ལྔ་པ་རྒྱུའི་སྒོ་ནས་གཏན་ལ་དབབ་པ།

ལྔ་པ་རྒྱུའི་སྒོ་ནས་གཏན་ལ་དབབ་པ་ནི།

མཛོད་ལས། རྒྱུ་དྲུག་རྐྱེན་བཞི་འབྲས་བུ་ལྔར་བཤད་པ་ལས་རྒྱུ་དྲུག་ནི། བྱེད་རྒྱུ་ལྷན་ཅིག་འབྱུང་བ་དང༌། །སྐལ་མཉམ་མཚུངས་པར་ལྡན་པ་དང༌། །ཀུན་ཏུ་འགྲོ་དང་རྣམ་སྨིན་ཏེ། །རྒྱུ་ནི་རྣམ་པ་དྲུག་ཏུ་འདོད། །ཅེས་བཤད་དོ། །སྡོམ་པ་ཆོས་ཅན། རྣམ་སྨིན་གྱི་རྒྱུ་ལས་མ་སྐྱེས་ཏེ། རྣམ་སྨིན་མ་ཡིན་པའི་ཕྱིར་ཏེ། དགེ་བ་ཡིན་པའི་ཕྱིར་རོ། །ཁྱབ་སྟེ། མཛོད་ལས། རྣམ་སྨིན་ལུང་དུ་མ་བསྟན་ཆོས། །ཞེས་གསུངས་པའི་ཕྱིར། སྡོམ་པ་ཆོས་ཅན། ཀུན་འགྲོའི་རྒྱུ་ལས་མ་སྐྱེས་ཏེ། ཉོན་མོངས་ཅན་མ་ཡིན་པའི་ཕྱིར། ཁྱབ་སྟེ།མཛོད་ལས། ཀུན་འགྲོ་ཞེས་བྱ་ཉོན་མོངས་ཅན། །རྣམས་ཀྱི་རང་ས་ཀུན་འགྲོ་ལྔ། །ཞེས་གསུངས་པའི་ཕྱིར། སྐབས་འདིར་མཚོ་ཊཱིཀ་ལས། དེ་ཡང་འདོད་ཁམས་ཀྱི་འདོད་ཆགས་སྔ་མས་འདོད་ཁམས་རང་སའི་འདོད་ཆགས་ཕྱི་མ་བསྐྱེད་པ་ལྟ་བུ་ཉོན་མོངས་པ་སྔ་མས་རང་སའི་ཉོན་མོངས་པ་ཕྱི་མ་བསྐྱེད་པ་སྟེ། རང་སའི་ཉོན་མོངས་པ་ཅན་ཀུན་ལ་ཁྱབ་པས་ཀུན་འགྲོ་ཞེས་བྱའོ། །ཞེས་སོགས་འདོད་པའི་འདོད་ཆགས་ཀུན་འགྲོའི་རྒྱུ་བཞག་པ་མི་འཐད་དམ་དཔྱད་དོ། །སྡོམ་པ་ཆོས་ཅན། མཚུངས་ལྡན་གྱི་རྒྱུ་ལས་སྐྱེས་པ་མ་ཡིན་ཏེ། མཚུངས་ལྡན་མ་ཡིན་པའི་ཕྱིར། ཁྱབ་སྟེ།མཛོད་ལས། མཚུངས་ལྡན་རྒྱུ་ནི་སེམས་དག་དང༌། །སེམས་བྱུང་རྟེན་མཚུངས་ཅན་རྣམས་སོ། །ཞེས་གསུངས་པའི་ཕྱིར། སྡོམ་པ་ཆོས་ཅན། སྐལ་མཉམ་གྱི་རྒྱུ་ལས་སྐྱེས་ཏེ། རང་དང་རིས་གཅིག་པའི་དགེ་བ་སྔ་མ་ལས་སྐྱེས་པའི་ཕྱིར། ཁྱབ་སྟེ། མཛོད་ལས། སྐལ་མཉམ་རྒྱུ་ནི་འདྲ་བའོ། །རང་རིས་ས་བའོ་སྔར་སྐྱེས་རྣམས། །ཞེས་སོགས་གསུངས་པའི་ཕྱིར། སྡོམ་པ་ཆོས་ཅན།ལྷན་ཅིག་འབྱུང་བའི་རྒྱུས་བསྐྱེད་པ་ཡིན་ཏེ། རང་གི་སྐྱེ་བ་ལྡན་མིན་འདུ་བྱེད་ཀྱིས་བསྐྱེད་པའི་ཕྱིར། མཛོད་ལས། ལྷན་ཅིག་འབྱུང་གང་ཕན་ཚུན་འབྲས། །འབྱུང་བཞིན་སེམས་ཀྱི་རྗེས་འཇུག་དང༌། །སེམས་དང་མཚན་ཉིད་མཚན་གཞི་བཞིན། །ཞེས་གསུངས་པའི་ཕྱིར་རོ། །འོ་ན་སྤོང་བ་བདུན་གྱི་སྡོམ་པ་སྐྱེ་ན། སྤོང་བ་བདུན་པོ་ཕན་ཚུན་ལྷན་ཅིག་འབྱུང་བའི་རྒྱུ་འབྲས་ཡིན་ནམ་མ་ཡིན་ཞེ་ན། སོ་སོར་ཐར་བའི་སྡོམ་པ་ནི། སྤོང་བ་བདུན་པོ་ཕན་ཚུན་ལྷན་ཅིག་འབྱུང་བའི་རྒྱུ་འབྲས་མ་ཡིན་ཏེ། མཛོད་འགྲེལ་ལས། རྒྱུར་བྱས་པའི་གཟུགས་གཞན་མ་ཡིན་ནོ། །ཞེས་པ་དང༌།དེའི་འགྲེལ་བཤད་རྒྱལ་སྲས་མ་ལས། སོ་སོ་ཐར་པའི་སྡོམ་པས་བསྡུས་པའི་སྤོང་བ་བདུན་ནི་ཕན་ཚུན་ལྷན་ཅིག་འབྱུང་བའི་རྒྱུ་མ་ཡིན་ཏེ། ཚོགས་པ་ཐ་དད་པའི་ཕྱིར། ཞེས་གསུངས་སོ། །འོན་ཀྱང་བསམ་གཏན་གྱི་སྡོམ་པའི་སྤོང་བདུན་ནི་ཕན་ཚུན་ལྷན་ཅིག་འབྱུང་བའི་རྒྱུ་ཡིན་ལ། ཟག་མེད་ཀྱི་སྡོམ་པའི་སྤོང་བ་བདུན་ཡང་དེ་བཞིན་ཏེ། མཛོད་ཀྱི་འགྲེལ་བཤད་རྒྱལ་སྲས་མ་ལས། བསམ་གཏན་དང་ཟག་པ་མེད་པའི་སྡོམ་པས་བསྡུས་པའི་སྤོང་བ་བདུན་ནི་ཕན་ཚུན་ལྷན་ཅིག་འབྱུང་བའི་རྒྱུ་ཡིན་ཏེ། སྲོག་གཅོད་པའི་སྤོང་བ་ཡང་གཞན་དྲུག་གི་ལྷན་ཅིག་འབྱུང་བའི་རྒྱུ་ཡིན་ལ། དྲུག་པོ་དེ་དག་ཀྱང་དེའི་ལྷན་ཅིག་འབྱུང་བའི་རྒྱུ་ཡིན་ནོ་ཞེས་མཚོ་ཊཱིཀ་ལས་གསུངས་སོ། །འོན་ཀྱང་སོ་ཐར་གྱི་སྤོང་བདུན་ཕན་ཚུན་རྒྱུ་འབྲས་མིན་པ་དང་ཟག་མེད་ཀྱི་སྡོམ་པའི་སྤོང་བདུན་ཕན་ཚུན་རྒྱུ་འབྲས་ཡིན་པའི་རྒྱུ་མཚན་འཚོལ་དགོས་སོ། །སྡོམ་པ་ཆོས་ཅན། རང་གི་བྱེད་རྒྱུ་ལས་བྱུང་སྟེ། རང་ལས་གཞན་པ་ཀུན་རང་གི་བྱེད་རྒྱུ་ཡིན་པའི་ཕྱིར། ཁྱབ་སྟེ། མཛོད་ལས། རང་ལས་གཞན་པ་བྱེད་རྒྱུའི་རྒྱུ། །ཞེས་སོ། །དེ་ཡང་རྒྱུའི་ཀུན་སློང་དང༌། དུས་ཀྱི་ཀུན་སློང་ངོ༌། ། དེ་ཡང་མཛོད་ལས། ཀུན་སློང་རྣམ་གཉིས་རྒྱུ་དང་ནི། །དེ་ཡི་དུས་ཀྱི་སློང་ཞེས་བྱ། །གཉིས་ལས་དང་པོ་རབ་འཇུག་བྱེད། །གཉིས་པ་རྗེས་སུ་འཇུག་བྱེད་ཡིན། །ཞེས་སོ། །དང་པོ་རྒྱུའི་ཀུན་སློང་ལ་གསུམ་སྟེ། ལེན་པར་འདོད་པ་དང༌། འཐོབ་པར་ཤེས་པ་དང༌། མྱ་ངན་ལས་འདས་པའི་བསམ་པ་བརྟན་པོ་དང་ལྡན་པའོ། །དང་པོ་ནི། ངེས་པ་ལྔ་དང་བྲལ་བའི་ལེན་འདོད་ཡིན་ཏེ། མཛོད་འགྲེལ་ལས། ངེས་པ་ལྔ་པོ་སེམས་ཅན་དང་ཡན་ལག་དང་ཡུལ་དང་དུས་དང་ཚེ་ངེས་པ་མི་བྱེད་ན་སོ་སོར་ཐར་པའི་སྡོམ་པ་ཐོབ་སྟེ། སེམས་ཅན་ཆེ་གེ་མོ་ཞིག་ལས་སྤང་ཞེས་བྱ་བ་ནི་སེམས་ཅན་ངེས་པའོ། །ཡན་ལག་ཆེ་གེ་མོ་ཞིག་སྤོང་ངོ་ཞེས་བྱ་བ་ནི་ཡན་ལག་ངེས་པའོ། །ཡུལ་ཆེ་གེ་མོ་ཞིག་ཏུ་སྤོང་ངོ་ཞེས་བྱ་བ་ནི་ཡུལ་ངེས་པའོ། །ཟླ་བའི་བར་དུ་ཞེས་བྱ་བ་ནི་དུས་ངེས་པའོ། །འཐབ་མོ་མ་གཏོགས་སོ་ཞེས་བྱ་བ་ནི་ཚེ་ངེས་པ་སྟེ། དེ་ལྟར་མནོས་ན་ལེགས་པར་སྤྱད་པ་ཙམ་དུ་ནི་འགྱུར་རོ། །ཞེས་སོ། །མདོ་སྡེ་པ་ནི་ངེས་པ་ལྔས་སྡོམ་པ་མནོས་ན། མཛོད་འགྲེལ་ལས། མདོ་སྡེ་པ་རྣམས་ན་རེ། སྡོམ་པ་མ་ཚང་བ་ཡོད་ལ་ཉི་ཚེ་བ་ཡང་ཡོད་དེ། འཆལ་བའི་ཚུལ་ཁྲིམས་དེ་ཙམ་གྱིས་གེགས་བྱེད་པའི་ཕྱིར། ཞེས་སོ། །དེ་དང་མཐུན་པར་སློབ་དཔོན་ཐོགས་མེད་ཀྱིས་རྣམ་པར་གཏན་ལ་དབབ་པ་བསྡུ་བ་ལས་དགེ་བསྙེན་གྱི་སྡོམ་པ་བརྒྱ་ཐམ་པར་ཕྱེ་སྟེ་གསུངས་སོ། །འོན་ཀྱང་བྱེ་བྲག་ཏུ་སྨྲ་བ་རྣམས་ནི་དེ་ལྟར་མི་འདོད་དོ། །