ཕྱག་ཆེན་གའུ་མའི་ཁྲིད་སྙིང་པོར་དྲིལ་ནས་ཉམས་སུ་ལེན་ཚུལ། །ལོ་ཆེན་དྷརྨ་ཤྲཱི།
ཕྱག་ཆེན་གའུ་མའི་ཁྲིད་སྙིང་པོར་དྲིལ་ནས་ཉམས་སུ་ལེན་ཚུལ། ལོ་ཆེན་དྷརྨ་ཤྲཱི།
ཕྱག་ཆེན་གའུ་མའི་ཁྲིད་སྙིང་པོར་དྲིལ་ནས་ཉམས་སུ་ལེན་ཚུལ། །ༀ་སྭ་སྟི། ཕྱག་ཆེན་གའུ་མའི་ཁྲིད་སྙིང་པོར་དྲིལ་ནས་ཉམས་སུ་ལེན་ཚུལ་ལ། སྔོན་འགྲོ་རང་བབས་རྣམ་གསུམ། དངོས་གཞི་སྐྱོན་བཞི་རང་གྲོལ། རྗེས་སྐུ་གསུམ་རང་ཤར་རོ། །དང་པོ་ལ། རྒྱུད་སྦྱོང་བ་དང་། བཞག་ཐབས་དངོས་གཉིས། དང་པོ་ནི། རྙེད་དཀའི་དལ་འབྱོར་ལ་མི་རྟག་པའི་དྲན་ཤེས་དང་། འཁོར་བའི་སྡུག་བསྔལ་བཟོད་གླགས་མེད་པར་བསམ་པའི་སྐྱོ་ཤས་ཀྱིས་ཡིད་བསྐུལ་ནས། གནས་ཁང་དག་པའི་ཞིང་དུ་མོས་ཏེ། མདུན་མཁར་སེང་ཁྲི་པད་ཉི་ཟླ་བའི་གདན་ལ། བླ་མ་རྡོ་རྗེ་འཆང་གི་རྣམ་པ་ཅན་སྐྱབས་གནས་ཀུན་འདུས་སུ་མོས་ལ། རང་གཞན་སེམས་ཅན་ཐམས་ཅད་འཁོར་བའི་སྡུག་བསྔལ་གྱིས་འཇིགས་ནས་སྐྱབས་ཞུ་ན། ཅི་མཛད་བླ་མ་རིན་པོ་ཆེ་མཁྱེན་སྙམ་པས། མ་ནམ་མཁའ་དང་མཉམ་པའི་སེམས་ཅན་ཐམས་ཅད་སྐྱབས་ཀུན་འདུས་པའི་ངོ་བོ་བླ་མ་རིན་པོ་ཆེ་ལ་སྐྱབས་སུ་མཆི་བ་ལགས་སོ། །ཞེས་ཅི་ནུས་བརྗོད་དེ། བླ་མ་རང་ལ་བསྟིམས་ནས་གཏད་མེད་ཀྱི་ངང་ལ་བཞག །དེ་མཐར་སེམས་ཅན་ཐམས་ཅད་དྲིན་ཅན་གྱི་མར་ཤེས་པའི་སྒོ་ནས། དེ་རྣམས་སྡུག་བསྔལ་གྱིས་ཉམ་ཐག་པ་ལ་ཚུགས་ཐབས་མེད་པའི་སྙིང་རྗེས་ཡིད་དྲངས་ཏེ། མ་ནམ་མཁའ་དང་མཉམ་པའི་སེམས་ཅན་ཐམས་ཅད་རྫོགས་པའི་སངས་རྒྱས་ཀྱི་གོ་འཕང་ལ་དགོད་པར་བྱ། དེའི་ཆེད་དུ་ལམ་ཟབ་མོ་ཕྱག་རྒྱ་ཆེན་པོ་བསྒོམ་པར་བྱའོ། །ཞེས་བརྗོད་ཅིང་དོན་བསམ། ཆོས་དྲུག་སྔོན་དུ་སོང་ན་འདི་མི་དགོས་གསུངས། དེ་ནས་དག་བྱེད་ཨའི་སྟོང་ར་ནི། རང་གི་སྤྱི་བོར་གདན་བཞི་བརྩེགས་ཀྱི་སྟེང་དུ། བླ་མ་རྡོ་རྗེ་འཆང་གི་རྣམ་པར་བསྒོམས་ལ། མོས་གུས་དྲག་པོས། བླ་མ་རིན་པོ་ཆེ་བདག་གི་ནད་གདོན་ཞི་བར་མཛད་དུ་གསོལ། སྡིག་སྒྲིབ་
དག་པར་མཛད་དུ་གསོལ། ཏིང་ངེ་འཛིན་ཁྱད་པར་ཅན་རྒྱུད་ལ་སྐྱེ་བར་མཛད་དུ་གསོལ། ཅེས་གསོལ་བ་བཏབ་པས། བླ་མ་རང་གི་སྤྱི་བོ་ནས་ཐིམ་པས་ཀླད་པ་གཏི་མུག་གི་རང་བཞིན་སྦྱངས། ཐོད་པ་འཇའ་འོད་ཀྱི་གུར་ཁྱིམ་ལྟར་སྒྲིབ་ཐོགས་དང་བྲལ་བའི་ནང་དུ་འོད་ཀྱི་ཆོས་འབྱུང་དཀར་པོ་ཁོང་སྟོང་གི་ནང་དུ། བླ་མ་དང་རང་སེམས་དབྱེར་མེད་ཨ་ཡིག་དཀར་པོ་རང་སྣང་བ་ལ་སལ་ལེ་མཉམ་པར་བཞག་ཅིང་། ཨ་ཡིག་ཉེར་གཅིག་ཙམ་ཤུབ་བུར་བཟླས་པས། ཨ་ལས་བདུད་རྩིའི་རྒྱུན་དྭངས་གསལ་ཅན་ལུས་ཀྱི་ཕྱི་ནང་ཀུན་ཏུ་བབས་པས། སྡིག་སྒྲིབ་ནད་གདོན་ཐམས་ཅད་རྣག་ཁྲག་དང་། སྲོག་ཆགས་ཕྲ་མོ། དུད་ཁུའི་རྣམ་པར་ནག་བུན་བུན་ཕྱི་ན་མར་ཐོན། རང་ལུས་ཁོང་སྟོང་ཤེལ་སྒོང་ཕྱིས་པ་ལྟར་བསམས་ལ། སྦྱང་བྱའི་ངོ་བོ་ལ་ཅེ་རེ་བལྟས་ཏེ་གཏད་མེད་དུ་རྗེན་ནེ་བཞག་གོ ། གཉིས་པ་བཞག་ཐབས་དངོས་ལ། ཐོག་མར་སྤྱི་བོར་གདན་བཞི་བརྩེགས་ལ་བླ་མ་རྡོ་རྗེ་འཆང་གི་རྣམ་པར་བསྒོམ་ལ། བ་སྤུ་ལྡང་ཞིང་མཆི་མ་འཁྲུགས་པའི་མོས་གུས་ཀྱིས། བླ་མ་རིན་པོ་ཆེ་བདག་འཛིན་བློ་ཡིས་ཐོངས་པར་མཛད་དུ་གསོལ། དགོས་མེད་རྒྱུད་ལ་སྐྱེ་བར་མཛད་དུ་གསོལ། འོད་གསལ་ཕྱག་རྒྱ་ཆེན་པོ་རྟོགས་པར་མཛད་དུ་གསོལ། ཅེས་གསོལ་བ་ཅི་མང་བཏབ་པས་ཐེབས་པའི་མཚན་མ་ཅི་རིགས་བྱུང་བ་དང་། ལུས་གནད་ལག་བཉིས་ཁུ་ཚུར་པུས་མོ་ལ་བཀབ་ས་གནོན་དང་བཅས་པའི་རྣམ་སྣང་གི་ཆོས་བདུན་དྲང་པོའི་ངང་ནས་ཉྭ་བཞི་དང་རྩ་བཞི་ལ་གྲིམས་ཆ་མི་འདོན་པར་ལྷོད་ཀྱིས་གློད་ལ་བཞག་པ་ནི་ལུས་རང་བབས། མཆུ་སོ་ལ་འཕར་ཅུང་ཟད་བཞག་ལ་མཆུ་འབྱེད་འཛུམ་མེད་པར་རླུང་འགྲོ་འོང་སོ་མར་འཇོག་པ་ནི་ངག་རང་བབས། མིག་གླང་པོ་ཆེ་ཆང་གིས་བཟི་བ་ལྟར་ཧད་དེ་གང་ལའང་ཆེད་འཛིན་མེད་པའི་ངང་ནས། ཡིད་དུས་གསུམ་གྱི་སྤྲོ་བསྡུ་དང་བསྒོམ་འདོད་ཀྱི་བློ་དང་ཕྲལ་ཏེ་བཟོ་མེད་དུ་ཆད་དེ་གློད་ནས་འཇོག་པ་ནི་སེམས་རང་བབས་སོ། །དེ་ལྟར་དམིགས་པའི་རྩ་བ་རང་བབས་གསུམ་ལ་བསྒྲིལ་ནས་གང་ལའང་ཆེད་འཛིན་མེད་པར་གཏད་མེད་དུ་ཆད་དེ་མཉམ་པར་འཇོག །
དམིགས་པའི་ཡན་ལག་ལ། སྤོགས་ཆོག་དང་། བོགས་འདོན་གཉིས་ལས། དང་པོ་ལའང་། རྟེན་བཅས་དང་། རྟེན་མེད་ལ་བསླབ་པ་གཉིས། དང་པོ་རྟེན་བཅས་ལ། ཐོག་མར་མཉམ་བཞག་དང་མཐུན་པ་བཞི། བར་དུ་བྱིང་རྒོད་ཀྱི་སྐྱོན་སེལ་བ་གསུམ། ཐ་མ་རྗེས་ཐོབ་དང་འབྲེལ་བ་བཞིའོ། །དང་པོ་བཞི་ནི། རང་བབས་ཀྱི་ངང་ནས། བུམ་པ་ལྟ་བུ་དངོས་པོ་རགས་པ་གཅིག་ལ་ལྟ་སྟངས་ཅེ་རེ་གཏད། གང་སྣང་གི་སྟེང་དུ་སེམས་ཀྱི་སྤུ་རིས་མི་འབྱེད་པར་ཤེས་པ་བཟོ་མེད་དུ་བཞག་པས་བུམ་སྣང་མ་འགགས་ལ་དེར་འཛིན་གྱི་བློའི་དྲི་མ་མེད་པར་འཆར་བས་དེའི་ངང་བསྐྱང་ངོ་། །དེ་བཞིན་དུ་ཤིང་བུ་རྡེའུ་ལྟ་བུ་དངོས་པོ་ཕྲ་བ་ལ་བསླབ་པ་དང་། སྤྱིལ་བུའི་དཀར་གསལ་ལྟ་བུ་ཐག་ཉེ་བ་དང་། རི་རྩེ་ལྟ་བུའི་ཐག་རིང་བའི་ཕྲ་རགས་གང་རུང་ལ་བསླབ་པ་སྟེ་བཞིའོ། །བར་དུ་བྱིང་རྒོད་ཀྱི་སྐྱོན་སེལ་བ་གསུམ་ནི། ཤེས་པ་བྱིང་ཞིང་འཐིབས་ན་ལྟ་སྟངས་གྱེན་ལ་གཏོད། རིག་པ་གཡེར་བཏོན་ནས་འཇོགཤེས་པ་འཕྲོ་ཞིང་རྒོད་ན། ལྟ་སྟངས་སྨད་དེ། ཞེ་གློད་ནས་འཇོག །བྱིང་རྒོད་རེ་མོས་སུ་བྱུང་ན་ལྟ་སྟངས་ཐད་ཀར་གཏོད། དངོས་པོ་གང་རུང་གི་སྟེང་དུ་ཤེས་པ་གྲིམས་ལྷོད་རེས་འཇོག་ཏུ་བསླབ་པ་དང་གསུམ་མོ། །ཐ་མ་རྗེས་ཐོབ་དང་འབྲེལ་བ་བཞི་ནི། ཤེར་སྙིང་ལྟ་བུ་མདོ་བྱང་བ་འདོན་ཅིང་རང་བབས་གསུམ་དང་བསྲེ། དེ་བཞིན་དུ་མ་ཎི་ལྟ་བུ་སྔགས་བགྲང་བདེ་བ་བཟླ་ཞིང་བསྲེ་བ་དང་། རང་གིས་གཏམ་གལ་ཆུང་བ་སྨྲ་བའམ། གཞན་ངེས་མེད་སྨྲ་བའི་གསེབ་ཏུ་བསྡད་ལ་གཏམ་དང་བསྲེ། སྤྱོད་ལམ་རྣམ་བཞིས་ས་བདེ་བར་བསྐོར་བ་སོགས་འཆག་པ་དང་། བཤང་གཅི་འདོར་སྐབས་ངོ་ཚ་དང་ཡ་ང་མེད་པར་བསྲེ་བ་དང་། ཉལ་བ་དང་བཟའ་བཏུང་ལ་སྤྱོད་པ་སོགས་སྤྱོད་ལམ་ཐམས་ཅད་རང་བབས་གསུམ་དང་བསྲེས་ཏེ་བསྐྱང་བའོ། །གཉིས་པ་རྟེན་མེད་ལ་བསླབ་པ་ནི། རང་བབས་རྣམ་གསུམ་གྱི་ངང་ནས་སྨིན་མཚམས་ཀྱི་བར་སྣང་སྟོང་པའི་དཀྱིལ་ལ་ལྟ་སྟངས་ཧད་དེ་བཞག་ལ། ཡུལ་ཕ་ག་ན་ཡོད་པར་མི་དཔྱད། རང་ཚུ་ག་ན་ཡོད་པར་མི་བསམ། ངོས་གང་དུའང་མི་བཟུང་། མ་བཅོས་བཟོ་མེད་དུ་གློད་ནས་ཤེས་པ་གསལ་ལ་རྟོག་མེད་ཀྱི་ངང་ལ་ཆད་དེ་བསྐྱང་ངོ་། །མདོར་ན་ཚོགས་དྲུག་
གི་ཡུལ་གང་ལའང་གཏད་མེད་ངོས་བཟུང་མེད་པར་གསལ་རིག་ཏུ་འཆར་ན། ངའི་སྔོན་འགྲོ་རང་ཤར་ནས་འདུག་སྙམ་དུ་ངོས་བཟུང་ལ། འཛིན་མེད་དུ་ཁྲོལ་ལེ་བཞག་གོ །གཉིས་པ་བོགས་འདོན་ལ། མོས་གུས། སྙིང་རྗེ། ཐབས་ལམ་ལ་བརྟེན་པ་དང་གསུམ་ལས། མོས་གུས་ནི། བླ་མ་ལ་གསོལ་བ་བཏབ་ལ། མོས་གུས་དུང་དུངས་པའི་རིག་པའི་འཆར་སྒོ་མ་འགགས་ལ། གཤིས་འཛིན་མེད་དུ་ཆད་དེ་བསྐྱང་བའོ། །སྙིང་རྗེ་ནི། རང་ངོ་མ་ཤེས་པའི་སེམས་ཅན་ལ་སྙིང་རྗེ་བསྐྱེད་དེ། རང་གདངས་མ་འགགས་པའི་གཤིས་འཛིན་མེད་དུ་ཆད་དེ་སྐྱུར་ལ་འཇོག་གོ །ཐབས་ལམ་ལ་གསུམ་ལས། ལྷ་སྐུ་གསལ་སྟོང་དུ་བསྒོམ་པ་ལ་འཇམ་རླུང་དང་བསྲེ་བ། ཐ་མལ་གྱི་ཤེས་པ་རང་བབས་ཕྱག་རྒྱ་ཆེན་པོའི་ངང་ནས་རླུང་ཅུང་ཟད་འཛིན་པ་ཐ་མལ་གྱི་ཤེས་པ་རླུང་དང་བསྲེ་བ། ཟུང་འཇུག་གི་ལྷ་སྐུ་འཇམ་རླུང་དང་བསྲེ་བ་སྟེ་སྒོམ་པ་གསུམ་མོ། །དམིགས་པ་དེ་རྣམས་གནད་དུ་གང་འགྲོ་ལས། འགྲིགས་ཆགས་སུ་དགོས་པའི་ངེས་པ་མེད་དོ། །མདོར་ན་སྔོན་འགྲོའི་ཚད་ནི། མ་བཅོས་པར་ཐ་མལ་གྱི་ཤེས་པ་རང་ཤར། དེ་བརྟན་པའི་ཚད་ལུས་ངག་གི་བྱ་བས་མི་འཕྲོག་པའོ། །གཉིས་པ་དངོས་གཞི་སྐྱོན་བཞི་རང་གྲོལ་ནི། རང་བབས་རྣམ་གསུམ་གྱི་ངང་ནས་བཟོ་མེད་དུ་གློད། འཛིན་མེད་དུ་བཤིག་སྟེ་བཞག་པས། རང་སེམས་གཟུང་འཛིན་རྟོག་པའི་སྒྲིབ་གཡོགས་དང་བྲལ་བ། སྟོན་ཁའི་བར་སྣང་སྤྲིན་བྲལ་ལྟར་སྣང་རིག་ངོས་བཟུང་མེད་པར་རྗེན་ལྷང་གིས་འཆར་བ་ནི་ཐ་མལ་གྱི་ཤེས་པ་ཡིད་བྱེད་དང་བྲལ་བ་སྟེ། གཉུག་སེམས་གསལ་སྟོང་འཛིན་མེད་རང་ངོ་ཤེས་པས་ཉེ་དྲགས་པས་མ་མཐོང་བའི་སྐྱོན་ལས་གྲོལ། རང་སེམས་འོད་གསལ་ཆོས་སྐུར་ཐག་ཆོད་པས་སླ་དྲགས་པས་ཡིད་མ་ཆེས་པའི་སྐྱོན་ལས་གྲོལ། ཐ་མལ་གྱི་ཤེས་པ་ཡིད་བྱེད་དང་བྲལ་བ་དེ་མ་ཡེངས་པའི་དྲན་པས་བཟུང་བས་ཐབས་དྲགས་པས་ངོས་མ་ཟིན་པའི་སྐྱོན་ལས་གྲོལ། ཐ་མལ་གྱི་ཤེས་པ་ཡུལ་མེད་རང་གསལ་དེ་ཆོས་སྐུར་ངེས་ཤེས་སྐྱེས་པས་བཟང་དྲགས་པས་བློར་མ་ཤོང་བའི་སྐྱོན་ལས་གྲོལ་བ་ཡིན་ནོ། །གསུམ་པ་རྗེས་སྐུ་གསུམ་རང་ཤར་ནི། གསལ་ལ་འཛིན་པ་དང་བྲལ་བའི་རྟོག་མེད་དེ་
ཆོས་སྐུ། དེ་ཉིད་བདེ་བའི་རང་གདངས་སུ་ཤར་བ་དེ་ལོངས་སྐུ། སྣ་ཚོགས་སུ་གསལ་བ་དེ་སྤྲུལ་སྐུ། དེ་གསུམ་རང་བཞིན་དབྱེར་མི་ཕྱེད་པས་མཐར་ཐུག་བདེ་བ་ཆེན་པོའི་སྐུའོ། །མདོར་ན་ཡིད་བྱེད་དང་བྲལ་བའི་ཐ་མལ་གྱི་ཤེས་པ་རང་ཤར་དེ་ཀ་དུས་གསུམ་སངས་རྒྱས་ཀྱི་དགོངས་པ། རང་སེམས་སྐྱེ་མེད་ཆོས་ཀྱི་སྐུར་ངོས་བཟུང་བ་ལ། མཐར་ཐུག་གི་སྐྱེལ་ས་འདི་ལས་མེད་པར་ཐག་བཅད་ཅིང་ངེས་ཤེས་བསྐྱེད་དེ་ཡེངས་མེད་དུ་བསྐྱང་བར་བྱ་བ་ཡིན་ནོ། །ཕྱག་ཆེན་གའུ་མའི་དམིགས་རྐང་ཟིན་ཐུན་བརྗེད་བྱང་དུ་སྤེལ་བ་ཤུ་བྷ་མསྟུ། དྷརྨ་ཤྲཱིས་སོ།། །།