བག་མ་ལ་དགེ་བའི་ལས་ཕྲན་བདུན་གྱི་ཆོ་ག་བཀྲ་ཤིས་དཔལ་བསྐྱེད།
འཇམ་མགོན་བློ་གྲོས་མཐའ་ཡས།

བག་མ་ལ་དགེ་བའི་ལས་ཕྲན་བདུན་གྱི་ཆོ་ག་བཀྲ་ཤིས་དཔལ་བསྐྱེད་ཅེས་བྱ་བ་བཞུགས་སོ། །ན་མོ་མཉྫུ་ཤྲཱི་ཡེ། འཇིག་རྟེན་པའི་སྲིད་འཛིན་པ་ལ་བག་མ་ལེན་པའི་ཆོ་ག་ཞེས་འཕགས་ཡུལ་དུ་རིག་བྱེད་ལུགས་དང༌། རྒྱ་ནག་འབྱུང་རྩིས་ལས་ཅི་རིགས་པ་འབྱུང་ཡང༌། སོ་སོའི་ཡུལ་ལུགས་འདོད་སྦྱར་ལྟ་བུས་གཞུང་གཞན་ལྟར་ཁྲིགས་སུ་སྦྱར་བ་མེད་སྟབས། ཡིག་རྙིང་ཕལ་ཆེར་གྲོང་སྔགས་པ་མི་མཁས་པས་བཅོས་པས་ཚུལ་དང་མཐུན་པ་མི་སྣང་བས། འདིར་བག་མ་ལ་དགེ་བའི་ལས་ཕྲན་བདུན་ཅེས་གྲགས་པ་དེ་ཉིད་སྐབས་སུ་བབས་ཤིང་འཐད་པའི་ཕྱོགས་སུ་བཟུང་ནས་ཁྲིགས་སུ་བཀོད་པ་ལ། ཐོག་མར་སྣ་བོན་བསྐྱེད་རིམ་ལྷ་སྔགས་ཀྱི་གདེངས་དང་ལྡན་ཅིང་ནུས་པ་ཐོབ་པ། བག་མའི་བདུན་ཟུར་ལོ་བ་ཞིག་གིས་བྱ་བ་འབྱུང་རྩིས་ཀྱི་དགོངས་པ་ཡིན་ལ། ཡོ་བྱད་དྲག་སྔགས་ཀྱིས་བཏབ་པའི་ཐུན་དང་རྣམ་འཇོམས་དང་སྨེ་བརྩེགས་བསྐྱེད་བཟླས་ཀྱིས་བྱིན་གྱིས་བརླབས་པའི་ཁྲུས་ཆུ་མེ་ལོང༌། སྣ་འདྲེ་སྐྲོད་པའི་རྫས་སྟག་ཡོས་ལོ་བ་ལ་ལྕགས་ཀྱི་རལ་གྲི། རྟ་སྦྲུལ་ལ་ཆུ་སྐྱོག་ནག་པོ། བྱ་སྤྲེལ་ལ་མེ་སྒྲོན། བྱི་ཕག་ལ་ས་སེར། གཤེད་བཞི་ལོ་བ་ལ་ཚེར་མ་ཅན་གྱི་ཤིང་གི་ཡལ་ག་སོགས་འོག་ཏུ་དགོས་པའི་ཡོ་བྱད་རྣམས་རྩིས་གཞུང་དང༌། ཡུལ་ལུགས་བསྟུན་ཏེ་འདུ་བྱ། དེ་ནས་བག་མས་ཁང་མགོ་མཐོང་སར་སླེབ་མ་ཐག་གླིང་ཆེན་སྣ་བསྒྱུར་གྱི་གཏོ་བཅའ་སྒྲུབ་བྱས་པ་བོར། དངོས་གཞི་ལས་ཕྲན་བདུན་ནི། སྣ་འདྲེ་བསྐྲད་པ། མནོལ་གྲིབ་བཀྲུ་བ། གདན་བཏིང་བ། དཀར་གསུམ་གྱིས་ངོ་གསོ་བ། མིང་འདོགས་པ། ལྷ་ལ་འདོགས་པ། གཡང་འགུགས་པ་རྣམས་དང༌། མཐའ་རྟེན་ཤིས་པ་བརྗོད་པའོ། ༈། དང་པོ་བག་སྣ་ལ་འདྲེ་ཡོད་པས་དེ་བསྐྲད་པ་ནི། སྒོ་རྩར་སླེབ་པ་དང༌། སྔགས་འཆང་གིས་ཐུན་དང་དགྲ་གཤེད་ཀྱི་རྫས་ཐོགས་ལ། ཡི་དམ་གང་རུང་གི་ང་རྒྱལ་བཟུང་དགོས་ཀྱང༌། འདིར་སྤྱི་ཙམ་དུ། ཨོཾ་ཨཱ་ཀྲོ་ཏེ་ཀ་ཡ་མཱནྟ་ཀ་ཧ་ན་མ་ཐ་བྷཉྫ་ཧཱུྃ་ཕཊ། རང་ཉིད་སྐད་ཅིག་གིས་འཇམ་དཔལ་ནག་པོ་རབ་ཏུ་ཁྲོས་པའི་སྐུར་གྱུར། ཧཱུྃ་ཧྲཱིཿ བླ་མ་རྣམས་ཀྱི་བྱིན་རླབས་དང༌། །ཡི་དམ་ལྷ་ཡི་ཏིང་འཛིན་དང༌། །མཁའ་འགྲོ་ཆོས་སྐྱོང་མཐུ་སྟོབས་ཀྱིས། དངོས་གྲུབ་བར་ཆད་བྱེད་པའི་བགེགས། །ལོག་པར་འདྲེན་པ་བདུད་ཀྱི་ཚོགས། །འདི་རུ་མ་འདུག་གཞན་དུ་དེངས། ན་མོ། རིག་འཛིན་རྩ་བརྒྱུད་ཀྱི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང༌། སངས་རྒྱས་ཀྱི་བཀའ་བདེན་པ་དང༌། ཆོས་ཀྱི་བཀའ་བདེན་པ་དང༌། དགེ་འདུན་གྱི་བཀའ་བདེན་པ་དང༌། གསང་སྔགས་དང་རིག་སྔགས་དང་གཟུངས་སྔགས་དང་སྙིང་པོ་དང་ཕྱག་རྒྱ་དང་ངེ་འཛིན་རྣམས་ཀྱི་བདེན་པ་དང༌། ཆོས་ཉིད་གདོད་ནས་རྣམས་པར་དག་ཅིང་ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང༌། ཁྱད་པར་དུ་བཅོམ་ལྡན་འདས་འཇམ་དཔལ་གཞོན་ནུར་གྱུར་པ་ཞི་བ་དང་ཁྲོ་བོའི་ལྷ་ཚོགས་རྣམས་ཀྱི་བཀའ་བདེན་པ་དང༌། དཔལ་ལྡན་དམ་པ་ཆོས་སྐྱོང་བའི་སྲུང་མ་ཡེ་ཤེས་དང་ལས་དང་འཇིག་རྟེན་པ་རྣམས་ཀྱི་བཀའ་བདེན་པ་དང༌། བདེན་པ་ཆེན་པོའི་བྱིན་གྱིས་བརླབས་ཀྱིས། བག་སྣ་ལ་རྒྱུ་བའི་འབྱུང་པོ་གདོན་གྱི་རིགས་སུ་གྱུར་ཅིང་གནོད་འཚེའི་བསམ་སྦྱོར་དང་ལྡན་པ་ཐམས་ཅད་འདིར་མ་གནས་པར་གཞན་དུ་དེངས་ཤིག གལ་ཏེ་བདེན་པའི་བཀའ་ཐོས་བཞིན་ཏུ་འགྲོ་བར་མི་བྱེད་པ་དེ་དག་ཐམས་ཅད་རབ་ཏུ་འབར་བའི་རྡོ་རྗེའི་ཁྲོ་བོ་དང་མཚོན་ཆའི་ཆར་ཆེན་པོས་རྡུལ་ཕྲན་བཞིན་དུ་བརླག་པར་འགྱུར་རོ། །ཨོཾ་ཨཱ་ཀྲོ་ཏེ་ཀ་ཡ་མཱནྟ་ཀ་ཧ་ན་མ་ཐ་བྷཉྫ་ཧཱུྃ་ཕཊ། ཨྱེ་ཨྱེ་ཨྱེ། ཨཱ་ཀྲོ་དྷེ་ཀ་ཡ་མཱནྟ་ཀ་ཡ་མ་ཡེ། ཀཱ་ལ་རཱུ་པ་ཀ་པ་ཡེ། ཧྲཱིཿཥྟི་ཨ་པ་ཡེ། ཨ་ཨ་ནེ་ཨ་ནེ། དུ་དུ་ནེ་དུ་ནེ། ཨ་ཨི་ཨུ་ཨེ་ཨོ་ཨཾཿ ར་རཱི། ལ་ལཱྀ། དུ་རུ་ཡེ། བྱ་ཙ་ཡེ། སེང་ཧ་ཡེ། ཧྲཱི་ད་ཡེ། བྷི་ཏ་ཡེ། ཙིཏྟ་ཡེ། ཧ་ལ་ཡེ། མུ་ཀ་ཡེ། ཨུ་ཨུ་ནེ། བྱི་ཏྲི་ཏ། ཨ་ཨ་ན་ན། ཡ་མ་ར་ཛ། ཡ་མ་རཀྴ། ཡ་མ་རཀ་ཨ། ཡ་མ་རཀ་ཥ། བཻ་ཏ་ལི། ཀྲོ་དྷི་ཤྭ་རི། མ་མ་ཨེ་ཀ་ཛ་ཊཱི། དེ་མ་ཁ་ལ་བཾ་རིལ། རུ་ལུ་རུ་ལུ་ཤྲཱི་བཛྲ་ཀྲོ་དྷ། ཡ་མ་ཀརྨ་རོ་ཥ་ཎ། ཀྲོ་དྷ་ཙཎྜ་རཀྴ་མོན་ཏ་ཨཱཿཧཱུྃ་ཛཿ དྲག་སྔགས་གང་ཤེས་དང་སུམ་བྷ་ནི་བརྗོད་ལ་ཐུན་གཏོར། དེ་ནས་དགྲ་གཤེད་ཀྱི་རྫས་ཐོགས་ལ། ཧཱུྃ། ང་ནི་འཕགས་པ་འཇམ་དཔལ་ཏེ། །འབྱུང་བ་ལྔ་ལས་གྱུར་པ་ཡི། །འདྲེ་གདོན་འབྱུང་པོ་ཡིད་གཟུགས་ཅན། །བག་མའི་སྣ་ལ་རྒྱུ་བ་ཀུན། །གནོད་འཚེའི་བསམ་སྦྱོར་རབ་ཏུ་སྤོངས། །འབྱུང་བ་ལྔ་ཡི་དབྱིངས་སུ་དེངས། །ཡེ་ཤེས་ལྔ་ཡི་རང་རྩལ་ལས། །རྟེན་འབྲེལ་རྫས་སུ་ཤར་བ་འདི། །འཇམ་དཔལ་དབྱངས་ཀྱིས་རྗེས་སུ་གནང༌། །སངས་རྒྱས་རྣམས་ཀྱིས་བྱིན་གྱིས་བརླབས། །ཏིང་འཛིན་སྔགས་ཀྱི་ནུས་མཐུ་བསྐྱེད། །ཕྱར་བ་ཙམ་གྱིས་ཀུན་ཀྱང་འདར། །བྲབས་པ་ཙམ་གྱིས་འདྲེ་གདོན་ཞི། །སྣང་སྲིད་གདུག་རྩུབ་ཞི་བར་ནུས། །ཤིང་གི་གནོད་པ་དར་བ་ན། །གནམ་ལྕགས་རལ་གྲི་འབར་བས་བཅད། །མེ་ཡི་གནོད་པ་དར་བ་ན། །ཆུ་རྒྱུན་རྦ་རླབས་འཁྲུགས་པས་བསད། །ལྕགས་ཀྱི་གནོད་པ་དར་བ་ན། །མེ་དཔུང་རབ་ཏུ་འབར་བས་བཞུ། །ཆུ་ཡི་གནོད་པ་དར་བ་ན། གཡོ་མེད་ས་ཡི་ཕུང་པོས་བསུབ། །ས་ཡི་གནོད་པ་དར་བ་ན། །ལྗོན་ཤིང་ཡལ་ག་རྒྱས་པས་བཤིག །འབྱུང་ལྔའི་ལྷ་འདྲེ་གནོད་སེམས་ཅན། །ཐམས་ཅད་རང་དགྲའི་ནུས་པས་བཅོམ། །འཕགས་པ་འཇམ་དཔལ་བདེན་པ་དང༌། །རྟེན་འབྲེལ་རྫས་ཀྱི་ནུས་པ་ཡིས། །འབྱུང་ལྔའི་སྣ་འདྲེ་ཞི་གྱུར་ཅིག །ཨོཾ་པྲ་སོད། ཆུ་སོད། དུར་མི་སོད། དུར་རྟ་སོད། ཆུ་ཁ་ལ་མགོ་ལ་སོད། གཉན་མགོ་ལ་ཆོད། ཁ་ལ་ཛཿ ཀཾ་ཤཾ་ཏྲཾ་རྦད་ཕཊ་སྭཱ་ཧཱ། ཞེས་བརྗོད་ལ་རལ་གྲི་ཡིན་ན་གཡུག ཆུ་འཐོར་སོགས་བྱའོ། ༈ གཉིས་པ་བག་མ་ལ་ཁྱིམ་ལྷ་སོགས་མནོལ་བའི་གྲིབ་ཡོད་པས་དེ་བཀྲུ་བ་ནི། སྔར་བསྒྲུབས་པའི་ཁྲུས་ཆུ་དང་མེ་ལོང་ཐོགས་ལ། འདི་ནི་ཁྲུས་མཆོག་དཔལ་དང་ལྡན། །ཐུགས་རྗེའི་ཆུ་ནི་བླ་ན་མེད། །བྱིན་རླབས་ཡེ་ཤེས་ཆུ་ཡིན་ཏེ། །ཅི་འདོད་དངོས་གྲུབ་སྩོལ་བར་མཛོད། །ན་མཤྩནྚ་བཛྲ་ཀྲོ་དྷཱ་ཡ། ཧུ་ལུ་ཧུ་ལུ། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ཨ་མྲྀ་ཏེ་ཧཱུྃ་ཕཊ། རྣམ་འཇོམས་དང་སྨེ་བརྩེགས་སྔགས་ལ། ཨོཾ་ཨེ་ཧོ་ཤུདྡྷེ་ཤུདྡྷེ་སྭཱ་ཧཱ༔ ལཾ་ཧོ་ཤུདྡྷེ་ཤུདྡྷེ་སྭཱ་ཧཱ༔ བཾ་ཧོ་ཤུདྡྷེ་ཤུདྡྷེ་སྭཱ་ཧཱ༔ རཾ་ཧོ་ཤུདྡྷེ་ཤུདྡྷེ་སྭཱ་ཧཱ༔ ཡཾ་ཧོ་ཤུདྡྷེ་ཤུདྡྷེ་སྭཱ་ཧཱ༔ ཧ་ལ་པཉྩ་སརྦ་ཤུདྡྷེ་ཤུདྡྷེ་སྭཱ་ཧཱ༔ འདི་ནི་སྦྱིན་པའི་རང་བཞིན་ཆུ། །སེར་སྣའི་དྲི་མ་སྦྱོང་མཛད་ཅིང༌། །གཏོང་བ་དྲི་ཡིས་ལེགས་བགོས་ཆུ། །ཁྲུས་ལེགས་མཛད་ཀྱིས་ཁྲུས་བགྱིའོ། །འདི་ནི་ཚུལ་ཁྲིམས་རང་བཞིན་ཆུ། །འཆལ་བའི་དྲི་མ་སྦྱོང་མཛད་ཅིང༌། །ཚུལ་ཁྲིམས་དྲི་ཡིས་ལེགས་བགོས་ཆུ། །ཁྲུས་ལེགས་མཛད་ཀྱིས་ཁྲུས་བགྱིའོ། །འདི་ནི་བཟོད་པའི་རང་བཞིན་ཆུ། །ཁོང་ཁྲོའི་དྲི་མ་སྦྱོང་མཛད་ཅིང༌། །བཟོད་པའི་དྲི་ཡིས་ལེགས་བགོས་ཆུ། །ཁྲུས་ལེགས་མཛད་ཀྱིས་ཁྲུས་བགྱིའོ། །འདི་ནི་བརྩོན་འགྲུས་རང་བཞིན་ཆུ། །ལེ་ལོའི་དྲི་མ་སྦྱོང་མཛད་ཅིང༌། །བརྩོན་འགྲུས་དྲི་ཡིས་ལེགས་བགོས་ཆུ། །ཁྲུས་ལེགས་མཛད་ཀྱིས་ཁྲུས་བགྱིའོ། །འདི་ནི་བསམ་གཏན་རང་བཞིན་ཆུ། །རྣམ་གཡེང་དྲི་མ་སྦྱོང་མཛད་ཅིང༌། །བསམ་གཏན་དྲི་ཡིས་ལེགས་བགོས་ཆུ། །ཁྲུས་ལེགས་མཛད་ཀྱིས་ཁྲུས་བགྱིའོ། །འདི་ནི་ཤེས་རབ་རང་བཞིན་ཆུ། །ཤེས་འཆལ་དྲི་མ་སྦྱོང་མཛད་ཅིང༌། །ཤེས་རབ་དྲི་ཡིས་ལེགས་བགོས་ཆུ། །ཁྲུས་ལེགས་མཛད་ཀྱིས་ཁྲུས་བགྱིའོ། །ཧཱུྃ། རྣམ་པར་འཇོམས་པའི་བྱིན་རླབས་དང༌། །སྨེ་བ་བརྩེགས་པའི་ནུས་མཐུ་དང༌། །གསང་སྔགས་རིག་སྔགས་བདེན་པ་ཡིས། །བཀྲུའོ་སྡིག་སྒྲིབ་ཐམས་ཅད་བཀྲུ། བཀྲུའོ་ནད་གདོན་བགེགས་རིགས་བཀྲུ། བྱུར་དང་སྐལ་བ་ངན་པ་དང༌། །བཀྲ་མི་ཤིས་པ་ཐམས་ཅད་བཀྲུ། ཕྱོགས་ངན་འདྲེ་ལྔ་བདུད་གཅོད་དང༌། །མི་ གཙང ་མནོལ་གྲིབ་ཕོག་པ་བཀྲུ། ཟས་ངན་ལྟོ་རུ་ཟོས་པ་དང༌། །གོས་ངན་ལུས་ལ་གྱོན་པ་བཀྲུ། རྒབ་འདྲེ་ཡུལ་འདྲེ་འཁྱམས་པོ་དང༌། །དམ་སྲི་དཀོར་འདྲེའི་གནོད་པ་བཀྲུ། ཤི་འདྲེ་མོ་དང་གསོན་འདྲེ་མོ། །བསེ་རག་འགོང་པོའི་ཁ་རླངས་བཀྲུ། ཕ་རོལ་བྱད་ཁ་རྦོད་གཏོང་དང༌། །བྱོལ་པོ་ཆགས་ཆེའི་གནོད་པ་བཀྲུ། ཕ་ལྷ་མ་ལྷ་ཞང་ལྷ་དང༌། །ཕྲག་ལྷ་ཡུལ་ལྷ་མནོལ་བ་བཀྲུ། ཕ་མཚུན་དགྲ་བླ་གཉན་པོ་དང༌། །སྐྱོབ་བྱེད་ལྷ་སྲུང་མནོལ་བ་བཀྲུ། མཁོན་དང་བཙོག་གིས་མནོལ་བ་བཀྲུ། དམེ་དང་ཡུག་གིས་མནོལ་བ་བཀྲུ། འབྱུང་ལྔའི་གདོན་གྱིས་མནོལ་བ་བཀྲུ། གངས་རི་བཞིན་དུ་དཀར་གྱུར་ཅིག །ཤེལ་དཀར་བཞིན་དུ་གསལ་གྱུར་ཅིག །བཀྲ་ཤིས་བདེ་ལེགས་རྒྱས་གྱུར་ཅིག །སྔགས་བརྗོད། སྟོང་གསུམ་ཀུན་ཏུ་དྲི་དང་ངད་ལྡན་པའི། །སྤོས་དང་སྨན་སྦྱར་ཆུ་ གཙང ་དག་པའི་ཁྲུས། །ཡེ་ཤེས་སྤྲིན་ཕུང་མཁའ་ལ་ཆར་འབེབས་པས། །མི་ གཙང ་དྲི་མའི་ཚོགས་ཀུན་དག་གྱུར་ཅིག །ཨོཾ་ཨ་ཀ་ནི་ནི་ཀ་ནིཨ་བི་ལ་མཎྜ་ལ་མ་ཡེ་སྭཱ་ཧཱ། ཨོཾ་མ་མ་ཀ་ར་ཀ་ར་ཡེ་སྭཱ་ཧཱ། ཨོཾ་མ་མ་ཁཾ་ཁཾ་ཡེ་སྭཱ་ཧཱ། ཨོཾ་མ་མ་རཾ་རཾ་ཡེ་སྭཱ་ཧཱ། ཨོཾ་མ་མ་སུ་སུ་སྟཾ་སྟཾ་ཡེ་སྭཱ་ཧཱ། ཨོཾ་མ་མ་སྔོ་ཏ་སྔོ་ཏ་ཡེ་སྭཱ་ཧཱ། ཞེས་དང༌། ཨོཾ་ཡེ་དྷརྨ་ཧེ་ཏུ་པྲ་བྷ་ཝཱ་ཧེ་ཏུན་ཏེ་ཥཱནྟ་ཐཱ་ག་ཏོ་ཧྱ་ཝ་དཏ། ཏེ་ཥཱཉྩ་ཡོ་ནི་རོ་དྷ་ཨེ་ཝཾ་བཱ་དཱི་མ་ཧཱ་ཤྲཱ་མ་ཎ་སྭཱ་ཧཱ། བརྗོད་ལ་ཁྲུས་བྱའོ། ༈ །གསུམ་པ་ཁྱིམ་ནང་དུ་བག་མའི་སྲོག་ལུས་དབང་ཀླུང་བསྐྱེད་པའི་གདན་གང་དགོས་རྩིས་གཞུང་དང་མཐུན་པར་བཏིང་བའི་སྟེང་དུ་ཁ་སྨེ་བ་དཀར་གསུམ་མམ། ཕྱྭ་ལོན་སོགས་ཀྱི་ཕྱོགས་སུ་བསྟན་ཏེ་བཞག་ལ། ཀྱེ། བཀྲ་ཤིས་སྲིད་པ་དང་པོ་ལ། །བོད་ཁམས་ཁ་བ་ཅན་ལྗོངས་སུ། །འཕགས་པ་སྤྱན་རས་གཟིགས་དབང་ཉིད། །མི་ཡི་རྗེ་བོའི་ཚུལ་བསྟན་པ། །ཆོས་རྒྱལ་སྲོང་བཙན་སྒམ་པོ་དེས། །འཇིག་རྟེན་མཐུན་འཇུག་མཛད་པ་དང༌། །གདུལ་བྱ་སྨིན་ཅིང་གྲོལ་བའི་ཕྱིར། །འཕྲུལ་བློན་ཆེན་པོ་མགར་ལ་སོགས། །གཉེན་པོ་སྐྱ་བརྒྱ་བཅས་པ་རྣམས། །རྒྱ་དང་བལ་པོའི་ཡུལ་དུ་བཏང༌། །ཁྲོ་གཉེར་ཅན་མའི་རྣམ་འཕྲུལ་ནི། །བལ་རྗེའི་སྲས་མོ་ཁྲི་བཙུན་དང༌། །འཕགས་མ་སྒྲོལ་མའི་རྣམ་འཕྲུལ་ནི། །ལྷ་ཅིག་འུན་ཤིང་ཀོང་ཇོ་གཉིས། །འཛམ་བུའི་གླིང་ན་དཀོན་པ་ཡི། །ཁྱད་པར་འཕགས་པའི་རྟེན་མཆོག་དང༌། །རིན་ཐང་མེད་པའི་ནོར་བུའི་རིགས། །དར་ཟབ་གོས་ཀྱི་བྱེ་བྲག་སོགས། །བོད་ཁམས་འཚིང་བའི་བརྫང་བ་བཅས། །བར་ཆད་མེད་པར་སྤྱན་དྲངས་ཏེ། །བོད་ཡུལ་དབུས་སུ་གདན་ཕབ་པས། །རྒྱལ་བློན་རྣམས་ཀྱི་བསམ་པ་འགྲུབ། །ཆོས་དང་སྲིད་ཀྱི་དཔལ་འབྱོར་དང༌། །བཀྲ་ཤིས་བདེ་ལེགས་ཕྱྭ་གཡང་གིས། །བོད་ཁམས་མཐའ་དབུས་ཀུན་ཏུ་གོང༌། །བདེ་སྐྱིད་དབྱར་མཚོ་བཞིན་ཏུ་རྒྱས། །དཔལ་འབྱོར་ཡར་ངོའི་ཟླ་ལྟར་འཕེལ། །སྔོན་གྱི་སྲིད་པ་དེ་བཞིན་དུ། །དེ་རིང་རྒྱུ་སྦྱོར་སྦྱིན་བདག་གིས། །དཔལ་འབྱོར་དབང་ཐང་འཕེལ་བའི་ཕྱིར། །རིགས་བཟང་ཁུངས་བཙུན་སྐྱོན་དང་བྲལ། །ཡོན་ཏན་ཚང་བའི་བུ་མོ་བཀུག །བཀྲ་ཤིས་ལྷ་ཡི་ཁྱིམ་འདི་རུ། །ཕུན་ཚོགས་བརྟན་པའི་གདན་ཅིག་བཏིང༌། །ལྷ་མི་གཉིས་ཀ་གདན་ལ་བཞུགས། །ཟ་འོག་དར་དཀར་གདན་སྟེང་དུ། །དགྲ་བླ་རྣམས་ཀྱི་བཞུགས་གནས་མཛོད། །ཟ་འོག་དར་སེར་གདན་སྟེང་དུ། །ཕོ་ལྷ་རྣམས་ཀྱི་བཞུགས་གནས་མཛོད། །ཟ་འོག་དར་དམར་གདན་སྟེང་དུ། །མ་ལྷ་རྣམས་ཀྱི་བཞུགས་གནས་མཛོད། །ཟ་འོག་དར་ལྗང་གདན་སྟེང་དུ། །ཞང་ལྷ་རྣམས་ཀྱི་བཞུགས་གནས་མཛོད། །ཟ་འོག་དར་སྔོན་གདན་སྟེང་དུ། །ཡུལ་ལྷ་རྣམས་ཀྱི་བཞུགས་གནས་མཛོད། །བཀྲ་ཤིས་ཁ་བཏག་ཡུག་རིང་ལ། །སྐྱོབ་པའི་ལྷ་རྣམས་བཞུགས་གནས་མཛོད། །མི་འགྱུར་རྡོ་རྗེ་རྒྱ་གྲམ་གདན། །སྲོག་ལ་དགྲ་དར་ཉེས་པ་སྐྱོབས། །ལོ་བརྒྱ་དག་ཏུ་འཚོ་བར་ཤོག །དབང་སྒྱུར་འཁོར་ལོ་རྩིབས་བརྒྱད་གདན། །ལུས་ལ་དགྲ་དར་ཉེས་པ་སྲུངས། །ནད་མེད་ལང་ཚོ་དར་བར་ཤོག །བཀྲ་ཤིས་གཡུང་དྲུང་འཁྱིལ་བའི་གདན། །དབང་ཐང་དགྲ་དར་ཉེས་པ་་སྐྱོབས། །བུ་ནོར་ཆོས་གསུམ་འཛོམ་པར་ཤོག །རབ་མཛེས་པདྨ་འདབ་བརྒྱད་གདན། །ཀླུང་རྟ་དགྲ་དར་ཉེས་པ་སྲུངས། །ཅི་བསམ་ཆོས་བཞིན་འགྲུབ་པར་ཤོག །དཀོན་མཆོག་རྩ་བ་གསུམ་པོ་དང༌། །ཆོས་སྲུང་ཡུལ་ལྷ་གཞི་བདག་དང༌། །འགོ་བའི་ལྷ་ལྔ་སྐྱོབས་བྱེད་དགུ། ཕ་མཚུན་དགྲ་བླའི་ཚོགས་རྣམས་ཀྱིས། །ཉིན་དང་མཚན་ཏུ་མི་གཡེལ་བར། །རྟག་ཏུ་སྲུང་སྐྱོབས་སྡོང་གྲོགས་མཛོད། །ཚེ་སྲོག་བརྟན་ཅིང་དབང་ཐང་འཕེལ། །བཀྲ་ཤིས་བདེ་ལེགས་རབ་རྒྱས་ཤོག ༈ །བཞི་པ་མཐུན་གསུམ་ལོ་མ་བཀྲ་ཤིས་པའི་བུ་མོའམ་ཁྱེའུ་ལ་དཀར་གསུམ་གྱི་བཟའ་བཏུང་ཁེམ་དང་བཅས་པ་བཟུང་བཅོལ་ཞིང་ལན་གསུམ་ཕྱིས་ལ། ཀྱེ། རིན་པོ་ཆེ་ལས་གྲུབ་པའི་ཁེམ། །ལག་ཏུ་བླངས་ཏེ་ལན་གསུམ་ཕྱི། །ལྷ་མི་རྣམས་ཀྱི་ངོ་སོ་གསལ། །ཤེལ་ལས་གསལ་ལ་དུང་ལས་དཀར། །མི་ གཙང ་བར་ཆད་མེད་པ་ཡི། །རྟེན་འབྲེལ་ལྷུན་གྱིས་གྲུབ་པར་ཤོག །དཀར་གསུམ་སྐྱེམས་ཕུད་མཆོད་ལ། ཀྱེ། སྐྱབས་གནས་མགོན་བྱེད་ལྷ་རྣམས་མཆོད། །ཕ་ལྷ་མ་ལྷ་ཞང་ལྷ་མཆོད། །སྲོག་ལྷ་དགྲ་ལྷ་ཁྱིམ་ལྷ་མཆོད། །ཐབ་ལྷ་ཟས་ལྷ་ཡུལ་ལྷ་མཆོད། །བཀྲ་ཤིས་བདེ་སྐྱིད་དངོས་གྲུབ་སྩོལ། །དཀར་གསུམ་དང་འོ་ཞོའི་སྐྱེམས་དྲངས་ལ། ཀྱེ། ཡོན་ཏན་བརྒྱ་ལྡན་བདུད་རྩིའི་བཅུད། །ལྷ་རྣམས་ཀུན་གྱི་དངོས་གྲུབ་ཡིན། །མི་རྣམས་འཚོ་བའི་ཟས་མཆོག་ཡིན། །དགོས་འདོད་ཀུན་འབྱུང་གཡང་གི་བཅུད། །རྟེན་འབྲེལ་ཕུན་སུམ་ཚོགས་པའི་ཟས། །ཟས་མཆོག་འདི་ལ་ལོངས་སྤྱོད་པས། །ལོ་བརྒྱ་འཚོ་ཞིང་སྟོན་བརྒྱ་མཐོང༌། །བདེ་སྐྱིད་ལྷ་དང་མཉམ་པར་ཤོག །འཛད་མེད་ནོར་གྱིས་ཕྱུག་པར་ཤོག །ཟད་མེད་ཟས་དང་ལྡན་པར་ཤོག །བསོད་ནམས་ལོངས་སྤྱོད་ཕུན་སུམ་ཚོགས། །ཐམས་ཅད་བརྟེན་པའི་གཞི་གྱུར་ཅིག ༈ །ལྔ་བ་གོ་ས་སོགས་དང་མཐུན་ཅིང་བཀྲ་ཤིས་རིགས་བརྒྱུད་འཕེལ་བའི་མིང་འདོགས་པ་ནི། ཀྱེ། དེ་རིང་གནམ་ལ་གཟའ་སྐར་བཟང༌། །ས་ལ་དུས་ཚོད་དག་ཀྱང་བཟང༌། །བར་ལ་རྟེན་འབྲེལ་ལ་ཉེ་བཟང༌། །བཟང་གསུམ་འཛོམ་པའི་གནས་སྐབས་འདིར། །འདྲེ་སྲིན་བྱུར་གསུམ་མར་ལ་བཀར། །མགོན་སྐྱབས་ལྷ་སྲུང་ཡར་ལ་བསྟོད། །ནམ་མཁར་ལྷ་ཡི་འཇའ་སྤྲིན་འཐིབས། །ས་གཞིར་མི་ཡི་མེ་ཏོག་བཀྲ། །བར་དུ་བཀྲ་ཤིས་ཆར་བ་འབེབས། །བདག་ལ་བརྟེན་པའི་བསྲུང་བྱ་མར། །བཀྲ་ཤིས་ཕུན་ཚོགས་མིང་ཞིག་བཏགས། །མིང་དུ་བཏགས་པར་མ་མཛད་ན། །འཇིག་རྟེན་ཐམས་ཅད་རྨོངས་པར་གྱུར། །དེ་བས་རྨོངས་པ་བསལ་བའི་ཕྱིར། །མགོན་པོས་མིང་དུ་བཏགས་པར་མཛད། །སྲུང་དང་སྐྱབས་ཀྱི་མིང་བཏགས་པས། །དཀོན་མཆོག་གསུམ་གྱིས་སྐྱོབ་པར་ཤོག །མགོན་དང་སྲུང་གི་མིང་བཏགས་པས། །ལྷ་སྲུང་གཉན་པོས་མགོན་བྱེད་ཤོག །འཚོ་བའི་མིང་མཐའ་ལྡན་པ་ཡིས། །ལོ་བརྒྱ་དག་ཀྱང་འཚོ་བར་ཤོག །ནམ་མཁའི་མིང་ལས་གྲས་པ་ཡིས། །དབུ་འཕང་དགུང་བས་མཐོ་བར་ཤོག །ས་གཞིའི་མིང་ལས་གྲས་པ་ཡིས། །ས་བཞིན་ཡོན་ཏན་ཀུན་སྐྱེད་ཤོག །རི་བོའི་མིང་ལས་གྲས་པ་ཡིས། །དབང་ཐང་རི་ལྟར་བརྟན་པར་ཤོག །ཉི་ཟླའི་མིང་ལས་གྲས་པ་ཡི། །ཉི་ཟླ་བཞིན་ཏུ་ཀུན་སྣང་ཤོག །རྟེན་འབྲེལ་ཕུན་ཚོགས་མིང་བཏགས་པས། །བུ་ནོར་ཆོས་གསུམ་འཛོམ་པ་དང༌། །སྐྱིད་དགའ་མཐའ་རུ་ཕྱིན་པར་ཤོག །དཔལ་དང་ལོངས་སྤྱོད་འཕེལ་བ་དང༌། །བཀྲ་ཤིས་དོན་རྣམས་འགྲུབ་པར་ཤོག །གྲགས་པ་བཟང་པོ་བཀྲ་ཤིས་མིང༌། །བོད་ཁམས་ཀུན་ཏུ་སྙན་པར་གྲགས། །ལྷ་མི་ཡོངས་ཀྱིས་སྨོན་པ་ཡི། །བདེ་ལེགས་དཔལ་དུ་འབར་གྱུར་ཅིག །ཅེས་ཤིས་བརྗོད་དང་བཅས་ཏེ་རྒྱལ་པོ་སོགས་ཆེན་པོའི་རིགས་ལ། ས་སྤྱོད་དབང་མོ། བཀྲ་ཤིས་དང་བདེ་ལེགས་དང༌། ཕུན་ཚོགས་དབང་མོ་སོགས་དང༌། ཕལ་བ་ལ་ཚོད་དང་མཐུན་པའི་མིང་བཀྲ་ལེགས་པ་གདགས་པར་བྱའོ། ༈ །དྲུག་པ་ལྷ་ལ་འདོགས་པ་ནི། ལྷ་རྟེན་གྱི་མདའ་དར་རམ། ཚེ་བུམ་སོགས་ཐོགས་ལ། ཧོཿ སྐྱབས་གནས་དཀོན་མཆོག་གསུམ་དང་རྩ་བ་གསུམ། །ཆོས་སྐྱོང་སྲུང་མ་ཁྱད་པར་སྦྱིན་བདག་འདིས། །ཕ་མེས་དུས་ནས་བརྟེན་སྒྲུབ་མཆོད་པའི་ལྷ། །ཐམས་ཅད་དེ་རིང་གསན་ཅིང་དགོངས་སུ་གསོལ། །རིགས་བཟང་ཡོན་ཏན་ལྡན་པའི་མོ་བཙུན་འདི། །དེང་ནས་བཟུང་སྟེ་ཅི་སྲིད་འཚོ་བའི་བར། །ཡེ་ཤེས་སྤྱན་ལྡན་སྐྱབས་གནས་ཁྱེད་རྣམས་ལ། །སྐྱབས་སུ་གསོལ་ཞིང་སྒོ་གསུམ་འབུལ་ལགས་ན། །ཐུགས་རྗེ་བརྩེ་བས་དགོངས་ཏེ་རྗེས་སུ་ཟུང༌། །སྐྱབས་འོག་ཆུད་ཅིང་བྱིན་གྱིས་བརླབ་ཏུ་གསོལ། །རྒྱལ་བ་དགོངས་བརྒྱུད་རིག་འཛིན་བརྡ་ཡི་བརྒྱུད། །གང་ཟག་སྙན་བརྒྱུད་ལས་འཕྲོ་གཏེར་གྱི་བརྒྱུད། །བཤད་བརྒྱུད་སྒྲུབ་བརྒྱུད་དོན་བརྒྱུད་འཛིན་པ་ཡི། །རྩ་བརྒྱུད་དཔལ་ལྡན་བླ་མའི་ཚོགས་རྣམས་ཀྱིས། །རིགས་ཀྱི་བུ་མོ་འདི་ཡི་ལུས་ངག་ཡིད། །སྲུང་ཞིང་སྐྱོབས་ལ་བྱིན་གྱིས་རློབས་པར་མཛོད། །ཐེག་པ་རིམ་པ་དགུ་ཡི་ལྷ་རྣམས་དང༌། །བྱད་བརྒྱུད་སྤྱོད་བརྒྱུད་རྣལ་འབྱོར་བླ་ན་མེད། །རྒྱུད་སྡེ་བཞི་དྲུག་ཡི་དམ་ལྷ་ཡི་ཚོགས། །རྒྱལ་བ་ཞི་ཁྲོ་རབ་འབྱམས་ལྷ་ཚོགས་ཀྱིས། །རིགས་ཀྱི་བུ་མོ་འདི་ཡི་ལུས་ངག་ཡིད། །སྲུང་ཞིང་སྐྱོབས་ལ་བྱིན་གྱིས་རློབས་པར་མཛོད། །རྡོ་རྗེ་ཕག་མོ་མཁའ་འགྲོ་སྡེ་ལྔ་དང༌། །གསང་བ་ཡེ་ཤེས་སེང་གེའི་གདོང་པ་ཅན། །སྒྲོལ་མ་དཀར་སྔོན་ཁྲོ་གཉེར་ཅན་མ་སོགས། །རི་རབ་རྡུལ་མཉམ་དཔའ་བོ་མཁའ་འགྲོ་ཡིས། །རིགས་ཀྱི་བུ་མོ་འདི་ཡི་ལུས་ངག་ཡིད། །སྲུང་ཞིང་སྐྱོབས་ལ་བྱིན་གྱིས་རློབས་པར་མཛོད། །མ་མགོན་ལྕམ་དྲལ་དཔལ་མགོན་བདུན་ཅུ་ལྔ༌། །ཨ་ཕྱི་མཆེད་ལྔ་ཚེ་རིང་མཆེད་ལྔ་དང༌། །རྡོ་རྗེ་གཡུ་སྒྲོན་བརྟན་མ་བཅུ་གཉིས་སོགས། །ཡེ་ཤེས་ལས་དང་འཇིག་རྟེན་ཆོས་སྐྱོང་གིས། །རིགས་ཀྱི་བུ་མོ་འདི་ཡི་ལུས་ངག་ཡིད། །སྲུང་ཞིང་སྐྱོབས་ལ་བྱིན་གྱིས་རློབས་པར་མཛོད། །འདིར་རང་རང་གི་ཆོས་སྐྱོང་སོགས་སྦྱོར་དགོས་པས་སྐབས་འདིར་མཚོན་ན། ༈ ཁྱད་པར་སྔགས་ཀྱི་བདག་མོ་རེ་མ་ཏི། །ལེགས་ལྡན་ཚོགས་བདག་དཔལ་མགོན་ཕྱག་བཞི་པ། །ཞིང་སྐྱོང་སེང་གདོང་ཡབ་ཡུམ་བཀའ་འཁོར་བཅས། །དྲང་སྲོང་གཟའ་བདུད་བཙན་ཆེན་རོལ་པ་བདུན། །དམ་ཅན་མགར་ནག་གནོད་སྦྱིན་སྔོན་པོ་སོགས། །མདོར་ན་རིག་འཛིན་བདུད་འདུལ་ཀློང་གསལ་གྱིས། །དམ་བཞག་གཏེར་སྲུང་དམ་ཅན་རྒྱ་མཚོའི་ཡིས། མཆན། ཁྱད་པར་ནག་པོ་ཆེན་པོ་རྡོ་རྗེ་གུར། །ལྕམ་དྲལ་ལྷ་བརྒྱད་བཀའ་འཁོར་བཅས་པ་དང༌། །ཞིང་སྐྱོང་སྟོབས་འཕྲོག་དབང་པོ་ཞལ་བཞི་པ། །བག་རྩེ་ལྕམ་དྲལ་དུར་ཁྲོད་བདག་པོ་སོགས། །བརྒྱུད་སྲུང་དམ་ཅན་རྒྱ་མཚོའི་ཚོགས་རྣམས་ཀྱིས། ༈། རིགས་ཀྱི་བུ་མོ་འདི་ཡི་ལུས་ངག་ཡིད། །སྲུང་ཞིང་སྐྱོབས་ལ་བྱིན་གྱིས་རློབས་པར་མཛོད། །རྒྱལ་ཆེན་རྣམ་སྲས་ཡུམ་མཆོག་དཔལ་ལྷ་མོ། །ཛཾ་ལྷ་དཀར་སེར་དམར་ནག་ནོར་གྱི་རྒྱུན། །རིག་བྱེད་མ་སོགས་ནོར་ལྷ་གཏེར་བདག་དང༌། །ཁམས་གསུམ་དབང་དུ་བྱེད་པའི་ལྷ་རྣམས་ཀྱིས། །རིགས་ཀྱི་བུ་མོ་འདི་ཡི་ལུས་ངག་ཡིད། །སྲུང་ཞིང་སྐྱོབས་ལ་བྱིན་གྱིས་རློབས་པར་མཛོད། །ཁྱད་པར་འཕགས་མ་སོ་སོ་འབྲང་མ་དང༌། །བསིལ་བའི་ཚལ་དང་གསང་སྔགས་རྗེས་སུ་འཛིན། །རྨ་བྱ་ཆེན་མོ་སྟོང་ཆེན་རབ་འཇོམས་སོགས། །གཟུངས་རིག་ལྷ་དང་ཕྱག་རྒྱའི་ཚོགས་རྣམས་ཀྱིས། །རིགས་ཀྱི་བུ་མོ་འདི་ཡི་ལུས་ངག་ཡིད། །སྲུང་ཞིང་སྐྱོབས་ལ་བྱིན་གྱིས་རློབས་པར་མཛོད། །ཕ་ལྷ་མ་ལྷ་ཞང་ལྷ་དགྲ་བླ་དང༌། །ཡུལ་ལྷ་ཁྱིམ་ལྷ་དཀར་ཕྱོགས་སྐྱོང་བའི་ལྷ། །མིའུ་གདུང་དྲུག་རུས་ཆེན་སྡེ་ལྔ་ལ། །མགོན་སྐྱབས་བྱེད་པའི་སོ་སོའི་ལྷ་རྣམས་དང༌། །བདེན་ཚིག་སྨོན་ལམ་གྲུབ་པའི་ཚོགས་རྣམས་ཀྱིས། །རིགས་ཀྱི་བུ་མོ་འདི་ཡི་ལུས་ངག་ཡིད། །སྲུང་ཞིང་སྐྱོབས་ལ་བྱིན་གྱིས་རློབས་པར་མཛོད། །འདིར་སོ་སོའི་ཡུལ་ལྷ་སྐབས་ཐོབ་འཛུད་དགོས་པས་སྐབས་འདིར་མཚོན་ན། ༈། ཀྱཻ། རྒྱལ་དབང་པདྨའི་བཀའ་ཉན་ཐ་ཚིག་ཅན། །དགྲ་བླའི་གཙོ་བོ་རྨ་ཆེན་སྤོམ་ར་དང༌། །གཉན་པོ་གཡུ་རྩེ་རྫ་ཡི་གསེར་ཁྲབ་ཅན། །མཐུ་རྩལ་ཐོགས་མེད་གཡུང་དྲུང་ལྕགས་རྩེ་དང༌། །དགོ་ནང་དབང་གི་ལྷ་བཙན་རྟ་དཀར་ཅན། །སྨིན་མོའི་གསེར་དེའུ་སྨན་བཙུན་རི་ཕྱོར་སོགས། །ཁྱད་པར་ཡུལ་ཕྱོགས་འདིར་གནས་གཞི་བདག་གིས། མཆན། དགེ་བསྙེན་ཆེན་པོ་རྡོ་རྗེ་གཡུང་དྲུང་རྩལ། །རྡོ་རྗེ་བློ་གྲོས་རྡོ་རྗེ་ཐོག་སྲས་དང༌། །རྡོ་རྗེ་དགྲ་འདུལ་རྡོ་རྗེ་གཞོན་ནུ་སོགས། །དཀར་ཕྱོགས་སྐྱོང་བའི་ཡུལ་གཞི་གནས་བདག་གིས། ༈ །རིགས་ཀྱི་བུ་མོ་འདི་ཡི་ལུས་ངག་ཡིད། །སྲུང་ཞིང་སྐྱོབས་ལ་བྱིན་གྱིས་རློབས་པར་མཛོད། །ཕ་མྱེས་བརྒྱུད་སྲུང་མགོན་བྱེད་ལྷ་སྲུང་རྣམས། །གཞི་བྱེས་ཉིན་དང་མཚན་མོ་དུས་རྟག་ཏུ། །ལུས་དང་གྲིབ་མ་ཇི་བཞིན་སྐད་ཅིག་ཀྱང༌། །འབྲལ་བ་མེད་པར་སྲུང་ཞིང་བསྐྱབ་ཏུ་གསོལ། །ཀྱེ། དབུས་ནས་མགོན་ལྷ་དཀར་པོས་སྲུངས། །སྟེང་ནས་ནམ་མཁའི་ལྷ་མོས་སྲུངས། །འོག་ནས་ས་ཡི་ལྷ་མོས་སྲུངས། །གཡས་ནས་ཕོ་ལྷ་གཉེན་པོས་སྲུངས། །གཡོན་ནས་མ་ལྷ་བུ་རྫིས་སྲུངས། །རྒྱབ་ནས་དགྲ་བླ་དར་མས་སྲུངས། །མདུན་ནས་ཞང་ལྷ་སྲོག་ལྷས་སྲུངས། །ཕུག་ལྷ་གཉེན་པོས་སྲུངས་སྐྱོབས་མཛོད། །དེ་རིང་མི་ནོར་བརྒྱ་བཏང་ཡང༌། །སང་ཉིན་སྟོང་ཕྲག་ཚུལ་ལ་ཤོག །ནོར་ལྷ་གཉེན་པོས་སྲུངས་སྐྱོབས་མཛོད། །དེ་རིང་ཕྱུགས་བརྒྱ་ཕར་བཏང་ཡང༌། །སང་ཉིན་ཕྱུགས་སྟོང་ཚུར་ལ་ཤོག །ཟས་ལྷ་གཉེན་པོས་སྲུངས་སྐྱོབས་མཛོད། །དེ་རིང་ཟས་བརྒྱ་ཕར་བྱིན་ཀྱང༌། །སང་ཉིན་ཟས་སྟོང་ཚུར་ལ་ཤོག །རྩ་བ་གསུམ་གྱི་བྱིན་རླབས་དང༌། །དཀོན་མཆོག་བདེན་པའི་ནུས་མཐུ་ཡིས། །དེ་རིང་ཉི་མ་ཕྱིན་ཆད་ནས། །མི་དང་ལྷ་གཉིས་མ་འབྲལ་བར། །རྟག་ཏུ་སྲུང་ཞིང་སྐྱོབས་པར་ཤོག །ལུས་ལ་ན་ཚ་མེད་པར་ཤོག །ཚེ་ལ་བར་ཆད་མེད་པར་ཤོག །སྲོག་ལ་ཤི་ཆད་མེད་པར་ཤོག །མངའ་ཐང་རིགས་བརྒྱུད་འཕེལ་བར་ཤོག །གནས་ལ་བཀྲ་ཤིས་བརྟན་པར་ཤོག །ཡུལ་ལ་འཕོ་འཆུག་མེད་པར་ཤོག །ས་ལ་བརྟན་ཕུར་ཚུགས་པར་ཤོག །མི་འཕེལ་རྟ་ཧྲག་འཛོམ་པར་ཤོག །ཕྱུག་གི་གཏེར་ཁ་བརྡོལ་བར་ཤོག །སྐྱིད་དགའ་ཡུན་རིང་གནས་པར་ཤོག །དབང་ཐང་དགུང་དང་མཉམ་པར་ཤོག །ཕུག་གི་ལྷ་ཡིས་སྐྱོབ་པར་ཤོག །བར་གྱི་མི་དང་མཐུན་པར་ཤོག །མི་ཚེ་སྐྱིད་ཀྱིས་འཁྱོལ་བར་ཤོག །མཐུན་གསུམ་འགྲོགས་ཡུན་རིང་བར་ཤོག །སྨན་འཛང་དབང་བུ་ཚང་བར་ཤོག །སྙན་གྲགས་འབྲུག་ལྟར་ཁྱབ་པར་ཤོག །དགེ་བའི་ས་བོན་འདེབས་པར་ཤོག །བུ་ནོར་ཆོས་གསུམ་འཛོམ་པར་ཤོག །བདེ་སྐྱིད་ལོངས་སྤྱོད་ལྡན་པར་ཤོག །ཅི་བསམ་དོན་ཀུན་འགྲུབ་པར་ཤོག ༈ །བདུན་པ་གཡང་འགུགས་པ་ནི་མདའ་དང་གཡབ་ལ། ཀྱེ། དེ་རིང་སྲིད་པའི་གནམ་གང་ལ། །ཁྱིམ་འཛིན་འདི་ལ་རྟེན་བཙུགས་ནས། །ཕྱོགས་བཞི་མཚམས་བརྒྱད་ཕྱྭ་གཡང་བཀུག །དཀོན་མཆོག་རྩ་གསུམ་བྱིན་རླབས་དང༌། །གསང་སྔགས་རིག་སྔགས་ནུས་མཐུ་དང༌། །བདེན་པ་གྲུབ་པའི་བདེན་མཐུ་དང༌། །རྟེན་འབྲེལ་རྫས་ཀྱི་ནུས་པ་ཡིས། །སྟེང་ཕྱོགས་ལྷ་ཡི་ཕྱྭ་གཡང་ཁུག །འོག་ཕྱོགས་ཀླུ་ཡི་ཕྱྭ་གཡང་ཁུག །བར་ཕྱོགས་གཉན་གྱི་ཕྱྭ་གཡང་ཁུག །གླིང་བཞི་མི་ཡི་ཕྱྭ་གཡང་ཁུག །ལྷ་སྲིན་སྡེ་བརྒྱད་ཕྱྭ་གཡང་ཁུག །རྒྱ་གར་དམ་པའི་ཆོས་གཡང་ཁུག །རྒྱ་ནག་བཙན་བརྗིད་ཁྲིམས་གཡང་ཁུག །སྟག་གཟིག་ནོར་གྱི་ཕྱུག་གཡང་ཁུག །ཟས་ནོར་གོས་ཀྱི་བཅུད་གཡང་ཁུག །བདེ་སྐྱིད་དཔལ་འབྱོར་ཕྱྭ་གཡང་ཁུག །དབུ་ནག་མི་ཡི་ཕྱྭ་གཡང་ཁུག །གསེར་དངུལ་ནོར་གྱི་ཕྱྭ་གཡང་ཁུག །དར་ཟབ་གོས་ཀྱི་ཕྱྭ་གཡང་ཁུག །རྐང་བཞི་ཕྱུགས་ཀྱི་ཕྱྭ་གཡང་ཁུག །བཟའ་བཏུང་བཅུད་ཀྱི་ཕྱྭ་གཡང་ཁུག །ཚེ་རིང་ནད་མེད་ཕྱྭ་གཡང་ཁུག །ཅི་བསམ་འགྲུབ་པའི་ཕྱྭ་གཡང་ཁུག །ཕུན་ཚོགས་དགེ་ལེགས་གཡང་ཁུག་ཅིག །ཀྱེ། མི་ཚུར་འོང་རྗེས་ལ་མི་གཡང་ཤོག །ནོར་ཚུར་འོང་རྗེས་ལ་ནོར་གཡང་ཤོག །ཟས་ཚུར་འོང་རྗེས་ལ་ཟས་གཡང་ཤོག །བག་མ་ཚུར་འོང་རྗེས་ལ་དཔལ་གཡང་ཤོག །ཡོ་མ་ཚུར་འོང་རྗེས་ལ་རྟ་གཡང་ཤོག །གནག་ཕྱུགས་ཚུར་འོང་རྗེས་ལ་ཟོག་གཡང་ཤོག །གཡང་དཀར་ཚུར་འོང་རྗེས་ལ་ལུག་གཡང་ཤོགཚེ་ཚེ་ཚུར་འོང་རྗེས་ལ་ར་གཡང་ཤོག །ལྷོ་སྤྲིན་འདྲ་བའི་ནོར་གཡང་ཤོག །ས་གཞི་འདྲ་བའི་འབྲུ་གཡང་ཤོག །སྦྲང་ཆར་འདྲ་བའི་ཟས་གཡང་ཤོག །རྒྱ་མཚོ་འདྲ་བའི་འོ་གཡང་ཤོག །ནགས་ཚལ་འདྲ་བའི་གོས་གཡང་ཤོག །བཙན་པོ་རྣམས་ཀྱི་བཙན་གཡང་ཤོག །ཕྱུག་པོ་རྣམས་ཀྱི་ཕྱུག་གཡང་ཤོག །འཕེན་པོ་རྣམས་ཀྱི་འཕེན་གཡང་ཤོག །གཡང་ལ་གཡང་འཕེལ་གཏེར་གྱི་གཡང༌། །ཁྱིམ་ལ་གཡང་འཕེལ་མི་ཡི་གཡང༌། །བང་མཛོད་གཡང་འཕེལ་ནོར་གྱི་གཡང༌། །ཞིང་ལ་གཡང་འཕེལ་འབྲུ་ཡི་གཡང༌། །ར་བར་གཡང་འཕེལ་ཕྱུགས་ཀྱི་གཡང༌། །ཟས་ལ་གཡང་འཕེལ་བཅུད་ཀྱི་གཡང༌། །དགོས་དགུ་མ་ཚང་མེད་པའི་གཡང༌། །དགེ་ལེགས་ལྷུན་གྱིས་གྲུབ་པའི་གཡང༌། །བཀྲ་ཤིས་ཕུན་སུམ་ཚོགས་པའི་གཡང༌། །འཁོར་འདས་གཉིས་ཀྱི་ཕྱྭ་གཡང་རྣམས། །དེ་རིང་ལྷ་ཁྱིམ་འདི་རུ་ལེན། །གཡང་གི་ར་བ་འདི་ལ་བསྡུ། །དཔལ་གྱི་མི་མོ་འདི་ལ་བསྟིམས། །མི་ཉམས་མི་འཐོར་བཅུད་དུ་འཁྱིལ། །ཕྱྭ་ཚེ་གཡང་གི་དངོས་གྲུབ་རྣམས། །ལྷོ་སྤྲིན་བཞིན་དུ་འཐིབས་པར་ཤོག །སྦྲང་ཆར་བཞིན་ཏུ་འབེབས་པར་ཤོག །རྒྱ་མཚོ་བཞིན་ཏུ་འཁྱིལ་བར་ཤོག །ཆུ་བོའི་རྒྱུན་བཞིན་ཆད་མེད་ཤོག །ལྷུན་པོ་བཞིན་ཏུ་བརྟན་པར་ཤོག །བཙན་ཕྱུག་འཕན་དར་འཛོམ་པ་དང༌། །བཀྲ་ཤིས་བདེ་ལེགས་ལྡན་པར་ཤོག །བརྒྱད་པ་མཐའ་རྟེན་བཀྲ་ཤིས་བརྗོད་པ་ནི། མདུན་གྱི་ནམ་མཁར་བླ་མ་རྒྱལ་བ་སྲས་དང་བཅས་པ་ལྷ་དང་དྲང་སྲོང་བདེན་པ་གྲུབ་པ་རྣམས་དང་དཀར་པོའི་ཕྱོགས་སྐྱོང་བ་རྣམས་དང་བཅས་པས་བཀྲ་ཤིས་པའི་བདེན་ཚིག་བརྗོད་ཅིང་མེ་ཏོག་ཆར་དུ་བསྙིལ་བར་གྱུར། ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །འཇིག་རྟེན་གསུམ་གྱི་མགོན་པོ་དྲི་མ་གསུམ་སྤངས་བ། །སངས་རྒྱས་པདྨ་རྒྱས་པའི་འདབ་འདྲའི་སྤྱན་མངའ་བ། །དེས་ནི་ཁྱོད་ལ་དེ་རིང་ཞི་བྱེད་བཀྲ་ཤིས་ཤོག །དེ་ཡིས་ཉེ་བར་བསྟན་པའི་མཆོག་རབ་མི་གཡོ་བ། །འཇིག་རྟེན་གསུམ་ན་གྲགས་ཤིང་ལྷ་དང་མིས་མཆོད་པ། །ཆོས་ཀྱི་དམ་པ་སྐྱེ་དགུ་རྣམས་ལ་ཞི་བྱེད་པ། །དེས་ནི་ཁྱོད་ལ་དེ་རིང་ཞི་བྱེད་བཀྲ་ཤིས་ཤོག །དམ་ཆོས་ལྡན་པ་ཐོས་པའི་བཀྲ་ཤིས་ཀྱིས་ཕྱུག་ཅིང༌། །དགེ་འདུན་མི་དང་ལྷ་དང་ལྷ་མིན་ཡོན་གྱི་གནས། །ཚོགས་ཀྱི་མཆོག་རབ་ངོ་ཚ་ཤེས་དང་དཔལ་གྱི་གཞི། །དེས་ནི་ཁྱོད་ལ་དེ་རིང་ཞི་བྱེད་བཀྲ་ཤིས་ཤོག །སོགས་ཞལ་ནས་གསུངས་པའི་མཆོག་གསུམ་བཀྲ་ཤིས་ཀྱིས་ཐོག་དྲངས། གང་ལ་སེར་སྣ་རྣམ་ཆགས་པ། །རྣམ་འཇོམས་དྲི་མ་མེད་མཛད་ཅིང༌། །ཐུགས་ཞི་གནོད་པ་མི་མངའ་དེས། །ཁྱེད་ལ་བདེ་ལེགས་མཛད་པར་གྱུར། །འདྲེན་པ་གང་ཞིག་འགྲོ་བ་རྣམས། །ཐར་བའི་ལམ་ལ་འཛུད་མཛད་ཅིང༌། །ཆོས་རྣམས་ཐམས་ཅད་སྟོན་པ་དེས། །ཁྱེད་ལ་བདེ་ལེགས་མཛད་པར་གྱུར། །སྟོན་པ་འགྲོ་བ་རྣམས་ཀྱི་རྟེན། །སེམས་ཅན་ཀུན་གྱི་དོན་གྱི་ཕྱིར། །གང་ཞིག་བདེ་བར་མངའ་མཛད་དེས། །ཁྱེད་ལ་བདེ་ལེགས་མཛད་པར་གྱུར། །སྐྱོབ་པ་གང་ཞིག་བྱས་པ་ཡི། །ཐུགས་ཀྱི་འགྲོ་བ་འདི་དག་ཀུན། །བུ་གཅིག་བཞིན་དུ་རྟག་བསྐྱངས་དེས། །ཁྱེད་ལ་བདེ་ལེགས་མཛད་པར་གྱུར། །གང་ཞིག་འཁོར་བར་འགྲོ་བ་ཡི། །སེམས་ཅན་ཀུན་གྱི་རྟེན་གྱུར་ཅིང༌། །གླིང་དང་དཔུང་གཉེན་གྱུར་བ་དེས། །ཁྱེད་ལ་བདེ་ལེགས་མཛད་པར་གྱུར། །གང་ཞིག་ཆོས་རྣམས་མངོན་སུམ་གྱུར། ། གཙང ་ཞིང་བསླུ་བ་མི་མངའ་ཡང༌། །གསུང་ གཙང ་ གཙང ་མར་མཛད་པ་དེས། །ཁྱེད་ལ་བདེ་ལེགས་མཛད་པར་གྱུར། །དཔའ་བོ་ཆེན་པོ་གང་སྐྱེས་པས། །ཕུན་སུམ་ཚོགས་དོན་འབྱོར་གྱུར་ཅིང༌། །དོན་གྲུབ་ཆོས་ཀྱང་གྲུབ་པ་དེས། །ཁྱེད་ལ་བདེ་ལེགས་མཛད་པར་གྱུར། །གང་ཞིག་སྐྱེས་པས་ས་རྣམས་ནི། །ནགས་ཚལ་བཅས་པ་རབ་གཡོས་ཤིང༌། །སེམས་ཅན་ཐམས་ཅད་རབ་དགའ་དེས། །ཁྱེད་ལ་བདེ་ལེགས་མཛད་པར་གྱུར། །བྱང་ཆུབ་སྙིང་པོར་གཤེགས་པ་ན། །ས་དག་རྣམ་དྲུག་གཡོས་གྱུར་ཅིང༌། །བདུད་ཡིད་མི་བདེར་གྱུར་པ་དེས། །ཁྱེད་ལ་བདེ་ལེགས་མཛད་པར་གྱུར། །ཆོས་ཀྱི་འཁོར་ལོ་བསྐོར་བ་ན། །འཕགས་པའི་བདེན་པ་རྣམ་གསུང་ཤིང༌། །ཐུབ་པའི་སྙན་པ་གང་བྱུང་དེས། །ཁྱེད་ལ་བདེ་ལེགས་མཛད་པར་གྱུར། །ཡིད་འཕྲོག་གང་གིས་མུ་སྟེགས་བྱེད། །ཐམས་ཅད་ཆོས་ཀྱིས་ཕམ་མཛད་ཅིང༌། །ཚོགས་ཀུན་དབང་དུ་མཛད་པ་དེས། །ཁྱེད་ལ་བདེ་ལེགས་མཛད་པར་གྱུར། །སངས་རྒྱས་ཁྱོད་ལ་བདེ་ལེགས་མཛད། །བརྒྱ་བྱིན་ཚངས་པའི་ལྷ་རྣམས་དང༌། །འབྱུང་བོ་ཀུན་གྱི་བདེ་ལེགས་ནི། །ཁྱེད་ལ་རྟག་ཏུ་བྱིན་གྱུར་ཅིག །སངས་རྒྱས་བསོད་ནམས་མཐུ་དག་དང༌། །ལྷ་རྣམས་ཀུན་གྱི་བསམ་པ་དང༌། །ཁྱེད་ཀྱི་འདོད་དོན་གང་ཡིན་པ། །དོན་དེ་དེ་རིང་གྲུབ་གྱུར་ཅིག །རྐང་གཉིས་ཁྱེད་ཅག་བདེ་ལེགས་གྱུར། །རྐང་བཞི་ཁྱེད་ཅག་བདེ་ལེགས་གྱུར། །ཁྱེད་ཅག་ས་ལམ་བདེ་གྱུར་ཅིག །ཕྱིར་འོང་དག་ཀྱང་བདེ་ལེགས་ཤོག །ཉིན་མོ་བདེ་ལེགས་མཚན་བདེ་ལེགས། །ཉི་མའི་གུང་ཡང་བདེ་ལེགས་ཤིང༌། །ཁྱེད་ཅག་ཀུན་ཏུ་བདེ་ལེགས་གྱུར། །ཁྱེད་ཅག་སྡིག་པར་མ་གྱུར་ཅིག །བགེགས་རིགས་སྟོང་ཕྲག་བརྒྱད་བཅུ་ཞི་བ་དང༌། །མི་མཐུན་གནོད་པའི་རྐྱེན་དང་བྲལ་བ་དང༌། །མཐུན་པ་འགྲུབ་ཅིང་ཕུན་སུམ་ཚོགས་པ་ཡི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བསོད་ནམས་རི་བོ་བཞིན་དུ་བརྟན་པ་དང༌། །རྒྱུད་འཛིན་ཉི་ཟླ་བཞིན་དུ་གསལ་བ་དང༌། །སྙན་གྲགས་ནམ་མཁའ་ལྟ་བུར་ཁྱབ་པ་ཡི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ལོ་བརྒྱ་འཚོ་ཞིང་སྟོན་བརྒྱ་མཐོང་བ་དང༌། །ཚེ་རིང་ནད་མེད་བདེ་སྐྱིད་ཕུན་སུམ་ཚོགས། །ཐེག་པ་མཆོག་ལ་ངེས་པར་འབྱུང་བ་སྟེ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །སྦྱིན་པ་གཏོང་ཞིང་ཚུལ་ཁྲིམས་བསྲུང་བ་དང༌། །བཟོད་པ་སྒོམ་ཞིང་བརྩོན་འགྲུས་བརྩམ་པ་དང༌། །མཉམ་པར་འཇོག་ཅིང་གནས་ལུགས་རྟོགས་པ་སྟེ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག གནས་འདིར་ཉིན་མོ་བདེ་ལེགས་༴ སོགས་བཀྲ་ཤིས་ཀྱི་ཚིག་ཕྲེང་རྒྱས་བསྡུས་ཇི་ལྟར་འོས་པ་བརྗོད་ཅིང་མེ་ཏོག་འཐོར། སླར་ཡང༌། ཉི་མ་ཐམས་ཅད་དགེ་བ་ཡིན། །རྒྱུ་སྐར་ཐམས་ཅད་བཟང་པོ་ཡིན། །སངས་རྒྱས་རྣམས་ནི་རྫུ་འཕྲུལ་ཆེ། །དགྲ་བཅོམ་རྣམས་ནི་ཟག་པ་ཟད། །བདེན་པའི་བདེན་ཚིག་འདི་ཡི་མཐུས། །བདག་ཅག་རྟག་ཏུ་བདེ་ལེགས་ཤིང༌། །ཇི་ལྟར་སྨོན་པ་ཀུན་འགྲུབ་ཤོག །མངྒ་ལཾ་སིདྡྷི་ཛ་ཡ་ཨ་ལ་ལ་ཧོཿཞེས་བདེན་པའི་ཚིག་གི་མཐའ་རྒྱས་སུ་བྱའོ། །དེ་ལྟར་ལས་ཕྲན་བདུན་པོ་མཐའ་བརྟེན་དང་བཅས་པ་ཇི་ལྟར་བྱ་བའི་ཚུལ་ལག་ལེན་འགྲིགས་ཆགས་སུ་བཀོད་པ་འདིའང༌། སྡེ་བཞི་དགེ་བ་བཅུ་དང་ལྡན་པའི་རྒྱལ་ཁབ་ཆེན་པོར་ལུང་ཟིན་སྤྲུལ་པའི་ཆོས་རྒྱལ་རིན་པོ་ཆེའི་སྲིད་འཛིན་ཏུ་སྟག་ལུང་ག་ཟིའི་གདུང་རིགས་ཀྱི་བཙུན་མོ་དམ་པ་ཕེབ་པའི་ཚེ་ཉེ་བར་མཁོ་བས་མཚམས་སྦྱར་ཏེ། ལྷ་ཤེས་སུ་རློམས་པའི་སྔགས་རིག་འཛིན་པ་ཀརྨ་ངག་དབང་ཡོན་ཏན་རྒྱ་མཚོས་ལྕང་ར་འཆི་མེད་ལྷ་ཀླུའི་དགའ་ཚལ་དུ་བྲིས་པ་དགེ་ལེགས་འཕེལ། །མངྒ་ལཾ། །