ཙ་རིའི་ཡའི་གནས་བསྟོད་པད་དཀར་ཆུན་པོ། ཡི་དམ་རྡོ་རྗེ།
༈ ཙ་རིའི་ཡའི་གནས་བསྟོད་པད་དཀར་ཆུན་པོ་བཞུགས། རྒྱལ་ཀུན་བརྩེ་ཆེན་སྙིང་རྗེའི་གཟུགས། །མཚན་དཔེའི་སྐུ་རུ་སྨིན་པའི་ལྷ། །སྤྱན་རས་གཟིགས་དབང་གང་དེ་ཡིས། །ཀུན་ནས་དགེ་བའི་ཤིས་པ་སྩོལ། །མདོ་ཁམས་གཡུ་ཁོག་ས་ཡི་ཆ། །ཙ་རིའི་ཡ་ཞེས་གྲགས་པ་ཡི། །འཕགས་མཆོག་ཐུགས་རྗེ་ཆེན་པོའི་གནས། །དེ་ཡི་རང་བཞིན་ཅུང་ཟད་གླེང་། །སྔོན་ཚེ་པདྨ་ཀཱ་ར་དང་། །རྣམ་སྣང་ལོ་ཙཱས་བྱིན་གྱིས་བརླབས། །ཕྱི་རབས་སྐྱེ་བོའི་བགོ་སྐལ་དུ། །ཟབ་མོའི་ཆོས་གཏེར་མང་དུ་སྦས། །གནས་སྲུང་ལྷ་བཙན་ལྕམ་དྲལ་དང་། །ཞིང་སྐྱོང་ཡབ་ཡུམ་གཉིས་ལ་གཏད། །མངའ་རིའི་ལྷ་མགོན་གཙོ་འཁོར་ལ། །བྱང་སྒོ་སྲུང་བའི་མངག་གཞུག་བཅོལ། །དེ་རྗེས་འཇིགས་མེད་རྣམ་རྒྱལ་བས། །རྫོང་བདུན་གནས་ཀྱི་སྒོ་ཕྱེ་ཚེ། །རྟེན་འབྲེལ་འགྲོ་དོན་དུས་བབས་ནས། །གནས་འདིའི་སྒོ་འཕར་ཕྱེས་པར་མཛད། །གནས་འདི་མཇལ་སྐོར་བྱས་པ་ན། །ལྷོ་མོན་དཔལ་གྱི་ཙ་རི་ཏྲ། །མཇལ་སྐོར་བྱས་དང་བྱིན་མཉམ་པས། །ཙ་རིའི་ཡ་ཞེས་མཚན་དུ་གསོལ། །བྲག་དཀར་དུང་སེང་འགྱིང་འདྲའི་དབུས། །འཕགས་མཆོག་སྤྱན་རས་གཟིགས་དབང་དང་། །བདེ་གཤེགས་ཐུགས་ཀྱི་མཆོད་རྟེན་ཆེ། །མ་བཀོད་རང་བྱུང་ལྷང་ངེར་གསལ། །སྲ་བ་རྡོ་ལ་བརྐོས་པ་ཡི། །བདེ་གཤེགས་སྐུ་གསུང་ཐུགས་རྟེན་གྱིས། །གནས་འདིའི་ཉེ་འཁོར་གཏམས་བྱས་པས། །འབྲེལ་ཚད་སྐྱེ་བོ་བདེ་ལ་བཀོད། །ཤིན་ཏུ་དབེན་ཞིང་ཉམས་དགའི་ཡུལ། །ངོ་མཚར་ས་ཡི་དཔྱད་པ་རྫོགས། །མདུན་དུ་ཆུ་ཤིང་གླིང་ཀ་མཛེས། །རྒྱབ་རིའི་རྩེ་འཛིན་མཁའ་ལ་སྙེགས། །ནུབ་ཕྱོགས་རི་བོའི་ངོས་ཡངས་ན། །རང་བྱུང་བཙན་མཁར་འཇིགས་རུང་རྔམས། །བྱང་གི་ས་མདོའི་འགག་སྒོ་ནི། །དྲག་པོའི་རི་བོས་བསྡམས་པ་བརྗིད། །ཤར་གྱི་གྲོགས་ལམ་དཀར་པོ་ནི། །ཚང་ཚིང་ནགས་མའི་གསེབ་ན་མཛེས། །ལྷོ་ཆུ་གཡུ་འབྲུག་སྔོན་མོ་ནི། །མདུན་ནས་དལ་གྱིས་བྱང་དུ་འབབ། །ནུབ་ཀྱི་བྱ་ཆེན་ལྗོན་པའི་ཚལ། །སྒྲོ་གཤོག་ཡངས་ཤིང་རྒྱས་པར་བརྐྱངས། །བྱང་དུ་རྔམས་བརྗིད་བྲག་གི་རི། །རུས་སྦལ་རྒྱལ་པོའི་ཟོལ་གྱིས་འགྱིང་། །རི་རྩེ་མཆོང་བྲག་མཁའ་ལ་སྙེགས། །དྲག་པོའི་ཕྲིན་ལས་འགྲུབ་པའི་བརྡ། །རི་མགུལ་གདགས་རི་ཟླ་གམ་དབྱིབས། །དབང་གི་ཕྲིན་ལས་བསྒྲུབ་ལ་ཤིས། །རི་འདབས་གཡུ་ཤུག་ཚལ་གྱིས་དཀྲིས། །ཚེ་བསོད་རླུང་རྟ་རྒྱས་པའི་གནས། །རི་ཞོལ་ཡངས་པའི་སྤང་ཐང་ཟླུམ། །ཞི་བའི་ལས་ལ་མཆོག་ཏུ་བསྔགས། །དབེན་པའི་གནས་ཀྱི་ཡོན་ཏན་ནི། །མ་ཚང་མེད་པ་འདི་ལ་རྫོགས། །སྦས་ཡུལ་ལྟ་བུའི་ཁྱད་འཕགས་གནས། །མོས་ལྡན་དགའ་བས་བརྟེན་པར་རིགས། །ལས་བཞིའི་ཕྲིན་ལས་གང་དང་དང་། །གནས་འདིར་བསྒྲུབ་ན་འགྲུབ་རྟགས་མྱུར། །ཉམས་རྟོགས་གོང་དུ་འཕེལ་འདོད་ན། །གནས་འདིར་སྒྲུབ་ལ་བརྩོན་པ་གཅེས། །སྔོན་རབས་རྣམས་སུ་ཡང་དང་ཡང་། །གྲུབ་མཆོག་རྣམས་ཀྱིས་བྱིན་བརླབས་པས། །ཕྱི་རབས་རྣམས་སུ་བཀྲ་ཤིས་ཤིང་། །ངོ་མཚར་ཁྱད་འཕགས་གནས་འདི་གྲུབ། །འདི་བྲིས་དགེ་བས་འགྲོ་བ་ཀུན། །གནས་སྐབས་མི་འདོད་ཉེར་འཚེ་ཞི། །མཐར་ཐུག་བདེ་ནས་བདེ་བ་རུ། །བགྲོད་པའི་རྒྱུ་རུ་གྱུར་ཅིག་གུ །ཅེས་ཙ་རིའི་ཡའི་གནས་བསྟོད་པད་དཀར་ཆུན་པོ་ཞེས་པ་འདི་ནི་རིང་མོའི་དུས་ནས་ཆོས་ཀྱི་མཆེད་པོ་བསྟན་པ་ཉི་ཤར་གྱིས་ནན་གྱིས་ལན་འགའ་བསྐུལ་མོད་སྙོམ་ལས་ངང་དུ་ལུས། ཉེ་ཆར་མཆེད་པོ་དུ་མ་དང་ལྷན་དུ་གཞི་བདག་བཅུ་སྐོར་ཞིག་ལ་བུམ་གཏེར་ཕུལ་ཞིང་གསས་མཁར་གསར་རྩིགས་བྱེད་དུ་ཕྱིན་སྐབས་གནས་འདི་མཇལ་བའི་སྐལ་བཟང་ཐོབ་པས་མཆེད་པོ་རྣམས་ཀྱི་ཞལ་ངོ་མི་ལྡོག་ཆེད་ཡི་དམ་རྡོ་རྗེར་འབོད་པས་ཆུ་ཡོས་ཁྲུམས་ཟླའི་ཚེས་བཅུ་དགུའི་ཉིན་བྲིས་པ་དགེ་ལེགས་འཕེལ།།