བྱང་གཏེར་གྱི་ཕུར་པ་ཁྲོ་བོ་རོལ་པའི་གཏོར་བཟློག་བདུད་སྡེ་ཕྱེར་འཐག
བྱང་གཏེར་གྱི་ཕུར་པ་ཁྲོ་བོ་རོལ་པའི་གཏོར་བཟློག་བདུད་སྡེ་ཕྱེར་འཐག་བཞུགས་སོ། །
སྒེག་དང་དཔའ་བ་མི་སྡུག་ཉམས་ཀྱི་སྲིད་གསུམ་མ་ལུས་གཡོ་མཛད་ཅིང་། །རྒོད་དང་དྲག་ཤུལ་འཇིགས་རུང་གསུང་གིས་དགྲ་བགེགས་སྙིང་ལ་འཇིགས་པ་སྟེར། །རྔམས་དང་སྙིང་རྗེ་ཞི་བའི་ཐུགས་ཀྱིས་འགྲོ་རྣམས་བདེ་བ་ཆེ་ལ་སྦྱོར། ཁྲག་འཐུང་དཀྱིལ་འཁོར་རྒྱ་མཚོའི་བདག་ཉིད་དཔལ་ཆེན་ཕུར་བུས་རྟག་ཏུ་སྐྱོངས། །རྒྱལ་དབང་པདྨའི་ཞལ་ལུང་བདུད་རྩིའི་རྒྱུན། །ཐུགས་ཀྱི་བུམ་པར་ལེགས་གཏམས་མཁར་ཆེན་བཟའི། །འཕྲིན་ལས་སྒྲུབ་པའི་ཡང་ཟབ་གོང་ཁུག་མ། །ལུགས་གསུམ་ཕུར་པར་ཡོངས་གྲགས་ལྷ་བྲག་གཏེར། །གང་དེའི་ལུགས་འཛིན་ནུབ་དགོན་ཆོས་རྗེ་དང་། །པདྨའི་གདུང་གསོབ་རིགས་འཛིན་མངའ་རིས་པའི། །གདམས་པའི་ཆུ་བོ་གཅིག་འདྲེས་བྱང་པ་རྗེ། །བརྒྱུད་པར་བཅས་པའི་རིག་སྔགས་འཆང་རྣམས་རྒྱལ། ཁྱད་པར་ཀུན་བཟང་ཆེ་མཆོག་ཧེ་རུ་ཀ༔། །ཐེག་མཆོག་ཆོས་ཀྱི་བདག་པོའི་ཟློས་གར་ཅན། །བཀའ་དྲིན་མཉམ་མེད་རྗེ་བཙུན་ཨཱ་ནནྡ། ཁྱོད་ཀྱི་མཁྱེན་བརྩེ་ནུས་པས་རྟག་ཏུ་སྐྱོངས། །འཕྲིན་ལས་དྲག་པོ་ཀརྨ་ཧེ་རུ་ཀའི། །དམར་ཆེན་ཁྲོ་བོ་རོལ་པའི་གཏོར་བཟློག་གི །ལས་གཞུང་བདུད་སྡེ་ཕྱེར་འཐག་འདྲི་བྱེད་ན། །ཀྭ་ཡེ་བདུད་སྡེའི་ཚོགས་རྣམས་བག་ཡོད་བྱོས། །དེ་ལ་(༢ན)
འདིར་བྱང་གཏེར་གྱི་ལྕགས་མཛོད་ནག་པོའི་ཆོས་སྡེ་ལས་བྱུང་བའི་ཕུར་པ་ལ་བརྟེན་པའི་ཁྲོ་བོ་རོལ་པའི་གཏོར་བཟློག་གི་སྒོ་ནས། ཕ་རོལ་མི་བསྲུན་དགྲ་བགེགས་ཀྱི་དཔུང་ཚོགས་མཐུ་སྟོབས་ཕྱེ་མར་འཐག་པའི་ལས་རིམ་ལ། གཏེར་གཞུང་ལས། བཛྲ་ཀུ་མ་ར་ལ་ན་མོ༔ ཁྲོ་བོ་རོལ་པའི་གཏོར་བཟློག་བྱེད་པར་འདོད་པས༔ སྦྱོར་བ་དངོས་གཞི་རྗེས་དང་གསུམ་ལས༔ དང་པོ་དཀྱིལ་འཁོར་བཤམ་པ་ནི༔ མཎྜལ་མདའ་གང་གྲུ་བཞིའམ། ཅི་རིགས་བཤམས་པ་ལ༔ འཁོར་ལོ་སེར་པོ་རྩིབས་བཅུ་པ་མུ་ཁྱུད་ནག་པོ་རྡོ་ར་མེ་རི་དང་བཅས་པའམ༔ ཡང་ན་ལྟེ་བའི་ཕྱི་རོལ་ནས༔ གྲུ་གསུམ་རྩེ་མོ་དབུས་སུ་བསྟན་པ༔ རྡོ་ར་མེ་རི་དང་བཅས་པ་བྲིས་པའི་སྟེང་དུ་མནྫིའི་ཁར་དཔལ་གཏོར་བཅུ་གཅིག་རྒྱན་དང་བཅས་པ་བཤམ༔ གཙོ་བོ་དང་ཁྲོ་བཅུའི་ཙཀླི་འཛུགས༔ འོག་ཏུ་དགྲ་བགེགས་ཀྱི་ལིངྒ་རེ་བཞག༔ ཕྱི་རོལ་དུ་ཐུན་མོང་གི་མཆོད་པ་དང་༔ ནང་དུ་ཁྱད་པར་གྱི་མཆོད་པ་བཤམ༔ རཀྟ་གཡས་ཏེ་བདུད་རྩི་གཡོན། བསྙེན་ཕུར་མདུན། སྐུའི་རྟེན་བཀྲམ༔ རོལ་མོའི་ཆ་བྱད༔ གསུར་ཆེན་སོགས་གང་དགོས་བཤམ༔ ཆོས་སྐྱོང་གང་བྱེད་དང་གཞི་བདག་སོགས་ཀྱི་གཏོར་མ་གང་བདེར་བཞག་གོ །གཉིས་པ་དངོས་གཞི་ལ༔ གསེར་(༢བ)
སྐྱེམས་རྒྱས་པར་བཏང་༔ གནས་དང་ཡོ་བྱད་རོལ་མོས་བྱིན་ཕབ་པ༔ སྐྱབས་འགྲོ་ནས་བཟུང་སྟེ་ཡི་དམ་ཕུར་པ་གཞུང་བགྲངས་ཏེ༔ རིགས་འཛིན་བསྐུལ་པ་ཡན་གྲུབ་པའི་རྗེས་ལ་ཆོས་སྐྱོང་གི་བསྐུལ་དང་ཚོགས་ཐ་མ་ཡན་ཆོད་བྱས་ལ༔ རྣལ་འབྱོར་པ་རྣམས་ཚོགས་ལ་རོལ༔ གཙོ་བོའི་གཏོར་མ་མ་གཏོགས་གཞན་རྣམས་ཁྱེར། མདའ་ཟོར། ཁྲག་ཟོར། ཡུངས་ཟོར་སོགས་འཕེན་མཁན་སྐྱེས་པ་བུད་མེད་སྟག་ཆས་ཅན་བྱས་ལ༔ གཏོར་ཚོགས་དཀར་པོའམ༔ དགྲ་ཕྱོགས་སུ་ཁྱེར་ལ། ཟོར་མཁན་ཆས་ཀྱིས་བརྒྱན་པ་དང་༔ རྡོ་རྗེ་སློབ་དཔོན་ལྷའི་ང་རྒྱལ་དང་ལྡན་པས་རྔ་བརྡུང་ཞིང་རྔམ་དབྱངས་དང་བཅས་པས་འདི་སྐད་དོ༔ ཞེས་བྱུང་བའི་སྦྱོར་དངོས་མཇུག་གསུམ་གྱི། དང་པོ་སྦྱོར་བ་ལ། དཀྱིལ་འཁོར་གཏོར་མ། ཟོར། ཕྱི་ནང་གི་མཆོད་པ་སོགས་ཕྲ་རགས་རྣམས་མཐོང་བརྒྱུད་ཀྱི་ཕྱག་ལེན་ལྟར་བཤམ། དངོས་གཞི་ལས་བྱང་གཞུང་བསྲངས། ཚོགས་ཐ་མ་ཡན་མདོར་བསྡུས་ཙམ་དང་བཅས་སོང་གྲུབ་ནས། འཕྲིན་ལས་འཆོལ་བ་ནི། ཧཱུཾ། མི་མངོན་དབྱིངས་ན་བཞུགས་པའི་རྒྱལ་བ་ཞི་ཁྲོའི་ཚོགས༔ ཨཱཿབཞེངས་ཤིག་བཞེངས་ཤིག་ཆོས་ཀྱི་དབྱིངས་ནས་བཞེངས། །ཨཱོཾ་བསྐུལ་ལོ་བསྐུལ་ལོ་འགྲོ་བའི་དོན་དུ་བསྐུལ། །ཧྲཱིཿམཛོད་ཅིག་མཛོད་ཅིག་བཅོལ་བའི་འཕྲིན་ལས་མཛོད། །ཧཱུཾ་ཕུར་པ་རོལ་པའི་དུར་ཁྲོད་ཆེན་པོ་ནས། །ལྗང་ནག་གྲུ་གསུམ་ལྷ་ཆེན་བསྣོལ་བའི་སྟེང་། །སྣང་སྲིད་ཕུར་པས་འདེབས་པའི་ལྷ་ཚོགས་ནི། །བཅོམ་ལྡན་དཔལ་ཆེན་རྡོ་རྗེ་གཞོན་ནུ་དང་། །གཉིས་མེད་ཡུམ་ཆེན་འཁོར་ལོ་རྒྱས་འདེབས་མ། །སྐུ་གསུང་ཐུགས་སྲས་སྲས་མཆོག་ཉི་ཤུ་གཅིག །བདུད་འདུལ་མཐུ་ཆེན་ཁྲོ་རྒྱལ་ཡབ་ཡུམ་བཅུ། །ཟ་བྱེད་ཁྲ་ཐབས་ཕྱག་བརྙན་ཉི་ཤུ་དང་། །བསྟན་སྐྱོང་(༣ན)
ཆེན་མོ་ཤ་ན་མཆེད་བཞི་དང་། །བདག་ཉིད་ཆེན་མོ་རེ་ཏཱི་མཆེད་བཞི་དང་། །ས་བདག་ཆེན་མོ་བསེ་ཡི་ལྷ་མོ་བཞི། །བསེ་ལྕགས་དུང་གསུམ་དགེ་བསྙེན་ཉི་ཤུ་གཅིག །མ་བདུན་སྲིད་བཞི་དབང་ཕྱུག་ཉི་ཤུ་བརྒྱད། །ཕུར་པ་འཕྲིན་ལས་ལྷ་ཚོགས་ཐུགས་དམ་ཅན། །མི་མངོན་དབྱིངས་ནས་གནས་འདིར་སྐུ་སྐྱོད་ལ། །དམ་རྫས་བདུད་རྩི་འབར་བ་འདི་བཞེས་ལ། །ཐུགས་དམ་རྒྱུད་བསྐུལ་བཅོལ་བའི་འཕྲིན་ལས་མཛོད། །བཅོམ་ལྡན་རྡོ་རྗེ་གཞོན་ནུའི་སྐུ༔ ཡུམ་ཆེན་འཁོར་ལོ་རྒྱས་འདེབས་གཉིས༔ ཡབ་ཡུམ་ཐབས་ཤེས་རོལ་པ་ལས༔ ཁྲོ་བོའི་ཚོགས་བཅས་བསྐོར་བ་ནི༔ སྟེང་གི་ཕྱོགས་ཀྱི་ཁྲོ་བོ་ནི༔ ཁྲོ་བོ་ཆེན་པོ་ཧཱུཾ་ཀཱ་ར༔ སྐུ་མདོག་སྔོན་པོ་འཇིགས་ཆེན་པོ༔ དབུ་གསུམ་ཕྱག་དྲུག་ཞབས་བཞི་བགྲད༔ གཡས་དཀར་གཡོན་དམར་དབུས་ཞལ་སྔོ༔ སྤྱན་གསུམ་ཞལ་བགྲད་མཆེ་བ་གཙིགས༔ དབུ་སྐྲ་ཁམ་ནག་གྱེན་དུ་བརྫེས༔ རྩ་ཕྱག་རྡོ་རྗེ་ཐོད་ཁྲག་དང་༔ བར་པ་རྡོ་རྗེ་དྲིལ་བུ་བསྣམས༔ ཐ་མ་ཕུར་བསྒྲིལ་དགྲ་བགེགས་གཟིར༔ ཁྲོ་བོའི་གར་དགུའི་ཉམས་དང་ལྡན༔ རྡོ་རྗེ་གཤོག་པས་བར་སྣང་ཁྱབ༔ དུར་ཁྲོད་ཆས་བརྒྱད་སྐུ་ལ་རྫོགས༔ ཞབས་གཉིས་ཚངས་པ་ཕོ་མོ་གནོན༔ མེ་དཔུང་འབར་བའི་ཀློང་ན་བཞུགས༔ རྡོ་རྗེ་སྒྲ་འབྱིན་སྐུ་ལ་འཁྲིལ༔ ཕྲ་མེན་ཕག་དང་རྨིགས་བུའི་མགོ༔ སྤྲུལ་པ་ཡང་སྤྲུལ་ཚོགས་དང་བཅས༔ འདིར་གཤེགས་རྒྱན་གྱི་གཏོར་མ་བཞེས༔ ཤ་ཁྲག་གཏོར་མ་འདི་བཞེས་ལ༔ བདག་ཅག་ཡོན་མཆོད་འཁོར་བཅས་ཀྱི༔ སྟེང་གི་ཕྱོགས་ནས་དགྲ་དང་བགེགས༔ ཧཱུཾ་མཛད་རྒྱལ་པོ་ཉིད་ཀྱིས་བཟློག༔ བཟློག་གོ་དམར་ཆེན་གཏོར་མས་བཟློག༔ བསྒྱུར་རོ་ལྟས་ངན་ཆོ་འཕྲུལ་སྒྱུར༔ བཟློག་བསྒྱུར་བཅོལ་བའི་འཕྲིན་(༣བ)
ལས་མཛོད༔ བཅོམ་ལྡན་རྡོ་རྗེ་གཞོན་ནུ་དང་༔ ཡུམ་ཆེན་འཁོར་ལོ་རྒྱས་འདེབས་གཉིས༔ ཡབ་ཡུམ་ཐབས་ཤེས་རོལ་པ་ལས༔ ཁྲོ་བོའི་ཚོགས་ཆེན་སྤྲུལ་པ་ནི༔ ཤར་གྱི་ཕྱོགས་ཀྱི་ཁྲོ་བོ་ནི༔ ཁྲོ་བོ་ཆེན་པོ་རྣམ་པར་རྒྱལ༔ སྐུ་མདོག་མཐིང་ནག་འཇིགས་ཆེན་པོ༔ དབུ་གསུམ་ཕྱག་དྲུག་ཞབས་བཞི་བགྲད༔ གཡས་དཀར་གཡོན་དམར་དབུས་མཐིང་ཞལ༔ སྤྱན་གསུམ་ཞལ་བགྲད་མཆེ་བ་གཙིགས༔ དབུ་སྐྲ་ཁམ་ནག་གྱེན་དུ་བརྫེས༔ རྩ་ཕྱག་རྡོ་རྗེ་ཐོད་ཁྲག་དང་༔ བར་པ་ལྕགས་ཀྱུ་རྔ་ཡབ་བསྣམས༔ ཐ་མ་ཕུར་བསྒྲིལ་དགྲ་བགེགས་གཟིར༔ ཁྲོ་བོའི་གར་དགུའི་ཉམས་དང་ལྡན༔ རྡོ་རྗེ་གཤོག་པས་བར་སྣང་ཁྱབ༔ དུར་ཁྲོད་ཆས་བརྒྱད་སྐུ་ལ་རྫོགས༔ ཞབས་གཉིས་དྲི་ཟ་ཕོ་མོ་གནོན༔ མེ་དཔུང་འབར་བའི་ཀློང་ན་བཞུགས༔ རྡོ་རྗེ་བསྙེམས་མ་སྐུ་ལ་འཁྲིལ༔ ཕྲ་མེན་སྟག་དང་བྱ་རྒོད་མགོ༔ སྤྲུལ་པ་ཡང་སྤྲུལ་ཚོགས་དང་བཅས༔ འདིར་གཤེགས་རྒྱན་གྱི་མཆོད་གཏོར་བཞེས༔ ཤ་ཁྲག་གཏོར་མ་འདི་བཞེས་ལ༔ བདག་ཅག་ཡོན་མཆོད་འཁོར་བཅས་ཀྱི༔ ཤར་གྱི་ཕྱོགས་ཀྱི་དགྲ་དང་བགེགས༔ དྲི་ཟའི་དམག་ཚོགས་བྱུང་བ་རྣམས༔ རྣམ་པར་རྒྱལ་བ་ཉིད་ཀྱིས་བཟློག༔ བཟློག་གོ་དམར་ཆེན་གཏོར་མས་བཟློག༔ བསྒྱུར་རོ་ལྟས་ངན་ཆོ་འཕྲུལ་སྒྱུར༔ བཟློག་བསྒྱུར་བཅོལ་བའི་འཕྲིན་ལས་མཛོད༔ བཅོམ་ལྡན་རྡོ་རྗེ་གཞོན་ནུ་དང་༔ ཡུམ་ཆེན་འཁོར་ལོ་རྒྱས་འདེབས་གཉིས༔ ཡབ་ཡུམ་ཐབས་ཤེས་རོལ་པ་ལས༔ ཁྲོ་བོའི་ཚོགས་ཆེན་སྤྲུལ་པ་ནི༔ ཤར་ལྷོ་མཚམས་ཀྱི་ཁྲོ་བ་ནི༔ ཁྲོ་བོ་ཆེན་པོ་དབྱུག་སྔོན་ཅན༔ དབུ་གསུམ་ཕྱག་དྲུག་ཞབས་བཞི་བགྲད༔ གཡས་དཀར་གཡོན་དམར་དབུས་ཞལ་སྔོ༔ སྤྱན་གསུམ་ཞལ་བགྲད་མཆེ་བ་གཙིགས༔ དབུ་སྐྲ་ཁམ་ནག་(༤ན)
གྱེན་དུ་བརྫེས༔ རྩ་ཕྱག་རྡོ་རྗེ་ཐོད་ཁྲག་དང་༔ བར་པ་དབྱུག་ཏོ་མེ་དཔུང་བསྣམས༔ ཐ་མ་ཕུར་བསྒྲིལ་དགྲ་བགེགས་གཟིར༔ ཁྲོ་བོའི་གར་དགུའི་ཉམས་དང་ལྡན༔ རྡོ་རྗེ་གཤོག་པས་བར་སྣང་ཁྱབ༔ དུར་ཁྲོད་ཆས་བརྒྱད་སྐུ་ལ་རྫོགས༔ ཞབས་གཉིས་མེ་ལྷ་ཕོ་མོ་གནོན༔ མེ་དཔུང་འབར་བའི་ཀློང་ན་བཞུགས༔ རྡོ་རྗེ་སྡེར་མོ་སྐུ་ལ་འཁྲིལ༔ ཕྲ་མེན་གཡག་དང་བྱ་རོག་མགོ༔ སྤྲུལ་པ་ཡང་སྤྲུལ་ཚོགས་དང་བཅས༔ འདིར་གཤེགས་རྒྱན་གྱི་མཆོད་གཏོར་བཞེས༔ ཤ་ཁྲག་གཏོར་མ་འདི་བཞེས་ལ༔ བདག་ཅག་ཡོན་མཆོད་འཁོར་བཅས་ཀྱི༔ ཤར་ལྷོ་མཚམས་ཀྱི་དགྲ་དང་བགེགས༔ མེ་ལྷའི་དམག་ཚོགས་བྱུང་བ་ན༔ དབྱུག་སྔོན་སྡེར་མོ་ཉིད་ཀྱིས་བཟློག༔ བཟློག་གོ་དམར་ཆེན་གཏོར་མས་བཟློག༔ བསྒྱུར་རོ་ལྟས་ངན་ཆོ་འཕྲུལ་སྒྱུར༔ བཟློག་བསྒྱུར་བཅོལ་བའི་འཕྲིན་ལས་མཛོད༔ བཅོམ་ལྡན་རྡོ་རྗེ་གཞོན་ནུ་དང་༔ ཡུམ་ཆེན་འཁོར་ལོ་རྒྱས་འདེབས་གཉིས༔ ཡབ་ཡུམ་ཐབས་ཤེས་རོལ་པ་ལས༔ ཁྲོ་བོའི་ཚོགས་ཆེན་སྤྲུལ་པ་ནི༔ ལྷོ་ཡི་ཕྱོགས་ཀྱི་ཁྲོ་བོ་ནི༔ ཁྲོ་བོ་ཆེན་པོ་གཤིན་རྗེ་གཤེད༔ སྐུ་མདོག་སྔོ་ནག་འཇིགས་ཆེན་པོ༔ དབུ་གསུམ་ཕྱག་དྲུག་ཞབས་བཞི་བགྲད༔ གཡས་དཀར་གཡོན་དམར་དབུས་སྔོ་ཞལ༔ སྤྱན་གསུམ་ཞལ་བགྲད་མཆེ་བ་གཙིགས༔ དབུ་སྐྲ་ཁམ་ནག་གྱེན་དུ་བརྫེས༔ རྩ་ཕྱག་རྡོ་རྗེ་ཐོད་ཁྲག་དང་༔ བར་པ་དབྱུག་པ་དགྲ་སྟ་བསྣམས༔ ཐ་མ་ཕུར་བསྒྲིལ་དགྲ་བགེགས་གཟིར༔ ཁྲོ་བོའི་གར་དགུའི་ཉམས་དང་ལྡན༔ རྡོ་རྗེ་གཤོག་པས་བར་སྣང་ཁྱབ༔ དུར་ཁྲོད་ཆས་བརྒྱད་སྐུ་ལ་གསོལ༔ ཞབས་བཞི་གཤིན་རྗེ་ཕོ་མོ་བརྫིིས༔ མེ་དཔུང་འབར་བའི་ཀློང་ན་བཞུགས༔ དུར་ཁྲོད་བདག་མོ་
སྐུ་ལ་འཁྲིལ༔ ཕྲ་མེན་ཤ་བ་འུག་པའི་མགོ༔ སྤྲུལ་པ་ཡང་སྤྲུལ་ཚོགས་དང་བཅས༔ འདིར་གཤེགས་རྒྱན་གྱི་མཆོད་གཏོར་བཞེས༔ ཤ་ཁྲག་གཏོར་མ་འདི་བཞེས་ལ༔ བདག་ཅག་ཡོན་མཆོད་འཁོར་བཅས་ཀྱི༔ ལྷོ་ཡི་ཕྱོགས་ཀྱི་དགྲ་དང་བགེགས༔ གཤིན་རྗེའི་དམག་ཚོགས་བྱུང་བ་ན༔ གཤིན་རྗེ་གཤེད་པོ་ཉིད་ཀྱི་བཟློག༔ བཟློག་གོ་དམར་ཆེན་གཏོར་མས་བཟློག༔ བསྒྱུར་རོ་ལྟས་ངན་ཆོ་འཕྲུལ་སྒྱུར༔ བཟློག་བསྒྱུར་བཅོལ་བའི་འཕྲིན་ལས་མཛོད༔ བཅོམ་ལྡན་རྡོ་རྗེ་གཞོན་ནུ་དང་༔ ཡུམ་ཆེན་འཁོར་ལོ་རྒྱས་འདེབས་གཉིས༔ ཡབ་ཡུམ་ཐབས་ཤེས་རོལ་པ་ལས༔ ཁྲོ་བོའི་ཚོགས་ཆེན་སྤྲུལ་པ་ནི༔ ལྷོ་ནུབ་མཚམས་ཀྱི་ཁྲོ་བོ་ནི༔ ཁྲོ་བོ་ཆེན་པོ་མི་གཡོ་མགོན༔ སྐུ་མདོག་མཐིང་ནག་འཇིགས་ཆེན་པོ༔ དབུ་གསུམ་ཕྱག་དྲུག་ཞབས་བཞི་བགྲད༔ གཡས་དཀར་གཡོན་དམར་དབུས་མཐིང་ཞལ༔ སྤྱན་གསུམ་ཞལ་བགྲད་མཆེ་བ་གཙིགས༔ དབུ་སྐྲ་ཁམ་ནག་གྱེན་དུ་བརྫེས༔ རྩ་ཕྱག་རྡོ་རྗེ་ཐོད་ཁྲག་དང་༔ བར་པ་རལ་གྲི་ཞགས་པ་བསྣམས༔ ཐ་མ་ཕུར་བསྒྲིལ་དགྲ་བགེགས་གཟིར༔ ཁྲོ་བོའི་གར་དགུའི་ཉམས་དང་ལྡན༔ རྡོ་རྗེ་གཤོག་པས་བར་སྣང་ཁྱབ༔ དུར་ཁྲོད་ཆས་བརྒྱད་སྐུ་ལ་རྫོགས༔ ཞབས་གཉིས་སྲིན་པོ་ཕོ་མོ་གནོན༔ མེ་དཔུང་འབར་བའི་ཀློང་ན་བཞུགས༔ རྡོ་རྗེ་གཏུན་ཁུང་སྐུ་ལ་འཁྲིལ༔ ཕྲ་མེན་གཟིག་དང་ཁྭ་དའི་མགོ༔ སྤྲུལ་པ་ཡང་སྤྲུལ་ཚོགས་དང་བཅས༔ འདིར་གཤེགས་རྒྱན་གྱི་མཆོད་གཏོར་བཞེས༔ ཤ་ཁྲག་གཏོར་མ་འདི་བཞེས་ལ༔ བདག་ཅག་ཡོན་མཆོད་འཁོར་བཅས་ཀྱི༔ ལྷོ་ནུབ་མཚམས་ཀྱི་དགྲ་དང་བགེགས༔ སྲིན་པོའི་དམག་ཚོགས་བྱུང་བ་ན༔ མི་གཡོ་མགོན་པོ་ཉིད་ཀྱིས་བཟློག༔ བཟློག་གོ་དམར་ཆེན་གཏོར་མས་བཟློག༔ (༥ན)
བསྒྱུར་རོ་ལྟས་ངན་ཆོ་འཕྲུལ་སྒྱུར༔ བཟློག་བསྒྱུར་བཅོལ་བའི་འཕྲིན་ལས་མཛོད༔ བཅོམ་ལྡན་རྡོ་རྗེ་གཞོན་ནུ་དང་༔ ཡུམ་ཆེན་འཁོར་ལོ་རྒྱས་འདེབས་མ༔ ཡབ་ཡུམ་ཐབས་ཤེས་རོལ་པ་ལས༔ ཁྲོ་བོའི་ཚོགས་ཆེན་རོལ་པ་ནི༔ ནུབ་ཀྱི་ཕྱོགས་ཀྱི་ཁྲོ་བོ་ནི༔ ཁྲོ་བོ་ཆེན་པོ་རྟ་མཆོག་དཔལ༔ སྐུ་མདོག་དམར་ནག་འཇིགས་ཆེན་པོ༔ དབུ་གསུམ་ཕྱག་དྲུག་ཞབས་བཞི་བགྲད༔ གཡས་སྔོ་གཡོན་དཀར་དབུས་ཞལ་དམར༔ སྤྱན་གསུམ་ཞལ་བགྲད་མཆེ་བ་གཙིགས༔ དབུ་སྐྲ་ཁམ་ནག་གྱེན་དུ་བརྫེས༔ རྩ་ཕྱག་རྡོ་རྗེ་ཐོད་ཁྲག་དང་༔ བར་པ་པདྨ་སྦྲུལ་ཞགས་བསྣམས༔ ཐ་མ་ཕུར་བསྒྲིལ་དགྲ་བགེགས་གཟིར། ཁྲོ་བོའི་གར་དགུའི་ཉམས་དང་ལྡན༔ རྡོ་རྗེ་གཤོག་པས་བར་སྣང་ཁེངས༔ དུར་ཁྲོད་ཆས་བརྒྱད་སྐུ་ལ་རྫོགས༔ ཞབས་གཉིས་ཆུ་ལྷ་ཕོ་མོ་གནོན༔ མེ་དཔུང་འབར་བའི་ཀློང་ན་བཞུགས༔ རྡོ་རྗེ་གཏུམ་མོ་སྐུ་ལ་འཁྲིལ༔ ཕྲ་མེན་བྱི་ལ་པུ་ཤུད་མགོ༔ སྤྲུལ་པ་ཡང་སྤྲུལ་ཚོགས་དང་བཅས༔ འདིར་གཤེགས་རྒྱན་པའི་མཆོད་གཏོར་བཞེས༔ ཤ་ཁྲག་གཏོར་མ་འདི་བཞེས་ལ༔ བདག་ཅག་ཡོན་མཆོད་འཁོར་བཅས་ཀྱི༔ ནུབ་ཀྱི་ཕྱོགས་ཀྱི་དགྲ་དང་བགེགས༔ ཀླུ་དབང་དམག་ཚོགས་བྱུང་བ་ན༔ རྟ་མགྲིན་རྒྱལ་བ་ཉིད་ཀྱིས་བཟློག༔ བཟློག་གོ་དམར་ཆེན་༴༔ བསྒྱུར་རོ་ལྟས་ངན་༴༔ བཟློག་བསྒྱུར་༴༔ བཅོམ་ལྡན་རྡོ་རྗེ་གཞོན་ནུ་དང་༔ ཡུམ་ཆེན་འཁོར་ལོ་༴༔ ཡབ་ཡུམ་ཐབས་ཤེས་༴༔ ཁྲོ་བོའི་ཚོགས་ཆེན་སྤྲུལ་པ་ནི༔ ནུབ་བྱང་མཚམས་ཀྱི་ཁྲོ་བོ་ནི༔ ཁྲོ་བོ་ཆེན་པོ་གཞན་མི་ཐུབ༔ སྐུ་མདོག་དཀར་པོ་འཇིགས་ཆེན་པོ༔ དབུ་གསུམ་ཕྱག་དྲུག་ཞབས་བཞི་བགྲད༔ གཡས་སྔོ་གཡོན་དམར་དབུས་ཞལ་དཀར༔ སྤྱན་གསུམ་(༥བ)
ཞལ་བགྲད་མཆེ་བ་གཙིགས༔ དབུ་སྐྲ་ཁམ་ནག་གྱེན་དུ་༴༔ རྩ་ཕྱག་རྡོ་རྗེ་ཐོད་ཁྲག་དང་༔ བར་པ་རྡོ་རྗེ་འཁོར་ལོ་བསྣམས་༴༔ ཐ་མ་ཕུར་བསྒྲིལ་དགྲ་བགེགས་༴༔ ཁྲོ་བོའི་གར་དགུའི་ཉམས་དང་༴༔ རྡོ་རྗེ་གཤོག་པས་བར་སྣང་༴༔ དུར་ཁྲོད་ཆས་བརྒྱད་སྐུ་ལ་༴༔ ཞབས་གཉིས་རླུང་ལྷ་ཕོ་མོ་༴༔ མེ་དཔུང་འབར་བའི་༴༔ རྡོ་རྗེ་མདའ་བསྙེམས་སྐུ་ལ་༴༔ ཕྲ་མེན་ཅེ་སྤྱང་ཁྲ་མགོ་ཅན༔ སྤྲུལ་པ་ཡང་སྤྲུལ་༴༔ འདིར་གཤེགས་རྒྱན་གྱི་༴༔ ཤ་ཁྲག་གཏོར་མ་༴༔ བདག་ཅག་ཡོན་མཆོད་༴༔ ནུབ་བྱང་མཚམས་ཀྱི་དགྲ་དང་༴༔ རླུང་ལྷའི་དམག་ཚོགས་བྱུང་བ་༴༔ གཞན་གྱི་མི་ཐུབ་ཁྲོ་བོས་བཟློག༔ བཟློག་གོ་དམར་ཆེན་གཏོར་མས་བཟློག་༴༔ བསྒྱུར་རོ་ལྟས་ངན་༴༔ བཟློག་བསྒྱུར་༴༔ བཅོམ་ལྡན་རྡོ་རྗེ་གཞོན་ནུ་དང་༔ ཡུམ་ཆེན་འཁོར་ལོ་༴༔ ཡབ་ཡུམ་༴༔ ཁྲོ་བོའི་༴༔ བྱང་གི་ཕྱོགས་ཀྱི་ཁྲོ་བོ་ནི༔ ཁྲོ་བོ་ཆེན་པོ་བདུད་རྩི་འཁྱིལ༔ སྐུ་མདོག་ལྗང་ནག་འཇིགས་ཆེན་པོ༔ དབུ་གསུམ་ཕྱག་དྲུག་ཞབས་བཞི་བགྲད༔ གཡས་དཀར་གཡོན་དམར་དབུས་ལྗང་ཞལ༔ སྤྱན་གསུམ་ཞལ་བགྲད་མཆེ་བ་༴༔ དབུ་སྐྲ་ཁམ་ནག་གྱེན་དུ་བརྫེས༔ རྩ་ཕྱག་རྡོ་རྗེ་དུང་ཁྲག་དང་༔ བར་པ་རྒྱ་གྲམ་བེ་ཅོན་བསྣམས༔ ཐ་མ་ཕུར་བསྒྲིལ་དགྲ་བགེགས་༴༔ ཁྲོ་བོའི་གར་དགུའི་ཉམས་དང་ལྡན༔ རྡོ་རྗེ་གཤོག་པས་༴༔ དུར་ཁྲོད་ཆས་བརྒྱད་༴༔ ཞབས་གཉིས་གནོད་སྦྱིན་ཕོ་༴༔ མེ་དཔུང་འབར་བའི་༴༔ རྡོ་རྗེ་རླུང་འབྱིན་སྐུ་ལ་འཁྲིལ༔ ཕྲ་མེན་སེང་གེ་ཕ་ཝང་མགོ༔ སྤྲུལ་པ་ཡང་སྤྲུལ་༴༔ འདིར་གཤེགས་༴༔ ཤ་ཁྲག་གཏོར་མ་༴༔ བདག་ཅག་༴༔ བྱང་གི་ཕྱོགས་ཀྱི་དགྲ་དང་བགེགས༔ གནོད་སྦྱིན་དམག་ཚོགས་༴༔ ཁྲོ་ཆེན་བདུད་རྩི་འཁྱིལ་པས་བཟློག༔ བཟློག་གོ་དམར་ཆེན་༴༔ བསྒྱུར་རོ་ལྟས་ངན་༴༔ བཟློག་བསྒྱུར་༴ བཅོམ་(༦ན)
ལྡན་རྡོ་རྗེ་གཞོན་ནུ་དང་༔ ཡུམ་ཆེན་༴༔ ཡབ་ཡུམ་༴༔ ཁྲོ་བོའི་༴༔ བྱང་ཤར་མཚམས་ཀྱི་༴༔ ཁྲོ་ཆེན་ཁམས་གསུམ་རྣམ་པར་རྒྱལ༔ སྐུ་མདོག་སེར་པོ་འཇིགས་ཆེན་པོ༔ དབུ་གསུམ་ཕྱག་དྲུག་ཞབས་བཞི་བགྲད༔ གཡས་སྔོ་གཡོན་ལྗང་དབུས་སེར་ཞལ༔ སྤྱན་གསུམ་ཞལ་བགྲད་༴༔ དབུ་སྐྲ་ཁམ་ནག་༴༔ རྩ་ཕྱག་རྡོ་རྗེ་ཐོད་ཁྲག་༴༔ བར་པ་རྡོ་རྗེ་རྩེ་གསུམ་བསྣམས༔ ཐ་མ་ཕུར་བསྒྲིལ་༴༔ ཁྲོ་བོའི་གར་དགུའི་༴༔ རྡོ་རྗེ་གཤོག་པས་བར་སྣང་༴༔ དུར་ཁྲོད་ཆས་བརྒྱད་༴༔ ཞབས་གཉིས་དབང་ལྡན་ཕོ་མོ་༴༔ མེ་དཔུང་༴༔ རྡོ་རྗེ་གསོད་མ་སྐུ་ལ་འཁྲིལ༔ ཕྲ་མེན་དྲེད་དང་སྲི་མོའི་མགོ༔ སྤྲུལ་པ་ཡང་སྤྲུལ་༴༔ འདིར་གཤེགས་རྒྱན་གྱི་༴༔ ཤ་ཁྲག་གཏོར་མ་༴༔ བདག་ཅག་༴༔ བྱང་ཤར་མཚམས་ཀྱི་དགྲ་དང་བགེགས༔ དབང་ལྡན་དམག་ཚོགས་༴༔ ཁམས་གསུམ་རྣམ་རྒྱལ་ཁྲོ་བོས་བཟློག༔ བཟློག་གོ་དམར་༴༔ བསྒྱུར་རོ་༴༔ བཟློག་བསྒྱུར་༴༔ བཅོམ་ལྡན་རྡོ་རྗེ་༴༔ ཡུམ་ཆེན་༴༔ ཡབ་ཡུམ་༴༔ ཁྲོ་བོའི་༴༔ འོག་གི་༴༔ ཁྲོ་བོ་ཆེན་པོ་སྟོབས་པོ་ཆེ༔ སྐུ་མདོག་དུད་ཀ་འཇིགས་ཆེན་པོ༔ དབུ་གསུམ་ཕྱག་དྲུག་ཞབས་བཞི་༴༔ གཡས་དཀར་གཡོན་དམར་དུད་ཀ་དབུས༔ སྤྱན་གསུམ་ཞལ་བགྲད་མཆེ་བ་༴༔ དབུ་སྐྲ་ཁམ་ནག་གྱེན་དུ་༴༔ རྩ་ཕྱག་རྡོ་རྗེ་ཐོད་ཁྲག་དང་༔ བར་པ་ཐོ་བ་གཏུན་ཤིང་བསྣམས༔ ཐ་མ་ཕུར་བསྒྲིལ་དགྲ་བགེགས་གཟིར༔ ཁྲོ་བོའི་གར་དགུའི་ཉམས་དང་ལྡན༔ རྡོ་རྗེ་གཤོག་པས་བར་སྣང་ཁྱབ༔ དུར་ཁྲོད་ཆས་བརྒྱད་སྐུ་ལ་རྫོགས༔ ཞབས་བཞི་ས་བདག་ཕོ་མོ་གནོན༔ མེ་དཔུང་འབར་བའི་ཀློང་ན་བཞུགས༔ རྡོ་རྗེ་བསྐུལ་བྱེད་སྐུ་ལ་འཁྲིལ༔ ཕྲ་མེན་དོམ་དང་བྱི་བའི་མགོ༔ སྤྲུལ་པ་ཡང་སྤྲུལ་ཚོགས་དང་བཅས༔ འདིར་(༦བ)
གཤེགས་རྒྱན་གྱི་མཆོད་གཏོར་བཞེས༔ ཤ་ཁྲག་གཏོར་མ་འདི་བཞེས་ལ༔ བདག་ཅག་ཡོན་མཆོད་འཁོར་བཅས་ཀྱི༔ འོག་གི་ཕྱོགས་ནས་དགྲ་དང་བགེགས༔ ས་བདག་དམག་ཚོགས་བྱུང་བ་ན༔ སྟོབས་ཆེན་རྒྱལ་པོ་ཉིད་ཀྱིས་བཟློག༔ བཟློག་གོ་དམར་ཆེན་གཏོར་མས་༴༔ བསྒྱུར་རོ་ལྟས་ངན་༴༔ བཟློག་བསྒྱུར་བཅོལ་བའི་འཕྲིན་ལས་མཛོད༔ ཅེས་གཏོར་ཆུང་རྣམས་ལ་སྨན་རཀ་སྦྲན་ཏེ་ཕུལ༔ ཐོག་མར་རིག་འཛིན་བསྐུལ་བ་ནི༔ ཧཱུཾ། བྱང་ཆུབ་མཆོག་ཏུ་སེམས་བསྐྱེད་ཅིང་༔ དུས་གསུམ་རྒྱལ་བའི་གདུང་འཚོབ་པའི༔ རིགས་འཛིན་རྣམས་ཀྱི་དུས་ལ་བབ༔ ཨྱོན་པདྨ་འབྱུང་གནས་ཀྱིས༔ རྒྱ་གར་ཙནྡན་ནགས་ཚལ་ལ༔ ཇི་ལྟར་རྟགས་བསྟན་བསྙེལ་ལམ་ནི༔ ཕུར་བུ་བསྒྲུབ་པའི་གྲོགས་མཛོད་ཅིག༔ པཎ་ཆེན་བི་མཱ་མི་ཏྲ་ཡིས༔ རྒྱ་གར་ཆུ་བོ་གངྒཱ་ལ༔ ཇི་ལྟར་རྟགས་བསྟན་བསྙེལ་ལམ་ཅི༔ ཕུར་བུ་བསྒྲུབཔའི་གྲོགས་མཛོད་ཅིག༔ བལ་པོ་ཤཱི་ལ་མཉྫུ་ཡིས༔ མཎྜ་ལ་ཡི་མཁར་ཁོངས་སུ༔ ཇི་ལྟར་༴༔ ཕུར་བུ་༴༔ མཁར་ཆེན་དཔལ་གྱི་དབང་ཕྱུག་གིས༔ ཡར་ཀླུངས་བགེགས་ཀྱི་ཕུ་ཆུ་ལ༔ ཇི་ལྟར་༴༔ ཕུར་བུ་༴ ཤུད་བུ་དཔལ་གྱི་སེངྒེ་ཡིས༔ འུ་ཤང་རྡོ་ཡི་བྲག་ལོགས་ལ༔ ཇི་ལྟར་༴༔ ཕུར་བུ་༴༔ སྣ་ནམ་རྡོ་རྗེ་བདུད་འཇོམས་ཀྱིས༔ ཧས་པོ་རི་ཡི་སྤང་ཁོངས་ལ༔ ཇི་ལྟར་༴༔ ཕུར་བུ་༴༔ མཆིམས་སྟོན་ཤཱཀྱ་པྲ་བྷ་ཡིས༔ རྩིབས་ཀྱི་སྤྱང་ཀི་སྔོན་པོ་ལ༔ ཇི་ལྟར་༴༔ ཕུར་བུ་༴༔ མཁའ་འགྲོ་ཡེ་ཤེས་འཚོ་རྒྱལ་གྱིས༔ ནམ་མཁའི་ཕོ་རོག་ནག་པོ་ལ༔ ཇི་ལྟར་༴༔ ཕུར་བུ་༴༔ སྤྲུལ་སྐུ་གཏེར་སྟོན་ཡབ་སྲས་ཀྱིས༔ ཟང་ཟང་རི་བོའི་བྲག་གི་རྩེར༔ ཇི་ལྟར་༴༔ ཕུར་བུ་༴༔ སྔགས་འཆང་ཤཱཀྱ་བཟང་པོ་ཡིས༔ ཡོལ་མོ་གངས་ཀྱི་ར་བ་རུ༔ ཇི་ལྟར་༴༔ ཕུར་བུ་༴༔ སྤྲུལ་སྐུ་ལེགས་ལྡན་རྡོ་རྗེ་(༧ན)
ཡིས༔ འབྲས་གཤོངས་གནས་སྒོ་འབྱེད་པའི་ཚེ༔ ཇི་ལྟར་༴༔ ཕུར་བུ་༴༔ ཆོས་རྒྱལ་བཀྲ་ཤིས་སྟོབས་རྒྱལ་གྱིས༔ གོང་ཡལ་གཙང་ཆབ་གྱེན་ལྡོག་ཚེ༔ ཇི་ལྟར་༴༔ ཕུར་བུ་༴༔ ཕུར་བུ་བརྒྱུད་པའི་བླ་མ་རྣམས༔ རང་རང་སོ་སོ་བསྒྲུབ་ཁང་དུ༔ ཇི་ལྟར་རྟགས་བསྟན་བསྙེལ་ལམ་ཅི༔ ཕུར་བུ་བསྒྲུབ་པའི་གྲོགས་མཛོད་ཅིག༔ ཅེས་བསྐུལ་ལོ༔ དེ་ནས་དཀྱིལ་འཁོར་ལྷ་ཚོགས་བསྐུལ་བ་ནི༔ ཧཱུཾ། བཅོམ་ལྡན་དཔལ་ཆེན་རྡོ་རྗེ་གཞོན་ནུ་ནི༔ ཞེ་སྡང་འཇོམས་མཛད་ཁྲོ་རྒྱལ་དབྱིངས་ནས་བཞེངས༔ ཡུམ་ཆེན་འཁོར་ལོ་རྒྱས་འདེབས་སྐུ་ལ་འཁྲིལ༔ ཡབ་ཡུམ་ཁྱེད་ཀྱི་འཕྲིན་ལས་དུས་ལ་བབ༔ གནོད་བྱེད་དགྲ་བགེགས་ཁུག་ལ་མྱུར་དུ་སྒྲོལ༔ ཧཱུཾ། ཡབ་ཡུམ་ཐབས་དང་ཤེས་རབ་རོལ་པ་ལས༔ ཕྱོགས་བཅུ་དྲེགས་པ་བསྣོལ་བའི་གདན་སྟེང་དུ༔ ཉི་ཟླ་ཕྱོགས་སྐྱོང་བསྒྱེལ་བའི་ཁྲི་ཡི་སྟེང་༔ ཁྲོ་བཅུ་ཡབ་ཡུམ་སྤྲུལ་པའི་ཁྲ་ཐབས་རྣམས༔ ཐུགས་དམ་ཚུལ་བཞིན་བཅོལ་བའི་འཕྲིན་ལས་མཛོད༔ ཧཱུཾ། སྟེང་གི་ཕྱོགས་ནས་ཧཱུཾ་མཛད་སྒྲ་འབྱིན་གཉིས༔ སྤྲུལ་པའི་ཕྲ་མེན་ཕག་དང་རྨིགས་བུའི་མགོ༔ གཟིགས་པའི་འཕྲིན་ལས་མཛད་པའི་དུས་ལ་བབ༔ ཧཱུཾ། ཤར་གྱི་ཕྱོགས་ནས་རྣམ་རྒྱལ་བསྙེམས་མ་གཉིས༔ སྤྲུལ་པའི་ཕྲ་མེན་སྟག་དང་བྱ་རྒོད་མགོ༔ འབེབས་མཛད་ཆེན་མོའི་འཕྲིན་ལས་དུས་ལ་བབ༔ ཧཱུཾ། ཤར་ལྷོའི་མཚམས་ནས་དབྱུག་སྔོན་སྡེར་མོ་གཉིས། སྤྲུལ་པའི་ཕྲ་མེན་གཡག་དང་བྱ་རོག་མགོ༔ འཇོམས་མཛད་ཆེན་པོའི་འཕྲིན་ལས་དུས་ལ་བབ༔ ཧཱུཾ། ལྷོ་ཡི་ཕྱོགས་ནས་གཤིན་རྗེ་དུར་ཁྲོད་གཉིས༔ སྤྲུལ་པའི་ཕྲ་མེན་ཤ་བ་འུག་པའི་མགོ༔ གསོད་མཛད་ཆེན་མོའི་འཕྲིན་ལས་དུས་ལ་བབ༔ ཧཱུཾ། ལྷོ་ནུབ་མཚམས་ནས་མི་གཡོ་(༧བ)
གཏུན་ཁུང་གཉིས༔ སྤྲུལ་པའི་ཕྲ་མེན་གཟིག་དང་ཁ་དའི་མགོ༔ སྒྲོལ་མཛད་ཆེན་མོའི་འཕྲིན་ལས་དུས་ལ་བབ༔ ཧཱུཾ། ནུབ་ཀྱི་ཕྱོགས་ནས་རྟ་མགྲིན་གཏུམ་མོ་གཉིས༔ སྤྲུལ་པའི་ཕྲ་མེན་བྱི་ལ་པུ་ཤུད་མགོ༔ འཆིང་མཛད་ཆེན་མོའི་འཕྲིན་ལས་དུས་ལ་བབ༔ ཧཱུཾ། ནུབ་བྱང་མཚམས་ནས་འདོད་རྒྱལ་མདའ་བསྙེམས་གཉིས༔ སྤྲུལ་པའི་ཕྲ་མེན་སྤྱང་ཀི་ཁྲ་ཡི་མགོ༔ བསྡིགས་མཛད་ཆེན་མོའི་འཕྲིན་ལས་དུས་ལ་བབ༔ ཧཱུཾ། བྱང་གི་ཕྱོགས་ནས་བདུད་རྩི་རླུང་འབྱིན་གཉིས༔ སྤྲུལ་པའི་བླ་མེན་སེང་གེ་ཕ་ཝཾ་མགོ༔ བསྐྱོད་མཛད་ཆེན་མོའི་འཕྲིན་ལས་དུས་ལ་བབ༔ ཧཱུཾ། བྱང་ཤར་མཚམས་ནས་ཁམས་གསུམ་གསོད་བྱེད་གཉིས༔ སྤྲུལ་པའི་ཕྲ་མེན་དྲེད་དང་སྲེ་མོའི་མགོ༔ སྟོང་མཛད་ཆེན་མོའི་འཕྲིན་ལས་དུས་ལ་བབ༔ ཧཱུཾ། འོག་གི་ཕྱོགས་ནས་སྟོབས་ཆེན་བསྐྱོད་མ་གཉིས༔ སྤྲུལ་པའི་ཕྲ་མེན་དོམ་དང་བྱི་བའི་མགོ༔ སྦོར་མཛད་ཆེན་མོའི་འཕྲིན་ལས་དུས་ལ་བབ༔ གནོད་བྱེད་དགྲ་བགེགས་ཁུག་ལ་མྱུར་དུ་སྒྲོལ༔ ཧཱུཾ། སྟོང་གསུམ་དྲེགས་པ་འདུལ་བར་ཞལ་བཞེས་པའི༔ སྲས་མཆོག་འཕྲིན་ལས་སྒྲུབ་པའི་དུས་ལ་བབ༔ གནོད་བྱེད་དགྲ་བགེགས་ཁུག་ལ་མྱུར་དུ་སྒྲོལ། ཧཱུཾ། ཤར་ལྷོ་ནུབ་བྱང་སྒོ་བཞིའི་གཞལ་ཡས་སུ༔ པུ་ཤུད་སྐྱ་ཀ་སྲིན་བྱ་ཁྲ་མགོ་བཞི༔ འགུགས་འདྲེན་འཆིང་སྡོམ་དབབ་པའི་དུས་ལ་བབ༔ གནོད་བྱེད་དགྲ་བགེགས་ཁུག་ལས་མྱུར་དུ་སྒྲོལ༔ ཐུགས་དམ་རྒྱུད་བསྐུལ་བཅོལ་བའི་འཕྲིན་ལས་མཛོད༔ དེ་ནས་དམ་ཅན་སྲུང་མ་བསྐུལ་བ་ནི༔ བྷྱོ༔ ནམ་གྱི་སྲོད་ལ་དམ་བཅས་མ༔ ལྕགས་ཀྱི་སྤྱང་མོ་མགོ་དགུ་ལ༔ མི་མོ་ལྕགས་ཀྱི་མགོ་ཅན་ཞོན༔ ལག་ན་ལྕགས་ཀྱི་ཕུར་པ་བསྒྲིལ༔ ཤྭ་ན་མུ་ཁའི་དུས་ལ་བབ༔ གཡུ་ཡི་ཁྱི་མོ་རལ་ཅན་ལ༔ མི་མོ་གཡུ་ཡི་མགོ་ཅན་ཞོན༔ ཕྱག་ན་གཡུ་ཡི་ཕུར་(༨ན)
པ་བསྒྲིལ༔ ཤྭ་ན་མུ་ཁའི་དུས་ལ་བབ༔ གསེར་གྱི་འཕར་བ་ལྕེ་བརྒྱད་ལ༔ མེ་མོ་གསེར་གྱི་མགོ་ཅན་ཞོན༔ ཕྱག་ན་གསེར་གྱི་ཕུར་པ་བསྒྲིལ༔ ཤི་ཁ་མུ་ཁའི་དུས་ལ་བབ༔ ཟངས་ཀྱི་ཝ་མོ་རྐང་གསུམ་ལ༔ མི་མོ་ཟངས་ཀྱི་མགོ་ཅན་ཞོན༔ ཕྱག་ན་ཟངས་ཀྱི་ཕུར་པ་སྒྲིལ༔ སྲི་ལ་མུ་ཁའི་དུས་ལ་བབ༔ བྷྱོཿ ནམ་གྱི་གུང་གི་དམ་བཅས་མ༔ ནག་མོ་རལ་པ་སྟོང་ཁམས་ཁྱབ༔ ཕྱག་ན་མཆོང་གི་ཕུར་པ་བསྒྲིལ༔ ཆིབས་སུ་དྲེལ་རྟ་རྐང་གསུམ་བཅིབས༔ རེ་མ་ཏཱི་ཡི་དུས་ལ་བབ༔ སེར་ནག་རྨ་བྱའི་ཐུལ་པ་ཅན༔ ཕྱག་ན་མཆོང་གི་ཕུར་པ་བསྒྲིལ༔ ཆིབས་སུ་ཆུ་གླང་སྔོན་པོ་བཅིབས༔ རེ་མ་ཏཱི་ཡི་དུས་ལ་བབ༔ དམར་ནག་རེ་ལྡེ་ནག་མོ་གསོལ༔ ཕྱག་ན་མཆོང་གི་ཕུར་པ་བསྒྲིལ༔ ཆིབས་སུ་ཤ་བ་ཡུ་མོ་བཅིབས༔ རྡོ་རྗེ་བསེ་སྦྱིན་དུས་ལ་བབ༔ ལྗང་མོ་གཡུ་ཕུར་རལ་ཅན་མ༔ ཕྱག་ན་གཡུ་ཡི་ཕུར་པ་བསྒྲིལ༔ ཆིབས་སུ་ཀླུ་རྟ་སྔོན་པོ་བཅིབས༔ རྡོ་རྗེ་ཕག་སྦྱིན་དུས་ལ་བབ༔ ལྗང་ནག་དར་ནག་གོ་ཟུ་གསོལ༔ ཕྱག་ན་མཆོང་གི་ཕུར་པ་བསྒྲིལ༔ ཆིབས་སུ་རྔ་མོ་ག་པ་བཅིབས༔ རེ་མ་ཛུ་ཡི་དུས་ལ་བབ༔ བྷྱོཿ ནམ་གྱི་ཐོ་རངས་དམ་བཅས་མ༔ མཐིང་ནག་ལྕགས་ཕུར་རལ་པ་ཅན༔ ཕྱག་ན་ལྕགས་ཀྱི་ཕུར་པ་བསྒྲིལ༔ ཆིབས་སུ་བདུད་རྟ་ནག་པོ་བཅིབས༔ རྡོ་རྗེ་ཡ་སྦྱིན་དུས་ལ་བབ༔ སེར་མོ་གསེར་ཕུར་རལ་པ་ཅན༔ ཕྱག་ན་གསེར་གྱི་ཕུར་པ་བསྒྲིལ༔ ཆིབས་སུ་གཟའ་རྟ་སེར་པོ་བཅིབས༔ རྡོ་རྗེ་བདེ་སྦྱིན་དུས་ལ་བབ༔ དམར་མོ་བསེ་ཕུར་རལ་པ་ཅན༔ ཕྱག་ན་བསེ་ཡི་ཕུར་པ་བསྒྲིལ༔ ཆིབས་སུ་བཙན་རྟ་དམར་ཞུར་བཅིབས༔ རྡོ་རྗེ་བསེ་སྦྱིན་དུས་ལ་བབ༔ ལྗང་མོ་གཡུ་ཕུར་རལ་པ་ཅན༔ ཕྱག་ན་(༨བ)
གཡུ་ཡི་ཕུར་པ་བསྒྲིལ༔ ཆིབས་སུ་ཀླུ་རྟ་སྔོན་པོ་བཅིབས༔ རྡོ་རྗེ་ཕག་སྦྱིན་དུས་ལ་བབ༔ བྷྱོཿ ཤར་ཕྱོགས་སྲིན་པོའི་སྐྱེས་བུ་ནི༔ དཀར་པོ་ཕྱག་ན་དུང་ཕྱུར་བསྒྲིལ༔ སྲིན་པོ་གྱད་ཆེན་དུས་ལ་བབ༔ ལྷོ་ཕྱོགས་གཤིན་རྗེའི་སྐྱེས་བུ་ནི༔ ནག་པོ་ཕྱག་ན་ལྕགས་ཕུར་བསྒྲིལ༔ གཤིན་རྗེ་ནག་པོའི་དུས་ལ་བབ༔ ནུབ་ཕྱོགས་ཡ་བདུད་སྐྱེས་བུ་ནི༔ དམར་པོ་ཕྱག་ན་ཟངས་ཕུར་བསྒྲིལ༔ སོག་པོ་མིག་རིང་དུས་ལ་བབ༔ བྱང་ཕྱོགས་གནོད་སྦྱིན་སྐྱེས་བུ་ནི༔ སྔོན་པོ་ཕྱག་ན་གཡུ་ཕུར་བསྒྲིལ༔ མོན་པ་མིག་རིང་དུས་ལ་བབ༔ བྷྱོཿ ཤར་བདུད་དཀར་པོ་མཆེ་བ་གཙིགས༔ ཕྱག་ན་དུང་གི་ཕུར་པ་བསྒྲིལ༔ ཤར་གྱི་སྐྱེས་བུའི་དུས་ལ་བབ༔ ལྷོ་བདུད་ནག་པོ་རལ་པ་ཅན༔ ཕྱག་ན་གཡུ་ཡི་ཕུར་པ་བསྒྲིལ༔ ལྷོ་ཡི་སྐྱེས་བུའི་དུས་ལ་བབ༔ ནུབ་བདུད་ནག་པོ་ཞགས་པ་ཅན༔ ཕྱག་ན་ཞགས་པ་ཕུར་པ་བསྒྲིལ༔ ནུབ་ཀྱི་སྐྱེས་བུའི་དུས་ལ་བབ༔ བྱང་བདུད་ལྗང་གུ་རལ་པ་ཅན༔ ཕྱག་ན་རལ་གྲི་ཕུར་པ་བསྒྲིལ༔ བྱང་གི་སྐྱེས་བུའི་དུས་ལ་བབ༔ བྷྱོ༔ ཀྲ་མ་རཱ་ཙ་སྲིན་པོའི་གིང་༔ དཀར་པོ་ཕྱག་ན་དུང་ཕུར་བསྒྲིལ༔ ཤར་གྱི་དམག་དཔོན་དུས་ལ་བབ༔ སྲོ་མ་རཱ་ཙ་གཤིན་རྗེའི་གིང་༔ སྔོན་པོ་ཕྱག་ན་གྲི་ཕུར་བསྒྲིལ༔ ལྷོ་ཡི་དམག་དཔོན་དུས་ལ་བབ༔ ད་ཤ་གྲཱི་བ་བདུད་ཀྱི་གིང་༔ དམར་པོ་ཕྱག་ན་གྲི་ཕུར་བསྒྲིལ༔ ནུབ་ཀྱི་དམག་དཔོན་དུས་ལ་བབ༔ ཡཀྴ་གྲཱི་བ་གནོད་སྦྱིན་གིང༔ སེར་པོ་ཕྱག་ན་ཕུར་པ་བསྒྲིལ༔ བྱང་གི་དམག་དཔོན་༴༔ ཕུར་པ་བཀའ་སྲུང་དམ་ཅན་རྣམས༔ དམ་རྫས་མཆོད་གཏོར་འདི་བཞེས་ལ༔ དགྲ་བགེགས་ཁུག་ལ་མྱུར་དུ་སྒྲོལ༔ བཅོལ་བའི་འཕྲིན་ལས་གྲུབ་པར་མཛོད༔ ཅེས་བསྐུལ་ལོ༔ དེ་ནས་གདབ་ལས་ཀྱི་རིམ་པ་གཞུང་བཞིན་དུ་བྱས་ནས་བཟློག་པ་བྱ་བ་ནི༔ གཏོར་མའི་ཁར་སྨན་རག་སྦྲན་ཞིང་འདི་སྐད་དོ༔(༩ན)
ཧཱུཾ། དབུས་ཕྱོགས་འཁོར་ལོའི་རྩིབས་སྟེང་ན། །མ་ཧཱ་དེ་བ་བསྣོལ་བའི་སྟེང་། །བཅོམ་ལྡན་རྡོ་རྗེ་གཞོན་ནུ་དང་། །ཡུམ་ཆེན་འཁོར་ལོ་རྒྱས་འདེབས་མ། །སྲས་མཆོག་ཉེར་གཅིག་འཁོར་གྱིས་བསྐོར། །ཡང་སྤྲུལ་གྲངས་མེད་ཕྱོགས་བཅུར་འཕྲོ། །རྣལ་འབྱོར་བདག་ཅག་འཁོར་བཅས་ལ། །དབུས་ཀྱི་ཕྱོགས་ནས་བདུད་གཡོས་པ། །བཟློག་གོ་དམར་ཆེན་གཏོར་མས་བཟློག །བསྒྱུར་རོ་ངན་སྡིག་དགྲ་ལ་སྒྱུར། །བཟློག་བསྒྱུར་བཅོལ་བའི་འཕྲིན་ལས་མཛོད། །ཧཱུཾ། སྟེང་ཕྱོགས་འཁོར་ལོའི་རྩིབས་སྟེང་ན། །ཚངས་པ་ཕོ་མོའི་གདན་སྟེང་ན། །ཁྲོ་བོའི་རྒྱལ་པོ་ཧཱུཾ་ཀཱ་ར། །ཡུམ་ཆེན་རྡོ་རྗེ་སྒྲ་འབྱིན་མ། །སྤྲུལ་
པ་ཕག་དང་རྨིགས་བུའི་མགོ །ཡང་སྤྲུལ་གྲངས་མེད་ཕྱོགས་བཅུར་འཕྲོ། །རྣལ་འབྱོར་བདག 
་ཅག་འཁོར་བཅས་དང་། །རྒྱུ་སྦྱོར་ཡོན་བདག་འཁོར་བཅས་ལ། །སྟེང་ཕྱོགས་ཚངས་པའི་གདོན་དང་བགེགས། །བཟློག་གོ་དམར་ཆེན་༴། །སྒྱུར་ཅིག་ངན་སྡིག་༴། །བཟློག་བསྒྱུར་བཅོལ་བའི་འཕྲིན་ལས་མཛོད། །ཧཱུཾ། ཤར་ཕྱོགས་༴། །དྲི་ཟ་ཕོ་མོའི་༴། །ཁྲོ་བོའི་རྒྱལ་པོ་རྣམ་པར་རྒྱལ། །ཡུམ་ཆེན་རྡོ་རྗེ་བསྙེམས་མར་བཅས། །སྤྲུལ་པ་སྟག་དང་བྱ་རྒོད་མགོ །ཡང་སྤྲུལ་༴། །རྣལ་འབྱོར་༴། །རྒྱུ་སྦྱོར་༴། །ཤར་ཕྱོགས་དྲི་ཟའི་གདོན་དང་བགེགས།༴༴།ཧཱུཾ། ཤར་ལྷོ་༴། །མེ་ལྷ་༴། ཁྲོ་བོའི་རྒྱལ་པོ་དབྱུག་པ་སྔོན། །ཡུམ་ཆེན་རྡོ་རྗེ་སྡེར་མོ་དང་། །སྤྲུལ་པ་གཡག་དང་བྱ་རོག་མགོ །ཡང་སྤྲུལ་༴། །རྣལ་འབྱོར་༴། །རྒྱུ་སྦྱོར་༴། །ཤར་ལྷོ་མེ་ལྷའི༴།༴༴།ཧཱུཾ། ལྷོ་ཕྱོགས་༴། །གཤིན་རྗེ་༴། ཁྲོ་བོའི་རྒྱལ་པོ་གཤིན་རྗེ་གཤེད། །ཡུམ་ཆེན་རྡོ་རྗེ་དུར་ཁྲོད་མ། །སྤྲུལ་པ་ཤ་བ་འུག་པའི་མགོ །ཡང་སྤྲུལ་༴། །རྣལ་འབྱོར་༴། །རྒྱུ་སྦྱོར་༴། །ལྷོ་ཕྱོགས་གཤིན་རྗེའི༴།༴༴།ཧཱུཾ། ལྷོ་ནུབ་༴། །སྲིན་པོ་༴། ཁྲོ་བོའི་རྒྱལ་པོ་མི་གཡོ་མགོན། །(༩བ)
ཡུམ་ཆེན་རྡོ་རྗེ་གཏུན་ཁུང་མ། །སྤྲུལ་པ་གཟིག་དང་ཁྭ་དའི་མགོ །ཡང་སྤྲུལ་༴། །རྣལ་འབྱོར་༴། །རྒྱུ་སྦྱོར་༴། །ལྷོ་ནུབ་སྲིན་པོའི༴།༴༴།ཧཱུཾ། ནུབ་ཕྱོགས་༴། །ཀླུ་བདུད་ཕོ་མོའི་༴། ཁྲོ་བོའི་རྒྱལ་པོ་རྟ་མཆོག་དཔལ། །ཡུམ་ཆེན་རྡོ་རྗེ་གཏུམ་མོ་དང་། །སྤྲུལ་པ་བྱི་ལ་པུ་ཤུད་མགོ །ཡང་སྤྲུལ་༴། །རྣལ་འབྱོར་༴། །རྒྱུ་སྦྱོར༴།༴༴།ཧཱུཾ།ནུབ་བྱང་འཁོར་ལོའི་༴། །རླུང་ལྷ་༴། །ཁྲོ་བོ་རྒྱལ་པོ་འདོད་པའི་རྒྱལ། །ཡུམ་ཆེན་རྡོ་རྗེ་མདའ་བསྙེམས་མ། །སྤྲུལ་པ་སྦྱང་མོ་ཁྲ་ཡི་མགོ །ཡག་སྤྲུལ་༴། །རྣལ་འབྱོར་༴། །རྒྱུ་སྦྱོར༴།༴༴།ཧཱུཾ། བྱང་ཕྱོགས་༴། །གནོད་སྦྱིན་༴། །ཁྲོ་བོའི་རྒྱལ་པོ་བདུད་རྩི་འཁྱིལ། །ཡུམ་ཆེན་རྡོ་རྗེ་སྣང་འབྱིན་མ། །སྤྲུལ་པ་སེངྒེ་ཕ་ཝང་༴། །ཡང་སྦྲུལ་༴། །རྣལ་འབྱོར་༴། །རྒྱུ་སྦྱོར་༴། །༴༴།ཧཱུཾ།བྱང་ཤར་༴། །དབང་ལྡན་༴། །ཁྲོ་བོའི་རྒྱལ་བོ་ཁམས་གསུམ་རྒྱལ། །ཡུམ་ཆེན་རྡོ་རྗེ་གསོད་བྱེད་མ། །སྤྲུལ་པ་དྲེད་དང་སྲེ་མིའི་མགོ །ཡང་སྤྲུལ་༴། །རྣལ་འབྱོར་༴། །རྒྱུ་སྦྱོར་༴། །བྱང་ཤར་དབང་ལྡན༴།༴༴། ཧཱུཾ། འོག་ཕྱོགས་འཁོར་ལོའི་༴། །ས་བདག་ཕོ་མོའི་གདན་སྟེང་ན། ཁྲོ་བོའི་རྒྱལ་པོ་སྟོབས་པོ་ཆེ། །ཡུམ་ཆེན་རྡོ་རྗེ་བསྐུལ་བྱེད་མ། །སྤྲུལ་ པ་དོམ་དང་བྱི་བའི་མགོ །ཡང་སྤྲུལ་གྲངས་མེད་ཕྱོགས་བཅུར་འཕྲོ། །བདག ་ཅག་རྣལ་འབྱོར་འཁོར་བཅས་དང་། །རྒྱུ་སྦྱོར་ཡོན་བདག་འཁོར་བཅས་ལ། །འོག་ཕྱོགས་ས་བདག་གདོན་དང་བགེགས། །བཟློག་གོ་དམར་ཆེན་གཏོར་མས་བཟློག །བསྒྱུར་རོ་ངན་སྡིག་དགྲ་ལ་སྒྱུར། །བཟློག་བསྒྱུར་བཅོལ་བའི་འཕྲིན་ལས་མཛོད། །གཞན་ཡང་བཟློག་ཅིང་བསྒྱུར་བ་ནི། །རྒྱུ་སྦྱོར་ཡོན་བདག་འཁོར་བཅས་ལ། །ཡས་ཀྱི་བདུད་དུ་གཡོས་པ་བཟློག །མས་ཀྱི་སྲི་རུ་ལངས་པ་བཟློག །ལྟག་པའི་བདུད་དུ་༴། །དཔྲལ་བའི་གཤེད་དུ་འཁོར་བ་༴། །ཕོ་སྲི་མོ་སྲི་ཆུང་སྲི་༴། །དམ་སྲི་དབུལ་སྲི་གོད་སྲི་༴། (༡༠ན)
ཕ་མེས་དུར་སྲི་བཙན་སྲི་༴། །བདུད་ཀྱི་ཐན་ནག་ཕྱག་བརྙན་༴། །ལོ་སྐེག་ཀི་ཀང་གཤེད་བཞི་༴། །ས་ལ་ཞག་རྩིས་འདེབས་པ་༴། །གནམ་ལ་ཟླ་གྲངས་འདེབས་པ་༴། །གཟའ་དང་སྐར་མ་ངན་པ་༴། །ལོ་སྐེག་ཟླ་སྐེག་ཞག་སྐེག་༴། །ཟ་སྐེག་བདུན་ཟུར་ཐམས་ཅད་༴། །དུས་ཚོད་རྩིས་ནས་འདེབས་པ་༴། །གནམ་གྱི་དལ་ཁ་བབས་པ་༴། །ས་ལ་དུག་ནད་ལངས་པ་༴། །ཐོག་བབས་དལ་བབས་ཐམས་ཅད་༴། །བྱས་ཉེས་ཉམས་གྲིབ་ཐམས་ཅད་༴། །ཡུལ་མི་ཁྱིམ་མཚེས་སྨོད་མོ་༴། །གཡས་ན་ཕོ་བརྒྱ་མདའ་འཕེན་༴། །གཡོན་ན་མོ་བརྒྱ་དུག་སྦྱོར་༴། །མདུན་ན་ལངས་ཤིང་སྡོད་པ་༴། །རྒྱ་བ་ན་ཁྱི་བཞིན་འབྲང་བ་༴། མོ་ངན་ལོག་པར་བསྡིགས་པ་༴། །རྨི་ལྟས་མཚན་མ་ངན་པ་༴། །སྲོད་ལ་བྱ་ཕོ་འཚེར་བ་༴། །ཐོ་རངས་སྒོ་ཁྱི་ངུ་བ་༴། །འུག་པ་ཧ་ཧ་རྒོད་པ་༴། །སྲིན་བྱ་ཐོག་ཁར་འཚེར་བ་༴། །ལོགས་ལ་ཝ་སྤྱང་བརྒྱལ་བ་༴། །ལྟས་ངན་བརྒྱད་ཅུ་རྩ་བཞི་༴། །ཕ་ཚན་ནང་གི་རྒྱ་འདྲེ་༴། །མའུ་དེ་ནི་བྱུར་འདྲེ་༴། །དར་ཚན་ནང་གི་སྟོབ་འདྲེ་༴། །ཕོ་བདུད་དལ་ཁ་གཡས་སུ་༴། །མོ་བདུད་དལ་ཁ་གཡོན་དུ་༴། །སྤྱི་བདུད་དལ་ཁ་མཁའ་ལ་༴། །ཕས་ཀྱི་ཕུང་འདྲེ་རྦད་འདྲེ་༴། །ཚུར་གྱི་སྣ་འདྲེ་བྱེད་པ་༴། །ལུས་ལ་ན་ཚ་གཏོང་བ་༴། །ཚེ་ལ་བར་ཆད་བྱེད་པ་༴། །ལྐོག་ན་འབུ་བཞིན་གཡེང་བ་༴། །ངོས་ན་ཏིལ་བརྡུངས་བྱེད་པ་༴། ཁ་ན་དར་བཞིན་འཇམ་པ་༴། །གཏིང་ན་ཚེར་ལས་རྩུབ་པ་༴། །ལུས་ལ་སྦྲུལ་ལྟར་འཁྲིལ་བ་༴། །ངོ་ལ་སྤྲེལ་ལྟར་འཇེག་པ་༴། །མི་ཁ་བྲམ་མཆུ་ཐམས་ཅད་༴། །སྤྱི་རུ་ཆགས་ཆེ་ཐམས་ཅད་༴། །སྒོས་སུ་ཉེས་པ་ཡོད་པ་༴། །རྦོད་གཏོང་རྦོད་འདྲེ་ཐམས་ཅད་༴། །རྨི་ལམ་ངན་པ་ཐམས་ཅད་༴། །ཕོ་བྱོལ་དེ་ནི་གཡས་སུ་བྱོལ། །(༡༠བ)
མོ་བྱོལ་དེ་ནི་གཡོན་དུ་བྱོལ། ཁྱིམ་མཚེས་གཞན་གྱི་ས་རུ་བྱོལ། །སྡང་དགྲ་གདོན་བགེགས་དེ་ལ་བྷྱོ། །ཟ་བར་བྱེད་པའི་བསྲིས་ལ་བྷྱོ། །སྦྱོར་ངན་གཏོང་བའི་ལྟག་ཏུ་བྷྱོ། །ཆོ་འཕྲུལ་ངན་པ་ཐམས་ཅད་དགྲ་ལ་སྒྱུར། །བཟློག་ཅིང་བསྒྱུར་བའི་ལས་མཛོད་ཅིག །བཟློག་བསྒྱུར་ལས་ལ་ཁྱེད་རང་མཁས། །ལྕི་ཡང་རི་བོ་པང་དུ་ལོང་། །དཀའ་ཡང་བདུད་ལ་རྒྱུ་ཞགས་ཐོབ། །ཡས་ཀྱི་བདུད་གཡོས་བྱེད་ཀྱིས་བཟློག །མས་ཀྱི་སྲི་ལངས་༴། །ཉེ་བའི་བྱོལ་ཟོར་༴། །ཕ་ཚན་རྒྱ་འདྲེ་༴། །མའུ་བྱུར་འདྲེ་༴། །བཙན་གྱི་ཀི་ཀང་༴། །ས་བདག་བྱད་ཁ་༴། །རྒྱལ་པོའི་སྨྱོ་འདྲེ་༴། །གཟའ་ཡི་ཀི་ཀང་༴། །མུ་སྟེགས་ངན་སྔགས་༴། །ཐེ་རང་བསྲིས་རྐུན་༴། །ནད་ཁ་རིམས་ཁ་༴། །སྔགས་པའི་ཕུར་ཁ་༴། །བོན་གྱི་བོན་ཟོར་༴། །སུམ་པའི་གླང་ཟོར་༴། །མི་ཉག་བོན་གྱི་འབོ་ལེ་༴། །ལོ་ཟླ་ཞག་སྐེག་༴། །མོ་ངན་རྩིས་ངན་༴། །ལྟས་ངན་མཚན་ངན་༴། །ཕོ་བརྒྱ་མདའ་བརྡར་མཚོན་བརྒྱབ་བཟློག །མོ་བརྒྱ་དུག་གཡོས་ཟས་ཁ་བཟློག །མི་ནག་སྐྱེ་བོའི་ཡ་ག་བཟློག །བྲན་འཁོལ་ངན་པའི་སྨོད་མཆུ་བཟློག །བཟློག་བསྒྱུར་བཅོལ་པའི་འཕྲིན་ལས་མཛོད། །བྷྱོཿ བྷྱོཿ དེ་ནས་སྒོ་དབྱེ་བྱ། གཏོར་ཟོར་རྣམས་ཕྱི་རོལ་དུ་ཁྱེར་ནས་གསེར་སྐྱེམས་བཏང་། གཟུ་དཔང་རྒྱས་པར་སྤྲོ་ན། དངོས་བརྒྱུད་བླ་མ་ཡི་དམ་ཞི་ཁྲོའི་ཚོགས། ཁྱད་བར་དཔལ་ཆེན་རྡོ་རྗེ་ཕུར་པའི་ལྷ། །བསྟན་སྲུང་རྒྱ་མཚོར་བཅས་པའི་ཚོགས་རྣམས་ཀྱིས། །བསྒྲིབས་མེད་ཡེ་ཤེས་སྤྱན་གྱིས་ཉེ་བར་དགོངས། །རྒྱལ་བའི་བསྟན་ལ་རབ་བཞུགས་རིགས་འཛིན་བདག །ཁས་བླངས་སྡོམ་གསུམ་མིག་གི་འབྲས་ལྟར་བསྲུངས། །བསྐྱེད་རྫོགས་ཟབ་མོ་གཞུང་བཞིན་ཉམས་ལེན་པར། །དགྲ་དང་བགེགས་ཀྱིས་ཉེ་བར་འཚེ་བྱེད་(༡༡ན)
ན། །ཡི་དམ་ཞི་ཁྲོས་གཟུ་དང་དཔང་པོ་མཛོད། །ཆོས་སྐྱོང་སྲུང་མས་དཀར་ནག་བདེན་ཤན་ཕྱེ། །དམ་ཅན་རྒྱ་མཚོས་བརྣག་པའི་དགྲ་བོ་སྒྲོལ། །དམ་བཅའ་དུས་ལས་གཡེལ་ལམ་ར་མདའ་བཟློག །ཚེ་འདིའི་རྣམ་གཡེང་ཆེ་ཐབས་རྒྱང་དུ་བསྲིངས། །སྙིང་ཉེས་བྱང་ཆུབ་སྒྲུབ་ལ་ལྷག་པར་གཞོལ། །ཐོས་བསམ་སྒོམ་པས་ཉིན་མཚན་འདའ་བྱེད་པའི། །ཟོལ་མེད་ཆོས་བཞིན་བྱེད་པའི་རྣལ་འབྱོར་ལ།༴༴།ངལ་བ་ཁྱད་བསད་བླ་མ་ཡུན་དུ་བསྟེན། །དཀའ་བ་མ་རྩེག་བསྙེན་སྒྲུབ་མཐའ་རུ་ཕྱིན། །ཆོས་སྲུང་ལུས་དང་གྲིབ་མ་ལྟར་བསྟེན་པའི།༴༴།གཟུགས་བྱང་མིང་རུས་བཏབ་པའི་དགྲ་བོ་འདིས། །རྒྱལ་བའི་བསྟན་བཤིག་བླ་མའི་སྐུ་དགྲ་བྱས། །དགེ་འདུན་སྡེ་བཅོམས་སྐྱེ་འགྲོ་ཡོངས་ལ་འཚེ། །རིགས་འཛིན་སྲུང་མར་བཅས་ལ་བརྙས་བྱས་ན། །རྟགས་མཚན་མི་སྟོན་སྔོན་གྱི་དམ་བཅའ་འགལ། །ཆོས་དབྱིངས་བདེ་བ་ཆེན་པོའི་ངང་ཉིད་ལས། ཁྲག་འཐུང་ཁྲོ་བོའི་འཁོར་ལོར་སྟོན་མཛད་ནས། །ལོག་འདྲེན་གདུག་པའི་དགྲ་སྡེ་མི་སྒྲོལ་ན། །ཞི་བའི་ཚུལ་ལས་འགོངས་ལ་དགོས་པ་ཅི། །དཔལ་ཆེན་སྤྱན་སྔར་རྒྱལ་བའི་བསྟན་པ་མཆོག །སྐྱོང་བར་ཁས་བླངས་ཆོས་སྲུང་རྒྱ་མཚོ་རྣམས། །ལོག་འདྲེན་གདུག་པའི་དགྲ་སྡེ་མི་སྒྲོལ་ན། །འཇིགས་རུང་ཁྲོ་བོར་བསྟན་ལ་ངོ་རེ་གནོང་། །བདེན་པའི་ཚིག་གིས་སྨྲེང་དུ་གསོལ་བ་ལས། །ཡེ་ཤེས་ལྡན་ལ་བརྫུན་གཏམ་སུ་ཡིས་ནུས། །དེ་ཕྱིར་མཐུ་སྟོབས་ནུས་པའི་དཔུང་བསྐྱེད་ལ། །མངོན་སྤྱོད་དྲག་པོའི་འཕྲིན་ལས་མྱུར་དུ་མཛོད། །ཟོར་བསྐུལ་ནི། དུག་ཅན་ཚེར་མའི་ཤིང་དག་ལ། །ལྟས་ངན་འབྱུང་པོའི་སྒྲོ་ཡིས་བརྒྱན། །གནམ་ལྕགས་འབར་བའི་མདེའུ་བཙུགས། །དུག་དང་མཚོན་(༡༡བ)
ཆར་བྱིན་བརླབས་པ། །ལོག་འདྲེན་དགྲ་བགེགས་སྟེང་དུ་བྷྱོ། །སྲོག་རྩ་ཆོད་ལ་རྡུལ་དུ་རློག །བྱད་ཁ་བཟློག་ལ་ཕུར་ཁ་སྒྱུར། །དྲག་པོའི་འཕྲིན་ལས་བསྒྲུབ་པར་མཛོད། །གྲུ་གསུམ་ས་ཡི་ཀོང་བུའི་ནང་། །དམར་ནག་ཁྲག་གི་མཚོ་བསྐྱིལ་བར། །ཧ་ལ་ནག་པོས་དར་བཏགས་པ།༴༴།དམེ་ཡུགས་ཉམས་གྲིབ་ཅན་དག་གི །ནུས་པ་ཉམས་པར་མ་བྱས་པའི། །ལེགས་བཏབ་ཡུངས་ཀར་གང་བཟང་འདི།༴༴།ཕུང་ཤུལ་དུར་ཁྲོད་ལ་སོགས་པའི། །འཇིགས་སུ་རུང་བའི་རྡོ་ནག་པོ། །དྲག་པོ་རྫས་ཀྱིས་ངར་བཏགས་པ།༴༴།གནམ་ལྕགས་འབར་བའི་སྣོད་ནང་དུ། །འབྲུ་ནག་ངར་བཏགས་དཔལ་གཏོར་ལ། །དྲག་པོའི་རྫས་ཀྱིས་ཉེར་བརྒྱན་པ། །དུག་དང་མཚོན་ཆར་བྱིན་བརླབས་ཏེ། །ལོག་འདྲེན་དགྲ་བགེགས་སྟེང་དུ་བྷྱོ། །སྲོག་རྩ་ཆོད་ལ་རྡུལ་དུ་རློག །བྱད་ཁ་བཟློག་ལ་ཕུར་ཁ་སྒྱུར། །དྲག་པོའི་འཕྲིན་ལས་བསྒྲུབ་པར་མཛོད། །ཅེས་གཏོར་ཟོར་འཕང་། །མེ་ཆུའི་རྒྱས་འདེབས། བདག་ཉིད་སྐད་ཅིག་རྡོ་རྗེ་སྲིན་པོའི་སྐུ། །ཞེས་སོགས་རྣམས་བརྗོད། གཏོར་གཞོང་འོག་ཏུ་དམ་སྲི་མནན་པ་ནི༔ ཧཱུཾ། དཔལ་ཆེན་འཁོར་དང་བཅས་པ་རྣམས༔ སྔོན་གྱི་ཐུགས་དམ་རྒྱུད་བསྐུལ་གྱིས༔ དམ་སྲི་བར་གཅོད་རྡུལ་དུ་རློག༔ བཅོལ་བའི་འཕྲིན་ལས་གྲུབ་པར་མཛོད༔ ཨཱོཾ་ལཾ། ཧཱུཾ་ལཾ་དམ་སྲི་བར་ཆད་ཐམས་ཅད་ནྲྀ་ཏྲི་སརྦ་སྟཾ་བྷ་ཡ་ནན༔ ཅེས་མནན་པར་བྱའོ༔ ཧཱུཾ། དཔལ་ཆེན་འཁོར་བཅས་རོལ་པའི་བྲོ༔ དམ་སྲིའི་སྙིང་ལ་ཆེམས་སེ་ཆེམ༔ ཁྲོ་བོ་ཁྲོ་མོ་རོལ་པའི་བྲོ༔ དགྲ་བགེགས་སྙིང་ལ་ཆེམས་སེ་ཆེམ༔ ཁྲོ་བོ་རྣམས་ཀྱིས་བྲོ་བརྡུངས་ལ༔ ཁྲོ་བོ་རྣམས་ཀྱིས་རྒྱས་འདེབས་སོ༔ ཨིག་ནན་བིག་ནན༔ སྟཾ་བྷ་ཡ་ནན༔ མཱ་ར་ཡ་
ནན༔ ཆད་མཐོ་བསྟན་སྐྱོང་སོགས་མཇུག་ཆོག་རྣམས་དཀྱུས་ལྟར་བྱ། དགྲ་བགེགས་སྒྲོལ་བའི་མན་ངག་ཟབ་ཁྱད་ཅན་དག །སློབ་དཔོན་ཆེན་པོ་པདྨའི་ཐུགས་ཀྱི་སྙིང་ཁུ་ཕུར་པ་གོང་ཁུག་མའི་གདམས་པ་བཅོས་ལྷད་དང་བྲལ་བ་ལ་མཁས་ཤིང་གྲུབ་པ་བརྙེས་པའི་རྡོ་རྗེའི་སློབ་དཔོན་གྱི་ཞབས་པད་ཡུན་དུ་བསྟེན་པའི་གསུང་གི་བདུད་རྩི་འཐུང་བར་བྱོས་ཤིག །སྨྲས་པ། བསམས་པ་ཙམ་གྱིས་མཆོག་ཐུན་དངོས་གྲུབ་ཆར་དུ་འབེབས་ལ་ཡིད་བཞིན་ནོར། །མ་རུངས་བདུད་སྡེའི་དཔུང་ཚོགས་འཇོམས་ལ་གནམ་ལྕགས་འབར་བའི་རྡོ་རྗེའི་ཐོག །ལོག་འདྲེན་དགྲ་བོའི་སྙིང་ཁྲག་འཐུང་ལ་གཏུམ་ཆེན་ཤན་པ་ཁྲོས་པའི་གར། ཁྱབ་བདག་ཀུན་བཟང་ཧེ་རུ་ཀ་དཔལ་དཔལ་ཆེན་ཕུར་བུར་གྲགས་མིན་ནམ། །གང་དེའི་གདམས་པའི་ཉིང་ཁུ་ལྷ་བྲག་གཏེར། །བདུད་དཔུང་ཕྱེར་འཐག་དམར་ཆེན་གཏོར་མའི་ལས། ཁྲོ་བོ་རོལ་པར་ཡོངས་གྲགས་སྤུ་གྲི་ཡིས། །མི་མཐུན་དགྲ་སྡེའི་སྲོག་རྩ་ཅིས་མི་གཅོད། །དེ་ཕྱིར་ཚུལ་འདིའི་ལས་རིམ་འཁྲུལ་མེད་དུ། །སྔ་འགྱུར་ཆོས་ཀྱི་དགོངས་དོན་ལྟར་བཀོད་ལས། །གསར་མའི་རྒྱས་བཀབ་རང་བཟོའི་གཟུ་ལུམ་གྱིས། །ཚད་ལྡན་མཁས་མང་ཁྲེལ་བའང་འདི་ན་མེད། །དགེ་འདིས་བསྟན་འགྲོའི་ཕན་བདེ་རྣམ་པར་རྒྱས། ཁྱབ་བདག་བླ་མ་ཟུང་འཇུག་ཞབས་པད་བརྟན། །གསང་ཆེན་ཐེག་པ་མཆོག་གི་འོད་སྟོང་གིས། །དོན་གཉིས་འབྲས་བུའི་སྣང་བ་རྒྱས་གྱུར་ཅིག །རིགས་འཛིན་ཆེན་པོ་རྒོད་ཀྱི་ལྡེམ་ཕྲུ་ཅན་གྱི་གཏེར་མའི་རྡོ་རྗེ་ཕུར་པ་ལུགས་གསུམ་ལས། འཕྲིན་ལས་བཅོལ་བའི་ཚིག་རྣམས་ལྷ་ཁྲར་འདུག་ཀྱང་། འབྲིང་པོ་སྤུ་གྲི་ལྷ་ནག་ལ་སྦྱོར་དུ་རུང་བའི་དབང་དུ་བྱས་པའི་ཁྲོ་བོ་རོལ་པའི་གཏོར་བཟློག་བདུད་སྡེ་ཕྱེ་མར་འཐག་པའི་མཚོན་ཆ་ཞེས་བྱ་བ་འདི་ནི་རྒྱ་ཧོར་གྱི་རྒྱལ་ཁམས་(༡༢བ)
མྱུལ་བའི་ཚེ་བྱང་ཕྱོགས་ཏལ་ཁར་ཡོད་ཐོག་དཔལ་ཆེན་པོ་ཉིད་ཀྱི་སྒྲུབ་པ་དང་གཏོར་བཟློག་གི་ཆོག་སྒྲིགས་བྱས་ན་བོད་ཁ་བ་ཅན་གྱི་བདེ་ཐབས་བསྒྲུབ་པ་ལ་གེགས་བྱེད་ཀྱི་བདུད་ཚོགས་རྣམས་མྱུར་དུ་ཞི་བར་འགྱུར་བའི་མཚན་མ་གསལ་པོ་མཐོང་བས་རྐྱེན་བྱས་ཏེ། འཁོན་སྟོན་ཆོས་ཀྱི་རྒྱལ་པོ་དཔལ་འབྱོར་ལྷུན་གྲུབ་སོགས་ཡོངས་འཛིན་དམ་པ་ཆོས་བཞིན་དུ་སྤྱོད་པ་དུ་མའི་བཀའ་དྲིན་གྱིས་འཚོ་བའི་ཟ་ཧོར་གྱི་རིགས་ལས་སྔགས་སྨྱོན་གང་ཤར་རང་གྲོལ་ལམ་མིང་གཞན་ངག་དབང་བློ་བཟང་རྒྱ་མཚོས་དེ་འཕྲལ་དུ་དབུ་བཙུགས་ནས་བྱང་ཕྱོགས་འབྲི་ཆུའི་འགྲམ་དུ་རྫོགས་པར་སྦྱར་བའི་ཡི་གེ་པ་ནི་འཇམ་དཔལ་ལོ།། །།སརྦ་མངྒ་ལཾ།།