གསུམ་པ་དེ་ལ་རྩོད་པ་སྤོང་བ།
གསུམ་པ་དེ་ལ་རྩོད་པ་སྤོང་བ་ལ།
གཟུགས་ཀྱི་སྐྱེ་མཆེད་ཆོས་ཅན། རྣམ་མཁྱེན་གྱིས་དངོས་སུ་རྟོགས་པར་བྱ་བ་ཡིན་པར་ཐལ། མངོན་སུམ་ཚད་མའི་དངོས་སུ་རྟོགས་པར་བྱ་བ་ཡིན་པའི་ཕྱིར་ན་མ་ཁྱབ། མ་གྲུབ་ན། གཟུགས་ཀྱི་སྐྱེ་མཆེད་ཆོས་ཅན། མངོན་སུམ་ཚད་མའི་དངོས་སུ་རྟོགས་པར་བྱ་བ་ཡིན་པར་ཐལ། དབང་མངོན་གྱི་དངོས་སུ་རྟོགས་པར་བྱ་བ་ཡིན་པའི་ཕྱིར། མ་གྲུབ་ན། གཟུགས་ཀྱི་སྐྱེ་མཆེད་ཆོས་ཅན། དབང་མངོན་གྱི་དངོས་སུ་རྟོགས་པར་བྱ་བ་ཡིན་པར་ཐལ། མིག་ཤེས་ཀྱི་བཟུང་བྱ་ཡིན་པའི་ཕྱིར། མ་གྲུབ་ན། གཟུགས་ཀྱི་སྐྱེ་མཆེད་ཆོས་ཅན། མིག་ཤེས་ཀྱི་བཟུང་བྱ་ཡིན་པར་ཐལ། གཟུགས་ཀྱི་སྐྱེ་མཆེད་ཡིན་པའི་ཕྱིར། ཁྱབ་སྟེ། མིག་ཤེས་ཀྱི་བཟུང་བྱ་དེ་གཟུགས་ཀྱི་སྐྱེ་མཆེད་ཀྱི་མཚན་ཉིད་ཡིན་པའི་ཕྱིར། ཁ་ཅིག་ན་རེ། གདམས་ངག་གི་མཆོག་རྟག་ཏུ་རང་སེམས་ལ་ལྟ་བ་ཡིན། ཞེས་པའི་ལུང་ཆོས་ཅན། ཚད་མ་ཡིན་པར་ཐལ། ལུང་གི་ཚད་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། ལུང་གི་ཚད་མ་ཡིན་པར་ཐལ། ལུང་ཚད་མ་ཡིན་པའི་ཕྱིར་ན་མ་ཁྱབ། གདམས་ངག་གི་མཆོག་རྟག་ཏུ་རང་སེམས་ལ་ལྟ་བ་ཡིན། ཞེས་པའི་ལུང་ཆོས་ཅན། ལུང་ཚད་མ་ཡིན་པར་ཐལ། བསྟན་བཅོས་རྣམ་དག་ཡིན་པའི་ཕྱིར། ཁ་ཅིག་ན་རེ། ཉན་རང་དགྲ་བཅོམ་པའི་རྒྱུད་ཀྱི་ཆོས་བདག་ཏུ་གྲུབ་བམ་མ་གྲུབ་སྙམ་པའི་རྩེ་གཉིས་པའི་བློ་ཆོས་ཅན། ཐེ་ཚོམ་ཡིན་པར་ཐལ། རང་ཡུལ་གཏན་ལ་མ་ཕབ་པར་ཡིད་གཉིས་གྱུར་བའི་བློ་ཡིན་པའི་ཕྱིར། འདོད་ན། དེ་ཆོས་ཅན། རྩ་ཉོན་ཡིན་པར་ཐལ། ཐེ་ཚོམ་ཡིན་པའི་ཕྱིར་ན་གཏན་ཚིགས་རིགས་པའི་དོན་བསྡུས་དང་ས་བཟང་གི་ཀུན་བཏུས་འགྲེལ་བ་ལྟར་ན་མ་ཁྱབ་སྙམ། ཁྱབ་སྟེ། རྩ་ཉོན་དྲུག་གྲངས་འདྲེན་ཚེ་ཐེ་ཚོམ་དེ་འདྲེན་དགོས་པའི་ཕྱིར་ཟེར་ན། མ་གྲུབ་སྟེ། རྩ་ཉོན་ཀྱི་ཐེ་ཚོམ་དེ་རྩ་ཉོན་ཡིན་ཀྱང་ཐེ་ཚོམ་དེ་རྩ་ཉོན་མ་ཡིན་ཞེས་བྱ་དགོས་ཏེ། དཔེར་ན་མ་རིག་པ་དེ་རྩ་ཉོན་མ་ཡིན་པར་ཉོན་མོངས་ཅན་གྱི་མ་རིག་པ་རྩ་ཉོན་ཡིན་པ་བཞིན་ཡིན་སྙམ་མོ། །འོན་ཀྱང་གཟུར་གནས་བློ་ལྡན་རྣམས་ཀྱིས་སླར་དཔྱད་པར་བྱའོ།། །།