དཔོན་རབས་གསུམ་པ་ཀརྨ་དོན་གྲུབ་ནི།
རབ་བྱུང་བཅུ་གཉིས་པའི་ནང་དཔོན་ཀརྨ་དབང་ཕྱུག་གི་སྲས་སུ་འཁྲུངས། གཡུ་ཁོག་དཔོན་རབས་གསུམ་པའི་གོ་གནས་བཞེས། སྐབས་དེར་སྒེག་གི་ཁྲོ་འཕོངས་མན་ཆད་རྒྱལ་རོང་ཁྲོ་སྐྱབས་ཀྱི་ས་ཆ་ཡིན་པ་ལ་། དཔོན་འདིས་སྐུ་སྲས་ཀརྨ་ཆོས་གྲགས་ལ་ཁྲོ་སྐྱབས་རླན་ཚང་གི་སྲས་མོ་ཞིག་བཙུན་མོར་བསུས་པས་གཡུའི་ནུ་མདོ་ཡན་ཆད་ཁྲོ་སྐྱབས་རྒྱལ་པོས་སྲས་མོ་ལ་ས་སྐལ་དང་སྡེ་སྐལ་དུ་བྱིན། སྐབས་དེར་གཡུ་ཁོག་གི་ས་ཆ་དང་སྡེ་བ་ཤོག་ཁག་ལྔ་རུ་བགོས་པ་ནི། ཝ་ཤུལ་ཆུ་དམར་བ། ཝ་ཤུལ་དབུས་ཐ་མ། ཝ་ཤུལ་གཡུ་དངོས་མ། ཝ་ཤུལ་སྒེག་ཐ་མ། ཝ་ཤུལ་ཆུ་དབར་བ་བཅས་ཡིན། སྡེ་ཤོག་ལྔ་པོ་སོ་སོར་ཤོག་དཔོན་གསར་བསྐོ་བྱས། དགོན་གྱི་མཐའ་སྐོར་གྱི་སྡེ་བ་ལ་མགོ་དཔོན་མ་བསྐོས་པར་དཔོན་རང་ཉིད་ཀྱིས་ཐད་གཟིགས་ཀྱིས་བསྐྱངས། ཞི་བདེ་འཆམ་མཐུན་གྱིས་མངའ་འབངས་བསྐྱངས་ཤིང་དམག་འཁྲུག་འཛིང་རྩོད་སོགས་ཆེར་མ་བྱུང་བར་སྣང་ངོ་།།