སྙན་རྩོམ་སྐོར།
སྙན་རྩོམ་སྐོར།
ཨོཾ་སྭ་སྟི། ཇི་ལྟ་ཇི་སྙེད་ཤེས་བྱའི་གནས་རྣམས་ཀུན། །མ་འདྲེས་གསལ་བར་སྟོན་པའི་རི་མོའི་འཕྲུལ། །གངས་ཅན་པ་ཡི་ཁྱད་ནོར་སྒྱུ་རྩལ་གྱི། །སུག་བྲིས་ཡིད་འོང་པདྨའི་དགའ་ཚལ་བཞད། །ཅེས་པ་འདི་ནི་མགོ་ལོག་ལུང་སྐྱའི་དུས་བྲིས་སྒྱུ་རྩལ་གླིང་ལ་དངོས་གྲུབ་དཔལ་གྱིས་རྗེས་སུ་ཡི་རང་དང་བཅས་ཏེ་ཕུལ། མཁྱེན་གཉིས་ཟུང་གི་ཕྱག་རྒྱའི་གར་སྟབས་ལས། །སྙན་པའི་ཆོས་སྒྲ་ཏམ་བུ་ར་ཡི་དབྱངས། །སྲིད་པའི་ཁྱོན་ལ་ཡོངས་སུ་རབ་དཀྲོལ་བས། །མི་ཤིས་རྒུད་ཚོགས་ཀུན་ནས་ཞི་བྱེད་ཀྱི། །དྲི་མ་འཆོས་ཤིང་སྲིད་ལས་སྐྱོབ་བྱེད་པ། །གདམས་ངག་བདུད་རྩིའི་བཅུད་ཀྱིས་གཏམས་པ་འདི། །དཔར་དུ་བསྐྲུན་པའི་ལེགས་བྱས་བསོད་ནམས་ཀྱིས། །ལུས་ཅན་བདེ་ཞིང་རྒྱལ་བསྟན་འཕེལ་གྱུར་ཅིག ། ཅེས་པ་འདི་ནི་བདག་སེམས་ལ་མཁྱེན་རྟོགས་ཀྱི་རིན་ཐང་ཆེ་བའི་མདོ་སྨད་ཇོ་ནང་དགོན་པའི་ཐོག་མ་ཛམ་ཐང་ཆོས་རྗེ་དགོན་པའི་མཁན་ཆེན་ཀརྨ་རྡོ་རྗེས་མཛད་པའི་ཐེག་པ་མཆོག་གི་ཟབ་གསང་ངེས་དོན་གཞན་སྟོང་དབུ་མ་ཆེན་པོའི་དོན་རབ་ཏུ་གསལ་བར་བྱེད་པ་གཟི་འབར་ནོར་བུའི་འོད་སྣང་ཞེས་པའི་བསྟན་བཅོས་ཀྱི་པར་བྱང་སྨོན་ཚིག་ཏུ་དངོས་གྲུབ་དཔལ་གྱིས་ཕུལ་བ་དགེའོ། །སྔོན་བསགས་བསོད་ནམས་སྟོབས་ལས་མངོན་འཕགས་པའི། །ཕུན་ཚོགས་ཡོན་ཏན་རིན་ཆེན་ལས་གྲུབ་ཅིང༌། །རིགས་ལམ་གད་རྒྱངས་འཕྲིན་ལས་སྟོང་འབར་བས། །ཕས་རྒོལ་ཟིན་གནོན་བློ་གྲོས་འདབ་སྟོང་བཞད། །རིགས་ལམ་རྣམ་པར་འབྱེད་པའི་ལེགས་བཤད་ཀྱི། །སྟོན་ཀའི་ཟླ་ལྟར་གསལ་བའི་འོད་དཀར་གྱིས། །འགྲོ་བློའི་རྨོངས་པའི་མུན་ཚོགས་རབ་བཅོམ་ནས། །ཐུབ་བསྟན་ལུང་རིགས་པད་དཀར་རྒྱས་གྱུར་ཅིག ། ཅེས་པ་འདི་ནི་མཁན་རྣམ་སྲས་ཀྱིས་རྟགས་རིགས་སོགས་རིགས་ལམ་གྱི་རྩོམ་ཡིག་དཔེ་སྐྲུན་བྱེད་སྐབས་སུ་བཙུན་པ་ངག་དབང་དངོས་གྲུབ་དཔལ་གྱིས་རྗེས་སུ་ཡི་རང་དང་བཅས་ཏེ་གུས་ཕུལ། ཨོཾ་སྭ་སྟི། ལྟ་སྒོམ་སྤྱ ོད་པའི་རྣམ་བཞག་རིན་ཆེན་གཏེར། །ནང་བསྟན་དཔག་བསམ་ལྗོན་པའི་འཁྲི་ཤིང་ལ། །ཚན་རིག་དེང་རབས་རིགས་པས་ཟུར་བརྒྱན་པའི། །ལེགས་བཤད་འདི་འདྲ་དུས་ཀྱི་གསོ་སྨན་མཆོག ། དངོས་གྲུབ་དཔལ་ནས་གུས་ཕུལ། ཨོཾ་སྭ་སྟི། བརྩེ་ཆེན་མུ་མེད་རྒྱ་མཚོ་འཁྲིགས་པ་ལས། །མཁྱེན་དཔྱོད་ཟླ་བའི་དཀྱིལ་འཁོར་མངོན་འཕགས་པ། །ཕན་བདེའི་འགྲོས་ཀྱིས་སྲིད་འདི་མི་འདོར་བའི། །བསྟན་འཛིན་དམ་པ་མཆོག་གི་འཁྲུངས་སྐར་བསུ། །ཐུགས་སྟོབས་གོ་ཆའི་སྤྲིན་རིམ་ལྡང་བ་ལས། །ལེགས་གསུང་འབྲུག་སྒྲས་ཀུན་རྨོངས་སེལ་བྱེད་ཅིང༌། །ཚུལ་གནས་ཐོས་བསམ་སྒོམ་པའི་རྒྱལ་མཚན་འཛིན། །འགྲོ་ཕན་བླ་མ་གང་དེའི་འཁྲུངས་སྐར་བསུ། །གདུལ་བྱའི་བསོད་ནམས་སེང་གེས་བཏེགས་པའི་ཁྲིར། །སྐུ་ཡི་ཁོ་ལག་མཚན་དཔེའི་གཟི་འབར་ཞིང༌། །འཕྲིན་ལས་གདུགས་དཀར་གཡས་སུ་རབ་འཁོར་ངང༌། །བསྟན་འགྲོའི་མགོན་དུ་ཡུན་རིང་བཞུགས་གསོལ་འདེབས། །རིན་ཆེན་རྣམ་གསུམ་ཚེ་མཐའ་ཡས་པ་དང༌། །རྣམ་པར་རྒྱལ་དང་སྒྲོལ་མ་དཀར་མོ་སོགས། །འཆི་མེད་ཚེ་ཡི་ལྷ་ཚོགས་ཐམས་ཅད་ཀྱིས། །བསྟན་འཛིན་མཆོག་གི་སྐུ་ཚེའི་འདུ་བྱེད་སྲུངས། །ཞེས་འབྲི་གུང་༧སྐྱབས་མགོན་རྡོ་རྗེ་འཆང་དཀོན་མཆོག་བསྟན་འཛིན་ཀུན་བཟང་འཕྲིན་ལས་ལྷུན་གྲུབ་དཔལ་བཟང་པོ་མཆོག་དགུང་གྲངས་དོན་ལྔ་ཕེབས་པའི་སྐུའི་འཁྲུངས་སྐར་ལ་ཇོ་ནང་པ་ངག་དབང་དངོས་གྲུབ་དཔལ་གྱིས་དད་གུས་དང་བཅས་གུས་པས་ཕུལ་བ་དགེའོ། །