སོ་སོའི་མངོན་པར་རྟོགས་པ་ལས་ཐོག་མར་རྫོགས་པའི་རིམ་པའི་རྟེན་བསྐྱེད་པའི་རིམ་པ།
ད་ནི་སོ་སོའི་མངོན་པར་རྟོགས་པ་ལས་ཐོག་མར་རྫོགས་པའི་རིམ་པའི་རྟེན་བསྐྱེད་པའི་རིམ་པ་བརྗོད་ན་ལྔ། བསྐྱེད་པའི་རིམ་པ་བསྒོམ་པའི་གང་ཟག་དང་། གནས་དང་། དུས་དང་། བསམ་པ་དང་། ལྷའི་རྣལ་འབྱོར་རོ། །དང་པོ་ནི་དབང་ཐོབ་ཅིང་དམ་ཚིག་དང་ལྡན་པའོ། །གནས་ནི་གསུམ་ལས་ཏེ། ལས་དང་པོ་པའི་གནས་དང་། ཅུང་ཟད་བརྟན་པ་དང་། བརྟན་པ་ཆེར་ཐོབ་པའི་གནས་སོ། །དང་པོ་ནི་རྩ་རྒྱུད་ཕྱི་མའི་གཉིས་པ་ལས། ལས་དང་པོ་པས་གོམས་པར་བྱེད་དུས་ཀྱི། །སྒྲུབ་པའི་གནས་ནི་གང་དུ་བསྔགས་པའི་སེམས་དང་མཐུན་ཞིང་། །གཅིག་ཏུ་མཉམ་གཞག་འགྲུབ་འགྱུར་བའི་མཐུན་རྐྱེན་ཚང་བའི། །གནས་ནི་བཟང་པོ་ངེས་པར་བརྟག །རང་གི་ཁྱིམ་དུ་ཞེས་བྱ་བ་དང་། རྡོ་རྗེ་གུར་ལས་ཀྱང་། ཆུ་དང་འབྲས་བུས་བརྒྱན་པ་ཡི། །ནགས་ཚལ་ཆེན་པོའི་གནས་སུ་ནི། །ཞེས་བྱ་བ་ལ་སོགས་པ་གསུངས་སོ། །སེམས་ཅུང་ཟད་བརྟན་པའི་གནས་ནི་དུར་ཁྲོད་ཡིན་ནོ། །བརྟན་པ་ཆེར་ཐོབ་པའི་གནས་ནི་རིགས་དང་རྗེས་སུ་མཐུན་པའི་གནས་ཏེ། རྡོ་རྗེ་གུར་ལེའུ་གཉིས་༼བཞི༷་༽པ་ལས། སྙིང་རྗེ་ཆེན་པོ་ཀྱེ་རྡོ་རྗེ། །ང་ནི་དུར་ཁྲོད་ཆུ་འགྲམ་དང་། །ནགས་ཚལ་ཆེན་པོའི་འགྲམ་དུ་ནི། །བསྙེན་བཀུར་ཅན་སྒྲུབ་པ་པོ་ལ་དངོས་གྲུབ་སྟེར། །ཞེས་བྱ་བ་ལ་སོགས་པ་གསུངས་སོ། །གནས་དེ་དག་ཀྱང་ལས་དང་པོ་པའི་གནས་ནི་དབེན་པ་དང་། ཡིད་དང་མཐུན་པ་དང་། རང་གི་ཁྱིམ་དང་། བཀྲ་ཤིས་པ་དང་བཞི་ཡིན་ལ། ཅུང་ཟད་བརྟན་པའི་གནས་ནི་བརྩོན་འགྲུས་རྩོམ་པའི་གནས་ཡིན་ལ། བརྟན་པ་ཆེར་ཐོབ་པའི་གནས་ནི་ངེས་པ་མེད་པ་ཡིན་ནོ། །གསུམ་པ་དུས་ལ་ཡང་གསུམ་སྟེ། ལས་དང་པོ་པའི་བསྒོམ་པའི་དུས་ནི་རྣམ་རྟོག་གི་འདུ་འཕྲོ་ཉུང་བའི་རྟེན་འབྲེལ་ཡིན་པས། རྩ་རྒྱུད་ཕྱི་མའི་གཉིས་པ་ལས། མཚན་དུས་སུ་ཞེས་གསུངས་སོ། །ཅུང་ཟད་བརྟན་པའི་དུས་ནི་ཐུན་བཞིའི་དུས་སུ། བརྟན་པ་ཆེར་ཐོབ་པ་ནི་དུས་ཐམས་ཅད་དུ་བསྒོམ་སྟེ། རྩ་རྒྱུད་ཕྱི་མའི་གཉིས་པ་ལས། རྐང་པ་འཁྲུད་དང་ཟ་བ་དང་། །འཐོར་འཐུང་གིས་ཁ་བཤལ་བ་དང་སོ་རྩི་གོ་ལ་སོགས་ཟ་བ་དང་། །ཙནྡན་གྱིས་ཕྱེ་མས་ནི་ལག་པ་ཉེད་པ་དང་། །སྨད་གཡོགས་ཀྱིས་ནི་རྐེད་འགེབས་དང་། །ཕྱིར་འབྱུང་བ་དང་སྨྲ་དང་འགྲོ་བ་དང་། །འདུག་དང་ཁྲོ་བ་དང་རྩེ་ཞིང་དགོད་པ་དང་། །བཅོམ་ལྡན་འདས་མ་བརྟེན་པ་དང་མདོར་ན་དུས་ཐམས་ཅད་དུ། །ཤེས་རབ་དང་ལྡན་ཞིང་བརྟུལ་ཞུགས་ཅན་ཉིད་ཀྱིས། །རྣལ་འབྱོར་མ་ནི་རྣམ་པར་བསྒོམ། །ཞེས་གསུངས་སོ། །བཞི་པ་བསམ་པ་ནི་བདག་སེམས་ཅན་ཐམས་ཅད་ཀྱི་དོན་དུ་སངས་རྒྱས་འདོད་པ་སྟེ། རྩ་རྒྱུད་ཕྱི་མའི་གཉིས་པ་ལས། བདག་ཉིད་གྲུབ་པའི་སེམས་ཀྱིས་ནི། །རྣལ་འབྱོར་མ་བདག་མེད་མ་བསྒོམ་མོ་ཤེས་རབ་ཅན། །ཡང་ན་ཧེ་རུ་ཀ་དཔལ་གཟུགས། །ཞེས་གསུངས་སོ། །ལྔ་པ་ལྷའི་རྣལ་འབྱོར་ནི་སྤྱིར་མཆོག་གི་དངོས་གྲུབ་བསྒྲུབ་པ་དང་། ཐུན་མོང་གི་དངོས་གྲུབ་བསྒྲུབ་པའི་ལྷའི་རྣལ་འབྱོར་གཉིས་སུ་གསུངས་པའི་ཐུན་མོང་གི་དངོས་གྲུབ་ཀྱི་ལྷའི་རྣལ་འབྱོར་རྣམས་ལས་ཀྱི་ཚོགས་རབ་འབྱམས་ཀྱི་སྐབས་སུ་འབྱུང་བ་ཡིན་ནའང་གཟུང་བདེ་བས་འདིར་ཕྱོགས་གཅིག་ཏུ་བརྗོད་དེ། དེ་ལ་ལྷའི་རྣལ་འབྱོར་ལ་གཉིས་ཏེ། ལྷའི་རྣམ་པ་དང་། མངོན་པར་རྟོགས་པའོ། །དང་པོ་ལ་གཉིས་ཏེ། གཙོ་བོར་མཆོག་བསྒྲུབ་པའི་དཀྱིལ་འཁོར་དང་། ལས་རྒྱས་པའི་ལྷའི་རྣལ་འབྱོར་རོ། །དང་པོ་ནི་རྩ་བའི་རྒྱུད་ལས། ཧེ་རུ་ཀ་བཞི་བདག་མེད་མ་དང་ལྔ། དྲུག་པ་རྡོ་རྗེ་འཛིན་པ་དང་དྲུག་འབྱུང་ངོ་། །རྡོ་རྗ་གུར་ལས། རིགས་བསྡུས་པ་དང་རྐྱང་པ་གཉིས། བསྡུས་པ་ལ་རྒྱས་པ་དང་བསྡུས་པ་གཉིས་འབྱུང་སྟེ། ལེའུ་ལྔ་པ་ལས། དཀྱིལ་འཁོར་རེ་རེ་སྟེ་རིགས་རྐྱང་བསྒོམ་པའམ། །ཡང་ན་རིགས་ལྔ་དབུས་སུ་བཞུགས་པའི་བསྡུས་པའི་དཀྱིལ་འཁོར་རོ། །ལྷ་མོ་བརྒྱད་བརྒྱད་ཀྱི་དབུས་སུ་གནས་པའམ། །ཡང་ན་བཞི་བཞིའི་དབུས་སུ་གནས་པ་ལྷ་ལྔ་ལ་ལྔ་སྟེ་ཉི་ཤུ་རྩ་ལྔའི་བར། །གང་ཚེ་དཀྱིལ་འཁོར་རིགས་བསྡུས་པ་རྒྱས་བསྡུས་གཉིས་ཀ་ཡི། །སྒོར་ནི་ལྕགས་ཀྱུ་ཞགས་པ་དང་། །ལྕགས་སྒྲོག་དེ་བཞིན་དྲིལ་བུ་དང་། །འཇུག་པའི་སྒོ་སྲུང་དགོད་པར་བྱ། །ཞེས་གསུངས་སོ། །རིགས་བསྡུས་པའི་ཕྱོགས་གཉིས་ཀྱང་གཙོ་བོ་འཕོ་བའི་གནད་ཀྱིས་དཀྱིལ་འཁོར་ལྔ་ལྔར་འགྱུར་ཏེ། དེ་ཉིད་ལས། སངས་རྒྱས་མགོན་པོ་མི་བསྐྱོད་པ་སོགས་གང་ཉིད་ཀྱིས། །དབུས་སུ་དཀྱིལ་འཁོར་གྱི་གཙོ་འཁོར་གང་བྱུང་བར་གྱུར་པ། །དེ་ཉིད་ཀྱི་ནི་མིང་གི་དཀྱིལ་འཁོར་བརྗོད། །སྙིང་པོ་བདེ་བ་ཆེན་པོ་ཡོངས་སུ་བཟུང་བའམ་ལེན་པས་དཀྱིལ་འཁོར་རོ། །ཞེས་གསུངས་སོ། །དེ་ལྟར་ན་རྒྱུད་ལས། དངོས་སུ་དཀྱིལ་འཁོར་གྱི་གྲངས་རྐྱང་པ་ལྔ་དང་། བསྡུས་པའི་རྒྱས་པ་ལྔ། བསྡུས་པ་ལྔ་སྟེ་བཅོ་ལྔ་རྩ་བའི་རྒྱུད་ཀྱི་དཀྱིལ་འཁོར་ཁ་བསྐངས་ནས་ཧེ་རུ་ཀ་གསུམ་སྟེ་བཅོ་བརྒྱད་རྗེ་བཙུན་མའི་སྒྲུབ་ཐབས་གཉིས་ཏེ་ཉི་ཤུ་ཐམ་པ་འབྱུང་བ་ལ། བླ་མའི་མན་ངག་གིས་དཀྱིལ་འཁོར་དྲུག་ཅུ་རྩ་གཉིས་སུ་བྱེད་དོ་༼དེ༷། ༽མི་བསྐྱོད་པ་ལ་ཧེ་རུ་ཀ་བཞི་ཡོད་པ་དེ་བཞིན་དུ་རིགས་གཞན་རྣམས་ལའང་བཞི་བཞིར་བྱས་ཏེ། དེ་ལྟར་ན་རིགས་རྐྱང་པའི་སྒྲུབ་ཐབས་ཉི་ཤུ། བསྡུས་པའི་རྒྱས་པ་ལ་ཉི་ཤུ། བསྡུས་པའི་བསྡུས་པ་ལ་ཉི་ཤུ། རྗེ་བཙུན་མའི་གཉིས་ཏེ་དྲུག་ཅུ་རྩ་གཉིས་སུ་བཞེད་དོ། །སཾ་པུ་ཊ་ལས། མཆོག་བསྒྲུབ་པའི་དཀྱིལ་འཁོར་གཞུང་ལས་བརྒྱད་འབྱུང་སྟེ། ཧེ་རུ་ཀ་བཞི། བདག་མེད་མ། ཡེ་ཤེས་མཁའ་འགྲོ་མ་ལྷ་བཅུ་གསུམ་དང་། བསྡུས་པའི་དཀྱིལ་འཁོར་རྡོ་རྗེ་དབྱིངས་དང་། དྲག་པོའི་གདན་ཅན་ལྷ་བཅུ་བདུན་ནོ། །དེ་ལ་བླ་མའི་མན་ངག་དང་བརྟག་པ་བདུན་པ་དངོས་ལས། གང་གི་ཡང་༼ག༷ང་༽ཡང་འི་འཁོར་ལོའི་དབུས་སུ་བཅུག་པ་དེའི་མཚན་དུ་བསྟན་པར་གྱུར་པའི་རྡོ་རྗེའི་དཀྱིལ་འཁོར་ནི་མཁས་པས་བསྔགས་སོ་ཞེས་གསུངས་པས། རྡོ་རྗེ་དབྱིངས་ལ་གཙོ་བོ་འཕོ་བའི་གནད་ཀྱིས་དཀྱིལ་འཁོར་ཆེན་པོ་ལྔ་རུ་བྱས་ཏེ། དེ་ལྟར་ན་མཆོག་བསྒྲུབ་པའི་དཀྱིལ་འཁོར་བཅུ་གཉིས་སོ། །འོ་ན་གཙོ་བོ་དུ་མ་འཕོ་བས་དཀྱིལ་འཁོར་དེ་བས་ཀྱང་མང་བར་མི་འགྱུར་རམ་སྙམ་ན། རིགས་ལྔ་ལས་ལྷག་པའི་གཙོ་བོ་གཞན་ནི་མི་བཞེད་དེ། ལྷ་གཞན་ནི་ལས་རྒྱས་པའི་ལྷ་ཞེས་བྱ་བར་འགྱུར་ཏེ། བརྟག་པ་བདུན་པ་དངོས་ལས། ཞི་བ་དང་། རྒྱས་པ་དང་། དབང་དང་། མངོན་སྤྱོད་ཀྱི་ལས་རྣམས་ལ་འཁོར་ལོའི་བདག་པོས་༼པོའི༷་༽རྒྱལ་པོ་༼མོ༷་༽རྣམ་པར་སྒོམ་པར་བྱེད་དོ་ཞེས་གསུངས་སོ། །གཉིས་པ་ལས་རྒྱས་པའི་ལྷའི་རྣལ་འབྱོར་ནི། རྩ་བའི་རྒྱུད་ལས། ཀུ་རུ་ཀུལླེ་དང་། དྲག་པོའི་སྔགས་བདུན་གསུངས། རྡོ་རྗེ་གུར་གྱི་ལེའུ་གཉིས་པ་ལས། འབྱུང་པོ་འདུལ་བ་དང་། སྟོབས་པོ་ཆེ་གཉིས། བཞི་པ་ལས་ཁྲོ་བོ་བཅུ། བརྒྱད་པ་ལས་སྒྲོལ་མ་དང་། ཤེས་རབ་ཕ་རོལ་ཕྱིན་མ། བཅུ་གཉིས་པ་ལས་ཁྲོ་བཅུ་སྤྱིའི་སྲུང་འཁོར། བཅུ་བཞི་པ་ལས་རྡོ་རྗེ་ལུས་མེད། བཅོ་ལྔ་པ་ལས་ཀུ་རུ་ཀུལླེ་དང་། སྤྱན་རས་གཟིགས་ལ་སོགས་པ་ལྷའི་རྣལ་འབྱོར་བཅུ། རྡོ་རྗེ་ནག་པོ་རྣམས་ཏེ། དེ་ལྟར་ན་ལས་རྒྱས་པའི་ལྷའི་རྣལ་འབྱོར་ཉི་ཤུ་རྩ་བརྒྱད་གསུངས་སོ། །བཤད་པའི་རྒྱུད་སཾ་པུ་ཊའི་བརྟག་པ་གཉིས་པའི་རབ་བྱེད་བཞི་པ་ལས་སྒྲོལ་མ་དང་། ཀུ་རུ་ཀུལླེ། ཤེས་རབ་ཀྱི་ཕ་རོལ་ཏུ་ཕྱིན་མ། རིགས་བཞི་དང་ཡུམ་བཞི་དང་བརྒྱད། བདུན་པ་དངོས་ནས་ལས་ཚོགས་དང་འབྲེལ་བའི་ལྷའི་རྣལ་འབྱོར་བཅུ་བདུན་ཏེ། དེ་ལྟར་ན་ལྷའི་རྣལ་འབྱོར་ཉི་ཤུ་རྩ་བརྒྱད་གསུངས་སོ། །སཾ་པུ་ཊའི་ལྔ་པའི་གཉིས་པ་ལས། རྫོགས་རིམ་དང་འབྲེལ་བ་དང་ཕྲེང་བ་དང་འབྲེལ་བ་ལས་ལྷའི་རྣལ་འབྱོར་གཉིས་ཀྱང་འབྱུང་ངོ་། །འོ་ན་སཾ་བུ་ཊའི་བདག་མེད་མའི་སྐབས་ཀྱི་དྲུག་པ་རྡོ་རྗེ་འཛིན་པ་མི་བགྲང་ངམ་སྙམ་ན། རྡོ་རྗེ་དབྱིངས་ཀྱི་ཁོངས་སུ་བསྡུ་བས་དེ་ནི་མི་བགྲང་ངོ་། །