ཀློང་ཆེན་སྙིང་ཐིག་གི་གཏུམ་མོའི་མེའི་བོགས་དབྱུང་གི་དམིགས་པ་གབ་པ་མངོན་ཕྱུང་།
༄༅། །ཀློང་ཆེན་སྙིང་ཐིག་གི་གཏུམ་མོ་མེའི་བོགས་དབྱུང་གི་དམིགས་པ་གབ་པ་མངོན་ཕྱུང་བཞུགས་སོ། །སྐྱབས་གནས་ཀུན་འདུས་ཀྱི་ངོ་བོ་རིགས་བདག་རྡོ་རྗེ་འཛིན་པའི་ཞབས་ཀྱི་པདྨོ་ལ་ཉེ་བར་བཏུད་དེ་གུས་པས་ཕྱག་འཚལ་ལོ། །ཚད་མེད་པའི་ཐུགས་རྗེ་ཆེན་པོས་བདག་གི་རྒྱུད་བྱིན་གྱིས་བརླབ་པར་མཛད་དུ་གསོལ། འདིར་ཀློང་ཆེན་སྙིང་ཏིག་གི་གཏུམ་མོ་མེའི་བོགས་དབྱུང་གབ་པ་བླ་མའི་གསུངས་སྒྲོས་ལས་ཐོས་པ་ཅུང་ཞིག་འདིར་བཀོད་པར་བྱ་སྟེ། དེ་ཡང་ཐོག་མར་བུམ་ཅན་དང་གཏུམ་མོའི་དམིགས་པ་གཞུང་ལྟར་གྲུབ་ནས། མཇུག་ཏུ་གཞུང་ལས། དེ་ནས་རྩ་གསུམ་འདུས་མདོ་རུ༔ དྭངས་མ་ཨ་ཤད་ལ་ཕོག་ཚེ༔ སྣུམ་ཁོལ་བདུད་རྩི་བླུག་པ་བཞིན༔ མེ་དང་བདུད་རྩི་གཉིས་མེད་འདྲེས༔ རིག་པ་རྩལ་གྱི་དབང་ཆེན་ཐོབ༔ སྣང་སྲིད་ཐབས་ཅད་མེ་ཡིས་ཁེངས༔ སྣོད་དང་བཅུད་དུ་འཛིན་པ་ཡི༔ རྣམ་རྟོག་བག་ཆགས་ཐམས་ཆད་བསྲེགས༔ ཞེས་པའི་དོན། ཡས་བབ་ཀྱི་དམིགས་པ་ལེགས་པར་གྲུབ་ནས་ཐིག་ལེ་ཨ་ཤད་ལ་ཕོག་པ་དང་ཆབས་ཅིག་སྣུམ་ཁོལ་ནང་དུ་ཨ་རག་བླུགས་པ་བཞིན་ཚེག་སྒྲ་དང་བཅས་ཏེ་འཕྱུར་ནས་མེ་ལྕེའི་དབལ་ཤིན་ཏུ་ཚ་བས་རིམ་བཞིན་གསང་གནས་སུ་ཉོན་མོངས་པ་ཕྲག་དོག་གིས་ཀུན་ནས་བསླངས་པའི་སྡིག་སྒྲིབ་བག་ཆགས་ཐམས་ཅད་བསྲེགས་ནས་བྱ་བ་གྲུབ་པའི་ཡེ་ཤེས་རྒྱུད་ལ་སྐྱེས་པར་བསམ། དེ་བཞིན་དུ་ལྟེ་བ་རུ་ཉོན་མོངས་པ་ང་རྒྱལ་གྱིས་ཀུན་ནས་བསླངས་པའི་སྡིག་སྒྲིབ་བག་ཆགས་ཐམས་ཅད་བསྲེགས་ནས་མཉམ་པ་ཉིད་ཀྱི་ཡེ་ཤེས་རྒྱུད་ལ་སྐྱེས་པར་བསམ། ཡང་སྙིང་གར་ཉོན་མོངས་པ་ཞེ་སྡང་གིས་ཀུན་ནས་བསླངས་པའི་སྡིག་སྒྲིབ་བག་ཆགས་ཐམས་ཅད་བསྲེགས་ནས་མེ་ལོང་ཡེ་ཤེས་རྒྱུད་ལ་སྐྱེས་པར་བསམ། ཡང་མགྲིན་པར་ཉོན་མོངས་པ་འདོད་ཆགས་ཀྱིས་ཀུན་ནས་བསླངས་པའི་སྡིག་སྒྲིབ་བག་ཆགས་ཐམས་ཆད་བསྲེགས་ནས་སོར་རྟོགས་ཡེ་ཤེས་རྒྱུད་ལ་སྐྱེས་པར་བསམ། ཡང་སྤྱི་བོར་ཉོན་མོངས་པ་གཏི་མུག་གིས་ཀུན་ནས་བསླངས་པའི་སྡིག་སྒྲིབ་བག་ཆགས་ཐམས་ཅད་བསྲེགས་ནས་ཆོས་དབྱིངས་ཡེ་ཤེས་རྒྱུད་ལ་སྐྱེས་པར་བསམ་ནས། སླར་མེ་ལྕེ་ཚང་བུག་ནས་ཐོན་ཏེ་ནམ་མཁའི་དབྱིངས་ཐམས་ཅད་ཁྱབ་པ་དང་འོག་སྒོ་གཉིས་ནས་ཀྱང་མེ་ལྕེ་སྔར་བཞིན་ཐོན་ནས་ས་གཞིའི་ཁམས་ཐམས་ཅད་ཁྱབ་པ་དང་ཆབས་ཅིག་སྟེང་འོག་མེའི་གུར་ཁུང་གཉིས་འཁོར་བའི་བར་དུ་སྡེ་བརྒྱད་འབྱུང་པོ་བཀའ་དང་དམ་ལ་མི་གནས་པའི་ནག་ཕྱོགས་ཀྱི་རིགས་གྱུར་ཐམས་ཅད་གཞོབ་ཐུལ་གྱིས་བསྲེགས་པར་བསམ་པ་དང་། ནང་གི་རྩ་འཁོར་ཡང་སྤྱི་བོ་དང་མགྲིན་པ་སྙིང་ག་དང་ལྟེ་གསང་རྣམས་ཀྱི་རྩ་འདབ་རེ་རེ་ལ་རྩ་ཕྲན་གྲངས་མེད་མཆེད་ནས་བ་སྤུའི་ཁུང་བུར་མེ་ལྕེ་དམར་ཁྱུགས་ཁྱུགས་འབར་བཞིན་འཁོར་བའི་བར་དུ་ལུས་ཀྱི་ནད་གདོན་སྡིག་སྒྲིབ་དམ་ཚིག་ཉམས་ཆགས་ཐམས་ཅད་གཞོབ་ཐུལ་གྱིས་ཚིག་པར་བསམ་ལ་རླུང་ཅི་ནུས་སུ་འཛིན་པ་དང་། ཡས་འབེབས་མས་འབེབས་ལ་གནད་དུ་བསྣུན་ནོ། །རྗེས་ལ་མེའི་དཀར་ཆ་ཐམས་ཅད་ཧཾ་ཡིག་དང་། དམར་ཆ་ཨ་ཤད་ལ་བསྡུས་ཏེ་དབུ་མ་ཆེ་བསྐྱེད་ཆུང་བསྐྱེད་རེས་མོས་ཡང་ཡང་བྱས་མཐར། གཞུང་ལས། མཐར་ནི་རང་ལུས་མེ་དང་བཅས༔ ཇེ་ཆུང་ཇེ་ཆུང་སྤྲོས་བྲལ་ངང་༔ བསྡུས་ལ་གསལ་སྟོང་ངང་དུ་བཞག༔ གསུངས་པ་ལྟར། མེ་དང་དབུ་མ་ཐམས་ཅད་ཇེ་ཆུང་ལ་སོང་ནས། མཐར་དམིགས་བསམ་བརྗོད་པ་དང་བྲལ་བའི་ངང་ནས་དོན་གྱི་གཏུམ་མོ་ལ་གོམས་འདྲིས་སུ་བྱའོ། །རྗེས་ཀྱི་རིམ་པ་བསྔོ་བ་སྨོན་ལམ་སྤྱི་དང་བྱེ་བྲག་ཉོན་མོངས་རླུང་སེམས་སོགས་རྒྱས་པར་བྱའོ། །འདིར་སྨྲས་པ། རྒྱལ་བའི་དགོངས་དོན་འཕྱུགས་མེད་བདུད་རྩི་ལ། བྱིས་བློའི་ཆུ་ཡིས་བསླད་པའང་མི་རིགས་ཀྱང་། །རྣམ་འདྲེན་བླ་མ་དམ་པའི་གསུང་ལྕིའི་ཁུར། །ཅི་ལྕོགས་ཕྲག་པར་བླངས་པའི་འབྲས་བུ་འདིས། །སྙིང་པོའི་ཡང་ཟབ་མ་རྒྱུད་བདེ་སྟོང་གི །ཡེ་ཤེས་ཆེན་པོར་སྤང་བླང་གཉིས་བྲལ་བཞིན། །མ་དག་རྩ་རླུང་ཐིག་ལེའི་ཁམས་དག་ནས། །དག་པ་རྒྱལ་བའི་གསང་གསུམ་མངོན་གྱུར་ཤོག །ཅེས་པའང་རྣམ་འདྲེན་བླ་མ་དམ་པ་བསྟན་རྒྱས་ཀྱིས་གསུངས་གནང་ཐོབ་བཞིན་སྤྲང་བཙུན་གཞན་ཕན་མཐའ་ཡས་པས་བྲིས་པའོ། །དགེའོ། །སརྦ་མངྒ་ལཾ། །