འཕགས་པ་ཀུན་དགའ་བོ།
༈ དེ་ལྟར་ཐེག་པ་ཆེ་ཆུང་གི་བཀའ་རྒྱལ་སྲས་ཉན་ཐོས་རྣམས་ཀྱིས་ལེགས་པར་བསྡུས་པ་དག་དར་རྒྱས་སུ་མཛད་པའི་ཚུལ་ནི། དེ་ནས་རབ་ཏུ་བྱུང་བ་རྣམས་ཀྱང་སྟོན་པ་བཞུགས་པའི་དུས་སུ་བདག་ཅག་ཡེངས་ཏེ་བག་མེད་དུ་གྱུར་པས་ཁྱད་པར་གྱི་གནས་མ་ཐོབ། ད་ནི་དུས་སུ་འཕགས་པ་ཀུན་དགའ་བོ་ལ་གདམས་ངག་ཡང་ནོད་པར་བྱེད་ཅིང་བག་ཡོད་པས་བསྟན་པ་ལ་བརྩོན་པར་མ་བྱས་ན་རབ་ཏུ་འཁྱམས་པར་འགྱུར་རོ་སྙམ་ནས་དགེ་བའི་ཕྱོགས་ལ་བརྩོན་པར་བྱས་པས། ཉིན་རེ་བཞིན་ཡང་འབྲས་བུ་བཞི་ཐོབ་པ་མང་དུ་བྱུང་བར་གྱུར། ཚུལ་དེ་ལྟ་བུས་ལོ་བཞི་བཅུ་ཙམ་དུ་འཇིག་རྟེན་དགེ་བ་ལ་གནས་པར་གྱུར་ཞེས་གྲགས། དེའི་ཚེ་མ་སྐྱེས་དགྲས་འཕགས་པ་ཀུན་དགའ་བོ་ནི་སངས་རྒྱས་དང་འདྲ་བའི་ཉན་ཐོས་སོ་ཞེས་བསྔགས་ནས། འཁོར་དགྲ་བཅོམ་པ་ལྔ་སྟོང་དང་བཅས་པ་ལ་ལོ་ལྔའི་བར་ཡོ་བྱད་ཀྱིས་བསྟབས་པའི་མཆོད་པ་བྱས་སྐབས། སྒྱུ་མའི་རིག་སྔགས་ལ་ཤིན་ཏུ་མཁས་པའི་བྲམ་ཟེ་བྷ་ར་དྷྭ་ཛས་འཁོར་རྣམས་ལ་ཆོ་འཕྲུལ་བསྟན་པ། ཀུན་དགའ་བོའི་རྫུ་འཕྲུལ་གྱི་ནུས་པས་ཚར་བཅད་ནས་ཞག་བདུན་གྱི་ཁོངས་སུ་བྷ་ར་དྷྭ་ཛ་འཁོར་བྲམ་ཟེ་ལྔ་བརྒྱ་སྐྱེ་བོའི་ཚོགས་ཁྲི་ཕྲག་དང་བཅས་པ་བདེན་པ་ལ་བཀོད། དེ་ནས་དུས་གཞན་ཞིག་ན་ཀུན་དགའ་བོ་དགེ་འདུན་དང་བཅས་པ་ལ་ཁྱིམ་བདག་ཤ་ནའི་གོས་ཅན་གྱིས་ལོ་ལྔར་དུས་སྟོན་ཆེན་པོ་བྱས། ཁྱིམ་བདག་དད་དེ་འཕགས་པའི་དྲུང་དུ་རབ་ཏུ་བྱུང་སྟེ། སྡེ་སྣོད་འཛིན་པ་དང་དགྲ་བཅོམ་པ་གཉིས་ཀའི་ཆ་ལས་རྣམ་པར་གྲོལ་བ་ཐོབ། མཐར་ཀུན་དགའ་བོས་དགེ་སློང་ཁྲི་ཙམ་
དགྲ་བཅོམ་པའི་གནས་ལ་བཀོད་ནས་བསྟན་པ་ཤ་ནའི་གོས་ཅན་ལ་གཏད་དེ། ཡངས་པ་ཅན་གྱི་ལི་ཙ་བྱི་རྣམས་དང་། མ་སྐྱེས་དགྲ་གཉིས་ཀས་གདུང་སྐལ་ཐོབ་པའི་དོན་དུ། ཡུལ་དེ་གཉིས་ཀྱི་བར་ཆུ་བོ་གངྒཱའི་དབུས་སུ་བཞུགས་པ་ལ། སླར་ཡང་འདུལ་བབས་ཀྱི་གདུལ་བྱའི་དོན་དུ་ཆུ་དབུས་སུ་གླིང་སྤྲུལ་ཏེ་ཆུ་ཚོད་གཅིག་ཁོ་ན་ལ་དྲང་སྲོང་ལྔ་བརྒྱ་དང་། ཉི་མ་གུང་པ་ལྔ་བརྒྱ་བསྙེན་པར་རྫོགས་ནས་དགྲ་བཅོམ་པའི་གནས་ལ་བཀོད་དེ་མྱ་ངན་ལས་འདས། སྐུ་གདུང་རང་བྱུང་གི་མེས་ཞུགས་ལ་བཞུས་ཏེ། རིན་པོ་ཆེའི་གར་བུ་ལྟ་བུ་ཆ་གཉིས་སུ་གྱུར་པ་ཆུའི་རླབས་ཀྱིས་བདས་ཏེ་འགྲམ་གཉིས་སུ་ཕྱིན་པ་ན། བྱང་གི་ནི་སྤོང་བྱེད་པས་ཁྱེར། ལྷོའི་ནི་མ་སྐྱེས་དགྲས་ཁྱེར་ཏེ་སོ་སོའི་ཡུལ་དུ་མཆོད་རྟེན་བྱས་སོ། །དེ་ལྟར་ཀུན་དགའ་བོས་ལོ་བཞི་བཅུར་བསྟན་པ་བསྐྱངས། དེའི་ཕྱི་ལོ་མ་སྐྱེས་དགྲ་ཡང་འདས་ཏེ་ཡུད་ཙམ་དམྱལ་བར་སྐྱེས། དེ་ནས་ཤི་འཕོས་ནས་ལྷར་སྐྱེས་ཏེ་འཕགས་པ་ཤ་ནའི་གོས་ཅན་ལ་ཆོས་ཉན་ནས་རྒྱུན་ཞུགས་ཀྱི་འབྲས་བུ་ཐོབ་པར་གྲགས་སོ། །