དགེ་སློང་གི་སྒྲ་བཤད།
དགེ་སློང་གི་སྒྲ་བཤད་ནི།
བི་ཞེས་པའི་སྒྲ་ལས་དྲངས་ན་དགེ་བ་མྱ་ངན་ལས་འདས་པའི་དོན་འཚོལ་ཞིང་ཆོས་དང་ལྡན་པའི་བསོད་སྙོམས་སློང་བས་ན་དགེ་སློང་ཞེས་མཁན་པོ་ཛི་ན་མི་ཏྲ་ལ་སོགས་པ་བཞེད་དོ། །མདོ་སྡེ་ལས་ནི། དགེ་བ་སློང་དང་ཟས་སློང་དང༌། །ཉེ་བར་ཞི་དང་ཆགས་སྤངས་དང༌། །ལེགས་པར་འཚོ་དང་ལམ་ཞུགས་དང༌། །ཡིད་འོང་ཕྱིར་ན་དགེ་སློང་ཡིན། །ཞེས་རྣམ་པ་བདུན་གསུངས་སོ། །སྔ་མ་སྔ་མ་བསྙེན་པར་མ་རྫོགས་པ་ལ་ཕྱི་མ་ཕྱི་མ་མི་བྱའོ། །འོ་ན་དགེ་བསྙེན་དང་དགེ་ཚུལ་ལ་བསྙེན་པར་རྫོགས་པའི་སྒྲ་མི་རིགས་སོ་ཞེ་ན། སྒྲ་ཡངས་དོག་གཉིས་ལས། སྒྲ་དོག་པའི་དབང་དུ་བྱས་ན་ལུང་རྣམ་འབྱེད་ལས། རྫོགས་པར་བསྙེན་པ་ནི་གཉིས་ཏེ། དགེ་སློང་དང་དགེ་སློང་མའོ། །དེ་ལས་གཞན་པ་ནི་རྫོགས་པར་མ་བསྙེན་པའོ་ཞེས་གསུངས་པས་བསྙེན་པར་རྫོགས་པའི་སྒྲ་དགེ་སློང་ཕ་མ་ཁོ་ན་ལ་འཇུག་ཀྱང༌། སྒྲ་ཡངས་པའི་དབང་དུ་བྱས་ན་དགེ་བསྙེན་དང་དགེ་ཚུལ་ལ་ཡང་བསྙེན་པར་རྫོགས་པའི་སྒྲ་འཇུག་སྟེ། ཊཱི་ཀ་ལས། རྫོགས་པ་ཞེས་བྱ་བ་ནི་གནོད་པ་ཐམས་ཅད་དང་བྲལ་བའི་དངོས་པོ་ལ་བྱ་སྟེ། མྱ་ངན་ལས་འདས་པ་ཡང་དེ་ལྟ་བུའི་རང་བཞིན་ཡིན་ནོ། །བསྙེན་པ་ཞེས་བྱ་བ་ནི་ཉེ་བའི་ཚིག་ཡིན་ཏེ་དེའི་ཕྱིར་བསམ་པ་ཐམས་ཅད་ཀྱིས་མྱ་ངན་ལས་འདས་པ་དང་ཉེ་བར་གྱུར་པ་ནི་བསྙེན་པར་རྫོགས་པ་ཡིན་ནོ་ཞེས་གསུངས་པས། རྫོགས་པ་མྱ་ངན་ལས་འདས་པ་ལ་བསྙེན་པ་ནི་དགེ་བསྙེན་དང་དགེ་ཚུལ་ཡང་ཡིན་པའི་ཕྱིར་རོ། །