འབྲིང་ལ་དད་པའི་གང་ཟག་ལ་སྐབས་དྲུག་ཏུ་བསྟན་པ།
གཉིས་པ་འབྲིང་ལ་དད་པའི་གང་ཟག་ལ་དོན་དྲུག་ཏུ་བསྟན་པ་ནི། མཚན་ཉིད་དེ་ཡི་སྦྱོར་བ་དང་། །སོགས་ཀྱིས་བསྟན། སྐབས་བརྒྱད་དུ་ཕྱེ་བ་ལས་དོན་ཅུང་ཟད་ཙམ་བསྡུས་ཏེ་རྒྱས་པ་ལས་གཞན་འབྲིང་དུ་བསྟན་ན་དོན་ཚན་རྣམ་པ་དྲུག་ཏུ་འགྱུར་ཏེ། མཚོན་པར་བྱེད་པའི་མཚན་ཉིད་གྱི་དབང་དུ་བྱས་ནས་མཁྱེན་པ་རྣམ་པ་གསུམ་དང་། མཁྱེན་གསུམ་དེའི་སྦྱོར་བའི་དབང་དུ་བྱས་ནས་རྣམ་ཀུན་དང་། རྣམ་ཀུན་དེ་རབ་ཏུ་གྱུར་པའི་དབང་དུ་བྱས་ནས་རྩེ་མོ་དང་། དེ་དག་གོ་རིམ་བཞིན་དུ་སྒོམ་པའི་དབང་དུ་བྱས་ནས་མཐར་གྱིས་པ་དང་། སྦྱོར་བ་དེ་རྣམས་སྒོམ་པའི་མཐར་ཐུག་པ་རྣམ་མཁྱེན་གྱི་དངོས་རྒྱུའི་དབང་དུ་བྱས་ནས་སྐད་ཅིག་མ་དང་། སྦྱོར་བ་དེའི་རྣམ་པར་སྨིན་པ་འབྲས་བུའི་དབང་དུ་བྱས་ནས་འབྲས་བུ་ཆོས་སྐུ་རྣམས་སུ་བཞེད་པའི་ཕྱིར།