སྐབས་བཅུ་དགུ་པས་སླར་ཡང་ངེས་པ་སྐྱེ་བའི་ཚུལ་བཤད་པ།
ད་ནི་སྐབས་བཅུ་དགུ་པས་སླར་ཡང་ངེས་པ་སྐྱེ་བའི་ཚུལ་བཤད་པ་ལ་གཉིས་ཏེ། ངེས་པ་སྐྱེ་ཚུལ་དང་། དེ་རྒྱུད་འགྲེལ་དང་སྒྲིག་པའོ། །དང་པོ་ལ་བསྟན་བཤད་གཉིས་ལས། དང་པོ་ནི། དེ་ལྟར་ན་གཟའ་རྣམས་ཀྱི་ངེས་པ་དུས་བཞིའི་མཐར་ཟད་བྱེད་ཀྱི་ལོ་དཔྱིད་ཟླ་ར་བའི་གནམ་སྟོང་ལ་ནམ་གྲུའི་སྟེང་དུ་བསྡུས་ཏེ་རྣམ་པར་དག་པའི་རྗེས་སུ། སླར་ཡང་རབ་བྱུང་གི་ལོའི་ནག་པའི་ཚེས་གཅིག་ནས་སྐྱེ་བའི་རིམ་པ་ཅུང་ཟད་ཅིག་བཤད་པར་བྱ་ཞེས་ཁས་བླང་ངོ་། །གཉིས་པ་ནི། རབ་བྱུང་གི་ལོའི་ནག་པ་ཟླའི་ཞེས་སོགས་ཏེ། རང་རང་གི་དྷྲཱུ་བ་སྟོང་པའི་གནས་རྣམས་སུ་རང་རང་གི་རྟག་ལོངས་བསྣན་ཏེ་རྐང་བྲལ་ལོངས་སྤྱོད་སྒྲུབ་པའོ། །ནག་པའི་ཟླ་བ་རྫོགས་ནས་ནི་ཟླ་བའི་ངེས་པ་སྐྱེ་བས་རྟོགས་པར་སླ་བར་ཟད་དོ། །དེ་ནས་ནག་པའི་ཚེས་གཅིག་གིས་སོགས་ཏེ། རྐང་རྩིས་ཇི་ལྟར་བཤད་པ་བཞིན་བྱས་པས། ནག་ཟླའི་ཚེས་གཅིག་གི་ལི་ཐུ་ལ། གཟའ་གནས་སུ་གཟའ་གཅིག །ཆུ་ཚོད་བཅོ་ལྔ་ལ་སོགས་པ་དང་། ཉི་དག་ལ་སྐར་མ་ཐིག་ལེ། ཆུ་ཚོད་བཅོ་ལྔ་ལ་སོགས་པ་དང་། ཉི་དག་དབྱུག་གུར་སོགས་ཀྱིས་བསྒྲུབས་པའི་ཟླ་སྐར་གྱི་སྐར་གནས་སུ་ཐིག་ལེ། ཆུ་ཚོད་ང་བཞི་འཆར་བ་དང་། ཉི་ཟླའི་ལོངས་སྤྱོད་བསྲེས་པ་ལས་སྦྱོར་བའི་སྐར་གནས་སུ་གཟུགས་དང་། དབྱུག་གུར་བུག་པ་སོགས་དང་། ཚེས་གྲངས་སོགས་ཀྱི་བྱེད་པ་གཟུགས་འཆར་ཏེ་ལག་ཏུ་བླངས་པས་ཤེས་སོ། །གཉིས་པ་ནི། དེ་ལྟ་བས་ན་རྒྱུད་འགྲེལ་ལས། ལོའི་དང་པོ་རབ་བྱུང་། ཟླ་བའི་དང་པོ་ནག་པའི་ཟླ་བ། རེས་གཟའི་དང་པོ་ཉི་མ། སྦྱོར་བའི་དང་པོ་སེལ་བ། ཚེས་ཀྱི་དང་པོ་དཀར་པོའི་ཕྱོགས་ཀྱི་ཚེས་གཅིག་དང་། འཕོ་བྱེད་བདུན་གྱི་དང་པོ་བ་ཝཾ་རྣམས་འཆར་བར་གསུངས་པ་ཇི་བཞིན་དུ་འགྲིག་པ་ཡིན་ནོ། །འོ་ན་འདིར་ནག་པའི་ཚེས་གཅིག་གི་དང་པོར་ཉིན་ཚེས་གཉིས་འགོ་མཉམ་པར་བྱས་པ་དེའི་འགོ་བརྩམས་པ་དང་གཟའ་རྣམས་ཀྱིས་ཐ་སྐར་གྱི་ཐོག་མ་ནས་སྤྱོད་པ་གཉིས་དུས་མཉམ་པ་རྒྱུད་འགྲེལ་གྱི་དགོངས་པ་མ་ཡིན་ནམ།
རི་མོར་ཤར་བ་འདིའི་དབང་དུ་བྱས་ན། ཆུ་ཚོད་བཅོ་ལྔ་ཟད་པ་དང་ཚེས་གཅིག་རྫོགས་པ་དང་། ཟླ་བས་ཐ་སྐར་གྱི་སྟེང་དུ་སླེབས་ནས་ཞག་གཅིག་བག་མེད་ཙམ་སོང་བ་དང་། ཉི་མས་ཐ་སྐར་གྱི་སྟེང་དུ་སླེབས་ནས་ཞག་གསུམ་ལྷག་ཙམ་སོང་བ་སོགས་བྱུང་བས་རྒྱུད་འགྲེལ་དང་ཇི་ལྟར་འགྲིག་སྙམ་ན། མཁས་པའི་དབང་པོ་དག །བུ། ངེས་པ་སྟོང་རྗེས་ཟླ་རེ་ཙམ་དུ་རྐང་བྲལ་ལོངས་སྤྱོད་ཁོ་ནས་ལི་ཐུ་བྱེད་པ་དང་། རྐང་བཅས་བྱེད་ནའང་འཕྲོ་བསྡོམས་ནས་མི་རྩི་བ་སོགས་འཕེལ་ཁ་རིས་ཀྱིས་བཤད་པ་ཇི་སྙེད་མཛད་པ་རྣམས་ནི་ཞལ་ལུང་མཁན་པོས་ཡང་དག་པའི་རིགས་ལམ་ནས་དྲངས་ཏེ་བཀག་ཟིན་པ་ལྟར་ཡིན་པས་འདིར་རྗེས་ཟློས་མི་བྱའོ། །དེ་བས་ན་འདི་ལྟར་ཤེས་པར་བྱ་སྟེ། མི་འགྲིག་པར་སྣང་བ་དེ་དག་ཞལ་ལུང་ལས། དེ་དག་ཀྱང་རྟག་པའི་ལོངས་སྤྱོད་ཀྱི་དབང་དུ་བྱས་ན་བདེན་མོད་ཀྱི། འདིར་ནི་རྐང་པ་དང་བཅས་པའི་དབང་དུ་བྱས་པ་ཡིན་པས་འགལ་བ་མེད་དོ། །དེ་ལྟ་མ་ཡིན་ན་གང་དུའང་སྒྲིག་པར་མི་ནུས་ཏེ་འཆད་པ་རྣམས་ཀྱིས་ཤེས་སོ། །ཞེས་གསུངས་པས་རྐང་པའི་རྒྱུན་ལ་ལྟོས་པའི་འཕེལ་འགྲིབ་ཀྱི་ཆ་ཤས་མི་སྟོང་བར་དགོངས་པའོ། །དེ་ལྟར་ན་ཐ་སྐར་གྱི་ཐོག་མ་ནས་སྤྱོད་པར་གསུངས་པ་ཡང་འཇིག་རྟེན་གྱི་གྲགས་པ་བཞིན་མ་དཔྱད་པའི་ངོར་གསུངས་པར་སྣང་སྟེ། མདོ་ལས། དེད་དཔོན་ས་སྐྱོང་གིས་ལི་ཙཱ་ཝི་ལྔ་བརྒྱ་ཅིག་ཅར་མདས་བསྣུན། ཞེས་པ་ལྟར། དེའི་ཚེས་གཅིག་གི་ལི་ཐུ་ལ་གཟའ་སྐར་སོགས་དང་པོ་ཁོ་ན་རི་མོར་ཤར་བ་ལ་དགོངས་ནས་བྱེད་པ་བརྗོད་པའི་ཕྱིར་གསུངས་པར་གོར་མ་ཆག་གོ། རྩིས་ཀྱི་མན་ངག་ཉིན་བྱེད་སྣང་ལས། སླར་ཡང་ངེས་པ་སྐྱེ་བའི་ཚུལ་བཤད་པའི་སྐབས་ཏེ་བཅུ་དགུ་པའི་འགྲེལ་པའོ། །ཞེས་སྐབས་བསྡུས་སོ།། །།