གཉིས་པ་ལྟུང་བྱེད་འབའ་ཞིག་པ།

གཉིས་པ་ལྟུང་བྱེད་འབའ་ཞིག་པ་ལ།

༡ ཡུལ་ཐ་སྙད་ལྔ་ལྡན་ལ་ཕམ་ལྷག་སྦོམ་པོ་ཉེས་བྱས་ཀྱི་རྫུན་བཞི་ལས་གཞན་པའི་རྫུན་ངག་ལྔ་ལྡན་གྱིས་སྨྲས་པ་ཡུལ་དེའི་དོན་གོ་བ་ན་རྫུན་སྨྲའི་ལྟུང་བྱེད། ༢ དགེ་སློང་ལ་སྐྱོན་ནས་སྨྲས་པ་ཡུལ་དེའི་དོན་གོ་ན་སྐྱོན་སྨྲ་བའི་ལྟུང་བྱེད། ༣ དགེ་སློང་ཕན་ཚུན་དབྱེ་བའི་བསམ་པས་ཕྲ་མའི་ཚིག་སྨྲས་པ་ཡུལ་དེའི་དོན་གོ་ན་ཕྲ་མ་བྱེད་པའི་ལྟུང་བྱེད། ༤ རང་ཞི་བ་པོའི་ཁོངས་སུ་གཏོགས་ཤིང་དགེ་སློང་གཉིས་ཡན་ཆད་ཀྱི་རྩོད་པ་བཞི་པོ་གང་རུང་དགེ་འདུན་གྱིས་ཆོས་ཕྱོགས་སུ་ཞི་བར་བྱས་པ་ཤེས་བཞིན་དུ་སླར་སློང་བ་ཡུལ་གྱིས་དོན་གོ་ན་སྐྱོ་སྔོགས་བྱེད་པའི་ལྟུང་བྱེད།རྩོད་པ་བཞི་ནི་ལྟུང་ཕྱིར་རྩོད་པ། འགྱེད་ཕྱིར་རྩོད་པ། མི་གདམས་ཕྱིར་རྩོད་པ། བྱ་བ་ལས་ཕྱིར་རྩོད་པའོ། ། ༥ ཁྲིམས་གྲོགས་མེད་པར་ཁྱིམ་པ་མོ་ཐ་སྙད་བཞི་ལྡན་༼ཁྲིགས་ཚིག་སྐབས་སུ་༽ལ་སངས་རྒྱས་ཀྱི་བཀའི་ཚིག་ལྔའམ་དྲུག་ལས་ལྷག་པར་སྟོན་པ་ན་ཡུལ་དེའི་ཚིག་གོ་ན་ཁྱིམ་པ་མོ་ལ་ཆོས་སྟོན་པའི་ལྟུང་བྱེད། ༦ བསྙེན་པར་མ་རྫོགས་པ་ཐ་སྙད་ལྔ་ལྡན་ནམ་བསླབ་བྱིན་དང་ཅིག་ཆར་རམ་རྗེས་སུ་དེའི་མི་ཤེས་པའི་བཀའི་ཚིག་དང་ཡི་གེ་གང་ རུང་འདོན་པ་རྫོགས་ན་འདོན་པའི་ལྟུང་བྱེད། ༧ བསྙེན་པར་མ་རྫོགས་ པ་ཐ་སྙད་ལྔ་ལྡན་ཕམ་ལྷག་མི་ཤེས་པ་ལ་དགེ་སློང་ཆོས་དྲུག་ལྡན་གྱིས་ཕམ་ལྷག་གང་རུང་བརྗོད་པར་མ་བསྐོས་པ་དང་བརྗོད་པའི་ཁོངས་སུ་མ་གཏོགས་པས་ངག་ལྔ་ལྡན་གྱིས་བརྗོད་པ་ཡུལ་དེའི་དོན་གོ་ན་གནས་ངན་ལེན་བརྗོད་པའི་ལྟུང་བྱེད། ༨ རང་གི་མི་ཆོས་བླ་མ་ཐོབ་པ་དགོས་པ་མེད་པར་བསྙེན་པར་མ་རྫོགས་པ་ཐ་སྙད་ལྔ་ལྡན་འཕགས་པ་མིན་པ་ལ་ངག་ལྔ་ལྡན་གྱིས་སྨྲས་པ་དེའི་དོན་གོ་ན་མི་ཆོས་བླ་མ་བདེན་སྨྲའི་ལྟུང་བྱེད། ༩ དགེ་འདུན་གྱི་ཟས་ལས་གཞན་པའི་རྙེད་པ་དེ་སྦྱིན་པའི་ལས་ལ་འདུན་པ་ཕུལ་ བ་ཡན་ཆད་ཀྱིས་བློ་མཐུན་བྱས་པའི་དགེ་སློང་གིས་དགེ་སློང་ལོག་པར་བསྔོ་བ་པོ་མིན་པ་ལ་ཤེས་བཞིན་དུ་ལོག་པར་བསྔོས་སོ་ཞེས་ངག་ལྔ་ལྡན་གྱིས་ཐ་སྙད་ལྔ་ལྡན་ཞིག་ལ་སྨྲས་པ་ན་དེའི་དོན་གོ་ན་བཤེས་ངོར་བྱས་ཞེས་བསྐུར་བ་འདེབས་པའི་ལྟུང་བྱེད། ༡༠ འདུལ་བའི་ཚིག་དང་མདོ་སྡེ་ལས་ཀྱང་ཕྱི་དྲོའི་ཟས་བཀག་པ་ལྟ་བུའི་ཚིག་ལ་ཁྱད་དུ་གསོད་པ་ངག་ལྔ་ལྡན་གྱིས་དགེ་སློང་ཆོས་དྲུག་ལྡན་ལ་སྨྲས་པ་དེའི་དོན་གོ་ན་ཁྱད་དུ་གསོད་པའི་ལྟུང་བྱེད། ༈ ༡༡ ས་བོན་མ་ཉམས་པ་དང་ཕྱི་རོལ་གྱི་སྐྱེ་པ་ཤིང་སོགས་གང་རུང་རུང་བ་མ་བྱས་པ་ཤེས་བཞིན་དུ་རང་ངམ་བསྐོས་པས་མངོན་སུམ་དུ་ཉམས་པར་བྱས་ན་ས་བོན་དང་སྐྱེ་བ་འཇོམས་པའི་ལྟུང་བྱེད། རུང་བ་བྱེད་ཚུལ་དགུ་ལས་མེས་རུང་བ་བྱེད་ཚུལ་ནི་ནས་ལྟ་བུ་སྤུངས་པ་ལ་བསྙེན་པར་མ་རྫོགས་པས་ཕྱོགས་བཞི་ནས་མེ་རེག་ཙམ་བྱེད་པ་མེས་རུང་བའོ། །རུང་བ་གཞན་རྣམས་འབྲུ་རེ་རེ་བྱ་དགོས་ལ། ལ་ཕུག་ལྟ་བུར་མཚོན་གྱི་རུང་བ་དང༌། སྟར་ཁ་ལྟ་བུ་བཀས་པའི་རུང་བ་བྱེད་ཚུལ་སོགས་ཡོད་དོ། ། ༡༢ དགེ་སློང་ཆོས་དྲུག་ལྡན་ལས་སུ་བསྐོས་མ་བསྐོས་གང་རུང་བསམ་བཞིན་དུ་དམན་པ་སྟོབས་པ་མིན་པ་ལ་དགེ་སློང་དམན་པའི་གྲངས་སུ་བགྲང་པས་བདག་ལ་དམན་པ་སྟོབས་པས་ཉེ་རིང་བྱས་སོ་ཞེས་ངག་ལྔ་ལྡན་གྱིས་མིང་གསལ་པོའམ་ཟུར་གྱིས་འཕྱ་བ་ཡུལ་དེས་ཐོས་ཏེ་དོན་གོ་བ་ ན་འཕྱ་བའི་ལྟུང་བྱེད། ༡༣ གྲངས་སུ་གཞུག་པའི་དགེ་སློང་གིས་རང་ལ་ཆོས་བདུན་ལྡན་གྱི་བསྒོ་བ་བྱེད་པའི་དགེ་སློང་ལ་ལན་ལོག་པ་སྨྲ་བ་དེའི་དོན་གོ་བ་ན་བསྒོ་བ་རྣ་ལ་གཟོན་པའི་ལྟུང་བྱེད། ༡༤ དགེ་འདུན་གྱི་གནས་མལ་མ་བསྡུས་མ་བཅོལ་བར་ཕན་ཕུན་དུ་འགྱུར་བའི་ཕྱོགས་སུ་བཞག་སྟེ་ཕན་ཕུན་དུ་གྱུར་བ༼རླུང་དང་ཆར་བ་སྲིན་སོགས༽འམ་གནས་དེ་ལས་འདོམས་བཞི་ཅུ་རྩ་དགུ་འདས་པ་ན་གནས་མལ་ཕན་ཕུན་དུ་གྱུར་བའི་ལྟུང་བྱེད། ༡༥ དགེ་འདུན་གྱི་གཙུག་ལག་ཁང་དུ་སྲོག་ཆགས་ཕྲ་མོ་སྐྱེ་བའི་སར་མཆན་ཁུང་གང་བས་རྩྭ་དང་ལོ་མའི་གདིང་བ་མ་བསྡུས་མ་བཅོལ་བར་ཕན་ཕུན་དུ་གྱུར་བའམ་འདོམས་ཞེ་དགུ་འདས་ན་གདིང་བ་མ་བསྡུས་ པར་འགྲོ་བའི་ལྟུང་བྱེད། ༡༦ དགེ་འདུན་གྱི་གཙུག་ལག་ཁང་ནས་བསྐྲད་བྱ་དགེ་སློང་རྣམ་དག་༼དགེ་འདུན་འཁྲུག་པ་སྐྱེ་བ་སོགས་༽རྐྱེན་མེད་པར་རང་ངམ་བསྐོས་པས་མངོན་སུམ་དུ་བསྐྲད་དེ་གནས་ཉེ་འཁོར་འདས་ན་སྐྲོད་པའི་ལྟུང་བྱེད། ༡༧ དགེ་འདུན་གྱི་གནས་སུ་སྔར་ཞུགས་པའི་དགེ་སློང་ལ་མཐོ་འཚམས་པའི་ལུས་ངག་གང་རུང་གིས་ཕྱིས་གནོན་བྱེད་པ་ན་ཕྱིས་གནོན་བྱེད་པའི་ལྟུང་བྱེད། ༡༨ མཐོ་འཚམས་པའི་སེམས་ཀྱིས་དགེ་འདུན་གྱི་གཙུག་ལག་ཁང་ཐོག་ཕྱིན་གྱིས་གཞོལ་བ་མིན་པར་ཁྲི་རྐང་པ་ཕུར་བུ་ལྟ་བུ་བཀན་པ་སོགས་༼རྐང་རྟེན་བཙུགས་པ༽མིན་པ་སྟེང་དབྱུང་རུང་བཙུགས་ཏེ་གནོན་པ་ན་འདུག་པ་རྫོགས་ཚེ་རྩ་བ་འབྱུང་བ་ལ་འདུག་པའི་ལྟུང་བྱེད། ༡༩ གསོད་སེམས་ཀྱིས་གཞན་དོན་དུ་རང་ངམ་བསྐོས་པས་ ཆུ་སོགས་༼ཤིང་ས༽སྲོག་ཆགས་དང་བཅས་པ་ལ་སྤྱོད་པའི་ཞར་ལ་ཐ་མལ་བའི་མིག་ཏུ་སྣང་བའི་དུད་འགྲོ་བསད་ན་དུད་འགྲོ་འདེབས་པའི་ལྟུང་བྱེད། ༢༠ རྨང་འཛུགས་སོགས་བཞི་བྱས་ནས་ཉིན་དེ་ཉིད་ལ་ཕ་གུ་སོགས་སྲ་བ་མིན་པ་རིམ་པ་བཞི་འཁོར་བ་དང༌། དེ་དག་མ་བྱས་ན་ཉིན་དེའམ་ཉིན་གཞན་གྱི་དུས་སུ་རྨང་གི་རྩ་འཛུགས་པ་དང༌། ཆུ་ཁུང་བཏོད་བ་དང༌། འཇིམ་པ་དང༌། སྒོ་ཆ་གོང་མ་གཞུག་པ་བཞི་གའམ་གང་ཡང་རུང་བ་མ་བྱས་ན་གང་ཡང་མ་བྱས་པ་ཡན་ཆད་ནས་ཉིན་གཞན་ལ་རིམ་པ་བཞི་པ་འཁོར་བ་ན་ཆར་ཆུ་བསྐྱབ་པའི་གཡོགས་པ་བྱས་པ་དང་རྡོ་སོགས་སྲ་བ་ལས་བྱས་ཀྱང་རིམ་པ་གསུམ་ལས་ལྷག་པ་བརྩིགས་པའི་ལྟུང་བྱེད། ༢༡ དགེ་སློང་མའི་སྟོན་པར་མ་བསྐོས་པའམ་བསྐོས་ཀྱང་བསྙེན་པར་རྫོགས་ནས་ཉི་ཤུ་མ་ལོན་པའམ་མཚན་ཉིད་དང་མི་ལྡན་པ་དགེ་སློང་མ་ཉེ་དུ་མིན་པ་ལ་ཆོས་བསྟན་པ་དེའི་དོན་གོ་བ་ན་དགེ་སློང་མ་ལ་སྟོན་པའི་ལྟུང་བྱེད། ༢༢ གནས་འཇིགས་པའི་ཉེན་དང་བཅས་པར་མཚན་ཐོག་ཐག་སྟོན་པ་མིན་པར་ཉི་མ་ནུབ་ནས་སྐྱ་རེངས་མ་ཤར་བའི་བར་དགེ་སློང་མ་ལ་ཆོས་སྟོན་ན་ཉི་མ་ནུབ་ཀྱི་བར་དུ་ཆོས་སྟོན་པའི་ལྟུང་བྱེད། ༢༣ ངག་ལྔ་ལྡན་གྱིས་དགེ་སློང་མ་ལ་ཟས་གོས་ཅུང་ཟད་ཙམ་གྱི་ཕྱིར་ཆོས་སྟོན་ཏོ་ཞེས་དགེ་སློང་དེ་ལྟར་གྱུར་བ་མིན་པ་ལ་སྐུར་བ་འདེབས་པ་ན་ཕ་རོལ་བོའི་དོན་གོ་བ་ན་ཟས་ཅུང་ཟད་ཙམ་གྱི་ཕྱིར་ཆོས་སྟོན་ཞེས་སྐུར་བའི་ལྟུང་བྱེད། ༢༤ བཅས་ལྡན་དགེ་སློང་གིས་དགེ་སློང་མ་ཆོས་བདུན་ལྡན་ལ་གོས་འཁོར་གསུམ་ཁེབས་པ་ཡན་ཆད་བཟོ་གསར་དུ་བྱས་ཏེ་ཟིན་པ་ན་གོས་བྱེད་པའི་ལྟུང་བྱེད། ༢༥ གོས་བརྗེས་པ་སོགས་ཀྱི་ཕྱིར་མིན་པར་བཅས་ལྡན་དགེ་སློང་གིས་རང་གི་ཉེ་དུ་མ་ཡིན་པ་དགེ་སློང་མ་ལ་གོས་ཁྲུ་གང་ཡན་ཆད་བྱིན་ཏེ་ཐོབ་པ་ན་གོས་སྦྱིན་པའི་ལྟུང་བྱེད། ༢༦ དགེ་སློང་མ་ཕན་ཚུན་ཕན་འདོགས་པ་མིན་ཞིང་ངོ་མ་སྤོས་པར་སའི་ལམ་ཉིན་གཅིག་ལ་འཇིགས་བཅས་མིན་པར་སོང་སྟེ་རྒྱང་གྲགས་གཅིག་འདས་པ་ན་དགེ་སློང་མ་དང་ལམ་དུ་འགྲོ་བའི་ལྟུང་བྱེད། ༢༧ ཡན་ལག་གཞན་སྔ་མ་དང་འདྲ་བ་ལ་འགྲམ་གཉིས་འཇིགས་པ་ཅན་དང་རྦ་ཀླུང་ལ་བཟུར་བ་མིན་པར་ཆུའི་ནང་དུ་གྲུར་ཞུགས་ཏེ་རྒྱུན་ནམ་རྒྱུན་ལས་ཟློག་ཕྱོགས་སུ་རྒྱང་གྲགས་འདས་པར་ཕྱིན་ན་གྲུར་ཞུགས་པའི་ལྟུང་བྱེད། ༢༨ ཁྲིམས་གྲོགས་མེད་པར་དབེན་པ་སྐྱབས་ཡོད་དུ་བུད་མེད་དང་ལྷན་ ཅིག་འདོམས་གང་གི་ནང་དུ་འདུག་པ་རྫོགས་ན་ཉེ་དུ་མ་ཡིན་པའི་བུད་མེད་གཅིག་དང་འདུག་པའི་ལྟུང་བྱེད། ༢༩ གནས་དེར་ཁྲིམས་གྲོགས་མེད་ པར་དགེ་སློང་མ་དང་ལྷན་ཅིག་འགྲེང་ན་དགེ་སློང་མ་དང་ལྷན་ཅིག་འགྲེང་བའི་ལྟུང་བྱེད། ༣༠ དགེ་སློང་མས་དགེ་སློང་རང་ཉིད་ཀྱི་ཡང་དག་པ་མིན་པའི་ཡོན་ཏན་ཁྱིམ་པ་ལ་བརྗོད་དེ་ཟས་སྦྱོར་དུ་བཅུག་པའམ་མགྲོན་དུ་བོས་པ་ལས་སྔར་ལས་ལྷག་པར་ཤེས་བཞིན་དུ་ཟོས་ཏེ་མགུལ་དུ་མིད་པ་ན་སྦྱོར་བཅུག་ཟ་བའི་ལྟུང་བྱེད། ༈ ༣༡ དགེ་སློང་ནད་པ་མིན་པ་དང་ལས་མ་བྱས་པ་ལམ་དུ་མ་ཞུགས་པ་སྲ་བརྐྱང་མ་བཏིང་བ་མུ་གེའི་དུས་མིན་པར་ཉིན་གཅིག་ལ་ཁྱིམ་པས་མགྲོན་དུ་ལན་གཉིས་ཡན་ཆད་བོས་པ་ནར་མའི་ཟས་མིན་པ་རུང་ཞིང་ཟས་གཅིག་གི་ཟ་ཚད་ལོངས་པའི་ཟས་ལ་འབོད་པ་ཕྱི་མ་ལ་གོས་སམ་དེའི་རིན་གྱིས་རྙེད་པ་མེད་པར་གཉིས་པ་དེ་ཟོས་ན་ཡང་ཡང་ཟ་བའི་ལྟུང་བྱེད། ༣༢ ཁྱིམ་པ་མུ་སྟེགས་ཅན་ཁོ་ནའི་སྦྱིན་བདག་གནས་བཞིན་པར་ཕྱི་བའི་རབ་བྱུང་རྣམས་ཀྱང་གནས་བཞིན་པའི་གནས་སུ་དགེ་སློང་མི་ན་བས་ཞག་གཅིག་གནས་ཏེ་ཟས་གཅིག་གི་ཚད་ལོངས་གཉིས་ངག་གིས་བསླངས་ཏེ་ཟས་གཉིས་པ་མགུལ་དུ་མིད་ན་འདུག་གནས་སུ་ཟ་བའི་ལྟུང་བྱེད། ༣༣ ཁྱིམ་པ་ཆོས་ལྔ་ལྡན་ཅི་བདེར་སྟོབས་པ་མིན་པ་ལས་ཟས་གཡོས་སུ་བྱས་པ་ལྷུང་བཟེད་འབྲིང་ ཚད་གསུམ་ལས་ལྷག་པ་བྲེ་ཕྱེད་ཡན་ཆད་ངག་ལྔ་ལྡན་གྱིས་བསླངས་ནས་གནས་དེ་ལས་གཞན་དུ་ཟོས་ཏེ་མགུལ་དུ་མིད་པ་ན་ལྷུང་བཟེད་དོ་གསུམ་ལས་ལྷག་ལེན་པའི་ལྟུང་བྱེད། ༣༤ བཟའ་བ་མགུལ་དུ་མིད་པར་མངོན་ པ་ཐུག་པ་མིན་པ་རང་ངམ་རང་འདྲས་ལྷག་པོར་མ་བྱས་པ་མུ་གེ་དུས་མིན་པར་སྔ་དྲོའི་དུས་སུ་དགེ་སློང་མི་ན་བས་ཉིན་དེར་ཟས་ངག་གིས་སྤངས་པ་ཕ་རོལ་པོས་དོན་གོ་ཞིང་ལུས་ཀྱི་ཟས་ཟ་ཞིང་འདུག་པའི་ཉེ་འཁོར་འདོམས་གང་འདས་པའི་དགེ་སློང་གིས་ཟས་དེ་མགུལ་དུ་མིད་པ་ན་སྤངས་པ་ཟ་བའི་ལྟུང་བྱེད། ལྷག་པོར་གྱི་ཆོས་ནི། རང་གི་ལག་པ་བཀྲུས་ཏེ་བྱིན་ལེན་ བྱས་དགེ་སློང་གི་མདུན་དུ་ཙོག་པུར་འདུག་སྟེ། གནས་བརྟན་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་འཚལ་མ་འཚལ་ལགས་ཏེ་སྤངས་ཤིང་འཚལ་བ་བགྱིས་པ་ལས་བཟའ་པ་དང་བཅའ་བ་རྙེད་ནས་འཚལ་བར་འཚལ་ན་བཙུན་པས་ལྷག་པོར་བགྱིས་ཏེ་བདག་ལ་སྩལ་ཏུ་གསོལ་ཞེས་ལན་གཅིག་བརྗོད། ཡུལ་གྱིས་བླངས་ཏེ་ཟས་མ་སྤངས་ན་ཁམ་གཉིས་སམ་གསུམ་ཙམ་ཟོས་ནས་ཁྱོད་ཀྱིས་ཅི་བདེར་གསོལ་ཅིག་ཅེས་ཕྱིར་གཏད། སྤངས་ན་མི་ཟའོ། །འཇིག་རྒྱུ་བྱིན་ལེན་དང་འདྲའོ། །༣༥ ཟས་དང་དུས་སྔ་མ་ལྟ་བུར་དགེ་སློང་ཟས་སྤངས་པ་ལ་ཤེས་བཞིན་དུ་ཟས་དེ་དག་གིས་སྟོབས་པ་ཡུལ་གྱིས་གོ་ན་སྤངས་པ་སྟོབས་པའི་ལྟུང་བྱེད། ༣༦ མཚམས་ནང་གཅིག་ཏུ་དགེ་འདུན་དང་ལྷན་གཅིག་ཟ་དགོས་པའི་ཟས་གཅིག་གི་ཚད་ལོངས་པ་དུས་རུང་གི་ཟས་དགེ་སློང་ནད་པ་སོགས་མ་ཡིན་པས་མུ་གེའི་དུས་མིན་པར་ཤེས་བཞིན་དུ་དགེ་འདུན་དང་ལྷན་ཅིག་མིན་པར་རང་གྲོགས་དགེ་སློང་གསུམ་སོགས་དང་ལྷན་ཅིག་དུས་ཅིག་ཅར་ཟོས་ཏེ་མགུལ་དུ་མིད་པ་ན་འདུས་ཤིང་ཟ་བའི་ལྟུང་བྱེད། ༣༧ དགེ་སློང་ཟས་ཀྱིས་ཕན་པའི་ནད་པ་དང་ཟས་ཀྱིས་ཕོངས་པ་མིན་པ་རང་གནས་པའི་གླིང་དང་ལྷ་ཡུལ་དུ་རང་སྐྱེས་པའི་གླིང་གི་ཉི་མ་ཕྱེད་ཡོལ་ནས་སྐྱ་རེངས་མ་ཤར་པའི་དུས་སུ་དུས་རུང་གི་ཟས་མིད་པར་མངོན་པ་ཟོས་ཏེ་མགུལ་དུ་མིད་ན་དུས་མིན་པར་ཟ་བའི་ལྟུང་བྱེད། ༣༨ སྨན་བཞི་གང་རུང་རང་ངམ་རང་འདྲས་གསོག་འཇོག་བྱས་པ་མིད་པའི་ཚད་དང་ལྡན་པ་དགེ་སློང་མི་ན་པས་མུ་གེའི་དུས་མིན་པར་ཟོས་ཏེ་མགུལ་དུ་མིད་པ་ན་གསོག་འཇོག་ཟ་བའི་ལྟུང་བྱེད། ༣༩ ཟས་རང་ངམ་རང་འདྲས་བྱིན་ལེན་མ་བྱས་པ་མིད་པར་མངོན་པ་གནས་སྒྲ་མི་སྙན་དང་མུ་གེའི་དུས་མིན་པར་དགེ་སློང་རྐྱེན་མེད་པར་ཤེས་བཞིན་དུ་ཟས་དེ་མགུལ་དུ་མིད་པ་ན་བྱིན་ལེན་མ་བྱས་པར་ཟ་བའི་ལྟུང་བྱེད། ༤༠ ཁྱིམ་པ་ཐ་སྙད་ལྔ་ལྡན་ཅི་བདེར་སྟོབས་པ་པོ་མིན་པ་ལ་ཟས་རུང་བ་ཚད་ལྡན་ཡུལ་དུས་དེར་ཟས་བསོད་པར་གྲགས་པ་ངག་གིས་བསླངས་ཏེ་མགུལ་དུ་མིད་ན་བསོད་པ་སློང་བའི་ལྟུང་བྱེད། འདིར་ཆ་ལ་བརྟེན་པའི་ཉེས་པ་བརྒྱད་ནི། རང་ངམ་རང་འདྲ་བ་དབང་པའི་ཟས་ཉེ་བའི་སྟ་གོན་དུ་གནས་པ་རུང་བ་ཚད་ལྡན་གཞི་བརྟན་པ་དང་མ་འབྲེལ་ལ་བྱིན་ལེན་སྟོབས་པ་དང་མ་འབྲེལ་བས་ཆུད་ཟའི་རྐྱེན་མེད་པའི་ཚེ་བྱིན་ལེན་མ་བྱས་པར་ཟ་འདོད་ལས་གཞན་པས་རང་ངམ་རང་འདྲས་རེག་ན་ལག་ ཉ་དང༌། ཚད་ལྡན་ཡན་འདྲ་ལ་རྗེན་པ་ཆུད་ཟའི་རྐྱེན་སོགས་མེད་ཚེ་རང་ངམ་རང་འདྲས་དབང་ཞིང་རུང་ཁང་དུ་མ་བྱས་པའི་གནས་སུ་བཙོས་པ་མཚམས་བཙོས་དང༌། གནས་སྔ་མ་ལྟར་དགེ་སློང་དབང་བའི་རུང་ཁང་མིན་པའི་གནས་སུ་རང་ངམ་རང་འདྲས་ཟས་སམ་འབྲུ་སོགས་ཉེ་བའི་སྟ་གོན་དུ་གནས་པ་ཆུད་ཟ་སོགས་ཀྱི་རྐྱེན་མེད་པར་ཞག་ལོན་ན་ཞག་ལོན་དང༌། རང་ངམ་རང་འདྲ་དབང་བའི་ཟས་སམ་ཉེ་བའི་སྟ་གོན་དུ་གནས་ཤིང་རུང་བ་ཚད་ལྡན་རྗེན་པ་ཞིག་གནས་གང་ཡང་རུང་བར་དགེ་སློང་གིས་མེའི་རླངས་ པ་ཡན་ཆད་ཀྱིས་འཚེད་ན་རྗེན་བཙོས་ཀྱི་ཉེས་བྱས་ཏེ་བཞི་དང༌། དེ་བཞི་ཟོས་པའི་ཉེས་བྱས་བཞི་དང་བརྒྱད་དོ། །མཚམས་བཅོས་དང་ཞག་ལོན་སོགས་ཀྱི་ཉེས་པ་མི་འབྱུང་བའི་ཆེད་དུ་རུང་ཁང་གཅོད་དགོས་པས་རུང་ཁང་དྲུག་ལས་རྡོ་བཏེགས་པའི་མཐའ་ལས་བྱུང་བའི་རུང་ཁང་ནི། རྨང་གི་རྡོ་གསར་འཇོག་གི་ཚེ་དགེ་སློང་ལག་གི་བླས་འདུག་སྟེ་རྡོ་སོགས་ལ་རེག་ནས་གནས་འདི་ནི་དགེ་འདུན་གྱི་རུང་བའི་ཁང་བར་འགྱུར་རོ་ཞེས་བརྗོད་པའམ་ཡང་ན་གཞི་གསུམ་ཆོ་ག་ལྟར་ལས་ཀྱིས་བྱ་སྟེ་འདི་མ་ཞིག་གི་བར་དུ་འཇིག་རྒྱུ་མེད་ལ་གཞན་རྣམས་གནས་དེར་དགེ་སློང་མེད་པར་སྐྱ་རེངས་ཤར་ན་འཇིག་གོ །གང་ཟག་རང་གི་རུང་ཁང་ཤེས་པ་ཆུང་ངུའི་རུང་ཁང་དུ་བྱིན་གྱིས་བརླབ་ཚུལ་ནི། རུང་ཁང་གི་གནས་དེར་འདུག་ནས་བདག་ནི་བསླབ་པ་རྣམས་ལ་མི་གུས་པ་མ་ལགས་སོ། །ཇི་ལྟར་སངས་རྒྱས་བཅོམ་ལྡན་འདས་རྣམས་མཁྱེན་པ་དང་གཟིགས་པ་དང་ལྡན་པ་དེ་དག་གིས་རུང་བའི་ཁང་བདག་ཟས་ཀྱི་ཁང་བར་ཡོངས་སུ་ལོངས་སྤྱོད་པར་མཁྱེན་ཅིང་བཟོད་པ་དེ་ལྟར་ན་འདི་བདག་གི་ཕྱིར་དྲན་པ་ཉེ་བར་འཇོག་གོ །དེ་བདག་གི་ཚངས་པར་སྤྱོད་པ་རྗེས་སུ་འཛིན་པར་གྱུར་ཅིག་ཅེས་ལན་གསུམ་བརྗོད་པའོ། །གནས་དེར་དགེ་སློང་མེད་པར་སྐྱ་རེངས་ཤར་ན་སླར་ཡང་བྱའོ། །བྱིན་ལེན་བྱ་ཚུལ་ནི། མཐོ་བའི་ཕྱོགས་མིན་པའི་མདུན་དྲང་པོ་ནས་རགས་པ་སོགས་ཀྱིས་བར་མ་ཆོད་པའི་བསྙེན་པར་མ་རྫོགས་པའམ་དེ་དང་འདྲ་བས་ཟས་གྱེན་དུ་འདེགས་ནུས་ཤིང་བསམ་པ་ཐག་པས་སྦྱིན་པར་འདོད་པས་ལག་པའམ་དེ་དང་འབྲེལ་བར་བསྟབས་པ་ན། ལེན་པ་པོས་ལག་པ་གཉིས་བཀན་པས་ལུས་སམ་དེ་དང་འབྲེལ་བའི་སྣོད་ལ་སོགས་པར་བླངས་པའོ། །བྱིན་ལེན་འཇིག་རྒྱུ་ནི། རྣམ་འབྱེད་ལས། འཕྲོག་༡དང་འདྲིལ༢་དང་རེག་པ༣་དང༌། །བསྔོས་༤དང་དགེ་སློང་མིན་གྱུར་༥དང༌། །ངོ་བོ་གྱུར་༦དང་སྐྱེ་བ་གྱུར༧། །འདོར་བ་ཡིས་ནི་བྱིན་ལེན་འཇིག །ཅེས་པ་ལྟར་རོ། །འདི་དག་ཁམ་རེ་རེ་ལ་ལྟུང་བྱེད་རེ་རེའོ། །༤༡ རང་ཁོ་ནའི་ལུས་སམ་ཡོ་བྱད་ཀྱི་དོན་དུ་ཡིད་གཉིས་ཡན་གྱིས་རང་ངམ་བསྐོས་པས་ཆུ་སོགས་ལ་མ་བརྟག་པར་སྤྱོད་པའི་ཞར་ལ་དུད་འགྲོ་ཤི་ན་དུད་འགྲོ་སྤྱོད་པའི་ལྟུང་བྱེད། ཆུ་བརྟག་ཚུལ་ཆུ་དྭངས་པ་མི་གཡོ་བར་དགེ་སློང་སྙིང་རྗེ་ཅན་གྱིས་ཐ་མལ་བའི་མིག་གིས་ཆུའི་སྲོག་ཆགས་མེད་པ་ཡིད་ཆེས་ཀྱི་བར་བརྟག་གོ །ཆུ་ཚགས་ནི། ཆུ་ཚགས་པའི་བྱ་བ་བྱེད་རུང་ཙམ་པས་ཆེ་ཆུང་ངེས་པ་མེད་དོ། །༤༢ ཁྱིམ་པ་ཕོ་མོ་ཉལ་བོ་བྱེད་པར་ཤོམ་པའི་ཁྱིམ་གནས་གཅིག་པ་འདོམས་གང་གི་ནང་དུ་སྐྱབས་མེད་པར་དགེ་སློང་འཇིགས་ པའི་དབང་མ་གཏོགས་པར་མངོན་སུམ་དུ་ཚོར་བྱ་ཚོར་བྱེད་དག་གིས་ཚོར་བར་འདུག་པ་རྫོགས་པ་ན་ཉལ་པོ་བྱེད་པའི་ཁྱིམ་ན་འདུག་པའི་ལྟུང་བྱེད། ༤༣ ཡན་ལག་གཞན་འདྲ་བ་ལ་མངོན་སུམ་མིན་པར་སྐྱབས་ཡོད་པར་འགྲེང་བ་རྫོགས་པ་ན་འགྲེང་བའི་ལྟུང་བྱེད། ༤༤ མུ་སྟེགས་ཀྱི་རབ་བྱུང་ནད་པ་དང་ཉེ་དུ་མིན་པ་ལ་དགོས་མེད་དུ་ཟས་ཡུལ་རྟེན་གཉིས་ཀ་ལ་རུང་བ་ཚད་ལྡན་ཤེས་བཞིན་དུ་རང་གི་ལག་པས་བྱིན་པ་དེའི་ལག་ཏུ་ཐོབ་ན་གཅེར་བུ་ལ་ཟས་སྦྱིན་པའི་ལྟུང་བྱེད། ༤༥ ཁྱིམ་པ་སྐྱེས་པའི་དམག་བཞི་ཡན་ཆད་འཐབ་པའམ་འཐབ་པའི་སྟ་གོན་དུ་གནས་པ་རྟེན་རྒྱལ་བོས་བོས་པ་སོགས་མིན་པར་བལྟ་བའི་ཕྱིར་རང་གི་གནས་ཉེ་འཁོར་དང་བཅས་པ་ནས་འཕགས་ཏེ་མཐོང་བ་ན་དམག་ལ་བལྟ་བའི་ལྟུང་བྱེད། ༤༦ འཐབ་པའམ་སྟ་གོན་དུ་གནས་པ་མ་གཏོགས་དམག་སྔ་མ་ལྟ་བུའི་ནང་དུ་དགོས་པ་མེད་པར་ཞག་གཅིག་གནས་ཏེ་སྐྱ་རེངས་ཤར་ན་དམག་གི་ནང་ན་གནས་པའི་ལྟུང་བྱེད། ༤༧ རྒྱལ་བོ་སོགས་ཀྱིས་བོས་ཀྱང་རུང་སྟེ་དགོས་པ་མེད་པར་སྟ་གོན་དུ་གནས་པ་ལ་རེག་པ་དང༌། དེ་བཤམས་པར་དཀྲུགས་པ་དང༌། རྒྱལ་བོས་བོས་ཀྱང་དགོས་མེད་དུ་རང་འདུག་པའི་གནས་ནས་འཕགས་ཏེ་མཐོང་བ་གསུམ་ནི་དཔུང་གི་ཡན་ལག་ཉམས་སུ་མྱོང་བའི་ལྟུང་བྱེད། ༤༨ རྙོག་པ་ཅན་ཏེ་ཞེ་སྡང་གི་སེམས་ཀྱིས་དགེ་སློང་ལ་བརྡེག་སྟེ་དེའི་ལུས་ལ་ཕོག་པ་ན་བརྡེག་པའི་ལྟུང་བྱེད། ༤༩ སེམས་དེས་དགེ་སློང་གཞན་ལ་བརྡེག་པར་གཟས་ན་གཟས་པའི་ལྟུང་བྱེད། གཟས་པའི་དོན་ནི་བརྡེག་ཚུལ་བྱེད་པའོ། །༥༠ མཐོལ་ཡུལ་མཚན་ཉིད་དང་ལྡན་པ་ཡོད་པའི་གནས་སུ་དགེ་སློང་གཞན་གྱི་ཕམ་ལྷག་གང་རུང་དགེ་འདུན་འཁྲུག་ཏུ་དོགས་ པ་སོགས་ཀྱི་དབང་མ་གཏོགས་པར་ཤེས་བཞིན་དུ་འཆབ་སྟེ་སྐྱ་རེངས་ཤར་ན་གནས་ངན་ལེན་འཆབ་པའི་ལྟུང་བྱེད། ༈ ༥༡ དགེ་སློང་གཞན་ལ་ཁྱིམ་པས་བསྔོས་པའི་དུས་རུང་གི་ཟས་སྔ་དྲོའི་དུས་སུ་ཕན་སེམས་མེད་པར་ངག་གིས་ཟན་གཅོད་པའི་ཚིག་སྨྲ་བ་ཡུལ་དེའམ་སྦྱིན་བདག་གིས་དོན་གོ་ན་ཟན་གཅོད་པའི་ལྟུང་བྱེད། ༥༢ དགེ་སློང་དུས་དྲན་བྱས་པ་དང་ནད་པ་མིན་པས་མེ་མ་མུར་དང་མེ་ལྕེ་ལས་གཞན་པའི་མེ་ཡོངས་སུ་རྫོགས་པ་ལ་རེག་གམ་རེག་ཏུ་བཅུག་ན་མེ་ལ་རེག་པའི་ལྟུང་བྱེད། དུས་དྲན་ནི། བྱ་བ་དེ་ལ་མ་ཞུགས་པའི་ནང་དུས་ལྟ་བུ་ལ། དེ་ཆོས་ལྡན་གྱི་ཆེད་དུ་དུས་དྲན་བསྟེན་རུང་གི་ལྟུང་བ་གང་གི་གཞི་ལ་ཐུགས་ཀྱང་གནང་བ་མཛད་དུ་གསོལ་སྙམ་དུ་དུས་དྲན་བྱས་ན། ཉིན་མཚན་དེ་འདས་ཀྱི་བར་དུ་འཆགས་ལ། དེ་སྐབས་དགེ་ཚུལ་ལྟ་བུ་མེ་ལ་རེག་མཁན་ཡོད་ན་གོ་མི་ཆོད་དོ། །བུད་མེད་ཆུས་འཁྱེར་བ་འཛིན་པ་ན་མ་དང་སྲིང་མོའི་འདུ་ཤེས་དང༌། རིན་པོ་ཆེ་ཁྲི་ལ་མི་རྟག་པའི་འདུ་ཤེས་ཀྱིས་ཆགས་པ་འགོག་ལ། ལྟུང་བ་གླེང་དྲན་བྱེད་ཚེ་ཕན་པའི་འདུ་ཤེས་ཀྱིས་ཞེ་སྡང་འགོག་པ་སོགས་ཆགས་སྡང་འགོག་པ་གལ་ཆེའོ། །༥༣ དགེ་སློང་གི་ཆེད་དུ་དགེ་འདུན་གྱིས་ལས་ཆོས་ལྡན་བྱས་པ་ཆགས་པའི་རྗེས་སུ་དེ་ལ་སྔར་འདུན་པ་ཕུལ་བའི་དགེ་སློང་གིས་ད་དེ་ཕུལ་བ་ཕྱིར་བྱིན་ཅིག ཅེས་ངག་གིས་ལས་དེར་གཏོགས་པའི་དགེ་སློང་ལ་སྨྲ་བ་དེའི་དོན་གོ་བ་ན་འདུན་པ་ཕྱིར་བསྒྱུར་བའི་ལྟུང་བྱེད། ༥༤ ཡུལ་བསྙེན་པར་མ་རྫོགས་པའམ་ཕམ་པ་བྱུང་བ་དང་ངོ་སྤོས་ཀྱང་རུང་གནས་ཕལ་ཆེར་གཡོགས་པ་དང་སྐོར་བ་གནས་གཅིག་པར་འདོམས་གང་གི་ནང་དུ་དགོས་མེད་དུ་གཉིད་ལོག་འདོད་ཀྱིས་ཞག་བར་མ་ཆད་དུ་ཉལ་ཞིང་ཞག་གསུམ་པའི་སྐྱ་རེངས་ཤར་ན་ནུབ་ལྷག་ཉལ་གྱི་ལྟུང་བྱེད། ༥༥ དགེ་སློང་གིས་ཁྱིམ་ན་གནས་པས་ཐར་བ་ལ་བར་དུ་མི་གཅོད་དོ། །ཞེས་པ་ལྟ་བུ་ཕྱོགས་འགའ་ཞིག་ལ་སྡིག་ལྟ་སྐྱེས་པ་དེ་ཟློག་པ་ལྔས་བཟློག་ཀྱང་བརྗོད་པ་གསུམ་པའི་མཐར་མི་གཏོང་ན་སྡིག་ལྟ་མི་གཏོང་བའི་ལྟུང་བྱེད། ༥༦ དགེ་སློང་གནས་ནས་ཕྱུང་ཞིང་བཟོད་གསོལ་གྱི་ལས་མ་བྱས་པ་དེར་ཤེས་བཞིན་དུ་དགེ་སློང་གནས་ཕྱུང་མིན་པས་ཆོས་དང་ཟང་ཟིང་གི་ལོངས་སྤྱོད་ལྷན་ཅིག་མྱོང་བའམ་གནས་གཅིག་ཏུ་གནས་ཏེ་སྐྱ་རེངས་ཤར་ན་སྤངས་བ་རྗེས་ཕྱོགས་ཀྱི་ལྟུང་བྱེད། ༥༧ དགེ་ཚུལ་སྡིག་ལྟ་ཅན་ཟློག་པ་ལྔས་མཐར་མི་གཏོང་བ་གསོལ་བཞིའི་ལས་ཀྱིས་གནས་དབྱུང་བྱས་པ་ལ་སྔར་ལྟར་བྱས་ན་བསྙིལ་བ་བསྡུད་པའི་ལྟུང་བྱེད། ༥༨ ཁ་མ་བསྒྱུར་བའི་གོས་དཀར་པོ་རང་གི་ཡིན་པ་ཆུ་ཚགས་ལས་གཞན་ལ་དགོས་མེད་དུ་ལོངས་སྤྱད་པ་རྫོགས་ན་ཁ་མ་བསྒྱུར་བའི་གོས་ཀྱོན་པའི་ལྟུང་བྱེད། ༥༩ རིན་པོ་ཆེ་རང་གི་མིན་པའམ་རང་གཞན་གང་རུང་གི་རིན་པོ་ཆེར་སྨོས་པ་དགོས་པའི་ཕྱིར་རུང་བར་མ་གྱུར་པ་ཐོབ་པར་ལྕོགས་པ་ན་གནས་པ་ལ་རྐྱེན་མེད་པར་རེག་འདོད་ཀྱིས་རང་ངམ་བསྐོས་པས་མངོན་སུམ་དུ་རེག་པ་རྫོགས་པ་ན་ལོངས་པ་གཞིར་གཏོགས་ཀྱི་ལྟུང་བྱེད། ༦༠ འཇིག་རྟེན་ན་གྲགས་པའི་ཆུས་དུས་ལྔ་བའི་ཚེས་གཅིག་ནས་བདུན་པའི་བཅོ་ལྔའི་བར་དང་ཟླ་ཕྱེད་སོང་བའི་དུས་མིན་པར་དགེ་སློང་ནད་པ་དང་རླུང་གིས་གོས་ཀྱི་གྲ་བསྐྱོད་པ་དང་ཆར་ཐིགས་པ་གཉིས་ལུས་ལ་ཕོག་པ་དང་སྐྲ་བྲེགས་པ་སོགས་མིན་པས་ཚ་བའི་གནས་མིན་པར་ཁྲུས་བྱེད་འདོད་ཀྱིས་ལུས་ཕྱེད་ཁྱབ་པ་ན་ཁྲུས་བྱེད་པའི་ལྟུང་བྱེད། ༈ ༦༡ རང་ངམ་བསྐོས་པས་གསོད་སེམས་ཀྱིས་དུད་འགྲོ་གཞི་མའི་ཞར་ལ་མ་ཡིན་པར་བསད་པ་ན་དུད་འགྲོ་གསོད་པའི་ལྟུང་བྱེད། ༦༢ དགེ་སློང་ཆོས་དྲུག་ལྡན་ལ་བཞད་གད་ཡན་ཆད་ཀྱིས་སྡོམ་པ་མ་ཆགས་པའམ་ཕམ་པ་བྱུང་བ་སོགས་དགེ་སློང་མིན་པའི་ཚིག་ངག་ལྔ་ལྡན་གྱིས་སྨྲས་པའི་དོན་གོ་བ་ན་འགྱོད་པ་བསྐྱེད་པའི་ལྟུང་བྱེད། ༦༣ དགེ་སློང་གི་རྨ་སྒོ་ལས་གཞན་པའི་ལུས་མ་ཉམས་པར་རང་གི་ལུས་མ་ཉམས་པས་སྐྱི་གཡའ་པར་འདོད་པས་རེག་པ་རྫོགས་པ་ན་ག་ག་ཚིལ་བྱེད་པའི་ལྟུང་བྱེད། ༦༤ ཆུ་ལྟེ་བར་སླེབ་པའི་ཚད་ལ་རྩེ་འདོད་ཀྱིས་རང་ངམ་བསྐོས་པས་དེར་ཞུགས་ཏེ་རྒྱུན་ཕྱོགས་སོགས་སུ་རྩོལ་བ་སོགས་བྱས་ཏེ་རྩེ་བ་རྫོགས་པ་ན་ཆུ་ལ་རྩེ་བའི་ལྟུང་བྱེད། ༦༥ བུད་མེད་ཆོས་དྲུག་ལྡན་སྲུང་མ་དང་མི་ལྡན་པ་དང་གནས་ཀྱི་ངོ་བོར་གྲུབ་པར་བར་དུ་མཚམས་ཆོད་ན་འདོམས་གང་དང་མཚམས་མ་ཆོད་ན་འདོམས་དགུའི་ནང་དུ་གནས་གཅིག་པར་ཁྲིམས་གྲོགས་མེད་པར་མཚན་མོ་ཡུལ་རྟེན་གཉིས་ཀ་ཉལ་ཞིང་གཉིད་ལོག་སྟེ་སྐྱ་རེངས་ཤར་ན་བུད་མེད་དང་ལྷན་ཅིག་ཉལ་བའི་ལྟུང་བྱེད། ༦༦ དགེ་སློང་ལ་སྔངས་པར་འདོད་པས་གཟུགས་སྒྲ་སོགས་ཡིད་མི་འོང་བ་ཉེ་བ་བསྒྲུབ་པ་རང་ངམ་བསྐོས་པས་ངག་གི་རིག་བྱེད་ཀྱིས་སྨྲ་བ་འཇིགས་པ་མ་སྐྱེས་ཀྱང་དོན་གོ་ན་སྔངས་པའི་ལྟུང་བྱེད། ༦༧ རབ་བྱུང་སྡེ་ལྔ་གང་རུང་གི་ཡོ་བྱེད་གང་ཡང་རུང་བ་རྐུ་སེམས་དང་ཕན་སེམས་མེད་པར་རང་ངམ་བསྐོས་པས་མངོན་སུམ་དུ་སྦེད་པ་རྫོགས་པ་ན་སྦེད་པའི་ལྟུང་བྱེད། ༦༨ དགེ་སློང་རང་གིས་དགེ་སློང་གཞན་ལ་བྱིན་པའི་གོས་དེས་མ་གནང་ཞིང་རྐུ་སེམས་དང་ཡིད་གཅུགས་ཁྱད་པར་ཅན་མ་ཡིན་པར་མི་དགའ་བར་ཤེས་བཞིན་དུ་བསྲི་བ་མེད་པར་ལོངས་སྤྱོད་པ་རྫོགས་པ་ན་གདེང་མེད་དུ་སྤྱོད་པའི་ལྟུང་བྱེད། རང་འགྲེལ་སོགས་ལས་ལྷུང་བཟེད་ཀྱིས་ཀྱང་བསྐྱེད་གསུངས་སོ། །༦༩ ཡུལ་མཚན་དང་ལྟ་བ་མཐུན་པ་གསོ་རུང་དང་མི་མཐུན་པ་རྣམ་དག་ལ་བསམ་བཞིན་དུ་སྐུར་བ་འདེབས་འདོད་ཀྱིས་ལྷག་མའི་སྐུར་བ་ངག་ལྔ་ལྡན་གྱིས་གསལ་པོའམ་བག་ཙམ་གང་རུང་གིས་སྨྲས་པ་ཡུལ་ཐ་སྙད་ལྔ་ལྡན་གྱིས་དོན་གོ་བ་ན་ལྷག་མའི་སྐུར་འདེབས་ཀྱི་ལྟུང་བྱེད། ༧༠ ཁྱིམ་པ་མོ་ཆོས་དྲུག་ལྡན་ངོ་མ་སྤོས་པ་ལམ་སེལ་༼ཕན་འདོགས་བྱ་འདོགས་བྱེད་མ་ཡིན་པ༽བྱེད་པ་སོ༼ལམ་ནོར་བ་བུད་མེད་ཀྱི་ལམ་དུ་ཞུགས་པ། འགྲོ་མི་ནུས་པར་བུད་མེད་ཀྱིས་ཁྲིད་པ༽གས་མིན་པ་དང་ས་ལ་བརྟེན་པའི་ལམ་དུ་ཁྲིམས་གྲོགས་མེད་པར་སྦྱོར་བ་གཅིག་གིས་ལྷན་ཅིག་སོང་སྟེ་རྒྱང་གྲགས་འདས་ན་བུད་མེད་དང་ལྷན་ཅིག་ལམ་དུ་འགྲོ་བའི་ལྟུང་བྱེད། ཉི་ཟེར་ལས། གྲུ་ཡང་ས་ལ་བརྟེན་པའི་ལམ་ཡིན་པར་བསྡུའོ། །ཞེས་གསུངས་སོ། །༈ ༧༡ གྲོང་འཇོམས་པའི་ཆོམ་རྐུན་པའམ་ཤོ་གམ་འདྲལ་བའི་ཚོང་བ་གང་རུང་སྐྱེས་པའི་མཚན་ལྡན་ངོ་མ་སྤོས་པ་དང་རྐྱེན་མེད་པར་དུས་དང་ལམ་སོགས་སྔ་མ་ལྟ་བུ་ནི་རྐུན་མ་དང་ལྷན་ཅིག་འགྲོ་བའི་ལྟུང་བྱེད། ༧༢ མངལ་ཤོལ་དང་བཅས་ཏེ་ལོ་ཉི་ཤུ་མ་ལོན་པ་སྡོམ་པ་སྐྱེ་བའི་བར་ཆད་གཞན་དང་མི་ལྡན་པ་ཡིད་གཉིས་ཡན་གྱིས་བསྙེན་རྫོགས་ཀྱི་མཁན་པོ་བྱས་ཏེ་བསྙེན་པར་རྫོགས་པ་ན་ཉི་ཤུ་མ་ལོན་པ་བསྙེན་པར་རྫོགས་པའི་ལྟུང་བྱེད།གཞན་ཡང་སྐྱེས་ནས་ཉི་ཤུ་མ་ལོན་པ་ཞེས་སྐབས་འགར་གསུངས་སོ། ། ༧༣ འཇིག་རྟེན་ན་གྲགས་པའི་ས་འོག་གཞི་དང་འབྲེལ་བ་མ་ཉམས་པ་འཐས་པར་གནས་པ་ཤེས་བཞིན་དུ་དགོས་པ་མེད་པར་རང་ངམ་བསྐོས་པས་མངོན་སུམ་དུ་སོར་བཞི་ཡན་རྐོས་ན་བརྐོ་བའི་ལྟུང་བྱེད། ༧༤ ཞག་བདུན་ལྟ་བུའི་དུས་ཚིགས་སུ་བོས་ན་དེ་ལས་ལྷག་ པ་དང་མ་ཤི་བར་མགྲོན་དུ་བོས་པ་ལྟ་བུ་མ་ཡིན་པར་ཞག་དང་ཟླ་བ་ལོ་ཅི་ཙམ་ཐེག་ཚད་ཟེར་ནས་ཚིགས་རྣམ་པར་བཞག་པ་མེད་ན་ཟླ་བ་བཞི་ལས་ལྷག་པར་ཁྱིམ་པ་ཉེ་དུ་མིན་པ་ལས་དུས་རུང་གི་ཟས་ཟས་གཅིག་གི་ཚད་ཟོས་ཏེ་མིད་ན་མགྲོན་གཉེར་རིང་འདུག་གི་ལྟུང་བྱེད། འདི་ལ་འདུལ་བ་བདུད་རྩིའི་ཉིང་ཁུ་ལས། ཟླ་བ་བཞི་མགྲོན་དུ་བོས་པ་ལྟ་བུ་ལ་ཟླ་བ་བཞི་ལས་ལྷག་འདུག་ནས་ཟས་ཟོས་ན་དེའི་ལྟུང་བ་འབྱུང་བར་གསུངས་སོ། །༧༥ དགེ་སློང་ཆོས་དྲུག་ལྡན་འདུལ་བ་ཤེས་པས་འདུལ་བར་གཏོགས་པའི་རང་གི་བསླབ་པ་ལ་སློབས་ཤིག ཅེས་བསྒོ་བ་ན་ཤེས་བཞིན་དུ་ཁྱོད་མི་ཤེས་པས་གཞན་ལ་མ་དྲིས་པར་མི་སློབ་ཅེས་པ་ལྟ་བུ་ངག་ལྔ་ལྡན་གྱིས་སྨྲས་པ་དེས་དོན་གོ་ན་བསླབ་པ་ཉེ་བར་འཇོག་པ་སྤང་བའི་ལྟུང་བྱེད། ༧༦ རང་ལ་རྩོད་པ་བཞི་གང་རུང་བྱེད་པའི་དགེ་སློང་གཉིས་ཡན་ཆད་དེའི་ཕྱིར་གྲོས་བྱེད་པ་ལ་དེ་སྤེལ་བའི་ཕྱིར་ཉན་ནས་དོན་གོ་བ་ན་ཉན་རྣ་བྱེད་པའི་ལྟུང་བྱེད། ༧༧ དགེ་འདུན་གྱིས་ཆོས་ལྡན་གྱི་ལས་རང་ལ་མི་མཐུན་པ་མིན་པའི་ལས་བྱེད་པ་མཚམས་ཀྱི་གནས་ནས་དགེ་སློང་ཁ་སྐོང་འོས་པ་གྲལ་ལ་འཁོད་པ་རྐྱེན་མེད་པར་ལས་དེའི་གསོལ་བ་མ་བྱས་པའི་དུས་སུ་ཤེས་བཞིན་དུ་ལྟག་༼སྔ་ཕྱི༽འོག་གི་དགེ་སློང་ལ་མ་སྨྲས་པར་འགྲོ་བ་ཐོས་པའི་ཉེ་འཁོར་འདས་པ་ན་ལས་ཀྱི་གནས་ནས་མ་སྨྲས་པར་འགྲོ་བའི་ལྟུང་བྱེད། ༧༨ སངས་རྒྱས་ཞལ་དངོས་སུ་བཞུགས་པ་དང་དགེ་སློང་གི་དགེ་འདུན་དང་དེའི་ཞལ་ཏ་བ་གང་རུང་གིས་རང་ལ་ཆོས་ལྡན་གྱི་བསྒོ་བ་ཤེས་བཞིན་དུ་མ་གུས་ཤིང་ཤད་སྦྱངས་མེད་པར་ངག་ལྔ་ལྡན་གྱིས་འགལ་བར་བྱེད་པ་ཕ་རོལ་བོས་དོན་གོ་ན་མ་གུས་པའི་ལྟུང་བྱེད། ༧༩ ཆང་མིད་པར་མངོན་པའི་ཚད་དང་ལྡན་པ་མགུལ་དུ་མིད་པ་ན་མྱོས་འགྱུར་འཐུང་བའི་ལྟུང་བྱེད། ༨༠ གླིང་དེའི་ཉིན་ཕྱེད་ཡོལ་ནས་སྐྱ་རེངས་མ་ཤར་བའི་དུས་སུ་རབ་བྱུང་སྡེ་ལྔ་གང་རུང་ཡོད་བཞིན་དུ་དེ་ལ་མ་སྨྲས་པར་ཁྱིམ་པ་མཚན་ཉིད་པའི་གནས་སུ་རྐྱེན་མེད་པར་སོང་སྟེ་བསྐོར་བ་ལ་སྒོ་ནང་དང་མ་བསྐོར་བ་ལ་ཉེ་འཁོར་འདོམས་གང་གི་ནང་དུ་ཞུགས་པ་ན་དུས་མ་ཡིན་པར་འགྲོ་བའི་ལྟུང་བྱེད། རབ་བྱུང་སྡེ་ལྔ་ནི། དགེ་ཚུལ་ཕ་མ་གཉིས། དགེ་སློབ་མ། དགེ་སློང་ཕ་མ་གཉིས་ཏེ་ལྔའོ། ། ༈ ༨༡ གླིང་དེའི་ཉིན་ཕྱེད་ཡོལ་ནས་སྐྱ་རེངས་མ་ཤར་བར་དགོས་མེད་དུ་ཁྱིམ་བཞི་པ་ལ་སོང་བའམ་དགེ་སློང་རང་གི་ངོ་བོར་དགེ་འདུན་དུས་རུང་གི་ཟས་ལ་སྤྱན་དྲངས་པའི་སྦྱིན་བདག་ལ་ཟས་བྲིམ་པ་ཡོལ་བར་མ་བྱེད་ཅིག ཅེས་མ་སྨྲས་པར་སྔ་དྲོ་ཁྱིམ་གསུམ་པའི་སྒོའི་གཏན་པའམ་ཉེ་འཁོར་འདས་པ་ན་གྲོང་དུ་རྒྱུ་བའི་ལྟུང་བྱེད། ༨༢ རང་གླིང་གི་ནུབ་ཀྱི་འོད་དམར་འདས་པ་ནས་ཉི་མ་མ་ཤར་བར་ལ་དགོས་པ་མེད་པར་བཙུན་མོའི་འཁོར་རམ་རྒྱལ་བོའི་ཕོ་བྲང་དུ་སོང་སྟེ་བསྐོར་བ་མེད་ན་ཉེ་འཁོར་དང༌། བསྐོར་ཀྱང་སྒོ་མེད་པ་དང་སྒོ་བཅད་པ་ལ་ནང་དང་མ་བཅད་པ་གཏན་པའི་རྩེ་རྩིགས་པའི་ནང་དུ་སོན་པ་འདས་པ་ན་དང༌། ཉིན་པར་སོང་སྟེ་འདུག་པ་འོད་དམར་འདས་པ་ན་རྒྱལ་པོའི་ཕོ་བྲང་དུ་འགྲོ་བའི་ལྟུང་བྱེད། ༨༣ དགེ་སློང་སྔར་སོ་ཐར་གྱི་མདོ་ལན་གཉིས་ཐོས་ཤིང་ཡིད་རྨོངས་པ་མིན་པས་གསོ་སྦྱོང་གི་དུས་སུ་མདོ་འདོན་པའི་ཚེ་དགེ་སློང་ལ་བདག་གིས་བསླབ་པའི་ཆོས་འདི་མདོར་གཏོགས་པ་ད་གདོད་ཤེས་སོ། །ཞེས་ངག་གིས་སྨྲས་པ་ཕ་རོལ་བོས་དོན་གོ་བ་ན་བསླབ་གཞི་ ཁྱད་དུ་གསོད་པའི་ལྟུང་བྱེད། ༨༤ རང་དོན་དུ་བ་སོ་རུས་པ་རྭ་གང་རུང་གི་ཁབ་རལ་སོར་བཞི་ཡན་ཆད་བྱས་སམ་བྱེད་དུ་བཅུག་སྟེ་ཟིན་པ་ན་ཁབ་རལ་འཆོས་པའི་ལྟུང་བྱེད། །༨༥ དགེ་འདུན་གྱི་ཁྲིའམ་ཁྲིའུ་རྐང་བ་བུ་གར་གཞུག་པ་མ་གཏོགས་པ་ཁྲུ་གང་ལས་ལྷག་པ་ཤེས་བཞིན་དུ་རང་ངམ་བསྐོས་པས་ བྱེད་དུ་བཅུག་སྟེ་ཟིན་པ་ན་ཁྲི་རྐང་འཆོས་པའི་ལྟུང་བྱེད། ༨༦ དགེ་འདུན་གྱི་གནས་མལ་ལ་ཞེ་སྡང་གིས་ཤིང་བལ་སྤར་གང་ཡན་གྱིས་གོས་ཕྱིར་བདལ་བ་རྫོགས་པ་ན་ཤིང་བལ་གྱི་གོས་པར་བྱས་པའི་ལྟུང་བྱེད། ༨༧རང་གི་གདིང་བ་སྲིད་དུ་རྡུལ་ཁྲུ་གསུམ་མམ་ཕྱེད་དང་ལྔ་ཞེང་དུ་ཁྲུ་དོ་དང་སོར་དྲུག་ལས་སོར་ཕྱེད་ཡན་ཆད་ཀྱི་ལྷག་པ་བྱས་ཟིན་པ་ན་གདིང་བ་ཚད་ལྷག་བྱེད་པའི་ལྟུང་བྱེད། ༨༨ གཞན་འདྲ་བ་ལ་གཡན་པ་དགབ་པ་སྲིད་དུ་ཁྲུ་དྲུག་ཞེང་དུ་གསུམ་ལས་ལྷག་པ་བྱས་སམ་བྱེད་བཅུག་ན་གཡན་པ་དགབ་པ་ཚད་ལྷག་པའི་ལྟུང་བྱེད། ༨༩ གཞན་འདྲ་བ་ལ་རས་ཆེན་སྲིད་དུ་ཁྲུ་དགུ་ཞེང་དུ་གསུམ་དང་སོར་བཅོ་བརྒྱད་ལས་ལྷག་པ་བྱས་ན་རས་ཆེན་ཚད་ལྷག་བྱེད་པའི་ལྟུང་བྱེད། ༩༠ རང་གི་ལུས་སྟོན་པའི་སྐུ་ཚད་མེད་པར་སྲིད་དུ་ཕལ་བའི་ཁྲུ་བཅོ་ལྔ་དང༌། ཞེང་དུ་དགུ་ལས་ལྷག་པའི་དང༌། དེའི་སྐུ་ཚད་ཡོད་པས་རང་གི་ཁྲུ་ལྔ་དང་གསུམ་ལས་སུམ་འགྱུར་གྱི་ཆོས་གོས་གསུམ་གང་རུང་བྱས་སམ་བྱེད་བཅུག་ན་བདེ་གཤེགས་ཆོས་གོས་ཀྱི་ཚད་ལས་གྱུར་བའི་ལྟུང་བྱེད་དེ་ལྟུང་བྱེད་འབའ་ཞིག་པ་དགུ་བཅུ་ཡིན་ནོ། །འདུལ་བ་བདུད་རྩིའི་ཉིང་ཁུ་ལས། ཁྲི་རྐང་དང་གཏིང་བ་གཡན་པ་དགབ་པ་རས་ཆེན་བཞི་ཚད་ལས་ལྷག་པའི་ལྟུང་བ་བཤགས་པའི་ཚེ་ལྷག་པོ་བཅད་ནས་བཤགས་དགོས། ཞེས་གསུངས་སོ། །