བཞི་བ་ཕྲག་དོག་གི་གཉེན་པོ་རྗེས་སུ་ཡི་རངས་བའི་ཡན་ལག་ནི།ཁྱོད་ཀྱི་བ་སྤུ་ཉག
བཞི་བ་ཕྲག་དོག་གི་གཉེན་པོ་རྗེས་སུ་ཡི་རངས་བའི་ཡན་ལག་ནི།ཁྱོད་ཀྱི་བ་སྤུ་ཉག་རེ་ཡི། །
བསོད་ནམས་ལ་ཡང་དུས་གསུམ་གྱི། །རྒྱལ་བའི་འཕྲིན་ལས་ཐམས་ཅད་ཀྱི། །ཆར་ཡང་བསྐྲུན་པར་མི་ནུས་པས། །ཉིད་དང་ཉིད་ཀྱི་རྗེས་བཟུང་དང། །ཉིད་ལ་མཆོད་དང་ཕྱག་འཚལ་སོགས། །བསོད་ནམས་མི་ཟད་བྱེད་པ་ལ། །ལྷག་པར་དང་བས་ཡི་རང་ངོ། །བླ་མ་རྡོ་རྗེ་འཆང་ཆེན་པོ་ཁྱོད་ཀྱི་སྐུའི་བ་སྤུ་ཉག་མ་རེ་རེ་ཡིས་སེམས་ཅན་གྱི་དོན་སྒྲུབ་པ་དང༌། རྒྱལབའི་བསྟན་པ་སྤེལ་བའི་བསོད་ནམས་ལ་ཡང་འདས་མ་འོངས་ད་ལྟ་དུས་གསུམ་གྱི་རྒྱལ་བའི་འཕྲིན་ལས་ཐམས་ཅད་ཀྱིས་བརྒྱ་སྟོང་གི་ཆར་ཡང་བསྐྲུན་པར་མི་ནུས་པ་རྒྱུ་མཚན་དེ་བས་ན་དཔལ་ལྡན་བླ་མ་དམ་པ་ཁྱོད་ཀྱིས་བསྟན་པ་དང་འགྲོ་བའི་དོན་མཛད་པ་ཉིད་དང་གདུལ་བྱ་ཐམས་ཅད་ཀྱིས་བསམ་སྦྱོར་གཉིས་ཀྱིས་སྒོ་ནས་བླ་མ་ཉིད་ཀྱི་མཛད་པ་ལ་རྗེས་སུ་ཡི་རངས་བར་བཟུང་བ་དང༌། དཔལ་ལྡན་བླ་མ་གང་ཉིད་ལ་གསོལ་ཆས་དང་ནབ་བཟའ་དང་ཁྲུས་སྐུ་མཉེ་སོགས་ཟང་ཟིང་འབུལ་བའི་མཆོད་པ་དང་ཕྱག་འཚལ་བ་གདན་བཏིང་བ་བསྙེན་བཀུར་བྱས་པ་སོགས་བཀུར་སྟིའི་མཆོད་པ་དང༌། འཇིག་རྟེན་གྱི་ཁམས་ན་བཀའ་བཞིན་སྒྲུབ་པའི་མཆོད་པའི་བསོད་ནམས་ནི་མི་ཟད་པའི་གཏེར་ལྟ་བུའི་སྒྲུབ་པར་བྱེད་པ་གང་ཡོད་པ་ཐམས་ཅད་ལ་ནི་ལྷག་པར་དང་བས་སྒོ་ནས་རྗེས་སུ་ཡི་རང་ངོ༌། ། དེ་ཡང་བདེ་སྨོན་ལས།གཞན་གྱིས་དགེ་བ་བྱེད་པ་ཐོས་པའི་ཚེ། །དེ་ལ་ཕྲག་དོག་མི་དགེ་སེམས་སྤངས་ནས། །སྙིང་ནས་དགའ་བའི་རྗེས་སུ་ཡི་རང་ན། །དེ་ཡི་བསོད་ནམས་མཉམ་དུ་ཐོབ་པར་གསུངས། །ཞེས་གསུངས་པ་ལྟར་གྲོགས་ཚང་བར་མཚུངས་བར་སྤྱོད་པ་སོགས་མདོར་ན་གཞན་གྱིས་བསྟན་འགྲོའི་དོན་དུ་མཛད་པའི་དགེ་བའི་རྩ་བ་དང༌། ལྷག་པར་དུ་དཔལ་ལྡནབླ་མ་དམ་པ་དེ་ལ་བརྟེན་ནས་ཚོགས་བསགས་སྒྲིབ་སྦྱངས་སོགས་བསོད་ནམས་ཀྱི་དགེ་བའི་རྩ་བ་གང་ཡོད་པ་དེ་དག་ཐམས་ཅད་རྗེས་སུ་ཡི་རང་བ་དེ་ནི་བསོད་ནམས་དགེ་བ་མང་དུ་སྤེལ་བ་ཡིན་པ་དང་གཞན་གྱིས་དགེ་བ་བྱས་པ་ལ་རྗེས་སུ་ཡི་རང་བ་དེ་ནི་ཕྲག་དོག་གི་གཉེན་པོ་ཡང་ཡིན་ནོ། །