དཔལ་གསང་བ་འདུས་པའི་དཀྱིལ་འཁོར་གྱི་སྒྲུབ་པའི་ཐབས་རྣམ་པར་བཤད་པ།
བི་ཏ་པཱ་ད།
རྒྱ་གར་སྐད་དུ། ཤྲཱི་གུ་ཧྱ་ས་མཱ་ཛ་མཎྚ་ལ་ནོ་པི་ཀ་ཊཱི་ཀཱ། བོད་སྐད་དུ། དཔལ་གསང་བ་འདུས་པའི་དཀྱིལ་འཁོར་གྱི་སྒྲུབ་པའི་ཐབས་རྣམ་པར་བཤད་པ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །རྣམ་རྟོག་དྲ་བ་གཏན་བཅོམ་ནས། །ཟབ་ཅིང་ལེགས་པར་གསལ་བའི་སྐུ། །ཀུན་དུ་བྲོད་པའི་བརྩོན་འགྲུས་ལྡན། །འཇམ་དབྱངས་དཀྱིལ་འཁོར་ལ་བཏུད་དེ། །དཔལ་ལྡན་གསང་བ་འདུས་པ་ཡི། །དཀྱིལ་འཁོར་གྱི་ནི་ཆོ་ག་མཆོག །འཇིག་རྟེན་སྒྲོན་མ་ཞེས་བྱ་བ། །བླ་མ་བརྒྱུད་རིམ་བཞིན་དུ་བཤད། །དེ་ལ་རབ་ཏུ་བྱེད་པ་རྩོམ་པར་འདོད་པའི་རྗེ་བཙུན་འདིས། འདོད་པའི་ལྷ་མཆོད་པས་བསོད་ནམས་འཕེལ་ཞིང་བགེགས་ཀྱི་བར་ཆོད་མི་འོང་བར་བསམ་པ་རྫོགས་པར་བྱ་བའི་ཆེད་དུ་དེ་ཉིད་བྱས་ནས་ཡང་དག་པའི་ཤེས་རབ་དང་ལྡན་པ་རྣམས་འཇུག་པའི་རྒྱུ་གསུངས་སོ། །དེ་ལ་ཤེས་བྱའི་སྒྲིབ་པ་སོགས་ཞེས་བྱ་བ་ནས་བཏུད་དེ་ཞེས་པའི་བར་གྱིས་མཆོད་པ་དང་བསྟོད་པ་དང་ཕྱག་འཚལ་བའོ། །གང་གི་ཕྱིར་གོ་རིམས་བཞིན་དུ་མཉེས་ཤིང་ཡང་དག་པའི་ཡོན་ཏན་བརྗོད་པ་དང་ལུས་ངག་གིས་བཏུད་པའི་དངོས་པོ་ལ་ཤེས་པར་བྱའོ། །ཤེས་བྱའི་སྒྲིབ་པ་སོགས་ངེས་པར་གྲོལ་ཞེས་པ་ནི་ཤེས་བྱའི་སྒྲིབ་པ་ལ་སོགས་པ་ལས་དབང་བསྐུར་བ་ལ་སོགས་པའི་རིམ་པས་འོད་གསལ་བར་ཞུགས་ནས་ངེས་པར་གྲོལ་བ་ཟབ་མོའི་ངོ་བོ་སྟེ་སྦྲངས་པའོ། །མེ་ལོང་ཡེ་ཤེས་ལ་སོགས་ལྡན། །ཞེས་པ་ནི་དེའི་དུས་ན་ཀུན་གཞི་ལ་སོགས་པ་མེ་ལོང་ལྟ་བུའི་ཡེ་ཤེས་ལ་སོགས་པར་གནས་གྱུར་ཅིང་སྐུར་གསལ་བ་སྟེ་ཡི་ཤེས་སུ་དབང་བསྐུར་བ་དེས་ནི་རང་གི་དོན་ཕུན་སུམ་ཚོགས་པ་གསུངས་སོ། །གཞན་གྱི་དོན་ཕུན་སུམ་ཚོགས་པ་གསུངས་པ། འཇམ་དཔལ་གསང་བའི་འཁོར་ལོ་མཆོག །ཅེས་པ་ནི་གང་འཇམ་དཔལ་ལས་བྱུང་བའི་སྐུ་དང་གསུང་དང་ཐུགས་ཀྱི་དཀྱིལ་འཁོར་ནི་འཁོར་ལོ་མཆོག་སྟེ་སྐུ་གསུམ་གྱིས་འགྲོ་བའི་དོན་བྱེད་པ་ཡིན་ནོ་ཞེས་གསུངས་པའི་ཕྱིར་རོ། །བཏུད་ཅེས་པ་ནི་ཟབ་མོ་གསལ་བར་དགོངས་པའི་ཕྱིར་ཡིད་ཀྱིས་བཏུད་པ་ཡིན་ལ་ལུས་དང་ངག་ནི་དེའི་རྗེས་སུ་འབྲང་བའི་ཕྱིར་དེ་གཉིས་ཀྱི་ངག་ཀྱང་མཐོང་བར་བྱའོ། །རང་དྲན་ཕྱིར་དེ་ཉིད་ཅེས་པ་ནི་བློ་གྲོས་ཅན་གྱི་འཇུག་པའི་ཡན་ལག་དགོས་པ་ལ་སོགས་པ་སྟོན་ཏོ། །དེ་ལ་བདག་གིས་སམ་
གཞན་གྱིས་དྲན་པ་གང་དེ་དགོས་པའོ། །འཇམ་དཔལ་གྱི་དཀྱིལ་འཁོར་གྱི་རང་བཞིན་ནམ་རྒྱུད་ལས་ཡང་དག་པར་བསྟན་པ་ནི་བརྗོད་པར་བྱའོ། །རབ་ཏུ་བྱེད་པ་དང༌། དགོས་པ་གཉིས་ཐབས་དང་ཐབས་ལས་བྱུང་བའི་མཚན་ཉིད་ཀྱིས་འབྲེལ་པར་གནས་སོ། །དགོས་པ་བསྟན་པའི་སྟོབས་ཀྱིས་ཕྱག་རྒྱ་ཆེན་པོ་ལ་སོགས་པ་མངོན་པར་འདུ་བྱེད་པ་ནི་དགོས་པའི་དགོས་པའོ། །དེ་རྣམས་དང་ལྡན་པ་ནི་ཆོས་ཡང་དག་པའོ་ཞེས་གསུངས་པའི་ཕྱིར་རོ། །ད་ནི་སྒྲུབ་པ་པོ་དང༌། སྒྲུབ་པའི་གནས་དང༌། བསྒྲུབ་པར་བྱ་བའི་ཕུན་སུམ་ཚོགས་པ་གསང་བར་རིགས་པ་ལ། འབྲས་བུ་མངོན་དུ་བྱེད་པ་ལ་སྒྲུབ་པ་པོ་ནི་རྒྱུ་ཡིན་པའམ་གཙོ་བོ་ཡིན་པའི་ཕྱིར་དེའི་ཕུན་སུམ་ཚོགས་པ་དང་པོར་གསུངས་པ་དཔལ་ལྡན་ཞེས་ལ་སོགས་པའོ། །དེ་ལ་དཔལ་ལྡན་འདུས་པ་ཞེས་བྱ་བ་ནི་རྣལ་འབྱོར་ཆེན་པོའི་རྒྱུད་གསང་བ་འདུས་པའོ། །དེའི་ཚུལ་ཞེས་པ་ནི་གཞུང་སྟེ། གཞུང་ལུགས་ཀྱིས་བླ་མ་དམ་པ་བསྙེན་བཀུར་བ་ལས་བྱུང་བའི་ཕྱིར་རོ། །དཀྱིལ་འཁོར་ཞེས་པ་ནི་ཡིད་ཀྱིས་སམ་རྡུལ་ཚོན་གྱིས་སོ། །མན་ངག་རིམ་པ་འདི་ཡིས་ཞེས་པ་ནི་འོག་ནས་འབྱུང་བའི་རིམ་པས་བླ་མ་རྣམས་ལས་གང་ཡང་རུང་བ་ཅིག་མཉེས་པར་བྱ་སྟེ་ཆོ་ག་མ་ཚང་བ་མེད་པའི་དཀྱིལ་འཁོར་གཉིས་གང་རུང་དུ་འོག་ནས་འབྱུང་བའི་རིམ་པས་ཞུགས་ནས་ཞེས་པའི་དོན་ཏོ། །ཆུ་ལ་སོགས་པའི་ཅེས་པ་ནི་ཆུའི་དབང་དང་པོར་བྱས་པའི་ཅོད་པན་དང་རྡོ་རྗེ་དང་བདག་པོ་དང་མིང་དང་རྡོ་རྗེ་སློབ་དཔོན་དང་བརྟུལ་ཞུགས་དང་ལུང་བསྟན་པ་དང་དབུགས་དབྱུང་བ་དང་རྗེས་སུ་གནང་བ་མཐའ་བསྐུར་ཞེས་པའོ། །བླ་མས་དེ་ལ་ཞེས་པ་ནི་རྒྱུད་ལས་གསུངས་པའི་མ་ནོར་བའི་ལམ་དུ་བརྟེན་པ་པོས་བུམ་པའི་དབང་རྣམས་བསྐུར་བ་ཞེས་སྦྱར་རོ། །གསང་བའི་དཀྱིལ་འཁོར་ཞེས་པ་ནི་གོང་དུ་བསྟན་པའི་དཀྱིལ་འཁོར་དེ་ཉིད་དུའོ། །དེ་ཉིད་ཐོབ་ཅེས་པ་ནི་འོག་ནས་བསྟན་པ་རྣམས་ཐོབ་པའོ། །དངོས་གང་ཞེ་ན། གསང་དང་ཤེས་རབ་དབང་བསྐུར་བས། །ཞེས་པ་ནི་གོང་དུ་སྨོས་པ་དེ་དག་དང་བཅས་པར་གསང་བ་དང་ཤེས་རབ་ཡེ་ཤེས་ཀྱི་དབང་ཐོབ་པ་ཞེས་པའི་དོན་ཏོ། །གསང་ཤེས་ཞེས་པ་ནི་བླ་མ་བརྒྱུད་པ་ལས་འོངས་པའི་གསང་བ་དང་མཆོག་ཏུ་གསང་བ་རྡོ་རྗེའི་ཚིག་ཏུ་གཏོགས་པ་རྣམས་ཤེས་
པའོ། །རྣལ་འབྱོར་དེ་ཉིད་ཅེས་པ་ནི་ཞི་བ་ལ་སོགས་པའི་ལས་ཀྱི་བྱེ་བྲག་བསམ་གཏན་ལ་བརྟེན་པ་རྣམས་རྟོགས་པའོ། །ཐེག་པ་གསུམ་མཚམས་དེ་ཉིད་ཤེས། །ཞེས་པ་ནི་ཉན་ཐོས་དང་རང་སངས་རྒྱས་དང་ཐེག་པ་ཆེན་པོའོ། །བསམ་པ་ཐ་དད་པའི་དབྱེ་བ་སོ་སོར་བསྟན་པའོ། །འོན་ཀྱང་ཐེག་པ་མང་པོ་རྣམས་ནི་སེམས་ཐ་དད་པའོ། །ཇི་སྐད་དུ་ལང་ཀར་གཤེགས་པ་ལས། ལྷ་དང་ཚངས་པའི་ཐེག་པ་ནི། །ཉན་ཐོས་རྣམས་ཀྱི་དེ་བཞིན་དང༌། །རང་རྒྱལ་དེ་བཞིན་གཤེགས་པ་དང༌། །ཐེག་པ་ཆེ་དག་བདག་གིས་བསྟན། །སེམས་ནི་ཇི་སྲིད་ཡོད་ཀྱི་བར། །ཐེག་པའི་མཐའ་ལ་ཐུག་པ་མེད། །ཅེས་གསུངས་པའི་ཕྱིར་རོ། །འདིར་འཇིག་རྟེན་ལས་འདས་པའི་ཐེག་པ་གསུམ་གྱིས་ས་མཚམས་ཀྱི་ཁོ་ན་ཉིད་རིག་པའོ། །རིག་པ་ཞེས་པ་ནི་ཕྲེང་བའི་སྔགས་ལ་སོགས་པ་ལ་ལས་ཀྱི་བྱེ་བྲག་གིས་བསྐུལ་བ་དང་བཅས་པའི་རིག་པའོ། །སྙིང་པོ་ཞེས་པ་ནི་ཧཱུཾ་ལ་སོགས་པའི་ས་བོན་ནོ། །སྔགས་ཞེས་པ་ནི་དབྱུང་བ་དང་བསྐུལ་བའོ། །ཕྱག་རྒྱ་ཞེས་པ་ནི་ཕྱག་རྒྱ་ཆེན་པོ་ལ་སོགས་པའོ། །ཏིང་འཛིན་རིམ་པ་གསུམ་དག་དང༌། །ཞེས་པ་ནི་དང་པོ་ལ་སོགས་པ་ཡན་ལག་དང་བཅས་པ་རྟོགས་པའོ། །ཐུན་མོང་ཞེས་པ་རིག་འཛིན་ལ་སོགས་པ་སྟེ། སའི་དབང་ཕྱུག་དང་འཕགས་པ་ཉན་ཐོས་དང༌། འཇིག་རྟེན་པའི་ལྷ་ཆེན་པོ་དང་རྣལ་འབྱོར་རྒྱུད་ལ་སོགས་པ་དང་ཐུན་མོང་དུ་གྱུར་པའོ། །ཅིག་ཤོས་དངོས་གྲུབ་ཅེས་པ་ནི་ཕྱག་རྒྱ་ཆེན་པོའི་དངོས་གྲུབ་སྟེ། རྒྱུད་ཚུལ་གྱིས་ནི་རྣམ་དབྱེ་ཤེས། །ཞེས་པ་ནི་རྒྱུད་འདིའི་རིམ་པས་སྒྲུབ་པའི་ཐབས་ལ་སོགས་པའི་རྣམ་པའི་དབྱེ་བ་ཤེས་པའོ། །དམ་ལྡན་རྩ་བའི་ལྟུང་བྱེད་བཅུ་བཞི་ནི་སྤང་བར་བྱ་བའོ། །གསོང་པ་ལ་སོགས་པ་དང་བདུད་རྩི་ལ་སོགས་པ་ནི་བསྲུང་བར་བྱ་བའོ། །སྔོམ་པ་ལ་གནས་པ་ཞེས་པ་ནི་སྤོམ་པའི་ལྟུང་བྱེད་ནི་བསྲུང་བར་བྱ་བའོ། །སྤྱོད་ཡུལ་རྡོ་རྗེ་འཆང་ཆེན་པོ་ལ་སོགས་པར་བལྟ་བ་ནི་བསྲུང་བར་བྱའོ། །ཤེས་རབ་རྣལ་འབྱོར་ལ་བརྩོན་པ། །ཞེས་པ་ནི་འདིའི་གཞུང་ལུགས་ཀྱིས་མངོན་པར་བྱང་ཆུབ་པའི་སྙིང་པོ་ཡིན་པས་ན་དེ་དང་སྦྱོར་བ་ལ་བརྩོན་ཞིང་དེའི་རྣལ་འབྱོར་ལ་གནས་པའོ། །སྔགས་རྒྱུད་སྤྱོར་བ་རབ་ཤེས་པ། །ཞེས་པ་ནི་ལེའུ་བཞི་པ་ལས་
གསུངས་པ་སྔགས་དང་འབྲེལ་པ་སྤྱོར་བ་ཞི་བ་ལ་སོགས་པའི་དབྱེ་བ་དང་བུམ་པ་རྣམས་སྟ་གོན་དུ་གནས་པ་ལ་སོགས་པ་ཤེས་པའོ། །སྔགས་དང་བསམ་གཏན་དང་རྫས་རྣམས་འབྲེལ་བའི་ཕྱིར་རོ། །སེམས་ཅན་དོན་བསྒྲུབ་འོས་པ་ཡིན། །ཞེས་པ་ནི་ལས་དེ་རྣམས་ཀྱི་སྒོ་ནས་སོ། །འོ་ན་བླ་མ་ཆེན་པོའི་ཞལ་ནས་གསུངས་པའི་སྒྲུབ་པ་པོའི་མཚན་ཉིད་ལས་གཞན་པ་ཅི་ཡིན་ནོ་སྙམ་པ་བསལ་བའི་ཕྱིར། གཏོང་བ་ཞེས་པ་ལ་སོགས་པའོ། །གཏོང་བ་ཞེས་པ་ནི་སྦྱིན་པའོ། །བརྟན་པ་ཞེས་པ་ནི་བསམ་གཏན་ནོ། །དེ་དང་པོར་བྱས་པའི་ཚུལ་ཁྲིམས་ལ་སོགས་པ་རྟོགས་པར་བྱའོ། །དེ་ཡི་ཡོན་ཏན་འདི་མཆོག་ཡིན། །ཞེས་པ་ནི་འདིའི་གཞུང་ལུགས་ཀྱིས་རྗེས་སུ་སྤྱོད་པ་ནི་ཡོན་ཏན་དུ་གསུངས་སོ། །དེ་མ་ཡིན་པར་གྱུར་ན་ལོག་པར་སྣང་བར་འགྱུར་བའི་ཕྱིར་རོ། །བརྗོད་པའི་ཡོན་ཏན་མི་ལྡན་ཞེས་པ་ནི་གོང་དུ་སྨོས་པའི་ཡོན་ཏན་རྣམས་དང་མི་ལྡན་ན་སེམས་ཅན་གྱི་དོན་མེད་པས་སྒྲུབ་པ་པོ་མ་ཡིན་ནོ། །དེ་ལྟར་ཐུན་མོང་གི་སྒྲུབ་པའི་མཚན་ཉིད་གསུངས་ནས། ཁྱད་པར་དུ་བྲི་བའི་མཚན་ཉིད་གསུངས་པ་བརྩེར་ལྡན་ཞེས་པ་ལ་སོགས་པའོ། །བརྩེར་ལྡན་ཞེས་པ་ནི་སྙིང་རྗེ་དང་ལྡན་པའོ། །བརྟུལ་ཞུགས་ཞེས་པ་ནི་བྱང་ཆུབ་ཀྱི་སེམས་མི་གཏོང་བ་ལ་སོགས་པའི་ཆོས་སུ་གསུངས་པའོ། །བཟླས་ལྡན་ཞེས་བ་ནི་རང་གི་ལྷའི་བཟླས་པ་བྱས་པས་བརྟན་པའམ་གྲུབ་པའི་མཚན་མ་མཐོང་བ་འམ་མ་ཐོབ་པ་ཞེས་པའི་དོན་ཏོ། །དད་ལྡན་ཞེས་པ་ནི་དད་པ་དང་ལྡན་པས་དམིགས་པ་ལ་མི་འཁྲུལ་པའི་ཕྱིར་རོ། །ཟབ་མོའི་དེ་ཉིད་ཤེས་ཞེས་པ་ནི་བསམ་གྱིས་མི་ཁྱབ་པའི་དངོས་པོ་ཐམས་ཅད་ཀྱི་དེ་བཞིན་ཉིད་རྟོགས་པའོ། །རང་གི་འཁོར་གནས་སྔོན་བསྙེན་པ། །བྱས་ནས་ཞེས་པ་ནི་རང་གི་དཀྱིལ་འཁོར་གྱི་འཁོར་ལོ་ལ་གནས་ནས་དང་པོའི་ལས་ཅན་གྱི་ཐུན་མཚམས་བཞིར་འོག་ནས་འབྱུང་བའི་རིམ་པས་དང་པོའི་རྣལ་འབྱོར་ལ་སོགས་པ་ཡན་ལག་དང་བཅས་པས་སྔོན་དུ་བསྙེན་པ་བྱ་ཞིང་དཀྱིལ་འཁོར་བྲི་བར་བྱ་ཞེས་པ་ནི་སློབ་མ་རྣམས་དབང་བསྐུར་བའི་དཀྱིལ་འཁོར་བྲི་བར་བྱ་བའི་དོན་ཏོ། །དེ་བཞིན་དུ་ཅུང་ཟད་ཡེ་ཤེས་ལ་དབང་ཐོབ་པ་དང་ཡེ་ཤེས་ལ་དབང་ཐོབ་པས་ཀྱང་རང་གི་འཁོར་ལོ་ལ་གནས་ནས་
ཉེ་བའི་སྒྲུབ་པ་ལ་སོགས་པ་ཡན་ལག་དང་བཅས་པ་དང་ཡི་གེ་གསུམ་གྱི་མཚན་ཉིད་བཟླས་པ་ཅན་གྱིས་ཐུན་མཚམས་བཞིར་རམ་ཉིན་མཚན་དུ་བསྙེན་པ་བྱས་ནས་ཅི་རིགས་པར་སློབ་མ་རྣམས་ལ་དབང་བསྐུར་བ་དང༌། རང་ཉིད་དངོས་གྲུབ་བསྒྲུབ་པའི་དཀྱིལ་འཁོར་བྲི་བར་བྱའོ་ཞེས་པའི་དོན་ཏོ། །གནས་ཕུན་སུམ་ཚོགས་པ་གསུངས་པ་གང་ཞིག་ཅེས་པ་ལ་སོགས་པ་ནི་གང་ཡང་རུང་བ་ཞེས་པའི་དོན་ཏོ། །ཡིད་འོད་གནས་སུ་ཞེས་པ་ནི་མེ་ཏོག་ལ་སོགས་པས་ཡིད་དགའ་བའི་ཡུལ་ཐམས་ཅད་ཡིན་ནོ་ཞེས་པའི་དོན་ཏོ། །ཡང་ན་གང་ཡང་རུང་བའི་གནས་སུ་སྔོན་དུ་བསྙེན་པ་བྱས་ནས་ཡིད་དུ་འོང་བའི་གནས་སུ་དཀྱིལ་འཁོར་བྲིའོ་ཞེས་གཞན་དག་ཀྱང་བཤད་དོ། །གོང་དུ་གསུངས་པའི་གནས་དེ་ཕྱི་བའི་ཚུལ་གྱིས་དག་པར་བྱ་བ་གསུངས་པ། ཙནྡན་མཆོག་ལ་སོགས་པས་བྱུག །ཅེས་པ་ནི་དེར་སྟེགས་བུ་གྲུ་བཞིར་བྱས་པ་རྣམ་པར་སྣང་མཛད་ལ་སོགས་པའི་ངོ་པོ་ཙནྡན་ལ་སོགས་པས་བྱུགས་ཤིང་དྲི་ཞིམ་པོའི་མེ་ཏོག་ཁ་དོག་དང་དབྱིབས་སྣ་ཚོགས་པ་ཡང་ཀུན་དུ་དགྲམ་པར་བྱའོ་ཞེས་པའི་དོན་ཏོ། །ད་ནི་སྔོན་དུ་བསྙེན་པ་བྱས་ནས་སུ། །ཞེས་པ་ནི་དེ་ལ་བསྙེན་པའི་རང་བཞིན་ལ་དང་པོ་རྣལ་འབྱོར་གསུངས་པ་ནང་པར་ཞེས་པ་ལ་སོགས་པའོ། །ནང་པར་ཞེས་པ་ནི་སྒྲུབ་པ་པོ་ཕལ་ཆེར་དེའི་དུས་སུ་གཡེང་བ་དང་བྲལ་བའི་ཕྱིར་རོ། །ཡང་ན་བྱིས་པས་བསྐལ་པའི་རྣལ་འབྱོར་བ་ཁྱད་པར་དུ་དལ་བའི་དུས་ཡིན་ནོ། །ཡང་ན་ཐུན་མཚམས་ཀྱི་དང་པོ་ཡིན་པའི་ཕྱིར་ཡང་གསུངས་སོ། །ཤར་བལྟས་འདུག་ནས་ནི་ཞེས་པ་ནི་རང་གི་ལྷ་དང་མཐུན་པར་བྱ་བའི་ཕྱིར་བདེ་བའི་སྟན་ལ་རྡོ་རྗེ་སྐྱིལ་མོ་ཀྲུང་གིས་འདུག་ནས་ནི་ཞེས་པའོ། །རྣམ་པར་ཐར་པའི་སྒོ་དག་ཅེས་པ་ནི་སྟོང་པ་ཉིད་ལ་སོགས་པས་སྙིང་པོའི་ས་བོན་ལ་སོགས་པ་དག་བའི་ཕྱིར་རོ། །དེ་ཅིའི་ཕྱིར་ཟབ་མོ་དང་གསལ་བའི་ངང་གིས་སེམས་དག་པར་འགྱུར་བའི་དོན་དུ་སྟོང་ཉིད་ལ་སོགས་པ་ནི་ཐམས་ཅད་དུ་རྟོགས་པར་བྱའོ། །རང་སྙིང་ཟླ་བར་འོད་འབར་མཾ། །ཞེས་པ་ནི་སྨོན་ལམ་གྱི་དབང་གིས་ཚད་མེད་བཞིའི་སྐུ་ཡིན་པར་བཀའ་སྩལ་ལོ། །དགེ་བ་འཕེལ་ཕྱིར་ཞེས་པ་ནི་རས་ཤིན་ཏུ་དཀར་པོས་ཚོན་འཛིན་པ་དང་འདའ་བར་དགེ་བ་འཕེལ་བས་དཀྱིལ་འཁོར་ལོར་འཇུག་པར་
འགྱུར་བའི་དོན་ཏོ། །གཤེགས་པ་ལ་སོགས་རབ་ཏུ་བྱ། །ཞེས་པ་ནི་འོག་ནས་འབྱུང་བའི་རིམ་གྱིས་རབ་ཏུ་བྱའོ་ཞེས་པའི་དོན་ཏོ། །ཇི་ལྟར་བྱ་ཞེ་ན། རྟེན་གསུངས་པའི་ཕྱོགས་བཅུ་ཞེས་པ་ལ་སོགས་པའོ། །ཆོ་ག་བཞིན་དུ་ཞེས་པ་ནི་མཆོད་པ་པོ་དང་མཆོད་པ་དང་མཆོད་པའི་གནས་གསུམ་ཡང་རྨི་ལམ་བཞིན་དུ་དོན་མེད་པར་མཉམ་པ་ཉིད་དུ་རྟོགས་པའོ། །རང་གི་ལོག་རྟོག་ཅེས་བྱ་བ་ནི་གཟུང་བ་དང་འཛིན་པའི་རྣམ་པར་རྟོག་པའོ། །དེ་ལས་བྱུང་བ་ནི་ཉེས་བྱས་ཞེས་ཏེ་མཚམས་མེད་པ་ལྔ་ལ་སོགས་པ་དུས་གསུམ་དུ་བྱས་པ་རྣམས་ཞེས་པ་གོང་དུ་སྨོས་པའི་རྟོག་པས་སྲིད་པའི་རྒྱུན་ལ་སོགས་པ་རྣམས་སོ། །རྨི་ལས་རྨི་ལམ་སོགས་ཞེས་པ་ནི་རྨི་ལམ་དང་པོར་བྱས་པའི་སྒྱུ་མ་ལ་སོགས་པ་བཞིན་དུ་དོན་མེད་པར་བྱའོ་ཞེས་པའི་དོན་ཏོ། །ལན་གསུམ་ཞེས་པ་ནི་གཤེགས་པ་པོ་དང་གཤེགས་བྱ་དང་གཤེགས་པ་གསུམ་མཉམ་པ་ཉིད་དུ་རྟོགས་པའོ། །རྫོགས་སངས་ཞེས་པ་ནི་རྟག་པ་ལ་སོགས་པའོ། །སྲས་མཆོག་ཅེས་པ་ནི་སའི་སྙིང་པོ་ལ་སོགས་པའོ། །འཕགས་པ་ཞེས་པ་ནི་བདུད་རྩི་འཁྱིལ་པ་ལ་སོགས་པའོ། །གཞན་ཞེས་པ་ནི་བཛྲ་ཧེ་རུ་ཀ་ལ་སོགས་པའོ། །དགེ་བ་དམ་པ་གང་ཞེས་པ་ནི་ངན་པར་བསྙིལ་བར་བྱེད་པ་དེ་ཟབ་མོ་དང་གསལ་བར་སྤྱོད་པའོ། །དེ་མ་ལུས་པར་བདག་གིས་ཡི་རང་ཞིང་བདག་གིས་བྱ་བའོ། །རྫོགས་བྱང་ཆུབ་ཏུ་རྗེས་བསྔོ་བགྱི། །ཞེས་པ་ནི་དགེ་བའི་རྩ་བ་དེ་དག་ཀྱང་གསང་སྔགས་ཀྱི་བྱང་ཆུབ་ཏུ་བསྔོ་བོར་བྱའོ། །སེམས་ཅན་ཀུན་གྱི་དབུགས་འབྱིན་པ། །ཞེས་པ་ནི་གཡང་སའི་ལམ་ལས་སྒྲོལ་བར་བྱེད་ཅེས་པའོ། །སངས་རྒྱས་ཀུན་ལ་ཞེས་པ་ནི་མདུན་ན་བཞུགས་པ་ལའོ། །གསོལ་བ་བཏབ་པར་བྱ་སྟེ། ཇི་ལྟར་གདབ་པར་བྱ་ཞེ་ན་ནམ་མཁས་ཀུན་དུ་ཁྱབ་པ་ལྟང་བསྟན་པས་ཀྱང་འཇིག་རྟེན་གྱི་ཁམས་ཀུན་དུ་རྒྱས་པར་མཛོད་ཅིག་ཅེས་པའི་དོན་ཏོ། །ཀུན་དུ་རྟོག་པ་མ་ལུས་དག་འགྱུར་ཞིང༌། །ཞེས་བ་ཟབ་མོའི་ངོ་བོའོ། །ཞེས་བ་ཟབ་མོའི་ངོ་བོའོ། །རང་རིག་དགའ་བ་ཐུགས་ཆུད་ལ། །ཞེས་པ་ནི་ཡང་དག་པར་གསལ་བའོ། །དེའི་ལས་གསུངས་པ་བདག་གཞན་དོན་གྱི་འབྲས་སྩོལ་ཞེས་པའོ། །སེམས་མཆོག་མ་ལུས་ཞེས་པ་ནི་བྱང་ཆུབ་སེམས་དཔའ་རྣམས་སོ། །ལུང་ཤེས་པ་ནི་གཟིངས་དང་འདྲ་བའི་ཆོས་སོ། །རྟག་པ་ཡིས་ཞེས་པ་ནི་བསམ་གྱིས་
མི་ཁྱབ་པའི་རང་བཞིན་ནོ། །དམ་པའི་ཕུན་སུམ་ཚོགས་པའི་རྟེན། །ཞེས་པ་ནི་བྱང་ཆུབ་སེམས་དཔའ་རྣམས་ཀྱིས་ཆོས་ཀྱི་དེ་ཁོ་ན་ཉིད་བསྒོམས་པ་ལས་དེ་བཞིན་གཤེགས་པའི་ཕུན་སུམ་ཚོགས་པ་དེ་ལས་འབྱུང་བའི་ཕྱིར་རོ། །མི་ལྡོག་དབུགས་འབྱིན་ཐོབ་འགྱུར་ཞིང་། །ཞེས་པ་ནི་གང་གསང་བའི་དབང་བསྐུར་བ་ལ་སོགས་པས་ཆོས་དང་བྲལ་ཞིང་འབྲོག་དགོན་པ་ལས་དབུགས་འབྱིན་པ་ཐོབ་པ་སྟེ། རྒྱུ་མཐུན་ལ་སོགས་འབྲས་བུར་ལྡན། །ཞེས་པ་ནི་ལོངས་སྤྱོད་པ་བཞི་དང་རྟོག་པ་ཉིད་དུ་ལྡན་པའོ། །ཐུབ་དབང་སྲས་ཀྱི་ལམ་གྱི་མཆོག །ཅེས་པ་ནི་ཕ་རོལ་ཏུ་ཕྱིན་པ་བཅུའོ། །མཐའ་ཡས་མཆོག་གི་སྤྱོད་ཤེས་པ། །ཞེས་པ་ནི་དེ་ཉིད་སངས་རྒྱས་ཀུན་གྱི་བདག་ཉིད་དཀྱིལ་འཁོར་འཁོར་ལོའི་རང་བཞིན་གྱི་བློ་གཤེགས་ཤིང་དེ་ལ་བརྟེན་པ་ཡིན་ནོ། །བླ་མ་ཆེན་པོའི་ཞལ་སྔ་ནས་བྱང་ཆུབ་ཏུ་སེམས་བསྐྱེད་པ་གུད་དུ་གསུངས་སོ། །རྗེ་བཙུན་གྱི་དགོངས་པ་ནི་སྨོན་པ་ཉིད་ལམ་གྱིས་འགྲུབ་པས་གུད་དུ་མ་ཕྱུང་སྟེ་འདི་ཉིད་དུ་འདུས་པར་གསུངས་པའོ། །དེ་ལྟར་བསོད་རྣམས་ཀྱི་ཚོགས་རྫོགས་པར་བྱས་ནས་ཡེ་ཤེས་ཀྱི་ཚོགས་ཀྱི་དོན་དུ་འཇུག་པ་བྱང་ཆུབ་སེམས་གསུངས་པའི་སྒྲིབ་པ་ཐམས་ཅད་ཅེས་པ་ལ་སོགས་པའོ། །སྒྲིབ་པ་ཐམས་ཅད་ཡང་དག་སེལ། །ཞེས་པ་ནི་ཤེས་བྱའི་སྒྲིབ་པ་ལ་སོགས་པ་བག་ཆགས་དང་བཅས་པ་བསལ་ཏེ་སྤངས་པའོ། །ཡེ་ཤེས་མཐའ་ཡས་བདུད་རྩིའི་གནས། །ཞེས་པ་ཀུན་གཞི་ལ་སོགས་པ་གནས་གྱུར་ཅིང་མེ་ལོང་ལ་སོགས་པ་བདུད་རྩི་ཐོབ་པར་བྱེད་པ་ཡེ་ཤེས་རང་གི་དོན་ཏོ། །གཞན་གྱི་ངོན་ནི། འཁྲུལ་བའི་བྱ་བ་རབ་རྟོགས་ཕྱིར། །ཞེས་པ་ནི་སྲིད་པ་གསུམ་དུ་ཡོངས་སུ་བྱིང་བའི་སེམས་ཅན་རྣམས་ལུས་དམ་པར་བལྟ་བ་ལ་སོགས་པས་ཟིན་པ་རྟོགས་ནས་ཞེས་པའི་དོན་ཏོ། །བྱང་ཆུབ་ལ་ཡིད་བཀོད་པར་བྱ། །ཞེས་པ་ནི་སྙིང་རྗེ་བསྐྱེད་པའོ། །དེའི་དོན་ནི་སྒྲིབ་བ་རྣམས་བསལ་ཏེ་ཡེ་ཤེས་བདུད་རྩི་ལྟ་བུ་མངོན་དུ་བྱས་ནས་སེམས་ཅན་སྡུག་བསྔལ་དང་སྡུག་བསྔལ་གྱི་རྒྱུ་ལས་སྒྲོལ་བར་བྱའོ་སྙམ་པའི་སྙིང་རྗེ་ཆེན་པོ་བསྐྱེད་པའི་བསམ་པས་འོག་ནས་འབྱུང་བའི་དོན་དམ་པ་བྱང་ཆུབ་ཀྱི་སེམས་བསྒོམ་པར་བྱའོ་ཞེས་བྱ་བའི་དོན་ཏོ། །བྱང་ཆུབ་སེམས་ལས་སངས་རྒྱས་ཉིད། །
ཅེས་པ་ནི་རྒྱུ་དང་འབྲས་བུའི་ཚུལ་ལོ། །རྒྱུ་དང་འབྲས་བུར་མ་ཆགས་ཉིད། །ཅེས་པ་ནི་གཞན་གྱིས་བརྟགས་པའི་དབང་ཕྱུག་ལ་སོགས་པའི་རྒྱུ་ལ་མ་ཆགས་པ་སྟེ་མཚན་མ་མེད་པའོ། །འབྲས་བུ་ནི་རྒྱལ་རིགས་ལ་སོགས་པ་དེ་དང་ཕྱུག་པ་ལ་སོགས་པ་དེའི་ངོ་བོ་ལ་མ་ཆགས་པ་སྟེ་སྨོན་པ་མེད་པའོ། །སོ་སོ་རང་ཉིད་ཆོས་ཉིད་ཕྱིར། །ཞེས་པ་ནི་ཆོས་ཐམས་ཅད་གཟུང་འཛིན་གྱི་རང་བཞིན་དང་བྲལ་བའི་ཆོས་ཉིད་ཡིན་པའི་ཕྱིར་སྟོང་པ་ཉིད་དེ་དེའི་བདག་ཉིད་ནི་བདག་ཡིན་ནོ་ཞེས་བསྒོམ་པར་བྱས་ནས་སྔགས་འདིས་བརྟེན་པར་བྱའོ། །ཨོཾ་ཞེས་པ་ནི་བསམ་གྱིས་མི་ཁྱབ་པའི་ལྷའི་སྐུའི་བདག་ཉིད་དོ། །ཤཱུ་ཉ་ཏཱ་ཉིད་ཛྙཱ་ནའོ། །དེ་ཉིད་བཛྲ་སྟེ་སྭ་བྷཱ་བ། དེ་ཨཱཏྨ་ཀོ་ཧཾ་ཞེས་སོ། །སྔགས་དེས་བདག་དང་སེམས་ཅན་ཐམས་ཅད་ཀྱི་རང་བཞིན་དོན་དམ་པར་གཅིག་ཏུ་བྱས་ནས་ཀུན་དུ་དེ་ཁོ་ན་ཉིད་གསུམ་གྱི་ཡི་གེ་ཧོ་གཉིས་ཀྱི་བར་དུ་གནས་པ། ཟླ་བའི་སྟེང་དུ་གནས་པར་བསམ། །ཞེས་པ་བརྒྱུད་པ་ལ་ས་འོངས་པའོ། །དེ་ལྟར་ཚོགས་རྫོགས་པར་བྱས་ནས་བགེགས་ཀྱི་ཚོགས་དགག་པའི་དོན་དུ་སྲུང་བའི་འཁོར་ལོའི་གཙོ་བོའི་ངེས་པ་གསུངས་པ། ཧཱུཾ་མཛད་ལ་ཞེས་པ་སོགས་པའོ། །ཧཱུཾ་མཛད་ནི་ཁམས་གསུམ་རྣམས་པར་རྒྱལ་བའོ། །གཙུག་ཏོར་དག་ཅེས་པ་ནི་འཁོར་ལོས་སྒྱུར་བ་ལ་སོགས་པ་བདུན་གང་ཡང་རུང་བའོ། །རྟོག་པ་ལ་སོགས་པ་ཞེས་པ་ནི་བདེ་བར་གཤེགས་པ་དྲུག་གོ །ཁོ་བོ་འཁོར་ལོ་གནས་བསྲུང་ཕྱིར། །ཞེས་པ་ནི་རྩིབས་བཅུ་ལ་གཤིན་རྗེ་གཤེད་ལ་སོགས་པ་རྫོགས་པའི་ཏིང་ངེ་འཛིན་གྱིས་བསྒོམས་ནས་ཐེག་པ་ཆུང་དུ་རྣམས་ལ་བྱང་ཆུབ་བར་བསུང་བར་བྱ་བའི་ཕྱིར་རོ་ཞེས་པའི་དོན་ཏོ། །དེའི་དོན་ནི་འདི་ལྟ་སྟེ། རང་གི་མདུན་དུ་ཉི་མ་ལ་གནས་པའི་ཧཱུཾ་ལས་བྱུང་བའི་རྡོ་རྗེ་འོད་འབར་བས་ཕྱོགས་བཅིང་པ་དང་མཚམས་བཅད་པ་དང་གཟིར་བར་དང་རྡོ་རྗེས་ཁྱབ་པར་བྱས་པའི་ས་གཞི་བསྒོམ་ནས། དེའི་དབུས་སུ་ཇི་སྐད་དུ་གསུངས་པའི་བསྲུང་བར་བྱ་བའི་དོན་དུ་བསྒོམ་པར་བྱའོ་ཞེས་པའི་དོན་ཏོ། །དེ་ནས་ཆོས་ཀྱི་དབྱིངས་བསམ་སྟེ། །ཞེས་པ་ནི་སྲུང་བའི་འཁོར་ལོའི་གཙོ་བོ་རྡོ་རྗེ་འཆང་ཆེན་པོར་གནས་གྱུར་ནས་དེ་ལས་གྱུར་པའི་ཆོས་ཀྱི་འབྱུང་གནས་ཀྱི་ཕྱག་རྒྱ་བསྒོམ་པར་བྱའོ་ཞེས་
པའི་དོན་ཏོ། །དབྱངས་ཡིག་མཚན་དང་ཡང་དག་ལྡན། །ཞེས་པ་ལ་སོགས་པས་ནི་འདི་སྟོན་པར་བྱེད་དོ། །ཡི་གེ་གསུམ་ནང་དུ་བཞུགས་པ་ལ་སྔོན་རྫོགས་པར་བྱེད་པའི་ཆེད་དུ་དེ་བཞིན་གཤེགས་པ་རྣམས་མངོན་དགར་གཤེགས་པར་བྱས་ནས། ཇི་སྐད་དུ་གསུངས་པའི་ཡི་གེ་བྲིང་བ་གཉིས་སུ་གྱུར་ནས་དེ་ནས་འབྱིན་པར་བྱ་སྟེ། ཡི་གེ་གསུམ་དྲངས་པ་ལ་སོགས་པའི་རིམ་པས་དབུ་མའི་ཟླ་བའི་གདན་ལ་ཟླ་བ་གཉིས་སུ་གྱུར་པ་ནི་བརྒྱུད་པའོ། །ཡེ་ཤེས་ཟླ་བ་གཉིས་གཅིག་ཏུ་གྱུར་པ་མཉམ་པ་ཉིད་ཀྱི་ཡེ་ཤེས་ཀྱི་ཟླ་བ་བསྒོམ་པར་བྱའོ་ཞེས་པའི་དོན་ཏོ། །སྤྲུལ་པས་འགྲོ་བའི་དོན་བྱས་ནས། །ཞེས་པ་ནི་ས་བོན་གྱི་འོད་ཟེར་ལས་འཕྲོས་པའི་བདེ་བར་གཤེགས་པ་རྣམས་ཀྱིས་སེམས་ཅན་རྣམས་སངས་རྒྱས་པར་བྱས་ས་བོན་ལ་ཐིམ་སྟེ། བདག་ཉིད་དེ་ཡིད་རྒྱལ་ལྡན། །ཞེས་པ་ནི་ཇི་ལྟར་དེ་བཞིན་གཤེགས་པ་དེ་དག་དེ་ལྟར་བདག་གི་རང་བཞིན་ཞེས་པའི་དོན་ཏོ། །སྐུ་དང་ཞལ་མཆོག་ཅེས་ཟླ་འདྲ། །ཞེས་པ་ལ་སོགས་པ་ནི་སྟོན་པར་བྱེད་དེ། ས་བོན་གྱི་འོད་ཀྱིས་དེ་བཞིན་གཤེགས་པ་རྣམས་རྡོ་རྗེ་སེམས་དཔར་བྱས་ནས་ས་བོན་ལ་བཅུག་སྟེ་གནས་པ་ལས་རྣམ་པའི་མཆོག་ཐམས་ཅད་དང་ལྡན་པའི་རྡོ་རྗེ་སེམས་དཔར་བསྒོམ་མོ་ཞེས་པའི་དོན་ཏོ། །དེ་ནས་འདོད་ཆགས་ཆེན་པོ་ཡིས། །ཞེས་པ་ལ་སོགས་པས་འགྲོ་བ་རྣམས་དཀྱིལ་འཁོར་གྱི་འཁོར་ལོའི་སྣོད་དུ་རུང་བར་བྱ་བ་སྟོན་ཏོ། །དེ་ལ་འདོད་ཆགས་ཆེན་པོ་ཡིས། །འདུལ་བའི་འཇིག་རྟེན་ཞེས་པ་ནི་གང་ན་གཉིས་ཀྱིས་གཉི་སྤྲོད་པའི་འདོད་ཆགས་སོ། །འགྲོ་བ་དབུགས་དབྱུང་ཕྱིར་ནི་ཞེས་པ་སྣོད་དུ་རུང་བར་བྱ་བའི་ཕྱིར་རོ་ཞེས་དགོངས་པའོ། །དབུགས་འབྱིན་འགྲོ་བ་དེ་མཐོང་ཞེས་པ་ནི་དབང་བསྐུར་བས་དེ་རྣམས་སྣོད་དུ་རུང་ཞིང་ཟླ་བར་ཞུ་བ་དེ་མཐོང་ནས་ཞེས་པའོ། །དེ་ཡི་དངོས་བྱུང་ས་བོན་གྱིས། །སེམས་ཅན་ཐམས་ཅད་བསྐྱེད་ནས་ཞེས་པ་ལ་སོགས་པ་ནི་རང་གི་རང་བཞིན་ལས་བྱུང་བ་དང༌། ཆོས་ཀྱི་རང་བཞིན་ལས་བྱུང་བ་སྟེ། དེ་ཡང་རྣམ་པར་དབྱེ་བའི་དབང་དུ་བྱས་ནས་མིག་ལ་སོགས་པ་རྣམས་བསྐྱེད་པའི་དང་རྣམ་པར་དག་པའི་དབང་དུ་བྱས་ནས་ཟླ་བ་ཞུབ་པ་ལས་ས་བོན་ལས་ཕྱག་མཚན་ས་བོན་གྱིས་མཚན་པ་དེ་ལས་སའི་སྙིང་པོ་ལ་
སོགས་པ་ཀུན་འདུས་པར་བྱས་ནས་བློའི་ཕྱི་རོལ་དུ་སེམས་ཅན་ཐམས་ཅད་སྤྲོས་ནས་དབྱུང་བར་བྱའོ་ཞེས་སོ། །ས་བོན་གྱིས་དབྱུང་བར་བྱའོ་ཞེས་པ་ནི་སྐབས་མི་ཤེས་པའོ། །འཇུག་པའི་བློ་ཡིན་པའི་ཕྱིར་མན་ངག་གཞན་ཇི་སྐད་བཤད་པའི་ཕྱིར་རོ། །བླ་མ་ཆེན་པོའི་ཞལ་སྔ་ནས་ཀྱང་སྐྱེད་པར་བྱེད་པའི་དོན་དུ་གསུངས་ཀྱི། སྤྲོ་བར་བྱེད་པ་ནི་མ་ཡིན་ནོ། །དེ་ལྟར་མ་ཡིན་ནས་བོན་མཐའ་ཡས་པར་ཐུག་པ་མེད་པའི་ཕྱིར་རོ། །ཕྱི་གནས་པའི་ཞེས་པ་ནི་སྐྱེ་མཆེད་ཀྱི་དབང་དུ་བྱས་པའོ། །ཕྱི་ནང་བདག་ཉིད་ཅེས་པ་རྒྱུད་ཀྱི་དབང་དུ་བྱས་པའོ། །འགྲོ་བའི་ཆོས་བདག་ཉིད་ཅེས་པ་ནི་ས་ལ་སོགས་པ་དག་དེ་བཞིན་ཉིད་དང་འདྲེས་པའོ། །ཨོཾ་ཨཱཿ་ཧཱུཾ་ཞེས་པ་འདིས་དེའི་སེམས་ཤེས་པ་ལ་སོགས་པས་ནི་ཆུང་དུའི་རྒྱུ་མཐུན་པའི་འབྲས་བུའི་གསུངས་སོ། །རྒྱུ་མཐུན་ཆུང་དུ་དག་ཕྱིར་རོ། །ཞེས་པ་ནི་ཞུ་པ་ལ་སོགས་པ་རིམ་པས་ལྷའི་སྐུར་སྣང་བར་བྱེད་པའི་ཕྱིར་རོ། །འབར་བའི་འདོད་ཆགས་མེ་དེས་ནི། །ཞེས་པ་ནི་འདོད་ཆགས་ཆེན་པོ་ལྡན་པའི་ཕྱིར་རིག་མ་སྐུ་མདོག་དམར་པོར་འགྱུར་བའི་སྟོབས་ཀྱིས་ཆུ་སྐྱེས་ཀྱི་ནང་དུ་ཆུད་པའི་ཡི་གེ་ལྔ་འོད་དུ་ཞུ་བ་ལས་དེའི་འོད་དམར་པོ་འཕྲོས་པས་སྐུ་གཉིས་ཏེ་ཡབ་ཡུམ་ཡང་འོད་དུ་ཞུ་ནས་བྱང་ཆུབ་སེམས་སུ་གནས་པ་ཅེས་པའི་དོན་ཏོ། །བཤེས་གཉེན་མཆོག་ལྟར་ཕྱོགས་ལྷ་མོ། །ཞེས་པ་ནི་དགེ་བའི་བཤེས་གཉེན་གྱི་ངོ་བོ་རྟེན་འབྲེལ་གྱི་ཚུལ་དུ་ལྷ་མོ་རྣམས་ཀྱིས་གླུས་གསོལ་བ་འདེབས་པར་བསྐུལ་ཞེས་སོ། །ས་བོན་བསྒོམས་པའི་རྗེས་ལ་བྱམས་པ་ལ་སོགས་བསྒོམ་པས་འདིར་ཤི་བར་མི་འགྱུར་ཏེ་ཆོས་ཀྱི་དབྱིངས་སྣང་བར་འགྱུར་རོ། །དེ་ཡང་ཞུ་བ་ལས་འབྱུང་བའི་མཱ་མ་ཀཱི་ལ་སོགས་པས་བསྐུལ་ནས་དེ་ཉིད་དུ་ཐིམ་པར་བྱའོ་ཞེས་པ་ནི་མན་ངག་གོ །གསོལ་བ་བཏབ་པས་བསླང་བ་སྟེ། །ཞེས་པ་གླུས་བསླང་པའོ། །ཞུ་བ་བརྒྱུད་པ་ལྟར་མཐོང་ནས། །ཞེས་པ་ནི་སེམས་ཅན་གྱི་དོན་བྱེད་པ་དང་བྲལ་བའི་ཕྱིར་རོ། །དངོས་རྣམས་སྒྱུ་མ་ལྟར་རིག་ནས། །ཞེས་པ་ནི་རྒྱུ་རྐྱེན་ལ་བརྟེན་ཏེ་འབྱུང་བའི་ཕྱིར་སྒྱུ་མ་ལྟ་བུར་རིག་པར་བྱས་ནས་ཞེས་སོ། །རང་སྔགས་དོན་དུ་སླར་ཡང་འགྱུར། །ཞེས་པ་ནི་བཅུ་པ་ལས་ས་བོན་དུ་གྱུར་པ་ལ་སོགས་པའི་རིམ་པས་རྣམ་པའི་མཆོག་ཐམས་ཅད་དང་ལྡན་པའི་བྱང་ཆུབ་སེམས་དཔའ་འཇམ་པའི་
དབྱངས་ཀྱི་གཟུགས་སུ་བསྒོམ་མོ་ཞེས་པའི་དོན་ཏོ། །སྲིད་པ་ཆགས་པ་ཞེས་པ་ཀུན་རྫོབ་ཁོ་ནར་ཞེས་པས་སྲིང་བ་མཐའ་ཡས་ཞེས་གསུངས་སོ། །ཞི་བར་ཆགས་ན་ཞེས་པ་ནི་རྣམ་པ་ཐམས་ཅད་དང་བྲལ་བའི་སྣང་བ་མེད་པའོ། །བཀྲ་ཤིས་མིན་ཞེས་པ་ནི་འགྲོ་བའི་དོན་བྱེད་པ་དང་བྲལ་བའོ། །འོ་ན་ཇི་ལྟ་བུ་ཞེ་ན། །སྒྱུ་མས་བསྙེན་པ་ཡང་དག་བྱ། །ཞེས་པ་ནི་གོང་མའི་རིམ་པས་བསྙེན་པ་བྱས་ནས། ཆོས་དབྱིངས་བདག་ཉིད་ཅན་དུ་འགྱུར། །ཞེས་ཏེ་ཟབ་མོ་དང་གསལ་བའི་སྐུར་གྱུར་ཏོ་ཞེས་པའི་དོན་ཏོ། །བཤེས་གཉེན་དམ་པས་རྒྱུ་མཐུན་བྱས། །ཞེས་པ་ནི་ས་བོན་གྱི་འོད་ཟེར་གྱིས་དེ་བཞིན་གཤེགས་པ་རྣམས་འཇམ་དབྱངས་ཀྱི་སྐུར་གྱུར་པ་ནི་བཤེས་གཉེན་ཏེ། དེས་རྒྱུ་མཐུན་པ་ཞེས་བྱའོ། །རྣམ་སྨིན་ལས་ནི་ཞེས་བྱ་བ་ལ་སོགས་པས་ནི་ཆུང་དུ་རྣམ་པར་སྨིན་པའི་འབྲས་བུ་སྟོན་ཏེ། རྣམ་པར་སྨིན་པ་ཞེས་པ་ནི་དམིགས་པ་ལ་སོགས་པས་བསྐྱེད་པའི་ཕྱིར་སའི་སྙིང་པོ་ལ་སོགས་པ་སྟེ་དེ་བསྒོམ་པ་ལས་ཞེས་པའི་དོན་ཏོ། །ཀུན་མཁྱེན་བསྒྲུབ་ཅེས་པ་ནི་མིག་ལ་སོགས་པ་བཞིན་དུ་ཡུལ་སོ་སོར་ངེས་པ་མ་ཡིན་ཏེ། སའི་སྙིང་པོ་ལ་སོགས་པ་བསམ་གྱིས་མི་ཁྱབ་པ་ཡོངས་སུ་ཤེས་པའི་ཕྱིར་རོ། །མིག་ལ་སོགས་པ་བྱིན་བརླབ་ཞེས་པ་ནི་ས་བོན་ལ་སོགས་པའི་རིམ་པས་བསྐྱེད་ནས་ཞེས་པའི་དོན་ཏོ། །ཉེ་བར་སྒྲུབ་པ་ཞེས་པ་ནི་སྒྲུབ་པ་ཕྱིས་འབྱུང་བ་དང་ཉེ་བའི་ཕྱིར་རོ། །སྐྱེས་བུ་ཞེས་པ་ལ་སོགས་པ་ནི་ཆུང་དུའི་སྐྱེས་བུ་བྱེད་པའི་འབྲས་བུ་གསུངས་སོ། །སྐྱེས་བུ་བྱེད་པའི་ཞེས་པ་ནི་ཆོས་ཀྱི་སྐུ་ལ་སོགས་པའི་སྐྱེས་བུ་འགྲོ་བ་རྣམས་སྨིན་ཅིང་གྲོལ་བར་བྱེད་པ་ནི་སྐྱེས་བུ་བྱེད་པ་སྟེ་དེ་ཉིད་འབྲས་བུའོ། །དེ་གྲུབ་ཅེས་སོ། །དེ་ཉིད་གསུངས་པ། །ཆོས་དང་ལོངས་སྤྱོད་སྤྲུལ་པ་འགྲོ་བའི་དོན་དུ་མངོན་གྱུར་པ། །ཞེས་སོ། །སྒྲུབ་པའི་དོན་དུ་ཞེས་པ་ནི་སྐུ་ལ་སོགས་པ་སྐྱེས་བུ་སྐུ་གསུམ་སྒྲུབ་པར་བྱེད་པར་བྱེད་པས་ན་སྒྲུབ་པ་སྟེ་དེའི་དོན་དུའོ། །བློ་ཡིས་སྐྱེད་བྱེད་པ་ནི་ས་བོན་ལ་སོགས་པའི་རིམ་པས་བསྐྱེད་པའི་དོན་ཏོ། །འདིར་སྨྲས་པ་སློབ་དཔོན་ཆེན་པོ་སྲུང་བའི་ཞབས་ལ་སོགས་པས་སངས་རྒྱས་རྣམས་ཀྱི་སྐུ་ནི་གང་ཞེས་པ་ལ་སོགས་པའི་ཚིགས་སུ་བཅད་པ་གསང་བ་འདུས་པའི་སྒྲུབ་ཐབས་ལས་གསུངས་ན། འདིར་གང་གི་
ཕྱིར་དེ་རྣམས་མ་གསུངས་ཤེ་ན། དེའི་ཕྱིར་རྗེས་དྲན་བཅུ་དྲུག་ཅེས་པ་ལ་སོགས་སོ། །རྗེས་དྲན་བཅུ་དྲུག་ཅེས་པ་ནི་བཅུ་དྲུག་རྣམས་ཀྱི་ནང་ན་སྐུ་དང་གསུངས་ཐུགས་རྗེས་སུ་དྲན་པའོ། །དག་དོན་དུ་ཞེས་པ་ནི་བརྟེན་པའི་མཚན་མ་ཐོབ་པའི་དོན་རྟོགས་པར་བྱ་བའི་ཕྱིར་སྨོན་པ་ནི་དག་པར་བྱེད་པ་སྟེ་དེའི་དོན་དུའོ། །དེ་དག་རྣམས་ནི་བྱ་དགོས་སོ། །ཞེས་པ་ནི། སངས་རྒྱས་རྣམས་ཀྱི་སྐུ་ནི་གང༌། །ཞེས་པ་ལ་སོགས་པ་དེ་དག་བྱ་དགོས་སོ་ཞེས་བའོ། །ཐུགས་སོགས་བྱིན་གྱིས་བརླབ་པ་ལ། །ཞེས་པ་ནི་ཐུགས་སོགས་བྱིན་གྱིས་བརླབ་པའི་སྐབས་འདིར་འབྲེལ་བ་མེད་པས་མ་བརྗོད་དོ་ཞེས་སྦྱར་རོ། །དེ་ཅིའི་ཕྱིར་ཞེ་ན། སྐབས་མིན་ཕྱིར་ནི་ཞེས་གསུངས་སོ། གང་གི་ཕྱིར་ཐུགས་ལ་སོགས་པ་བྱིན་གྱིས་བརླབས་པའི་གསོལ་བ་འདེབས་པ་ནི་ཆུང་དུའི་སྒྲུབ་པ་ཁོ་ན་སྟེ། དེའི་ཕྱིར་མཚན་མ་ཐོབ་པའི་འོག་ཏུ་དེ་དང་སྤྲོ་བ་ལ་སོགས་པ་ལས་གྲུབ་པའི་རྗེས་སུ་དྲན་པ་སྟེ། དེ་ཉིད་སྐབས་འདིར་འབྲེལ་པ་མེད་པའི་ཕྱིར་རོ། །མི་འབྲེལ་ཡང་གཞན་དག་གིས་འཁྲུལ་བའི་རྒྱུ་ནི་ཐུགས་ལ་སོགས་པའི་བྱིན་གྱིས་བརླབ་པའི་ཚིག་སུ་བཅད་པ་དང་འདྲ་བར་མཐོང་བའི་ཕྱིར་རོ། །ཤེས་རབ་སྒྱུ་མའི་ཞེས་པ་ལ་སོགས་པས་ནི་ཆུང་དུའི་འབྲེལ་བའི་འབྲལ་བུ་གསུངས་སོ། །ཤེས་རབ་སྒྱུ་མ་ཞེས་པ་ནི་གནས་སྒྱུ་མ་ལྟར་སྣང་བའི་རིག་མ་སྟེ། དེའི་ལུས་འཁྱུད་ཅེས་པའོ། །དངོས་གང་ཞེ་ན། གསང་བའི་མཚན་ཉིད་གསུངས་ཞེས་ཏེ་ཐུགས་རྡོ་རྗེ་ལ་སོགས་པའོ། །དེ་མཐོང་ནས་ཞེས་པ་ནི་གནས་གསུམ་དུ་དམིགས་ནས་ཏེ། རིགས་ཀྱི་དབང་ཕྱུག་དབུ་རྒྱན་མཆོག །ཅེས་བྱ་བར་སྦྱར་རོ། །ཆུང་དུ་ཞེས་པ་ནི་ཡེ་ཤེས་མ་བྱང་ཞིང་གཡེང་བ་མ་ལུས་པ་བསལ་བར་མི་ནུས་པའི་ཕྱིར་རོ། །བྲལ་བའི་འབྲས་བུ་ཞེས་པ་ནི་དབང་བསྐུར་བའི་ཆུས་དྲི་མ་དག་པར་བྱས་པའི་འབྲས་བུ་རིགས་ཀྱི་བདག་པོར་སྣང་བའི་ཕྱིར་རོ། །སྒྲུབ་པ་ཆེན་པོར་ཞེས་པ་ནི་སྐུ་གསུམ་དུ་སྒྲུབ་པ་ནི་སྒྲུབ་པ་སྟེ། སྒྲུབ་པ་ཡིན་ཡང་ཁམས་གསུམ་གྱི་ཆོས་ཀྱི་རྒྱལ་པོའི་དབང་མ་ཐོབ་ན་དམ་པ་ཡང་དག་པར་རྫོགས་པའི་སངས་རྒྱས་མ་ཡིན་པས་ན་དབང་བསྐུར་བ་ནི་སྒྲུབ་པ་ལས་ཁྱད་པར་དུ་འཕགས་པའི་ཕྱིར་ཆེན་པོའོ། །དེ་བཞིན་འབྲིང་ལ་ཞེས་པ་ལ་སོགས་པས་འབྲིང་པོའི་འབྲས་བུ་བཞི་བསྡུས་སོ། །དེ་བཞིན་ཞེས་པ་ནི་འཇམ་པའི་
དབྱངས་བཞིན་དུ་ཤེས་སོ། །འབྲིང་ལ་ཞེས་པ་ནི་ཆུང་དུ་དང་ཆེན་པོ་བ། ཉིས་ཀྱི་བར་ན་གནས་པས་ན་འབྲིང་པོའི་སྒྲར་གསུངས་སོ། །རང་འོད་ཀྱི་རིག་མ་དམིགས་པ་ཙམ་འབྲིང་པོའི་བསྙེན་པའོ་ཞེས་བརྗོད་པ་ནི་སྐབས་མི་ཤེས་པའོ། །ཆུང་དུའི་དུས་སུ་དེ་ཉིད་མཐོང་བའི་ཕྱིར་རོ། །དེ་ལྟ་ན་ནི་མཐུན་པའི་ཕྱོགས་འབྲིང་པོ་རྟག་པ་ཉེད་དུ་འགྱུར་བའི་ཕྱིར་ཏེ། བླ་མ་ཆེན་པོའི་ཞལ་སྔ་ནས་ཀྱང༌། གུད་དུ་བསྐྱེད་པར་གསུངས་ཀྱི་མཐོང་བ་ནི་མ་ཡིན་ནོ་ཞེས་གསུངས་སོ། །དེ་བས་ན་འདི་ན་ཡང་ཟླ་བ་གཉིས་པས་འགྲུབ་པ་ལ་སོགས་པ་འགྲོ་བའི་དབང་བསྐུར་བ་མ་གཏོགས་པ་རྒྱུ་མཐུན་པ་ལ་འབྲས་བུ་ལ་སོགས་པ་རྣམས་བསྐྱེད་པར་བྱས་ནས་དེའི་རྗེས་ལ་ཞེས་པ་ནི་དེ་མ་ཐག་ཏུ་ཞེས་པའི་དོན་ཏོ། །སོ་སོར་ནི་ཞེས་པ་ནི་སྤྱི་བོ་ལ་སོགས་པར་རོ། །སངས་རྒྱས་ལྔ་ཡི་བཀང་བྱས་ཏེ། །ཞེས་པ་ནི་སངས་རྒྱས་ཀྱི་ངོ་བོ་ཉིད་ཆ་ཤས་ཏེ། ཡི་གེ་དང་མཚན་མ་སྐུ་རྣམས་གང་ཡང་རུང་བའོ། །ཧཱུཾ་ཨཱཿ་ཞེས་པ་ལ་སོགས་པས་གསུང་བའི་གནས་གཉིས་དག་པར་བྱས་ནས། དེ་ནས་གདོང༌། རང་འོད་རིག་མ་དག་པར་བྱས། །ཞེས་ཏེ་ཕྱི་རོལ་གྱི་བུད་མེད་ནི་བདེ་མཆོག་གི་རྐྱེན་མ་ཡིན་པའི་ཕྱིར་རང་རང་གིས་བོན་གྱི་འོག་ཀྱིས་གནས་སྐབས་ལྔ་དང་ལྡན་པར་གྱུར་པ་བསྐུལ་ནས་རང་གི་རིམ་པ་ལ་ཐིམ་པས་དག་པར་བྱ་ཞེས་སོ། །འགྲོ་བའི་ཤེས་པ་དག་པའི་ཕྱིར། །ཞེས་པ་ནི་ཕྱིན་ཅི་ལོག་གི་ཞེ་སྡང་ལ་སོགས་པ་རྣམས་ཞེ་སྡང་ཆེན་པོ་ལ་སོགས་པ་དག་པར་བྱེད་པའི་ཕྱིར་རོ། །ཐ་དད་རིམ་གྱིས་ཞེས་པ་ནི་རིམ་པ་ནས་དབྱུང་བར་བྱའོ་ཞེས་སོ། །ཅིག་ཅར་རིན་མ་ཡིན་ནོ། །དངོས་བོ་ཀུན་ཞེས་པ་ནི་ཕྱག་མཚན་ལ་སོགས་པ་ཀུན་ནོ། །གཞོན་ནུའི་ཞལ་འདྲ་ཞེས་པ་ནི་གཡས་གཡོན་འཇམ་པའི་རྡོ་རྗེ་ལྟ་བུ་ཞེས་པའི་དོན་ཏོ། །མཁས་བསྐྱེད་ཅེས་པ་ལ་མཁས་པ་ནི་རྣལ་འབྱོར་པའོ། །དེས་བསྐྱེད་པའོ། །སྙིང་རྗེ་ཐབས་ཀྱིས་དོན་སྦྱིན་མ། །ཞེས་པ་ནི་ཁྱད་པར་གྱི་ལས་དེ་དང་འབྲེལ་པ་ལ་དེ་སྩོལ་ཞེས་པའི་དོན་ཏོ། །རོལ་པ་ཞེས་པ་ནི་ཐབས་ཀྱིས་དགྱེས་པར་སྤྱོད་པ་སྟེ་དེ་ལ་རབ་ཏུ་བྲོད་པའི་སེམས་སུ་གནས་པའོ། །བསམ་དག་པ་ཞེས་པ་ཡོངས་སུ་དག་པའི་བསམ་པ་སེམས་ཅན་རྣམས་ལ་སྟོན་པའོ། །ཡིད་དགའ་མ་ཞེས་པ་ནི་བརྩོན་པ་ལ་དགའ་བའོ། །ཕྱག་མཚན་ལྷག་
མ་རང་དགའ་འདྲ། །ཞེས་པ་མཱ་མ་ཀཱི་དང་སྒྲོལ་མའིའོ། །གཞན་ནི་ཐམས་ཅད་དོ། །གཞན་དག་ནི་སྒྲོལ་མའི་གཡས་གཉིས་པ་ན་འཁོར་ལོ་ཞེས་སོ། །འཇོམས་པ་ནི་རིམས་ལ་སོགས་པའོ། །མི་བཟད་ཅེས་པ་ནི་ཞལ་དགོང་པ་ལ་སོགས་པའོ། །རང་བདག་ལྟ་དང་ཉོན་མོངས་འཇོམས།། ཞེས་པ་ནི་ཉོན་མོངས་པ་རྣམས་ནི་བདག་ཏུ་ལྟ་བ་སྔོན་དུ་འགྲོ་བས་དེ་བཅོམ་པ་ཞེས་པའོ། །བགེགས་འཇོམས་པ་ཞེས་པ་ནི་རིམས་ཀྱི་གནོད་པ་ལ་སོགས་པ་འཇིག་རྟེན་དང་འཇིག་རྟེན་ལས་འདས་པའི་སྤྱོད་ཡུལ་དེས་བཅོམ་པ་ཡིན་ནོ། །མི་བཟད་སྤྲུལ་གྱིས་བརྒྱན་པའི་སྐུ། །ཞེས་པ་ནི་ཁོང་ཁྲོ་པ་ལ་སོགས་པ་རྣམ་པར་དག་པ་མཐའ་ཡས་ལ་སོགས་པས་བརྒྱན་པའོ། །རང་འོད་རིག་མ་ཞེས་པ་ནི་བག་ཞད་ཁྱད་པར་མཛས་པས་སྨ་ར་མེད་པའོ། །ཐམས་ཅད་ཀྱི་ནི་དངོས་པོ་ཡི། །ཞེས་པ་ནི་མདོག་ལ་སོགས་པའི་སྒོ་ནས་སོ། །ས་བོན་སྙིང་པོ་ལྕགས་ཀྱུ་ཡིས། །ཞེས་པ་ནི་བརྒྱུད་པ་སྟེ་གཤིན་རྗེ་གཤེད་ལ་སོགས་པ་བསྐུལ་བའི་དབང་གིས་ཞེས་པའི་དོན་ཏོ། །བསྐྲད་ནས་ཞེས་པ་ནི་འཕྲོས་པའི་ཁྲོ་བོ་རྣམས་ཀྱིས་དེ་དང་ལྷན་དུ་འགྲོགས་པ་རྣམས་བསྐྲད་ནས་སོ། །བསྲུང་བྱ་སྟེ་ཞེས་པ་ནི་ནང་དུ་ཆུད་པའི་དུས་སུ་ཁྲོ་བོ་རྣམས་ཀྱིས་གཟེབ་ལ་སོགས་པ་མཛད་པའོ། །དེ་ནས་དུང་ཕོར་ལ་སོགས་པའི་བྱ་བས་མཆོད་ཡོན་ཕུལ་ནས་དཀྱིལ་འཁོར་གྱི་འཁོར་ལོ་ལ་ཐིམ་སྟེ་ཞེས་པ་ནི་ཤེས་རབ་མཐར་ཕྱིན་གྱི་འོད་ཟེར་གྱིས་གཞུག་པའོ། །དེ་བཞིན་དུ་བཅིང་བ་དང་དབང་བྱ་བ་ཡང་རྟོགས་པར་བྱའོ། །དབང་བསྐུར་གོང་མ་བསྒོམས་པས་ཞེས་པ་ནི་གུད་དུ་སྟོན་ཏེ། ཡན་ལག་གཉིས་ནི་མོས་པས་བྱ་བར་གསུངས་ཏེ་དབང་བསྐུར་བ་ནི་ཆུང་དུ་བཞིན་དུ་བྱའོ་ཞེས་པའི་དོན་ཏོ། །དེ་ལྟར་དཀྱིལ་འཁོར་གྱི་ལྷ་རྣམས་བསྐྱེད་ཅིང་ཕྱུང་ནས་ད་ནི་ལྷ་རྣམས་མཉེས་པའི་སྤྱོར་བ་གསུངས་སོ། །རང་གི་སྙིང་པོའི་འོད་ཟེར་གྱིས་གཟུགས་ལ་སོགས་པ་བཀུག་ནས་བྱང་ཆུབ་སེམས་སུ་ཞུ་པ་ཞེས་ཚིག་ལྷག་མའོ། །ཤེས་རབ་པདྨོ་དཀྱིལ་དུ་ནི། །ཞེས་བྱ་བ་བྱང་ཆུབ་སེམས་ལས་ས་བོན་དུ་གྱུར་པའི་གནས་སོ། །གཟུགས་ལ་སོགས་པ་ཐིམ་བྱ་སྟེ། །ཞེས་པ་ནི་ས་བོན་གྱི་འོད་ཟེར་གྱིས་དེ་རྣམས་ལ་བོན་ལ་བསྟིམ་པའོ། །དོན་དམ་པར་ན་ཐུགས་ཀྱི་རིགས་སོ། །དེ་ཉིད་སྤྲོས་པ་ལས་
སྐུ་ལ་སོགས་པ་རིགས་གསུམ་མོ། །དེ་ཉིད་དེ་བཞིན་གཤེགས་པ་ལྔའི་གཟུགས་ཀྱི་རིགས་ལྔའོ། །རིགས་ལྔ་རེ་རེ་ལྔ་ལྔར་བྱས་པ་ལས་སྐུ་ལ་སོགས་པར་ཕྱེ་བས་བརྒྱ་རྣམས་སོ། །དེ་ནི་ཉེ་བར་མཚོན་པ་ཙམ་སྟེ་རྣམ་པ་དེ་ལྟ་བུའི་རིགས་མཐའ་ཡས་པའོ། །ཡེ་ཤེས་ལྔ་ཞེས་པ་ནི་རྟག་པ་ལ་སོགས་པའོ། །ཕྱག་རྒྱ་ཞེས་པ་ནི་སྤྱན་མ་ལ་སོགས་པའོ། །སངས་རྒྱས་རང་བཞིན་གཟུགས་ཞེས་པ་ནི་མེ་ལོང་ལྟ་བུའི་ཡེ་ཤེས་ལ་སོགས་པའི་རང་བཞིན་གྱི་ཕྱིར་གཤིན་རྗེ་གཤེད་ལ་སོགས་པའོ། །ཆོས་ཐམས་ཅད་ཀྱི་དཀྱིལ་འཁོར་བསྟོད་ཅེས་པ་ནི་གཟུགས་ལ་སོགས་པ་ཆོས་ཐམས་ཅད་རྣམ་པར་དག་པའི་སྒོ་ནས་འོག་ནས་འབྱུང་བས་སྒྲ་བརྙན་ལྟར་ཤེས་པར་བྱས་ནས་བསྟོད་པར་བྱ་ཞེས་སོ། །ཡེ་ཤེས་བདུད་རྩི་བླང་བསྒོམས་ནས། །ཞེས་པ་ནི་ས་བོན་གྱིས་པདྨ་བཅུ་དགུ་སྤྲོས་ཏེ་བླང་བར་བསྒོམས་ནས་ཞེས་པའི་དོན་ཏོ། །ཀུན་དུ་རྟོག་པ་ཡོངས་སྤངས་ཏེ། །ཞེས་པ་ནི་དེ་སྤངས་པས་སངས་རྒྱས་ཞེས་པའོ། །དེ་ཡང་སྙིང་ལ་ཞུགས་བསམས་ནས། །ཞེས་པ་ནི་ཐིག་ལེའི་འོད་ཟེར་གྱིས་རལ་གྲི་ལ་སོགས་པ་གསལ་བར་བྱས་ནས་འོད་ཟེར་དེ་ཉིད་དུ་བཞག་སྟེ། སེམས་དེ་སྙིང་ལ་ཞེས་པ་ཐིག་ལེ་ཞུགས་པར་བསམས་ནས་ཞེས་སོ། །དེས་ཅིར་འགྱུར་ཞེ་ན། དེ་ནི་ཞེས་པ་ནི་ཞུགས་པའི་སེམས་དེ་ཉིད་དོ། །ཡེ་ཤེས་བདུད་རྩིའི་རྒྱུན་ཞེས་པ་ནི་ཡེ་ཤེས་ཀྱི་རང་བཞིན་ཤི་བ་ལ་སོགས་པ་དང་བྲལ་བར་བྱེད་པ་བྱང་ཆུབ་སེམས་དཔའ་འཇམ་དཔའི་དབྱངས་ཀྱི་དཀྱིལ་འཁོར་ཆོས་འབྱུང་བ་ནས་བརྩམས་ནས་ཐིག་ལེའི་རྣལ་འབྱོར་ཡན་ཆད་དུ་མོས་པར་བྱས་ཏེ་བསྒོམ་པ་ལ་དེ་སྐད་ཅེས་བྱའོ། །དེ་ནས་ལུས་ནང་ཀུན་གསལ་ཏེ། །ཞེས་པ་ནི་ཐིག་ལེ་ཕྲ་མོ་ལས་གོང་མའི་རིམ་པས་འཕྲོས་ནས་ཞེས་པའི་དོན་ཏོ། །སོ་སོར་བ་སྤུའི་འོད་ཟེར་ཞེས་པ་ནི་གོང་གི་ནང་གི་ལུས་སུ་གཞག་པ་དེ་ཉིད་ལ་སྤུའི་བུ་གནས་སྤྲོས་པ་ཞེས་པའི་དོན་ཏོ། །རང་རིག་ཅེས་པ་ནི་དབྱེར་མེད་པས་སོ། །རིག་མའི་སྣ་རྩེར་ཞེས་པ་ནི་ཟེའུ་འབྲུ་བུམ་པའི་ནང་དུ་སེམས་བྱིང་བར་སོང་ན་རང་གི་རྡོ་རྗེས་ཕྱུང་སྟེ། དེར་གནས་པར་བྱས་ནས་ཕྲ་མོའི་ཏིང་ངེ་འཛིན་གསུམ་པས་སྤྲོ་བསྡུ་བྱ་ཞེས་བྱ་བའི་དོན་ཏོ། །བརྟན་པའི་མཚན་མ་ཞེས་པ་ནི་བཏང་ཞིང་བཟུང་
བས་སེམས་བརྟན་པར་གྱུར་པའི་མཚན་མ་ལྔ་པོ་མཐོང་བའོ། །སྐུ་གསུང་ཐུགས་ཀྱི་རྡོ་རྗེ་དང༌། །སྤྲོ་བ་ལྔ་ཡི་ཡེ་ཤེས་ཞེས་པ་ནི་ལྷ་རྣམས་ཕྱག་རྒྱ་བཞིས་རྒྱས་བཏབ་ལ་གོང་དུ་སྟེ་སྤྲོ་བ་ལྔ་ཞེས་པ་ནི་ཡེ་ཤེས་ཀྱི་འོད་ཟེར་ལས་དེ་བཞིན་གཤེགས་པ་ལ་སོགས་པ་སྤྲོ་བའོ། །དུས་གཅིག་ཅེས་པ་ནི་སྐུའི་ས་བོན་ལས་སྐུ་གསུང་ཐུགས་ཀྱི་དེ་བཞིན་དུ་སྐུ་གསུང་ཐུགས་ཀྱང་ཤེས་པར་བྱའོ། །ཡང་ན་རིམ་པར་བྱ་ཞེས་པ་ནི་སྐུ་གསུང་ཐུགས་ལས་ཐུགས་སྤྲོ་བའོ། །དེ་གཉིས་སྐུ་གསུང་ཐུགས་ཀྱི་དབང་དུ་བྱས་པ་སྟེ། ཡེ་ཤེས་སེམས་དཔའ་ནི་ལྷན་ཅིག་ཁོ་ནའོ། །འོན་ཀྱང་དེ་རྣམས་ནི་སྐུ་བླས་པ་ནི་སྐུ་གསུང་གི་ས་བོན་གྱི་ཏིལ་ལ་ཡེ་ཤེས་སེམས་དཔའི་ས་བོན་གཞུག་པའོ། །ཡང་དེ་རྣམས་ཀྱི་གདན་བླ་མ་བརྒྱུད་པ་ལས་འོངས་པ་གསུངས་པ། རྡོ་རྗེ་གསལ་ཆོས་ཞེས་པ་ལ་སོགས་ཏེ་མ་བཤད་དོ། །ཡེ་ཤེས་སྐུ་འཕྲོས་ཞེས་པ་ནི་སེམས་ཅན་གྱི་སྐུ་ཞེས་པའི་དོན་ཏོ། །གང་གི་དབང་དུ་བྱ་ཞེ་ན། དབུགས་དབྱུང་ཞེས་པ་ལ་སོགས་པའོ། །རིམ་བཞིན་རིམ་བཞིན་ཞེས་པ་ནི་རིམ་གྱིས་ཅིག་ཅར་ཞེས་པའོ། །སྔོན་བཞིན་ཞེས་པ་ནི་ཏིང་ངེ་འཛིན་གཉིས་པ་བཞིན་དུ་ཡེ་ཤེས་སེམས་དཔའ་ལས་དངོས་པོ་ཐམས་ཅད་ཀྱི་འོད་འཕྲོས་པས་གཟུགས་ལ་སོགས་པ་བཀུག་ནས་ཟླ་བར་ཞུ་བ་པདྨོའི་ནང་དུ་ས་བོན་དུ་གྱུར་པ་ལས་དབུགས་དབྱུང་བའི་དུས་སུ་ལྷ་མོ་སྤྲོས་ནས་དེས་མཆོད་པ་སྟེ། གསང་བའི་རིག་མས་འཁྱུད་པ་སྟེ། ཞེས་པ་སོ་སོའི་རིག་མ་ནང་དུ་ཐིམ་པས་ཞེས་པའི་དོན་ཏོ། །ཐིག་ལེ་ལ་སོགས་པ་གསུམ་ལ། །རྒྱུ་མཐུན་འབྲས་བུ་རྫོགས་པ་ཡིས། །ཞེས་མོས་པས་བསྒོམ་ཞེས་སོ།། དེ་བཞིན་མོས་པ་ཡིས། ཆུང་དུ་ལ་སོགས་དབྱེ་བའི་ས། ཞེས་པ་ནི་གཙོ་བོ་ནི་རིག་མ་དང་ལྷ་རྣམས་ལ་ཞེས་སོ། །སྦྱོར་བ་ཞེས་པ་ནི་རྣལ་འབྱོར་ལ་སོགས་པ་ཡང་མོས་པ་ཡིས་ཞེས་སོ། །རང་སྙིང་དེ་མཆོག་རྟོགས་པ་ཞེས་པ་ནི་རང་གི་སྔགས་ཀྱི་དོན་ཤིན་ཏུ་རྟོགས་པའོ། །དེས་ངལ་ཞིང་སེམས་ཀྱི་སྤྱོད་པ་ཞན་པར་གྱུར་ན་ཞེས་པའི་དོན་ཏོ། །དམ་པའི་སེམས་ཀྱི་ཆུ་རྒྱུན་ཞེས་པ་ནི་སྤྱི་བོར་བདུད་རྩི་ལྔ་ཞུ་བ་ལ་ཨོཾ་གྱིས་བརླན་པར་བྱ་བའི་ཆུ་ཞེས་པའི་དོན་ཏོ། །ཅིའི་ཕྱིར་སངས་རྒྱས་ཐམས་ཅད་སྐུ་གསུང་ཐུགས་གསུམ་དང་འབྲེལ་བ་དེའི་ཕྱིར་ལྷ་རྣམས་སྐུ་གསུང་ཐུགས་
གསུམ་གྱི་ས་བོན་ལ་ཐིམ་པ་སྟེ། སེམས་ཙམ་ཡིན་པའི་ཕྱིར། ཐོགས་པ་སྤངས་ནས་བསྡུ་བར་བྱ། །ཞེས་པ་སྟེ་ས་བོན་གསུམ་བརྗོད་པས་སོ། །དེ་བསྡུ་ཞེས་པ་ནི་གོང་དུ་གསུངས་པའི་དཀྱིལ་འཁོར་ཏེ་དེ་དང་བྲལ་བ་མཐོང་ནས་ཞེས་སོ། །རང་རང་དག་ནས་ཞེས་པ་ནི་གཟུགས་ཀྱི་རྡོ་རྗེ་མ་ལ་སོགས་པའི་ངོ་བོར་ཞེས་པའི་དོན་ཏོ། །སོ་སོ་རང་རིག་ཅེས་པ་ནི་སྐུ་གསལ་བ་སྟེ་ཐབས་སོ། །ཕྱི་སྟོང་པ་ཉིད་ཤེས་རབ་པོ། །སེམས་དག་པ་ནི་གཟུང་བ་དང་འཛིན་པ་དག་ཅེས་སོ། །རྟག་ཏུ་བསྒོམ་པའི་རྣལ་འབྱོར་པའི། །དཀྱིལ་འཁོར་མཆོད་པ་མཆོག་འདིའོ། །ཞེས་པ་ནི་སྤྱོད་ཡུལ་རྣམས་སེམས་དག་པ་དང་ལྡན་པས་གོང་དུ་གསུངས་པ་ལྟ་བུར་བལྟས་ན་གསང་བ་ཆེན་པོའི་མཆོད་པ་སྟེ་ཡིད་དགའ་བར་བྱེད་པའི་ཕྱིར་རོ། །གཞི་ཡི་སྙིང་པོ་ཡིས་བསྒྱུར་བའི། །ཞེས་པ་ནི་སྙིང་གར་ས་བོན་དང་དབྱུང་བས་སོ། །རང་སྙིང་དེ་བཞིན་ཞེས་པ་བདུད་རྩིའི་སྟེང་དུ་བྷཱུཾ་ལ་སོགས་པའི་རིམ་པའོ། །ཕྱིའི་སྦྱིན་སྲེག་ནི་ཐབ་ལ་སོགས་པ་སྟེ་ལེའུ་བཅུ་དྲུག་པ་ལ་དཔགས་ཏེ་ཤེས་པར་བྱའོ། །སེམས་ནི་སེམས་དེ་ཡིན་ཞེས་པ་ནི་ཁ་ཟས་སྦྱང་བ་འདིའོ། །ཡེ་ཤེས་མེ་ཞེས་པ་ནི་གོང་དུ་གསུངས་པའི་ཟབ་པ་དང་རྒྱ་ཆེ་བའི་རྣལ་འབྱོར་རོ། །དེས་ཕུང་པོ་ལ་སོགས་པའི་བླུན་པ་རྣམས་བསྲེག་པ་སྟེ་དེ་ནི་བླ་ན་མེད་པའོ། །བདག་གཞན་མཆོད་ཅེས་པ་ནི་གཟུགས་ལ་རྣམ་གསུམ་ཞེས་པ་ལ་སོགས་པའི་རིམ་པས་སོ། །ལུས་དག་དངོས་པོ་ལ་ཐལ་བ་དང་ཁྱད་པར་ཅན་ནོ། །དེ་མཉམ་པར་བཞག་པས་བརྩམས་ན་ཕྱག་རྒྱ་དང་སྔགས་བདག་ཉིད་དེ་དེ་ཉིད་མཆོད་པ་སྟེ་ཆེན་པོའོ། །ཆོས་ཅན་གཅིག་ལ་ཞེས་པ་ནི་དངོས་པོ་གཅིག་ལ་སྟེ་བུད་མེད་ལྟ་བུར་རྟོགས་པ་ནི། །སྣ་ཚོགས་རྣམ་པར་སྣང་བ་སྟེ། །ཞེས་པ་ནི་རོ་དང་འདོད་པ་ཅན་དང་བཟའ་བ་ལ་སོགས་པར་སྣང་བ་སྟེ་རྟོག་པ་དེས་ལས་མ་ལུས་པ་བསགས་པའོ། །དེ་བཞིན་དུ་བཅོམ་ལྡན་འདས་ཁོ་ན་ལ་སྨད་པ་དང་བསྟོད་པ་དེས་བསྟན་པའི་ལམ་ལ་བསྟེན་པས་སྡུག་བསྔལ་བ་ལ་སོགས་པ་གྲོལ་བར་འགྱུར་རོ། །དེའི་ཕྱིར་ལས་སྣ་ཚོགས་པ་ནི་རྟོག་པ་ལས་བྱུང་ལ་རྣལ་འབྱོར་པ་འདི་ནི་ཀུན་རྟོག་ཐམས་ཅད་ལས་ངེས་པར་གྲོལ་བས་ན། དེས་ལུས་ངག་གི་ལས་ཁྱད་པར་ཅན་མཉམ་པར་བཞག་པས་བརྩམས་ན་མི་དགེ་བ་ག་ལ་འགྱུར། ཞེ་སྡང་དང་འདོད་པ་མེད་པའི་ཕྱིར་རོ། །
བརྗེད་པ་ལ་སོགས་པའི་དབང་གིས་དམ་ཚིག་ཉམས་པ་བསྐང་བའི་ཆོ་ག་གསུངས་པ་དོན་ཡོད་ཅེས་པ་ལ་སོགས་པའོ། །ཀུན་ངག་ཅེས་པ་ནི་ཀུན་དག་པའི་བསམ་པས་སོ། །ཁྱད་པར་དུ་བསྐང་བའི་ཆོ་ག་གསུངས་པ་བླ་མ་ཞེས་པ་ལ་སོགས་པའོ། །རང་གི་དཀྱིལ་འཁོར་ཞེས་པ་ནི་ཅུང་ཟད་ཁྱད་པར་མཛད་པ་སྟེ་ཡི་དམ་གྱི་ལྷའོ། །སྲོད་མཚམས་ཞེས་པ་ནི་མཐའ་མ་སྟེ། དེ་ནི་ཉི་མའི་མཚན་དུ་ཟད་དེ་ཉི་མའི་གུང་དང་ཕྱི་དྲོའི་དུས་སུ་ཡང་རྟོགས་པར་བྱའོ། །ཐ་མར་ཁྱད་པར་དུ་བྱ་བ་གང་ཞེ་ན། ཡི་གེ་གསུམ་གྱི་མཐའ་ལ་མུཿབྮག་པས་གཤེགས་སུ་གསོལ་བ་དང་ཡི་གེ་གསུམ་གྱིས་དམ་ཚིག་གི་དཀྱིལ་འཁོར་ཡེ་ཤེས་སེམས་དཔའ་དཀྱིལ་འཁོར་ལ་ཐིམ་སྟེ་ཉལ་བར་བྱའོ་ཞེས་སོ། །ཐོ་རངས་ལངས་ཞེས་པ་ནི་མོས་པ་ཡང་ན་ཞེས་སོ། །སྔོན་བཞིན་དུ་ཞེས་པ་ནི་གོང་དུ་གསུངས་པ་ཁོ་ན་བཞིན་དུ་ཡན་ལག་དང་བཅས་པའི་སྤྱོད་པ་དུས་བཞིར་བྱ་ཞེས་སོ། །ལས་དང་པོ་པ་ཞེས་པ་ནི་འདི་ལས་རྣལ་འབྱོར་པའི་བྱེ་བྲག་གིས་ལས་བཞིར་སྟོན་པ་ནི་ལས་དང་པོ་པའི་ལས་དང་ལྡན་པའི་ཕྱིར་རོ། །དེ་ལ་ཡང་བསམ་གཏན་དང་བྱ་བས་བསྐལ་པ་སྟེ་རང་རང་གི་ལས་ཀྱིས་བསྟན་པའི་མཚན་མཐོང་ཞིང་རྙེད་པའོ། །དེ་ལས་དེ་མ་ཐག་པའི་རྐྱེན་གྱིས་བསྒྱུར་བ་ནི་ཅུང་ཟད་ཡེ་ཤེས་དབང་དུ་གྱུར་པའི་རྣལ་འབྱོར་ཏེ། བརྟུལ་ཞུགས་ཞེས་པ་ལ་སོགས་པའོ། །བརྟུལ་ཞུགས་ཞེས་པ་ནི་ཆོས་བརྒྱད་ལ་སོགས་པ་དང་ལྡན་པའོ། །ཚུལ་ཁྲིམས་ཞེས་པ་ནི་རང་གི་རྗེས་སུ་མཐུན་པའི་དམ་ཚིག་དང་བཟླས་བརྗོད་དང་ཕན་གདགས་པའི་བྱ་བའོ། །སྔགས་ཞེས་པ་ནི་ལྷའི་སྐུར་གྱུར་པའི་ཡེ་ཤེས་ཏེ་ཨོཾ་དྷ་རྨམ་དྷཱ་ཏུ་སྭ་བྷཱ་བ་ཨཱཏྨ་ཀོ྅ཧཾ་ཞེས་པ་དང་ལྡན་པའོ། །རང་གི་ལས་གསུངས་པ་མིག་ཅེས་པ་ལ་སོགས་པ་སྟེ། ཆེན་པོ་མིག་ལ་སོགས་པ་བྱིན་གྱིས་བརླབ་པ་ལ་སོགས་པ་ཞེས་པ་ནི་དོན་ཏོ། །དེ་གང་གིས་ཤེ་ན། ཅུང་ཟད་ཡེ་ཤེས་དབང་གྱུར་པས། །ཞེས་ཏེ་འབེབས་པ་ཐོབ་པ་ཞེས་པའི་དོན་ཏོ། །དུས་བཞི་ཞེས་པ་ནི་ལས་དང་པོའི་པ་བཞིན་དུའོ། །འཁྲུལ་མེད་ཅེས་པ་ནི་བརྟན་པ་མ་ཡིན་པས་ཐིག་ལེ་དང་ཕྲ་མོན་ན་ཏན་དུ་བྱ་བ་མ་ཡིན་ནོ། །བཟླས་བརྗོད་བྱ་ཞེས་པ་ནི་གྲུབ་པའི་མཚན་མ་ཐོབ་པར་བྱ་བའི་དོན་ཏོ། །དཀྱིལ་འཁོར་དང་ནི་ལས་རྒྱལ་མཆོག་གོ །རྣམ་པ་ཀུན་གྱིས་རྫོགས་
བྱས་ཏེ། །ཞེས་པ་ནི་སློབ་མ་གཞུག་པ་དང༌། བསྒྲུབ་པའི་དོན་དུ་ཁྱད་པར་མཛད་པའོ། །རང་གི་ལས་གསུངས་པ་སྤྲོ་བ་བསྡུ་བ་བྱེད་པ་ཞེས་ཏེ་ཡི་གེ་གསུམ་གྱིས་སྤྲོ་བ་དང་བསྡུ་བའི་སྒོ་ནས་ཉིན་མཚན་དུ་དཀྱིལ་འཁོར་གྱི་སྦྱོར་བ་ལ་བརྟེན་པས་བཞི་པར་འགྱུར་བའི་མཚན་མ་ཅི་སྐད་གསུངས་པ་རྣམས་འབྱུང་བའོ། །ཡེ་ཤེས་དབང་དུ་གྱུར་པ་ནི་རང་དང་གཞན་གྱིས་དཀྱིལ་འཁོར་མཐོང་བར་མཛད་པའོ། །དེ་ལས་དེ་མ་ཐག་པའི་རྐྱེན་གྱིས་བསྒྱུར་བ་ནི་བཞི་སྟེ་ཡང་དག་ཅེས་པ་ལ་སོགས་པའོ། །ཡང་དག་ཡེ་ཤེས་ཞེས་པ་ནི་མེ་ལོང་ལྟ་བུ་ལ་སོགས་པ་སྟེ། དེ་ཐོབ་པ་ནི་ཕྱག་རྒྱ་ཆེན་པོ་མངོན་དུ་མཛད་པ་ཞེས་སོ། །དེའི་ལས་གསུངས་པ། གཟུགས་བརྙན་ཞེས་པ་ལ་སོགས་པ་སྟེ། དེ་ནི་གཞན་གྱི་དོན་ལ་གོམས་པས་ཁམས་ཀུན་གྱི་ནང་དུ་འོད་གསལ་བར་ལངས་ནས་གཟུགས་བརྙན་ལྟ་བུའི་དམ་པའི་འཁོར་ལོ་གསུམ་གྱིས་སྲིང་པ་ཇི་སྲིད་ཡོད་པ་དེ་སྲིད་ཀྱི་བར་དུ་རོ་མྱང་བའི་མཚན་ཉིད་བརྒྱད་དང་ལྡན་པར་བཞུགས་ནས་འགྲོ་བའི་དོན་ཆེན་པོ་མཛད་པའོ། །དེ་ལྟར་རང་གི་འཁོར་གནས་སྔོན་བསྟན་པ་བྱས་ནས་ཞེས་བྱ་བའི་སྒྲའི་དོན་བསྟན་ནས། ད་ནི། དཀྱིལ་འཁོར་ཀུན་དུ་བྲི་བར་བྱ། །ཞེས་བསྟན་པའི་ཕྱིར། གྲུབ་པའི་མཚན་མ་རྣལ་འབྱོར་པས། །ཞེས་པ་གསུངས་ཏེ། དེ་ལ་གྲུབ་པའི་མཚན་མ་ཞེས་པ་ནི་རྨི་ལམ་ལ་སོགས་པའོ། །རྣལ་འབྱོར་པས་ཞེས་པ་ནི་ཅུང་ཟད་ཡེ་ཤེས་དབང་དུ་གྱུར་ནས་ཞེས་པའི་དོན་ཏོ། །ལན་གྲངས་མང་དུ་ཞེས་པ་ནི་ཡིད་ལ་བྱེད་པའི་བག་ཆགས་ཀྱི་མཚན་མ་དགར་བའོ། །དེ་ལྟར་མ་ཡིན་ན་ཡང་དག་པ་ནི་ཡང་དང་ཡང་དུ་འབྱུང་བའི་ཕྱིར་རོ། །དེ་གསུམ་ཆོ་ག་བཞིན་བྱས་ནས། །ཞེས་པ་ནི་མཚན་མ་ཐོབ་པ་དེས་དཀྱིལ་འཁོར་བྲི་བའི་དོན་དུ་བཟླས་བརྗོད་བྱའོ་ཞེས་བསྟན་པའོ། །དཀྱིལ་འཁོར་བྲི་བར་བྱ་ཞེས་པ་ནི་ཅུང་ཟད་ཡེ་ཤེས་དབང་དུ་གྱུར་པའི་རྣལ་འབྱོར་པས་ཐུན་མོང་གི་ཆེད་དུ་བྲི་བ་དང༌། ཡེ་ཤེས་དབང་དུ་གྱུར་པའི་རྣལ་འབྱོར་པས་ཁྱད་པར་མེད་པར་ཐུན་མོང་དང་མཆོག་གི་ཆེད་དུ་བྲི་བའོ་ཞེས་སྒྲུབ་པ་པོ་ཁོ་ནའི་དབང་དུ་གསུངས་པའོ། །དེ་ནི་སློབ་དཔོན་དང་སྒྲུབ་པ་པོ་ཐུན་མོང་གི་དབང་དུ་གསུངས་པ། འཁོར་གནས་ཞེས་པ་ལ་སོགས་པའོ། །དེ་ལ་འཁོར་ཆོ་ག་བཞིན་བཟླས་ཏེ་ཞེས་པ་ནི་ཅི་
རིགས་པར་རྣལ་འབྱོར་པ་གང་ཡང་རུང་བས་ཆོ་ག་བཞིན་དུ་བཟླས་བརྗོད་བྱས་ཏེ་བྲིའོ་ཞེས་པའོ། །གང་གི་དོན་དུ་བྲི་ཞེ་ན། བདག་གི་ཞེས་པ་ནི་དངོས་གྲུབ་ཀྱི་སྟེ་རྣལ་འབྱོར་པ་བར་མའི་དབང་དུ་བྱས་པའོ། །ཞུས་པས་ཞེས་པ་ནི་སྣོད་དུ་རུང་ཞིང་མོས་པ་དང་ལྡན་པས་ཞུས་པ་དང་གླེགས་བམ་ལ་སོགས་པ་བརྐོ་བར་འདོད་པས་ཞུས་པ་དང༌། སྡིག་པའི་དབང་གིས་མཚན་མ་ངན་པ་མཐོང་བས་ཞུས་པའོ། །གཞན་དོན་བྱེད་པར་འདོད་ན་ཡང༌། །ཞེས་པ་ནི་ངང་ཚུལ་བཟང་པོ་དང་ལྡན་བཞིན་སྣོད་དུ་རུང་བ་རྣམས་ནི་ཞུས་པ་མ་ཡིན་ཀྱང༌། དེའི་དོན་དུ་དམིགས་ནས་བསོད་ནམས་འཕེལ་བའི་དོན་དུ་དེ་བཅུད་དེ་བྲི་ཞེས་པའི་དོན་ཏོ། །དེ་བས་ན་རྣམ་པར་སྣང་མཛད་མངོན་པར་བྱང་ཆུབ་པའི་རྒྱུད་ལས། མོས་པ་བརྟེན་པ་དད་པ་ཅན། །གཞན་ལ་ཕན་དགའ་མཐོང་ནས་ནི། །ཤེས་ནས་སློབ་དཔོན་བདག་ཉིད་ཀྱིས། །མ་གསོལ་བར་ནི་དེར་བས་ཏེ། །ཕན་འདོད་ཕྱིར་ནི་འདི་སྐད་སྨྲ། །ཞེས་པ་ལ་སོགས་པ་གསུངས་སོ། །དེ་བས་ན་དེ་རྣམས་ཀྱི་དོན་དུ་རྣལ་འབྱོར་པ་ཁྱད་པར་མེད་པར་དབང་བསྐུར་བའི་དཀྱིལ་འཁོར་བྲིའོ་ཞེས་སོ། །ཡེ་ཤེས་དབང་དུ་གྱུར་པས་ནི་བསམ་གཏན་ཙམ་གྱིས་རྫོགས་པར་བྱེད་པ་ཡང་འཆད་དོ། །མཚན་མ་ཐོབ་ནས་ཞེས་པ་ནི་སྒྲུབ་པ་པོས་གྲུབ་པའི་མཚན་མ་ཐོབ་ནས་སོ། །སློབ་དཔོན་ནི་བརྟན་པའི་མཚན་མ་ཐོབ་ནས་བྲི་བ་སྟེ་ལས་དང་པོ་ལ་སོགས་པའོ། །དེ་བཞིན་ལས་དང་པོ་པ་དེ་མཚན་མ་མ་ཐོབ་ཀྱང་དོན་མི་འདོར་བའི་ཕྱིར་དབང་བསྐུར་བའི་དཀྱིལ་འཁོར་བྲིའོ་ཞེས་སློབ་དཔོན་ཛ་བ་རི་པས་བཤད་དོ། །འཁོར་གནས་ཆོ་ག་བཞིན་བཟླས་ཏེ། །ཞེས་གསུངས་པ། འཁོར་བདག་སྔགས་ནི་འབུམ་བཟླས་ཏེ། །ཞེས་པ་ལ་སོགས་པའོ། །དེའི་དོན་ནི་འདི་ལྟ་སྟེ། གོང་དུ་སྨོས་པ་རྣམས་ཀྱིས་ཞུ་བ་གསལ་བ་དང༌། ཡུལ་རྣམས་ལ་ཆགས་དང་བྲལ་བའི་བདག་ཉིད་ཆེན་པོ་དེས་དེ་ལ་སོགས་ཏེ་སེམས་ཅན་རྣམས་འཁོར་བ་ལས་བསྒྲལ་བར་བྱའོ་ཞེས་ཏེ་བྲི་བར་བྱའོ། །ཁྱེད་ཀྱིས་ཡོ་བྱད་རྣམས་ཚོགས་སམ་ཞེས་སྨྲས་ནས། དེས་ཀྱང་ཁ་ཅིག་ཚོགས་ཁ་ཅིག་ཚོགས་ཞེས་སྨྲས་ནས་གནས་ཇི་ལྟ་བ་བཞིན་དུ་འདུག་སྟེ། ཇི་སྐད་དུ་གསུངས་པའི་འཛབ་བརྟེན་པ་མ་ཡིན་པས་དུ་མ་བཟླས་པ་འམ། བརྟེན་པའི་མཚན་མ་མཐོང་བས་འཛབ་འབུམ་ལ་སོགས་པའི་བཟླས་པ་བྱས་པས་ལྷས་
གནང་བར་བསམས་པ་འམ་དངོས་སུ་ཐོབ་ནས་བྲི་བར་བྱའོ་ཞེས་སོ། །གསལ་ཏེ་མཚན་མ་མི་བཟང་བའི་སློབ་མས་ཞུས་པར་གྱུར་ན། ཁྱད་པར་དུ་དེའི་ཁྲོ་ཞིང་ཁྲོ་བོ་གང་ཡང་རུང་བའི་རྣལ་འབྱོར་རམ། ཡང་ན་རང་གི་ལྷའི་རྣལ་འབྱོར་དང་ལྡན་པས། མདུན་དུ་སློབ་མ་ཉི་མའི་དཀྱིལ་འཁོར་གྱི་སྟེང་དུ་བཞག་ལ་བདག་གི་ས་བོན་སྤྲོས་པའི་འོད་ཟེར་གྱིས་དེའི་སྟེང་ལ་གནས་པ་ཀ་ལས་བསྐྱེད་པའི་ཁ་དོག་ནག་པོ་འཇིགས་སུ་རུང་བའི་སྡིག་པ་བསྐུལ་ནས་སྣ་བུག་ནས་ཕྱུང་སྟེ། ཡང་ས་བོན་ལས་བདུད་རྩི་ཐབ་སྦྱོར་ཁ་བྱེ་བའི་རྡོ་རྗེ་དང་ལྡན་པས་ཕྱུང་ནས། ན་མཿས་མནྟ་ཞེས་པ་ལ་སོགས་པ་ཆེ་གེ་མོའི་སྡིག་པ་མཱ་ར་ཡ་ཕཊ་ཅེས་པ་དང་ལྡན་པའི་སྔགས་ཀྱིས་སྡིག་པ་ཟོས་ནས། དེའི་སེམས་ཀྱིས་བདོག་པ་ཀུན་ཕུར་བུས་བཏབ་པར་བསམ་པས་ཀུན་དུ་བཟང་པོར་བསྐྱོད་ནས་དེའི་སྤྱི་བོར་བསམས་ཏེ། སློབ་མ་བཅོས་ནས་འཛབ་བཟླས་བྱ། །ཞེས་ཁྱད་པར་རོ། །ད་ནི་བཟླས་བརྗོད་ཀྱི་སྐབས་སུ་སྙིང་པོ་ལ་སོགས་པའི་དབྱེ་བ་གསུངས་པ། དེ་ཉིད་གསུམ་ཞེས་བྱ་བ་ལ་སོགས་པའོ། །དེ་ཉིད་གསུམ་ཞེས་པ་ནི་ཡི་གེ་གསུམ་མོ། །བར་བཅུག་ཅེས་པ་ནི་སྐུ་གསུམ་གྱི་མཇུག་ཏུ་དང་པོའི་སྙིང་པོས་བོན་ཧེ་མཾ་ལ་སོགས་པའོ། །བཅུག་ནས། ཧཱུཾ་གི་སྟོན་པས་བཟླས་པར་བྱ། །ཞེས་སོ། །ས་བོན་དེ་ཇི་ལྟ་བུ་ཞེ་ན། ཐིག་ལེ་ལ་སོགས་པ་དང་ལྡན་པའོ། །གཞན་ཡང་དེ་ཉིད་གསུམ་གྱི་བར་དུ་མཚན་གྱི་སྔགས་རྣམས་བཅུག་ནས་བཟླས་བརྗོད་འབྱུང་བར་བྱ་ཞེས་སོ། །དེ་གཉིས་ནི་བཟླས་བརྗོད་ཐུན་མོང་ངོ༌། །ཕྱག་རྒྱ་ཞེས་པ་དེ་ཉིད་གསུངས་པ། གསང་བའི་སྐུ་གསུང་ཞེས་པ་ལ་སོགས་པའོ། །སྙིང་པོ་ཞེས་པ་དེ་ཉིད་གསུངས་པ། ས་བོན་སྙིང་པོ་ཞེས་བྱ་སྟེ། ཡི་གེ་གཅིག་པ་ཞེས་པའི་དོན་ཏོ། །རིག་པ་ཞེས་པ་དེའི་སྒོ་ནས་སྒྲུབ་པའི་བཟླས་བརྗོད་གསུངས་པ། ཞི་བ་ལ་སོགས་བསྐུལ་ནས་ནི། །ཞེས་བྱ་བ་ནི་ཤཱནིཏཾ་ཀུ་རུ་ཞེས་པ་ལ་སོགས་པ་ལས་ཀྱི་བྱེ་བྲག་གིས་སོ། །ལས་བྱེད་པ་ནི་བསྐུལ་བས་དེ་དང་དེའི་ལས་བྱེད་པའོ། །དེའི་ཕྱིར་རིག་པ་ཞེས་དེ་ལྷ་རྣམས་སོ། །དེ་ལ་སྐུལ་བར་བྱེད་པ་ལ་ཡང་དེ་སྐད་ཅེས་བྱའོ། །སྔགས་ཞེས་པ་ནི་བདུད་རྩི་འཁྱིལ་པའི་སྔགས་ལ་སོགས་པའོ། །རིགས་གསུམ་སྟེ་ཞེས་པ་ནི་ལས་ཀྱི་བྱེ་བྲག་གིས་བསྐུལ་ནས་ཞེས་པའོ། །དེ་
ཐམས་ཅད་ཁམས་ལས་ཅི་རིགས་པར་བཟླས་པ་བྱའོ་ཞེས་སོ། །ཇི་ལྟར་རྣལ་འབྱོར་གནས་བཟླས་ཏེ། །ཞེས་པ་ནི་ཇི་སྐད་གསུངས་པའི་ཏིང་ངེ་འཛིན་ལ་གནས་ནས་བཟླ་ཞེས་པའོ། །དེས་རང་གི་ལྷའི་བཀའ་འམ། འཁོར་བདག་གིས་བཀའ་ཐོབ་ནས་ཞེས་པ་ནི། བསམ་པ་འམ་དངོས་སུ་གནས་ནས་བྲི་བར་བྱ། །ཞེས་བྱ་བར་སྦྱར་རོ། །དེ་ཡང་གང་གི་དབང་གིས་ཐོབ་ཅེ་ན། མདུན་དུ་རྣལ་འབྱོར་པས་འགོག་པའི་འཁོར་ལོ་ཞེས་པ་ནི་ཕྱིན་ཅི་ལོག་འགོག་པ་སྟེ་དཀྱིལ་འཁོར་གྱི་འཁོར་ལོའོ། །དེ་མོས་ནས་སུ་ཞེས་པ་ན་བསྟན་པའི་སེམས་ཀྱིས་གསལ་པོར་བསམས་ནས་ཞེས་སོ། །རང་སེམས་དག་པས་ན་དམ་ཚིག་ཉམས་པ་མེད་པའོ། །དེའི་དོན་ནི་འདི་ལྟ་སྟེ། སྲུང་བ་ལ་སོགས་པའི་དམ་ཚིག་དང་ལྡན་པའི་སྒོ་ནས་དུས་བཞིར་ཏིང་ངེ་འཛིན་གསུམ་རྫོགས་པའི་མཛུག་ཏུ་སྨོན་ལམ་བཏབ་པ་དང༌། དེའི་ཡན་ལག་གཞན་ཡང་སྡོམ་པ་དང༌། ཁ་ཟས་སྦྱར་བ་དང༌། ལས་གཉིས་ཀྱིས་སངས་རྒྱས་མཆོད་པར་བྱས་ནས་བདག་གུང་དུ་བསམས་ཏེ། བདག་གིས་དབང་བསྐུར་བ་ལ་སོགས་པས་དམ་ཚིག་ཉམས་པ་ལ་སོགས་པ་སེམས་དག་པར་བྱས་པས་ཞེས་པའི་དོན་ཏོ། །དེ་ལྟར་རི་མོ་བྲི་བའི་སྔོན་དུ་བཟླས་བརྗོད་ཀྱི་ཆོ་ག་བསྟན་ནས་ད་ནི་ལས་དང་པོ་པོའི་རྣལ་འབྱོར་པས་དཀྱིལ་འཁོར་བྲི་བའི་ཆོ་ག་ལ་དང་པོར་དག་པར་བྱ་བའི་ཆོ་ག་གསུངས་པ། བགེགས་ཀུན་བསྐྲད་ནས་ཞེས་པ་ལ་སོགས་པའོ། །དེའི་དོན་ནི་འདི་ལྟ་སྟེ། བཟླས་པ་བྱས་པས་བྲི་བར་འདོད་ན། དེའི་ཚེ་ལྷ་ཁང་དམ། གྲོང་ཁྱེར་རམ། མཆོད་རྟེན་ནམ། ཀུན་དགའ་ར་བ་ལ་སོགས་པའི་བྱང་ཤར་མཚམས་སུ་བརྩམ་པར་བྱའོ། །གཞན་དུ་བརྒྱ་བྱིན་ལ་ལྷ། གཤིན་རྗེ་བདེན་བྲལ་དང༌། ཆུ་ལྷ་དང་རླུང་ལྷ་གནོད་སྦྱིན་ཕྱོགས་སུ་ནི་གོ་རིམས་བཞིན་དུ་གནོད་པར་འགྱུར་པ་སྟེ་ཕམ་ཞིང་མུ་གེ་རིགས་རྒྱུད་འཆི་བ་དང༌། །མུ་གེས་སློང་བ་འཆི་ཡོད་སློབ་མ་འཆི་ཞེས་འབྱུང་བས་ཞི་བ་ལ་ཇི་ལྟ་བ་བཞིན་དུ་ཁ་དོག་ཐ་དད་པ་དང༌། མཐོན་དམན་དང་འབྲུ་དང་ཚེར་མ་དམན་པ་ལ་སོགས་པ་མེད་པར་བྱའོ། །ཤར་དུ་མཐོ་ན་རིགས་ཟད་འགྱུར། །བྱང་དུ་མཐོན་རང་འཆི་འམ། །ཡང་ན་ནོར་ནི་ཟད་པར་འགྱུར། །ཞེས་འབྱུང་བས། དེ་དག་སྤངས་ནས་བྱང་ཤར་དུ་འདྲི་ཞིང་བཀྲ་ཤིས་པའི་
མཚན་ཉིད་དང་ལྡན་པ་བརྩལ་བར་བྱའོ། །དེ་ལ་སོགས་པ་ནི་རྟོག་པའི་རྣལ་འབྱོར་ལ་གནས་པ་ལ་གསུངས་ཀྱི། རྣལ་འབྱོར་ཆེན་པོ་རྣམས་ལ་ནི་ངེས་པ་མེད་དོ། །དེ་ནས་དགེ་འདུན་རྣམས་དང་བཅས་ཏེ་བཀྲ་ཤིས་པའི་གཟའ་སྐར་དང་བྱེད་པ་བཟང་པོའི་ཉིན་བར་བཅག་ནས་དེར་པུས་མོ་ནུབ་ཙམ་བརྐོས་ནས་དེ་ཉིད་དག་པར་བྱའོ། །གལ་ཏེ་སྔ་མ་ལས་ལྷག་པར་གྱུར་ན་དངོས་གྲུབ་ལ་སོགས་པའི་རྟགས་སུའོ། །དེ་བཞིན་དུ་བརྐོས་ནས་ཆུས་བཀང་སྟེ་སློབ་དཔོན་གོམ་པ་བརྒྱ་ཕྱིར་སོང་ནས་འོངས་ཏེ་མི་གཡོ་ཞིང་གཡས་སུ་འཁོར་བ་ནི་བཟང་པོའི་རྟགས་སུ་ཤེས་པར་བྱའོ། །དེ་ལྟར་མ་ཡིན་པར་གྱུར་ན། ཕུར་བུ་བཏབ་ནས་བགེགས་ཀུན་བསྐྲད། །ཅེས་པ་སྟེ་བདུད་རྩི་འཁྱིལ་པས་ཇི་སྐད་དུ་གསུངས་པའི་རིམ་པས་བགེགས་ཀུན་ཕུར་བུས་བཏབ་ནས་བསྐྲད་པར་བྱའོ། །དེ་ནས་ས་བསླང་བར་བྱ་བའི་ཕྱིར་བསང་གཏོར་བྱས་ནས་ཞེས་པ་ནི་ཡི་གེ་གསུམ་མམ། བདུད་རྩི་ཐབ་སྦྱོར་གྱི་སྔགས་བཟླས་པའི་ཆུས་ས་གཞི་དེ་ལ་གཏོར་བར་བྱའོ། །གསོལ་བ་གདབ་ཅེས་པ་ནི་ཕྱོགས་སྐྱོང་བ་རྣམས་རང་རང་གི་ཕྱོགས་སུ་བསྐྱོད་ལ་རང་བཞིན་ནས་ཕྱོགས་སྐྱོང་བཀུག་ནས་ཉེ་རེག་ལ་སོགས་པའི་བྱ་བ་བྱས་ཏེ་པུས་མོ་བཙུགས་ནས་གཏོར་མ་ཡང་ཟས་སྦྱར་བའི་སྦྱོར་བ་བྱིན་གྱིས་བརླབས་ཏེ་སྔགས་འདིས་དབུལ་ལོ། །ཨོཾ་ཨིནྡྲ་ཡེ་སྭཱ་ཧཱ། ཨོཾ་ཡ་མ་ཡེ་སྭཱ་ཧཱ། ཨོཾ་ཀུ་བེ་རེ་ཡེ་སྭཱ་ཧཱ། །ཨོཾ་ཨགྣ་ཡེ་སྭཱ་ཧཱ། ཨོཾ་ནཻ་རྀ་ཏི་ཡེ་སྭཱ་ཧཱ། ཨོཾ་བ་ཡ་བེ་སྭཱ་ཧཱ། ཨོཾ་ཨི་ཤྭ་ནཱ་ཡ་སྭཱ་ཧཱ། ཨོཾ་ཙནྡྲ་ཨ་ཏེ་བྱ་སྭཱ་ཧཱ། ཨོཾ་སུ་མྦྷ་ནི་སྭཱ་ཧཱ། ཞེས་བརྗོད་ནས། ཨ་ཀཱ་རོ་མུ་ཁཾ་རྦབ་དྷརྨ་ཎཱཾ་ཨཱདྱཱ་ནུ་ཏྤནྣ་ཏྭཱ་ཏ་ཅེས་བརྗོད་དོ། གསོལ་བ་གདབ་པར་བྱའོ། །ཁམས་ན་བཞུགས་པའི་ལྷ་དང་ཀླུ། །གནོད་སྦྱིན་དྲི་ཟ་ལྷ་མ་ཡིན། །གང་དག་རྫུ་འཕྲུལ་ཆེར་ལྡན་རྣམས། །རྡོ་རྗེ་སྤྱན་དང་སྙན་མངའ་བ། །འཐུང་ལ་གནས་པའི་འབྱུང་པོ་ཀུན། །མིང་འདི་ཞེས་ནི་བགྱི་བ་ཡིས། །སངས་རྒྱས་རྣམས་ལ་མཆོད་པ་དང༌། །སེམས་ཅན་རྣམས་ལ་ཕན་སླད་དུ། །ས་ཕྱོགས་དགེ་གནས་འདི་ཉིད་དུ། །དམ་པའི་དཀྱིལ་འཁོར་ཆེར་འབྱུང་བ། །ཇི་ལྟར་བསམས་པའི་ལས་བྱེད་ན། །ཁྱེད་ཀྱིས་བར་ཆད་མ་བྱེད་པར། །དགེ་བའི་གྲོགས་པོ་ཉིད་དུ་མཛོད། །ད་ལྟར་ཁྱོད་ལ་བདག་གིས་ནི། །
བཟོད་པར་གསོལ་གྱིས་མི་སླུ་བར། །མཚན་མ་རྣམས་ནི་བསྟན་དུ་གསོལ། །ཞེས་འཇིག་རྟེན་པའི་ལྷ་རྣམས་ལ་གསོལ་བ་ལན་གསུམ་གྱི་བར་གྱིས་བླང་བར་བྱའོ། །དེ་ནས་རང་གི་ལྷའི་རྣལ་འབྱོར་དང་ལྡན་པས་ཉལ་ནས་རྨི་ལམ་ལ་སོགས་པར་ཐོབ་པ་འམ། ཡང་ན་མ་ཐོབ་ན་མངོན་སྤྱོད་ཀྱི་སྦྱིན་སྲེག་གིས་དགྲ་བགེགས་བཅོམ་པར་བྱའོ། །དེ་རྣམས་འཇིག་རྟེན་ལས་འདས་པ་རྣམས་ལ་བླང་བ་ཏིང་ངེ་འཛིན་གྱི་རིམ་པ་ཞེས་པ་ནི་གོང་དུ་གསུངས་པ། སངས་རྒྱས་ལ་སོགས་ཞེས་པ་ནི་དཀྱིལ་འཁོར་གྱི་ལྷ་ལ་སོགས་པ་ཞེས་པའོ། །ཉན་ཐོས་དང་རང་རྒྱལ་དང་བྱང་ཆུབ་སེམས་དཔའོ། །སྟ་གོན་གནས་ཞེས་པ་ནི་གནས་དེར་དམིགས་ཏེ་ཞེས་པའི་དོན་ཏོ། །ཡོན་དང་ཞེས་པ་ནི་རྩྭ་དཱུར་བ་ཉག་མ་སྔོན་པོ་ཞེས་ལ་སོགས་པ་དང༌། ལྷ་མོ་བཞིས་འཇམ་དཔལ་དང༌། བདུད་རྩི་འཁྱིལ་པའི་བུམ་པ་ལ་སོགས་པ་རྣམས་སོ། །གཏོར་མ་ནི་གོང་དུ་གསུངས་པའི་ཚུལ་གྱིས་བརླབ་པའོ། །དེ་རྣམས་སྟོབས་ནས་མཆོད་པ་ཕུལ་ཏེ་གསོལ་བ་གདབ་པར་བྱའོ། །དགོངས་ཤིག་དུས་གསུམ་མགོན་པོ་རྣམས། །དགྲ་བཅོམ་ཀུན་དང་རང་རྒྱལ་རྣམས། །དེ་བཞིན་བྱང་ཆུབ་སེམས་དཔའ་རྣམས། །སངས་རྒྱས་ཐམས་ཅད་མཆོད་པ་དང༌། །སློབ་མ་རྣམས་ལ་ཕན་དོན་དུ། །དཔལ་ལྡན་འཇམ་དཔལ་རྡོ་རྗེ་ཡི། །དཀྱིལ་འཁོར་དམ་པ་བྲི་བར་འཚལ། །རྒྱལ་བ་སྲས་དང་བཅས་རྣམས་ཀྱིས། །ཡོན་ཏན་གཏོར་མ་བཞེས་ནས་ཀྱང༌། །བདག་ལ་བྱིན་གྱིས་བརླབ་ཏུ་གསོལ། །ཞེས་ལན་གསུམ་དུ་བརྗོད་པར་བྱའོ། །དེ་ནས་དེ་དག་ཞི་བ་ལ་སོགས་པའི་ཐབ་ཅི་ལྟ་བར་སྦྱིན་སྲེག་གིས་ཚིམ་པར་བྱས་ཏེ། དེ་དག་གིས་ཀྱང་ཞལ་གྱིས་བཞེས་པར་བསམས་ལ། ཁུང་བུ་བརྐོ་བའི་ཆེད་དུ་ནམ་མཁའ་ལ་དགོད་པར་བྱའོ། །དེ་ལྟར་བསླང་བ་བྱས་ནས་དེ་ཕྱི་བའི་ཚུལ་གྱིས་སྦྱང་བར་བྱ་བའི་ཕྱིར། ཤིན་ཏུ་བགེགས་མེད་པ་བརྐོས་ཏེ། །ཞེས་པ་དེའི་དོན་ནི་གནས་གྲུབ་བཞི་ཡོངས་སུ་བརྟགས་ནས་ཀླུ་བརྟག་པར་བྱ་སྟེ། དེ་ཡང་རྗེའུ་རིགས་ཀྱི་ཀླུ་ཞིག་སྟོན་གསུམ་དང༌། དགུན་གསུམ་དང༌། དཔྱིད་གསུམ་དང༌། དབྱར་གསུམ་ལ་གོ་རིམས་བཞིན་དུ་མགོ་ཤར་ལ་སོགས་པར་བསྟན་ནས། བརླ་གཡོན་པས་ཉལ་ཏེ་གཡས་སྐོར་དུ་གནས་པར་ཤེས་པར་བྱའོ། །དེ་ཡང༌། མགོ་
ལོགས་བརྐོས་ན་ཕ་སོགས་འཆི། །མཇུག་ཏུ་བརྐོས་ན་ནོར་ཟད་འགྱུར། །རྒྱབ་ཏུ་བརྐོས་ན་རང་ཉིད་འཆི། །ཞེས་འབྱུང་བས་དེའི་མདུན་ཕྱོགས་ཁོ་ནར་མཆོག་དང་རིག་འཛིན་དང་ཕྲ་མོ་གཞན་དང༌། གཞན་གྱི་དབྱེ་བས་གོ་རིམས་བཞིན་དུ་མགྲིན་པ་དང་ལྟོ་བ་དང་པུས་མོ་ནུབ་ཙམ་དུ་བདུད་རྩི་ཐབ་སྦྱོར་དུ་བསྒོམས་པའི་སློབ་མས་འཇོར་གྱིས་བརྐོ་བར་བྱའོ། །དེ་བཞིན་དུ་སློབ་མ་རྣམས་དབང་བསྐུར་བ་ཡང་ཅི་རིགས་པའོ། །དེ་ནས་སོ་ཕག་དང་རུས་པ་ལ་སོགས་པ་བསལ་ཞིང་དེ་ཉིད་གསུམ་དང་བདུད་རྩི་འཁྱིལ་བའི་སྔགས་ཀྱི་བཟླས་པའི་ཚུལ་བསྟན་ནས། དེའི་ཆ་ཉིད་དུ་མངོན་སྤྱོད་ཀྱི་སྦྱིན་སྲེག་གིས་བགེགས་བཅོམ་སྟེ། དེ་ནས་དག་པར་བྱའོ། །གལ་ཏེ་རུས་པ་ལ་སོགས་པ་བསལ་བར་མ་གྱུར་ན། ལག་པས་རེག་སྟེ་དེ་ཉིད་གསུམ་དང་བདུད་རྩི་འཁྱིལ་བའི་སྔགས་ཀྱིས་བཟླས་བརྗོད་བྱའོ། །དེ་བས། ཁུང་བུ་རིམ་པ་འདི་ཡིས་དག །ཅེས་པའོ།། སྔོན་དུ་དུས་རིང་བསྙེན་བྱེད་བ། །ཞེས་པ་ནི། གོང་དུ་སྨོས་པ་རྣམས་སོ། །འཇམ་དཔལ་རྡོ་རྗེ་ཞེས་པ་ནི་ཉི་མའི་མཚན་ཉིད་དོ། །རང་གི་ལྷ་ཡི་ཏིང་འཛིན་གནས། །ཞེས་པས་སོ། །དཀྱིལ་འཁོར་ས་ནི་སྦྱང་བྱ་སྟེ། །ཞེས་བ་ནི་དེའི་སྟེང་དུ་ས་གཞན་དག་ལས་ཇི་ལྟར་རིགས་པའི་སྟེགས་བུ་གྲུ་བཞི་པ་ཁྲུ་གང་ཙམ་དུ་འཕགས་པ་མཛེས་པ་དེའི་ནང་དུ་རིན་པོ་ཆེ་དང་འབྲུ་ལ་སོགས་པ་དང་ལྡན་པར་བྱས་ནས། དམ་ཚིག་རྣམས་དང་ར་བ་ལྡན་པར། །ཞེས་ཏེ་ལྕི་བ་ལ་སོགས་པས་བ་ལང་གི་ཀོ་བའི་ཚད་ཙམ་དུ་བྱུགས་ནས་མེ་ལོང་ལྟ་བུའོ། །དེ་ནས་གནས་ཁང་དེ་དྲི་ཆུས་ཆག་ཆག་བཏབ་ནས། རིན་པོ་ཆེའི་དབུ་རྒྱན་དང་གདུགས་དང་མཛེས་པའི་འབྲས་བུ་དངོས་པོའམ། བཅོས་མ་དང༌། དར་ཁ་དོག་སྣ་ཚོགས་པའི་ཡུག་དང༌། བླ་རེ་དང༌། བ་དན་དང༌། དྲིལ་བུ་དང༌། རྔ་ཡབ་དང༌། པི་ཝང་དང་སྦྲང་ཡབ་ལ་སོགས་པས་བརྒྱན་པར་བྱའོ། །བརྒྱ་བྱིན་ལ་སོགས་པའི་ཕྱོགས་སུ་གོ་རིམས་བཞིན་དུ་རྒྱལ་མཚན་དཀར་པོ་དང༌། སྨུག་པོ་དང༌། ནག་པོ་དང༌། དུང་ཀ་དང༌། དམར་པོ་དང༌། སྣ་ཚོགས་པ་དང༌། སེར་པོ་དང༌། ལྗང་གུ་རྣམས་ཀྱིས་མཛེས་པར་བྱས་པའོ། །དེ་ལྟ་བུའི་གནས་སུ་ཉིན་རེ་བཞིན་དུ་དཀྱིལ་འཁོར་བྲི་བར་བྱའོ། །བགེགས་དགྲའི་ཞེས་བྱ་བ་ལ་སོགས་པས་ནི་ནང་གི་རྣམ་
པར་དག་པའི་ཆོ་ག་གསུངས་པ། དེ་ལ་བགེགས་ཞེས་པ་ནི་གཟུང་བ་དང་འཛིན་པའོ། །དེའི་དགྲ་ནི་ཏིང་ངེ་འཛིན་རྣམ་པར་དག་པའི་བདུད་རྩི་འཁྱིལ་པ་སྟེ། དེའི་དཀྱིལ་འཁོར་ནི་གཙོ་བོར་བྱས་པ་སྟེ་ཇི་ལྟ་བ་བཞིན་དུ་བསྒོམས་ནས་འོད་ཟེར་བསྐུལ་བ་སྔོན་དུ་བྱས་ཏེ་བདག་ལ་རིགས་ཀྱི་བདག་པོས་དབང་བསྐུར་བས་ནི་རྣམ་པར་དག་པའོ། །ཡང་ན། རང་གི་ལྷ་ཡི་སྦྱོར་བ་འམ། །ཞེས་པས་ནི་དམ་ཚིག་ལྷའི་ཏིང་ངེ་འཛིན་མངོན་པར་བྱས་ནས་གོང་བཞིན་དུ་དབང་བསྐུར་བ་བླང་བར་བྱ་སྟེ། བགེགས་རྣམས་ཞེས་པ་ནི་ཀུན་དུ་རྟོག་པའོ། །དེ་བསྐྲད་པ་ནི་སེམས་ལས་མངོན་པར་བསལ་བའོ། །ཨོཾ་བྷཱུ་ཁཾ་ཞེས་པ་ལ་སོགས་པས་ནི་ས་བྱིན་གྱིས་བརླབ་པ་སྟོན་ཏེ། མཁའ་ལ་རི་རབ་འབྱུང་བ་བྱ། །ཞེས་པ་ནི་ཨོཾ་བྷཱུ་ཁཾ་ཞེས་བརྗོད་པས་རྣམ་པར་དག་པའི་ནམ་མཁའ་ལ་བཏེག་དེ་ཉིད་རི་རབ་ལྟ་བུར་བསྐྱེད་པར་བྱའོ། །དེ་ནས་ཧཱུཾ་ལཾ་ཧཱུཾ་ཞེས་བརྗོད་པས་དེ་ཉིད་རྡོ་རྗེའི་བདག་ཉིད་དུ་བསམས་ནས་སྔགས་འདིས་བྱིན་གྱིས་བརླབ་པར་བྱའོ། །ཨོཾ་མེ་དི་ནཱི་བཛྲི་བྷ་བ་བཛྲ་བནྡྷ་ཧཱུཾ་ཞེས་པས་སོ། །ད་ནི་སྟེགས་བུ་དབུས་སུ་སྦྱོར་བ་ཞེས་པ་དང་ལྷན་ཅིག་གམ། ཡང་ན་གཅིག་ཏུ་བསྒོམ་པ་སྤྱོད་པས་ཏིང་ངེ་འཛིན་བསྒོམ་པར་བཀའ་སྩལ་ཏེ། སྔོན་བཞིན་ཞེས་པ་ལ་སོགས་པ་གསུངས་སོ། །སྔོན་བཞིན་ཞེས་པ་ནི་གོང་དུ་བསྙེན་པ་ལ་སོགས་བཞིན་དུའོ། །བགེགས་དགྲ་ཞེས་པ་ནི་ཧཱུཾ་མཛད་ལ་སོགས་པའོ། །དེའི་དོན་ནི་འདི་ལྟ་སྟེ། གོང་མ་བཞིན་དུ་སྲུང་བའི་འཁོར་ལོ་བསྒོམ་པ་ནས། རྗེས་སུ་ཆགས་པའི་མཐའ་ལ་ཐུག་པའི་སྦྱོར་བ་དང་པོ་བྱས་ནས་ཏེ། ཟླ་བར་ཞུ་བ་ལ་སོགས་པའི་རིམ་པས་བདུད་རྩི་འཁྱིལ་བའི་བར་དུ་ཕྱུང་ནས་མཆོད་པ་ལ་སོགས་པ་བྱས་ནས་དཀྱིལ་འཁོར་རྒྱལ་བ་མཆོག་གི་བདག་ཉིད་ཡིན་པ་དང༌། ལས་རྒྱལ་མཆོག་ནི་དཀྱིལ་འཁོར་གྱི་ལས་ས་དག་པར་བྱས་པ་ལ་སོགས་པ་བྱེད་པའོ། །དེ་བས་ན་ལས་ཀྱི་རྒྱལ་བ་མཆོག་ནི་ཕྱོགས་གསུམ་སྟེ། ཐིག་ལ་སོགས་པའི་བསྙེན་པའི་དུས་སུ་གསུངས་པ་དང༌། རི་མོའི་དཀྱིལ་འཁོར་བྲི་བའི་ལས་སློབ་པ་དབང་བསྐུར་བ་དང༌། དངོས་གྲུབ་བསྒྲུབ་པའི་དུས་སུ་གསུངས་པའོ། །དེ་བས་ན་ཏིང་ངེ་འཛིན་གྱི་བདག་ཅེས་པའི་དོན་ཏོ། །དཀྱིལ་འཁོར་ས་ཡི་དབུས་སུ་ནི། །རོལ་པ་དང་ལྷའི་འཁོར་ལོ་
འབྱིན་པ་དང་དྲི་བ་དང་བསྡུ་བ་དང་གཞི་ལ་གཞག་པ་དང༌། མཆོད་པ་ལ་སོགས་པ་དང་ལྡན་པར་ཨོཾ་བཛྲ་ཨཱཏྨ་ཀོ྅ཧཾ། ཨོཾ་སྭ་བྷཱ་བ་བི་ཤུདྡྷོ྅ཧཾ། ཨོཾ་སརྦྦ་དྷརྨོ྅ཧཾ་ཞེས་བརྗོད་པས་སངས་རྒྱས་ཀུན་བདག་རང་བཞིན་གྱིས་དག་པ་དང༌། །རྡོ་རྗེའི་བདག་ཉིད་དུ་མོས་ནས་ང་རྒྱལ་བྱའོ། །ང་ཉིད་ཁོ་ན་རྡོ་རྗེ་ཅན། །ང་ཉིད་རྡོ་རྗེ་སེམས་དཔའ་བདག །སངས་རྒྱས་རྒྱལ་པོ་ཆེན་པོའི་བདག །རྡོ་རྗེ་ཅན་དང་སྟོབས་པོ་ཆེ། །དབང་ཕྱུག་རྒྱལ་པོ་རྣལ་འབྱོར་དང༌། །ང་ནི་བརྟན་པ་ཕྱག་རྡོ་རྗེ། །རྡོ་རྗེ་ཅན་ཆེན་བདག་ལྔ་བདག །ཅེས་བརྗོད་ནས་སེམས་ལ་དོན་གཟུང་བར་བྱའོ། །དེ་ལྟར་གནས་པ་ལ་སོགས་པའི་སློབ་མ་བཞིས་དངོས་སུ་འམ་སེམས་ཀྱིས་མཆོད་ནས་ཞུ་བ་གསོལ་བར་བྱའོ། །དེ་བཞིན་གཤེགས་པ་ཀུན་གྱི་རང་བཞིན་ཡིན་པས་ན་ཞི་བ་སྟེ་གཟུང་བ་ལ་སོགས་པ་མེད་པ་དེ་ནི་སྐུ་རྡོ་རྗེའོ། །དེ་བཞིན་གཤེགས་པ་དེ་ཡང་གང་ཞེ་ན། ཀུན་གྱི་གནས་ནི་ཀུན་གྱི་བདག་པོར་གྱུར་པ་སྟེ་ཐུགས་རྡོ་རྗེའོ། །ཕྱོགས་ཀུན་བདག་མེད་པ་ནི་རྣམ་པར་དག་པ་སྟེ་གསུང་རྡོ་རྗེའོ། །དེ་ལྟ་བུའི་དཀྱིལ་འཁོར་དམ་པ་བཤད་དུ་གསོལ་སྤྱིར་ཞུས་པའོ། །དེ་བཞིན་དུ་ཁྱད་པར་དུ་གྲུ་བཞི་པ་ལ་སོགས་པའི་མཚན་ཉིད་ཐམས་ཅད་ཡོངས་སུ་རྫོགས་པ། གྲུ་བཞི་མ་ཡིན་པ་ལ་སོགས་པའི་མཚན་ཉིད་མེད་པ་ཐམས་ཅད་སྤངས་པ་དེ་ཡང་གང་ཞེ་ན། ཀུན་དུ་བཟང་པོ་ཞེས་པ་ནི་རྡོ་རྗེ་འཆང་ཆེན་པོའོ། །དེའི་སྐུའི་དཀྱིལ་འཁོར་གྱི་མཆོག་བཤད་དུ་གསོལ་ཞེས་པའོ། །ཞི་བའི་ཆོས་ཞེས་པ་ནི་བདག་མེད་པའོ། །དེ་ཉིད་མཆོག་སྟེ་དེ་ལས་ཡང་དག་པར་འབྱུང་བ་ནི་གསུང་གི་དཀྱིལ་འཁོར་རོ། །དེ་ཉིད་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་སྤྱོད་ཡུལ་ཡིན་པས་རྣལ་འབྱོར་པ་ཞེས་སོ། །སེམས་ཅན་ཀུན་གྱི་ཞེས་པ་ནི་སངས་རྒྱས་དང་སེམས་ཅན་ནོ། །དེའི་སེམས་ཆེན་པོ་ནི་ཐུགས་རྡོ་རྗེའི་རང་བཞིན་ནོ། །དེ་ཉིད་རང་བཞིན་དག་པས་དྲི་མ་མེད་ཅེས་པའོ། །དེ་ལྟར་ལན་གསུམ་དུ་ཞུས་པ་དེས་ལངས་ནས་ལུས་ངག་ཡིད་གསུམ་གྱི་སྦྱོར་བས་བགེགས་བསྐྲད་གསུངས་པ། འཇམ་རྒྱལ་ཞེས་པ་ལ་སོགས་པའོ། །འཇམ་རྒྱལ་ཁྲོ་བོ་ཞེས་པ་ནི་དེ་ཉིད་དེ་མ་ཐག་ཏུ་ཧཱུཾ་མཛད་ཀྱི་བདག་ཉིད་ཡིན་པའི་ཕྱིར་དེས་བལྟས་ནས་ཞེས་སོ། །གང་ལ་ཞེ་ན་རང་དང་འདྲེས་པའི་སེམས་
ཅན་ཁམས་ཞེས་པ་སྟེ། སྲིད་པ་ཐམས་ཅད་འཇམ་དཔལ་རྡོ་རྗེའི་རང་བཞིན་དུ་འདྲེས་ཤིང་གནས་པ་ལ་གློ་བུར་དུ་ཉོན་མོངས་པ་རྣམས་ཀྱིས་བསྒྲིབས་ཏེ། དེའི་ཕྱིར་དེ་ལས། བགེགས་གཤེད་ཀྱི་ངོ་བོར་ཁྲོས་ཞེས་པའོ། །སྤྱན་ལ་ཧཱུཾ་བཀོད་རྡོ་རྗེ་བསྟན། །ཞེས་པ་ནི་མིག་གཡས་པ་མ་ལས་ཉི་མར་བསམ་གཡོན་པར་ཊ་ལས་ཟླ་བའི་དཀྱིལ་འཁོར་དུ་བསྒོམས་ཏེ། དེའི་སྟེང་དུ་མིག་འབྲས་ཧཱུཾ་ལས་འབར་བའི་རྩེ་ལྔ་པར་བསྒོམ་ཞེས་པའོ། །གྲོལ་བའི་དཀྱིལ་འཁོར་སྤྲུལ་པར་བྱ། །ཞེས་པ་ནི་རྡོ་རྗེ་ལས་ནམ་མཁའི་ཁམས་ཐམས་ཅད་ཁྲོ་བོའི་དཀྱིལ་འཁོར་གྱིས་ཁྱབ་པར་སྤྲུལ་པར་བྱའོ། །བློ་ལྡན་ཞེས་པ་ནི་སྦྱོར་བ་ཞེས་པའོ། །འགྲོ་ཀུན་ལྟར་ཞེས་པ་ནི་གོང་མའི་རིམ་པས་ཤེས་སོ། །དཀྱིལ་འཁོར་ས་གཞི་སྟང་སྟབས་བསྐོར། །ཞེས་པ་ནི་གཡས་བརྐྱང་བའི་རིམ་པས་སོ་སོའི་ཚུལ་སྤྱོད་པའོ། །རྐང་མཐིལ་རྡོ་རྗེ་འབར་བསྒོམས་ཏེ། །ཞེས་པ་ནི་རྐང་པ་གཉིས་སུ་བལྟས་ལ་སྣ་ཚོགས་རྡོ་རྗེ་འབར་བ་བསྒོམ་མོ། །ལག་པས་རྡོ་རྗེ་ཞེས་པ་ནི་ཉེ་བར་མཚོན་པ་ཙམ་གྱིས་དྲིལ་བུ་དང་བཅས་པའོ། །ཧཱུཾ་མཛད་པས་ཞེས་པ་ནི་ཧཱུཾ་གི་ང་རོ་སྒྲོགས་པའོ། །ལྟ་སོགས་ཞེས་པ་ལ་སོགས་པ་ནི། ས་ལ་གནས་པའི་བགེགས་ལ་སོགས་པའོ། །ཚིག་ཏུ་ཡང་འདི་སྐད་བརྗོད་དོ། །ཉོན་ཅིག་ཅེས་པ་ལ་སོགས་པའོ། །ལུས་ངག་ཡིད་གསུམ་ལ་གནས་པའི་ཞེས་པ་ནི་གཡས་བརྐྱང་བ་ལ་སོགས་པས་བགེགས་འཇོམས་པ་ནི་ལུས་ཀྱིའོ། །བསྐལ་བ་ཟང་པའི་དུས་ཀྱི་འབྲུག་ལྟ་བུའི་སྒྲ་སྒྲོགས་པ་ནི་གསུང་གིའོ། །དངོས་པོ་ཐམས་ཅད་ཟབ་མོར་དམིགས་པ་ནི་ཐུགས་ཀྱིའོ། །དེ་ལྟ་བུ་ལ་གནས་པའི་འཇམ་དཔལ་བདག་གིས་སྲུང་བའི་འཁོར་ལོ་བྱེད་ཅེས་པས་སོ། །འདོད་གསུམ་བསྐྱེད་ལུས་ཞེས་པ་ནི་འདོད་པའི་ཁམས་ཁོ་ན་ལ་ཁམས་ཡོད་པའི་ཕྱིར་རོ། །དེ་ལྟ་བུའི་རིམ་པས་ས་ལ་ཡོངས་སུ་བསྐོར་བར་བྱ་སྟེ། དེ་ནས་བགེགས་མེད་པར་བྱ་བའི་ཕྱིར་ཕུར་བུས་གདབ་པར་བྱའོ། །ཇི་ལྟ་བུ་ཞེ་ན་སྟོད་དགྲ་ཞེས་པ་ལ་སོགས་པའོ། །དེ་ཡང་སེང་ལྡེང་ལ་སོགས་པའི་ཕུར་བུ་དྲི་དམར་པོས་བྱུག་ཅིང༌། སྲད་བུ་དམར་པོ་ལ་མེ་ཏོག་གི་ཕྲེང་བ་བཏགས་ལ། སྟོད་བགེགས་དགྲ་སྟེ་བདུད་རྩི་འཁྱིལ་པ་ལྟ་བུ་ལ་སྨད་གསལ་ཤིང་སྟེ། ཟུར་གསུམ་པ་ལྟ་བུར་བསམས་ནས་
དཀྱིལ་འཁོར་གྱི་དབུས་སུ་གདབ་པར་བྱའོ། །དེ་ལས་འོད་ཟེར་འབར་བས་འཁྲུག་ཅིང་འབར་བའི་ཕྱོགས་བཅུ་ན་གནས་པའི་བགེགས་ཐམས་ཅད་བཅོམ་པར་འགྱུར་རོ། །ཡང་ན་མཚམས་དང་ར་བ་དྲ་བས་ཕྱོགས་བཅིང་ཞེས་པ་ནི་སྲུང་བའི་འཁོར་ལོའི་སྦྱོར་བསར་བ་དྲ་བ་དང་ས་གཞིར་བསྒོམས་ནས་འཁོར་ལོ་བསྒོམ་པར་བྱ་སྟེ་ས་བསྲུང་བར་བྱའོ། །སྟ་གོན་བྱ་བ་ནི་ཞེས་པ་ནི་ས་བོན་གྱི་ཕྱག་རྒྱ་དཀྱིལ་འཁོར་གྱི་ས་ལ་བཞག་སྟེ། ཨོཾ་ཊཀྐི་ཧཱུཾ་ཛ་ཞེས་བརྗོད་པས་སའི་ལྷ་མོ་སྐུ་མདོག་གསེར་ལྟ་བུ་ཕྱག་ན་གསེར་གྱི་བུམ་པ་བསྣམས་པ་རྒྱན་ཀུན་གྱིས་བརྒྱན་པ་རྣམ་པར་སྣང་མཛད་དང་ལྡན་པས་སའི་ལྷ་མོ་ལུས་ཕྱེད་ཐོན་པར་བསམས་ཏེ། མེ་ཏོག་ལ་སོགས་པས་མཆོད་ནས་འདི་སྐད་དུ་སྦྲན་ནོ། །སྐྱོབ་པ་སངས་རྒྱས་ཐམས་ཅད་ཀྱིས། །ཞེས་པ་ལ་སོགས་པ་ལན་གསུམ་དུ་བརྗོད་དོ། །དེ་ནས་དེ་ཉིད་དགྱེས་ཏེ་ཞལ་གྱིས་བཞེས་ནས་དེ་ཉིད་དུ་ཐིམ་པར་བསམ་མོ། །ས་དག་པར་བྱ་བའི་ཆོ་གའོ། །ལྷ་སྟ་གོན་ཏུ་གནས་པ་གསུངས་པ། དྲི་ཞིམ་ཞེས་པ་ལ་སོགས་པའོ། །དྲི་ཞིམ་སོགས་ཀྱིས་བསྐུས་ཞེས་པ་ནི་ཙནྡན་དང་གུར་ཀུམ་ལ་སོགས་པས་ས་བྱུག་ས་ནས་ཞེས་སོ། །དེ་བཞིན་དུ་ཁ་དོག་དང་དབྱིབས་སྣ་ཚོགས་པའི་མེ་ཏོག་གིས་ཀྱང་རབ་ཏུ་བཀྲམ་ལ་ཟླ་བ་ལ་སོགས་པས་ཞེས་ཏེ། བྱང་ཆུབ་སེམས་ལ་སོགས་པ་དང་དྲི་ཞིམ་པོ་བསྲེས་པས་ལྷའི་གདན་ཞེས་པ་ནི་ལྷ་བཅུ་དགུའི་གྲངས་དང་མཐུན་པའི་ཐིག་ལེ་རང་གི་སྔགས་ལན་བདུན་བདུན་བཟླས་པས་མཎྜལ་རབ་ཏུ་བྱ་ཞེས་སོ། །དེ་ལ་དཀྱིལ་འཁོར་རབ་ཏུ་བཀུག་ནས་ཞེས་པ་ལ་དེའི་དོན་ནི་འདི་ལྟ་སྟེ། ལྷག་པར་མོས་པ་ལ་སོགས་པས་དམ་ཚིག་གི་འཁོར་ལོ་རྫོགས་པར་བཀོད་ལ་མཚན་ཡང་འདི་བཞིན་དུ་བྲིས་པར་བསྐྱེད་དོ། །སྐྱེས་དོན་དང་ལྡན་དེ་རིང་བདག །བདག་གི་གསོལ་བའི་འབྲས་བུ་འདི། །དམ་ཚིག་ལྷ་དང་བདག་མཉམ་མོ། །བདག་གི་ཐེ་ཚོམ་མེད་པར་འགྱུར། །ཕྱིར་མི་ལྡོག་པར་བདག་འགྱུར་བ། བྱང་ཆུབ་སེམས་དཔའ་ད་དགོངས་ཤིག །དེ་བཞིན་གཤེགས་པའི་རིགས་སུ་ནི། །སྐྱེ་བར་བདག་ནི་ཐེ་ཚོམ་མེད། །དེ་རིང་བདག་གི་ཉི་མ་མཚོན། །མཆོད་སྦྱིན་འདི་ནི་བླ་ན་མེད། །དེ་རིང་བདག་གི་ཚོགས་པ་མཆོག །ཅེས་བརྗོད་ནས་སྙན་གསན་ཡང་དབབ་པར་བྱའོ། །མ་ལུས་ཕྱོགས་ན་བཞུགས་པ་རྣམས།།
སངས་རྒྱས་བདག་ལ་དགོངས་སུ་གསོལ། །ཆེ་གེ་མོ་བདག་རྡོ་རྗེ་ཅན། །བདག་གིས་དཀྱིལ་འཁོར་བྲི་བར་འཚལ། །སངས་རྒྱས་ལ་སོགས་འདིར་བྱོན་ནས། །བདག་ལ་དངོས་གྲུབ་སྩལ་དུ་གསོལ། །ཞེས་དགུག་གོ །དེ་ནས་མཚམས་ལ་སོགས་པ་བཅིངས་ནས། བཅིང་བ་དང་དབང་དུ་བྱ་བ་བྱས་ནས་ཉེ་བར་སྒྲུབ་པ་ལ་སོགས་པ་མཚོན་ནས་མཆོད་པ་དང་བསྟོད་པ་དང༌། བདུད་རྩི་མྱང་བ་བྱས་ནས་འོག་ནས་བྱུང་བའི་ཚིགས་སུ་བཅད་པས་ཀྱང་ལན་གསུམ་གསོལ་བ་གདབ་པར་བྱའོ། །བུམ་པ་སྟ་གོན་དུ་གནས་པ་གསུངས་པ། བུམ་པ་ཞེས་པ་ལ་སོགས་པའི་བུམ་པ་ཞེས་པ་ནི་གསེར་ལ་སོགས་པའམ། ཁམ་གྱི་རྒྱུ་ལས་བྱས་པའི་བུམ་པ་ལྟོ་བ་ཆེ་བ་མགྲིན་པ་ཁ་ཁྱེར་དང་ལྡན་ཞིང་མཆུ་འཕྱང་བ། ཞབས་བརྟན་པ། ནག་ནོག་མེད་པ། རྟ་མགྲིན་དུ་གནས་པར་བྱའོ། །མགུལ་པ་རས་ཀྱིས་ཡང་དག་དཀྲིས། །ཞེས་པ་ནི་རས་ཁ་ཚར་མ་ཉམས་པས་མགུལ་བཅིངས་སོ། །ཙཱུ་ཏ་ཡལ་ག་ལ་སོགས་ལྡན། །ཞེས་པ་ནི་འབྲས་བུ་ཅན་གྱི་ཤིང་གིས་ཁ་བརྒྱན་པ་ཞེས་སོ། །བུམ་པ་དཀྱིལ་འཁོར་ལྷ་རྣམས་ཀྱི། །ཞེས་པ་ནི་འཆད་པའི་བུམ་པ་ལྷའི་གྲངས་ངང་མཐུན་པར་བྱས་ལ་རང་རང་གི་སྔགས་ཀྱིས་སྟ་གོན་དུ་གནས་པར་བྱའོ། །རྫས་འདི་རྣམས་ཚོགས་པས་དབང་བསྐུར་བའི་བུམ་པ་རྟ་མགྲིན་དུ་གནས་པར་བྱ་སྟེ། །འབྲུ་ལྔ་ཞེས་པ་ནི་གྲོ་དེང་ནས་དང་ཏིལ་དང་འབྲས་དང་མོན་སྲན་གྲེའུའོ། །སྨན་ལྔ་ཞེས་པ་ནི་སིང་ཀྲི་དང་ཧ་ས་དང༌། དེ་བ་དང༌། ཀརྟི་ཀའོ། །རིན་ཆེན་ལྔ་ཞེས་པ་ནི་བྱི་རུ་དངས་ལེ་སྦྲམ་དང་དུང་དང་མུ་ཏིག་དང་ནོར་བུའོ། །དེ་རྣམས་ནི་གཞན་ཡང་རྟག་པར་བྱའོ། །འཁོར་ལ་དྲི་ཆུ་ལ་བསྡུས་པ། །ཞེས་པ་ནི་བུམ་པ་གཞན་ལས་ཡོན་གྱི་སྣོད་རེ་རེ་བསྡུ་བར་བྱའོ། །དེའི་སྟེང་དུ་སྣ་ཚོགས་ཀྱི་ཕྲེང་བས་བཅིངས་པའི་རྡོ་རྗེས་བརྒྱན་པར་བྱའོ། །དེའི་མིང་ནི་རྣམ་པར་རྒྱལ་བའི་བུམ་པ་ཞེས་བྱ་སྟེ། དཀྱིལ་འཁོར་གཙོ་བོའི་སྔགས་ཀྱིས་བཟླས་པར་བྱའོ། །དེ་བཞིན་དུ་བསང་བྱེད་ཀྱི་བུམ་པ་ལ་བདུད་རྩི་འཁྱིལ་བའི་སྔགས་ཀྱིས་བཟླས་པར་བྱའོ། །དེ་རྣམས་ཀྱང་ཙནྡན་དཀར་པོས་བྱུག་ཅིང་སྤོས་བསྲེགས་ནས་སྦྱར་བའི་དྲི་ཞིམ་པོའི་ཆུས་བཀང་བ། ཡི་གེ་བཾ་ལས་བསྐྱེད་པ། ཧྲཱི་ལས་གྱུར་པའི་པདྨ་ལ། ཨ་ལས་ཟླ་བ་དང༌། ཉི་མའི་གདན་ལ་འབྲུ་ལྔ་པ་ལ་
སོགས་པ་ས་བོན་དང་ཕྱག་མཚན་གྱི་རིམ་པས་སྐུ་རྫོགས་པར་བསྐྱེད་ལ། ཡེ་ཤེས་ཀྱི་འཁོར་ལོ་བཀུག་ནས་བསྟིམ་སྟེ། དེ་ནས། ཡོན་ཕུལ་ནས་ནི་མཆོད་བྱས་ཏེ། །ཞེས་པ་ནི་བསང་གཏོར་ལ་སོགས་པའི་བྱ་བ་དང་མཆོད་པ་ལྔ་ལ་སོགས་པས་མཆོད་པའོ། །མེ་ཏོག་དཀར་པོ་གཏོར་བ་དང༌། །ཞེས་པ་ནི་མེ་ཏོག་དཀར་པོ་ཁ་ཅིག་དབང་བསྐུར་བའི་བུམ་པའི་ནང་དུ་གཏོར་བ་སྟེ་མན་ངག་གོ །གནས་དེར་སྤང་སྤོས་བསྲེག་པའི་སྣོད་ལ་སོགས་པ་ཡང་གཞག་པར་བྱའོ། །ཉིན་རེ་ཡི་ནི་མཚན་གསུམ་ལ། །ཞེས་པ་ནི་སྔ་དྲོ་དང་གྲོ་རན་དང་ཕྱི་འཕྲེད་དོ། །གཏོར་མ་ཕུལ་ནས་ཞེས་པ་ནི། ཟས་སྦྱོར་བའི་རིམ་པས་སྦྱར་བའི་གཏོར་མ་ཡང་ཐུན་མཚམས་སུ་དབུལ་བར་བྱའོ་ཞེས་སོ། །དེ་བཞིན་བཟླ་ཞེས་པ་ནི་གོང་མ་བཞིན་དུ་སོ་སོའི་བཟླས་པ་བྱའོ། །དེ་ནས་དགོད་པའི་གནས་གསུངས་པ། དེ་དག་དཀྱིལ་འཁོར་གྱི་གྲྭ་ལ་བཀོད་ལ་གཡས་སུ་སྟེ་ཤར་ལྷོ་མཚམས་སུ་བཞག་སྟེ་མི་གཡོ་བའི་ཏིང་ངེ་འཛིན་དུ་བྱའོ། །དེ་བཞིན་དུ་གཡོན་དུ་བསང་བྱེད་ཀྱི་བུམ་པ་བཞག་ལ་བགེགས་ཟློག་ཏུ་གསོལ་ཞེས་ལས་བཅོལ་ལོ། །དེ་ནས་གཡོན་གྱི་སྣོད་ལ་ཆུ་བླུགས་ནས། །ཞེས་པ་ནི། དབང་བསྐུར་བའི་བུམ་པ་ལ་བྱ་སྟེ་གོང་དུ་བཤད་ཟིན་ཏོ། །བདག་གིས་སློབ་མ་ཐམས་ཅད་ལ། །ཆུ་ཡི་དབང་བསྐུར་བྱེད་པར་འགྱུར། །ཞེས་པ་ནི་དུས་གཞན་དུ་བྱེད་པར་འགྱུར་རོ་ཞེས་པའོ། །དཀྱིལ་འཁོར་མཆོད་པ་ཡང་བྱ་སྟེ། །ཞེས་པ་ལ་སོགས་པ་ནི་གོང་དུ་བཀུག་པ་རྣམས་ལ་སྙན་གསན་དབབ་པར་སྟོན་ཏོ། །དེ་ཁོ་ན་གོང་དུ་གསུངས་པའི་དེ་ཉིད་འདིར་ཡང་ཤེས་པར་བྱའོ། །མཆོད་པ་ཞེས་པ་ནི་ཉེ་བར་མཚོན་པ་སྟེ་བསྟོད་པ་དང་བདུད་རྩི་མྱང་བ་ཡང་ཤེས་པར་བྱའོ། །ལག་པར་པོག་ཕོར་བསྲེགས་ནས་སུ། །པུས་མོ་བཙུགས་ཞེས་པ་ནི་བདག་ཉིད་དབུས་ཀྱི་གཙོ་བོའི་ང་རྒྱལ་དང་ལྡན་པ་ཉིད་ཀྱི་ཐུགས་ཀ་ནས་ལས་ཀྱི་རྡོ་རྗེའི་གཟུགས་སུ་ཕྱུང་ནས་སོ། །དེས་ཅི་བྱེད་ན། དཀྱིལ་འཁོར་གཙོ་ཞེས་པ་ནི་བདག་འཇམ་དཔལ་གྱི་ངོ་བོར་གནས་པ་ལའོ། །སངས་རྒྱས་ཞེས་པ་ནི་རྟག་པ་ལ་སོགས་པ་སྟེ་དེ་རྣམས་ལ་སྙན་གསན་དབབ་པར་བྱའོ། །བཅོམ་ལྡན་འདས་འཇམ་པའི་རྡོ་རྗེ་ཞེས་བྱ་བ་ལ་སོགས་པ་ནས། བྱིན་གྱིས་བརླབ་པར་
མཛད་དུ་གསོལ། །ཞེས་པ་ལན་གསུམ་དུ་གསོལ་བ་གདབ་པར་བྱའོ། །ཁྱབ་བདག་ཅེས་པ་ནི་དཀྱིལ་འཁོར་གྱི་ལྷ་རྣམས་ཀྱི་རང་བཞིན་ནོ། །མཆོད་སོགས་ཞེས་པ་ནི་བསྟོད་པ་ལ་སོགས་པའོ། །བསྲུངས་ནས་ཞེས་པ་ནི། ཕྱིར་འབྱུང་བའི་དུས་སུ་དྲན་པ་ལ་སོགས་པས་སོ། །སློབ་མ་སྟ་གོན་དུ་གནས་པ་གསུངས་པ། རང་གི་སློབ་མ་བརྟགས་ནས་གཟུང༌། །ཞེས་པ་ལ་སོགས་པའོ། །ཇི་ལྟ་བུ་ཞེ་ན། བློ་དང་ལྡན་པ་ཐེག་པ་ཆེན་པོ་ལ་མཆོག་ཏུ་དགའ་བ་ཆེན་པོ་དང་ལྡན་པ་བཀའ་དྲིན་ཆེན་པོ་རྗེས་སུ་དྲན་པ་ང་རྒྱལ་མེད་པའི་རིགས་ཅན་ཞེས་པ་ནི་བྲམ་ཟེ་ལ་སོགས་པའི་ཁྱད་པར་ཅན་ནོ། །ཕྱི་ནང་གི་ཡོན་ཏན་དང་ལྡན་ཞིང་དད་པ་ཆེ་བ། གཟུགས་ལ་སོགས་པ་གཞོན་པས་བརྒྱན་པ་སྟེ། འདི་རྣམས་ནི་བསྟན་པས་མཆོག་ཏུ་གཟུང་བར་རྒྱལ་བས་གསུངས་སོ། །དེ་བཞིན་དུ་བདེ་བར་གཤེགས་པ་སྔགས་ཀྱི་དངོས་གྲུབ་སྒྲུབ་པ་ལ་འདོད་པ་མངོན་དུ་ལྡན་པ་སྟེ། ལྷག་པར་མོས་པ་ཡོད་ན་ངན་ཞིང་ཡོན་ཏན་མེད་པ་དང་རིགས་དམན་པ་ཡིན་ཡང་གཟུང་བར་བྱ་བ་ཡིན་ནོ་ཞེས་པའོ། །དཀྱིལ་འཁོར་འཁོར་ལོ་རིམ་པ་འདི། །ཞེས་པ་ནི་དཀྱིལ་འཁོར་འཁོར་ལོའི་རིམ་པ་འདི་ལ་མོས་པ་དང་ལྡན་པ་བཞི་རྣམས་ལ་ཡང་ལུང་དུ་བསྟན་ན་ཞེས་པ་སྟེ། དགེ་སློང་དང་དགེ་སློང་མ་དང༌། དགེ་བསྙེན་དང་དགེ་བསྙེན་མ་ལ་ཡང་ངོ༌། །ཐམས་ཅད་ཀྱང་འདི་རྣམས་དང་ལྡན་ན་དཀྱིལ་འཁོར་དུ་ཞུགས་པར་བྱ་སྟེ་བསླབ་དང་ཞེས་པ་ལ་སོགས་པའོ། །དེ་ལས་གཞན་པའི་སློབ་མ་བསོད་ནམས་འདོད་པ་དང་ཚེ་འདིའི་སྲིད་རྣམས་འདོད་པའོ། །དེ་ཡང་ཚེ་ཕྱི་མའི་བསོད་ནམས་ནི་ཚེ་ཕྱི་མར་རིགས་རྒྱས་པ་ལ་སོགས་པའོ། །ཚེ་འདིའི་འདིར་བགེགས་ཀྱི་འཚེ་བ་བཟློག་པ་ལ་སོགས་པའོ། །ཚེ་འདིར་འབྲས་བུ་རྒྱས་པ་ཡིན། །ཞེས་པ་ནི་ཞར་ལས་འབྱུང་བ་ཡིན་ནོ་ཞེས་པའོ། །དེ་ལྟར་གནོད་དང་གནོད་མ་ཡིན་པ་སློབ་མ་ལ་སྨས་ནས། སློབ་དཔོན་རང་གི་ཁང་པའི་ནང་དུ་འགྲོའོ། །སྔོན་བཞིན་རྡོ་རྗེ་ཆུ་སྐྱེས་དག །ཅེས་པ་ནི་དེའི་ཚེ་དེ་རྣམས་མེའི་དཀྱིལ་འཁོར་གྱི་སྟེང་དུ་བཞག་ལ། སྙིང་ག་ན་གནས་པའི་རའི་མེས་ཐལ་བར་བྱས་ཏེ། རྣམ་པར་ཤེས་པ་ཡི་གེ་གསུམ་དུ་གནས་པ་དེ་ཉིད་ཞལ་དུ་ཞུགས་ནས་རྡོ་རྗེའི་ལམ་ནས་ཆུ་
སྐྱེས་ཀྱི་ནང་དུ་བབ་སྟེ་དབང་པོ་རྒྱས་པར་བྱས། ཐབས་དེས་དག་པར་བྱས་ནས་བསྡུས་ཏེ། དེས་ཁང་པའི་སྒོ་རུ་ཚིགས་སུ་བཅད་པ་འདིས་གསོལ་བ་ལན་གསུམ་གདབ་པར་བྱའོ། །དེ་ཡང་གང་ཞེ་ན། སྟོན་ཆེན་ཁྱེད་ལ་བདག་དགའོ། །ཞེས་བ་ནས་ཞུགས་པར་མཛོད་ཅེས་པའི་བར་དུའོ། །ཆགས་ལྡན་སློབ་མ་མཛེས་པའོ། །ཞེས་པ་ནི་ཟབ་མོའི་དོན་ལ་ཆགས་པ་དང་ལྡན་པའོ། །སློབ་མའི་གཙོ་བོ་གཅིག་པུ་ནི། །ཞེས་པ་ནི་སློབ་མ་དམ་པ་ཅིག་གཙོ་བོར་བྱས་ནས། དེ་ལ་སོགས་པ་རྣམས་ལ་ཚིག་འདི་སྐད་དུ་སྨྲ་བར་བྱའོ། །བུ་འདིར་ཤོག་ཅིག་ཐེག་ཆེན་གྱི། །ཞེས་པ་ནས། ཐམས་ཅད་མཁྱེན་པ་ཐོབ་པར་གྱིས། །ཞེས་པའི་བར་བརྗོད་པར་བྱའོ། །རྣམ་པ་གསུམ་དང་བཤགས་སོགས་པ། །ཞེས་པ་ལ་སོགས་པས་ནི་འདི་སྟོན་པར་བྱེད་དོ། །སློབ་མ་རྣམས་སྡིག་པ་བཤགས་པ་ལ་སོགས་པ་ཡང་ཚིག་འདིར་གཞུག་གོ །ཐོག་མ་མེད་ལྡན་སྲིད་རྒྱུད་ལ། །རྙོག་པས་བསགས་པའི་སྡིག་ཀུན་གང༌། །སྙིང་རྗེ་ཆེན་པོ་བདུན་རིམ་བཞིན། །དེ་དག་ཐམས་ཅད་བཤགས་པར་བྱ། །སངས་རྒྱས་བྱང་ཆུབ་སེམས་རྣམས་དང༌། །འཕགས་པ་གཞན་གྱི་དགེ་བ་གང༌། །མ་ལུས་བདག་གིས་ཡི་རངས་ཏེ། །ཡང་དག་བྱང་ཆུབ་ཕྱིར་བསྔོའོ། །སངས་རྒྱས་ཐམས་ཅད་དབུགས་འབྱིན་པར། །སངས་རྒྱས་ཀུན་ལ་གསལ་བྱས་ཏེ། །ནམ་མཁའི་དབྱིངས་ལ་བརྟན་དུ་ཤིས། །འཇིག་རྟེན་ཀུན་དང་སྡིག་མེད་མཛོད། །ཟླ་རྒྱས་དྲི་མེད་འདྲ་སེམས་ལས། །གྲུབ་པ་མཐའ་ཡས་སྙིང་རྗེ་ཐབས། །རྟག་ཏུ་བདག་ཡིད་ལ་གནས་པའི། །སངས་རྒྱས་ཀུན་ལ་སྐྱབས་སུ་མཆིའོ། །རྟོག་པ་ཀུན་ལས་ངེས་གྲོལ་བ། །མ་ལུས་ཀུན་གྱི་བཀྲ་ཤིས་བཞི། །དངོས་པོ་ཀུན་དགའ་རང་བཞིན་གཅིག །བདག་ནི་ཆོས་ལ་སྐྱབས་སུ་མཆི། །བཅིངས་པ་ཡང་དག་སྤངས་པ་ཡི། །དཔལ་ལྡན་སྙིང་རྗེ་མཆོག་ལྡན་པ། །རབ་དགའ་ལ་སོགས་སར་གནས་པའི། །འདུལ་དབང་མཆོག་ལ་སྐྱབས་སུ་མཆི། །བསམ་དང་རྣམ་སྨིན་དག་པ་ཡི། །སྒྲིབ་ཀུན་བག་ཆགས་བཅོམ་པ་སྟེ། །མོས་པས་རྣམ་པར་བརྒྱན་སེམས་ཀྱིས། །བྱང་ཆུབ་སེམས་ནི་བསྐྱེད་པར་བགྱི། །བདེ་གཤེགས་སྲས་གཅིག་ལམ་གཅིག་པོ། །བྱིན་སོགས་བཅུ་པོ་དཀར་པོ་ལ། །སངས་རྒྱས་ཀུན་
དག་རང་བཞིན་བློས། །ད་ལྟར་བདག་གིས་བརྟེན་པར་བགྱི། །བདག་ཀྱང་ཐམས་ཅད་མཁྱེན་གྱུར་ཏེ། །དབང་ཕྱུག་གོ་འཕང་ཐོབ་ནས་ནི། །འགྲོ་བ་མ་ལུས་ཡོངས་སུ་བསྒྲལ། །སངས་རྒྱས་ཐོབ་པར་བགྱི་སླད་དུ། །འཁོར་བའི་རྒྱ་མཚོ་ལས་སྒྲོལ་ཏེ། །བདག་གིས་སྟོབས་ཀྱི་ནུས་པ་དང༌། །སྨོན་ལམ་ལ་ཡང་མི་ཆགས་ཀྱི། །དངོས་གྲུབ་ཐམས་ཅད་ཐོབ་བྱའི་ཕྱིར། །ཐབས་ནི་རྟག་ཏུ་བྱེད་པའི་བདག །ཕུན་སུམ་ཚོགས་པའི་གཙོར་གྱུར་ཅིག །བདག་གི་སྨོན་ལམ་འདི་ཡིས་ནི། །ཇི་སྙེད་འགྲོ་བ་མ་ལུས་ཀུན། །བདེ་འགྲོའི་གོ་འཕང་ཐོབ་པར་ཤོག །ཅེས་ལན་གསུམ་དུ་སློབ་མ་རྣམས་བརྗོད་དུ་གཞུག་གོ །དེ་ནས་རྫས་འདི་རྣམས་སྦྱིན་པར་བྱ་སྟེ། །ཐམས་ཅད་བྱེད་པ་གསུམ་བྱས་ནས། །ཞེས་པ་ནི་དེ་རྣམས་བདུད་རྩི་འཁྱིལ་པའི་སྔགས་ཀྱིས་བསྲུངས་ནས་ཞེས་སོ། །དེ་ནས་རྡོ་རྗེ་དང་པདྨ་འཁོར་ལོ་དེ་རྣམས་སྙིང་ག་དང་མགྲིན་པ་དང་སྤྱི་བོར་བསམ་པར་བྱས་ལ།། དེ་རྣམས་ལ་ཧཱུཾ་དང་ཨཱཿཨོཾ་དགོད་པར་བྱའོ། །དྲི་ཆུ་རྡོ་རྗེ་ཁུ་ཚུར་གྱིས། །ཞེས་པ་ནི། །རྡོ་རྗེ་བཟུང་བའི་ཁུ་ཚུར་གྱིས་དྲི་ཆུ་བླངས་ཏེ། །ཧཱུཾ་ཨཱཿཨོཾ་ཞེས་བརྗོད་པར་བྱས་ནས་སྙིང་ག་དང་མགྲིན་པ་དང་མགོ་ལ་བསྐུ་བར་བྱ་སྟེ། རིམ་པས་མེ་ཏོག་ལ་སོགས་སྦྱིན། །ཞེས་པ་ནི་དེ་ལ་མཆོད་པར་བྱའོ་ཞེས་སོ། །སྤྱི་བོར་མེ་ཏོག་དང་སྤོས་མེ་མགྲིན་པ་དང་དྲི་སྙིང་གར་རོ། །ལྷ་བཤོས་ནི་མ་སྨོས་ཀྱང་མདུན་དུ་ཤེས་པར་བྱའོ། །ལུས་ཀུན་བྱེད་པས་བཟླས་བྱས་ཏེ། །སོ་སོར་བསྙེན་ནས་ཞེས་པ་ནི་རྫས་དེ་རྣམས་ཀྱང་བདུད་རྩི་འཁྱིལ་བའི་སྔགས་ཁོ་ན་བཟླས་ནས་སོ། །སྦྱིན་པར་བྱ་ཞེས་པ་ནི་ཚིག་འདིས་སྦྱིན་པར་བྱའོ། །དེང་གི་ཉི་མ་ནས་བཟུང་ནས། །འཁོར་བའི་ཉེས་པས་མ་གོས་ཤིང༌། །མཆོད་པ་ཀུན་དང་ཁྱོད་ལྡན་ཏེ། །དུས་རྣམས་ཀུན་དུ་བདེ་བར་གནས། །ཞེས་བརྗོད་ནས་བསྐུལ་བར་བྱའོ། །དེ་བཞིན་དུ་སོར་མོ་བཅུ་གཉིས་ཀྱི་ཚད་དུ་ཕྱིན་པ་རྩེ་མོའི་ཕྱོགས་སུ་མེ་ཏོག་བཏགས་ལ། སྲིན་དུས་བརྐོས་པའི་བུ་ག་མེད་པ། ཨ་ཤྭདྠ་འམ། ཨུ་དུམྦཱ་ར་ལ་སོགས་པས་བྱས་པའི་སོ་ཤིང་དྲང་པོར་དྲི་ཞིམ་པོ་བྱུག་ཅིང་སྦྱིན་པར་བྱའོ། །དེ་ནས་ལྟས་བལྟ་བའི་ཕྱིར་ཐོ་རངས་ལངས་ནས་ཁ་ཤར་ཕྱོགས་སུ་བལྟས་ཏེ་མི་སྨྲ་བར་དེ་འཆོས་ནས་མདུན་དྲང་པོར་བསྐྱུར་རོ། །གར་བསྐྱུར་
ཞེ་ན། ས་ལ་བ་ལང་ཀོ་བ་ཙམ་བྱུགས་ཞེས་པ་ནི། གྲུ་བཞི་འམ་གསུམ་དུ་མཐུག་སྲབ་དེ་ཙམ་དུ་བྱུགས་ཏེ། ཞི་བ་ལ་སོགས་དངོས་གྲུབ་བལྟ། །ཞེས་པ་ནི་བྱང་ཕྱོགས་ལ་སོགས་པ་གོ་རིམས་བཞིན་དུ་ཞི་བ་དང་རྒྱས་པ་དང་མངོན་སྤྱོད་དང་དབང་གི་བྱ་བ་འགྲུབ་པར་འགྱུར་རོ། །དེ་བཞིན་དུ་སྟེང་དུ་བལྟས་ན་རིག་འཛིན་ནོ། །འོག་ཏུ་བལྟས་ན་འོག་གི་དངོས་གྲུབ་ཏུ་འགྲུབ་པར་འགྱུར་རོ། །ཁ་བཀྲུས་ནས་ནི་ཧུབ་གསུམ་ཆུ། །ཞེས་པ་ངག་གི་ཉེས་པ་སྦྱང་བའི་ཕྱིར་ཁྱོར་བར་ཆུ་མི་མང་བ་བྱིན་ནས་ཀུན་བཏུང་བར་བྱའོ། །ཕྱི་རོལ་འཇུག་པར་བྱ་ཞེས་པ་ནི་དེའི་ཆོ་བག་ཞད་སྣོད་དུ་མི་རུང་བའི་ཕྱིར་རོ། །དེ་བཞིན་དུ་བཀྲ་ཤིས་པའི་རྨི་ལམ་མི་འཁྲུལ་བར་བྱ་བའི་ཕྱིར་མལ་དང་སྔགས་སུ་རྩྭ་ཀུ་ཤ་སྦྱིན་པར་བྱའོ། །དེ་ནས་བགེགས་བསྲུང་བར་བྱ་བའི་ཕྱིར། བདུད་རྩི་འཁྱིལ་བའི་སྔགས་ཀྱིས་བཟླས་པ་གསུམ་སྒྲིལ་མདུད་པ་གསུམ་བོར་བས་དཔུང་པ་ལ་བསྲུང་བར་བྱའོ། །དེ་ནས་སྐབས་འདིར་སྡོམ་པ་ཀུན་གཟུང་བར་བྱ་སྟེ། དང་པོ་སློབ་མས་ཞུ་བ་ནི་ཕྱིར་མི་ལྡོག་དབང་ཞེས་པ་ལ་སོགས་པ་སྟེ། ཕྱིར་མི་ལྡོག་དབང་ནི་རྡོ་རྗེ་སློབ་དཔོན་གྱི་དབང་ངོ༌། །དཀྱིལ་འཁོར་ལ་བྱིན་ནས་ཞེས་པ་ནི་ཁ་དོག་གཅིག་པའི་དཀྱིལ་འཁོར་ལ་གནས་ནས་ཞེས་སོ། །བདག་ལ་གསང་ཞེས་པ་ནི་བཀའ་སྩལ་ཞེས་པའོ། །གང་ཞེ་ན་དཀྱིལ་འཁོར་གྱི་དེ་ཁོ་ན་ཉིད་ནི་གྲུ་བཞི་ལ་སོགས་པའོ། །ལྷའི་དེ་ཁོ་ན་ཉིད་ནི་གཟུགས་ལ་སོགས་པའི་རྣམ་པར་དག་པའོ། །སློབ་དཔོན་གྱི་ལས་ནི་རྒྱུད་དང་སྔགས་འཛིན་ཅིང་སྒྲུབ་པ་པོ་རྣམས་རྒྱུད་ལ་འཇུག་པའོ། །སངས་རྒྱས་ཀུན་གྱི་དམ་ཚིག་ནི་སྤྱི་དང་ཁྱད་པར་དུ་སྟེ། ཚུལ་ཁྲིམས་ལ་སོགས་པ་རྣམས་ཐོབ་པར་བྱེད་པའི་རྐྱེན་ནོ། །གསང་བ་མཆོག་གི་སྡོམ་པ་ནི་ལུས་ངག་གི་ལས་བྱེད་པ་ཅན་རྣམས་ཏེ། དེ་རྣམས་བདག་རྡོ་རྗེ་སློབ་དཔོན་ཆེན་པོར་གྱུར་ནས་སེམས་ཅན་གྱི་དོན་བྱེད་པའི་ཕྱིར་གསོལ་བ་འདེབས་ན་བཀའ་སྩོལ་ཅིག་ཅེས་པའོ། །འདོད་པའི་སློབ་མ་ཞེས་པ་ནི་སློབ་དཔོན་དུ་འདོད་པ་རྣམས་སོ། །སྡོམ་པ་བཟུང་བར་བྱས་ནས་སུ། །ཞེས་པ་ནི། རིག་པའི་དབང་གི་སྡོམ་པ་སྟེ། དེ་ལ་དང་པོར་སློབ་དཔོན་གྱིས་བསྒོ་བའི་དུས་ལུང་ནི་འདི་སྐད་དུ། སངས་རྒྱས་ཆོས་དང་དགེ་
འདུན་གསུམ། །དགོན་མཆོག་གསུམ་ལ་སྐྱབས་སུ་སོང༌། །འདི་ནི་སངས་རྒྱས་རིགས་དག་པའི། །སྡོམ་པ་འདི་ནི་བསྟན་པའོ། །རྡོ་རྗེ་དྲིལ་བུ་ཕྱག་རྒྱ་དག །བློ་ཆེན་གྱིས་ནི་གཟུང་བྱས་ཏེ། །བྱང་ཆུབ་སེམས་གང་དེ་རྡོ་རྗེ། ཤེས་རབ་དྲིལ་བུ་རྗེས་སུ་དྲན། །སློབ་དཔོན་དག་ཀྱང་བཟུང་བྱས་ཏེ། །བླ་མ་སངས་རྒྱས་ཀུན་དང་མཉམ། །འདི་ནི་རྡོ་རྗེའི་རིགས་དག་པའི། །སྡོམ་པ་དམ་ཚིག་ཡིན་བར་གསུངས། །རིན་ཆེན་རིགས་མཆོག་ཆེན་པོ་ལ། །ཉིན་དང་མཚན་དུ་ལན་གསུམ་དུ། །ཟང་ཟིང་མི་འཇིགས་ཆོས་དང་བྱམས། །སྦྱིན་པ་རྣམ་བཞི་རྟག་ཏུ་སྦྱིན། །ཕྱི་ནང་གསང་བའི་ཐེག་པ་གསུམ། །དམ་ཆོས་ཤིན་ཏུ་གཟུང་བར་བྱ། །འདི་ནི་པདྨའི་རིགས་དག་བའི། །དམ་ཚིག་སྡོམ་པ་ཡིན་པར་གསུངས། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བྱ། །སྲོག་ཆགས་གསང་པར་མི་བྱ་ཞིང༌། །མ་བྱིན་པར་ཡང་མི་བླང་ངོ༌། །འདོད་སྤྱོད་དག་ཀྱང་མི་བྱ་ཞིང༌། །བརྫུན་དུ་སྨྲ་བར་མི་བྱ་སྟེ། །ཉེས་པ་ཀུན་གྱི་རྩ་བ་ཡིན། །ཆང་ནི་བཏུང་བ་སྤང་བར་བྱ། །སེམས་ཅན་གདུལ་བྱ་མ་གཏོགས་པར། །བྱ་བ་མ་ཡིན་ཐམས་ཅད་སྤང༌། །དམ་པ་ཉེ་བར་བསྟེན་བྱ་ཞིང༌། །རྣལ་འབྱོར་པ་ལ་བསྙེན་བཀུར་བྱ། །ལུས་ཀྱི་ལས་ནི་རྣམ་གསུམ་དང༌། །ངག་གི་རྣམ་པ་བཞི་དག་དང༌། །ཡིད་ཀྱི་རྣམ་པ་གསུམ་དག་ནི། །ཅི་ནུས་པར་ནི་རྗེས་སུ་བསྲུང༌། །སེམས་ཅན་དོན་ལ་མི་ཕྱོགས་དང༌། །ཐེག་པ་དམན་ལ་འདོད་མི་བྱ། །འཁོར་བ་དག་ཀྱང་སྤང་མི་བྱ། །རྟག་ཏུ་མྱ་ངན་འདར་མི་ཆགས། །ལྷ་དང་ལྷ་མིན་གསང་བ་པ། །དེ་ལ་བརྙས་པར་མི་བྱ་ཞིང༌། །ཕྱག་རྒྱ་བཞོན་པ་མཚོན་ཆ་སོགས། །མཚན་མ་འགོམ་བར་མི་བྱ་སྟེ། །དེ་ལྟར་དམ་ཚིག་གསུངས་པ་ནི། །བློ་ལྡན་ཁྱོད་ཀྱིས་བསྲུང་བར་བྱ། །ཞེས་བརྗོད་པར་བྱའོ། །དེ་ནས་སློབ་མ་དེས་བླ་མས་གསུངས་པའི་སྡོམ་པ་དེ་གཟུང་བར་བྱའོ། །ཇི་ལྟར་ཐེག་གསུམ་གནས་པའི་མགོན། །བསླབ་པའི་ཚུལ་ཁྲིམས་རྣམ་པ་གསུམ། །དགེ་བའི་ཆོས་ནི་སྡུད་པ་དང༌། །སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་བརྟན་པོར་སོ་སོར་གཟུང༌། །བླ་ན་མེད་པའི་དཀོན་མཆོག་གསུམ། །སངས་རྒྱས་རྣལ་འབྱོར་ལ་
སྐྱེས་སྡོམ། །འདི་ནི་མཆོག་ཏུ་གཟུང་བར་བྱ། །རྡོ་རྗེ་དྲིལ་བུའི་ཕྱག་རྒྱ་དག །ཡང་དག་ཉིད་དུ་གཟུང་བར་བྱ། །རྡོ་རྗེ་རིགས་མཆོག་ཆེན་པོ་ལ། །སློབ་དཔོན་དག་ཀྱང་གཟུང་བར་བྱ། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་ལན་དྲུག་ཏུ། །སྦྱིན་པ་རྣམ་བཞི་རྟག་ཏུ་བགྱི། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་མཆོག་དམ་པ་ལ། །ཕྱི་ནང་གསང་བའི་ཐེག་པ་གསུམ། །དམ་ཚིག་སོ་སོར་གཟུང་བར་བགྱི། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བྱ། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །སེམས་ཅན་མ་ལུས་དོན་གྱི་ཕྱིར། །བདག་གིས་སྡོམ་པ་མ་ལུས་གཟུང༌། །མ་བསྒྲལ་བ་དག་བདག་གིས་བསྒྲལ། །མ་གྲོལ་བ་དག་བདག་གིས་དགྲོལ། །དབུགས་མ་ཕྱིན་པ་དབུགས་ཕྱུང་སྟེ། །མྱ་ངན་འདས་ལ་དགོད་པར་བགྱི། །ལུས་དང་ངག་དང་ཡིད་ངག་གི །མི་དགེ་བ་ནི་བཅུ་པོ་དང༌། །བག་མེད་པ་ཡི་གནས་གྱུར་པའི། །ཆད་ནི་རྣམ་པར་སྤང་བར་བགྱི། །དེ་བཞིན་ལྷ་དང་ལྷ་མིན་དང༌། །གསང་བ་ལ་ནི་བརྙས་པ་དང༌། །མཚན་མ་ལ་སོགས་འགོམ་པ་རྣམས། །དུས་འདི་ནས་ནི་བཟུང་ནས་སུ། །ཇི་སྲིད་བྱང་ཆུབ་སྙིང་པོའི་བར། །བདག་ནི་རབ་ཏུ་ལྡོག་པར་བགྱི། །ཞེས་ལན་གསུམ་དུ་བརྗོད་བར་བྱའོ། །དེ་ལྟར་སྡོམ་པ་བཟུང་བའི་སློབ་མ་དེ་ལ་སྤྲོ་བ་བསྐྱེད་ཅིང་བདེ་བའི་ཆོས་བཤད་པ་ནི། །ཐམས་ཅད་མཁྱེན་པ་ཞེས་པ་ནས། །དེ་བཞིན་གཤེགས་པ་རྣམས་འོངས་འགྱུར་ཞིང་ཞེས་པའི་བར་དུ་བརྗོད་པར་བྱའོ། །དོན་བསྟན་ཞེས་པ་ནི་དེ་ལྟ་བུའི་ཚིག་གིས་ཆོས་ཀྱི་དོན་བསྟན་ནས། །བསྲུངས་ནས་བུ་ཞེས་པ་སྟེ་བདུད་རྩི་འཁྱིལ་བའི་སྔགས་ཁོ་ནས་སོ། །དེ་ནས་སློབ་མ་རྣམས་ཀུ་ཤའི་མལ་ལ་ཉལ་དུ་བཅུག་ནས་ཁྱེད་ཀྱིས་རྨི་ལམ་མཐོང་བ་ནང་པར་བདག་ལ་སྨྲོས་ཤིག་ཅེས་བརྗོད་ནས་ཉལ་དུ་གཞུག་གོ །བསྲུང་དང་ཞེས་པ་ནི་སློབ་པ་བསྲུང་བ་ཡང་བདུད་རྩི་འཁྱིལ་པའོ། །དེ་བཞིན་དུ་སྦྱིན་བ་ལ་སྟེ་སོ་ཤིང་ལ་སོགས་པའོ། །སོགས་ཀྱི་སྒྲས་བསྡུས་པས་བསང་གཏོར་ལ་སོགས་པ་བྱ་བ་ཐམས་ཅད་བྱེད་པའི་སྔགས་ཀྱིས་བཟླས་པར་བྱའོ་ཞེས་སོ། །ཅིའི་ཕྱིར་
ཞེ་ན། རིགས་ལྔ་དང་སྐུ་ལ་སོགས་པའི་དཀྱིལ་འཁོར་གསུམ་གྱི་ལས་ནི་བདུད་རྩི་འཁྱིལ་པས་བྱེད་པ་སྟེ་ཏིང་ངེ་འཛིན་རྣམ་པར་དག་པའི་ཕྱིར་རོ། །མཐོང་བའི་རྨི་ལམ་དགེ་བ་ནི་རང་གིས་བྱང་ཆུབ་ཀྱི་ཤིང་ལ་འགྲོ་བ་དང༌། རང་གིས་ཆོས་བཤད་པ་དང༌། སྐྱེད་མོས་ཚལ་མཐོང་བ་དང༌། བྱང་ཆུབ་སེམས་དཔའ་རྣམས་ཀྱིས་བསྐོར་བ་དང༌། རྒྱལ་སྲིད་ཐོབ་པ་དང༌། རྣལ་འབྱོར་པ་ཚོགས་པ་དང༌། དམ་པའི་ཆོས་ཀློག་པ་ལ་སོགས་པ་དང༌། རིགས་རྣམས་དང་འབྲེལ་པ་དང༌། སངས་རྒྱས་ཀྱི་ཞིང་མཐོང་བ་དང༌། རྒྱ་མཚོ་ལས་དགྲོལ་བ་དང༌། རི་མཐོན་པོ་ལ་འཛེགས་པ་དང༌། བརྒྱ་བྱིན་ལས་རྒྱལ་བ་དང༌། རབ་གནས་ཀྱི་ཆོ་ག་ལ་སོགས་པ་མཐོང་བའོ། །མི་དགེ་བ་ནི་སྤྲེའུ་དང༌། མ་ཧེ་དང༌། བྱི་ལ་དང༌། འཐབ་པ་དང༌། མཚོན་འབབ་པ་དང༌། རང་འཆི་བ་དང༌། འབྲུ་མར་གྱིས་ལུས་བསྐུས་པ་ལ་སོགས་པའོ། །མི་དགེ་བ་ལྟུང་བྱེད་སྔགས་ཀྱིས་གཞོམ་ཞེས་པ་ནི་སློབ་དཔོན་གྱིས་བཟླས་ནས་ཞེས་སོ། །ཡང་ན་དེ་རྣམས་ཀྱིས་བཟླས་པའི་ཕྱིར་རོ། །སློབ་མ་བསྲུང་བ་ལ་བདུད་རྩི་འཁྱིལ་པ་དེ་ཁོ་ན་མཆོག་ཡིན་ནོ་ཞེས་སོ། །དཀྱིལ་འཁོར་སྦྱོར་བ་བསྒོམ་བྱ་སྟེ། །ཞེས་པ་ནི་གོང་དུ་བསྒོམ་པ་རྣམས་ལ་ལྷག་པར་མོས་པའོ། །མཆོད་ནས་ཞེས་པ་ནི་བསྟོད་པ་དང་བདུད་རྩི་མྱང་བའི་བར་ཡང་རྟོགས་པར་བྱའོ། །ནམ་མཁར་དགོད་དོ་ཞེས་པ་ནི་ཡེ་ཤེས་ཀྱི་དཀྱིལ་འཁོར་ཕྱུང་ནས་ནམ་མཁའི་ཕྱོགས་སུ་བཀོད་དེ། རང་དང་ཉེ་བས་ཁ་སྦྱར་གྱི་སྦྱོར་བ་སྲུང་སྟེ་གཞག་གོ །དམ་ཚིག་གི་འཁོར་ལོ་བདག་གི་ཐུགས་ཀར་བསྡུས་ནས་མཉམ་པར་བྱའོ། །དེ་ནས་ལངས་ནས་གདོད་སོ་ཤིང་ལ་སོགས་པའི་བྱ་བ་ཀུན་བྱ་བའོ་ཞེས་གསུངས་སོ། །ད་ནི་ཐིག་གདབ་པའི་ཆོ་ག་གསུངས་པ། །རྟག་པ་ཞེས་པ་ལ་སོགས་པའོ། །རྟག་པ་ལ་སོགས་གཟུགས་འདྲ་བ། །ཞེས་པ་ནི་དེ་བཞིན་གཤེགས་པ་ལྔའི་ཁ་དོག་དང་མཐུན་པའི་རང་བཞིན་གྱི་དཀྱིལ་འཁོར་སྐུལ་བར་བྱེད་པའི་སྐུད་པ་དང༌། རྡུལ་ཚོན་གྱི་དཀྱིལ་འཁོར་བྲི་བའི་སྐུད་པ་སྟེ་ཚོན་སྣ་ཚོགས་སོ་སོར་བཅོས་ལ། དེ་དང་དེ་ཡི་ས་བོན་བྱུང༌། །ཞེས་པ་སྟེ་ཧཱུཾ་ལ་སོགས་པའི་ས་བོན་བྱུང་བར་བསམས་ལ། དབྱེ་བ་ཉི་ཤུ་རྩ་ལྔ་ཞེས་པ་ནི་སྐུད་པ་རེ་རེ་ལ་ཡང་ཡེ་ཤེས་ལྔ་ལྔ་སྟེ་ཉི་ཤུ་ལྔའི་བྱེ་བྲག་ཏུ་མོས་
པར་བྱའོ། །རང་སྐུ་འཇམ་པའི་རྡོ་རྗེ་ཉིད་དུ་བསྒོམས་ནས། ཛ་ཡིག་ཟླ་བ་ཉི་མའི་སྤྱན། །ཞེས་པ་ནི་མིག་གཡས་གཡོན་ཛ་སེར་པོ་ལས་ཉི་མ་དང་ཟླ་བའི་མིག་ཏུ་བསམས་ལ། བར་མིག་ལྕགས་ཀྱུས་དྲངས་ནས་སུ། །ཞེས་པ་ནི་དེ་ཉིད་ལ་ཛས་མཚན་པ། རྫི་མ་རླེབ་རླེབ་པོས་ནམ་མཁའི་དེ་བཞིན་གཤེགས་པ་ལ་བལྟ་ཞིང༌། ཨོཾ་དཱིཔྟ་དྲྀཥྚི་ཨངྐུ་ཤ་ཛཿཞེས་བརྗོད་ཅིང་ཛ་ལས་འཕྲོས་པའི་འོད་ཟེར་གྱི་ལྕགས་ཀྱུས་རྣམ་པར་སྣང་མཛད་ལ་སོགས་པའི་ཐུགས་ཀ་ན་གནས་པའི་ཡེ་ཤེས་ཀྱི་སྐུད་པ་ལ་ཨོཾ་ཨཱཿཧེ་བྷ་ག་ཝཱན་པྲ་མ་ཐ་ཤཱ་ཤྭ་ཏོ་སཱུ་ཏྲ་པ་ཙཀྲ་སུ་དུ་པ་ཡ་ཧཱུཾ་ཞེས་གསོལ་བ་བཏབ་པས་དྲངས་ནས། སྐུད་བྱེད་སྐུད་པ་དང་ལྷན་ཅིག །ཅེས་པ་ནི་སྔོན་དེའི་ངོ་བོར་འགྱུར་པའི་སློབ་མས་སྣ་གཅིག་བཟུང་བ་ལ། རང་རང་ཁ་དོག་ནང་དུ་ཐིམ། །ཞེས་པའོ། །ཅུང་ཟད་མ་འབྲེལ་པ་ནི་ཚིགས་སུ་བཅད་པའི་ངོར་བཏབ་པའོ། །ཇི་སྙེད་མི་བསྐྱོད་པ་ཡི་སྔགས། །ཕུན་ཚུན་རྗེས་སུ་འབྲེལ་པ་ཡིས། །ཞེས་པ་ནི་པྲ་ཡཙྪའི་རྗེས་ལ་རཏྣ་སམྦྷ་བ་དང༌། ཨ་མི་ཏ་དང༌། ཨ་མོ་གྷ་སིདྡྷི་དང༌། ཨཀྵོ་བྷྱ་ཞེས་བྱ་བ་བརྗོད་ནས་གསོལ་བ་གདབ་པར་བྱ་སྟེ་གཞུག་ཅེས་པའོ། །དེ་ལྟར་སོ་སོར་གནས་པ་ཀུན། །དྲན་པ་ལ་སོགས་གནས་པར་བཀལ།། ཞེས་པ་ནི། ཨོཾ་ཨ་ནྱོ་ནྱ་ཨ་ནུ་ག་ཏ་སརྦ་དྷརྨཱ་སྦ་ར་སྤ་ར་ཨ་ནུ་པྲ་བིཥྚ་སརྦྦ་དྷརྨྨཱ་ཧཱུཾ་ཞེས་བརྗོད་ནས་བསྒྲིལ་བར་བྱའོ། །ལས་ཐམས་ཅད་པའི་ཁ་དོག་གཅིག་པར་ཡང་བཤད་དོ། །དེ་ནས་དེ་དག་གསེར་ལ་སོགས་པའི་སྣོད་དུ་དྲི་ཞིམ་པོ་དང་བདུད་རྩི་རྣམ་པ་ལྔ་ས་བྱུགས་ནས། བདུད་རྩི་འཁྱིལ་པའི་སྔགས་ཀྱིས་བསྲུང་བར་བྱའོ། །ཡིག་གསུམ་བར་བཅུག་རྣལ་འབྱོར་པས། །ཞེས་པ་ནི་ཐིག་སྐུད་ཡི་གེ་གསུམ་གྱི་བར་དུ་ཆུད་པར་མོས་ནས། སྐུད་པ་བཟུང་ནས་བརྡེག་པར་བྱ། །ཞེས་སོ། །ཛ་ཡིག་གསུམ་གྱིས་ཀྱང་བྱས་ནས། །ཞེས་པ་ནི་དེ་བརྗོད་དེ་ཤེས་རབ་མས་ཀྱང་བརྗོད་བར་བྱའོ། །དེ་མེད་ན་ཀུན་བྱེད་དམ་རྣམ་པར་སྣང་མཛད་དུ་བསྒོམས་པའི་སློབ་མ་ལ་གཏད་ཅིང་དེས་ཀྱང་ཛ་ཛ་ཛ་ཞེས་བརྗོད་པར་བྱའོ། །བློ་གྲོས་ཅན་གྱིས་མཁའ་ཐིག་གདབ། །ཅེས་པ་ནི་དེ་བཞིན་གཤེགས་པ་རྣམས་སེམས་ཅན་གྱི་དོན་བྱེད་པའི་དུས་ལ་བབ་པས་གནས་འདིར་གཤེགས་པའི་ཆེད་དུ་ཐིག་སྐུད་
ཀྱི་སྒྲས་བསྐུལ་བ་བརྗོད་ཅིང༌། ཨོཾ་བཛྲས་མ་ཡ་སཱུ་ཏྲ་མཱ་ཏི་ཀྲ་མ་ཧཱུཾ་ཞེས་བརྗོད་ནས་ནམ་མཁའི་མ་ལུས་པར་བརྗོད་པར་བྱའོ། །དེ་བཞིན་འོག་ཀྱང་རབ་གདབ་ཅེས་པ་ནི་ནམ་མཁའ་ལ་བཏབ་པ་ཇི་ལྟར་དེ་བཞིན་དུ་ས་ལ་ཡང་གདབ་པར་བྱའོ་ཞེས་སོ། །གནོད་སྦྱིན་ཞེས་པ་ལ་སོགས་པ་ནི་ནམ་མཁའ་དང་ས་ལ་གདབ་པའི་གཡས་སྐོར་ལ་སོགས་པས་ཕྱི་རོལ་གྱི་དྲངས་པའི་ཐིག་གདབ་པ་སྟོན་ཏེ། གནོད་སྦྱིན་ཞེས་པ་ནི། བླ་མ་མེ་མཚམས་ནས་གནོད་སྦྱིན་ཕྱོགས་སུ་བལྟས་ཏེ་ཤར་གྱི་ཐིག་གདབ་པོ། །དེ་བཞིན་བླ་མས་གཡས་སྐོར་དུ་བསྐོར་ནས་རླུང་མཚམས་སུ་གནས་ཏེ། ཡི་དགས་ཀྱི་ཕྱོགས་སུ་བལྟས་ནས་ནུབ་ཀྱི་ཐིག་གདབ་པ་དང༌། བླ་མ་དེ་ཉིད་དུ་གནས་ནས། བརྒྱ་བྱིན་ཕྱོགས་སུ་བལྟས་ནས་བྱང་ཕྱོགས་སུ་ཐིག་གདབ་པ་དང༌། དེ་ནས་བསྐོར་ནས་མེ་མཚམས་སུ་གནས་ཏེ་ཀླུ་བདག་གི་ཕྱོགས་སུ་བལྟས་ནས་ལྷོ་ཕྱོགས་ཀྱི་ཐིག་གདབ་པས་ཕྱོགས་བཞི་དག་གི་ཕྱི་རོལ་གྱི་ཐིག་གདབ་པར་འགྱུར་རོ། །དེ་བཞིན་དུ་མེ་མཚམས་སུ་གནས་ནས་རླུང་མཚམས་སུ་བལྟས་ཏེ་གྲྭའི་ཐིག་དང་པོ་གདབ་པར་བྱའོ། །བདེན་བྲལ་མཚམས་སུ་གནས་ནས་དབང་ལྡན་གྱི་མཚམས་སུ་བལྟས་ཏེ་གྲྭའི་ཐིག་གཉིས་པ་གདབ་པར་བྱའོ། །ཤར་དང་ཞེས་པ་ལ་སོགས་པའི་ཕྱོགས་རྣམས་འབྱེད་པའི་ཐིག་སྟོན་ཏེ། དེ་ཡང་བླ་མས་ཤར་དང་བྱང་དུ་ཁ་བལྟས་ནས་ཕྱོགས་ཀྱི་ཐིག་མ་ལུས་པ་གདབ་པར་བྱའོ་ཞེས་རེའུ་མིག་བརྒྱད་དུ་གདབ་ཅེས་པ་ནི་དབུས་ཏེ་གཙོ་བོའི་རེའུ་མིག་ལ་གཏོགས་པའོ། །དེ་ནི་ཉེ་བའི་མཚན་ཉིད་དུ་ཟད་དེ། སྒོ་ལ་སོགས་པ་ཀུན་གདབ་བྱ། །ཞེས་བྱའོ། །དེ་ལྟར་ཐིག་བཏབ་པའི་འོག་ཏུ་ཅི་ཞིག་བྱ་ཞེ་ན། དེ་ནས་ཐིག་སྐུད་ཉིས་འགྱུར་བྱ། །ཞེས་པ་ནི་ཉིས་བལྟབ་ཏུ་བཀུག་པའོ། །དཀྱིལ་འཁོར་དབུས་སུ་ཤིན་ཏུ་བཟུང༌། །ཞེས་པ་ནི་ཙནྡན་ལ་སོགས་པའི་ཕུར་བུ་ལ། ཨོཾ་བཛྲ་ཀཱི་ལི་ཀཱི་ལ་ཡ་བཾ་ཞེས་ལན་བདུན་བཟླས་ནས་དབུས་སུ་གདབ་སྟེ་ཐིག་སྐུད་གཟུང་ངོ༌། །དེ་ནས་ཕྱི་རོལ་ཞེས་པ་ནི་ནང་གི་དཀྱིལ་འཁོར་དང་ཕྱིའི་དཀྱིལ་འཁོར་རོ། །རྡོ་རྗེ་སྐུད་གཉིས་ཡང་བྲིའོ། །ཞེས་པ་ནི་ནང་གི་རྡོ་རྗེ་རབ་དང་གཉིས་པ་ནི་ཕྱི་རོལ་གྱི་པདྨོ་ལ་སོགས་པའི་ར་བའོ། །དབང་ལྡན་མཚམས་ནས་ཞེས་པ་ནི་བསྐོར་བ་སྟེ། ཡང་དབང་ལྡན་གྱི་མཚམས་ནས་བརྩམས་
ནས་རང་མདུན་བལྟས་ཞེས་པ་ནི་གཞན་དུ་བལྟས་ན་ལོག་པར་འགྱུར་བའི་ཕྱིར་གཡས་སྐོར་དུ་ནམ་མཁའི་ཐིག་དང་བཅས་པ་བསྐོར་བར་བྱའོ་ཞེས་སོ། །དེ་ནས། ཕྱོགས་ཀུན་མཉམ་པ་ངོ་བོ་རུ། །ཤེས་རབ་ལྡན་པས་ཐིག་གདབ་བྱ། །ཞེས་སོ། །མཚན་མ་ངན་ཞེས་པ་ལ་སོགས་པ་ནི་ལས་དང་པོ་པ་མི་བརྟན་པ་ལ་གསུངས་པ་སྟེ་བརྟན་པ་རྣམས་ལ་ནི་དེ་ལྟ་བུ་མེད་པའོ། །ད་ནི་ཕྱིའི་དཀྱིལ་འཁོར་གྱི་གཟུགས་དང་དབྱིབས་ཇི་ལྟར་ཞེ་ན། གྲུ་བཞི་ཞེས་བྱ་བ་ལ་སོགས་པ་གསུངས་ཏེ། ཐིག་སྐུད་བཞི་ཞེས་པ་ནི་ཕྱོགས་བཞིའི་ཚོན་སྣ་ལྔའི་ཐིག་ལ་བྱ་ཞེས་པའོ། །ནང་གི་དཀྱིལ་འཁོར་གྱི་ཚད་དང་དབྱེ་བའི་ཐབས་བསྟན་པ་ནི། དེའི་ནང་གི་ཞེས་པ་ལ་སོགས་པ་གསུངས་ཏེ། དེའི་ཕྱིར་དཀྱིལ་འཁོར་ནི་གྲུ་བཞི་སྟེ་ཚོན་སྣ་ལྔ་ཕན་ཆད་དོ། །དེའི་ཕྱེད་དབུས་སུ་བསྐོར་བར་བྱའོ། །དེའི་ཡང་དབྱི་བས་ཇི་ལྟ་བུ་ཞེ་ན། ཟླུམ་པོ་འཁོར་ལོ་ལ་སོགས་པའི་ཀ་བ་དང་ལྡན་པ་འདི་ཐུགས་ཀྱི་དཀྱིལ་འཁོར་ཡིན་པས། མཛེས་པའི་རྡོ་རྗེ་ཕྲེང་བས་བསྐོར། །ཞེས་སོ། །དེ་ནས་སྒོ་ལ་སོགས་པའི་ཚད་བསྟན་པའི་ཕྱིར་དེ་ནས་ཞེས་པ་ལ་སོགས་པའོ། །དེ་ནས་མིག་གཉིས་ལ་ཧི་ལས་བྱུང་བའི་ཉི་ཟླས་ཁྲོ་བོའི་ལྟ་བས་བལྟས་ནས་དེའི་འོད་ཟེར་གྱིས་བགེགས་བསལ་ནས་ཏེ་སྒོ་དབྱེ་བར་བྱའོ་ཞེས་སོ། །སྔར་ཕྱེ་བ་རྣམས་ལ་ཡང་རིགས་པར་སྦྱར་རོ། །དཀྱིལ་འཁོར་བརྒྱད་ཅར་སྒོའི་ཞེས་པ་ནི་ཕྱིའི་དཀྱིལ་འཁོར་ལ་ཆ་བརྒྱད་གནས་པའི་ཆ་གཅིག་ལ་སྒོའི་དབུས་བྱའོ་ཞེས་སོ། །བར་ཁྱམས་སྒོ་ཡི་ཚད་ཡིན་ཏེ། །ཞེས་པ་ནི་ནང་གི་དཀྱིལ་འཁོར་དང་འདོད་པའི་ལྷ་མོའི་སྣམ་བུའི་བར་དུ་སྟེ་སྒོའི་དབུས་དང་མཉམ་པའོ། །ལྷའི་སྣམ་བུ་ཞེས་པ་ནི་འདོད་པའི་ལྷ་མོའིའོ། །ཀུན་དུ་ཁ་ཁྱེར་ཞེས་པ་ནི་མཆོད་པའི་ལྷ་མོའི་སྣམ་བུ་སྟེ་སྒོའི་ཕྱེད་དོ། །དེ་བཞིན་དུ་སྒོའི་འགྲམ་སྟེ་ཁ་ཁྱེར་གྱི་ཕྱི་རོལ་དང་གཤོག་པ་སྟེ་ཀ་བའི་ནང་ལོགས་སྒོ་ཕྱེད་དོ། །དེའི་ཚད་ཀྱི་ཁ་ཁྱེར་གྱི་ཕྱི་རོལ་དུ་དྲ་བ་དང་དྲ་བ་ཕྱེད་པ་ལ་སོགས་པའི་སྣམ་བུ་ཡང་ཤེས་པར་བྱའོ། །དེའི་ཕྱེད་ཀྱིས་ནི་ཚོན་སྣ་ལྔའི་ས་དང༌། དབུས་ཀྱི་འཁོར་ལོ་ལ་སོགས་པའི་ཀ་བ་དང་མཉམ་པར་བྱའོ་ཞེས་སོ། །སྒོ་སྟེང་སུམ་འགྱུར་ཏྭ་ར་ན། །ཞེས་པ་ནི་སྒོའི་དབུས་ཀྱི་ཚད་སྟེང་དུ་སུམ་འགྱུར་བྱས་པ་ལ་ཏྭ་ར་ཎ་རྒྱན་དང་བཅས་པ་ཕྱོགས་བཞིར་
བྲི་ཞེས་སོ། །དེ་ཡང་ཐེམ་སྐས་ལ་སོགས་པའི་གཟུགས་དྲི་བུ་དང་ཅོད་པན་ལ་སོགས་པས་བརྒྱན་པ་ཆོས་ཀྱི་འཁོར་ལོ་དང་རི་དགས་གཉིས་ཀྱིས་མཚན་ཅིང་བ་དན་ཉི་ཤུ་རྩ་གཅིག་ལ་སོགས་པས་བརྒྱན་པའོ། །གཞན་དཀྱིལ་འཁོར་གྱི་དབྱིབས་དང་མཐུན་པར་ཇི་ལྟར་མཛེས་པར་བྱའོ་ཞེས་སོ།། བྱང་ཆུབ་སེམས་དཔའ་འཇམ་པའི་དབྱངས་གཞན་གྱི་རིགས་སུ་གཏོགས་པ་དགག་པའི་ཕྱིར་གསུངས་པ། སངས་རྒྱས་ཞེས་པ་ལ་སོགས་པ་སྟེ་དེ་ཡང་འཇམ་དཔལ་ནི་སངས་རྒྱས་ཐམས་ཅད་ཀྱི་ཆོས་ཀྱི་ཡེ་ཤེས་ཀྱི་སྐུ་ཉིད་ཡིན་པའི་ཕྱིར་ན་འདིར་གསུངས་མཁན་ཏེ་འཇམ་དབྱངས་རྡོ་རྗེའི་རིགས་སུ་འདོད་དོ། །དེ་བས་ན་ཆོས་ཀྱི་སྐུ་རྣམ་པར་དག་པས་དཀྱིལ་འཁོར་ཞེས་བྱའོ། །རྒྱུད་ལས་ཁྲུ་བཅུ་དྲུག་ལ་སོགས་པ་ཚད་ངེས་པར་གསུངས་པ་དེ་ཉིད་གཉིས་སུ་མེད་པའི་སྦྱོར་བ་ངེས་པར་གཟིགས་པ་རྣམས་ལ་དམིགས་པར་བསྟན་པའི་ཕྱིར་སེམས་ཅན་ཞེས་པ་ལ་སོགས་པའོ། །དེ་ཡང་སེམས་ཅན་གྱི་བསམ་པའི་བྱེ་བྲག་གིས་ཚད་ལ་སོགས་གསུངས་ཞེས་སོ། །དོན་ཀུན་ཐབས་དང་ཤེས་རབ་སྙོམས་པར་འཇུག་པ་ལས་དངོས་གྲུབ་འབྱུང་བས་རིགས་ལ་སོགས་པའི་ངེས་པ་ག་ལ་ཡོད་ཅེས་སོ། །དེ་བས་ན་ཚད་ཀྱང་ཁྲུ་གང་ནས་བརྩམས་ཏེ་སྟོང་ཕྲག་གེ་བར་དུ་བྱའོ་ཞེས་སོ། །ཚོན་གྱི་ཆོ་ག་གསུངས་པ་དེ་ལྟར་ཞེས་པ་ལ་སོགས་པའོ། །འབར་བའི་མིག་གིས་ཞེས་པ་ནི། ཛ་སེར་པོ་ལས་ཉི་མ་དང་ཟླ་བའི་མིག་གིས་སོ། །ཚོན་རྩི་རྣམས་ཞེས་པ་ནི་རིན་པོ་ཆེ་ལྔ་འམ། བྱུང་ཁུངས་ཀྱི་ཕྱེ་མ་འམ་སཱ་ལུ་ལ་སོགས་པའི་ཕྱེ་མ་ཞིབ་མོར་བཏགས་ལ་རྣམ་པ་ཉི་ཤུ་རྩ་ལྔའི་དབྱེ་བ་མོས་ནས་སོ། །སྔ་མའི་གོ་རིམས་ཞེས་པ་ནི་ཐིག་སྐུད་ལྟར་རང་གི་མིག་གིས་བལྟས་ནས། ཨོཾ་དིཔྟ་དྲྀཥྚི་ཨངྐུ་ཤ་ཛ།ཞེས་བརྗོད་ནས་དེའི་འོད་ཟེར་གྱིས་དེ་བཞིན་གཤེགས་པ་རྣམས་སྤྱན་དྲངས་ནས་རང་རང་གི་མདོག་དཀར་པོ་ལ་ཐིག་གདབ་པར་བྱའོ། །དེ་ལྟར་བསམས་ནས། བདེན་པ་གང་གིས་སངས་རྒྱས་རྣམས། །སེམས་ཅན་དོན་ལ་ཆགས་པ་པོ། །བདེན་པ་དེ་ཡི་བྱིན་རླབས་ཀྱིས། །ཚོན་རྩི་རྣམས་ནི་འབར་གྱུར་ཅིག །ཅེས་བརྗོད་ནས་ཚོན་རྩི་ལ་བལྟས་ཏེ་གསལ་བར་བྱས་ནས་སྔགས་འདི་བརྗོད་དོ། །ཨོཾ་བཛྲ་ཙི་ཏྲ་ཡས་མ་ཡ་ཧཱུཾ་ཞེས་ཡང་དང་ཡང་དུ་བཟླས་ཏེ་དྲི་ཞིམ་པོའི་སྤོས་དང་ཅུང་ཟད་བསྲེས་པ་
གསེར་དངུལ་ལ་སོགས་པའི་སྣོད་དུ་སྩལ་ཏེ། ཨོཾ་བཛྲ་བེ་ག་ཨ་ཀྲ་མ་ཡ་ཞེས་རྡོ་རྗེ་ཤུགས་ཀྱིས་ཐིག་ནམ་མཁའ་ལ་བཏེག་ནས་དཀྱིལ་འཁོར་གྱི་ནང་དུ་ཞུགས་ཏེ་འདི་རྣམས་སུ་མོས་པས་དགྱེས་པར་བྱའོ་ཞེས་སོ། །དེ་དག་གང་ཞེ་ན། ཆོས་ཀྱི་དབྱིངས་ཀྱི་དག་པ་འདི། །ཞེས་པ་ལ་སོགས་པའོ། །དེ་ལ་དང་པོ་ཚོན་སྣ་ལྔ་གདབ་པའི་ཐབས་སྟོན་ཏེ། །དེ་ཡང་བླ་མས་གཡོན་གྱི་ཁུ་ཆུར་གྱིས་དབང་ལྡན་མཚམས་ལ་བསྟེན་ཏེ་ཕྱི་རོལ་དུ་དཀར་པོ་དེ་ནས་དམར་པོ་དེ་ནས་ལྗང་གུ་ཀུན་གྱི་ནང་རོལ་དུ་ནག་པོ་སྟེ། གཡས་སྐོར་དུ་བར་མ་ཆད་པར་ཡ་ཕུབས་ཀྱི་ཚད་ཙམ་དུ་བྲིས་ནས་མེ་ཏོག་དང་ལྡན་པའི་སྣོད་ཀྱིས་བཀབ་ནས། དེ་ནས་ཅི་བདེ་བར་བྲི་བར་བྱའོ། །གཡས་སྐོར་ཚུལ་མི་བདེན། །ཚོན་ལ་ཕུར་བུས་གདབ་པར་བྱ། །ཞེས་པ་ནི་ཕྱོགས་མི་བདེ་བ་ལ་སོགས་པའི་དུས་སུ་དུད་རྩི་འཁྱིལ་བའི་ཕུར་བུས་བཏབ་ནས་བྲི་ཞེས་པའོ། །རྡོ་རྗེ་རྩེ་མོའི་ཚོན་བསྟན་པའི་ཕྱིར་རྡོ་རྗེ་རྩེ་མོ་དཀར་པོ་ཞེས་པ་ལ་སོགས་པས་ཕྱོགས་ཀྱི་ཚོན་རྣམ་པར་དབྱེ་བའི་ཕྱིར། ཤིན་ཏུ་དཀར་པོ་ཤར་གྱི་ཕྱོགས། །ཞེས་བ་ལ་སོགས་པའོ། །རྟག་ཏུ་ཐབས་དང་ཤེས་རབ་ལྡན། །ཞེས་པ་ནི་རང་གི་ལྷའི་ཐབས་དང་ཤེས་རབ་ཀྱི་ང་རྒྱལ་མ་བཏང་བ་ཉིད་དུ་ཤིན་ཏུ་མཉམ་པར་བཞག་ནས་ཕྱོགས་པའི་སྔགས་པ་རྣམས་ཀྱིས་དགྱེ་བར་བྱའོ་ཞེས་པས་སོ། །དེའི་འོག་ཏུ་དཀྱིལ་འཁོར་གྱི་འོག་ཏུ་སྤྲུལ་ལ་སོགས་པ་བྱུང་བར་གྱུར་ན། དེ་བཟློག་པ་བསྟན་པའི་ཕྱིར། རྡོ་རྗེ་བདུད་རྩི་འཁྱིལ་བ་ནི་ཐུགས་ཀྱི་དཀྱིལ་འཁོར་ཡིན་པས་དེ་ཁོ་ནའོ། །སྐུ་ལ་སོགས་པ་ཡང་གཤིན་རྗེ་གཤེད་ལ་སོགས་པ་ཡང་ཤེས་པར་བྱའོ། །སྡང་བ་ཐམས་ཅད་ཅེས་པ་ནི་རླུང་དང་ཆར་པ་དང་སྦྲུལ་ལ་སོགས་པ་ལ་གཏོར་བའོ། །ཕྱག་རྒྱ་ཆེན་པོ་མཆེ་བར་གསུངས། །ཞེས་པ་ནི་གདུག་པ་འཇོམས་པས་ན་མཆེ་བ་སྟེ་ཀུན་བྱེད་དོ། །དེ་བསམས་ནས་སྡང་བའི་དགྲའི་སྔགས་ཀྱི་རྒྱལ་པོ་འདི་བརྗོད་པར་བྱའོ། །ན་མཿས་མནྟ་ཀཱ་ཡ་ཝཱཀ་ཙིཏྟ་བཛྲ་ཎཱཾ། ཞེས་པ་ལ་སོགས་པའོ། །ཕྱག་རྒྱ་དགོད་པའི་ཆོ་ག་གསུངས་པ། དེ་ལྟར་དཀྱིལ་འཁོར་བྲིས་ནས་ཞེས་པ་ལ་སོགས་པའོ། །ཕྱག་མཚན་རྣམ་པར་དག་པ་དང་བཅས་པ་གསུངས་པ་སྟེ་གོ་སླའོ། །དེ་ནས་ཕྱིར་བྱུང་ནས་རྣམ་པ་ཀུན་གྱི་
ཚོན་གདབ་བས་ཤིན་ཏུ་གསལ་བར་བྱ་སྟེ། ཉེས་པས་མི་གོས་པར་བྱ་བའི་ཕྱིར་ཡི་གེ་གསུམ་གྱི་མཐར་མུཿགྮག་པའི་སྔགས་ཀྱིས་ཚོན་རྩི་དང༌། དེ་བཞིན་གཤེགས་པ་ལ་སོགས་པ་གཤེགས་པར་བྱས་ནས། དཀྱིལ་འཁོར་གྱི་ཕྱི་སྐོར་ལ་བྱུག་པ་དང༌། དྲི་ཞིམ་པའི་ཆུས་གཏོར་བ་དང༌། བུམ་པ་དགྲམ་པ་དང༌། ན་བཟའ་དང་མེ་ཏོག་དང་བ་དན་ལ་སོགས་པའི་དྲི་ཞིམ་པོ་དང༌། ལྷ་བཤོས་དང་མར་མེ་དབུལ་བ་ལ་སོགས་པའི་བྱ་བ་བཤམ་པར་བྱའོ་ཞེས་སོ། །དེ་བཞིན་དུ་འདིར་སྒྲུབ་པ་པོས་དངོས་གྲུབ་བསྒྲུབ་པར་འདོད་པས་ས་དག་པར་བྱ་བ་ལ་སོགས་པའི་ཆོ་ག་སྔ་མ་བཞིན་དུ་བྱས་ཏེ་ཐིག་བྱིན་གྱིས་བརླབ་པ་དང་ཚོན་བྱིན་གྱིས་བརླབ་པར་བྱ་སྟེ། ཁྱེའུ་དང་བུ་མོ་ལོ་བཅུ་གཉིས་ལོན་པ་ཁང་པར་བཅུག་སྟེ། དེས་ཐིག་གདབ་ཅིང་ཚོན་བཀྱེ་ནས་ཕྱག་མཚན་ལ་སོགས་པ་བཀོད། དེ་ནས་དབབ་པའི་ལྷ་གཤེགས་སུ་གསོལ་ནས། དེ་གཉིས་རང་གི་གནས་སུ་བཏང་སྟེ་ཇི་ལྟ་བ་བཞིན་དུ་བསྒྲུབ་པར་བྱའོ་ཞེས་སོ། །དེ་ལྟར་དཀྱིལ་འཁོར་བྲིས་ནས་ལྷ་གནས་པར་བསམ་ཞིང་བྱིན་གྱིས་བརླབ་པའི་ཆོ་ག་གསུངས་པ། ཤེས་རབ་ལུས་ཞེས་པ་ལ་སོགས་པའོ། །ཤེས་རབ་ལུས་སྦྱོར་སྔ་མ་བཞིན། །ཞེས་པ་ནི་ལེགས་པར་བརླབ་པའི་ཕྱག་རྒྱ་དང་ལྷན་ཅིག་ཏུ་སྣ་ཚོགས་པདྨ་རས་ཀྱིས་གཡོགས་པའི་གདན་ལ་འདུག་སྟེ། རྗེས་སུ་ཆགས་པའི་མཐའ་ལ་ཐུག་པར་སྦྱོར་བ་དང་པོར་བྱ་སྟེ། བསམས་ཏེ་ནང་གི་ནང་དུ་ཐིམ། །ཞེས་པ་ནི་དེ་བཞིན་གཤེགས་པ་རྣམས་ཞལ་དུ་ཞུགས་ནས་ཟླ་བ་ཞུ་བ་རྡོ་རྗེའི་ལམ་ནས་པདྨའི་ནང་དུ་བརྟག་སྟེ་དེ་ལ་ས་བོན་ལས་ལྷའི་སྐུར་བརྟགས་ཏེ། བཛྲ་དྷྲྀཀ་ལ་སོགས་པའི་སྔགས་ཀྱིས་གོ་རིམས་བཞིན་དུ་སྤྲོས་ནས་ཇི་ལྟ་བ་བཞིན་དུ་གནས་སུ་དགོད་པར་བྱའོ་ཞེས་སོ། །སྒྲུབ་པ་པོས་ནི་ལྷའི་བཀའ་ཐོབ་ནས་སྤྲོ་བར་བྱ་བ་ནི་མན་ངག་གོ །རང་གི་སེམས་ནི་མཁའ་ཁྱབ་པའི། །དཀྱིལ་འཁོར་ཞེས་པ་ནི་རང་གི་སེམས་དང་འདྲེས་པའི་ཕྱིར་རང་གི་སེམས་དེ་ཡེ་ཤེས་ཀྱི་དཀྱིལ་འཁོར་རོ། །དེ་རྡོ་རྗེ་དང་པདྨ་སྦྱོར་བའི་སྒྲས་བཀུག་སྟེ། མདུན་དུ་གནས་པར་བྱ་ཞེས་ཤར་སྒོར་ཕྱོགས་པར་བྱའོ། །དེ་ནས་གཤིན་རྗེ་གཤེད་ལ་སོགས་པ་སྤྲོས་པས་དེ་དང་ལྷན་ཅིག་ཏུ་འོངས་པའི་བགེགས་བསྐྲད་པར་བྱའོ། །མངོན་པར་བསྲུང་བྱས་ཏེ་ཞེས་པ་ནི་ཛ་ལ་སོགས་པ་སྔ་མ་བཞིན་དུ་མཛད་པའོ། །དེ་ནས་ཡོན་དང་ཞེས་པ་
སྟེ་བསང་གཏོར་ལ་སོགས་པའི་བྱ་བ་བྱས་ནས། གཤིན་རྗེ་གཤེད་ལ་སོགས་པས་དགུག་པ་དང་གཞུག་པ་དང་བཅིང་བ་དང་དབང་དུ་བྱ་བ་བྱས་ཏེ། ཨོཾ་དྷརྨྨ་དྷཱ་ཏུའི་སྔགས་ཀྱིས་བྱིན་གྱིས་བརླབ་པ་ནི་བསྙེན་པའོ། །དེ་བཞིན་མིག་ལ་སོགས་པ་བྱིན་གྱིས་བརླབ་པ་ནི་ཉེ་བར་སྒྲུབ་པའོ། །སྐུ་ལ་སོགས་པ་བྱིན་གྱིས་བརླབ་པ་ནི་སྒྲུབ་པའོ། །འོད་ཟེར་གྱིས་བསྐུལ་བ་མངོན་དུ་བྱས་ནས་རང་རང་གི་རིགས་ཀྱི་བདག་པོས་དབང་བསྐུར་བ་ནི་སྒྲུབ་པ་ཆེན་པོའོ། །དེ་རྣམས་མ་ཉེས་པར་བྱ་བའི་སྦྱོར་བ་གསུངས་པ། མཆོད་པ་ནི་བྱས་པ་སྟེ་ཕྱག་རྒྱའི་གནས་པའི་གནས་ཀྱི་ས་བོན་གྱི་འོད་ཟེར་ལས་ལྷ་མོའི་གཟུགས་ཀྱིས་ནམ་མཁའི་ཁམས་བཀད་ནས་དེས་ཐིམ་པ་ལ་སོགས་པས་དགྱེས་པར་བྱས་ནས། སྔགས་ཀྱི་བྱིན་གྱིས་བརླབ་པ་སྟེ་གསང་བའི་མཆོད་པའོ། །བསྟོད་ཅེས་པ་ནི་རྡོ་རྗེ་དང་དྲིལ་བུ་ལྡན་པས་མི་བསྐྱོད་རྡོ་རྗེ་ལ་སོགས་པ་དགེས་པར་བྱའོ། །ཤིན་ཏུ་ཚིམ་ཞེས་པ་ནི་གོ་ལ་སོགས་པའི་ཆོ་གས་དག་པར་བྱས་པའི་བདུད་རྩིས་སོ། །ཤིན་ཏུའི་སྒྲས་ནི་མེ་ཏོག་གིས་སྤྱན་ལའོ། །དྲི་དང་སྤོས་ཤངས་ལའོ། །བྱུག་སྤོས་ཀྱིས་སྐུ་ལའོ། །མར་མེས་ཐུགས་ལའོ། །ལྷ་བཤོས་ཞལ་དུའོ། །དྲིལ་བུ་ལ་སོགས་པ་སྙན་དུའོ། །ཡོན་ཆབ་དང་ཞལ་བསིལ་དང་ཕྱག་དང་ཞབས་ལ་དབུལ་བ་ལ་སོགས་པའི་རིམ་པའོ། །བཟླས་ཏེ་ཞེས་པ་ནི་སོ་སོའི་སྔགས་བརྗོད་པའོ། །དགེས་པར་བྱས་ཞེས་པ་ནི་དགེས་པའི་ཞེས་པ་ཡན་ཆད་བསྒོམ་པར་བྱ་ཞེས་སོ། །ངལ་བར་བྱེད་པ་ནི་མན་ངག་ཏུ་ཤེས་པར་བྱའོ། །དེ་ནས་སྲུང་བ་བྱས་ཏེ་ཕྱི་རོལ་ཏུ་བྱུང་ནས་ཕྱོགས་སྐྱོང་བ་རྣམས་ལ་གཏོར་མ་སྦྱིན་པ་གསུངས་པ། སྔོན་བཞིན་པདྨའི་སྣོད་དུ་ཡང༌། །ཡེ་ཤེས་བདུད་རྩིར་བྱས་ཞེས་པ་ནི་སྣོད་རྒྱ་ཆེན་པོའི་ནད་དུ་སྡིག་མེད་ཤ་དང་ཟན་ལ་སོགས་པ་བཀོད་ལ་ཏིང་ངེ་འཛིན་གཉིས་པའི་སྐབས་སུ་གསུངས་པ་ལྟར་རླུང་ལ་སོགས་པའི་རིམ་གྱིས་སྦྱངས་པའི་ཁ་ཟས་ཡེ་ཤེས་བདུད་རྩིའི་རང་བཞིན་དུ་བསམས་ཏེ། ཕྱོགས་སྐྱོང་རང་རང་རྣལ་འབྱོར་གནས། །ཞེས་པ་ནི་གཞུང་གཞན་ལ་གྲགས་པའི་སྤྱན་ལ་སོགས་པའི་གཟུགས་སུ་བསྐྱེད་ལ། བདག་པོ་ཁྲོས་པའི་སྙིང་ལས་འཕྲོས་པའི་འོད་ཟེར་རང་བཞིན་གྱི་ཕྱོགས་སྐྱོང་བ་རྣམས་བཀུག་སྟེ་བསྟིམ་ནས་མཆོད་ནས་ཞེས་པ་ནི་དེ་རྣམས་གྱི་ལྕེ་ལ་གནས་པའི་རྡོ་རྗེ་
འོད་ཟེར་གྱིས་གོང་གི་བདུད་རྩི་དྲངས་པར་བསམས་ཏེ་ཚིམ་པར་བྱའོ། །དེ་གསོལ་བ་བཏབ་ནས་གཤེགས་སུ་གསོལ་ཏེ། དཀྱིལ་འཁོར་ནང་དུ་འགྲོ་ཞེས་སོ། །དེ་ནས་རྫས་དང་ཡོ་བྱད་ལ་སོགས་པ་ལྷག་པའི་སྐྱོན་ཐམས་ཅད་དག་པར་བྱ་བའི་ཕྱིར། ཁམས་གསུམ་རྣམ་པར་རྒྱལ་བའི་གཟུགས་སུ་གྱུར་པ་སྟེ། རྒྱན་དང་གོས་ཞེས་ཏེ། སྟོད་གཡོགས་དང་སྨད་གཡོགས་དང་ཐོད་བཅིང་བ་དང༌། དཔུང་རྒྱན་ལ་སོགས་པ་དང་ལྡན་པར་བྱའོ། །དེ་ནས་རྡོ་རྗེ་དང་དྲིལ་བུར་ལྡན་པས་ནང་དུ་སོང་སྟེ་དཀྱིལ་འཁོར་ལ་གཡས་སུ་བསྐོར་བ་བྱས་ཏེ། ཕྱག་འཚལ་ནས་མེ་ཏོག་གཏོར་ཏེ་བདག་གི་མགོ་ལ་གཙོ་བོས་བཅིང་བར་བསམས་ནས། དག་པར་འགྱུར་རོ་ཞེས་སོ། །དེ་ནས་དཀྱིལ་འཁོར་པ་རྣམས་སྦྱིན་སྲེག་གིས་ཚི་མ་པར་བྱས་པའི་ཕྱིར་སྦྱིན་སྲེག་མཆོད་པ་ལ་སོགས་པས་སོ། །སོར་བཞིའི་ཚད་དུ་ལྷག་པ་ནི་དེ་ཙམ་དུ་ས་ལས་འཕགས་པའོ། །དེའི་ཚད་ཅེས་པ་ནི་སོར་བཞི་ཙམ་གྱི་པདྨ་རབ་ཏུ་རྒྱས་པ་སྟོང་པ་ཉིད་བཅུ་དྲུག་གི་རང་བཞིན་གྱིས་འདབ་མ་བཅུ་དྲུག་གིས་བསྐོར་བ་ནི་ཤུགས་ཀྱིས་རྟོགས་པར་བྱའོ། །ཁ་ཁྱེར་ཁྲུ་གང་ཞེས་པ་ནི་གོ་སླའོ། །ཁྲུ་ཕྱེད་ཅེས་པ་ནི་ཟབས་སུ་ཕྱེད་དོ། །འཁོར་ལོ་ལྟ་བུས་ལས་ཀུན་བྱེད། །ཅེས་པ་ནི་བསམ་པའི་བྱེ་བྲག་གིས་རྒྱས་པ་ལ་སོགས་པའི་ལས་རྣམས་ཀྱང་བྱེད་དོ། །ཕྱི་རོལ་རྡོ་རྗེ་ཕྲེང་བས་བསྐོར། །ཞེས་པ་ནི་ཐབ་ཀྱི་དབུས་སུ་ཕྱག་མཚན་གྱི་ཕྱི་རོལ་དུ་ཤེས་པར་བྱའོ། །ཀུན་བྱེད་བཟླས་ནས་བསྲུང་བྱས་ཏེ། །ཞེས་པ་ནི་བདག་དང་ཡོ་བྱད་ལ་སོགས་བའོ་ཞེས་སོ། །ཡོན་ཆབ་གཡོན་དུ་ཞེས་པ་ནི། དུང་ཕོར་གསུམ་ལ་སོགས་པ་གཡོན་དུ་གཞག་པ་ཉེ་རེག་ལ་སོགས་པ་བྱ་ཞེས་པའོ། །གཞན་དུ་གཞག་ཅེས་པ་ནི་གཡས་སུ་མེ་ཏོག་ལ་སོགས་པ་བཞག་ལ། གཡོན་གྱི་དུང་ཕོར་དང་པོའི་ཆུས་ཡོ་བྱད་གཞག་པ་རྣམས་ལ་དག་པར་བྱའི་ཕྱིར་བསང་གཏོར་བྱས་ནས་ཞེས་སོ། །གཡས་སྐོར་ཚུལ་དུ་ཀུ་ཤ་དངོ༌། །ཞེས་པ་ནི་བདག་དང་ཡོ་བུད་ལ་སོགས་པའོ། །ཧ་ཅང་རིང་བ་དང་ཐུང་བ་མ་ཡིན་པའི་སྐུ་ཤ་སྔོན་པོ་སྲིན་བུས་མ་ཟོས་པ་ལ་བཛྲ་སཏྭ་ཨ་ཞེས་བརྗོད་ནས་གནོད་སྦྱིན་ནས་བརྒྱ་བྱིན་གྱི་ཕྱོགས་སུ་རྩེ་མོས་རྩ་བ་ནོན་པར་དགྲམ་པར་བྱའོ། །དང་པོ་བསྐྱེད་པ་ཞེས་པ་ནི་སྤྱིན་སྲེག་གི་ལྷ་དང་པོ་སྟེ་མེ་ལྷའོ། །དེའི་སྙིང་པོ་
རཾ་མོ། །བཀུག་ནས་དང་པོའི་ཆོས་ཡེ་ཤེས་ཀྱི་མེ་ཞེས་པ་ནི་ས་བོན་གྱི་འོད་ཟེར་གྱི་ལྕགས་ཀྱུས་བཀུག་ནས་ཞེས་སོ། །བཀུག་པའི་སྔགས་ནི། ཨོཾ་མེ་ཡི་ལྷ་ནི་འབར་བ་ཆེ། །འདོད་པའི་དོན་ཀུན་སྒྲུབ་མཛད་པ། །སེམས་ཅན་དོན་ལ་ཐུགས་རྗེས་དགོངས། །གནས་འདིར་ཉེ་བར་བྱོན་མཛོད་ཅིག །ཨོཾ་ཚུར་སྤྱོན་ཚུར་སྤྱོན་འབྱུང་ཆེན་པོ། །ལྷ་དང་དྲང་སྲོང་བྲམ་ཟེ་དག །བསྲེག་པར་བྱས་ན་སྲེག་ཏུ་གསོལ། །གནས་འདིར་མྱུར་དུ་བྱོན་མཛོད་ཅིག །ཅེས་བརྗོད་ནས་ཐབ་ཀྱི་ཁ་ཁྱེར་ལ་བྱོན་པར་བསམ་མོ། །དེ་ལ་བསང་གཏོར་ལ་སོགས་བྱས་ནས་ཞེས་པ་ནི་ཀུ་ཤའི་བམ་པོས་དུང་ཕོར་དང་པོའི་ཆུ་གཏོར་ཞིང༌། ཨོཾ་ཨང་ཡེ་ཨཱ་དི་བྱ་ཨཱ་དི་བྱ་ཨཱ་བི་ཤ་ཨཱ་བི་ཤ་མ་ཧཱ་ཤྲཱི་ཡེ་ཧ་བྱ་ཀ་བྱ་བཱ་ཧཱ་ནཱ་ཡ་ཨ་རྒྷཾ་པྲ་ཏཱི་ཙྪ་སྭཱ་ཧཱ། ཞེས་བརྗོད་ནས་བསང་གཏོར་བྱའོ། །དེ་ནས་དུང་ཕྱོར་བར་མའི་མེ་ཏོག་དང་ལྡན་པའི་ཆུ་མཐེབ་མཛུབ་གཉིས་ཀྱིས་མེ་ཏོག་ཚུལ་དུ་བཟུང་ནས། ཨོཾ་ཨགྣ་ཡེ་ཨཱ་དི་བྱ་ཨཱ་དི་བྱ་ཨཱ་བི་ཤ་ཨཱ་བི་ཤ་མ་ཧཱ་ཤྲི་ཡེ་ཧ་ཀ་བྱ་བཱ་ཧཱ་ནཱ་ཡ་པྲ་བ་ར་སཏྐཱ་ར་པྲ་ཏཱིཙྪ་སྭཱ་ཧཱ། ཞེས་བརྗོད་ནས་ཉེ་རག་སྦྱིན་ནོ། །དེ་ནས་དུང་ཕོར་གསུམ་པའི་བདུད་རྩི་སྤོས་ལ་སོགས་པ་དང་དྲིལ་བུའི་སྒྲ་དང་བཅས་པས་ཞལ་དུ་བཏབ་ཅིང༌། ཨོཾ་ཨགྣ་ཡ་ཨཱ་དི་བྱ་ཨཱ་དི་བྱ་ཨཱ་བི་ཤ་ཨཱ་བི་ཤ་མ་ཧཱ་ཤྲི་ཡེ་ཧ་བྱ་ཀ་བྱ་བཱ་ཧཱ་ནཱ་ཡ་པུཥྤཾ་པྲ་ཏཱིཙྪ་སྭཱ་ཧཱ། ཞེས་བརྗོད་ནས་མཆོད་ཡོན་དབུལ་ལོ། །དེ་ནས་དུང་ཕོར་བར་མའི་མེ་ཏོག་འགྱིང་བག་ཏུ་བླངས་ཏེ། ཨོཾ་ཨགྣ་ཡེ་ཨཱ་དི་བྱ་ཨཱ་དི་བྱ་ཨཱ་བི་ཥའ་བི་ཥ་མ་ཧཱ་ཤྲི་ཡེ་ཧ་བྱ་ཀ་བྱ་བཱ་ཧཱ་ན་ཡ་སྭཱ་ཧཱ། ཞེས་བརྗོད་ནས་རྐང་པ་གཉིས་ལ་དབུས་བར་བྱའོ། །དེ་ལ་ཐིམ་པར་བསམ་ཞེས་པ་ནི། ཀུན་ནས་ཐིམ་པར་བྱས་ནས་བཅིངས་ཏེ་དབང་དུ་བྱས་ནས་སྔགས་འདི་བརྗོད་དོ། །ཨོཾ་ཨགྣ་ཡེ་ཨཱ་དི་བྱ་ཨཱ་དི་བྱ་ཨཱ་བིཥ་ཨཱ་བི་ཥ་མ་ཧཱ་ཤྲི་ཡེ་ཧ་བྱ་ཀ་བྱ་བཱ་ཧཱ་ནཱ་ཡ་སྭཱ་ཧཱ། ཞེས་བརྗོད་པར་བྱའོ། །དེ་སྟེང་རིན་ཆེན་རྡོ་རྗེའོ། །ཞེས་པ་ནི་མགུལ་པའི་སྟེང་དུ་རིན་ཆེན་རྩེ་མོའི་འོག་ཏུ་རྡོ་རྗེ་ཞེས་སོ། །རྡོ་རྗེ་དང་ཞེས་པ་ནི་དབུས་སུ་སོར་གཅིག་གི་རྡོ་རྗེ་བྲི་བར་བྱའོ། །གཞན་ལ་སོར་ཕྱེད་པའི་རྡོ་རྗེ་བྲི་བར་བྱའོ། །བླུགས་གཟར་དགང་གཟར་ཁ་ལ་འབར། །ཡི་དམ་ལྷ་སྙིང་བསམས་ནས་ནི། །ཞེས་པ་ནི་རྫས་འཛག་པའི་བུ་གར་རྡོ་རྗེའི་བུམ་པར་རཾ་བསམས་ནས་མར་
ལ་སོགས་པ་དབུལ་བར་བྱའོ། །དེ་ཡི་ཞལ་དུ་རཾ་བཀོད་ནས། །ཞེས་པ་ནི་མེ་ལྷ་དེའི་ཞལ་དུ་རཾ་བསམས་ལ་དེས་དྲངས་པར་བསམས་ནས་དབུལ་བར་བྱའོ་ཞེས་སོ། །བཀྲ་ཤིས་བསྲེགས་ཤིང་བསྲེག་བྱ་སྟེ། །ཞེས་པ་ལ་སོགས་པ་ནི་རྫས་དབུལ་བའི་རིམ་པ་སྟེ། དེ་ཡང་མར་ལ་སོགས་པ་ཞུ་པའི་རྫས་ནི་ཞལ་དུའོ། །ཡམ་ཤིང་དང་ཕྱེ་མ་དང་སྤོས་ནི་འོད་ཀྱི་དཀྱིལ་འཁོར་དུའོ། །ཞོ་དང་འབྲས་ལ་སོགས་པའི་ཟས་དང་ཏིལ་དང་འཐོར་འཐུང་ནི་ཕྱག་ཏུའོ། །དྲི་ནི་ཐུགས་ཀར་རོ། །མཆོད་ཡོན་དང་མར་མེ་ནི་མདུན་དུའོ། །མེ་ཏོག་ནི་སྤྱི་རྩེར་དབུལ་ལོ། །དེ་བསྟན་ཆོ་ག་རིམ་པ་བཞིན་ཞེས་སོ།། དེ་ལྟར་བསྲེགས་པས་འབར་བའི་མཚན་མ་ནི་དྲན་ནུས་པས་མ་བཤད་དོ། །དེ་ཉིད་ཡེ་ཤེས་འབར་མེ་ལ། །ཞེས་པ་ནི་མེ་ཐོབ་ཀྱི་གཟུགས་སུ་གྱུར་པའི་ནང་དུ་ཞེས་པའོ། །ཉི་ཟླ་ལས་བྱུང་བདག་པོར་བཅས། །ཞེས་པ་དེ་ཉིད་གསུམ་གྱི་སྔགས་བཟླས་ནས་བྱུང་སྟེ་ཇི་ལྟ་བ་བཞིན་དུ་བཀོད་པའོ། །དེ་ནས་འོད་ཟེར་གྱིས་དཀྱིལ་འཁོར་སྤྱན་དྲངས་ཏེ་མདུན་དུ་བསམ་མོ། །སྔགས་ནི། ཨོཾ་ཚུར་སྤྱོན་ཚུར་སྤྱོན་བཅོམ་ལྡན་འདས། །གང་ཟག་དང་པ་ཅན་རྣམས་ཀྱིས། །མཆོད་ཡོན་ལ་སོགས་དབུལ་བར་དགོངས། །གནས་འདིར་མྱུར་དུ་བྱོན་པར་མཛོད། །ཅེས་བརྗོད་པར་བྱའོ། །ཛཿ་ཧཱུཾ་བཾ་ཧོཿ་ཁཾ་རཾ་གྱིས་བསང་གཏོར་བྱའོ། །ཨོཾ་ནི་རི་ཏི་ཧཾ་ཁཾ་གིས་ཉེ་རེག་གོ །ཨོཾ་བཛྲ་པུཥྤེ་ཧཱུཾ་སྭཱ་ཧཱ། མེ་ཏོག་དང་ཞབས་གཡོན་ལ་དེས་དབུལ་ལོ། །ཨོཾ་བདྲ་དྷུཔྤེ་ཧཱུཾ་སྭཱ་ཧཱ། སྤོས་སོ། །ཨོཾ་བཛྲ་གནྡྷེ་ཧཱུཾ་སྭཱ་ཧཱ། དྲི་ཆབ་པོ། ཨོཾ་བཛྲ་དཱི་པཾ་ཧཱུཾ་སྭཱ་ཧཱ། མར་མེའོ། །ཨོཾ་བཛྲ་ནཻ་བི་ཏེ་ཧཱུཾ་སྭཱ་ཧཱ། ལྷ་བཤོས་སོ། །དེ་ནས་གཞུག་པ་དང་བཅིང་བ་དང་དབང་དུ་བྱ་བ་བྱས་ནས། ཨོཾ་བཛྲ་ཨ་ན་ལ་མ་ཧཱ་བྷཱུ་ཏ་ཛྭ་ལ་ཡ་སརྦ་དུཥྚཱན་ཧཱུཾ་ཕཊ་སྭཱ་ཧཱ་དྲྀ་ཤྱ་ཧོ་ཛཿ་ཧཱུཾ་བཾ་ཧོཿ། ས་མ་ཡ་སྟྭཾ། ཞེས་བརྗོད་ནས་ཉེ་བར་སྒྲུབ་པ་ལ་སོགས་པ་བྱིན་གྱིས་བརླབས་ནས་སྔོན་དུ་ཕྱིའི་མཆོད་སོགས་ནི་ཕྱི་དང་གསང་བ་བསྟོད་པ་མཛད་ནས། གོང་མའི་རིམ་པས་སྲེག་ཤིང་ལ་སོགས་པས་སོ་སོའི་སྔགས་ཀྱིས་དབུལ་ལོ་ཞེས་སོ། །དེ་ཡང་རྒྱས་པའི་ཞེས་པ་ལ་སོགས་པའོ། །རྒྱས་པ་ལ་ཨོཾ་གྱི་མཐའ་དང་བཅས་པའོ། །ཞི་བ་ལ་ནི་སྭཱ་ཧྰྸི་མཐའ་དང་བཅས་པའོ། །དགུག་པ་ལ་ནི། ཛའི་མཐའ་དང་བཅས་པའོ། །འཁོན་དང་
བསྐྲད་དང༌། མངོན་སྤྱོད་ལ་ནི་ཧཱུཾ་ཕཊ་ཀྱི་སྒྲ་དང་བཅས་པའོ། །དེ་བས། སྔགས་ཀྱིས་མཐའ་ཡས་བསྐུལ་བར་གསུངས། །ཞེས་བྱའོ། །སྔོན་བཞིན་ཡང་དག་ཚིམ་པར་བྱ། །ཞེས་པ་ནི་ཏིང་ངེ་འཛིན་གཉིས་པ་གསུངས་བཞིན་དུ་རླུང་ལ་སོགས་པས་དག་པར་བྱས་པའི་བདུད་རྩི་རིམ་པར་བྱའོ་ཞེས་སོ། །ཉི་ཟླ་འཁོར་ལོ་ཞེས་པ་ནི་དེ་ལས་འགྱུར་བའི་ཕྱིར་རོ། །དམ་པའི་ལྗགས་ཞེས་པ་ནི་ཧཱུཾ་ལ་སོགས་པའི་རྡོ་རྗེ་བསྐྱེད་པའི་རྡོ་རྗེ་བསྒོམས་ནས་དེའི་འོད་ཀྱིས་དྲངས་ནས་ཞེས་སོ། །དེ་ལྟར་ཚིམ་པར་བྱས་ནས་བཟོད་པར་གསོལ་བ་བཏབ་ནས་བསང་གཏོར་ལ་སོགས་པའི་བྱ་བ་བྱས་ནས་མཆོད་བསྟོད་བྱས་ཏེ་སྔགས་འདིས་གཤེགས་སུ་གསོལ་ལོ། །ཨོཾ་ཁྱོད་ཀྱིས་སེམས་ཅན་དོན་ཀུན་མཛད། །རང་གི་ཡུལ་དུ་གཤེགས་ནས་ཀྱང༌། ཡང་ནི་གནས་འདིར་བྱོན་མཛོད་ཅིག །མུཿ་ཞེས་བརྗོད་པར་བྱའོ། །རྣལ་འབྱོར་དག་ཅེས་པ་ནི་རང་གི་ལྷའི་སྦྱོར་བ་དང་ལྡན་པས་མེ་ལྷ་སྔོན་བཞིན་དུ་བསྐྱེད་ནས་གཞན་བཅུག་སྟེ། ལྷག་མའི་སྲེག་རྫས་རྣམས་གོང་མའི་རིམ་པས་བསྲེག་པར་བྱའོ་ཞེས་སོ། །དེ་བཞིན་དུ་གསོལ་བ་བཏབ་ནས་གོང་མའི་རིམ་པས་གཤེགས་སུ་གསོལ་ལོ། །སྦྱིན་སྲེག་གི་ཆོ་ག་བསྡུས་པའོ། །དེ་ལྟར་དཀྱིལ་འཁོར་མཆོད་པའི་ཆོ་ག་གསུངས་པ། དཀྱིལ་འཁོར་མཆོད་ནས་ཞེས་པ་ལ་སོགས་པའོ། །སློབ་མར་ཞུགས་པའི་རིམ་པ་བཞིན། །ཞེས་པ་ནི་བྱང་ཆུབ་ཏུ་སེམས་བསྐྱེད་པ་ལ་སོགས་པ་ནས་མེ་ཏོག་དེར་བའི་བར་གྱིས་དང་པོ་རང་ཉིད་ཞུགས་ནས། དབང་བསྐུར་ཡན་ཆད་བསྐྱེད་བྱས་ཏེ། །ཞེས་པ་བསྙེན་སྒྲུབ་བཞི་དང་ལྡན་པར་བྱས་ནས་སུའོ། །རིགས་བདག་བཀའ་སྩལ་ཐོབ་ནས་སུ། །ཞེས་པ་ནི་ཆུའི་དབང་ནས་བཀའ་སྩལ་པའི་དབང་ཡན་ཆད་ལྷས་གནང་བར་བསམས་ནས་ཞེས་བྱའོ། །དེ་ནས་སྒྲུབ་པ་པོ་རྣམས་ནི་དངོས་གྲུབ་ཀྱི་ལམ་གྱི་རིམ་པ་ལ་འཇུག་པར་ཤེས་པར་བྱའོ། །སློབ་དཔོན་ནི་འདོད་ཆགས་ཆེན་པོ་ལས་བྱུང་བའི་དཀྱིལ་འཁོར་གཟུགས་བརྙན་བཞིན་དུ་སྣང་བ་དེ་སློབ་མ་གཞུག་པར་བྱ་བའི་དོན་དུ་དེ་ཁོ་ན་ཉིད་དང་བདེན་པ་བརྗོད་པར་བྱའོ། །ནམ་མཁའ་ལས་བྱུང་ཞེས་པ་ལ་སོགས་པས་འཇམ་པའི་རྡོ་རྗེའི་དེ་ཁོ་ན་ཉིད་སྟོན་ཏོ། །མཆོག་ཆེན་ཞེས་པ་
ལ་སོགས་པས་ནི་རྣམ་པར་སྣང་མཛད་ཀྱི་དེ་ཁོ་ན་ཉིད་སྟོན་ཏོ། །སྐྱོན་མེད་རྟག་ལ་སོགས་པས་ནི་སྣང་བ་མཐའ་ཡས་ཀྱི་དེ་ཁོ་ན་ཉིད་སྟོན་ཏོ། །དེ་ལ་སྐྱོན་མེད་ཅེས་པ་ནི་ཟབ་མོའོ། །རྟག་པ་ཞེས་པ་ནི་གསལ་བའོ། །གཏན་དུ་དག་པ་ཞེས་པ་ལ་སོགས་པས་ནི་རིན་ཆེན་འབྱུང་ལྡན་གྱི་དེ་ཁོ་ན་ཉིད་སྟོན་ཏོ། །དངོས་གྲུབ་ཆེན་པོ་ཞེས་པ་ལ་སོགས་པས་ནི་མི་བསྐྱོད་པའི་དེ་ཁོ་ན་ཉིད་སྟོན་ཏོ། །སེམས་ཅན་ཀུན་ཞེས་པ་ལ་སོགས་པས་ནི་དེ་ཁོ་ན་ཉིད་གྲུབ་པའི་དེ་ཁོ་ན་ཉིད་སྟོན་ཏོ། །དེ་ལ་ཡིད་ཁྱབ་པ་ནི་ཕྱག་རྒྱ་ཆེན་པོའོ། །སྙིང་ལ་གནས་པ་ནི་དམ་ཚིག་གི་ཕྱག་རྒྱས་སོ། །ཀུན་གྱི་ཕ་ནི་ལས་ཀྱི་ཕྱག་རྒྱའོ། །འདོད་པའི་དོན་ནི་ཆོས་ཀྱི་ཕྱག་རྒྱའོ། །བདེན་པ་གང་གིས་ཞེས་པ་ལ་སོགས་པས་ནི་དེ་རྣམས་ལ་གསོལ་བ་གདབ་པའོ། །གཟུགས་བརྙན་དང་ནི་ཞེས་བྱ་བ་ལ་སོགས་པས་ནི་ལྷ་རྣམས་དང་གཞལ་མེད་ཁང་ལ་སོགས་པའི་དེ་ཁོ་ན་ཉིད་སྟོན་ཏེ། གཟུགས་བརྙན་དང་མཉམ་ཉིད་ལ་སོགས་པའི་ཆོས་ནི་དྲན་པ་ཉེ་བར་གཞག་པ་ལ་སོགས་པའོ། །དེ་ཉིད་ཤེས་པ་ནི་ཆོས་དེ་རྣམས་སོ། །དེ་ཉིད་རྙེད་པ་ཞེས་པ་ནི་གཞལ་མེད་ཁང་ལ་སོགས་པའི་མཚན་ཉིད་དུ་ཤེས་པའོ། །དེ་ལྟ་བུའི་དཀྱིལ་འཁོར་གཟུགས་ལྟར་གསལ་བ་སྟེ། སྡིག་མེད་པར་ནི་བལྟ་བར་བྱ། །ཞེས་སྡེམ་པ་ལ་སོགས་པའི་རིམ་པས་དག་པར་བྱས་པའི་སློབ་མ་ཞེས་བྱའོ། །ད་ནི་སློབ་མ་གཞུག་པའི་ཆོ་ག་གསུངས་པ་ཐུན་མོང་བཞེས་ལ་སོགས་པའོ། །ཐུན་མོང་སྡོམ་པ་ཞེས་པ་ནི་རིག་པའི་དབང་ཐོབ་པར་བྱེད་པའི་སྡོམ་པ་སྟེ། བྱང་ཆུབ་སེམས་དཔའ་རྣལ་འབྱོར་གྱི་རྒྱུད་ལ་སོགས་པ་དང་ལྡན་པ་ཐུན་མོང་དུ་གྱུར་པའི་ཕྱིར་རོ། །དེ་དང་དུས་སྔོན་དུ་ལྡན་པར་བྱས་པ་ཞེས་པའི་དོན་ཏོ། །སྔོན་བཞིན་ཞེས་པ་ནི་བསྙེན་པའི་སྐབས་བཞིན་དུ་ཞེས་སོ། །སྐུ་སོགས་འོད་གསལ་ཞེས་པ་ནི་རྣམ་པར་སྣང་མཛད་ཀྱི་ངོ་བོ་བསྙེན་སྒྲུབ་བཞི་དང་ལྡན་པར་བསམ་པའོ་ཞེས་སོ། །དེ་ནས་དཀྱིལ་འཁོར་ཆེན་པོ་དང་བར་དུ་ཡོལ་བས་བཅད་ནས་བསང་བྱེད་ཀྱི་བུམ་པའི་ཆུས་གཏོར་ལ་དམར་པོའི་ཤམ་གྱིས་གདོང་གཡོགས་ཏེ། ཞེས་པ་ནི་ལྷའི་ཡེ་ཤེས་ཞེན་པར་བྱའི་ཕྱིར་དེས་གཡོགས་ཞེས་པའོ། །དེ་ནས་བླ་མས་ཁྱོད་ཅི་ལ་དགའ་ཞེས་ལན་གསུམ་དུ་དྲི་བར་བྱའོ། །དེས་བསྐལ་པ་བཟང་པོ་དགའ་བོ་
ཞེས་ལན་གསུམ་སྨྲ་བར་བྱའོ། །མེ་ཏོག་གི་ཕྲེང་བ་ལག་པས་དཀྱིལ་འཁོར་གྱི་ལྷ་ལ་སྒོ་ནས་ཡང་དག་པར་མཆོད་པར་བྱ་སྟེ། དེ་བཞིན་གཤེགས་པ་ལྷའི་རྣལ་འབྱོར་མ་བཏང་བ་ཉིད་དུ་ཞེས་སོ། །སོན་པ་འབུལ་ཞེས་པ་ནི་བླ་མ་ལ་དབུལ་བ་སྟེ། ཡུལ་འཁོར་ཁྱིམ་དང་གླང་པོ་རྟ། །གསེར་དང་མུ་ཏིག་བྱི་རུ་དང༌། །ནོར་བུ་དང་ནི་ཁྱད་པར་རྫས། །བུ་དང་ཆུང་མ་བདག་ཉིད་དང༌། །བུ་མོ་ཤིན་ཏུ་ཡིད་འོང་དང༌། །བྲན་ཕོ་བྲན་མོ་བཅས་པ་ཀུན། །དེང་ནས་བརྩམས་ཏེ་དབུལ་བར་བྱ། །ཞེས་ཡོན་གྱི་བྱེ་བྲག་གིས་དབུལ་ལོ། །སྙིང་གར་རྡོ་རྗེ་སྙིང་གཞག་སྟེ། །ཞེས་པ་ཧཱུཾ་གིས་བསྐྱེད་ནས་ཞེས་སོ། །དེ་ནས་ཨོཾ་སརྦྦ་ཡོ་ག་ཞེས་པ་ནས་སུ་ར་ཏེ་ས་མ་ཡ་སྟྭཾ་ཞེས་པས་བྱང་ཆུབ་ཏུ་སེམས་བསྐྱེད་ལ། ཏིཥྛ་བཛྲ་ཡ་ཐ་སུ་ཁཾ་ཞེས་པས་འཁོར་ལོ་བསྐུལ་བར་བྱས་ནས་འདི་བརྗོད་དོ། །འདི་ཁྱོད་ལ་དེ་བཞིན་གཤེགས་པ་ཐམས་ཅད་ཀྱིས་ཞེས་པ་ནས་དད་པ་མི་བྱེད་པ་ཡང་མི་རུང་ངོ་ཞེས་པའི་བར་དུ་བརྗོད་པར་བྱའོ། །དེ་ནས་གཤིན་རྗེ་གཤེད་ལ་སོགས་པའི་རང་སྔགས་ཀྱིས་ཡོལ་བའི་རྒྱབ་ཏུ་བཀུག་ནས་ཆུད་པར་བྱས་སམ་ཡང་ན་ཡི་གེ་ལྔ་པོ་བརྗོད་ཅེས་པ་ནི་ཨ་ཁཾ་བའི་ར་ཧཱུཾ་ཞེས་བརྗོད་ནས་གཞུག་པ་ལ་སོགས་པ་བྱས་ནས་སྔ་མ་བཞིན་དུ་སྡོམ་པ་འཛིན་དུ་གཞུག་གོ །དེ་ནས་འོག་ཏུ་ཡང་བརྗོད་དོ། །དེ་ཡང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་ལ་ཞེས་པ་ནས་ཁྱོད་པའི་ཚིག་ལས་འདས་པར་མི་རུང་ངོ་ཞེས་བརྗོད་པར་བྱའོ། །དེ་ནས་དམ་བསྒྲག་པའི་ཕྱིར་དེའི་སྙིང་གར་རྡོ་རྗེ་བཞག་ནས། ཨོཾ་དེ་རིང་རྡོ་རྗེ་སེམས་དཔའ་ཉིད། །ཅེས་པ་ནས། དེ་མ་ཐག་ཏུ་བཀས་ནས་གཤེགས། །ཞེས་བརྗོད་དོ། །ཡི་གེ་གསུམ་འབར་པདྨར་གནས། །ཞེས་པ་ནི་པདྨ་བྷནྡྷའི་ནང་དུ་གནས་པའི་བདུད་རྩི་ཡི་གེ་གསུམ་གྱིས་སྦྱངས་པའི་བདུད་རྩི་འཐུང་དུ་གཞུག་སྟ་འདི་བརྗོད་དོ། །འདི་ནི་ཁྱོད་ཀྱི་དམྱལ་བའི་ཆུ། །ཞེས་པ་ནས། ཨོཾ་བཛྲ་བ་ཞེས་པའི་བར་དུ་བརྗོད་པར་བྱའོ། །དེ་ནས་བརྟན་པའི་དམ་བཅས་པ་ནས་རྡོ་རྗེ་དང་བདུད་རྩི་འགྱུར་དུ་མི་གནས་པའི་ཕྱིར་བརྟན་པའོ། །དེ་རིང་ཕྱིན་ཆད་ཁྱོད་ཀྱིས་ཞེས་པ་ནས་དམྱལ་བར་ལྟུང་བར་མ་འགྲོ་ཞིག་ཅེས་བརྗོད་པར་བྱའོ། །དེ་ནས་སློབ་
དཔོན་གྱིས་དེ་ལྟར་སྨྲས་པ་ལས་སློབ་མས་ཀྱང་དེ་ལྟར་བཀའ་གདབས་པར་བྱའོ། །དེ་བཞིན་གཤེགས་པ་ཐམས་ཅད་ཀྱིས་ཞེས་པ་ནས་དབབ་པར་ཤོག་ཅིག་ཅེས་གསོལ་བ་གདབ་པར་བྱའོ། །དེ་ནས་དེའི་སྙིང་གར་ལཾ་ལས་བྱུང་བའི་དབང་ཆེན་གྱི་དཀྱིལ་འཁོར་སེང་པོ་གྲྭ་ལ་སྣ་ཚོགས་རྡོ་རྗེས་མཚན་པ་ལ་ཧཱུཾ་བསམ་མོ། །མགྲིན་པར་བཾ་ལས་བྱུང་བ་ཆུའི་དཀྱིལ་འཁོར་ཟླུམ་པོ་བུམ་པས་མཚན་པ་ལ་ཨས་མཚན་པའོ། །དེ་བཞིན་དུ་སྤྱི་བོར་ཡཾ་ལས་བྱུང་བའི་རླུང་གི་དཀྱིལ་འཁོར་གཞུ་འདྲ་བ་རྒྱལ་མཚན་སྔོན་པོས་མཚན་པ་ལ་ཧ་བསམ་མོ། །དེའི་རྐང་པའི་འོག་ཏུ་འོད་ཟེར་འབར་བའི་ཛྷཻ་བསམས་ནས། རླུང་རང་བྱུང་ཟུར་གསུམ་པ་ཞེས་པ་ནི་རླུང་གི་སྟེང་དུ་མེ་གཟུགས་གྲུ་གསུམ་པའི་སྟེང་དུ་ཛྷཻ་བསམས་ནས། དེའི་འོད་རྐང་པའི་བུ་གནས་ཞུགས་ནས། རྐང་གི་དབུས་ཚུན་ཆད་སྣང་བར་བྱས། ཨཱ་བེ་ཤ་ཡ་སྟྭཾ་པ་ཡ་ར་ར་རར་ཙ་ལ་ཡ་ཧཱུཾ་ཧ་ཨཱ་ཛྷཻ་ཞེས་པ་དང་རྡོ་རྗེ་དྲིལ་བུའི་སྒྲ་དང་བཅས་པས་དབབ་པར་བྱའོ། །དེ་མ་ཐག་ཏུ་འོད་དཔག་ཏུ་མེད་པར་མོས་པའི་ལྕེའི་སྟེང་དུ་ཐིག་ལ་དམར་པོ་ལ་ཨ་བསམས་ནས་གསུངས་ཤིག་ཅེས་བརྗོད་པར་བྱའོ། །དེ་ནས་ཏིཥྛ་བཛྲ་ཞེས་བརྗོད་ནས་བརྟན་པར་བྱའོ་ཞེས་སོ། །དེ་ནས་མེ་ཏོག་གི་ཕྲེང་བ་དཀྱིལ་འཁོར་དུ་གཏོར་བར་བྱའོ། །པྲ་ཏཱི་ཙྪ་བཛྲ་ཧོ་ཞེས་བརྗོད་ནས་དེ་ཉིད་མགོ་ལ་བཅིང་བར་བྱ་སྟེ་སྔགས་འདི་བརྗོད་དོ། །ཨོཾ་པྲ་ཏི་གྲྀ་ཧྣ་སྭ་མཾ་མ་ཧཱ་བ་ལ་ཞེས་བརྗོད་པར་བྱའོ། །ཕྱག་མཚན་ཉེ་འམ་ཞེས་པ་ནི་རེའུ་ཆའི་གནས་ལས་ནི་ཤེས་པར་བྱ་སྟེ་སྐུ་དང་དབུ་ལ་བབ་ན་མཆོག་གོ །ཞལ་ལ་བབ་ན་སྔགས་ཀྱི་དངོས་གྲུབ་པོ། །སྐུའི་དབུས་སུ་བབ་ནས་ཐ་མལ་པ་བརྒྱད་དོ། །སྨད་དུ་བབ་ན་ལས་རྣམས་འགྲུབ་པོ། །ཉེ་ན་དངོས་གྲུབ་ཀྱང་ཉེའོ། །རིང་ན་དངོས་གྲུབ་ཀྱང་རིང་ངོ༌། །བར་དུ་བབ་ན་ཉེ་བའི་རིགས་སོ། །དཀྱིལ་འཁོར་ལས་ཐལ་ན་དད་པ་ཆུང་དུ་སྟེ་དམན་པའི་དངོས་གྲུབ་པོ། །སྙིང་པོ་ལ་བབ་ན་གང་ཡང་འགྲུབ་པོ། །རེ་ཁཱ་ལ་ཕོག་ན་ཡང་དོར་རོ། །མཉམ་པའམ་བདག་གི་མདུན་དུ་ལྷུང་ན་ལན་གསུམ་དོར་རོ། །དེར་མ་ཆུད་ན་སླར་གཏང་པོ་ཞེས་སོ། །སྤྱན་ལ་ཕྱག་འཚལ་འོད་འབར་ཅན། །ཞེས་པ་ནི་མིག་གཉིས་ལ་འོད་ཟེར་འབར་བའི་ཨོཾ་རེ་རེ་
བཀོད་དོ། །ཨོཾ་བཛྲ་ས་ཏྭ་ས་མནྟེ་དེ་ཏྱ་ཙཀྵཱུདྒྷ་ཊ་AN་ཏ་པ་ར་པ་ཨུདྒྷ་ཊ་ཡ་ཏི་སརྦྦ་AAKShO་བཛྲ་ཙཀྵུ་ཨ་ནུཏྟ་རཾ་ཞེས་བརྗོད་ནས་གདོང་གཡོགས་བཀྲོལ་ཏེ་ཁྱོད་ཀྱི་མིག་གིས་ཇི་ལྟར་མཐོང་ཞེས་དྲིས་ཏེ། དཀར་པོ་མཐོང་ན་མཆོག་ཐོབ་པའོ། །སེར་པོ་མཐོང་ན་རྒྱས་པའོ། །དམར་པོ་མཐོང་ན་དབང་ངོ༌། །ནག་པོ་ནི་མངོན་སྤྱོད་དོ། །སྣ་ཚོགས་པ་ནི་གང་ཡང་རུང་པའོ། །ཤེས་བྱའི་རྣམ་པ་ཐམས་ཅད་ལ་མིག་ཕྱེ་བར་བསམས་ནས་དཀྱིལ་འཁོར་པར་བྱའོ། །ཇི་ལྟར་ཞེ་ན། འཁོར་ལོའི་བདག་པོ་ནས་བརྩམས་ནས་བདུད་རྩི་འཁྱིལ་པ་ཡན་ཆད་དོ་ཞེས་པ་སྟེ་འཇམ་དབྱངས་ནས་ཀུན་བྱེད་རྣམ་པར་དག་པ་དང་བཅས་པ་ཞེས་སོ། །ཀུན་བྱེད་ནས་གཙོ་བོའི་བར་དུ་བསྟན་ཏོ་ཞེས་པ་ཅི་འདོད་དོ། །ད་ནི་སློབ་མ་དབང་བསྐུར་བའི་ཆོ་ག་གསུངས་པ། སྤྱི་བོར་ཞེས་པ་ལ་སོགས་པའོ། །དེ་ལ་བུམ་པ་རྣམས་ཀྱི་ཆུ་མཆོད་ཡོན་གྱི་སྣོད་ལས་གཅིག་ཏུ་བྱས་པ། ཧཱུཾ་དང་རྡོ་རྗེ་ལས་མི་བསྐྱོད་པའི་བསྙེན་སྒྲུབ་བཞི་དང་ལྡན་པས་གྲུབ་པར་བྱས་ཡེ་ཤེས་སེམས་དཔའ་བཀུག་སྟེ་མཆོད་ནས་ཐིམ་པར་བྱ་སྟེ། ཆུའི་ངོ་བོར་གྲུབ་པར་བྱས་ནས་སྤྱི་བོར་བླུགས་ནས་སྔགས་འདི་བརྗོད་པར་བྱའོ། །གསང་གསུམ་དམ་ཚིག་ལས་བྱུང་པ། །ཡེ་ཤེས་བདུད་རྩི་དྲི་མ་མེད། །ལྷ་ཡི་ཆུ་ནི་རབ་དག་པས། །མི་བསྐྱོད་རྡོ་རྗེའི་དབང་བསྐུར་རོ། །ཨོཾ་བཛྲོ་ད་ཀཱ་བྷིཥིཉྩ་ཡ་མཱཾ་ཞེས་བརྗོད་པས་མེ་ལོང་ལྟ་བུའི་ཡེ་ཤེས་རབ་ཏུ་རྒྱས་སོ། །དེ་བཞིན་དབུ་རྒྱན་དབང་བསྐུར་སྔ་མ་བཞིན། །ཞེས་པ་ནི་ལུགས་མ་ལ་སོགས་པའི་དབུ་རྒྱན་ལ་ངར་གྱི་ཅོད་པ་ནི་གྱིས་མཚན་པ་དང་། རིན་ཆེན་འབྱུང་ལྡན་གོང་མ་བཞིན་དུ་བསྒོམས་ནས་དེར་གྱུར་པ་ལ་བསྐོན་ཏེ་འདི་སྐད་བརྗོད་དོ། །སངས་རྒྱས་ཀུན་གྱི་རྒྱལ་སྲིད་ཆེ། །དབུ་རྒྱན་རིན་ཆེན་དམ་པ་སྟེ། །རིན་ཆེན་ཀུན་གྱི་མཆོག་འགྲོ་བས། །རྫོགས་སངས་རྒྱས་སུ་དབང་བསྐུར་བའོ། །ཨོཾ་བཛྲ་བའི་ར་ཏ་ཀ་བཛྲ་ཤ་ལི་ཧོཿ་ཞེས་བརྗོད་ནས་དེའི་དབུས་སུ། ཡི་དམ་གྱི་ལྷ་ནི་བྱིན་ནས་ཞེས་པ་ནི་རིགས་ཀྱི་བདག་པོ་གཞག་པར་བྱའོ། །མཉམ་པ་ཉིད་ཀྱི་ཡེ་ཤེས་རབ་ཏུ་རྒྱས་སོ། །སྙིང་གར་རྡོ་རྗེ་དེ་བཟུང་ནས་ཞེས་པ་ནི་ཧྲཱིཿ་དང་པདྨ་ལས་གྱུར་པའི་སྣང་བ་མཐའ་ཡས་སྔར་བཞིན་གྲུབ་པར་བྱས་ནས། དེ་ཡོངས་སུ་
གྱུར་པའི་རྡོ་རྗེ་ལག་པ་གཡས་པར་སྦྱིན་ཏེ་དབང་བསྐུར་རོ། །སངས་རྒྱས་རྣམས་ཀྱི་རྡོ་རྗེའི་དབང༌། །དེ་རིང་ཁྱོད་ལ་བསྐུར་བར་བྱ། །རབ་གྲུབ་ཕྱིར་ན་གཟུང་བར་བྱ། །ཨོཾ་པྲ་ཏི་ཨཱ་བེ་ཤ་ཛྙཱ་བཛྲ་ཨ་བྷི་ཥིཉྩི་ཞེས་བརྗོད་པས་སོ་སོར་རྟོག་པའི་ཡེ་ཤེས་རྒྱས་སོ། །རྡོ་རྗེ་དྲིལ་བུས་འཁྱུད་པའི་ཚུལ། །ཞེས་པ་ལཾ་དང་རལ་གྲི་ལས་བྱུང་བའི་དོན་ཡོད་གྲུབ་པ་ནི་སྔ་མ་བཞིན་དུ་གྲུབ་པར་བྱས་ནས། དེ་ལས་གྱུར་པའི་དྲིལ་བུར་བསྒོམས་ཏེ་རྡོ་རྗེ་དང་འཁྱུད་པའི་ཚུལ་གྱིས་བཟུང་སྟེ། བདག་པོར་དབང་ཞེས་པ་ནི་ཕྱི་དང་ནང་གཉིས་ཀྱི་རྣལ་འབྱོར་ལས་སོ། །ཐབས་དང་ཤེས་རབ་ལྡན་པ་ཡིས། །འགྲོ་དོན་མཉམ་ཉིད་བྱེད་པ་དང༌། །མཆོད་པའི་ལས་རྣམས་རྫོགས་བྱེད་ཕྱིར། །རྡོ་རྗེ་ལས་ཀྱི་དབང་བསྐུར་རོ། །ཨོཾ་བཛྲཱ་དྷི་པ་ཏི་སྟཾ་ཨ་བྷི་ཥིཉྩ་མི་ཞེས་བརྗོད་པས་བྱ་བ་ནན་ཏན་གྱི་ཡེ་ཤེས་རབ་ཏུ་རྒྱས་སོ། །ཕྱི་བོར་མིང་གི་དབང་བསྐུར་ཏེ་ཞེས་པ་ནི་རྣམ་པར་སྣང་མཛད་ཕབ་སྟེ། དེའི་ལུས་ལ་སྟྭཾ་སྩལ་སྤྱི་བོར་ལག་པ་བཞག་ནས་ཀྱེ་ཆེ་གེ་མོ་རྡོ་རྗེ་ཞེས་པ་ནི་བོས། །རྡོ་རྗེ་མིང་གི་དབང་བསྐུར་བས། །བྱང་ཆུབ་སྙིང་པོའི་བར་དུ་ནི། །ཅིས་ཀྱང་མི་ཤིགས་མི་གཡོ་བར། །རྡོ་རྗེ་དབང་ནི་རབ་ཏུ་གྲགས། །ཨོཾ་བཛྲ་ས་ཏྭ་ཏྭཾ་ཨ་བྷིཥིཉྩ་ཏ་ཞེས་བརྗོད་པས་རྣམ་པར་དག་པའི་ཡེ་ཤེས་རབ་ཏུ་རྒྱས་སོ། །ད་ནི་དེ་རྣམས་ལ་ཡེ་ཤེས་ལྔ་འབྱུང་བ་གསུངས་པ། གང་གང་ཞེས་པ་ལ་སོགས་པའོ། །དཀྱིལ་འཁོར་གྱི་གང་དང་གང་སྣང་བ་དེ་ཀུན་གྱི་རང་བཞིན་ནི། འཇམ་པའི་རྒྱལ་པོ་ཉིད་ཡིན་ཏེ་འདི་ཕྱིར། རང་བཞིན་གྱིས་ནི་ཆོས་ཀུན་དག །ཅེས་པ་སྟེ། རང་བཞིན་གྱི་བསྒོམ་པ་བྲལ་བའི་ཕྱིར་ན་ཆོས་ཀུན་ལྷའི་སྐུར་སྣང་བའོ། །དེ་ཀུན་ཡེ་ཤེས་འདུས་པའི་ཕྱིར། འཇམ་པའི་དབྱངས་ནི་རང་གི་དཀྱིལ་འཁོར་གྱི་གཙོ་བོ་འམ་གཞན་ལས་ཁྱད་པར་དུ་མཐོང་བར་བྱ་བའི་མཚན་གྱི་གོང་དུ་དཔལ་ཞེས་པའི་སྒྲ་གཞག་གོ་ཞེས་སོ། །དབང་རྣམ་པར་དག་པ་གསུངས་པ། ཆུ་དབང་མི་བསྐྱོད་ཅེས་པ་ལ་སོགས་པའོ། །ཡེ་ཤེས་རིག་འདི་རྡོ་རྗེར་འགྱུར། །ཞེས་པ་ནི་མིང་གི་དབང་ནི་རིག་པའི་བདག་ཉིད་ཀྱི་ཕྱིར་ན་ཡེ་ཤེས་ཏེ་ཤིན་ཏུ་རྣམ་པར་དག་པའོ། །ད་ནི་ཐུན་མོང་དུ་གསུངས་པ་ཆོས་ཀྱི་དབྱིངས་ཞེས་བྱའོ། །དེའི་རྒྱུད་ནི་དེ་ལས་གྱུར་པ་སྟེ་དབང་བཞིའོ། །དེ་ནས་
འདིར་དབང་བཞི་བསྡུས་པས་ན་ཁྱད་པར་དུ་དེ་ལ་རིག་པའི་དབང་ཞེས་བྱའོ། །འདི་རྣམས་ཀུན་གཞི་ལ་སོགས་པ་མེ་ལོང་ལྟ་བུར་གནས་འགྱུར་བས་མ་རིག་པ་འཇོམས་པའི་ཕྱིར་དེ་སྐད་བརྗོད་དོ། །ད་ནི་དེ་རྣམས་ཀྱི་རྒྱུ་བརྟུལ་ཞུགས་ལ་སོགས་པ་གསུམ་དུ་གསུངས་པ། བརྟུལ་ཞུགས་ཞེས་བྱ་བ་ལ་སོགས་པའོ། །བརྟུལ་ཞུགས་ཞེས་པ་དམ་ཚིག་གསུམ་ལས་དང་པོ་དང་གཉིས་པའོ། །ལུང་བསྟན་པ་དང་དབུགས་དབྱུང་བ་ནི་འོག་ནས་སྟོན་པ་སྟེ་ཐུན་མོང་དུ་ཤེས་པར་བྱའོ། །དེ་རྣམས་ནི་རིག་པའི་ཡེ་ཤེས་ལྔའོ། །འདི་སྤྱོད་པ་བྱེད་པས་ན་རིག་པར་སྦྱོར་བའོ།། དེ་བས་ན་དམ་ཚིག་འདི་མེད་པར་རྡོ་རྗེ་སློབ་དཔོན་གྱི་དབང་བསྐུར་བའི་སྣོད་མ་ཡིན་པས་ཧཱུཾ་ལས་གྱུར་པའི་རྡོ་རྗེ་ལག་ཏུ་གཏད་ལ་འདི་སྐད་དུ། འདི་ནི་སངས་རྒྱས་ཐམས་ཅད་ཀྱི། །ཞེས་བརྗོད་ནས། ཧི་ཧི་ཧཱུཾ་ཞེས་པ་ནས་རྡོ་རྗེ་བརྟུལ་ཞུགས་བྱིན་ཏེ་དེ་ནས་རྡོ་རྗེའི་དེ་ཁོ་ན་ཉིད་བསྟན་ཏོ། །ཐོག་མཐའ་མེད་ཕའི་སེམས་དཔའ་ཞེས་པ་ནས་རྡོ་རྗེ་སྙིང་པོའི་གཙོ་ཞེས་པ་དེ་ཁོ་ན་ཉིད་བྱིན་པ་ནི་རྡོ་རྗེའི་དམ་ཚིག་གོ །དེ་ལྟ་བུའི་དེ་ཁོ་ན་ཉིད་རྟོགས་པས་གསུང་གི་བསྟན་པའི་ཕྱིར་དྲིལ་བུ་གྲོགས་སུ་གསུངས་པ། དེ་བཞིན་ཉིད་ཅེས་པ་ལ་སོགས་པ་གསུངས་སོ། །ཨ་ལས་ཡོངས་སུ་གྱུར་པའི་དྲིལ་བུ་ལག་ཏུ་བྱིན་ལ། འདི་དེ་སངས་རྒྱས་ཐམས་ཅད་ཀྱི། །ཞེས་པ་ནས། རྒྱལ་བས་བྱང་ཆུབ་མཆོག་ཏུ་འདོད། །ཅེས་པས་བརྟུལ་ཞུགས་བྱིན་ནས་དེ་ཁོ་ན་ཉིད་བརྗོད་དོ། །དེ་ནི་ཆོས་ཀྱིས་ཞེས་པ་ནི་གཞུང་བཞིན་དུ་དཀྲོལ་བར་བྱ་སྟེ། སྲིད་པ་རང་བཞིན་གྱིས་དག་པ། །ཞེས་པ་ནི། གཟུང་བ་ལ་སོགས་པས་དག་པ་སྟེ་དེ་ལྟར་མ་ཡིན་ན་དོན་མེད་པར་འགྱུར་བ་ལ་སོགས་པའོ། །རང་བཞིན་དག་ཅེས་པ་ནི་ཟབ་པའོ། །དེ་སེམས་ཅན་ཏེ་བྱང་ཆུབ་སེམས་དཔའ་རྣམས་ཀྱིས་བསྒོམས་པས་དམ་པའི་སྲིད་པ་ཞེས་ཏེ། དེ་བཞིན་གཤེགས་པ་རྣམས་ཐོབ་པར་བྱེད་པའོ། །བྱེད་པ་པོ་ཞེས་པ་ནི་ཟབ་པ་དེ་ཉིད་དོ། །དེ་ལྟ་བུའི་རང་བཞིན་དུ་ཤེས་པ་ནི་དྲིལ་བུའི་དམ་ཚིག་གོ །ད་ནི་ཕྱག་རྒྱའི་དམ་ཚིག་གིས་བཅོམ་ལྡན་འདས་ཐོབ་པར་བྱེད་པའི་བཟླས་པ་གསུངས་པ་ཕྱག་རྒྱ་ཆེན་པོ་ཞེས་པ་ལ་སོགས་པའོ། །ཕྱག་རྒྱ་ཆེན་པོ་ཞེས་པ་ནི་ལྷའི་སྐུ་ལ་སོགས་པའོ། །
བྱིན་གྱིས་བརླབས་ཏེ་ཞེས་པ་ནི་སྐུལ་སོགས་པའོ། །སྙིང་ག་ཞེས་པ་ནི་ས་བོན་རྣམས་ཀྱིས་སོ། །བསྙེན་པ་ལ་སོགས་ཞེས་པ་ནི་ཆུང་དུ་དང༌། འབྲིང་པོ་དད་ཆེན་པོའི་བསྙེན་པ་ལ་སོགས་པས་སོ། །དམ་ཚིག་ཅེས་པ་ནི་རྡོ་རྗེ་འཛིན་པའོ། །འདོད་པ་ཡང་ཡིན་ལ་གཟུགས་ལ་སོགས་པ་ཡང་ཡིན་པས་དེ་སྐད་དོ། །སྔགས་ནི་དབུས་སུ་བཏགས་ནས་བཟླས། །ཞེས་པ་ནི་མན་ངག་གི་རིམ་པས་ཤེས་སོ། །རང་གི་རང་བཞིན་ཞེས་པ་ནི་རང་གི་ལྷའི་རང་བཞིན་ཏེ་གཟུགས་ལ་སོགས་པའོ། །དེ་ལྟར་ཤེས་པར་བྱས་ནས་མཆོད་པར་བྱའོ་ཞེས་ཏེ་གསང་ཆེན་གྱི་མཆོད་པ་སྟེ་ཡིད་དགའ་བར་བྱེད་པའི་ཕྱིར་རོ། །མི་མཐུན་པ་གང་ཞེ་ན། དཀའ་ཐུབ་དམ་བཅས་དེ་དག་ནི། །ཞེས་པ་སྟེ་ཉན་ཐོས་ལ་སོགས་པའོ། །དེ་བསྙེན་བྱས་ན་འགྲུབ་པ་མེད། ཅེས་སོ། །གང་མི་འགྲུབ་ཅེ་ན། མི་སྣང་མངོན་ཤེས་མཁའ་འགྲོ་སྟེ། ཐ་མལ་པ་རྣམས་ཀྱིས་མི་འགྲུབ་པོ། །དེ་བཞིན་དུ་སྐུ་གསུང་ཐུགས་ལ་འགྲུབ་པ་ཕྱག་རྒྱ་ཆེན་པོ་ཡང་མི་འགྲུབ་ཅེས་སོ། །དེ་བས་ན་བཀའ་སྩལ་པ། དེ་ནས་སངས་ཞེས་པ་ལ་སོགས་པའོ། །འབྲས་བུ་གསུངས་པ། ཆོས་ཡིག་མཆོག་ཅེས་ཏེ་མི་འགྱུར་བས་ན་ཡི་གེ་སྟེ། ཟབ་པོ་གསལ་བ་དབྱེར་མེད་པའོ། །བདེ་སྡུག་གཉིས་མེད་བདག་མེད་ཅེས་པ་ནི་གཟུགས་ལ་སོགས་པ་རེ་རེ་ཡང་གསུམ་གྱི་བདག་ཉིད་དོ། །དེ་འདོད་ཆགས་ཡེ་ཤེས་ཏེ་རྡོ་རྗེ་འཛིན་པ་ལ་སོགས་པར་ཤེས་པར་བྱས་ནས་དེ་ཁོ་ན་ཉིད་འགྲུབ་པོ་ཞེས་སོ། །དེ་ཡང་སྐུ་གསུང་ཐུགས་བསྒོམ་པ། །ཞེས་པ་ནི་ཕྱག་རྒྱའི་དམ་ཚིག་བསྒོམས་ན་བརྟགས་པ་ཙམ་གྱིས་འགྲུབ་པོ་ཞེས་སོ། །དམ་ཚིག་གསུམ་བསྡུས་པ་གསུངས་པ། ཇི་སྐད་ཅེས་པ་ལ་སོགས་པའོ། །ད་ནི་རྡོ་རྗེ་སློབ་དཔོན་གྱི་དབང་བསྐུར་བ་གསུངས་པ། སྡོམ་པ་ཞེས་པ་ལ་སོགས་པ་གསུངས་པའོ་ཞེས། སྔོམ་པ་བཟུང་བའི་སློབ་མ་ཡིས། ཞེས་པ་ནི་ཕྱིར་མི་ལྡོག་པའི་སྡོམ་པའོ། །དེ་ཡང་ཕྱིར་མི་ལྡོག་པའི་དབང་ལ་སོགས་པས་སློབ་མ་བཞུགས་སུ་གསོལ་བར་བྱ་སྟེ། དེ་ནས་བླ་མས་སྡོམ་པའི་མཆོག་བཀའ་སྩལ་པ། །ཕམ་པ་འདི་ནི་བཅུ་བཞིར་གྲགས། །སྤང་ཞིང་དོར་བར་མི་བྱ་སྟེ། །རྩ་བའི་ལྟུང་བ་དེ་ལྟར་གསུངས། །སློབ་དཔོན་ཉིད་ལ་སྨོད་པ་དང༌། །བདེ་བར་
གཤེགས་པའི་སྐད་ཅིག་དང༌། །ཁྲོས་པས་མཆེད་ཀྱི་སྐྱོན་རྣམས་བརྗོད། །བྱམས་པས་ཆེན་པོ་ཡོངས་བྲལ་དང༌། །བྱང་ཆུབ་སེམས་ནི་སྨད་པ་དང༌། །ཐེག་པ་གསུམ་པོ་སྨད་པ་དང༌། །སྣོད་མ་ཡིན་ལ་གསང་བ་བསྟན། །བདག་ཉིད་རྒྱལ་བའི་ཕུང་པོ་སྨད། །དག་པའི་ཆོས་ལ་སོམ་ཉི་དང༌། །དམ་པའི་ཆོས་ལ་དགའ་བྲལ་བར། །སྡུག་བསྔལ་དག་ལ་ཆོས་སུ་བརྟགས། །དད་སེམས་དག་ནི་སྨད་པ་དང༌། །དམ་ཚིག་ཉིད་ལ་སྤྲད་པ་དང༌། །རྙེད་པའི་གཟུགས་མང་སྨད་པ་དང༌། །དེ་ལྟར་རྩ་བའི་ལྟུང་བ་ཡིས། །སྔགས་པ་རྣམས་ཀྱི་དམ་ཚིག་ཉམས། །ཉིན་གསུམ་མཚན་གསུམ་ལན་དྲུག་ཏུ། །ཉིན་རེ་བཞིན་དུ་བརྗོད་པར་བྱ། །ཡན་ལག་དམ་ཚིག་ཅེས་བྱ་བ། །དམ་ཚིག་དང་ནི་མི་ལྡན་པའི། །རིག་མ་བསྟེན་པར་དགའ་བ་དང༌། །ཚོགས་ཀྱི་དཀྱིལ་འཁོར་སྨོད་པ་དང༌། །གསང་བའི་ཆོས་ནི་སྟོན་པ་དང༌། །སེམས་ཅན་དད་དང་ལྡན་པ་ལ་།དམ་པའི་ཆོས་ནི་ལོག་པར་བསྟན། །ཉན་ཐོས་དག་ཏུ་རློམ་བྱེད་པ། །ནང་དུ་ཞག་བདུན་གནས་པ་དང༌། །སྦྱོར་བ་ངེས་པར་མ་བྱས་དང༌། །སྣོད་མིན་གསང་བ་སྟོན་པ་རྣམས། །ཁ་ན་མ་ཐོ་སྦོམ་འགྱུར་ཏེ། །སྔགས་པ་དེ་ཡི་དམ་ཚིག་ཟད། །ཟད་པ་གྲུབ་པར་མི་འགྱུར་ཏེ། །ནད་དང་སྡུག་བསྔལ་རབ་ཏུ་འཕེལ། །ཐུར་དུ་བལྟས་ཏེ་དམྱལ་བར་འགྲོ། །སྔགས་པས་དེ་དག་ཡོངས་སྤངས་ཏེ། །བདག་ཉིད་མ་འཁྲུལ་ཤེས་པར་བྱ། །ཞེས་ལན་གསུམ་བརྗོད་དོ། །དེ་ལྟར་སྡོམ་པ་བཟུང་བའི་སློབ་མས་དེ་བཞིན་དུ་རྗེས་སུ་མཐུན་པའི་ཡོན་ཕུལ་ནས་ཕྱག་འཚལ་ནས་ཚིགས་སུ་བཅད་པ་འདིས་རྡོ་རྗེ་སློབ་དཔོན་གྱི་དབང་ནོད་པར་བྱ་བའི་དོན་དུ་གསོལ་བ་གདབ་པར་བྱའོ། །བྱང་ཆུབ་རྡོ་རྗེ་སངས་རྒྱས་ལ། །ཞེས་པ་ནས། ནམ་མཁའི་རྡོ་རྗེ་བདག་ལ་སྩོལ། །ཞེས་པའི་གསོལ་བ་གདབ་པར་བྱའོ། །དེ་ནས་བླ་མས་དབང་སྦྱིན་པ་ནི་འཇུག་པའི་སྒོ་ཞེས་པ་ནི་ཤར་སྒོར་རོ། །འདབ་བརྒྱད་པདྨའི་ཁྲི་ལ་གཞག །ཅེས་པ་ནི་ཁ་དོག་གཅིག་པའི་དཀྱིལ་དུ་ས་བོན་ལ་སོགས་པས་བརྒྱན་པ་ལ་འདབ་མ་བརྒྱད་པའི་པདྨ་ལ་གནས་པར་བྱས་ལ། དེའི་སྟེང་དུ་རས་ལ་སོགས་པས་གཡོགས་པའི་སེང་གེས་མཚན་པ་ལ་སློབ་མ་དེ་བཞག་སྟེ། གསོལ་བ་གདབ་པར་བྱའོ། །དེ་
ནས་སློབ་མ་དེ་ལྷག་པར་མོས་པ་ལ་སོགས་པས་ཏིང་ངེ་འཛིན་གསུམ་གྱི་རྣལ་འབྱོར་དང་ལྡན་པར་བྱས་ནས་ཐབས་འདིས་རྡོ་རྗེ་སློབ་དཔོན་གྱི་དབང་བསྐུར་རོ། །ཕྱོགས་བཅུ་དུས་གསུམ་གྱི་རྫོགས་པའི་སངས་རྒྱས་ཀྱི་དཀྱིལ་འཁོར་ཏེ་བདེ་བར་གཤེགས་པ་ལྷ་མོའི་ཚོགས་དང་བུམ་པ་གཙོ་བོར་བྱས་པའོ། །མེ་ཏོག་སྤོས་མར་མེ་དྲི་ལྷ་བཤོས་གདུགས་རྒྱལ་མཚན་ཅན་ཁྱད་པར་གྱི་མཆོད་པ་སྣ་ཚོགས་པ་ཐོགས་པ་རྣམས་རང་སྙིང་ལས་ཕྱུང་ནས་ཞེས་པ་ནི། སློབ་དཔོན་དང་ཡེ་ཤེས་སེམས་དཔའི་ས་བོན་གྱི་འོད་ཟེར་ཕྱུང་ནས་དེ་བསྐུལ་བ་ཞས་སོ། །རོལ་མོ་དྲི་སོགས་ལྡན་བྱས་ཞེས་པ་ནི་རྔ་ལ་སོགས་པའོ། །རོལ་མོ་དང་དྲིལ་བུ་ལ་སོགས་པའི་རོལ་མོ་དང་ལྡན་པ་རྣམས་ཀྱི་ཚིགས་སུ་བཅད་པའི་རྡོ་རྗེ་བརྗོད་དོ། །སྔོན་བཞིན་རིག་པའི་དབང་བསྐུར་ནས། །ཞེས་པ་ནི་དེ་རྣམས་ཀྱིས་བྱས་པར་བསམས་ཤིང་སློབ་དཔོན་གྱིས་ཆུ་ལ་སོགས་པ་བཀའ་སྩལ་བའི་མཐར་ཐུག་པའི་བར་དུ་བསྐུར་བར་བྱའོ། །དེ་རྣམས་ཀྱི་ཚིགས་སུ་བཅད་པའི་སྡེ་བརྗོད་པ་འདི་དག་གོ །དབང་བསྐུར་རྡོ་རྗེ་ཆེན་པོ་ནི། །ཞེས་ནས། །སངས་རྒྱས་ཀུན་གྱིས་བྱིན་པ་ཡིན། །ཞེས་པས་དབང་བསྐུར་བར་བྱའོ། །ཕྱིར་མི་ལྡོག་པའི་དབང་ཞེས་པ་ནི་ས་བརྒྱད་པ་ལས་སོ། །དེ་ནས་དེ་ཐམས་ཅད་ཡེ་ཤེས་ངོ་བོ་སློབ་མ་དེ་ལ་གཞུག་པར་བསམས་ནས། ཨོཾ་སུ་པྲ་ཏིཥྛ་བཛྲ་སྭཱ་ཧཱ། མི་བསྐྱོད་པ་རིན་པོ་ཆེའི་དབུ་རྒྱན་གསལ། དེ་ནས་སྤྱི་བོར་མེ་ཏོག་སྤོས་དང་མར་མེ་དྲི་མགྲིན་པ། སྙིང་གར་དྲི་རྒྱན་སྣ་ཚོགས་པ་ཁྱད་པར་གྱི་མཆོད་པ་རྣམས་ཀྱིས་ཡང་དག་པར་མཆོད་ནས་མི་བསྐྱོད་རྡོ་རྗེ་ཞེས་པ་ལ་སོགས་པ་ནས་ཡང་དག་པར་བསྟོད་ནས། དེ་ནས་སློབ་མ་རྡོ་རྗེ་དྲིལ་བུ་འཛིན་པར་བྱས་ནས་བཀྲ་ཤིས་ལ་སོགས་པའི་ཚིགས་སུ་བཅད་པ་བརྗོད་ཅིང་ངོའི་སྟེང་དུ་གདུགས་བཏེག་པར་བྱས་ནས་གཡས་སྐོར་དུ་ལན་གསུམ་བྱེད་དུ་གཞུག་ནས། དཀྱིལ་འཁོར་གྱི་སྒོར་ཐལ་མོ་སྦྱར་ནས་གདུགས་དང་བཅས་པས་ཕྱག་བྱེད་དུ་གཞུག་གོ །དེ་ནས་དེ་གདུགས་བཟུང་ནས་ཁྲི་ལ་བཞག་སྟེ། རིམ་པ་འདི་སློབ་དཔོན་གྱིས་བརྗོད་པར་བྱའོ། །དེ་རིང་ཕྱིན་ཆད་བུ་ཁྱོད་ཀྱིས། །དཀྱིལ་འཁོར་གྱི་ནི་སློབ་དཔོན་འགྱུར། །སྔགས་དང་རྒྱུད་ཀྱང་འཛིན་པར་འགྱུར། །སངས་རྒྱས་བྱང་ཆུབ་སེམས་དཔའ་དང༌། །ལྷ་རྣམས་
ཀྱིས་ནི་བཀུར་བར་འགྱུར། །སེམས་ཅན་རྣམས་ལ་སྙིང་བརྩེའི་ཕྱིར། །ཁྱོད་ཀྱིས་དཀྱིལ་འཁོར་ཆོ་ག་བཞིན། །ནན་ཏན་བསྐྱེད་དེ་བྲི་བར་གྱིས། །སྒྲུབ་པ་པོ་ཡང་རྒྱུད་ལ་སྦྱོར། །ཞེས་སློབ་དཔོན་གྱི་ལས་བསྟན་ཏོ། །དེ་ལ། ཚོན་ལྔ་ཡང་དག་སངས་རྒྱས་ལྔ། །ཞེས་པ་ནི་རྟག་པ་ལ་སོགས་པ་སྟེ་ཅིའི་ཕྱིའི་ཚོན་ཞེས་བྱ་ན། ཚོན་རྩིར་སྣང་བའི་ཡེ་ཤེས་ཀྱིས་སངས་རྒྱས་ཀྱི་ངོ་བོར་སེམས་ཅན་གྱི་སེམས་མཚོན་པའི་ཕྱིར། དེ་བཞིན་དུ་དབང་པོ་ལ་སོགས་པའི་ཆོས་ཇི་སྙེད་རང་རང་གི་ཚོན་ཉིད་དང་བྲལ་བའི་ཕྱིར་དག་པས་ན་ལྷ་རྣམས་ཏེ་དེའི་བུམ་པའོ། །ཇི་ལྟ་བུ་ཞེ་ན་སེམས་ཅན་རྣམས་ལ་ཡེ་ཤེས་བདུད་རྩི་ལྟ་བུ་བྱིན་པས་གསེར་ལྟ་བུར་གནས་སོ། །ཚོགས་གཉིས་ཀྱིས་གང་བའི་རྟགས་སུ་བུམ་པ་གང་བའོ། །སེམས་ཅན་ལ་ཐུགས་རྡོ་རྗེའི་ཆུས་བརླན་པའི་རྟགས་སུ་ཆུས་གང་བ་ཞེས་སོ། །དེ་བཞིན་དུ་བྱང་ཆུབ་ཀྱི་ཡན་ལག་གིས་མེ་ཏོག་དང༌། འགྲོ་བ་རྣམས་ཡིད་ཚིམ་པར་བྱེད་པས་ན་སྒྲོན་མ་དང་། འཛམ་བུ་གླིང་དུ་ཆོས་བཤད་པས་ཐམས་ཅད་ནང་འགྲངས་པས་བདུག་པ་དང༌། །ལུང་སོགས་པ་ཆོས་ཀྱིས་ཚིམ་པའི་ལྷ་བཤོས་དང༌། ངོ་ཚ་ཤེས་པ་དང་ཁྲེལ་ཡོད་པས་ན་སྔོམ་པ་སྟེ་དམ་ཚིག་གི་རྟགས་དང༌། བདེ་བ་ཆེན་པོ་འཕེལ་བར་བྱེད་པའི་གླུ་དང་གར་ལ་སོགས་པས་ཀྱང་བརྒྱན་པའོ། །ཕྱིན་ཅི་ལོག་ཐམས་ཅད་ལས་གྲོལ་ཞིང་ཁམས་གསུམ་གྱི་ཆོས་ཀྱི་རྒྱལ་པོའི་གནས་ཉིད་ཀྱི་ཕྱིར་ན་གཞལ་ཡས་ཁང་ངོ༌། །དཀྱིལ་འཁོར་སྙིང་པོ་འདུས་པའི་ཕྱིར། །ཞེས་པ་ནི་སྙིང་པོ་ནི་གསལ་བ་དབྱེར་མེད་པའི་ཆོས་ཀྱི་དབྱིངས་ཏེ། དེ་བསྡུས་པ་ནི་དེ་རྟོགས་པའི་དུས་ན་རྒྱུ་བ་དང་མི་རྒྱུ་བའི་ཆོས་ཐམས་ཅད་དེའི་ངོ་བོར་རྟོགས་པས་ན་དཀྱིལ་འཁོར་རོ། །དེ་ལྟར་དཀྱིལ་འཁོར་གྱི་དེ་ཁོ་ན་ཉིད་བསྟན་ནས། ད་ནི་ལྷའི་དེ་ཁོ་ན་ཉིད་བསྟན་པའི་ཕྱིར། དད་པ་བརྩོན་ཞེས་བྱ་བ་ལ་སོགས་པ་སྟེ། དེ་ལ་མེ་ལོང་སོགས་ཟད་ཡེ་ཤེས་ཞེས་པ་ནི་ཀུན་གཞི་ལ་སོགས་བ་གནས་འགྱུར་ཞིང་བག་ཆགས་དང་བཅས་པ་ཟད་ཅིང་མཐར་ཐུག་པ་སྟེ་སྐད་ཅིག་མའོ། །མ་སྐྱེས་ཡེ་ཤེས་ཞེས་པ་ནི་དེ་རྣམས་ཀྱི་རྣམ་པར་དག་པ་སྟེ། བཅོས་མ་མ་ཡིན་པའི་ཕྱིན་ཅི་ལོག་པ་ཐམས་ཅད་དུ་མི་འགྱུར་བའོ། །གཟུགས་ལ་སོགས་འཁྲུལ་པ་དག་པས་ནི་གཅིག་དང་དུ་མ་ལ་སོགས་པ་
དག་པའོ། །ཕུང་པོ་བཞིས་ཞེས་བྱ་བ་ལ་སོགས་པ་ནི་རང་དབང་དུ་བརྟགས་པ་རྣམ་པར་དག་པ་སྟེ་ལྟ་མོ་ལ་སོགས་པའོ། །རང་གི་མི་མཐུན་པའི་ཕྱོགས་ཞེས་པ་ནི་སྒྲིབ་པ་བཞིའོ། །དེ་ལ་ལྡོག་པས་ན་སྟོབས་བཅུ་ལ་སོགས་པའོ། །སོ་སོ་རང་རིག་ཅེས་པ་ནི་གསལ་བའོ། །ཆོས་ཉིད་ཅེས་པ་ནི་ཟབ་པའོ།། དེ་གོ་རིམས་བཞིན་དུ་དབྱེར་ཡོད་པ་དང་དབྱེར་མེད་པའི་རང་བཞིན་དུ་གནས་པའོ། །དེ་བཞིན་དུ་རིག་པའི་འཁྲུལ་པ་ཞེས་བྱ་བ་ནི་གོང་དུ་བསྟན་པ་ལྟར་ཕྱིའི་དོན་གྱི་འཁྲུལ་པ་ལ་སོགས་པ་རྣམས་ལོག་ཅིང༌། གཞན་གྱི་རྣམ་ལྟར་འདི་བལྟས་ཏེ། །འབྲས་བུ་ཕ་རོལ་ཕྱིན་སོགས་ཀུན། །ཞེས་སོ། །དེ་ཉིད་ཀྱིས་འདིར་དཀྱིལ་འཁོར་འཁོར་ལོའི་ཚུལ་དུ་ཤེས་པར་བྱའོ་ཞེས་བསྟན་ཏོ། །ད་ནི་དེ་ལ་དེ་ཁོ་ན་ཉིད་དགུ་པ་སློབ་དཔོན་ལ་སོགས་པའི་ལས་ཀྱི་དཀྱིལ་འཁོར་གྱི་སྒྲུབ་པ་ལ་སོགས་པ་གསུངས་པ། ཞེས་པ་ལ་སོགས་པའོ། །དེའི་དོན་ནི་འདི་ལྟ་སྟེ། སློབ་མ་རྣམས་དབང་བསྐུར་བའམ། བདག་ཉིད་ཀྱང་དངོས་གྲུབ་སྒྲུབ་པའི་དོན་དུ་དཀྱིལ་འཁོར་ཇི་ལྟ་བ་བཞིན་དུ་བྲིས་ཏེ། ཕྱག་རྒྱ་དགོད་པའི་ཕྱག་རྒྱ་ཡན་ཆད་རྫོགས་པར་བྱས་ནས་སངས་རྒྱས་མཉམ་སྦྱོར་ལས་གསུངས་པ་བཞིན་དུ་བླ་རེ་ལ་སོགས་པ་དང༌། ཨ་ག་རུ་ལ་སོགས་པའི་སྤོས་དང་མར་དཀར་གྱི་མར་མེ་འབུམ་ལ་སོགས་པ་དང༌། པི་ཝང་ལ་སོགས་པའི་རྒྱན་གྱི་ཁྱད་པར་སྣ་ཚོགས་པས་རྣམ་པར་བསྐོར་ནས་ཆོ་ག་འདིས་དཀྱིལ་འཁོར་བསྒྲུབ་པར་བྱའོ་ཞེས་སོ། །དེ་ནས་བྱད་དང་ཞེས་པ་ལ་སོགས་པའོ། །དེའི་དོན་ནི་བདག་ཉིད་ཕྱིའི་ཁྲུས་བྱས་ནས་གླ་རྩི་ལ་སོགས་པས་བྱུགས་ཤིང་རྒྱན་སྣ་ཚོགས་པས་རྣམ་པར་བརྒྱན་པ་ལེགས་པའི་ནང་ཚངས་ཅན་གྱི་སྟན་ལ། རྡོ་རྗེ་དྲིལ་བུ་ལྡན་པ་ཤར་ཕྱོགས་སུ་བལྟས་ཏེ་འདུག་པར་བྱའོ། །དེ་ནས་བྱད་ལ་སོགས་པ་དང་ལྡན་པའི་བུ་མོད་དང་ལྷན་ཅིག་ཏུ་གནས་ནས་རྗེས་སུ་ཆགས་པའི་མཐའ་ལ་ཐུག་པས་དང་པོ་སྦྱོར་བ་བྱ་སྟེ། ཆོ་ག་གསུམ་གྱིས་གསང་བའི་གནས་སུ་ལྷ་བསྐྱེད་ནས་བརྟན་པར་བྱས་ཏེ་རིག་པ་དག་སྣང་བ་ཐོབ་ནས་སྦྱོར་བར་བྱའོ་ཞེས་སོ། །འདི་ཉིད་ནི་ལས་དང་པོ་དང་ཆུད་ཟད་ཡེ་ཤེས་དབང་དུ་གྱུར་པར་འགྱུར་བའི་མཚན་མ་ཡང་ཡིན་ནོ། །དེ་ནས་རང་མཚན་བརྗོད་ནས། རྡོ་རྗེ་བདག་ཅེས་པ་ནི། བཛྲ་དྷྲྀཀ་ལ་སོགས་པ་བརྗོད་ནས་
རྡོ་རྗེའི་བདག་ཉིད་རྣམས་འབྱུང་ངོ་ཞེས་སོ། །འཁོར་ལ་མདུན་དུ་བཀུག་ནས་སུ། །ཞེས་པ་ནི་རྡོ་རྗེ་དང་པདྨ་སྦྱོར་བའི་སྒྲས་གཤིན་རྗེ་གཤེད་བསྐུལ་བས་དེ་བཀུག་ནས་ཤར་ཕྱོགས་ཀྱི་སྒོར་གནས་པར་བསམ་མོ། །བགེགས་ཀུན་བསྐྲད་ཅེས་པ་ནི། །སྤྲོས་པའི་ཁྲོ་བོ་སོ་སོར་བསྲུང་བྱས་ཏེ། །ཞེས་པ་ནི་དྲ་བ་ལ་སོགས་པས་སོ། །དེ་ནས་ཡོན་ཕུལ་ནས་ཞེས་པ་སྟེ་དུང་ཕོར་གྱི་ཆུ་ཀུ་ཤའི་བམ་པོས་གཏོར་ཞིང༌། ཨོཾ་ཨ་མཾ་ནི་ཝརྡྷ་པྲ་ཏཱིཙྪ་ཧཱུཾ་ཞེས་བརྗོད་ནས་བསང་གཏོར་བྱའོ། །ཉེ་རེག་གི་སྔགས་ཀྱང་དེའོ། །དེ་བཞིན་དུ་བདུད་རྩིའི་ཆུ་ལ་ཡང་སྣོད་དུ་ཕུལ་ནས། ཨོཾ་ཨ་ཕྲ་བ་ར་སཏྐཱ་རཾ་ཨོཾ་ཨཾ་ཛ་ཞེས་བརྗོད་དོ། །ཨོཾ་ཨ་མཾ་ཨརྒྷཾ་པྲ་ཏཱིཙྪ་ཧཱུཾ་ཛ་བར་ཡ་ཞེས་བརྗོད་ནས་མེ་ཏོག་བསྒྱིང་བས་བླངས་ཏེ་ཞབས་ལ་དབུལ་བར་བྱའོ། །མཆོད་བྱས་ཏེ་ཞེས་པ་ནི་ཕྱི་དང་གསང་བའི་མཆོད་པས་སོ། །དེ་ལ་བསྟོད་ནས་བདུད་རྩི་མྱངས་པ་ཡང་རབ་ཏུ་བྱས་ཏེ་སྒོ་སྲུང་གི་སྒོ་རུ་ལས་བྱ་ཞེས་པ་ནི་ཤེས་རབ་མཐར་བྱེད་ཀྱི་འོད་ཟེར་གྱིས་བཏེག་སྟེ་བསྐོར་ནས་ཇི་ལྟ་བ་བཞིན་དུ་ཐིམ་པར་བྱའོ། །ཕྱི་མའི་བརྡ་ཕྲད་པར་ཟད་དོ། །དེ་ནས་མཆོད་པ་ལ་སོགས་པ་བྱས་ནས་ཕྱི་རོལ་དུ་བྱུང་སྟེ། གོང་མ་བཞིན་དུ་ཕྱོགས་སྐྱོང་རྣམས་ལ་གཏོར་མ་དབུལ་ལོ། །དེ་ནས་ལྷག་ཆད་ཀྱི་སྐྱོན་བསལ་བའི་ཕྱིར་རྡོ་རྗེ་ཧཱུཾ་མཛད་དུ་བསྒྱུར་ནས་ནང་དུ་ཞུགས་ཏེ་གོང་མ་བཞིན་དུ་བྱའོ། །དེ་ནས་ཇི་སྐད་དུ་གསུངས་པའི་སྦྱིན་སྲེག་གི་ཆོ་ག་བྱས་ནས། སེམས་ཅན་ཀུན་གྱི་དོན་གྱི་ཕྱིར། །དངོས་གྲུབ་ཐམས་ཅད་རབ་འགྲུབ་མཛོད། །ཅེས་གསོལ་བ་བཏབ་པོ། །དེ་ལ་གཞན་ཚོགས་ཡོངས་སུ་རྫོགས་པར་བྱེད་པའི་དོན་དུ་དཀྱིལ་འཁོར་ཇི་སྐད་དུ་གསུངས་པ་བྲིས་པའི་ཕྱོགས་བཞིའི་གནས་མཛེས་པ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་དང༌། སྡོང་པོ་བརྒྱན་པ་དང་སྣང་བ་དམ་པ་དང༌། གསེར་འོད་དམ་པ་རྣམས་བཀླགས་ཤིང་སངས་རྒྱས་ལ་སོགས་པ་ལ་གོང་མ་ལྟ་བུའི་སྤོས་ལ་སོགས་པའི་ཡོ་བྱད་དཔག་ཏུ་མེད་པས་བསགས་ནས་ཕྱག་རྒྱ་དགོད་པ་ཡན་ཆད་རྫོགས་པར་བྱས། །སྐུད་པ་དང་ཚོན་རྩི་གཤེགས་སུ་གསོལ་ནས། བ་ལང་གི་ལྕི་བ་དང་བསྲེས་ནས། ཕྱི་སྐོར་ལ་བྱུག་ཅིང་མེ་ཏོག་ལ་སོགས་པ་སྣ་ཚོགས་པ་དགྲམ་པར་བྱའོ། །དེ་ནས་ཁྲུས་ལ་སོགས་པ་བརྩམས་ནས་ཤར་ཕྱོགས་སུ་ཁ་བལྟས་ཏེ་རྡོ་རྗེ་དྲིལ་བུ་དང་ལྡན་པས་
རས་ཀྱིས་གཡོགས་པའི་སྟ་ན་ལ་འདུག་སྟེ། དམ་ཚིག་གཅིག་པར་ཡོད་པའི་གྲོགས་པོ་རྣམས་ཀྱང་གོང་མའི་རིམ་པས་རྒྱན་སྣ་ཚོགས་ཀྱིས་བརྒྱན་ནས་གནས་ཇི་ལྟ་བ་བཞིན་དུ་གཞག་པར་བྱའོ། །དེ་ནས་བླ་མས་བསྟན་པའི་དེ་ཁོ་ན་ཉིད་ལ་གོམས་བར་བྱ་བའི་ཆེད་དུ་བྱང་ལ་སོགས་པ་དང་ལྡན་པའི་བུ་མོ་རང་གི་གཡོན་དུ་བཞག་སྟེ། གོང་དུ་བླ་མ་ལྟ་བུའི་ཏིང་ངེ་འཛིན་ལ་གནས་ནས་འཁྱུད་པ་དང་འོ་བྱ་བ་ལ་སོགས་པའི་རིམ་པས་ཡེ་ཤེས་འཕེལ་བར་བྱའོ། །ཕྱི་མའི་སྔ་མ་བཞིན་དུ་བསྟན་པ་ལྟར་རོ། །དེ་བཞིན་དུ་རིག་པ་འདིས་ཚོགས་ཀྱི་དཀྱིལ་འཁོར་ཡང་བསྒྲུབ་པར་བྱའོ་ཞེས་སོ།། ད་ནི་དེ་ཁོ་ན་ཉིད་བཅུ་པ་གླེགས་བམ་ལ་སོགས་པས་བསྐོར་བའི་ཆོ་ག་སློབ་དཔོན་ལས་གསུངས་པ། དཀྱིལ་འཁོར་ཞེས་པ་ལ་སོགས་པའོ། །དཀྱིལ་འཁོར་སྔོན་བཞིན་བྲིས་ནས་སུ། །ཞེས་པ་ནི་དད་པ་ཅན་གང་ཞིག་གིས་གཟུགས་བརྙན་ནམ་གླེགས་བམ་ལ་སོགས་པ་ཡིད་ཀྱིས་བསམས་ནས། སྐྱེས་བུ་བྱེད་མཐའ་ཡན་ཆད་དབང༌། །ཞེས་པ་སྟེ་ཆུ་ནས་རྡོ་རྗེ་སློབ་དཔོན་གྱི་དབང་ཡན་ཆད་ཇི་ལྟར་རིགས་པར་བསྐུར་བར་བྱའོ་ཞེས་སོ། །བུམ་པ་ལ་སོགས་པ་ལ་ཡི་གེ་གསུམ་དང་ལྔ་བཟླས་པར་བྱའོ་ཞེས་སོ། །ཡང་ན་སྔོན་དུ་ཕྱུང་བའི་སྔགས་ཞེས་པ་སྟེ། བཛྲ་དྷྲྀཀ་ལ་སོགས་པ་ཡང་བཟླའོ་ཞེས་སོ། །ཕྱི་ཡི་ཁྲུས་ནི་བྱས་ནས་སུ། །ཞེས་པ་ནི་བསྐུར་བའི་དུས་སུ་མེ་ལོང་དང་ལྡན་པའི་སྤྱི་ཁྲུས་བྱས་ནས་ཞེས་སོ། །ནང་གི་ཁྲུས་གང་ཞེ་ན་དཀྱིལ་འཁོར་ཞེས་པ་ལ་སོགས་པའོ། །དེའི་དོན་ནི་འདི་ལྟ་སྟེ། ཐབས་དང་ཤེས་རབ་ཀྱི་བདག་ཉིད་དཀྱིལ་འཁོར་གྱི་གཙོ་བོའི་གཟུགས་སུ་བསྙེན་སྒྲུབ་དང་ལྡན་པས་བསྐྱེད་པ་དེ་བཞིན་ཉིད་ཀྱི་ཁྲུས་ཏེ་ཆོ་གའོ། །དེ་ལྟ་བུ་ལ་སོགས་པའི་རིམ་པ་རྫོགས་ནས་དགོངས་ཞི་བའི་སྦྱིན་སྲེག་གི་རིམ་པ་བྱ་སྟེ། དེ་ནས་ཐབ་ཀྱི་ནང་དུ་མན་འཇིའི་སྟེང་དུ་གསེར་དངུལ་གྱི་སྣོད་བཞག་ནས། འབྲས་གྲུས་པ་གཙང་མ་འོ་མ་དང་སྤྲང་རྩི་དང་བུ་རམ་དང༌། མར་རྒྱ་ཆེ་བར་བཏབ་ནས་བླུགས་པར་བྱའོ། །དེ་བསྐོལ་ཞིང་བདུད་རྩི་བྱིན་གྱིས་བརླབ་པའི་ཆོ་གས་སྦྱངས་ཏེ་ཡི་གེ་གསུམ་དུ་མར་བཟླས་ཏེ་དངུལ་གྱི་སྣོད་དུ་བླུགས་ཏེ། ཨོཾ་དཱི་པྱ་ཨནྣ་ས་མཱ་དྷི་དྷྱཱེ་ན་པྲ་ཎི་ནེ་སྭཱ་ཧཱ། ཞེས་བརྗོད་ནས་ལྷ་རྣམས་ལ་དབུལ་བར་བྱའོ། །རང་ཡང་མྱང་ཡོན་བདག་ལ་ཡང་སྦྱིན་གཞན་དག་
ལ་ཡང་སྦྱིན་ནོ། །དེ་ནས་འདི་བརྗོད་པར་བྱའོ། །བཟོད་པར་གསོལ་མཐའ་སངས་རྒྱས་ཀུ། །ལྷ་དང་དེ་ཡི་སྲས་ཀུན་གང༌། །ཚངས་པ་ལ་སོགས་ཕྱོགས་སྐྱོང་ཀུན། ཆོ་ག་གང་འདི་བྱ་བ་ལ། །ཞི་བ་བཀྲ་ཤིས་ཀུན་ལ་ནི། །ཡོན་བདག་ཆེན་པོར་བྱས་ནས་སུ། །སངས་རྒྱས་ཡུལ་དུ་གཤེགས་སུ་གསོལ། །ཡང་ནི་སླར་ནི་བྱོན་མཛོད་ཅིག །ལྷ་ལ་བཟོད་པར་གསོལ་ནས་སུ། །འདི་ཉིད་ཀྱིས་ནི་བྱིན་གྱིས་རློབ། །གང་གིས་ད་ལྟར་བཞུགས་པར་འགྱུར། །བསྐལ་པ་འམ་བསྐལ་པ་བརྒྱ་ལྷག་དང༌། །ཅི་སྙེད་ལྷ་ཀུན་གསུང་མཛོད་ཅིག །ས་དང་ཆུ་དང་མེ་རླུང་རྣམས། །མོས་པ་དགའ་བ་བྱས་ནས་སུ། །ལེགས་པའི་རང་གནས་གཤེགས་སུ་གསོལ། བུ་དང་རིགས་རྒྱུད་སྲུང་མཛོད་ཅིག །ཅེས་བརྗོད་ནས་ནུབ་མོ་ཡང་དག་པའི་ཚོགས་ཀྱིས་མཆོད་པར་བྱ། དགེ་འདུན་རྣམས་ལ་ཆོས་སྟོན་གསོལ་ས་གཞི་བྱུག་པར་བྱའོ། །ལྷ་མཉེས་པར་འདོད་ན་བླ་མ་ཅེས་ཀྱང་མཉེས་པར་བྱའོ། །ཡོ་བྱད་ཅི་སྙེད་པ་མ་ལུས་པར་དབུལ་བར་བྱའོ། །དེ་ལྟར་བྱས་པས་དོན་ཐམས་ཅད་འགྲུབ་པར་འགྱུར་རོ་ཞེས་རྡོ་རྗེ་འཛིན་པས་གསུངས་སོ། །ད་ནི་དབང་ཐམས་ཅད་འབྲས་བུ་བཞིར་བསྡུས་པ་གསུངས་པ་ཆ་དང་ཞེས་པ་ལ་སོགས་པ་སྟེ་འབྲས་བུའི་སྒོ་ནས་བླ་མ་ཤེས་སོ། །ད་ནི་གསང་བའི་དབང་བསྐུར་བའི་ཆོ་ག་གསུངས་པ་དེ་ནས་ཞེས་པ་ལ་སོགས་པའོ། །དེའི་དོན་ནི་འདི་ལྟ་སྟེ། རིག་པའི་དབང་དང་ཕྱིར་མི་ལྡོག་པའི་དབང་ཐོབ་པ་དེ་ཉིད་ལས་ཆུའི་ཡེ་ཤེས་བསྐྱེད་ནས་ཞིང་དག་པར་བྱ་བའི་ཕྱིར་སྔར་གྱི་དཀྱིལ་འཁོར་འདི་ཉིད་དམ་གཞན་ཡང་རུད་སྟེ་མེ་ཏོག་ལ་སོགས་པས་བརྒྱན་ནས། སླར་ལོ་ལ་སོགས་པར་བསྙེན་བཀུར་བྱས་པའི་བླ་མ་ལ་གསེར་ལ་སོགས་པའི་ཡོན་དང༌། ཚོགས་ཀྱི་མཆོད་པ་ཆེན་པོ་བྱས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་གསོལ་བ་གདབ་པ་ནི། ཀུན་མཁྱེན་ཡེ་ཤེས་ཕུང་པོ་ཅན། །སྲིད་པའི་འཁོར་ལོ་རྣམས་སྤྱོད་བ། །དི་རིང་བཤད་པའི་རིན་ཆེན་གྱིས། །གཙོ་བོས་བདག་ལ་སྐུ་དྲིན་སྩོལ། །ཁྱོད་ཞབས་པདྨ་སྤངས་ནས་ནི། །རྗེ་གཅིག་བདག་ལ་སྐྱབས་མ་མཆིས། །འགྲོ་བ་དད་པའི་ཐུབ་ཆེན་པོ། །དེ་བས་བློ་མཆོག་མཉེས་པར་མཛོད། །སྡུག་བསྔལ་ཀུན་གྱི་རྒྱུར་འགྱུར་བ། །རྗེ་བཙུན་གྱིས་ནི་གྲོལ་བར་མཛོད། །སྡུག་
བསྔལ་ཐམས་ཅད་གྲོལ་བར་མཛོད། །མགོན་མེད་རྣམས་ལ་ཐུགས་རྗེས་དགོངས། །ཞེས་གསོལ་པ་གདབ་པོ། །དེ་ནས་བླ་མ་དཔལ་ལྡན་པས། ཡོན་ཏན་གྱི་ཆོས་སྙིང་རྗེ་སློབ་མ་ལ་བསྐྱེད་ནས་ཞལ་གདམས་པར་བྱས་ནས་རབ་ཏུ་དགའ་ནས་སྔ་མ་ལྟ་བུའི་སྔོམ་པ་བསྟན་པར་བྱ། དེ་ནས་སློབ་མ་དེས་གཟུགས་ལ་སོགས་པ་དང་ལྡན་པའི་རིག་མ་ལེགས་པར་བསླབས་པ་ལོ་བཅུ་དྲུག་ལོན་པ་བླ་མ་ལ་ཕུལ་ནས་བླ་མ་ཆེན་པོ་ལ་གསང་བའི་དབང་ནོད་དུ་གསོལ་བ་གདབ་པར་བྱའོ། །རྡོ་རྗེ་སེམས་དཔའ་ཁྱོད་ནི་སངས་རྒྱས་ཀུན་གྱི་བདེ་བ་བསྒྲུབ་པ་སྟེ། རྣམ་དག་བྱང་ཆུབ་སེམས་དཔའ་བདེ་བ་རྒྱ་ཆེན་པོས་སྲས་སུ་བཅས་པའི། །ཡུན་རིང་སྟོང་ཉིད་བསྒོམས་པས་བདག་ནི་ཤིན་ཏུ་གདུངས། །དཀའ་བའི་ཡིད་འོང་དོན་ཆེན་འདོད་པ་བདག་ལ་བསྐྱབ་ཏུ་གསོལ། །ཀྱེ་འདོད་ཆགས་དེ་ནི་དྲི་མེད་ཀུན་དུ་བཟང་པོའི་སྤྱོད་པ་སྟེ། །དག་པའི་འདོད་ཆགས་རྡོ་རྗེ་དམ་ཚིག་ལ་ནི་ཕྱེད་མཛད་ནས།། དཀའ་བ་རྣམ་པ་དྲུག་ལ་སྤྱོད་པས་ཤིན་དུ་གདུངས་མཛད་པའི། །རབ་ཏུ་དགྱེས་པ་དབང་འདོད་པའི་བདེ་བ་ཉེད་ཀྱིས་འཇོམས་པར་མཛད། །རྣམ་དག་རྡོ་རྗེ་ལས་བྱུང་བ་ཡི་ཡེ་ཤེས་ཆུ། །རིན་ཆེན་འབར་བ་བྱང་ཆུབ་སེམས་ཡིད་རྣམས་ཕྱུང་ནས། །རྒྱལ་བ་རྣམས་ཀྱི་དབུ་ནི་སྐམ་པ་ལས། །དྲི་མེ་རིན་ཆེན་ཆར་གྱི་སྤྱི་བོར་དབང་བསྐུར་མཛོད། །མཉམ་དང་མི་མཉམ་འདོད་ཆགས་ཚུལ་དག་པས། །པདྨའི་གནས་སུ་རྡོ་རྗེ་མཛོད་གཏོང་བ། །སྣ་ཚོགས་སེམས་དཔའ་སེམས་ཅན་རླན་གྱུར་པ། །སྦྱོར་བ་གཞན་གྱོན་མ་རྟོགས་བཤད་པར་གསོལ། །རྡོ་རྗེ་སེམས་དཔའ་ཁྱོད་དབང་མཆོག་བདེ་བྱེད་པ་པོ། །རྡོ་རྗེ་པདྨོ་ཆེ་བའི་ཚུལ་གྱིས་སྦྱོར་མཛད་དེ། །རྒྱུ་བ་ཀུན་གྱི་གཟུགས་ཀྱི་སྐུ་ནི་རབ་བསྟན་ནས། །ཐམས་ཅད་བདེ་བར་སྒྲུབ་པ་ཉིད་ཀྱིས་བདག་ལ་མཉེས་པར་མཛོད། །ཅེས་གསོལ་བ་གདབ་པར་བྱའོ། །དེ་ནས་བླ་མས་བྱིན་གྱིས་བརླབ་པ་ཡང་བྱས་ཏེ་ཞེས་པ་ནི་འབྲིང་པོའི་བསྙེན་སྒྲུབ་བཞི་དང་ལྡན་པར་བྱ་སྟེ། །རྡོ་རྗེ་དང་པདྨ་དག་པར་བྱས་ནས་ཡང་དག་པའི་སྦྱོར་བ་བྱ། །དེ་ནས། ཐུགས་དབང་དེ་ནི་རྡོ་རྗེ་དཀྱིལ། །ཡང་དག་ཐིམ་ནས་ཞེས་པ་ནི། །ས་བོན་གྱིས་ནི་བསྐུལ་བ་ཡི། །ཐུགས་དབང་ཞུ་བའི་རྗེས་འགྲོ་བ། །རིགས་ནི་བརྟགས་པར་བྱས་ནས་ཀྱང༌། །སློབ་མའི་
ཁ་རུ་དབབ་པར་བྱ། །ཞེས་པ་བླ་མས་བསྟན་པ་ལྟར་ཤེས་རབ་ཀྱི་བྱེ་བྲག་གིས་དབབ་པར་བྱའོ། །དེ་ནས་སློབ་མ་རྣམ་བར་སྣང་མཛད་ཀྱི་ངོ་བོར་གནས་པས་ཀྱང་དེ་བཞིན་གཤེགས་པ་ཞུ་བའི་བདག་ཉིད་དུ་ཤེས་པར་བྱས་ནས་བཏུང་བྱར་བྱའོ། །སྣང་སྲིད་དུ་སྣང་བ་ཐམས་ཅད་ཀྱང་དེ་ཡིན་པར་ཤེས་པར་བྱའོ། །ཨ་ཧོ་མ་ཧཱ་སུ་ཁ་ཞེས་བརྗོད་པར་བྱའོ། །དེ་ནས་བླ་མའི་ཞལ་ནས་བརྒྱུད་པའི་རྣལ་འབྱོར་པ་གསུམ་པ་ལ་རྡོ་རྗེ་བཟླས་པས་སྒྱུ་མ་ལྟ་བུའི་སྐུའི་ངོ་བོར་བསྟན་པར་བྱའོ། །སློབ་མས་ཀྱང་བསྟོད་པ་སྣ་ཚོགས་པས་བསྟོད་པར་བྱའོ། །དེ་ཁོ་ན་ཉིད་གསུམ་པའོ། །ད་ནི་དེ་ཁོ་ན་ཉིད་བཞི་པ་ཤེས་རབ་ཡེ་ཤེས་ཀྱི་དབང་བསྐུར་བ་གསུངས་པ། དཔལ་ལྡན་ཞེས་པ་ལ་སོགས་པའོ། །དེའི་དོན་ནི་འདི་ལྟ་སྟེ་དེ་ལྟར་རིག་པའི་དབང༌། ཕྱིར་མི་ལྡོག་པའི་དབང་ཐོབ་པ་སློབ་མ་གཞི་དག་པར་བྱས་པ་དེ་ལ་རང་རིག་ཆོས་སྐུ་གསལ་བར་བསྟན་པའི་ཕྱིར་ཆོས་ཐམས་ཅད་ཀྱི་འབྱུང་གནས་ཆོས་ཀྱི་དབྱིངས་ཀྱི་རྡོ་རྗེ་མར་བྱིན་གྱིས་བརླབས་པ་བརྒྱན་པ་ཇི་སྐད་གསུངས་པ་དེ་ལག་ཏུ་སྦྱིན་པར་བྱའོ། །དེ་ནས་སྔ་མ་ལྟ་བུའི་སྡོམ་པ་དང་ཁྱད་པར་གྱི་སྡོམ་པ་སློབ་མ་ལ་བསྟན་པར་བྱས། དེ་ནས་དེས། ཀྲི་ཏ་མུ་ཙ་ཧེ་ཧེ་བ་ཅ་བི་ཏྲ་མུ་ཧི་དྷ་བྷ་ཀྵ་རཀྟཾ་ཤུ་ཀྲ་ཏ་ཐཱ་མཱཾ་སཾ་སྟྭཾ་ནཾ་བྷ་ཀྲ་ཏིཥྛ། བརྩེག་མ་ནཾ་བར་མ་ས་བུ་ཧི་བྷ་རྩ་ཡ་ཐཱ་ས་ག་མི་ཏི་ཞེས་བརྗོད་པ་དང་དེས་བཞད་གད་དང་བཅས་པར་སྨྲས་པ། ཀྲིཉྩ་པི་ནོ་ཏ་ཧེ་དེ་བ་ཤ་ཀཾ་ཀ་དྷི་བཀྵི་ནཾ། ཀརྫེ་བྷ་ག་ཧི་ས་ཏི་ཧྲི་ནཾ་ཙུམྦ་ནཾ་བྷ་ག་མོ་བ་ཙ་ཞེས་ལན་གདབ་པར་བྱའོ། །དེ་ནས་ཡང་གོན་པའི་ག་ཤ་ཕུད་ནས་པདྨ་གསལ་བར་བསྟན་ཏོ་ཞེས་བརྗོད་དོ། །ཨེམ་བདག་གི་པདྨ་འདི། །བདེ་བ་ཐམས་ཅད་དང་ལྡན་པའི། །གང་གི་ཆོ་ག་སྦྱིན་བྱེད་ན། །དེ་ཡི་མདུན་ན་རྟག་པར་གནས། །དོན་བྱེད་པདྨ་དམ་པ་འདི། །སངས་རྒྱས་རྣམས་ཀྱིས་བཀུར་བའི་གནས། །བདེ་ཆེན་རྒྱལ་བའི་རང་བྱུང་ནི། །དེ་ནང་རྟག་ཏུ་བཞུགས་པ་ཡིན། །བྷ་ག་བྷོ་ཀྵ་ཧོ་ར་ཏི། །དེ་ནས་བླ་མའི་མན་ངག་གིས་ནང་ན་གནས་པའི་རྩ་བའི་འཁོར་ལོ་བསྐུལ་ནས། སོར་མོ་ལ་སོགས་པ་བླ་མའི་མན་ངག་གིས་ཤེས་པར་བྱ་སྟེ། ས་བཅུ་དང་ལྡན་པ་དེ་ལ་འཁྱུད་པར་བྱའོ། །བསྒྲུབ་བྱ་སྒྲུབ་པོ་སྦྱར་བ་དག །དེ་ནི་བརྙེས་པ་ཞེས་སུ་གསུངས། །རྡོ་རྗེ་པདྨོ་སྦྱོར་པ་གང༌། །ཉེ་བར་སྒྲུབ་པ་ཞེས་སུ་འདོད། །
ཧཱུཾ་དང་ཕཊ་དང་ལྡན་པར་ནི། །བསྒྲུབ་པ་སྒྲུབ་པར་གསུངས་པའོ། །རང་བཞིན་ཉིད་བདེ་ཞི་བར་ནི། །སྒྲུབ་པ་ཆེན་པོ་ཞེས་བྱའོ། །ཞེས་སོ། །དེ་བས་ན། ཉམས་སུ་མྱོང་ཞིང་བདེ་བ་དེ། །རྡོ་རྗེ་སྐྱིལ་མོ་ཀྲུང་གནས་སེམས། །ནོར་བུའི་བར་དུ་མཐོང་བར་བྱ། །ཞེས་སོ། །བདེ་བ་དེ་གནས་ན་འདོར་རོ། ཨོཾ་སརྦྦ་ཏ་ཐཱ་ག་ཏ་ཨ་ནུ་རཱ་ག་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། །ཞེས་བརྗོད་ནས་རྡོ་རྗེ་དབྱིངས་ཀྱི་དབང་ཕྱུག་མ་དང་ལྡན་པར་མཐོང་ནས་རང་གི་སྙིང་ག་ནས་གཏི་མུག་དགའ་མ་ལ་སོགས་པ་སྤྲོས་ནས་སློབ་མའི་སྙིང་གར་གཞུག་པར་བྱའོ། །དེས་ཀྱང་པདྨ་རཱ་ག་ལ་སོགས་པ་སྣ་ཚོགས་པས་མཆོད་པར་བྱའོ། །པདྨ་ལ་གནས་པའི་བྱང་ཆུབ་སེམས་དཔའ་ཡེ་ཤེས་ཅན་གྱི་ལྕེས་བླང་བར་བྱའོ། །ཨོཾ་བཛྲ་ཨམོ་ཀྵོ་ཧོ། །ཤེས་རབ་ཡེ་ཤེས་སོ། །དེ་ནས་དེས་རྒྱས་བཏབ་ནས་དབང་བསྐུར་བ་རིན་པོ་ཆེ་བཞི་བླ་མའི་མན་ངག་གིས་མཁའ་གཉིས་ཀྱི་སྦྱོར་བའི་བཤད་པ་སྦྱིན་པར་བྱ་སྟེ། བསམ་པ་བརྟན་པ་ཟབ་ཅིང་རྒྱ་ཆེ་བ་ལ་མོས་པའོ། །གཞན་ལ་མ་ཡིན་ཏེ། དེ་ནས་དཀྱིལ་འཁོར་གྱི་དེ་ཁོ་ན་ཉིད་དང༌། ལྷའི་དེ་ཁོ་ན་ཉིད་དང་སློབ་དཔོན་གྱི་ཕྲིན་ལས་བསྟན་པར་བྱས་ནས། གསང་བའི་དབང་དང༌། ཤེས་རབ་ཡེ་ཤེས་དབང་གི་དམ་ཚིག་དང་སྡོམ་པ་དེ་ཉིད་བསྟན་པར་བྱའོ། །དེ་བས་ན་བཀའ་སྩལ་ཏེ་ཞེས་སོ། །དེ་ཇི་ལྟར་བྱང་ཆུབ་ཅེས་པ་ལ་སོགས་པའོ། །དེ་ལ། དེ་ལས་གཞན་ཡང་དམ་ཚིག་གསུངས། །ཞེས་པ་ནི་ལྟུང་བྱེད་དང་སྦོམ་པོའི་ལྟུང་བྱེད་དོ། །དཀོན་མཆོག་མ་བཞིན་པའི་ཞེས་པ་ནི་ལེའུ་དགུ་ལ་སོགས་པའི་རིམ་པས་ཞེས་སོ། །རྣལ་འབྱོར་རྒྱུད་ཅེས་པ་ནི་འདི་ཉིད་དོ། །དེ་ལས་གསུངས་པ་ཁྱད་པར་གྱི་སྡོམ་པ་སྟེ། གླེགས་བམ་བཀླག་པ་ལ་སོགས་པའོ། །དེ་དག་ཀྱང་ཆོག་བཞིན་དུ་གསུངས་ཞེས་སོ། །དེ་ནས་སློབ་མ་དེས་པུས་མོ་བཙུགས་ཐལ་མོ་སྦྱར་ནས་གནས་པ་ལ་དེའི་སྤྱི་བོར་གཡོན་པའི་ཕྱག་བཞག་ནས་རིག་མའི་བརྟུལ་ཞུགས་སྦྱིན་པར་བྱའོ། །བདག་གིས་དེ་རིང་ཡང་དག་བཤད། །སྒྲུབ་པ་པོ་ལ་རིག་མ་སྦྱིན། །བྱང་ཆུབ་ཆེན་པོ་བསྒྲུབ་པའི་ཕྱིར། །དེ་བཞིན་གཤེགས་རྣམས་མཁྱེན་པར་གསོལ། །ཐབས་གཞན་གྱིས་ནི་འཚང་མི་རྒྱ། །དེ་བས་འདིར་ནི་རིག་མའི་མཆོག །ཐམས་ཅད་ཆོས་ནི་གཉིས་མེད་དེ། །སྣང་བ་གཉིས་ཀྱིས་མཚོན་པ་ཡིན། །དེ་བས་
རྟག་ཏུ་འཁོར་བ་རུ། །ཁྱེད་ཀྱིས་བྲལ་བར་མི་བྱའོ། །འདི་ནི་སངས་རྒྱས་ཐམས་ཅད་ཀྱི། །རིག་མའི་བརྟུལ་ཞུགས་བླ་ན་མེད། །བླུན་ཆེན་གང་ཞིག་འདའ་བྱེད་ན། །དེ་ལ་དངོས་གྲུབ་མཆོག་ནི་མེད། །རིག་མའི་བརྟུལ་ཞུགས་ཆོ་གའོ། །ལུང་བསྟན་པ་གསུངས་པ། དེ་ནས་ཞེས་པ་ལ་སོགས་པའོ། །དེ་ལ་དེ་བཞིན་གཤེགས་གྱུར་ནས། །ཞེས་པ་ནི་བདག་ཉིད་སྐད་ཅིག་གིས་ཡི་གེ་ཨ་ལས་ཤཱཀྱ་ཐུབ་པའི་སྐུར་གྱུར་ཏེ་ཞེས་སོ། །མཆོག་སྦྱིན་ཚུལ་གྱིས་ལུང་བསྟན་བྱ། །ཞེས་པ་ནི་ཕྱག་རྒྱ་དེ་ཁོ་ནས་སོ། །དེ་དངོས་གང་ཞེ་ན་སྙིང་གར་ཁུ་ཚུར་གཡོན་གྱིས་སློབ་མའི་བར་གྱི་མཐར་གསུང་སྟེ་གསང་བའི་མཆོག་སྦྱིན་པའི་ཕྱག་རྒྱ་སྤྱི་བོར་བཞག་སྟེ་བླ་ན་མེད་པའི་བྱང་ཆུབ་ཆེན་པོར་ལུང་བསྟན་པར་བྱའོ། །བདེ་གཤེགས་ཀུན་གྱི་ལུང་བསྟན་ཡིན། །ཞེས་པ་ནི་སློབ་དཔོན་ནམ་རྡོ་རྗེ་འཛིན་པ་ལ་སོགས་པའོ། །བཀའ་ལུང་གནང་བའི་དབང་བསྐུར་བ་གསུངས་པ་ཇི་ལྟ་ཇི་ལྟར་ཞེས་པ་ལ་སོགས་པའོ། །དེ་ལ་དག་པ་ཞེས་པ་ནི་ཐ་མལ་པའི་འདོད་ཆགས་ལ་སོགས་པ་དག་པས་སེམས་ཅན་གྱི་དོན་བྱ་ཞེས་སོ། །རང་རིག་བྱ་བ་གསུངས་པ་ཉིན་རེ་ཞེས་པ་ལ་སོགས་པའོ། །བསྒྱུར་ནས་འགྲུབ་ཅེས་པ་ནི། གྲུབ་པའི་མཚན་མ་རྙེད་ནས་ཇི་སྐད་གསུངས་པ་བཞིན་དུ་འགྲུབ་ཅེས་སོ། །འབྲས་བུ་གསུངས་པ་མི་སྣང་ཞེས་པ་ལ་སོགས་པའི་སྟེ། དེ་ལ། འགྲོ་ཀུན་གཙོ་པོ་རྡོ་རྗེ་ཅན། །ཞེས་པ་ནི་ཕྱག་རྒྱ་ཆེན་པོ་སྟེ་ཕྱོགས་མ་ཆད་པའོ། །དེ་ལས་གཞན་ཞེས་པ་ནི་རྒྱ་མཚོ་ཆག་པ་ལ་སོགས་པའོ། །དེ་དག་ཀྱང་དཀྱིལ་འཁོར་གྱི་འཁོར་ལོ་ལ་རྗེས་སུ་ཆགས་པས་འགྲུབ་པ་ལ་སོགས་པའོ། །དེ་ཉིད་གསུངས་པ་རྡོ་རྗེ་བདག་པོ་ཞེས་པ་ནི་གཟུགས་རྡོ་རྗེ་མ་ལ་སོགས་པ་སྟེ། དེ་རྣམས་ཀྱི་ཡུལ་རྣམས་བསྟན་པ་བྱང་ཆུབ་ཐོབ་ཅེས་སོ། །དེ་བས་ཞེས་བྱ་བ་ལ་སོགས་པས་མཇུག་བསྡུ་བ་གསུངས་པ་སྟེ། ཆོ་ག་བཞིན་ཞེས་པ་ནི་མན་ངག་གི་རིམ་པས་ཞེས་སོ། །དེའི་དོན་ནི་འདི་ལྟ་སྟེ་སྔ་མ་ལྟ་བུའི་ཀུན་མཁྱེན་ཞེས་བྱ་བ་སོགས་པས་གསོལ་བ་གདབ་པའི་སློབ་མ་ལ་བརྒྱུད་པ་དང༌། ཉན་པ་དང་མཆོག་དང་ཐུན་མོང་སྒྲུབ་པ་དང༌། དབང་བསྐུར་བ་ལ་སོགས་པའི་རྒྱུད་སོམ་ཉིར་གྱུར་པ་
རྣམས་ཀྱང་བསྟན་ཏོ། །ཐམས་ཅད་སྣང་བའི་དབང་སྦྱིན་ནོ། །ཞེས་སོ། །དབུགས་ད་བྱུང་བའི་དབང་གསུངས་པ་ཅི་བཞིན་ཞུགས་པའི་ཞེས་པ་ལ་སོགས་པའོ། །དེ་ལ་བསྔགས་པར་འདོད་པ་རྣམས་ལ་ཞེས་ཡོན་ཏན་བརྗོད་པར་འདོད་པ་རྣམས་ལ་འོག་ནས་བྱུང་བའི་ཚིག་གིས་དབྱུགས་དབྱུང་ཞེས་སོ། །དམ་ཚིག་གསུམ་ཞེས་པ་ནི་རྡོ་རྗེ་ལ་སོགས་པའོ། །ཆོ་ག་སྦྱིན་ཞེས་པ་ནི་འདིར་ནི་མན་ངག་གི་རིམ་པས་ཇི་ལྟ་བཞིན་དུ་སྦྱིན་ནོ་ཞེས་སོ། །བསྔགས་པ་དངོས་གང་ཞེ་ན། གསང་བའི་མཆོག་འགྱུར་ཞེས་བྱ་བ་ནས་བརྩམས་ཏེ། ཁྱེད་རྣམས་འགྲོ་བར་ཤོག་ཅིག་ཅེས་པའི་བར་གྱིས་རྡོ་རྗེ་འཛིན་པའི་ས་ལ་དབུགས་དབྱུང་བར་བྱའོ། །དེ་ནས་ཤིན་ཏུ་ཁོ་ནར་གནས། །ཞེས་པ་ནི་ཤིན་ཏུ་རྣམ་པར་དག་པར་གནས་པའོ། །སྲིད་པ་ཤིན་ཏུ་དག་པ་སྟེ། །ཞེས་པ་ནི་དུས་དེ་ནས་བཟུང་སྟེ་ཁྱེད་ཀྱི་སྲིད་པ་ནི་ཤིན་ཏུ་རྣམ་པར་དག་པའོ་ཞེས་སོ། །དམ་ཚིག་རྡོ་རྗེ་ལྡན་པ་ཞེས་པ་ནི་རྡོ་རྗེ་འཛིན་པའོ། །དེའི་ཁྱད་པར་གསུངས་པ་རིག་མ་ཞེས་པ་ལ་སོགས་པའོ། །རྡོ་རྗེ་ཕྱག་རྒྱ་ནི་རང་གི་ལྷའོ། །དམ་པའི་ཆོས་ནི་སྨོད་མི་བྱ། །ཞེས་པ་ལ་སོགས་པས་ནི་སེམས་ཀྱིས་ཀྱང་མི་རུང་ནས་གཞན་ལྟ་ཅི་སྨོས་ཞེས་སོ། །དད་པ་མེད་པས་དེ་རྣམས་དོན་མེད་པར་བསམས་ནས་ཡལ་བར་བྱ་བ་མ་ཡིན་ནོ། །མ་རིག་པ་ཞེས་བྱ་བ་ནི་མ་ཐོས་པའོ། །གཏི་མུག་གིས་ཞེས་བྱ་བ་ནི་མ་བསམས་པའི་དབང་གིས་མ་དྲན་པའོ། །རང་དབང་ཞེས་པ་ནི་རྡོ་རྗེ་འཛིན་པ་དང་ཤེས་རབ་ཀྱི་ཕ་རོལ་ཏུ་ཕྱིན་པ་དང་དེ་ལས་བྱུང་བའི་ཕྱག་རྒྱ་སྔགས་དང་ཡེ་ཤེས་ཀྱི་སྐུའོ། །ཉིད་ལས་བྱུང་ཞེས་པ་ནི་གཞན་ལ་བརྟེན་པ་དང་འདྲ་ཡང་རང་གི་དེ་ཁོ་ན་ཉིད་རྟོགས་པ་ལས་བྱུང་ངོ་ཞེས་སོ། །རྡོ་རྗེ་དྲིལ་བུའི་ཕྱག་རྒྱ་རྣམས། །ཞེས་པ་ནི་གོང་མ་ལྟ་བུའི་དམ་ཚིག་གསུམ་མོ། །སྤང་བར་བྱར་མི་རུང་ཞེས་པ་ནི་སྐོམ་པས་ངལ་བའི་དབང་གིས་མི་སྤང༌། སྨོད་བྱེད་ན་ཞེས་པ་ནི་མ་དྲན་པ་ལ་སོགས་པས་སོ། །རྗེས་སུ་རིགས་པས་ཞེས་པ་ནི་རང་གི་དབང་གི་རྗེས་སུ་མཐུན་པར་ཞེས་པའོ། །རང་གི་དམ་ཚིག་ཅེས་པ་ནི་རང་གི་ལྷའི་སྐུའོ། །དམ་ཚིག་ལྷ་དང་མཉམ་པར་དུ། །ཞེས་པ་ནི་རང་གི་ལྷ་དང་གཅིག་ཁོ་ན་སྟེ་སོམ་ཉི་མི་བྱའོ། །དེ་དག་ཀུན་མཛོད་ཅིག་ཅེས་པ་
ནི་གོང་དུ་གསུངས་པ་རྣམས་སོ། །འགྲོ་བའི་བདེན་པ་ཞེས་པ་ནི་ཆུང་བ་དང་མི་བརྟན་པ་དང་ཡུན་རིང་པོར་གནས་པ་ལས་དེ་ཉིད་བསྒོམས་པའི་སྟོབས་ཀྱིས་དག་པ་སྟེ། རྡོ་རྗེ་སེམས་དཔའ་དང་འདྲ་ཞེས་པ་ནི་དེ་དང་ངོ་གཅིག་ཏུ་གྱུར་པ་དེ་ལ་ཁྱེད་རྣམས་གྲོལ་བར་ཤོག་ཅེས་སོ། །དེ་ནས་སྔར་བསྟན་པའི་བཀའ་ལུང་ཀུན་སྣང་བའི་དབང་ཡང་སྦྱིན་ནོ། །དེ་ལྟར་དབང་ཐམས་ཅད་བསྐུར་ནས་དམ་པ་ལ་གུས་པ་དང་ལྡན་པས་སློབ་མ་རྣམས་ཀྱིས་བླ་མ་ཆེན་པོའི་ཞབས་ལ་མགོ་བོས་ཕྱག་འཚལ་ནས། །ཇི་ལྟར་རྗེས་མཐུན་གྱི་བཀའ་སྩལ་པ་ལྟར་བདག་ཅག་གིས་ཀྱང་དེ་ལྟར་བྱའོ་ཞེས་བླ་མའི་མདུན་དུ་གསོལ་བར་བྱའོ། །ད་ནི་དཀྱིལ་འཁོར་བསྡུ་བའི་ཆོ་ག་གསུངས་པ། འབྱོར་པ་ཞེས་པ་ལ་སོགས་པའོ། །སོ་སོ་རེ་རེ་ཞེས་པ་ནི་སློབ་མ་དེ་དག་འབྱོར་པ་ཡོད་ན་རང་གི་སྡིག་པ་ལ་སོགས་བཞི་བར་བྱ་བའི་ཕྱིར་གོང་ནས་གསུངས་པ་ལྟ་བུའི་སྦྱིན་སྲེག་རེ་རེ་བྱའོ་ཞེས་སོ། །ཡང་ན་ཐབ་གཅིག་ཁོ་ནར་མི་འགལ་ལོ། །ཇི་ལྟར་བྱ་སྟེ་ལག་པ་གཡོན་གྱིས་ཞེས་ཏེ་བླ་མའི་ལག་པ་གཡོན་གྱིས་སློབ་མའི་ལག་པའི་མཐེའུ་ཆུང་བཟུང་སྟེ་བསྐོར་ཞིང་གོང་མའི་ཆོ་གས་ཞི་བར་བྱའོ་ཞེས་སོ། །གྲངས་གསུངས་པ་ལྟ་བུའི་ལུགས་གསུམ་མམ་བདུན་ནམ་གཅིག་ཅེས་སོ། །ས་བདག་དང་ཕྱོགས་སྐྱོང་བ་ལ་སོགས་པ་བཞི་བར་བྱ་བའི་སྦྱིན་སྲེག་གསུངས་པ། རྒྱལ་པོ་ཞེས་པ་ལ་སོགས་པའོ། །དེའི་དོན་ནི་འདི་ལྟ་སྟེ། གོང་གི་ཐབ་དེ་ཉིད་དུ་ཇི་སྐད་གསུངས་པའི་རྫས་རྣམས་ཀྱིས་ཕྱོགས་སྐྱོང་ལ་སོགས་པར་ཞི་བའི་དོན་དུ་སྦྱིན་སྲེག་བྱས་ནས་གསོལ་བ་གདབ་པར་བྱའོ། །དེ་གང་ཞེ་ན་སེམས་ཅན་གྱི་དོན་བྱེད་པ་ལ་སོགས་པར་ཁྱེད་ཀྱིས་གྲོགས་མཛོད་ཅིག་ཅེས་གསོལ་བ་གདབ་པར་བྱའོ། །ད་ནི་སྤྱོད་ལམ་ལ་སོགས་པས་མཉེས་པར་བྱ་བ་གསུངས་པ། གང་དེ་ལྷག་པར་ཞེས་པ་ལ་སོགས་པའོ། །ཟས་དང་ཞེས་པ་ནི་ཆད་ལ་སོགས་པའོ། །སྤྱོད་ལམ་ཞེས་པ་ནི་སྡོམ་བ་མཆོག་ལ་སོགས་པ་ལས་གསུངས་པའི་གླུ་དང་གར་ལ་སོགས་པའོ། །བདག་གཞན་ཞེས་པ་ནི་སློབ་དཔོན་དང་གྲོགས་པོ་ལ་སོགས་པས་ཤེས་སོ། །
དེའི་དོན་ནི་འདི་ལྟ་སྟེ། སྦྱིན་སྲེག་བྱས་པའི་དེ་མ་ཐག་པ་འདིར་བླ་ན་ཡོད་པ་ལ་སོགས་པའི་མཆོད་པ་དང༌། བཟའ་བཏུང་དང་གླུ་གར་ལ་སོགས་པ་མཆོད་པ་དང་བདག་དང་ལྷའི་དཀྱིལ་འཁོར་སྣ་ཚོགས་དམ་པའི་མཆོད་པས་ཚིམ་པར་བྱས་ཏེ་བསྡུ་བར་བྱ་ཞེས་བྱ་བར་སྦྱར་རོ། །སྐལ་ལྡན་སློབ་མས་བཟུང་ནས་སུ། །ཞེས་པ་ནི་སྐལ་བ་དང་ལྡན་པའི་སློབ་མ་ལས་གཞན་ལ་སྨྲར་མི་རུང་བའི་དོན་མནས་བསྒགས་ཏེ་བསྟན་ཏོ། །དེ་ནས་གཞུག་པ་ཐམས་ཅད་ཀྱིས་ཀྱང་བླ་མ་ཆེན་པོ་ལ་ཕྱག་བྱས་ནས་མངོན་པར་བསྟོད་དེ་ཕྱིར་ཕྱུང་བར་བྱའོ། །མཐའ་མར་མུཿ་གཞུག་ཡིག་གསུམ་གྱི་ནི། སྔགས་ཀྱིས་ཉེ་བར་བསྡུ་བར་བྱ། །ཞེས་པ་ནི་ཐམས་ཅད་རྫོགས་ནས་མཆོད་པ་ལ་སོགས་པ་བྱ་སྟེ། ཨོཾ་ཨཱཿཧཱུཾ་མུཿཞེས་པའི་སྔགས་ཀྱིས་ཡེ་ཤེས་སེམས་དཔའི་དཀྱིལ་འཁོར་གཤེགས་སུ་གསོལ་ལོ། །བསྡུ་བར་བྱ་ཞེས་པའི་ཚིག་གིས་ནི་ཨོཾ་ཨཱཿཧཱུཾ་ཞེས་པ་དམ་ཚིག་གི་དཀྱིལ་འཁོར་བདག་གི་ཐུགས་ཀར་བསྡུའོ་ཞེས་སོ། །ཨ་ཀཱ་རོ་ལ་སོགས་པས་ཞེས་པ་ནི་ཆོས་ཉིད་ཀྱི་བདེན་པ་བརྗོད་པ་སྟེ། ཨ་ཀཱ་རོ་མུ་ཁཾ་སརྦ་དྷརྨ་ཎཱཾ་ཨཱདྱ་ནུ་ཏྤ་ནྣ་ཏྭཱཏ་ཅེས་པས་གཟུགས་བརྙན་གྱི་དཀྱིལ་འཁོར་ནམ་མཁའ་དང་འདྲ་བ་སྟོང་པ་ཉིད་དུ་བསྒོམས་ནས་བསྡུ་བར་བྱའོ་ཞེས་སོ། །དཀྱིལ་འཁོར་ལ་སོགས་པའི་ནོར་གཞན་གྱིས་བསྐུར་མི་རུང་བར་བསྟན་པ། ཁུང་བུ་གང་བར་ཞེས་པ་ལ་སོགས་པའོ། །དེ་ནས་ནི་གོང་ནས་གསུངས་པ་འདི་ལས་དང་པོའི་དཀྱིལ་འཁོར་གྱི་ཆོ་ག་གསུངས་པ་ཡིན་ནོ། །གཞན་རྣམས་ཀྱིས་མ་ལུས་པར་འདིར་ཅི་རིགས་པར་སྦྱར་རོ་ཞེས་སོ། །ད་ནི་ཅུང་ཟད་ཡེ་ཤེས་དབང་དུ་གྱུར་པའི་རྣལ་འབྱོར་པས་དཀྱིལ་འཁོར་བྲི་བའི་ཆོ་ག་གསུངས་པ། ཅུང་ཟད་ཅེས་པ་ལ་སོགས་པའོ། །དེ་ལ་ཁྱེའུ་དང་བུ་མོ་བཅུ་གཉིས་པ་ཞེས་པ་ནི་དབབ་པའི་སྣོད་དེ། དེ་ལ་ཉོན་མོངས་པའི་རིགས་ཀྱི་སྐྱོན་གྱིས་མ་གོས་པའི་ཕྱིར་རོ། །མཆོད་གནས་ཞེས་པ་ནི་གཉིས་གཉིས་པར་བྱས་ནས་དེས་དཀྱིལ་འཁོར་བྲི་བར་གཞུག་ཅེས་ཏེ་ཐིག་དང་རྡུལ་ཚོན་ལ་སོགས་པ་བྱེད་དུ་གཞུག་པའོ། །སྣོད་དེ་ལ་དངོས་གང་དབབ་ཅེ་ན།
ཐུགས་ལ་ཞེས་པ་ལ་སོགས་པའོ། །ཐུགས་ཀྱི་གནས་སྐབས་སུ་མི་བསྐྱོད་པ་ཁྱེའུར་བུ་མོ་ལ་མཱ་མ་ཀཱི་དབབ་ཅེས་སོ། །དེ་ལྟར་ཕྱི་མ་ལ་ཡང་སྦྱར་ཞེས་སོ། །དབབ་པ་དེའི་ཡོན་ཏན་བརྟགས་པ་གསུངས་པ་སེམས་ཅན་གང་ཞེས་པ་ལ་སོགས་པའོ། །དབབ་པའི་ལྷས་བྲིས་པ་ནི་རྨད་དུ་བྱུང་བ་ཞེས་ཏེ་ཁྱད་པར་དུ་འཕགས་པ་ཞེས་སོ། །གཞན་མ་ནི་གོ་སླའོ། །སློབ་མ་གཞུག་པ་ཞེས་པ་ལ་སོགས་པ་ནི་ལས་དང་པོ་པ་བཞིན་དུ་བྱའོ། །དེ་གསུངས་པ། སློབ་དཔོན་སློབ་མའི་ཆོ་ག་ནི། །སྔོན་བཞིན་བསམ་གཏན་ཁོ་ནས་གནས། །ཞེས་སོ། །དེའི་དོན་ནི་འདི་ལྟ་སྟེ། གོང་དུ་སྨོས་པ་ལྟ་བུས་ཞུགས་པ་འམ། བདག་དངོས་གྲུབ་ཀྱི་མཚན་མ་མཉེས་པས་འཛབ་བཟླས་པ་བྱས། ས་དག་པར་བྱ་བའི་མཆོག་ལ་སོགས་པ་བྱ་སྟེ། ཇི་སྐད་གསུངས་པའི་ཁྱེའུ་དང་བུ་མོ་ཁང་པར་བཅུག་སྟེ་སྒོ་བཅད་ནས་ཆོ་ག་ཇི་ལྟ་བ་བཞིན་དུ་ཕབ་སྟེ་དེ་གཉིས་སློབ་དཔོན་དང་སློབ་མའི་ངོ་བོས་ཐིག་གདབ་པ་དང༌། ཚོན་དགྱེ་བ་དང་ཕྱག་རྒྱ་བཀོད་པ་ཇི་ལྟ་བ་བཞིན་དུ་བྱ་སྟེ་ལྷ་གཤེགས་སུ་གསོལ་ནས་དེ་གཉིས་སླར་བཏང་སྟེ། དེ་ནས་བདག་ནི་ལྷ་གནས་པའི་བསམ་པས་སྦྱོར་བ་ལ་སོགས་པ་སྔ་མ་ཁོ་ན་བཞིན་དུ་བྱའོ། །དེ་སློབ་མ་གཞུག་པ་དབང་བསྐུར་བ་ཡང་སྔ་མ་ཁོ་ན་བཞིན་དུ་བྱའོ་ཞེས་སོ། །དངོས་གྲུབ་ཀྱི་མཚན་མ་མ་རྙེད་པ་ཞིག་ན་ལྷས་དབང་བསྐུར་བའི་ཆོ་གཡན་ཆད་ཀྱིས་བདག་ཞུགས་ཏེ། རྒྱུད་ལས་ཇི་སྐད་གསུངས་པ་བཞིན་དུ་ཐུན་མོང་གི་དངོས་གྲུབ་མཚན་མ་ཐོབ་པའི་བྱེ་བྲག་གིས་ཅི་རིགས་པར་བསྒྲུབ་པར་བྱའོ་ཞེས་སོ། །ད་ནི་ཡེ་ཤེས་དབང་དུ་གྱུར་པའི་རྣལ་འབྱོར་པས་བསམ་གཏན་གྱི་དཀྱིལ་འཁོར་གྱི་ཆོ་ག་གསུངས་པ། སེམས་ཉིད་ཁོ་ན་ཞེས་པ་ལ་སོགས་པའོ། །སེམས་ཉིད་ཁོ་ན་ཞེས་པ་ནི། ཕྱིའི་བྱ་བ་ལ་ལྟོས་པ་མེད་པ་ཁོ་ནར་ཞེས་པའི་དོན་ཏོ། །ཡེ་ཤེས་དབང་དུ་ཐོབ་པ་ཞེས་པ་ནི་འདི་ལྟ་སྟེ། དེའི་བྱིན་རླབས་ཀྱིས་མཐོང་བ་སྟེ་ཞེས་སོ། །བཙུད་ནས་འདི་ན་གནས་པའི་མཐའ། །ཞེས་པ་ནི་བསམ་གཏན་གྱི་དཀྱིལ་འཁོར་དེར་སྐལ་བ་དང་ལྡན་པ་བཙུད་ནས་བཀའ་ལུང་སྣང་བའི་མཐར་ཐུག་
པའི་བར་གྱིས་དབང་བསྐུར་བར་བྱའོ་ཞེས་སོ། །རྨི་ལམ་ལྟར་འདོད་ཤིན་ཏུ་གསལ། །ཞེས་པ་ནི་ཅུང་ཟད་མི་གསལ་བའི་དཔེ་བསྟན་པ་ཡིན་ཏེ། དེ་སྒྱུ་མ་ལྟ་བུའི་ལྷའི་སྐུ་རང་དང་གཞན་གྱིས་མཐོང་བ་དེ་ཡང་ཇི་ལྟ་བ་བཞིན་དུ་མ་ཡིན་ཏེ་རྨི་ལམ་ལ་སོགས་པ་བཞིན་ནོ་ཞེས་སོ། །སེམས་ཀྱི་སྐུ་གཟུགས་བསྟན་པའི་ཕྱིར། །ཞེས་པ་ནི་ནང་གི་བཟླས་པའི་རིམ་པས་ཉིན་མཚན་དུ་རང་ཉིད་ཟློས་ཏེ། སྒྱུ་མ་ལྟ་བུའི་ལྷའི་གཟུགས་སུ་བསྟན་པའི་ཕྱིར་རྣལ་འབྱོར་པ་སྟེ་མཆོག་ནི་ཞེས་བྱའོ། །དེའི་དོན་ནི་འདི་ལྟ་སྟེ། གོང་དུ་སློབ་མ་རྣམས་ལ་སྣོད་དུ་རུང་ཞིང་སྦྱོར་བ་ལ་རྣམ་པར་གནས་པ། ཡུལ་རྣམས་ལ་ཞེན་པ་དང་བྲལ་བ་རྣམས་ཀྱིས་ཞུས་པའི་དོན་དུ་དཀྱིལ་འཁོར་སྒྱུ་མ་ལྟ་བུ་བསམ་གཏན་གྱིས་རྫོགས་པར་བྱ་སྟེ། ཁྱད་པར་ཅན་གྱི་སློབ་མ་དེ་དེར་བཅུག་སྟེ་ཆུ་ནས་ཐམས་ཅད་སྣང་བའི་མཐར་ཐུག་པའི་དབང་བསྐུར་བར་བྱའོ་ཞེས་སོ། །དེ་ལས་གཞན་པའི་སློབ་མའི་བྱ་བ་ལ་མངོན་པར་ཞེན་ཅིང་བློ་གྲོས་དམན་པ་དེར་འཇུག་པར་མི་ནུས་པ་རྣམས་ལ་ཅུང་ཟད་ཡེ་ཤེས་ཀྱི་དབང་དུ་གྱུར་པའི་རྣལ་འབྱོར་པ་ལྟར་གཟུགས་བརྙན་དུ་བྲིས་ནས་དབང་བསྐུར་བ་ལ་སོགས་པ་བྱའོ་ཞེས་སློབ་དཔོན་སྔ་མ་པའི་ཞལ་སྔ་ནས་བཤད་དོ། །དེ་ལ་གཞན་རྣལ་འབྱོར་པས་འདིས་དངོས་གྲུབ་ཆེན་པོ་ལ་སོགས་པའི་མཚན་མ་རྙེད་ནས། སྣོད་ལ་དབབ་པའི་ལྷས་བྲིས་པའི་དཀྱིལ་འཁོར་ལ་གནས་ནས་ཇི་སྐད་གསུངས་པའི་ལམ་གྱི་རིམ་པས་དངོས་གྲུབ་ཆེན་པོ་ལ་སོགས་པ་བསྒྲུབ་པར་བྱའོ་ཞེས་སོ། །རྣལ་འབྱོར་གསུམ་གྱི་སྔ་མ་བཞིན། །ཞེས་པ་ནི་སྐུ་ལ་སོགས་པའི་རྣལ་འབྱོར་པས་དཀྱིལ་འཁོར་བྲི་བའི་ཆོ་ག་ནི་གོང་མ་ཁོ་ནར་ཟད་དོ་ཞེས་སོ། །ཕྱག་མཚན་དགོད་པའི་ཁྱད་པར་གསུངས་པ། ཆོ་ག་བསྡུ་བའི་འཁོར་ལོའོ། །དེ་ནས་མི་བསྐྱོད་ཕྱག་མཚན་དགོད། །ཅེས་སོ། །ཅིའི་ཕྱིར་ཞེ་ན། སྐུ་གསུམ་གསང་བ་དག་ཕྱིར་ཞེས་ཏེ་གསུང་རྡོ་རྗེ་དང་ཐུགས་རྡོ་རྗེ་ཡང་ཆོས་ཀྱི་དབྱིངས་སུ་རོ་གཅིག་པའི་ཕྱིར་རོ་ཞེས་སོ། །དེ་བཞིན་དུ་ཁྱད་པར་གཞན་ཡང་ཅི་རིགས་པར་རྟོགས་པར་བྱའོ་ཞེས་སོ། །ད་ནི་རྣལ་འབྱོར་
པ་རྣམ་པ་གསུམ་ཆར་ལ་ཡང་སེམས་ཁོ་ན་གཙོ་བོ་ཡིན་པར་གསུངས་པ་ལས་དང་པོ་པས་ཞེས་བ་ལ་སོགས་པའོ། །ལས་དང་པོ་པ་ནི་དེ་ཉིད་དོ། །ཅུང་ཟད་ཙམ་ཞེས་པ་ནི་ཅུང་ཟད་ཡེ་ཤེས་དབང་དུ་གྱུར་པའོ། །ཡེ་ཤེས་དབང་ཐོབ་ཅེས་པ་ནི་ཡེ་ཤེས་དབང་དུ་གྱུར་པའི་རྣལ་འབྱོར་པའོ། །དེ་རྣམས་ཀུན་ཀྱང་སེམས་ཀྱི་ཆོ་ག་གསུངས་ཏེ་ཞེས་པ་ནི་སྔགས་ལ་སོགས་པའི་བྱ་བ་ཙམ་གྱིས་བྱེད་པ་དགག་པའོ། །དེ་བས་ན། སེམས་ཀྱི་ཆོ་ག་དེ་མེད་ན། །དེ་རྣམས་ལ་ནི་འགྲུབ་པ་མེད། །ཅེས་སོ། །དེ་ཉིད་གསུངས་པ་རྡོ་རྗེ་སློབ་དཔོན་ཞེས་པ་ལ་སོགས་པའོ། །རྡོ་རྗེ་སློབ་དཔོན་དང་སློབ་མ་མཚུངས་པར་རྒྱུ་མཐུན་པའི་འབྲས་བུ་ལ་སོགས་པ་བདག་གིས་རྟོགས་པར་འདོད་ན། སེམས་ཀྱི་ཆོ་ག་མཆོག་གསུངས་ཞེས་ཏེ་དེ་ལ་བརྟན་པ་ཁོ་ནས་འགྲུབ་པར་འགྱུར་ཞེས་སོ། །ངག་བརྗོད་ཙམ་གྱིས་ཅི་ཡང་མེད། །ཅེས་པ་ནི། ནང་གི་བཟླས་པ་མ་གཏོགས་པར་སྔགས་ལ་སོགས་པ་བཟླས་ཀྱང་མི་འགྲུབ་ཅེས་སོ། །སྤྱོད་པ་ཙམ་གྱིས་སངས་མི་རྒྱ། །ཞེས་སོ། །དེ་ནི་ཡེ་ཤེས་ཀྱི་སྐུ་མ་གཏོགས་པར་བགྲང་ཕྲེང་བགྲང་བ་དང༌། ལག་པའི་ཕྱག་རྒྱ་དང་སྐྱིལ་ཀྲུང་ལ་སོགས་པའི་མཚན་ཉིད་ཀྱིས་སངས་རྒྱས་པ་མ་ཡིན་ཞེས་སོ། །ཐོས་པ་ཙམ་ལས་ཡོད་མ་ཡིན། །ཞེས་སོ། །བླ་མ་དམ་པ་བསྙེན་བཀུར་བ་ལས་བྱུང་བའི་དེ་ཁོ་ན་ཉིད་ཀྱི་གསང་བའི་མན་ངག་བླ་མའི་ཞལ་ནས་མ་ཐོབ་པར་གཞན་ཚིགས་སུ་བཅད་པ་རྐྱང་པ་དུ་མ་ཐོས་པ་ལ་སོགས་པས་ཀྱང༌། ཕྱག་རྒྱ་ཆེན་པོ་མངོན་གསུམ་དུ་མི་མཛད་ཅེས་སོ། །འོ་ན་གང་གིས་ཐོབ་ཅེ་ན། ཅི་ཙམ་སེམས་དཔའ་བརྟན་བྱེད་ན། །ཞེས་ཏེ་ཇི་སྐད་གསུངས་པ་རྣམས་རྟོགས་པར་བྱ་སྟེ། ཐབས་གཞན་གྱིས་བདེ་བར་གསུངས་གསོས་ཏེ། དེ་ནས་དགོན་པ་ལ་སོགས་པ་ཡིད་དུ་འོང་བའི་ས་ཕྱོགས་སུ་གནས་ཏེ། ཇི་སྐད་གསུངས་པའི་འོག་ནས་འབྱུང་བའི་འབྲས་བུ་གསལ་བར་འགྱུར་ཞེས་སོ། །དེ་ཉིད་ཟློས་པའི་ཕྱིར་ཡང་བཀའ་སྩལ་པ། སྔགས་པ་རྣམས་ཀྱིས་གཞག་པར་བྱ། །ཞེས་སོ། །ཅིའི་ཕྱིར་སྤྲོས་པ་མང་པོར་གཞག་ཅེ་ན་སེམས་ལས་ཐུན་མོང་དང་མཆོག་གི་ཁྱད་པར་འགྲུབ་པ་དང༌། སེམས་ལས་རྣམ་པ་
ཐམས་ཅད་མཁྱེན་པའི་བྱང་ཆུབ་འབྱུང་བའི་ཕྱིར་དེ་ཁོ་ན་ལ་བློ་རྣམ་པར་བཞག་སྟེ། གཞན་སྤྲོས་པ་མང་པོས་ཅི་ཞིག་བྱ་ཞེས་སོ། །ཇི་སྐད་གསུངས་པ་ཞེས་བྱ་བ་ལ་སོགས་པས་ནི་སེམས་ཁོ་ནས་ཇི་ལྟ་བ་བཞིན་དུ་རྟོགས་པ་དེ་ཉིད་རྣལ་འབྱོར་པ་བཞི་པ་ཡིན་ཏེ། སེམས་དེ་བྱང་ཆུབ་འབྲས་བུ་སྟེ། །ཞེས་པ་ནི་བརྟུལ་ཞུགས་ལ་སོགས་པའི་རིམ་པས་སེམས་དེ་ཁོ་ནས་ཐང་ཅིག་གིས་རྟོགས་པ་དེ་ཉིད་བྱང་ཆུབ་ཀྱི་འབྲས་བུ་ཞེས་སོ། །དེ་དངོས་གང་ཞེ་ན་བླ་ན་མེད་པའི་སངས་རྒྱས་ཞེས་ཏེ། ས་འོག་མ་པ་མ་ཡིན་པའི་ཕྱིར་རོ། །དེ་ཉིད་གསུངས་པ། རྡོ་རྗེ་སེམས་དཔའ་དངོས་པོ་ཡིས། །ཆོས་དང་ལོངས་སྤྱོད་སྤྲུལ་པའི་ཞེས་ཏེ་རྟོགས་པ་དེ་ཉིད་ལས་སྐུ་གསུམ་གྱི་དཀྱིལ་འཁོར་གྱི་འཁོར་ལོས་འགྲོ་བ་རྣམས་ཀྱི་དོན་མཛད་པ་ཡིན་ནོ་ཞེས་སོ། །དེ་བས་ན་གསུངས་པ། དཀྱིལ་འཁོར་གསུམ་གྱི་མཐའ་ཡས་ཁམས། །འགྲོ་བའི་ཕན་དོན་བྱེད་པ་པོ། །ཞེས་པ་དེ་ཉིད་ཀྱིས་གསལ་པོར་མཛད་པ་ཡིན་ལ་དེ་རྣམས་ལོག་མ་ཐག་དེ་ལས་སྲིད་པའི་སྡུག་བསྔལ་གཞན་ཡོད་པ་མ་ཡིན་ཞེས་ཏེ་དེ་ཉིད་སྲིད་པའི་སྡུག་བསྔལ་ཡིན་ནོ་ཞེས་སོ། །དོན་འདི་ལྟ་སྟེ། རྟག་པ་ལ་སོགས་པ་ལ་གཟུགས་ལ་སོགས་པར་འཁྲུལ་པ་དེ་ཉིད་སྲིད་པའི་སྡུག་བསྔལ་ཡིན་ནོ་ཞེས་སོ། །ཐབས་དང་ཤེས་རབ་བདག་ཉིད་འདི། །ཞེས་པ་ནི་འོག་ནས་འབྱུང་བའི་ཟབ་མོ་གསལ་བའི་བདག་ཉིད་དཀྱིལ་འཁོར་གྱི་འཁོར་ལོ་དུས་དང་གནས་སྐབས་ཐམས་ཅད་དུ་ཁྱབ་པའོ། །དེ་ཡི་གཉེན་པོ་མངོན་སུམ་མཐོང༌། །ཞེས་པ་ནི་དེ་ཉིད་གོང་དུ་སྨོས་པའི་སྡུག་བསྔལ་གྱི་གཉེན་པོར་མངོན་སུམ་དུ་ཤེས་པར་བྱའོ། །གཉེན་པོ་དེ་ཉིད་གསུངས་པ། ཆོས་ཀུན་ཕྱོགས་ལ་ཁྱབ་པའི་ཞེས་ཏེ་རྒྱུ་བ་དང་མི་རྒྱུ་བའི་ཆོས་ཐམས་ཅད་ལ་རྟག་པ་ལ་སོགས་པའི་རྒྱུན་འཇུག་པའི་ཀུན་རྫོབ་ཀྱི་གཟུགས་ལ་སོགས་པ་དཀྱིལ་འཁོར་གྱི་འཁོར་ལོ་རང་ལ་སྣང་བར་བྱས་ཏེ། དེ་གོམས་པས་ཞེས་ཏེ་ཇི་སྐད་གསུངས་པའི་དོན་ལ་གཞོལ་བས་ཟིན་པ་གཉིས་སུ་དབྱེར་མེད་པ་དེས་དུས་ཐམས་ཅད་དུ་དེ་ལ་ཁྱབ་པར་གནས་ཏེ་དེ་ཉིད་གསུངས་པ། ཐོག་མེད་དམ་པའི་འཁོར་ལོར་སྣང༌། །ཞེས་སོ། །རྟོག་པ་ལོག་ནས་སྣང་བྱས་ཏེ། །ཞེས་སྦྲུལ་བཞིན་དུ་སྣང་ལ། མེད་པའི་རྟོག་པ་དེ་ཉིད་ལོག་པར་
བྱས་ནས་ཐག་པ་ལྟ་བུའི་རྟོག་པ་ལ་སོགས་པའི་དཀྱིལ་འཁོར་གྱི་འཁོར་ལོ་རང་ལ་སྣང་བར་བྱས་ཏེ། དེ་གོམས་པས་ཞེས་ཏེ། ཇི་སྐད་གསུངས་པའི་དོན་ལ་གཞོལ་བས་འཁོར་ལོ་དེ་གོམས་པར་བྱས་ནས་དེ་ལྡོག་གོ་ཞེས་ཏེ། གཟུགས་ལ་སོགས་པར་འཁྲུལ་པའི་སྲིད་པའི་སྡུག་བསྔལ་དེ་ལྡོག་གོ་ཞེས་སོ། །གང་ཚོར་བ་གང་གིས་མི་མཐུན་ཕྱོགས། །ཞེས་པ་ནི་གང་གི་ཚེ་ན་རྣལ་འབྱོར་པ་གང་གི་རྒྱུད་ལ་སྲིད་པའི་སྡུག་བསྔལ་བརྫུན་པ་ངོ་བོར་འཁྲུལ་པ་ནི་མི་མཐུན་པའི་ཕྱོགས་སོ། །དེ་ཆོ་དེ་ནི་དེ་ཡིས་འགགས། །ཞེས་ཏེ་དེའི་རྣལ་འབྱོར་པ་དེ་ཐོགས་པ་མེད་པའི་འཁོར་ལོ་བསྒོམས་པས་དེ་ཉིད་འགགས་ཞེས་སོ། །དེའི་དོན་ནི་འདི་ལྟ་སྟེ། རྟོག་པ་ནི་ཕྱོགས་ཀུན་ལ་ཁྱབ་པ་སྟེ་ཐོག་མ་མེད་པ་ནས་བརྟགས་པའོ། །ཟབ་མོ་གསལ་བའི་དཀྱིལ་འཁོར་དུ་སྣང་བའི་ཡིད་ལ་དེ་སྣང་བར་མི་རིགས་ཏེ་གཞི་རྣམ་པར་རྟོག་པའི་ཕྱིར་རོ། །དེ་བས་ན་བདེ་བ་དང་སྡུག་བསྔལ་དུས་གཅིག་ཏུ་མི་མཐུན་པ་བཞིན་ནོ། །འོ་ན་བྱམས་པ་ལ་སོགས་པས་སྡང་བ་ལ་སོགས་པ་འགགས་པ་ལྟ་བུར་མི་འགྱུར་རམ་ཞེ་ན། དེས་ན་གཏན་དུ་བཟློག་བྱས་ཏེ། །ཞེས་པ་ཇི་ལྟ་བ་བཞིན་དུ་བཟློག་པའི་ཕྱིར་རྟོག་པ་རྣམས་གཏན་དུ་དག་སྟེ་དེ་ལྟ་བུའི་སྣང་བ་སྐྱེ་མི་རིགས་ཏེ་དེ་ཉིད་བརྫུན་པ་ཡིན་པའི་ཕྱིར་དེར། རྒྱུ་མཐུན་ཤིན་ཏུ་གོམས་ཕྱིར་རོ། །ཞེས་པ་ནི་ཇི་སྐད་གསུངས་པའི་རིམ་པ་དེས་དེའི་རྒྱུ་ལམ་རྣམ་པར་གོམས་པས་དེ་ཉིད་གསལ་བར་སྣང་བའི་ཕྱིར་ཅིག་ཤོས་སྣང་བར་མི་རིགས་སོ། །དམ་པའི་འཁོར་ལོ་ཞེས་པ་ནི་གོང་དུ་སྨོས་པའི་ཟབ་མོ་དང༌། གསལ་བའི་དེ་ཉིད་ཆོས་ཀུན་བདག །ཅེས་པ་སྟེ་ཆོས་ཐམས་ཅད་ལ་ཁྱབ་བདག་ཏུ་གྱུར་པའོ། །སྣང་སྲིད་དག་པར་སྤྱོད་པའི་ཕྱིར། །ཞེས་པ་ནི་རྒྱུ་བ་དང་མི་རྒྱུ་བའི་ཆོས་ཐམས་ཅད་གཟུང་བ་དང་འཛིན་པའི་རྣམ་པར་དག་པ་སྟེ། ཟབ་མོ་དང་གསལ་བའི་འཁོར་ལོར་སྔགས་པ་རྟག་ཏུ་སྤྱོད་པའི་ཕྱིར་སྲིད་པའི་སྡུག་བསྔལ་ཅན་དུ་ལོག་པར་བྱེད་དོ་ཞེས་སོ། །དེ་བས་ན་བྱམས་པ་ལ་སོགས་པས་ཞེ་སྡང་ལ་སོགས་པ་སྐད་ཅིག་ཙམ་དུ་འགགས་ཀྱང༌། ཡང་འབྱུང་དུ་མི་བཏུབ་པ་མ་ཡིན་པའི་ཕྱིར་རོ། །
དེ་བས་ན་འདིར་བྱང་ཆུབ་མངོན་དུ་འགྱུར་ཞེས་སོ། །དེའི་ཕྱིར་འདི་ལ་བསྐལ་བ་དང་འབྲེལ་བ་མེད་དོ། །དེ་ལྟར་ན་སྲིད་པའི་སྡུག་བསྔལ་ལྡོག་པར་འགྱུར་པའི་ལམ་གཞན་ཡོད་པས་འཁོར་ལོ་འདིས་ཅི་ཞིག་བྱ་ཞེ་ན་དེའི་ཕྱིར་ལམ་དེ་ལས་ཚུལ་འདི་ཁྱད་པར་དུ་འཕགས་པར་གསུངས་བ་བསྐལ་བར་གནས་པ་ཞེས་པ་ལ་སོགས་པའོ། །བསྐལ་པར་གནས་ཀྱང་འབྲས་བུ་མེད། །ཅེས་སོ། །སྦྱིན་སོགས་རིམ་བཞིན་ཟབ་མོར་ནི། །སྦྱིན་རྫས་ཚུལ་སོགས་རང་བཞིན་མེད། །ཅེས་ཏེ། སྦྱིན་པ་ལ་སོགས་པའི་རང་བཞིན་མེད་པར་གོམས་པར་བྱེད་པ་ཁོ་ནའི་ཕྱིར་ཟབ་མོ་ཡིན་ནོ། །ཡང་དག་པར་གསལ་བ་མ་ཡིན་ནོ། །དེ་བས་ན་ཐ་མལ་པའི་རྟོག་པ་བསལ་བས་བཟློག་སྟེ་ཟབ་མོ་མ་ཡིན་ནོ། །གསལ་བ་རྣམ་པར་སྤྱོད་པ་ནི་བདག་ཅག་རྣམས་ཀྱིའོ། །དེ་བས་ན་ཁྱེད་ནི་ཐ་མལ་པར་འགྱུར་ཞེས་དང༌། མི་གསལ་གསལ་མི་འགྲུབ་ཅེས་སོ། །བྱང་ཆུབ་དུས་ཆད་མེད་བའི་ཕྱིར། །ཞེས་པ་ནི་དེའི་གཞུང་གིས་བྱང་ཆུབ་བཙལ་ནས་བསྐལ་པ་གྲངས་མེད་པ་གསུམ་འཛིན་པའི་ཕྱིར་ན། རང་གི་དོན་ཡུལ་དངོས་བདག་ནི། །ཞེས་ཏེ་ཁྱེད་ཀྱི་སྦྱིན་པ་ལ་སོགས་པའི་དངོས་པོའི་བདག་ཉིད་རྣམས་ཏེ། མཁས་པ་ཐ་མལ་ཡིན་པར་བསྟན། །ཞེས་སོ། །ཁྱེད་ཀྱི་ཡང་དེ་ལྟར་མི་འགྱུར་རམ་ཞེ་ན། སྣང་སྲིད་ཅེས་པ་ལ་སོགས་པའོ། །སྣང་སྲིད་ཆོས་བདག་དཀྱིལ་འཁོར་གྱིས། །ཞེས་པ་ནི་གོང་དུ་སྨོས་པའི་དཀྱིལ་འཁོར་གྱི་འཁོར་ལོ་ལ་རྣལ་འབྱོར་པ་ཆེན་པོ་ཞིག་གིས་གོམས་པའི་སྟོབས་ཀྱིས་སྐད་ཅིག་འདིར་ནི་བྱང་ཆུབ་ཞེས་ཏེ། ཉིན་མཚན་དུ་སྦྱོར་བས་ཚེ་འདི་ཉིད་ལ་ཨིནྡྲ་བྷཱུ་ཏི་ལ་སོགས་པ་བཞིན་དུ་ཕུང་པོ་རྡོ་རྗེའི་ལུས་སུ་བརྗེ་པར་འགྱུར་རོ་ཞེས་སོ། །དེ་བས་ན་འདི་ནི་ཇི་ལྟ་བ་བཞིན་དུ་གནས་པའི་ལམ་སྟེ་སྐད་ཅིག་གིས་རྫོགས་པར་བྱེད་པའི་ཕྱིར་རོ། །ཁྱེད་ཀྱི་ཐ་མལ་པ་སྟེ་བསྐལ་པ་གྲངས་མེད་པ་གསུམ་ན་ཡང་འདི་ལྟ་བུའི་དོན་རྫོགས་པར་བྱེད་མི་ནུས་སོ་ཞེས་སོ། །བདག་གི་ཇི་ལྟ་བར་ཐ་མལ་པར་འགྱུར་ཞེ་ན། སྦྱིན་རྫས་ཞེས་པ་ལ་སོགས་པ་མི་དམིགས་ཀྱང་ཞེས་པ་ནི་སྦྱིན་པའི་རྫས་དང་སྦྱིན་པ་པོ་དང་ལེན་པ་པོ་ལ་སོགས་པ་གསུམ་མི་དམིགས་པས་ཟབ་མོ་ཁོ་ན་ཡིན་ཡང༌། སྦྱིན་ལ་སོགས་པ་ཐ་
མལ་བདག །ཅེས་པ་མི་དམིགས་པ་དེ་ཟབ་མོ་ཡིན་ཡང་སྦྱིན་པ་ལ་སོགས་པ་ནི་ཐ་མལ་པ་སྟེ། ཇི་སྟེ་ཀུན་རྫོབ་ཏུ་སོང་ནས་འདུག་པ་དེ་གང་གིས་བཟློག་ནུས། དེ་བས་ན་ཁྱེད་ཀྱི་ནི་ཐ་མལ་པའི་སྦྱིན་པ་ལས་འདས་པ་མ་ཡིན་པ། དེ་བདག་མེད་པའི་དམ་པའི་འཁོར་ལོར་མི་སྣང་ཞེས་ཏེ། སྦྱིན་པ་ལ་སོགས་པའི་དེ་ཁོ་ན་ཉིད་བླ་མའི་ཞལ་ནས་རྙེད་པར་བྱ་སྟེ། དེ་ལྟ་བུའི་དཀྱིལ་འཁོར་གསུམ་གྱི་དོན། རང་ཡིད་གང་གིས་བསྒོམ་བྱེད། །ཞེས་ཏེ་བསྒོམ་པར་བྱ་བ་མ་ཡིན་ནོ། །དེའི་དོན་ནི་འདི་ལྟ་སྟེ། གཞན་སྡུག་བསྔལ་གསུམ་གྱི་རང་བཞིན་གྱི་བསྐལ་པ་གྲངས་མེད་པ་གསུམ་གྱིས་བླ་ན་མེད་པའི་སངས་རྒྱས་ཐོབ་པ་རྣམས་ཀྱིས་འདི་ལྟ་བུའི་དཔལ་དང་ལྡན་པ་ཀུན་ནས་བཀྲ་ཤིས་པའི་ངོ་བོ་འདི་གང་ཟག་གང་གིས་སྒོམ་པར་མི་བྱེད་པ་ཁོ་ན་ཡིན་ནོ་ཞེས་པའི་དོན་ཏོ། །ད་ནི་བླ་མ་ཆེན་པོ་རྣམས་ཀྱིས་བརྩམས་པའི་ཆོས་དཔང་པོར་གཞག་པ་གསུངས་པ། དམ་པའི་ཆོས་ཞེས་པ་ལ་སོགས་པའོ། །དམ་པའི་ཆོས་ཀྱི་རོ་མྱངས་པ། །ཞེས་བྱ་བ་ནི་གཞུང་གི་ཆོས་ལ་བློ་རྣམ་པར་འབད་པའི་སྒོ་ནས་ཇི་ལྟ་བ་བཞིན་དུ་གནས་པའི་ཆོས་ཀྱི་རོ་མྱང་བ་ཞེས་པའི་དོན་ཏོ། །ཐོས་པ་མང་པོས་ཕུན་སུམ་ཚོགས། །ཞེས་པ་ནི་བླ་མ་གུས་པས་མཉེས་པར་བྱས་པ་སྟེ། ཕྱི་ནང་སྔགས་ཀྱི་རྒྱུད་ལ་སོགས་པ་མར་མེ་ལྟ་བུའི་སྒོ་ནས་གསེར་ལྟ་བུའི་དོན་བླ་མའི་ཞལ་སྔ་ནས་མང་དུ་ཐོས་པའོ། །དངོས་གང་ཞེ་ན་སྐྱེས་བུ་དམ་པ་ཞེས་པ་སྟེ། འཕགས་པ་ཀླུ་སྒྲུབ་ལ་སོགས་པའོ། །དེ་འདིར་ཚར་ནས་ཀྱང་ཞེས་པ་ནི། དེ་རྣམས་ཀྱིས་རྣམ་པར་འདུལ་བའི་ཆོས་དང་འདིར་བདག་གིས་འདིར་དང་པོ་ལྟ་བུར་བཞག་ནས་སྒྲུབ་པའི་ཐབས་འདི་རང་གི་སེམས་ཀྱི་བརྩོན་འགྲུས་ཀྱིས་བརྩམས་ང་རྒྱལ་གྱིས་མ་ཡིན་ནོ། །དེ་བཞིན་དུ་བདག་གིས་ཀྱང་བརྩོན་པར་གསུངས་པ། བླ་མའི་གཞུང་ཞེས་པ་ལ་སོགས་པའོ། །དད་པས་རབ་ཏུ་གསལ་བར་བྱས། །ཞེས་པ་ནི། འདིར་རིགས་པ་ཡིན་ཏེ་བླ་མ་ཆེན་པོའི་གཞུང་བློ་ལ་རྣམ་པར་བཟུང་ནས་དད་པ་གསལ་པོར་བདག་གིས་བྱས་ཏེ། གཞན་མ་ཡིན་ཞས་ཏེ་དད་པ་ལ་
སོགས་པ་ནི་ཆོས་ལ་འཇུག་པའི་རྒྱུ་ཡིན་པའི་ཕྱིར་དེས་སྣོད་དུ་རུང་བ་ཡོད་དེ། དེ་བས་ན་སྣོད་དུ་རུང་བའི་བསྒོམ་པར་བྱ་བ་ལ་སྨྲ་བར་འོས་པ་མ་ཡིན་ཞེས་སོ། །དེ་ཅིའི་ཕྱིར་ཞེ་ན། དད་པ་རྣམ་པར་བརྩམས་པ་སྟེ། །དད་པ་ནི་དཀར་པོའི་ཆོས་འཕེལ་པའི་རྒྱུ་ཡིན་པའི་ཕྱིར་ན་དེ་ལ་སྨྲར་རུང་བ་མ་ཡིན་ནོ་ཞེས་སོ། །དེ་བས་ན་དད་པ་མེད་པའི་མི་རྣམས་ལ། །དཀར་པོའི་ཆོས་རྣམས་ཡོངས་མི་སྐྱེ། །ས་བོན་མེ་ཡིས་ཚིག་པ་ལ། །མྱུ་གུ་རྣམས་ནི་ཡོངས་མི་སྐྱེ། །ཞེས་སོ། །ད་ནི་སློབ་དཔོན་གྱི་ང་རྒྱལ་གཞོམ་པ་གསུངས་པ། བློ་གྲོས་ཞན་ཡང་ཞེས་པ་ལ་སོགས་པའོ།། བདག་འདྲ་བའི་བློ་གྲོས་ཞན་པ་ལ་དོན་རབ་ཏུ་རྟོགས་པ་ཡོད་སྲིད་ཅེས་སོ། །དེ་བཞིན་དུ་བྲིས་པའི་ཁ་ནས་ཚིག་སྙན་པ་བྱུང་སྲིད་པས། འདིར་རང་གི་སེམས་ཀྱི་བརྩོན་འགྲུས་ཀྱིས་སོ་ཞེས་སོ། །ཅིའི་ཕྱིར་ཞེ་ན། མཆོག་ནི་སྐྱེས་བུ་རྣམས་ཀྱི་གཞུང༌། །ཞེས་པ་དེ་རྣམས་ལ་གཞུང་དུ་མ་འགའ་ཡོད་སྙམ་པའི་བློ་བཞག་སྟེ་སྐྱེས་བུ་རྣམས་ཀྱིས་གཟུང་བར་མཛོད་ཅེས་སོ། །དགེ་བའི་རྩ་བ་བསྔོ་བ་གསུངས་པ། རིམ་པ་ཅེས་བྱ་བ་ལ་སོགས་པའོ། །དེ་ལ་དཀྱིལ་འཁོར་བྲིས་དགེ་བ། །ཞེས་པ་ནི་གོ་རིམས་འབྲེལ་ཞིང་ཚར་བའི་བར་དུ་དཀྱིལ་འཁོར་གྱི་སྒྲུབ་པའི་ཐབས་བྲིས་པའི་དགེ་བ་ཁང་པ་དང༌། ཟླ་བའི་འོད་ལྟ་བུ་འདིས་འཇིག་རྟེན་པ་རྣམས་འཇམ་པའི་རྡོ་རྗེའི་གོ་འཕང་ཐོབ་པར་འགྱུར་ནས། དེའི་སྟོབས་ཀྱིས་བདག་ཀྱང་འཇམ་དཔལ་གྱི་གོ་འཕང་དམ་པ་ཟབ་མོ་རྒྱ་ཆེ་བ་མི་གཉིས་པ། འཁོར་བ་ཇི་སྲིད་ཡོད་པ་དེ་སྲིད་ཀྱི་བར་དུ་རོ་མྱང་ཚ་བའི་བདག་ཉིད་བརྒྱད་དང་ལྡན་པས་བཞུགས་པ་དེ་ལྟ་བུར་བདག་གི་རྒྱུད་ལ་དེ་ལྟ་བྱུང་བར་གྱུར་ཅིག་ཅེས་བསམས་པ་ལས་བྱུང་བའི་དགེ་བའི་རྩ་བ་བསྔོ་བའོ། །ད་ནི་རབ་ཏུ་བྱེད་པ་འདིའི་གཞུང་གི་ཤོག་ལོག་གི་ཚད་བསྟན་པའི་ཕྱིར་གསུངས་པ་ཚིག་བདུན་པའི་ཞེས་པ་ལ་སོགས་པའོ། །དེ་ལ་ཚིག་བདུན་པའི་ཚིགས་སུ་བཅད་པ་བཞི་བརྒྱ་དང་ལྔ་བཅུ་ཐམ་པ་སྟེ། དེའི་རབ་ཏུ་འབྱེད་པ་འདི་བསྒྲུབས་སོ་ཞེས་ཤེས་པར་བྱའོ། །དེ་དངོས་གང་ཞེ་ན་འཇིག་རྟེན་སྒྲོན་མ་
ཞེས་བྱ་སྟེ། དེ་ལ་འཇིག་རྟེན་ནི་སེམས་ཅན་རྣམས་ཏེ། དེ་ལ་དཔལ་གསང་བ་འདུས་པའི་དཀྱིལ་འཁོར་གྱི་འཁོར་ལོའི་དོན་གསེར་ལྟ་བུའི་ཤ་ལོ་ཀ་དེ་རྣམས་སྒྲོན་མ་ལྟ་བུས་སྟོན་པ་དེའི་ཕྱིར་ཏེ་དེ་ལ་དེ་སྐད་ཅེས་བྱའོ། །དཀྱིལ་འཁོར་སྒྲུབ་ཐབས་བརྩམས་པ་ཞེས་པ་ནི་གཟུགས་བརྙན་གྱི་དཀྱིལ་འཁོར་གྱི་སྒོ་ནས་ཐམས་ཅད་དེ་དཀྱིལ་འཁོར་གྱི་འཁོར་ལོ་མི་སྣང་བ་དེའི་ཕྱིར་ཐ་མལ་པའི་རྟོག་པས་བརྩམས་པ་མ་ཡིན་ནོ། །དེ་ཉིད་ཟབ་མོ་སྟེ། ཟབ་ནི་ཕན་འདོགས་པའི་རྒྱུ་མ་ཡིན་ནོ། །དེའི་ཡན་ལག་ཏུ་གྱུར་པ་སྟེ་སྣང་བའི་ཕྱིར་རོ། །དེ་ཡང་དག་པར་བསལ་བ་ནི་ཐ་མལ་པའི་རྟོག་པ་ཐམས་ཅད་རྣམ་པར་འཇོམས་པ་ཡིན་ནོ། །རྟོག་པ་ཐམས་ཅད་ལོག་པ་དེ་ཉིད་ཟབ་མོ་ཞེས་ཏེ། དད་པ་མེད་པ་མ་ཡིན་པའི་ཕྱིར་རོ། །དེ་བས་ན་ཡང་དག་པར་བསལ་བ་ཟབ་མོའི་དཀྱིལ་འཁོར་དེ་ཉིད་བསམ་པར་བྱས་ནས་གདོད་འབྲས་བུའི་སྐལ་བ་ཅན་དུ་གྱུར་ཏེ། གཞན་རྣམས་ཀྱིས་དེ་ལྟ་བུ་གྲུབ་པ་མ་ཡིན་ནོ་ཞེས་སོ། །དེ་བས་ཀུན་རྟོག་བཅོམ་ནས་སུ། །ཞེས་པ་ནི་ལམ་གྱི་རིམ་པ་གང་གིས་ཡང་དག་པ་མ་ཡིན་པ་རྣམས་བཅོམ་ནས། །ཀུན་དུ་འོད་ཟེར་འཕྲོ་ལྡན་པ། །ཞེས་ཏེ། ཆོས་དང་ཕྱོགས་ཀུན་ལ་འོད་ཟེར་ལྟར་ཁྱབ་པའི་འཁོར་ལོ་ཇི་ལྟ་བུ་ཞེ་ན་ཀུན་དུ་བཟང་པོ་ཞེས་ཏེ་སྐྱོན་གྱིས་གདོད་མ་ནས་མ་གོས་པའི་ཕྱིར་རོ། །དེ་བས་ན་གདོད་བྱང་ཆུབ་སྐལ་བ་དང་ལྡན་པར་འགྱུར་རོ་ཞེས་སོ། །ཐམས་ཅད་དེ་ཁོ་ནའི་རང་བཞིན་པའི་ཕྱིར་རོ། །དེ་བས་ན་དམ་པ་རྣམས་ཀྱི་ལམ་ཡིན་པར་གསུངས་པ། དེའི་ཕྱིར་ཞེས་པ་ལ་སོགས་པའོ། །དེའི་ཕྱིར་དཀྱིལ་འཁོར་འཁོར་ལོ་བསྟན། །ཞེས་པ་ནི་ཐབས་དེས་ཀྱང་བྱང་ཆུབ་ཀྱི་སྐལ་བར་འགྱུར་བ་དེའི་ཕྱིར་སྙིང་རྗེ་ཆེན་པོ་དང་ལྡན་པས་ཇི་སྐད་གསུངས་པའི་དཀྱིལ་འཁོར་གྱི་འཁོར་ལོ་བསྟན་པ་ཡིན་ནོ་ཞེས་སོ། །དེ་ཉིད་གསུངས་པ། ཆོས་དང་ལོངས་སྤྱོད་སྤྲུལ་པ་ནི། །ཞེས་པ་ནི་དྲན་པ་ཉེ་བར་གཞག་པ་ལ་སོགས་པ་དང༌། དེ་བཞིན་ཉིད་ནི་ཆོས་སྐུའོ། །མཚན་དང་དཔེ་བྱད་དུ་ལྡན་པ་གཙང་མ་ན་གནས་པ་ནི་ལོངས་སྤྱོད་རྫོགས་པའི་སྐུའོ།།
ཚངས་པ་ལ་སོགས་པའི་གཟུགས་ཇི་ལྟར་ཕན་པར་ཞུགས་པ་ནི་སྤྲུལ་པའི་སྐུའོ། །དེ་རྣམས་སྐུ་གསུང་ཐུགས་ཀྱི་གསང་བ་ནི་སྐུ་གསུམ་རིམ་པར་དག་ཅེས་ནི་གསང་བ་འདུས་པ་ལས་ཏེ། ཆོས་ཀྱི་སྐུ་རྣམ་པར་དག་པ་ཐུགས་ཀྱི་དཀྱིལ་འཁོར་རོ། །ལོངས་སྤྱོད་རྫོགས་པའི་སྐུ་རྣམ་པར་དག་པ་ནི་གསུང་གི་དཀྱིལ་འཁོར་རོ། །སྤྲུལ་པའི་སྐུ་རྣམ་པར་དག་པ་ནི་སྐུའི་དཀྱིལ་འཁོར་ཞེས་སོ། །དེ་བས་ན་འདི་ཉིད་མངོན་དུ་གྱུར་པས་ཐམས་ཅད་མདོར་བསྡུས་པར་གསུངས་པ་སྐུ་གསུམ་ཞེས་པ་ལ་སོགས་པའོ། །སྐུ་གསུམ་ཞེས་པ་ནི་གོང་མའི་དེ་ཉིད་དོ། །དེ་ཡི་ཁྱད་པར་ཡེ་ཤེས་ལྔ། །ཞེས་པ་ནི་མེ་ལོང་ལ་གཟུགས་བརྙན་སྣང་བ་བཞིན་དུ་སྣང་བ་མ་ལུས་པ་ཅིག་ཅར་སྣང་བ་བཞིན་དུ་བཅིངས་ཡོངས་སུ་ཤེས་པ་ནི་མེ་ལོང་ལྟ་བུའི་ཡེ་ཤེས་སོ། །སེམས་ཅན་ཐམས་ཅད་མཉམ་པའི་ཡེ་ཤེས་ཙམ་མོ། །ཞེས་པ་རྣམ་པ་གཅིག་ཏུ་རྟོགས་པ་ནི་མཉམ་པ་ཉིད་དོ། །ཕྱི་ནང་གི་སྣང་བ་རྣམས་སོ་སོར་རྣམ་པར་བརྟགས་ན་ཐམས་ཅད་དོ། །སངས་རྒྱས་པར་ཤེས་ནས་ཆོས་ཐམས་ཅད་ཀྱི་ཆ་འདི་དག་ཅེས་པདྨའི་འདབ་མ་བཞིན་རྟོག་ཅིང༌། རྟོག་པ་མེད་པ་ནི་སོ་སོར་རྟོག་པའོ།། བདག་དང་གཞན་གྱི་ལུས་ངག་ཡིད་ཀྱི་ལས་རྫོགས་པར་བྱེད་པ་བྱ་བ་གྲུབ་པའོ། །ལུས་ངག་ཡིད་ཀྱི་སྒྲིབ་པ་དང་གྲོལ་ཏེ། རྣམ་པར་རྟོག་པའི་བག་ཆགས་སྦྱངས་པ་ནི་ཆོས་ཀྱི་དབྱིངས་ཏེ་དེ་རྣམས་གོ་རིམས་བཞིན་དུ་འདིར་རྟག་པ་ལ་སོགས་པའོ། །དེ་རྣམས། འཁོར་ལོའི་རྣལ་འབྱོར་གྱིས་བསྒྲུབ་བྱ། །ཞེས་པ་ནི་དེ་དག་བླ་མ་དམ་པས་འབྲས་བུ་ཐོབ་པའི་སྔོམ་པ་བྱིན་ནས། དེ་ལ་བསྟེན་ནས་དཀྱིལ་འཁོར་དེ་བསྒྲུབ་ཅེས་སོ། །དེའི་འབྲས་བུ་ནི། རྣམ་པ་ཐམས་ཅད་མཁྱེན་པ་འགྲུབ། །ཅེས་རྡོ་རྗེ་འཛིན་པ་ཆེན་པོ་ཤེས་བྱའི་རྣམ་པ་ཐམས་ཅད་མཁྱེན་པ། དེ་ལྟ་བུ་གྲུབ་ནས་མ་གྲུབ་པ་ཞེས་གང་ཡང་མེད་ཅེས་ཏེ། རིག་འཛིན་ལ་སོགས་པའོ། །ས་འོག་མ་པ་རྣམས་ཀྱིས་སངས་རྒྱས་ལ་སོགས་པ་ཡང་རྩོམ་པ་མེད་པར་ཐོབ་པོ་ཞེས་གསུངས་པས་སངས་
རྒྱས་ལ་སོགས་པའོ། །སངས་རྒྱས་ཞེས་པ་ནི་ས་འོག་མ་པའིའོ། །ཕྱི་རོལ་ཕྱིན་འགྲུབ་ཅེས་པ་ནི་སྦྱིན་པ་ལ་སོགས་པའོ། །གཟུང་དང་ཞེས་པ་ནི་ཚིག་གཟུང་བ་ལ་སོགས་པའོ། །ས་རྣམས་ཞེས་བྱ་བ་ནི་རབ་ཏུ་དགའ་བ་ལ་སོགས་པ་སྟེ་དེ་རྣམས་ཀྱང༌། བདེ་ཆེན་ཐེག་པ་འདི་ལས་ནི། །ཞེས་པ་ནི་དཀའ་ཐུབ་ལ་སོགས་སློང་བའི་བདེ་བ་དེ་ཉིད་ཀྱིས་གོ་འཕང་དམ་པ་ཐོབ་པའི་ཐེག་པ་འདི་ལས་ཞེས་སོ། །སོ་སོར་རང་ཡིད་རྗེས་ལས་འགྲུབ། །ཅེས་པ་སྟེ་འབད་པ་དང་རྩོལ་བ་མེད་པ་ཁོ་ན་བདེ་བ་ཆེན་པོའི་གོ་འཕང་ཁོ་ནར་རྟོགས་པའི་སྟོབས་ཀྱིས་ཐམས་ཅད་འགྲུབ་པ་ལ་ཐོགས་པ་མེད་ཅེས་སོ། །མཐར་ཐུག་པ་དེ་ཉིད་རྟོགས་པའི་ཕྱིར་རོ། །ད་ནི་དེ་ཁོ་ན་ལ་བརྟན་པོར་བྱས་པ་གསུངས་པ་དེ་ལྟར་ཞེས་པ་ལ་སོགས་པའོ། །དེ་ལྟར་དཔལ་དང་ལྡན་པའི་རྣལ་འབྱོར་པ་ཆེན་པོས་དེའི་དོན་ཤེས་པར་བྱས་ནས། །རང་ཉིད་ཆོས་ནི་འཕགས་པའི་ལུས། །ཞེས་པ་ནི་རང་གི་གཟུགས་ལ་སོགས་པའི་ཆོས་ཐམས་ཅད་རྟག་པ་ལ་སོགས་པའི་འཕགས་པ་འདུས་པའི་རང་བཞིན་རྙེད་པ་ནི་དེའི་སྒྲུབ་པའི་ཐབས་རྙེད་དོ། །བརྩམས་སོ་ཞེས་གཞན་རྣམས་ཀྱང་མ་བསྟན་པ་མ་ཡིན་མོད་ཀྱི་དེའི་ཡན་ལག་ཏུ་གྱུར་པའི་ཕྱིར་རོ། །སངས་རྒྱས་ཡེ་ཤེས་ཞབས་ཀྱི་གཞུང་ལུགས་གསལ་ཚིག་ནི། །བླ་མ་དམ་པ་བཟང་པོའི་ཞབས་ཀྱིས་རྣམ་པར་བཤད། །དེ་ཟེར་རིམ་པས་དམན་པའི་ཞལ་ལ་ཅུང་ཟད་ཕོག །དེ་བས་འདི་ནི་དོན་ཡོད་བསམས་ནས་རྣམ་པར་བཤད། དེ་ལས་གྱུར་པ་དགེ་བ་ཟླ་འདྲ་དེ་ཡིས་ནི། །འཇིག་རྟེན་མ་ལུས་འདི་རྣམས་མ་རིག་བསལ་བྱས་ཏེ། །སྐྱེ་བའི་རྒྱ་མཚོ་ལས་གྲོལ་དཀྱིལ་འཁོར་གྱི། འཁོར་ལོའི་ལམ་གྱིས་རྡོ་རྗེ་འཛིན་པའི་ས་ལ་གནས་གྱུར་ཅིག །དཔལ་གསད་བ་འདུས་པའི་དཀྱིལ་འཁོར་གྱི་སྒྲུབ་པའི་ཐབས་འཇིག་རྟེན་སྣང་བྱེད་ཅེས་བྱ་བའི་རྣམ་པར་བཤད་པ་སློབ་དཔོན་ཆེན་པོ་བི་ཏ་པཱ་དས་མཛད་པ་རྫོགས་སོ།། །།རྒྱ་གར་གྱི་མཁན་པོ་ཀ་མ་ལ་གུ་ཧྱ་དང་ཞུ་ཆེན་གྱི་ལོ་ཙཱ་བ་མངའ་བདག་ཡེ་ཤེས་རྒྱལ་མཚན་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།