རི་ས་སངས་རྒྱས་ཆོས་འཕེལ་གྱིས་བསྐུར་ངོར།
༅། རྗེ་མཆོག་གསུམ་ངོ་བོ་རྡོ་རྗེ་འཆས། །ཕ་འཇིགས་མེད་གླིང་པ་སྤྱི་བོས་མཆོད། །ཁྱེད་གསོན་དང་དམ་པ་རིན་པོ་ཆེ། །ལུས་དལ་འབྱོར་ཐོབ་པའི་སྙིང་པོའི་དོན། །རྩེ་གཅིག་ཏུ་སྒྲུབ་ལ་གཞོལ་འདི་རྨད། །དུས་དེ་སང་གི་བྱིས་དང་སྡིག་གྲོགས་ལ། །བློ་གཏད་ན་མི་དགེ་འཕེལ་བ་ལས། །ཆོས་རྣམས་དཀར་གནས་ལ་ཤུགས་ཀྱིས་རིང་། །དོན་དེ་ཕྱིར་ན་གྲོགས་ངན་ཐབས་ཀྱིས་སྤོངས། །ཁོང་རྒྱལ་པོ་བླ་མཆོད་ཕྲགས་དོག་ཅིང་། །དགའ་མི་དགའ་ཡི་མངོན་རྟོག་བསྲུང་བར་དཀའ། །དོན་དེ་ཕྱིར་ན་མཛའ་ཆེས་མཁོན་ཆེན་སྤངས། །ལར་དམུ་རྒོད་གྱི་བསམ་སྤྱོད་ལྡན་རྣམས་གང་། །ཐབས་ཞི་ཚུལ་གྱིས་ཐུལ་ན་གཏན་རྒྱལ་ཡིན། །སྤྱིར་དུས་ངན་གྱི་སྐྱེ་བོ་ངན་པ་ཡི། །བློ་ངན་གོམས་གྱི་སྤྱོད་ཚུལ་བཅོས་པ་ལས། །རང་འདུ་འཛི་ལས་བྱོལ་དེ་རང་ཉིད་ཀྱི། །སྐྱོན་མཚང་འདོད་ན་ལ་བརྩོན་ན་མཆོག་ཏུ་དགའ། །དཔལ་ཡོན་ཏན་གྱི་བརྒྱན་པའི་རི་ཁྲོད་གངས། །ལས་མི་དགེ་ལས་ཤུགས་ཀྱིས་རང་འགྱུར་ཞིང་། །ཆོས་རྣམ་དཀར་གྱི་དགེ་ཚོགས་གོང་འཕེལ་འགྱུར། །ཚིག་གཏམ་ངན་གྱིས་རྣ་བ་མི་གཙེར་ཞིང་། །བློ་བག་ཕེབས་ཀྱི་བསྟན་མ་གང་གིས་འཕེལ། །ནོར་ཆས་ཀ་ཡི་བསག་བསྲུང་མི་དགོས་པའི། །སྐྱོན་སེར་སྣ་ཡི་གདོན་ལས་གྲོལ་བ་ལ། །མི་ཆེ་ཆུང་གི་ངོ་བསྲུང་ཙམ་བཞག་པའི། །གང་སུ་ཡི་ཀྱང་ཉེ་རིང་ཆགས་སྡང་བྲལ། །ནོར་གཏོང་ལེན་གྱི་ལག་ལེན་མི་དགོས་པའི། །གཞན་རོ་མཁར་ཁང་གི་རོ་དོང་དགོས་དོན་ཅི། །དོན་དེ་ཕྱིར་ན་བཏང་སྙོམས་བསྒོམས་ཀྱང་སླ། །ལར་དམ་པ་ཡི་ཡོན་ཏན་ཀུན་ཚང་ཁྱོད། །ཡོངས་འགྲོ་ཀུན་ལ་སེམས་མཆོག་ལྡན་པ། །ཁོང་ལ་ལ་ཡི་གཤེ་སྐུར་སྨོད་ཅིང་གཤེ། །དེ་སྔོན་ལས་ཀྱི་མཐུ་ལས་དོན་གཞན་དབེན། །དོན་དེ་ཕྱིར་ན་ལས་དེ་འཛད་ཐབས་སུ། །བྱམས་སྙིང་རྗེ་ཡི་གཏོང་ལེན་གནད་དུ་ཆེ། །ནོར་ཡོ་བྱད་ཀྱི་དངོས་པོ་གང་ཡོད་ཀུན། །དཔེ་རླུང་ཁྱེར་གྱི་རྫས་བཞིན་གཏོང་ནུས་ཁྱོད། །སྔོན་དྲི་མེད་ཀུན་ལྡན་རྣམ་ཐར་བཞིན། །བདག་བྱང་སེམས་ཀྱི་རིགས་གཅིག་ཡིན་ངེས་ན། །ཉིད་པན་བདེ་ཡི་ས་བོན་གོང་འཕེལ་མངོན། །སླར་ད་དུང་ཀྱང་འཁོར་གསུམ་དམིགས་མེད་ཀྱིས། །རྫས་ཡོ་བྱད་རིང་ཕག་ཁར་གང་བབས་རྣམས། །དུས་ད་རེས་བཞིན་མཆོག་སྦྱིན་རྒྱུན་ལྡན་མཛོད། །ཚུལ་དེ་ཡིས་ནི་སྦྱིན་པའི་ཕར་ཕྱིན་རྫོང་། །ས་དང་པོ་ཡི་བདེན་པ་མངོན་སུམ་མཐོང་། །ལར་མཆོད་པ་ལས་སྦྱིན་གལ་ཆེ་བ། །ཆོས་ཐེག་ཆེན་གྱི་བཞེད་གཞུང་རྨད་བྱུང་ལང་། །དོན་དེ་ཕྱིར་ན་དམན་ཡུལ་སྙིང་རྗེས་སྐྱོངས། །ཚུལ་དེ་ཡིས་ནི་དགེ་འབྲས་ཚེ་འདིར་མངོན། །ཆོས་དོན་དམ་གྱི་ངོ་བོ་སྤྲོས་བྲལ་ཡང་། །ལམ་ཉམས་ལེན་གྱི་སྐབས་སུ་སྤྲོས་དང་བཅས། །དེ་ཇི་ལྟར་ན་དང་པོ་ལྟ་བྱ་ལ། །བལྟ་བྱེད་ཀྱི་རྟོག་འཇུག་མ་བྱས་ན། །ལྷ་ཡུལ་གྱི་གནས་ཚུལ་མི་ཤེས་པས། །དང་པོའི་ཚེ་རྟོག་དཔྱོད་གལ་དུ་ཆེ། །རྟོག་དཔྱོད་ཀྱིས་སྐྱོན་མཚང་ཕུགས་བཏུགས་ན། །རྟོག་དཔྱོད་ལས་འདས་པ་གདོད་ཤེས་འོང་། །རྟོག་དཔྱོད་ལས་བྲལ་བའི་དྲན་པ་དེ། །རང་བབས་སུ་འཇོག་ལས་གྲོགས་བཅས་མིན་། །གྲོགས་མེད་ཀྱི་རིག་པ་རང་བྱུང་དེ། །མ་བཅོས་པར་བཞག་ཚེ་ལན་རེའི་ཚེ། །ས་ལེ་དགས་སང་ངེ་ཡེ་རེ་བ། །རྒྱ་མཚོ་བཞིན་མེར་རེ་ཁྱི་ལེ་བ། །རྣམ་རྟོག་དང་བྲལ་བའི་ངང་དུ་གནས། །ལན་རོའི་ཚེ་རྣམ་རྟོག་མང་འཕྲོ་ཡང་། །གནས་པའི་གཞི་བསྐྱོད་མེད་དྲན་པའི་ངང་། །དེ་དག་ལ་ཞི་གནས་སྐྱོན་མེད་ཟེར། །དེ་ཉིད་ལ་གོམས་འདྲིས་བྱས་གྱུར་ན། །མཐའ་བྲལ་གྱི་ལྷག་མཐོང་ཡང་དག་རྟོགས་དང་། །དེ་ཉིད་གྱི་ངོ་བོ་གང་ཞེ་ན། །ཞི་གནས་ལ་ཞེན་པའི་བློ་བྲལ་ནས། །བལྟ་བྱ་དང་ལྟ་བྱེད་གཅིག་ཏུ་གོ །གོ་བ་ཡང་རང་བཞིན་མེད་པར་ཤེས། །ཤེས་མཁན་གྱི་རིག་པ་དེ་ཉིད་ལས། །གཞན་མ་ཞིག་མེད་པར་ཁོ་ཐག་ཆོད། །དེ་ཉིད་ཀྱང་སྐྱེ་འགག་གནས་གསུམ་ལས། །བྲལ་བ་ཡི་རིག་པ་བཅོས་མེད་གང་། །རང་བབ་སུ་བཞག་ཚེ་སྒོམ་རྒྱུས་དབེན། །མ་བསྒོམ་ཚེ་དྲན་ཤེས་དེ་གའི་ངང་། །ནན་ཏན་དུ་བསྒོམ་ཚེ་སྒོམ་རྒྱུ་སྡེར། །དེ་ག་ལ་ཐ་མལ་ཤེས་པ་ཟེར། །དེ་ཉིད་ལ་གོམས་འདྲིས་བྱེད་པ་ལས། །གཞན་པ་ཡི་སྐྱོང་ཐབས་ཡོད་པ་མིན། །དེ་གའི་མུར་མུར་ཤིན་ཏུ་གོམས་ཙ་ན། །མ་ཡེངས་ཀྱང་གཏད་སོ་སྤུ་ཙམ་མེད། །ཡེངས་གྱུར་ཡང་ངོ་བོ་འགྱུར་མེད་དོ། །ནམ་མཁའ་བཞིན་མཚན་མས་བཞིག་དུ་མེད། །དེ་ཚུལ་ལ་སླབ་པ་མཐར་ཕྱིན་ནས། །བསྟན་འགྲོ་ལ་ཕན་པ་མཆོག་སྒྲུབ་པའི། །དཔལ་ཡོན་གྱིས་ཡོངས་བརྒྱན་གདན་གསུམ་དལ། །སྲིད་མཐའ་ཡི་བར་དུ་བརྟན་གྱུར་ཅིག །ཅེས་པ་འདིའང་རི་ས་སངས་རྒྱས་ཆོས་འཕེལ་གྱིས་བསྐུར་ངོར། ༧ གཞན་ཕན་ཕྲིན་ལས་འོད་ཟེར་གདམས་པའོ། བཀྲ་ཤིས། དགེའོ།།