ཐེག་པ་ཆེ་ཆུང་གི་ཁྱད་པར།
དེ་བས་ན་ཐེག་པ་ཆེ་ཆུང་གི་ཁྱད་པར་ནི། རྣམ་རིག་སྨྲ་བ་དག་གི་ལྟར་ན་ཁྱད་པར་གྱི་ཆོས་བཅུས་འབྱེད་དེ། ཐེག་བསྡུས་ལས། ཤེས་བྱའི་གནས་དང་མཚན་ཉིད་དེར་འཇུག་དང་། །དེ་ཡི་རྒྱུ་འབྲས་དེ་རབ་དབྱེ་བ་དང་། །བསླབ་པ་གསུམ་དང་དེ་འབྲས་སྤངས་པ་དང་། །ཡེ་ཤེས་ཐེག་པ་མཆོག་གྱུར་ཁྱད་པར་འཕགས། །ཞེས་འབྱུང་ངོ་། །དེའང་ཤེས་བྱའི་གནས་ཀུན་གཞིའི་རྣམ་ཤེས། ཤེས་བྱའི་མཚན་ཉིད་ཀུན་བརྟགས། གཞན་དབང། ཡོངས་གྲུབ་གསུམ། མཚན་ཉིད་དེར་འཇུག་པ་རྣམ་རིག །དེར་འཇུག་པའི་རྒྱུ་འབྲས་ཕར་ཕྱིན་དྲུག །དེ་བསྒོམས་པའི་རབ་ཏུ་དབྱེ་བ་ནི་ས་བཅུ། ལྷག་པའི་ཚུལ་ཁྲིམས་ནི་བྱང་སྡོམ། ལྷག་པའི་སེམས་ནི་དཔའ་བར་འགྲོ་བ་སོགས་ཀྱི་ཏིང་ངེ་འཛིན། ལྷག་པའི་ཤེས་རབ་ནི་རྟོག་མེད་ཀྱི་ཡེ་ཤེས། དེ་འབྲས་སྤངས་པ་ནི་མི་གནས་པའི་མྱང་འདས། དེ་འབྲས་ཡེ་ཤེས་ནི་སྐུ་གསུམ་མོ། །དེས་ན་ཁྱད་པར་བཅུ་པོ་འདི་དག་དང་ལྡན་ན་ཐེག་ཆེན། མི་ལྡན་ན་ཐེག་དམན་དུ་ཤེས་པར་བྱ་ཞིང་། དེ་བཞིན་དུ་ཁྱད་པར་བཅུ་པོ་དེ་དག་ཐམས་ཅད་དམ་གང་རུང་དང་འབྲེལ་བའི་བརྗོད་བྱ་ཅན་གྱི་གསུང་རབ་ནི་ཐེག་ཆེན་གྱི་སྡེ་སྣོད་དུ་བཞེད་དོ། །ཡང་ན་དབུ་སེམས་ཐམས་ཅད་ཀྱི་འདོད་པ་ལྟར། གོང་དུ་བཤད་པའི་ཆེན་
པོ་བདུན་གྱི་ཚུལ་དང་ལྡན་མི་ལྡན་དང་། བརྗོད་བྱ་དེ་དག་དང་འབྲེལ་མི་འབྲེལ་སོགས་ཀྱིས་སོ། །འདི་སྐབས་སྡུད་པ་ལས། གང་དག་བདེ་གཤེགས་ཉན་ཐོས་འགྱུར་བར་བྱ་སྙམ་དང་། །རང་སངས་རྒྱས་དང་དེ་བཞིན་ཆོས་རྒྱལ་འགྱུར་འདོད་པ། །བཟོད་པ་འདི་ལ་མ་བརྟེན་ཐོབ་པར་མི་ནུས་ཏེ། །དཔེར་ན་ཕ་རོལ་ཚུར་རོལ་འགྲོ་ངོགས་མི་མཐོང་བཞིན། །ཞེས་གསུངས་པ་དང་། སློབ་དཔོན་ཀླུས། བཅོམ་ལྡན་དངོས་དང་དངོས་མེད་པ། །མཁྱེན་པས་ཀཱཏྱཱ་ན་ཡི། །གདམས་ངག་ལས་ནི་ཡོད་པ་དང་། །མེད་པ་གཉིས་ཀ་དགག་པར་གསུངས། །ཞེས་གསུངས་པ་སོགས་ཀྱི་ཉན་རང་རྣམས་ཀྱིས་ཀྱང་དངོས་པོའི་དེ་ཁོ་ན་ཉིད་རྟོགས་པས་འཁོར་བ་ལས་བརྒལ་ཏེ། རང་རང་གི་ལྷག་མེད་མྱང་འདས་མངོན་དུ་བྱེད་པ་ཡིན་པའི་ཕྱིར། ལྟ་བ་རྐྱང་པས་ནི་ཐེག་པ་ཆེ་ཆུང་དབྱེ་བར་དཀའ་བས་གཙོ་བོར་ཐབས་ལ་མཁས་པའི་སྤྱོད་པ་སོགས་ཀྱི་སྒོ་ནས་དབྱེ་བར་ཤེས་དགོས་ཏེ། རིན་ཆེན་ཕྲེང་བ་ལས། ཉན་ཐོས་ཐེག་པ་དེ་ལ་ནི། །བྱང་ཆུབ་སེམས་དཔའི་སྨོན་ལམ་དང་། །སྤྱོད་པ་ཡོངས་བསྔོ་མ་བཤད་དེས། །བྱང་ཆུབ་སེམས་དཔར་ག་ལ་འགྱུར། །བྱང་ཆུབ་སྤྱོད་ལ་གནས་པའི་དོན། །མདོ་སྡེ་ལས་ནི་བཀའ་མ་སྩལ། །ཐེག་པ་ཆེ་ལས་བཀའ་སྩལ་པ། །དེ་ཕྱིར་མཁས་པ་རྣམས་ཀྱིས་གཟུང་། །ཞེས་གསུངས་པའི་ཕྱིར་རོ། །ཐེག་པ་ཆུང་ངུ་དེ་ལ། དམན་པ་ཉན་ཐོས་ཀྱི་ཐེག་པ་དང་འབྲིང་རང་རྒྱལ་གྱི་ཐེག་པ་གཉིས་སུ་དབང་པོ་དང་འབྲས་བུ་མཆོག་དམན་གྱིས་དབྱེར་མོད་ཀྱི། དེ་
གཉིས་ལམ་ཕལ་ཆེར་རྣམ་གཞག་མཚུངས་པར་སའི་དངོས་གཞི་ལས་བཤད་དོ། །ཐེག་ཆེན་ལ་རྒྱུ་ལམ་དུ་བྱེད་པ་མཚན་ཉིད་ཀྱི་ཐེག་པ། འབྲས་བུ་ལམ་དུ་བྱེད་པ་གསང་སྔགས་རྡོ་རྗེ་ཐེག་པ་ཞེས་གཉིས་སུ་ཕྱེ་ཞིང་། སྔ་མ་ལ་དབུ་སེམས་གཉིས་འབྱེད་ཀྱང་དེ་དག་ལ་ཐེག་པ་ཐ་དད་པའི་རྣམ་གཞག་བྱར་མེད་དེ། ལྟ་བ་ལ་ཅུང་ཟད་ཁྱད་ཞུགས་ཀྱང་འབྲས་བུ་ལ་ཁྱད་པར་མེད་པའི་ཕྱིར་དང་། ལམ་མྱུར་བུལ་ཙམ་གྱིས་ནི་ཐེག་པ་སོ་སོར་འབྱེད་མི་ནུས་པའི་ཕྱིར་རོ། །ཐེག་པ་ཐམས་ཅད་ཀྱང་སྤྱིའི་མཐར་ཐུག་ཐེག་པ་གཅིག་ཏུ་ངེས་ཏེ། ཉན་རང་གི་ཐེག་པའི་མྱང་འདས་དེ་གནས་སྐབས་མྱང་འདས་ཙམ་དུ་བཞག་གི །མཐར་ཐུག་གི་མྱང་འདས་མཚན་ཉིད་པ་མ་ཡིན་པའི་ཕྱིར་ཏེ། མྱང་འདས་དེ་དག་ལ་སླར་དེ་བཞིན་གཤེགས་པས་འོད་ཟེར་གྱིས་བསྐུལ་ནས་བྱང་ཆུབ་ཆེན་པོའི་གནས་སུ་འཁྲིད་དགོས་པའི་ཕྱིར་རོ། །གནས་སྐབས་བྱེ་བྲག་ཏུ་ཐེག་པ་སོ་སོར་གཞག་དགོས་ཏེ། སོ་སོ་ལ་ལམ་དང་འབྲས་བུ་སོགས་ཀྱི་ཚུལ་རང་རྐང་རེ་ཡོད་པའི་ཕྱིར་རོ། །འདི་སྐབས་ཉན་ཐོས་པ་དག་གིས། ཐེག་ཆེན་གྱི་ཆོས་འཁོར་ཕྱི་མ་གཉིས་ཁས་མི་ལེན་ཞིང་། དེ་གཉིས་ཀྱི་མདོ་སྡེ་རྣམས། བཀའ་རྟགས་ཀྱི་ཕྱག་རྒྱ་བཞི་དང་འགལ་བ་དང་།༡ འདུལ་བ་ལ་མི་སྣང་། མདོ་སྡེ་ལ་མི་འཇུག །ཆོས་ཉིད་དང་འགལ་བ་དང་།༢ སྔགས་བཟླ་བ་དང་། ཁྲུས་དང་། སྨྱུང་བར་གནས་པས་སྡིག་པ་འདག་པ་སོགས་ཕྱི་རོལ་པའི་ལམ་བསྟན་པ་དང་།༣ སངས་རྒྱས་ཀྱི་བསྟན་པ་སྡེ་པ་
བཅོ་བརྒྱད་དུ་འདུས་པར་གསུངས་པ་ལས། དེར་མ་འདུས་པ་དང་། ༤ གཞན་ཡང་གྲགས་པ་དང་འགལ་བ་སོགས་སྐྱོན་མང་པོ་བརྗོད་ནས་སུན་འབྱིན་པར་བྱེད་དོ། །