གྲྭ་བཙུན་དབང་ཕྱུག་ལ་གདམས་པའི་སེམས་ཁྲིད།
༄༅། །གྲྭ་བཙུན་དབང་ཕྱུག་ལ་གདམས་པའི་སེམས་ཁྲིད་བཞུགས་སོ།།
༄༅། །བླ་མ་དམ་པ་ལ་ཕྱག་འཚལ་ལོ། །འོ་ཕ་བཟང་བུ། ཚེ་འདིར་སྣང་གི་བྱ་བཞག་གང་ལ་ཡང་སྙིང་པོ་མི་འདུག མི་རྣམས་ན་ལུགས་ལ་ལྟོས་དང་། ཤི་ལུགས་ལ་ལྟོས་དང་། འཆི་སྙམ་ཡིད་ལ་མེད་པར་འདུག་རྩིས་ཀྱི་བྱ་བས། རང་མགོ་སྐོར་ལུགས་ལ་ལྟོས་དང་། རང་ཡང་ནམ་ན་འོང་ཅི་ཤེས། འཆི་བ་ད་ལྟ་ཨེ་
སླེབ་ཅི་ཤེས། ན་བ་དང་འཆི་བའི་རྐྱེན་ཐོག་ཏུ་བབ་འོང་ན་མི་འཇིགས་པའི་གདེང་ཅི་ཡོད། དེས་ན་རང་གི་རྒྱུད་ལ་བརྟག་དཔྱད་ཡང་ཡང་མཛད་དགོས། ད་རེས་ལུས་རྟེན་ཕུན་སུམ་ཚོགས་པ་འདི་འདྲ་ཐོབ་ཅིང་། ཆོས་ཟབ་མོ་དང་འཕྲད་པའི་དུས་འདིར། བསམ་བློ་གཏོང་ལུགས་ནོར་མི་ཉན། བསམ་ཚད་
ཐམས་ཅད་ཆོས་དང་མཐུན་དགོས། བྱས་ཚད་སྤྱོད་ཚད་ཐམས་ཅདནོར་མི་ཉན། བྱས་ཚད་སྤྱོད་ཚད་ཐམས་ཅད་ཆོས་དང་མ་འགལ་བ་དགོས། ཆོས་དང་མཐུན་མི་མཐུན། སྡོམ་པ་དམ་ཚིག་དང་འགལ་ཨ་ཡོད་མི་ཡོད་རང་སེམས་དཔང་པོར་བཞག་སྟེ་ཁ་ནང་དུ་ལོག་ནས་རང་གིས་ཞུ་དག་བྱེད་དགོས། གཞན་གྱིས་ཟེར་ཚད་ཐམས་ཅད་ལ་ཆ་འཇོག་མེད། ཆོས་ཤིག་སྒྲུབན་ཡང་ལྟར་སྣང་གི་རྗེས་སུ་མ་འབྲངས། ཚེ་འདིའི་འཁྲི་བ་དང་རང་འདོད་ཆོད་དགོས། བདག་འཛིན་མ་ཆོད་ན་གཞན་གྱིས་རྩིས་འཇོག་གིས་ཆོས་པའི་མིང་བཏགས་ཀྱང་ཕན་པ་མེད། རང་འདོད་ཤོརནས་ནམ་ཞིག་བསླུ་འོང་། རང་འདོད་དང་བདག་འཛིན་ཆོད་ན། གཞན་གྱིས་བཟང་པོར་མ་བརྩིས་ཀྱང་མི་སྐྱོན་ཏེ། རང་བདག་འཛིན་དང་ཉོན་མོངས་ཀྱི་དབང་དུ་མ་ཤོར་ན། ཚིག་ཐམས་ཅད་ཁ་ནང་རླངས་པ་
ཡིན། རྐྱེན་ཐམས་ཅད་མདང་དགོང་གི་རྨི་ལམ་དང་འདྲ། བསྟོད་སྨད་ཐམས་ཅད་བྲག་ཆ་དང་མཚུངས་པས་ཕན་གནོད་གང་ཡང་། མེད། འོན་ཀྱང་དེ་ལ་བདེན་པར་བཟུང་ན། རང་ལ་ཆག་སྒོ་ཆེ་སྟེ་འཁོར་བ་དང་ངན་སོང་དུ་འཕེན་འོང་། མ་ཟད་ཚེ་འདིར་ཡང་འདུག་མི་བདེ་སེམས་ཀྱང་མི་སྐྱིད། དགེ་སྦྱོར་མི་འཕེལ། མི་འདོད་པ་ཇེ་ཆེར་འོང་ངེས་བསླུ་བ་མེད། བདེན་པར་མ་བཟུང་ན་འཆིང་མི་ནུས། མཐར་ཐུགས་མྱང་འདས་སངས་རྒྱས་ཀྱི་གོ་འཕང་ཐོབ། གནས་སྐབས་ཚེ་འདིར་ཡང་སེམས་སྐྱིད། ཆོས་འཕེལ་སྡིག་སྒྲིབ་དག ཕྱི་མ་དག་པའི་ཞིང་དུ་སྐྱེ་བ་སོགས་ཚེ་འདི་ཕྱིའི་བདེ་སྐྱིད་ཐམས་ཅད་རང་འདོད་བདག་འཛིན་ཆོད་པ་ལས་བྱུང་བས། རྣམ་པ་ཀུན་ཏུ་བདག་འཛིན་དང་། རང་འདོད་འདི་ཆོད་དགོས། བདག་འཛིན་དང་རང་འདོད་ཟེར་བ་འདི་ཧ་མ་གོ་
ན། ངས་ངོ་སྤྲོད་ཅིག་འདེབས། ཚུལ་ཇི་ལྟར་ངོ་སྤྲདན། འདི་ལྟ་སྟེ། རང་ལ་ལེགས་པ་དང་སྙན་གྲགས་ཤིག་འོང་དུས་དགའ་ཡི་ལེ་དང་། མི་འདོད་པ་ཆེ་ཕྲ་ཆུང་གསུམ་དང་ཐན་ཚིག་ཟེར་ལུགས་དང་། མིག་གིས་བལྟ་ལུགས་བཟང་ངན་གཅིག་གིས་སེམས་ལ་གཟེར་ཆ་ལེ་ལྷང་ངེ་ཐོན་འོང་བ་དེ་བདག་འཛིན་ཡིན། ཐམས་ཅད་ཀྱིས་དེ་ལ་བརྟགས་དཔྱད་མ་ཐུབ་པས་ལན་མ་གཏོགས་ཧ་མི་གོ་རྒྱུ་མེད། ཧ་གོ་རྩ། རྣམ་པ་ཀུན་ཏུ་དེ་ངོས་ཟིན་དགོས། དེ་འདུལ་ཐུབ་ཚོ་དགོས། དགྲ་ངོ་མ་དེ་ཡིན། དེ་ངོས་ཟིན་ཅིང་། དེ་འདུལ་ཐུབ་ན། བླ་མའི་མིང་མ་ཐོག་ཀྱང་དོན་ལ་བླ་མ་ཡིན། གཞན་གྱིས་མཁས་པར་མ་བརྩིས་ཀྱང་དོན་ལ་མཁས་པ་ཡིན། གྲུབ་ཐོབ་མ་ཟེར་ཡང་དོན་ལ་གྲུབ་ཐོབ་ཡིན། མཁས་པ་ཡིན་ཏེ་མདོ་རྒྱུད་བསྟན་བཅོས་ཐམས་ཅད་ཀྱི་རྩ་བ་དེ་ཡིན། གྲུབ་ཐོབ་ཡིན་ཏེ་རང་
སེམས་ལ་དབང་ཐོབ་པ་ལས་ལྷག་པ་ཅི་ཞིག་གྲུབ་པ་ཐོབ། བདག་འཛིན་མ་ཆོད་ན། མངོན་ཤེས་ཕྲན་བུ་དང་། ས་བཅང་རྡོ་ཕུག་ལྕགས་མདུད་ཙམ་ལ་སྙིང་པོ་ཅི་ཡོད། འོན། བདག་འཛིན་དེ་ངོས་ཟིན་དུས་གཉེན་པོ་གང་གིས་ཐབས་ཅི་འདྲ་བྱེད་དེ་འདུལ་ཟེརན། འོ་བདག་འཛིན་ལྷོང་གིས་སྐྱེ་འོང་དུས། ཕྱིར་མ་སྤང་། དང་དུ་མ་ལེན། སྤུ་མ་བརྗེ། མདོག་མ་བསྒྱུར། ཡང་བཞག་ཡང་དཔྱད་མ་མཛད་པར། ཐད་ཀར་རང་བབས་སུ་ཞོག་དང་། རང་སན་གྲོལ་འདུག་པས། གཞན་གཅིག་གིས་གྲོལ་བཅུག་མི་དགོས། ཁོ་རང་རང་ས་ན་ཤར་ཐོགནས། མ་གྲོལ་བའི་ཆོས་གཅིག་ཀྱང་མི་འདུག ཕ་བཟང་བུ། སྐྱོན་དང་ཡོན་ཏན་གཉིས་ཀྱི་རྩ་བ་ཡེངས་མ་ཡེངས་སམ། རིག་མ་རིག་གཉིས་པོ་ཡིན། དེ་ངོ་ཤེས་དགོས། ཤེས་ཐོག་ཏུ་གོམས་ཐུབ་དགོས། གོམས་ཐོག་ཏུ་རྐྱེན་
དང་བསྲེ་ཐུབ་དགོས། སྐད་ཅིག་ཙམ་ཡང་རྐྱེན་ཁར་གཏོང་མི་ཉན། སྐྱིདན་ཡང་དེ་གཉིས་ངོས་ཟིན་དགོས། སྡུག་ན་ཡང་དེ་གཉིས་ངོས་ཟིན་དགོས། དེ་ལ་གོམས་འདྲིས་བྱེད་ཐུབ་ན། ནམ་ཞིག་ན། སེམས་ཅན་ཐམས་ཅད་ལ་མི་བཟོད་པའི་སྙིང་རྗེ་དང་། འཁོར་བ་ལ་ངེས་འབྱུང་། རྒྱུ་འབྲས་ཕྲ་རགས་ལ་བསླུ་བ་མེད་པའི་ཡིད་ཆེས། བླ་མ་སངས་རྒྱས་དངོས་མཐོང་གི་དད་པ་དང་། བསྟན་པ་ལ་ལྷག་བསམ། ན་དགའཤི་སྐྱིད་གཅིག་ངང་གིསཐོན་འོང་། དེ་མ་འོང་བར་དུ་ཡེངས་མ་བཅུག ཕ་བཟང་བུ། ད་རེས་ཡིན་གྱིས་ཕྱི་བཞག་མ་བྱེད། འདུན་མ་ཐམས་ཅད་བསྟན་ཐོག་གཅིག་ཏུ་ཆོད། སྙིང་དམར་པོ་སྟོན་ཀྱང་དེ་ལས་ཟེར་རྒྱུ་མེད། ཚིག་མི་སྙན་ཀྱང་དོན་ཟབ་མོ་ཡོད། མཁས་པ་བརྒྱ་ལ་ཞུས་ཀྱང་རྩ་བ་དེ་གཉིས་ཀྱིནང་དུ་འདུས། གྲུབ་ཐོབ་བརྒྱ་ལ་གཏུགས་ཀྱང་འགྲོ་ས་བབ་ས་དེ་
ལས་མེད་སྣང་ནི་ཤར་དུ། མ་རྩ་ཕྲན་ནི་བློ་རྨོངས། ཆོས་རང་རྒྱུད་ལ་མ་ལོན། དོན་ཟབ་མོ་རྫོགས་ཆེན་གྱི་ཉམས་ལེན་ཕར་ཞོག ཐ་ན་སྙན་ངག་ལེགས་པར་རེ་དང་། ཡི་གེའི་འབྲུ་དག་པའི་ཞིབ་ཆ་ཙམ་ཡང་མི་ཤེས་པས། གདམས་ངག་ཉམས་ལེན་གཞན་ལ་ཞུ་ཕོད་དཀའ་མོ་རེདནའང་། ཁྱེད་ཀྱི་གསུང་ནན་མ་ལྡོག་ཙམ་དུ་བྲིས་པས། ཉེས་འགལ་གང་མཆིས་བླ་མ་ལྷ་ལ་སྙིང་ནས་བཤགས་ཤིང་། དགེ་བས་ཁྱེད་ལ་ཕན་ཐོགས་ནས་བསྟན་པ་དང་སེམས་ཅན་གྱི་དོན་རྒྱ་ཆེན་པོ་འབྱུང་བར་སྨོན། སྤྱིར་དགེ་སྦྱོར་གང་བྱེད་ཀྱི་གཤམ་དང་། རྟེན་གསུམ་དང་། བླ་མ་དང་། དགེ་འདུན་རྣམས་ཀྱི་མདུན་དང་བྱ་བྱིའུ་འབུ་སྲིན་རྟ་ཁལ་བཞོན་པ། མི་སྐྱ་ཕོ་མོ་སོགས་གང་དྲན་གང་མཐོང་ཐམས་ཅད་ཀྱི་སྐབས་སུ། སེམས་བསྐྱེད་རྒྱ་ཆེན་པོས། རང་འདོད་དང་བྲལ་བའི་བསྔོ་
བ་དང་སྨོན་ལམ་བཏབ། རྒྱུནས་འབྲུ་ཆུ་ཐིག་ཡན་ཆོད་ཀྱི་ཚོགས་བསགས་སྒྲིབ་སྦྱང་གིས་སངས་མ་རྒྱས་ཀྱི་བར་དུ་གལ་ཆེ། དེ་ཐམས་ཅད་ཞེན་མེད་གཟའ་གཏད་དང་བྲལ་བ་རིག་པ་ཁྱབ་གདལ་གཅིག་གིས་ནམ་ཡིན་རྒྱས་ཐེབ་དགོས་པ་འདྲ། ཞེས་པའང་རིག་འཛིན་མཁའ་སྤྱོད་གླིང་གི་གྲྭ་བཙུན་དབང་ཕྱུགནས་རྟེན་ལྷ་རེག་བཅས་སྐུལ་ངོར་རྨོངས་རྒན་གང་ཤར་དབང་པོས་བྲིས་སོ།།