གསོལ་འདེབས་སྐོར།
གསོལ་འདེབས་སྐོར།
༧འཕགས་མའི་གསོལ་འདེབས་འཕྲིན་ལས་ཀུན་འགྲུབ་ཅེས་བྱ་བ་བཞུགས་སོ། །པད་ཟླའི་གདན་ལ་སེམས་མའི་དཀྱིལ་དཀྲུང་གིས། །ཐུགས་རྗེ་ཕྱོགས་མེད་ལུས་ཅན་མི་འདོར་བའི། །འཇིགས་པ་བརྒྱད་སོགས་བར་ཆད་མ་ལུས་པ། །མཚན་ཙམ་དྲན་པས་ཀུན་ནས་ཞི་མཛད་མ། །ཉེར་གཅིག་འཕགས་མ་མྱུར་མ་དཔའ་མོ་ལ། །དུས་རྣམས་ཀུན་ཏུ་དད་པས་གསོལ་འདེབས་ན། །མཆོག་དང་ཐུན་མོང་དངོས་གྲུབ་སྩོལ་བ་དང༌། །འགྲོ་འདི་དགེ་ལེགས་དཔལ་གྱིས་སྐྱོང་གྱུར་ཅིག ། ལུང་རྟོགས་རིན་ཆེན་བསྟན་པའི་སྙིང་བོ་མཆོག ། འཆད་ཉན་སྒོམ་སྒྲུབ་བཤད་སྒྲུབ་འཕྲིན་ལས་ཀྱིས། །བསྟན་པ་འཛིན་རྣམས་མི་མཐུན་ཀེག་ཀུན་ཞི། །བར་ཆད་གནོད་པ་འཇོམས་པའི་མཐུ་ཐོབ་ཤོག ། མི་དང་མི་མིན་སྐྱེ་རྒུ་མ་ལུས་པ། །ནད་མཚོན་དུག་དང་གདོན་གྱིས་གནོད་པ་ཞི། །མི་འདོད་བྲལ་ཞིང་འདོད་དོན་མ་རྙེད་པའི། །མྱ་ངན་གདུང་བ་ཐམས་ཅད་མེད་པར་མཛོད། །འདོད་པ་ཆེ་ལ་ཆོག་ཤེས་དམ་པ་ཐོབ། །ཞེ་སྡང་འབར་ལ་བཟོད་པའི་གོ་ཆ་སྤྲས། །གཏི་མུག་འགྲོ་ལ་ཤེས་རབ་རབ་རྒྱས་ཏེ། །འཇིག་རྟེན་མ་ལུས་ཀུན་ནས་དགེ་གྱུར་ཅིག། སྐྱབས་འོག་པ་ཀུན་དད་པས་གསོལ་འདེབས་ན། །སྨོན་པ་བཞིན་དུ་གང་ལ་གང་འདོད་དུ། །ཆོས་བཞིན་འགྲུབ་ཅིང་འགྲོ་ལ་ཕན་པ་ཡིས། །བདེ་བླག་ངང་གིས་ཆར་དུ་སྙིལ་བར་མཛོད། །གསོལ་བ་འདེབས་སོ་རྒྱལ་ཡུམ་འཕྲིན་ལས་མ། །བྱིན་གྱིས་རློབས་ཤིག་མཐུ་སྟོབས་དཔལ་བསྐྱེད་མ། །དེང་ནས་རེ་འོ་འཕགས་མ་སྒྲོལ་མ་མཆོག ། རྩེ་གཅིག་ཡིད་ཀྱིས་སྐྱབས་སུ་ཁྱེད་བསྟེན་ནོ། །འཕགས་མའི་གསོལ་འདེབས་འཕྲིན་ལས་ཀུན་འགྲུབ་ཅེས་བྱ་བ་འདི་ཉིད་ཚུལ་ཁྲིམས་རྒྱ་མཚོས་བསྐུལ་ངོར་ངག་དབང་དངོས་གྲུབ་དཔལ་ནས་སོ། །བཀྲ་ཤིས། དགེའོ། །ཕྱག་རྡོར་རྣམ་སྤྲུལ་བློ་བཟང་འཕྲིན་ལས་རྗེ། །མཐུ་སྟོབས་དབང་ཕྱུག་བསོད་ནམས་དཔལ་ལྡན་མཆོག ། རྟོགས་པའི་མངའ་བདག་བསོད་ནམས་བཟང་པོའི་དཔལ། །རྣམ་གསུམ་བླ་མར་ཕྱག་འཚལ་གསོལ་བ་འདེབས། །བདག་སོགས་འགྲོ་རྣམས་སྲིད་ཞིའི་འཇིགས་སྐྱོབས་ནས། །ཕྱི་མ་བྱང་ཆུབ་ལམ་ནས་མཇལ་བར་སྨོན། །ཞེས་པ་འདི་ཆོས་རབ་ནས་བསྐུལ་ངོར་དངོས་གྲུབ་དཔལ་ནས་བྲིས་པ་དགེའོ། །རྒྱལ་ཀུན་ཆོས་སྐུ་ཉག་གཅིག་བཤེས་གཉེན་དུ་སྣང་བ། །ཐུགས་རྗེ་ཕ་མཐའ་བྲལ་བའི་ཉམ་ཐག་གི་སྐྱབས་གནས། །འགྲོ་ཀུན་ཐར་བའི་དགའ་ཆེན་ཕངས་མེད་དུ་སྩོལ་མཁས། །འཇིགས་མེད་མགོན་པོ་ཁྱེད་ཞབས་ཅོད་པན་དུ་བསྟེན་ནོ། །སོར་བཅུ་སྙིང་ལ་སྦྱར་ནས་དད་གདུང་གིས་འབོད་ན། །ཕ་གཅིག་བརྩེ་བའི་རང་གཟུགས་སྙིང་ཁུང་ལ་ཕེབས་ཏེ། །བྱིན་རླབས་ཏིང་འཛིན་སྒོ་བརྒྱའི་དགའ་སྟོན་དང་བཅས་པར། །དོན་གཉིས་ལྷུན་འགྲུབ་ས་ལ་ཐོགས་མེད་དུ་སྦྱོར་ཅིག ། ཅེས་པ་འདི་ནི་དངོས་གྲུབ་དཔལ་ནས། ཀུན་ལ་མཐུན་པར་བྱེད་པའི་བྱ་རྩོམ་པ། །ཀུན་མཁྱེན་གྱིས་ནི་མ་བྱུང་ཨེ་མ་ཧོ། །འཇིག་རྟེན་མཐུན་པ་བདེན་ལས་ངན་གཡོ་མཆོག ། རང་སེམས་ཆོས་དང་མཐུན་ན་དོན་ཆེན་རྙེད། །སྤྲང་འཁྱམ་པ་དངོས་གྲུབ་དཔལ་ནས། བཀའ་དྲིན་གཞལ་མེད་བླ་མ་རིན་པོ་ཆེས། །བྱང་ཆུབ་མ་ཐོབ་བར་དུ་བརྩེ་བས་སྐྱོངས། །བདག་ལ་རེ་ས་སྐྱབས་གནས་གཞན་མ་མཆིས། །མགོན་པོ་གང་གི་ཐུགས་རྗེས་གཟིགས་པར་ཞུ། །དངོས་གྲུབ་དཔལ་ནས།