེན་པོའི་དམ་ཚིག་དེ༔ བསྒྲགས་པ་རྣལ་འབྱོར་བདག་གི་སྟེ༔ བྲོ་བོར་ལྷ་ཁྱོད་གཡར་དམ་ལོངས༔ འཁོར་འདས་རང་གྲོལ་གཞི་སྣང་རྫོགས༔ ཤིན་ཏུ་རྣལ་འབྱོར་དམ་ཚིག་དེ༔ བསྒྲགས་པ་རྣལ་འབྱོར་བདག་གི་སྟེ༔ བྲོ་བོར་ལྷ་ཁྱོད་གཡར་དམ་ལོངས༔ མི་ནུབ་རྒྱལ་མཚན་རྩེ་མོ་ན༔ ཁད་མཉམ་ཉི་ཟླ་བརྡལ་བའི་དམ༔ བསྒྲགས་པ་རྣལ་འབྱོར་བདག་གི་སྟེ༔ བྲོ་བོར་ལྷ་ཁྱོད་གཡར་དམ་ལོངས༔ ཀྱཻ༔ འཁོར་འདས་གཞི་ལམ་འབྲས་བུའི་ཆོས༔ ལུས་དང་སེམས་ལ་ལྷུན་གྱིས་གྲུབ༔ སེམས་དང་ཡེ་ཤེས་རང་སྣང་གཉིས༔ མཐའ་སྡུད་རྒྱལ་པོ་ང་རྒྱལ་རྒྱལ༔ ཆོས་ཅན་རང་ངོའི་དམ་ཚིག་དེ༔ བསྒྲགས་པ་རྣལ་འབྱོར་བདག་གི་སྟེ༔ བྲོ་བོར་ལྷ་ཁྱོད་གཡར་དམ་ལོངས༔ ལུས་དང་སྐུ་ཡི་ད་ལ་ན༔ ན་དཱ་ངག་གི་རང་སྒྲ་བརྟེན༔ འགྲོ་འོང་ཁྱབ་འཇུག་ཨ་ལི་ཀ༔ སྡོམ་པ་འཁོར་ལོའི་དབང་ཆགས་ཆགས༔ ཆོས་ཅན་བསྐྱོད་མའི་དམ་ཚིག་དེ༔ བསྒྲགས་པ་རྣལ་འབྱོར་བདག་གི་སྟེ༔ བྲོ་བོར་ལྷ་ཁྱོད་གཡར་དམ་ལོངས༔ ཁྱབ་འཇུག་སྣང་དང་སྟོང་པ་ཉིད༔ ཐིག་ལེ་ཆེན་པོ་བཅུ་དྲུག་མགོན༔ མི་འབྱེད་གཏི་མུག་ལ་གཏི་མུག༔ བསྒྲགས་པ་རྣལ་འབྱོར་བདག་གི་སྟེ༔ བྲོ་བོར་ལྷ་ཁྱོད་གཡར་དམ་ལོངས༔ ཀྱཻ༔ དགོངས་ཤིག་དམ་ཅན་མཐུ་བོ་ཆེ༔ སྙིགས་མ་ལྔ་བརྡོའི་སེམས་ཅན་ཉིད༔ གསར་ངེས་ཆེ་བའི་དབང་ཕྱུག་གི༔ ལྷ་ལ་སྤངས་ལེན་བྱས་པ་བཤགས༔ རྣམ་རྟོག་ཆེ་བའི་བྱེད་ལས་ཀྱི༔ ཤ་ལྔ་བདུད་རྩི་དང་མ་ལོན༔ ཡང་ན་ཁྱི་ཕག་བག་ཆགས་ཀྱིས༔ ཐ་མལ་ཆགས་ཞེན་སྐྱེ་བ་བཤགས༔ སེར་སྣའི་དབང་དུ་གྱུར་བ་ཡི༔ མཆོད་རྫས་རྒྱུ་ཆུང་ཕུད་ལྷག་ཉམས༔ ལེ་ལོ་ཆེ་བའི་གཞན་དབང་གིས༔ རྒྱུན་མཆོད་ཕྲིན་གཏོར་ཆགས་པ་བཤགས༔ འཆོལ་སྙོགས་སྤྱོད་དང་ཁ་ཚར་ཤོར༔ ཕོ་མོ་གྲངས་མ་འཁྱོལ་བ་དང་༔ མཚན་འཛིན་རང་དགར་སྤྱོད་པ་དང་༔ དམ་ཚིག་བསྲུང་མཚམས་ཉམས་པ་བཤགས༔ བཟླས་བརྗོད་བསྙེན་གསོལ་མ་བྱས་པས༔ ཞུད་དང་འགྱངས་དང་གཡེལ་བ་ཡི༔ རང་གི་ཉེས་པ་མ་ཤེས་ཤིང་༔ ལྷ་ལ་མཐུ་མེད་སེམས་པ་བཤགས༔ ཡེ་ཤེས་ཏིང་འཛིན་དམན་པ་ཡི༔ མཆོད་གཏོར་བྱིན་གྱིས་མ་རློབས་དང་༔ ལྟ་བ་དམན་པའི་བྱེད་ལས་ཀྱིས༔ གཉའ་ནོན་ཚོལ་བ་མཐོལ་ལོ་བཤགས༔ བློ་དམན་འཁོར་འདས་རང་བརྒྱུད་བལྟས༔ དྲེགས་པ་འདྲེ་རུ་གོལ་བ་དང་༔ སྐྱེ་བརྒྱུད་དགོངས་པ་མ་ཤེས་པས༔ དེ་ལས་བརྙེས་པར་བྱས་པ་བཤགས༔ སངས་རྒྱས་སྐྱེ་བརྒྱུད་གནོད་སྦྱིན་ཀྱང་༔ རུ་ཏྲར་བརླན་པ་སྙིང་རྗེའི་གནས༔ ལྟ་བ་ངན་པས་བློ་བཅོས་ཏེ༔ འཁུ་འཁྲུགས་ཟ་བ་མཐོལ་ལོ་བཤགས༔ ཅོལ་ཆུང་ངག་འཁྱལ་བྲེ་མོ་ཡི༔ ཚིག་འཁྱལ་བག་མེད་མཐོལ་ལོ་བཤགས༔ དེ་ལྟར་བཤགས་བསྐང་བྱས་པ་ཡི༔ མི་འཁོན་ལྷ་ལ་ཕོག་པ་དང་༔ ལྷ་འཁོན་མི་ལ་གནོད་པ་དང་༔ བརྟེན་རྫས་མནོལ་དང་སྒྲུབ་རྫས་འགོངས༔ བསྐང་རྫས་འཆལ་དང་དམ་སྡོམ་རལ༔ དམེ་ཡུལ་ནལ་དང་བང་གྲིབ་སོགས༔ འཁྲུགས་བཅོས་འཁོན་སྡུམ་རྨུགས་པ་བསངས༔ འཐིབ་པ་དྭངས་ནས་དངོས་གྲུབ་སྩོལ༔ དུས་གསུམ་དགེ་བའི་བཀྲ་ཤིས་མཆོག༔ རྟག་ཏུ་བདག་ལ་ཉེ་བར་མཛོད༔ སྔོན་གྱི་ཐུགས་དམ་མ་དོར་ཅིག༔ བཀའ་དང་དམ་ལས་མ་འདའ་ཞིག༔ འཁུ་ལྡོག་གདུག་རྩུབ་མ་ཆེ་ཞིག༔ བྲོ་བོར་ཐ་ཚིག་མ་དོར་ཞིག༔ མཐུ་རྩལ་དཔའ་རྟགས་མ་ཆུང་ཞིག༔ ཁ་མགོན་བྱམས་སྐྱོངས་མ་གཡེལ་ཞིག༔ བདག་གི་བྱ་བ་ཅི་ཉེས་ཀྱང་༔ བསམ་མེད་བུ་ཡི་སྤྱོད་པ་ལ༔ མ་བཞིན་ཁྲོ་འཁྲུགས་མི་མཛད་ཞུ༔ བཅོལ་བའི་ཕྲིན་ལས་གྲུབ་པར་མཛོད༔ ཅེས་ཀྱང་བླ་མ་འདུས་ཆུང་ནས་བསྐུལ་བ་དོན་ཡོད་ཕྱིར་དུས་མཐའི་སྔགས་པ་ག་གཱ་ཨ་བྷྱེ་ནས་བྲིས་པ་དུས་གསུམ་དགེ་བའི་འཁྲི་ཤིང་དུ་གྱུར་ཅིག །དགེའོ། །དགེའོ། །དགེའོ། །ཡང་ཅིག་བསྡུ་ན༔ ཀྱཻ༔ གནོད་སྦྱིན་ཆེན་པོ་དགོངས་སུ་གསོལ༔ མ་ཤེས་བག་མེད་ནོར་འཁྲུལ་དང་༔ དམ་ཅན་བསྲུང་མའི་ཐུགས་འགལ་ལས༔ མཐོལ་ལོ་བཤགས་སོ་དག་ཚངས་སྩོལ༔ ཨོཾ་རཱ་ཛ་ཙནྡྲ་ས་མ་ཡཱ༔ སརྦ་ཤཱུདྡྷེ་ཡེ་སྭཱ་ཧཱ༔ ཅེས་ཀྱང་བླ་མ་དམ་པ་ཤི་ལའི་གསུང་འཕྲོ་དོན་ཡོད་པའི་ཕྱིར་ག་གཱས་སོ། །