བསྟན་འཛིན་སྨོན་ལམ་རྫོགས་ལྡན་སྤྲིན་ཆེན།
༄༅། །རིགས་བདག་བླ་མ་རིན་པོ་ཆེ་དང་མི་འབྲལ་ཞིང་མཆོག་གི་བསྟན་པ་འཛིན་པའི་སྨོན་ལམ་རྫོགས་ལྡན་སྤྲིན་ཆེན་བཞུགས་སོ།།
༄༅། །ན་མོ་གུ་རུ་བཛྲ་དྷ་ར་ཡ། གདོད་ནས་ཆོས་ཀུན་མཐའ་བྲལ་དགོངས་ཀློང་ཟླུམ་པོར་རོ་གཅིག་བསྐྱིལ་ནའང་། སྣཚོགས་མ་འདྲེས་སྙིང་རྗེའི་རང་གདངས་བརྩེ་ཆེན་ཆུ་འཛིན་རབ་ཏུ་དཀྲིགས། །མཐའ་ཀླས་རྗེས་འགྲོ་ཐབས་མཁས་གང་འདུལ་ཐུགས་རྗེའི་གྲུ་ཆར་ཅིར་ཡང་འབེབས། །རྣམ་སྣང་རོལ་གར་ཡེ་ཤེས་སྐུ་ཅན་
འཇམ་མགོན་རྣམ་གཉིས་ཕྱག་བགྱིའོ། །མཐོང་བ་ཙམ་གྱིས་སྲིད་པའི་མུན་སེལ་འདོད་དགུའི་སྣང་བ་མཆོག་སྦྱིན་པའི། །གཤིས་ལུགས་དྲི་མེད་རིགས་ཁམས་ནོར་བུ་སྟོང་གསུམ་འབྱོར་བས་མཚོན་མིན་ཏེ། །ཡིད་དཔྱོད་མཚན་མའི་དྲི་ཡིས་མ་བསླད་རང་བཞིན་ལྷག་པར་སྐྱོང་བ་ཡི། །མཆོད་པ་འདིས་ཀྱང་ཚེ་
རབས་ཀུན་ཏུ་མི་འབྲལ་སྙིང་དབུས་རོ་གཅིག་བཞུགས། །ཡོངས་ལ་ཁྱབ་པ་ཉིད་ཀྱི་གསང་གསུམ་གཉུག་མའི་རིག་པ་ལྷུན་རྫོགས་ཆེ། །གར་ཡང་མ་བྱོན་ཆུ་ལ་བརླན་བཞིན་རང་དང་ལྷན་ཅིག་འབྲལ་མེད་ཀྱང་། །གློ་བུར་ཀུན་རྟོག་སྨག་གིས་སྒྲིབ་ལས་རང་ཞལ་མ་མཐོང་སྲིད་མཚོར་བྱིངས། །རྒྱུད་ལྔས་བསགས་ཀུན་དནས་བཟུང་སྟེ་སྟོང་ཆེན་ཀློང་བསྡོམ་དག་ཚངས་སྩོལ། །ཇི་སྙེད་ཆོས་ཀུན་དུ་མར་སྣང་ཡང་ཡེ་ཤེས་གཅིག་གི་རོལ་གར་ལས། །ཕན་བདེའི་འོད་སྣང་རྒྱལ་བའི་མཛད་པ་ཞིང་ཁམས་རྒྱ་མཚོར་འཇུག་པ་ལ། །བྱིས་བློས་དཔག་དཀའ་འགྲོ་སེམས་དད་པར་ཕྱོགས་ཙམ་ཁྱོད་ཀྱི་མཐུ་ལས་གྲུབ། །དེ་སླད་ཀུན་ལ་སྤང་བླང་མི་བྱ་ཟག་མེད་དགའ་བས་རྗེས་ཡི་རང་། །ནམ་མཁའི་ཁམས་བཞིན་ཕ་མཐའ་བྲལ་བ་གདུལ་བྱ་རྒྱ་ཆེའི་འགྲོ་ཀུན་ཚོགས། །མི་བཟད་ཉེས་བརྒྱའི་ཆ་
ལ་འཕྱན་ཡང་སྙིང་པོའི་སྲོག་དེ་འདོར་བ་མེད། །ཆོས་སྒོ་དུ་མའི་ཐབས་མཁས་དང་བཅས་ཐུགས་རྗེའི་ཞགས་པ་རིང་བརྐྱངས་ཏེ། །དུག་མཚོར་བྱིང་བའི་ཉམས་ངའི་ལུས་ཅན་ཐར་པའི་སྐམ་སར་དབུགས་དབྱུང་མཛོད། །མཚན་མའི་ཚང་ཚིངས་འཕོ་འགྱུར་སྣང་ཀུན་ཡེ་ཤེས་མེ་ཡིས་ལྷག་མེད་བསྲེགས། །སྤྲོ་བསྡུའི་གར་རྒྱ་ཏིང་འཛིན་གཅིག་གི་མཐུ་ཡང་སྲིད་དུ་འཇུག་ལ་དབང་། །ནམ་ཡང་མི་གཡོ་རྡོ་རྗེའི་སྐནི་རི་ལྟར་བརྟན་ཅིང་འགྱུར་མེད་པས། །སྒྱུ་མའི་རོལ་མོ་ཡེ་ཤེས་ཉི་མ་ཞིང་འདིའི་ཁྱོན་ལ་ནུབ་མེད་བཞུགས། །ཆོས་དབྱིངས་དང་མཉམ་རྒྱ་ཆེའི་ལེགས་བྱས་བདག་གཞན་རྣམ་དཀར་ཅི་མཆིས་ཀུན། །འཁོར་གསུམ་རྙོག་མའི་དྲི་ཡིས་བསླད་མིན་ཡིད་སྤྲུལ་རྒྱ་མཚོའི་མཆོད་པ་བཅས། །ས་ཆེན་མཆོག་གྱུར་གྲོལ་བ་དྲུག་ལྡན་གདོད་མའི་མགོན་པོའི་རྒྱུར་
བསྔོན། །རིགས་བདག་བླ་མའི་གོ་འཕང་མངོན་བྱས་ཆོས་སྐུའི་རྒྱལ་སར་དབང་བསྒྱུར་ཤོག །དེ་མ་ཐོབ་ཀྱི་ཚེ་རབས་ཕྲེང་བར་གནས་ངན་ལེན་གྱི་འདམ་ལས་གྲོལ། །ཡིད་བཞིནནོར་འདྲའི་དལ་འབྱོར་རྟེན་ལ་མཚུངས་མེད་ཟུང་གིས་རྗེས་བཟུང་ནས། །གདམས་ཟབ་བདུད་རྩིས་ལུས་ཟུངས་ཡོངས་བརྟས་མཁྱེན་ནུས་བརྩེ་བའི་རྩལ་རྫོགས་ཏེ། །དད་དམ་གཙང་མས་མཆོག་གི་བསྟན་ལ་སྲིད་ཞུ་འགྲུབ་པའི་མཐུ་ཐོབ་ཤོག །ཇི་ལྟར་བྱས་ཀྱང་རང་འདོད་འཁྲིས་བྲལ་གཞན་ཕན་འབའ་ཞིག་དོན་དུ་གཉེར། །གང་དུ་བསྡད་ཀྱང་ཆོས་བརྒྱད་སྒྲོགས་གྲོལ་དམ་པའི་ཆོས་ལ་ཐོས་བསམ་གྱིས། །བསྐྱེད་རྫོགས་གདེངས་ལྡན་རྩོལ་བྲལ་ལྟ་བས་ཆོས་ཀུན་ཉམས་འོག་གཅིག་ཏུ་ཆུད། །གང་ཤར་རིག་པའི་ཨར་གཏད་ཕྱོགས་ལས་རྣམ་རྒྱལ་རྒྱལ་ས་ཟིན་གྱུར་ཅིག །གསར་རྙིང་བཀའ་གཏེར་
གདམས་ཟབ་བཅུད་བསྡུས་རིན་ཆེན་མཆོག་གྱུར་མཛོད་ལྔའི་ནོར། །འདི་ལ་འཁུ་ཞིང་ཕྱོགས་རིས་མིག་ཅན་ལོག་ལྟའི་ལུས་བསྒྲིང་གླང་ཆེན་ཚོགས། །སྡང་བས་མ་ཡིན་སྙིང་རྗེའི་ཤུགས་ཀྱིས་ཉམས་པ་སྒྲོལ་བའི་སྲུང་མར་བཅས། །ལུང་རིགས་རྡོ་རྗེས་ཕྱེ་མར་འཐག་ནས་ཡང་དག་བསྟན་ལ་འཛུད་བྱེད་ཤོག །བྱེ་བ་ཕྲག་བརྒྱའི་ཞིང་གིས་མཚོན་མིན་ནམ་མཁར་ཁྱབ་པའི་ཁམས་ཀུན་ཏུ་།སྐད་ཅིག་རེར་ཡང་སྤྲུལ་བསྒྱུར་དུ་མས་མོས་པའི་རྗེས་འགྲོ་མཛོད་ལྔའི་ཆོས། །འཆད་ཙམ་འཛིན་པས་གདུལ་བྱ་ཡོངས་སྨིན་སྒོ་གསུམ་བགྱི་བ་དོན་དང་ལྡན། །འཁོར་བ་དོང་སྤྲུགས་རིགས་བདག་ཟུང་གི་ཕྲིན་ལས་ཕྱོགས་མཐར་སྤེལ་བར་ཤོག །དེ་ནས་བཟུང་སྟེ་སྐད་ཅིག་ཙམ་ཡང་བསྙེལ་བ་མེད་པར་མགོན་པོ་ཟུང་། །སྤྱི་བོར་མཆོད་དེ་ཉིན་མཚན་ཀུན་ཏུ་གདུང་བས་རྩེ་
གཅིག་འབོད་ལགས་ན། །སྐྱེ་འཆི་བར་དོའི་གནས་སྐབས་ཀུན་ཏུ་བརྩེ་ཆེན་གཟིགས་པས་ཞལ་བསྟན་ཏེ། །མངོན་སུམ་བཞིན་དུ་སྒྲིབ་མེད་མཐོང་བའི་སྐལ་བཟང་དམ་པ་ཐོབ་གྱུར་ཅིག །སྐྱེ་རྒུ་མཐའ་དག་མཛོད་ལྔའི་བསྟན་ལ་གཅིག་ཏུ་གུས་པའི་འཆད་ཉན་གྱིས། །ནག་ཕྱོགས་ལོག་སྨྲ་གདུག་པའི་རྩུབ་འགྱུར་མིང་ཙམ་གྱུར་ཏེ་རྩདནས་ཞི། །རྣམ་པར་རྒྱལ་བའི་ཕྱོགས་མཐར་ཁྱབ་པའི་སྙན་གྲགས་དཀར་པོའི་བ་དན་མཆོག །ཡོངས་སུ་ཉམས་སྲིད་ཞིའི་ཁྱོན་འདིར་རྟག་པ་བླ་ན་བསྒྲེང་གྱུར་ཅིག །དཔལ་ལྡན་བླ་མའི་སྐུ་ཚེ་རབ་བརྟན་ཐུགས་ཀྱི་བཞེད་དོན་ཡིད་བཞིན་འགྲུབ། །ས་ཆེན་འདི་ཡང་འཁོར་ལོ་གསུམ་གྱིས་དག་པའི་སྣང་བ་འབའ་ཞིག་བསྒྱུར། །རྡོ་རྗེའི་མཆེད་རྣམས་ལྟ་སྤྱོད་དག་པ་བསྙེན་སྒྲུབ་བཞི་ཡི་གསེང་ལམ་ནས། །གདོད་མའི་གསང་ཆེན་ཚེ་འདིར་འགྲུབ་ལ་དཀའ་བ་མེད་
པའི་མཐུ་ལྡན་ཤོག །ཁ་ཙམ་མ་ཡིན་སྙིང་ནས་སྨོན་པ་མཁྱེན་པའི་མེ་ལོང་དཔང་དུ་བཞུགས། །དེ་ཡི་སླད་དུ་ཡེ་ཤེས་གཟིགས་པས་དེང་འདིར་རྗེས་སུ་རབ་དགོངས་ཏེ། །བཟང་དགུའི་ལེགས་ཚོགས་རྟེན་འབྲེལ་དུས་སྨིན་དགེ་མཚན་བྱེ་བའི་མེ་ཏོག་བཅས། །བུམ་པ་བཟང་དང་དཔག་བསམ་ཤིང་བཞིན་རེ་བའི་འབྲས་རྣམས་ཐོགས་མེད་སྩོལ། །རྒྱལ་བས་ལུང་བསྟན་རྒྱལ་ཀུན་རྣམ་ཐར་གཅིག་ཏུ་བསྡུས་པའི་མཛད་པ་ཅན། །རྒྱལ་མཆོག་གང་གིས་གཏན་གྱི་དབུལ་སེལ་ཆོས་མཛོད་མ་ལུས་གཉེར་གཏད་པའི། །རྒྱལ་བསྟན་སྲུང་བའི་ཐ་ཚིག་ལ་གནས་དཀར་ཕྱོགས་སྐྱོང་བའི་ཕྱོགས་རྣམས་ཀྱིས། །རྒྱལ་བསྟན་སྙིང་པོ་ཆོས་མཛོད་རྣམ་ལྔ་ཕྱོགས་མཐར་འཕེལ་བའི་ཕྲིན་ལས་མཛོད། །ཆོས་དབྱིངས་མཁའ་ལ་རིག་འཛིན་བརྒྱུད་པའི་བྱིན་རླབས་སྤྲིན་ཆེན་རབ་ཏུ་
འཁྲིགས། །རྣམ་པར་དཀར་བའི་དད་དམ་པ་ལ་སློབ་མའི་འདུ་ཚོགས་གཏེར་བཞིན་བརྡོལ། །སྡེ་བཞིའི་ཕུན་ཚོགས་བརན་སྨིན་གྲོལ་གདམས་པའི་གྲུ་ཆར་མཛད་མེད་ཀྱིས། །བཤད་སྒྲུབ་སྙིང་པོས་ས་གསུམ་ཁྱབ་སྟེ་ཡེ་ཤེས་རྒུད་པ་ཞི་གྱུར་ཅིག །ཅེས་པའང་རིགས་བདག་འཇམ་མགོན་རྣམ་གཉིས་ཀྱི་ཞལ་སློབ། མཛད་པ་གང་ཙམ་བླ་མའི་བསྟན་པ་ལ་གཅིག་ཏུ་སྨོན་པའི་སྒྲུབ་བརྒྱུད་བསྟན་པའི་སྲོག་ཤིང་སྐྱབས་རྗེ་གར་དབང་རིན་པོ་ཆེ་ངེས་དོན་ཆོས་སྐྱོང་རྡོ་རྗེས་བཀའ་སྩལ་སྤྱི་བོར་ཕེབས་པ་བཞིན། རྡོ་རྗེ་འཆང་འཇམ་མགོན་རིན་པོ་ཆེ་རྣམ་གཉིས་ཀྱི་ཞབས་རྡུལ་སྤྱི་བོར་ལེན་པའི་སྐལ་བཟང་དུ་ཐོབ་པ། བཙུན་གཟུགས་སྙོམས་ལས་མཁན་གང་ཤར་དབང་པོས་ཉེར་ལྔའི་ཚོགས་མཆོད་དང་འབྲེལ་སྨོན་ལམ་དུ་བགྱིས་པ་དེ་བཞིན་དུ་འགྲུབ་པ་རྒྱལ་བ་སྲས་དང་བཅས་པས་བྱིན་གྱིས་བརླབ་ཏུ་གསོལ།། །།