ཁྲོ་ཆུའི་ཐུན་གཏོར་གྱི་དམིགས་རིམ་དང་བསྐུལ་པ་རིང་མོ།
ཁྲོ་ཆུའི་ཐུན་གཏོར་གྱི་དམིགས་རིམ་དང་བསྐུལ་པ་རིང་མོ་བཞུགས༔ ༈ དེ་ནས་གཏོར་མ་བསྐུལ་བ་ཐུན་གཏོར་འཕང་བ་ནི༔ དམར་གཏོར་ལ་བྱ་ནག་རྟ་ནག་གཡག་ནག་ལུག་ནག་ཁྱི་ནག༔ སྟག་གཟིག་དོམ་སོགས་ཀྱི་ཤ་ཁྲག་དང་༔ བཙན་དུག་ཐང་ཕྲོམ་ལ་སོགས་པའི་དུག་སྣ་ཚོགས་སྦྱར་བའི་དུག་ཁྲག་གིས་བྲན་ལ༔ གཏོར་མ་ལ༔ ཡཾ་ལས་རླུང་༔ རཾ་ལས་མེ༔ ཀཾ་ལས་མི་མགོའི་སྒྱེད་པུ་གསུམ་གྱི་སྟེང་དུ་ཨ་ལས་དྲག་པོའི་ཐོད་པ་བྷནྡྲ་ལྕང་ལོ་ཅན་གྲུ་གསུམ་པའི་ནང་དུ༔ ཚྭ་དང་ཁྲི་ལས་དགྲ་བགེགས་བྱད་མ་དེ༔ ཁོ་རང་ཅི་འདྲ་བར་བསྟིམ་ལ་འགུགས་གཞུག་དྲག་པོས་གཏོར་མ་དང་ཉ་བོ་ལ་བསྟིམས་ལ རླུང་གཡོས་མེ་སྦར་ཐོད་པ་དྲོས༔ ངོ་བོ་དགྲ་བགེགས་ཀྱི་ཤ་ཁྲག་འོད་དུ་ཞུ་བ་ལས་རྣམ་པ་ཡེ་ཤེས་ཀྱི་བདུད་རྩིར་གྱུར་པར་བསམས་ལ༔ ཨོཾ་ཨཱཿཧཱུྃ༔ གསུམ། དུ་ཏྲི་ཡ་མ་རཱ་ཙ༔ ཡ་མ་རཀྵ༔ ཀྲོ་ཏ་པ་ཙ་ལ་ཏི༔ ཀཱ་ལ་རཱུ་པ༔ ཨ་ཀྲོ་རཱ་༔ ཡ་མ་རཱ་ཙ༔ ས་མ་ཡ་ཛ་ཛ༔ ཨི་དམ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི༔ དགྲ་བོ་འདི་ཡི་དོན་སྙིང་ལྔ་ལ་ཁཱ་ཧི༔ དགྲ་བོ་བྱད་མ་འདི་ཡི་སྲོག་རྩ་སྙིང་རྩ་ཁྲག་རྩ་ལ་ཁཱ་ཧི་ཁཱ་ཧི༔ གོ་རོ་ཙ་ན་ལ་ཁཱ་ཧི་ཁཱ་ཧི༔ བ་སུ་ཏ་ལ་ཁཱ་ཧི་ཁཱ་ཧི༔ དགྲ་བོ་བྱེད་མའི་གཟུགས་ཕུང་རྣམ་པར་ཤེས་པ་
ལ་ཁཱ་ཧི་ཁཱ་ཧི༔ དགྲ་བོ་བྱད་མའི་སྐྱེ་མཆེད་ལ་ཁཱ་ཧི་ཁཱ་ཧི༔ དགྲ་བོ་བྱད་མ་མི་ནོར་འཁོར་དང་བཅས་པ་ལ་ཁཱ་ཧི་ཁཱ་ཧི༔ དགྲ་བོ་སྡེ་ཕ་ཚན་ཚ་ཞང་དང་བཅས་པ་ལ་ཁཱ་ཧི་ཁཱ་ཧི༔ དགྲ་བོ་རུ་རོགས་ཁྱིམ་མཚེས་དང་བཅས་པ་ལ་ཁཱ་ཧི་ཁཱ་ཧི༔ དགྲ་བོའི་སྐྱེ་བ་བདུན་རྒྱུད་མ་ལུས་པ་ལ་ཁཱ་རཾ་ཁཱ་ཧི༔ ཞེས་བརྗོད་ལ་གཏོར་མ་དགྲ་བགེགས་མི་ནོར་འཁོར་བཅས་དུ་བསམ་པའམ༔ བྱད་མ་ལྷ་སྲུང་དང་བཅས་པའི་ཤ་ཁྲག་ཏུ་བསམ་ལ་འབུལ་ལོ༔ ལས་ཀྱི་གཤིན་རྗེའི་ཁ་གདངས་ཤིང་མཆེ་བ་གཙིགས་པས་དགྲ་བགེགས་བྱད་མའི་ཤ་ཁྲག་རྣམས་སྟིམ་སྟིམ་མ་ལུས་པར་གསོལ་བར་བསམ༔ ང་རྒྱལ་དང་ལྡན་ཞིང་རྔ་བརྡུང་ལ་རོལ་མོ་དང་བཅས་པས་འདི་སྐད་དོ༔ ཧཱུྃ༔ ཕྱོགས་ཕྱོགས་དག་ཀྱང་ཕ་ཀི་ན༔ ཉི་མ་ལྷོ་ཕྱོགས་ཕ་ཀི་ན༔ ལས་ཀྱི་གཤིན་རྗེའི་ཞིང་ཁམས་ནས༔ ཚ་བའི་མེ་དང་གྲང་བའི་ཆུ༔ ཚ་གྲང་འཁྲུགས་པའི་དཀྱིལ་འཁོར་ནས༔ ཤིན་ཏུ་འཇིགས་པའི་ཕོ་བྲང་ནས༔ སྟེང་ནི་རལ་གྲིའི་ལྡིང་ཁང་ཞབས༔ འོག་ནི་སྤུ་གྲིའི་ས་གཞི་ལ༔ བར་སྣང་སྤུ་གྲི་ཆུ་གྲི་དང་༔ མཚོན་ཆ་འཆོལ་བའི་མཚོན་སྟེང་དུ༔ སྤུ་གྲི་རལ་གྲི་ཆུ་གྲི་དང་༔ དུག་ཕུར་གཏམས་པའི་ཁྲི་སྟེང་དུ༔ པདྨ་ཉི་མའི་གདན་སྟེང་ན༔ དྲེགས་ཆེན་བཅོ་བརྒྱད་ཁྲི་རུ་བརྩེགས༔ བདུད་
དང་མུ་སྟེགས་ལྷ་སྲིན་དང་། ཉམས་པའི་དགྲ་བོ་བམ་གྱི་ཚོགས༔ མ་རུངས་རུ་ཏྲའི་ཁྲི་སྟེང་དུ༔ སངས་རྒྱས་ཀུན་གྱི་སྐུ་གསུང་ཐུགས༔ བདེ་གཤེགས་ཀུན་གྱི་སྤྲུལ་པ་སྟེ་ལས་ཀྱི་གཤིན་རྗེ་བཞུགས་པ་ནི༔ སྐུ་མདོག་དམར་ནག་མེ་ལྟར་འབར༔ ཞལ་གསུམ་ཕྱག་དྲུག་འཇིགས་པའི་གཟུགས༔ གཡས་ལྗང་གཡོན་དམར་དབུས་མཐིང་ཞལ༔ གཡས་ཞལ་ལྗང་ནག་གཏུམ་པ་ཡིས༔ དགྲ་བོ་ཕོ་རྒྱུད་ཞལ་དུ་གསོལ༔ གཡོན་ཞལ་དམར་ནག་རྔམ་པ་ཡིས༔ ཉམས་པ་མོ་རྒྱུད་ཞལ་དུ་གསོལ༔་དབུས་ཞལ་མཐིང་ནག་ཁྲོས་པ་ཡིས༔ གནོད་བྱེད་བྱེད་མ་ཞལ་དུ་གསོལ༔ དབུ་གསུམ་སྟེང་ན་མཆོད་རྟེན་གསུམ༔ གཡས་པ་ལྕགས་ལ་གཡོན་པ་དུག༔་དབུས་ནི་ཁྲོ་ཆུའི་མཆོད་རྟེན་ཏེ༔ འདས་དང་མ་བྱོན་ད་ལྟར་གྱི༔ ཕྱོགས་བཅུའི་སངས་རྒྱས་དབུ་ན་བཞུགས༔ སྲུང་སྐྱོབ་ཚེ་དབང་ཆོས་ཀྱི་སྐུ༔ ཕྱག་དྲུག་གཡས་གསུམ་དགྲ་སྣ་ཡིས༔ དམ་ཉམས་བྱད་མའི་མགོ་ལུས་ཕྲལ༔ གཡོན་སྙིང་སྲོག་རྩར་བཅས་པ་ཡིས༔ དྲེགས་ཆེན་བཅོ་བརྒྱད་ཞལ་དུ་གསོལ༔ སྐུ་ལ་དུག་སྦྲུལ་ཆུན་པོས་བརྒྱན༔ གདུག་པའི་ཚོགས་རྣམས་དབང་དུ་སྡུད༔
སྤྱན་དགུ་སྡང་མིག་ཕྱོགས་བཅུར་གཟིགས༔ སངས་རྒྱས་བསྟན་པའི་བྱ་ར་བྱེད༔ ཞལ་གསུམ་གདངས་ཤིང་རབ་ཏུ་བསྒྲད༔ མཆེ་བ་བཅུ་གཉིས་གཙིགས་པ་ཡིས༔ བྱད་མའི་དོན་སྙིང་ཞལ་དུ་གསོལ༔ ལྗགས་གསུམ་འདྲིལ་ཞིང་རྐན་སྒྲ་རྡེབ སྟོང་གསུམ་ལྷ་འདྲེ་ཞལ་དུ་གསོལ༔ རལ་གྲིའི་གཤོག་པ་གཡས་པ་ཡིས༔ དགྲ་བོ་ཕོ་རྒྱུད་རླག་པར་བྱེད༔ ཆུ་གྲིའི་གཤོག་པ་གཡོན་པ་ཡིས༔ དགྲ་བོ་མོ་རྒྱུད་དམྱལ་ཐག་གཅོད༔ སྐུ་སྐེད་ཆུ་སྲིན་རྔམས་ཞལ་ཅན་སྟོང་གསུམ་ལྷ་སྲིན་ཞལ་དུ་གསོལ༔ སྐུ་སྨད་ཁྲོ་ཆུའི་ཕུར་པ་ནི༔ ཟུར་གསུམ་དབལ་དང་ལྡན་པ་ཡིས༔ དགྲ་བོ་བྱད་མའི་སྲོག་སྙིང་གཟིར༔ སྐུ་ལ་བསྐལ་པའི་མེ་དཔུང་འབར༔ དམིགས་པའི་དགྲ་བགེགས་གཞོབ་ཏུ་བསྲེག༔ བ་སྤུའི་གསེབ་ནས་ཁྲོ་ཆུང་འགྱེད༔ དགྲ་བགེགས་བྱད་མ་རྡུལ་དུ་རློགས༔ ༈ བསྡུ་ན་འདི་ཕྱིན་བྱའོ༔ ལས་ཀྱི་གཤིན་རྗེ་མཐུ་རྩལ་ཅན༔ འཁོར་དུ་གཤིན་རྗེ་འབུམ་གྱིས་བསྐོར༔ སྟོང་གསུམ་འཇིག་རྟེན་ཁྱབ་པར་ཉུལ༔ ཁྱོད་ཀྱི་ཐུགས་དམ་དུས་ལ་བབ༔ གང་ལ་དམིགས་པ་རྡུལ་དུ་རློགས༔ འཆི་བདག་ནག་པོའི་དུས་ལ་བབ༔ ཕོ་རྒྱུད་ཚོགས་རྣམས་
རྡུལ་དུ་རློགས༔ ཚེ་བདག་ནག་པོའི་དུས་ལ་བབཿ༔ དགྲ་བོ་མོ་རྒྱུད་རྡུལ་དུ་རློགས༔ སྲོག་བདག་ནག་པོའི་དུས་ལ་བབ༔ སྣང་སྲིད་ལྷ་འདྲེ་རྡུལ་དུ་རློགས༔་་བྷཱ་སྭ་ཏ་དུས་ལ་བབ༔ ལྷ་སྲིན་སྡེ་བརྒྱད་རྡུལ་དུ་རློགས༔ ཟ་བ་ལྗང་དམར་དུས་ལ་བབ༔ བདུད་དང་མུ་སྟེགས་རྡུལ་དུ་རློགས༔ ཡ་མ་རཱི་ཙའི་དུས་ལ་བབ༔ དགྲ་བགེགས་ཐམས་ཅད་རྡུལ་དུ་རློགས༔ ཁྲོ་ཆུ་དུག་གདོང་དུས་ལ་བབ༔ ཐམས་ཅད་མ་ལུས་རྡུལ་དུ་རློགས༔ སྤྱི་གཤེད་དུག་གདོང་དུས་ལ་བབ༔ ཕྱི་ནང་ཆོས་སྐྱོང་རྡུལ་དུ་རློགས༔ དགྲ་བགེགས་ཤ་ཁྲག་འདི་གསོལ་ལ༔ བྱད་མ་ལྷ་སྲིན་སྡེ་བརྒྱད་དང་༔ བན་བོན་ཤན་པ་མུ་སྟེགས་ཚོགས༔ དྲེགས་ཆེན་བཅོ་བརྒྱད་ལྷ་འདྲེ་སྟོང་༔ བྱད་མ་འབུམ་དང་བཅས་པ་རྣམས༔ སྐད་ཅིག་ཉིད་ལ་བརླག་པར་མཛོད༔ བརྒྱན་པའི་གཏོར་མ་འདི་བཞེས་ལ༔ བཅོལ་བའི་ཕྲིན་ལས་འགྲུབ་པར་མཛོད༔ ཅེས་ནམ་གུང་ཉིན་གུང་དུས་དྲུག་ལ་བསྐུལ་ལོ༔ གཡབ་རྡེབ་དང་དམོད་བཅོལ་དྲག་ཏུ་བྱ༔ ངུ་འབོད་ལ་སོགས་བྱའོ༔ དེ་ལྟར་བྱས་ན་དགྲ་བགེགས་མྱུར་དུ་བརླག་པར་འགྱུར་རོ༔ དེ་ལྟར་བསྐུལ་བས་ལྷ་འདྲེ་རྣམས་ཀྱིས་སྔོན་གྱི་དམ་ཚིག་རྗེས་སུ་དྲན་ནས་རང་དབང་མེད་
པར་འཁོད་ནས་ལས་ཀྱི་གཤིན་རྗེ་བྱེ་བ་འབུམ་དང་བཅས་པས་བྱད་མའི་ཤ་ཟོས་ཁྲག་འཐུང་རུས་མུར་སྐྱེ་རྒྱུད་བཅད་པར་བསམ༔ ཐལ་བ་རྡུལ་དུ་བརླག་པར་བསམ་མོ༔ སརྦ་མངྒ་ལཾ། ༈ གཞུང་གི་ཐུན་གཏོར་དང་། གཏོར་གཉིས་པོ་འདོན་ཏེ་བྱ། གཟའི་བསྐུལ་པ་གཏེར་སྲུང་བདུད་པོ་ལྕམ་དྲལ་དང་བཅས་པའི་བསྐུལ་པ་བྱའོ། །རང་གི་ཕྱག་ལེན་མཐིལ་སོགས། ཐར་རྡེབ་བྱ་མཆན། དགེའོ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།