མཇུག་ཡོངས་སུ་རྫོགས་པའི་བྱ་བ་བསྟན་པ།
སྨྲས་པ། སྦྱང་གཞི་གཉུག་མ་རྡོ་རྗེའི་སེམས་ནི་དོན་དམ་དུ་ཡོད་འདུས་མ་བྱས། །སྦྱང་བྱ་གློ་བུར་ཀུན་རྫོབ་ཏུ་ཡོད་མ་དག་འཁོར་བའི་རྒྱལ་ཁམས་འདིར། །སྦྱོང་བྱེད་རིམ་གཉིས་ཟུང་འཇུག་སྦྱོར་བས་ཡང་དག་འོག་མིན་ཆེར་བྱས་པས། །སྦྱངས་འབྲས་དྲི་བྲལ་སྲིད་ཞིའི་སྲོག་བཅུད་མི་ཤིགས་ཐིག་ལེ་གཅིག་ཏུ་འདྲེན། །སྣང་བ་མ༷་སྤ༷ང༷ས་སྟོང་པ་ར༷ང་གྲོ༷ལ་ཞི་དང་ཁྲོ་བོ་རབ་འབྱམས་སྐུ། །སྒྲ་གྲགས་མ༷་སྤ༷ང༷ས་གྲགས་སྟོང་རང་༷གྲོ༷ལ་དམ་པ་རིགས་བརྒྱའི་སྙིང་པོའི་གསུང་། །དྲན་རྟོགས་མ༷་སྤང༷ས་རིག་སྟོང་རང༷་གྲོ༷ལ་རྒྱལ་བ་རྒྱ་མཚོའི་ཡེ་ཤེས་ཐུགས། །འཁོར་བ་མ༷་སྤང༷ས་མྱང་འདས་ར༷ང་གྲོ༷ལ་མཉམ་ཉིད་ལམ་འདི་རྨད་དུ་བྱུང་། །དེང་འདིར་ཀེ་ལ་ཤ་ཡི་ལྗོངས་འདི་རུ། །རྒྱུད་དོན་ནོར་འཛིན་བུ་མོའི་མཁའ་ཀློང་གཏེར། །ཤེས་རློམ་སོ་སྐྱེའི་བློ་ཡི་བབ་ཅོལ་ལ། །འདི་ཕྱིའི་འདུན་མ་གཅིག་དྲིལ་ཀྱེ་མ་ཧུད། །མཆོག་གསང་རྡོ་རྗེ་རྩེ་མོར་འཇུག་འདོད་རྣམས། །ཡེ་ཤེས་ཌཀྐིའི་ཞལ་རླངས་ཐོ་ལེ་བར། །སྤྱོད་འདི་སྐལ་བ་བཟང་ཡང་འགལ་འདུའི་ཚིག། ལྷན་པ་གདབ་ལ་ཡིད་བརྟན་རུང་མིན་ཕྱིར། །དབྱིངས་རིག་དབྱེར་མེད་གདངས་རྩལ་ཞི་དང་ཁྲོའི། །སྒྲུབ་ཐབས་རྡོ་རྗེའི་བཀའ་ཡི་སྒྲོམ་བུ་ལ། །ལྷ་ཀླུ་མི་ཡི་མ་ཡིན་ཟབ་དོན་ནོར། །ཡིད་བཞིན་རྒྱ་ཆེན་བཀྲལ་དུ་ཡོད་མོད་ཀྱང་། །བདག་བློ་མེ་ཏོག་ཟས་ཅན་སྔོན་ནས་དེང་། །སྦྱངས་ཡོན་གཤོག་རྩལ་མ་རྫོགས་སྒྲིབ་པའི་སྨག། འཐུག་པོར་བྱིང་བས་ཟབ་གསང་ནམ་མཁའི་ཀློང་། །ཇི་བཞིན་ཕ་མཐའ་སྙེགས་པའི་གོ་སྐབས་ཅི། །འོན་ཀྱང་སྔོན་བྱོན་མཁས་གྲུབ་བཀའ་དྲིན་དང་། །གསང་ཆེན་ངེས་པའི་རྒྱུད་སྡེ་བཅུ་དང་བདུན། །སྒྱུ་འཕྲུལ་སྐོར་དང་རང་གཞུང་སོགས་བརྟེན་ལས། །ཞྭ་དཔེ་ལྷམ་གྱིས་བྱས་པ་འདི་ན་མེད། །གཞན་ལུགས་ན་ཡང་འཁྱོགས་པོར་འགྲེལ་ལ་སོགས། །མ་ཡིན་རྡོ་རྗེའི་ཚིག་གི་འབྲུ་དེ་ཉིད། །ཚད་མ་གསུམ་གྱིས་ལེགས་པར་གཞལ་ནས་འགྲེལ། །ཀུན་ཏུ་བཟང་པོའི་དགོངས་རྒྱན་འདི་བྱས་སོ། །དེ་ལྟར་བསྟན་བཅོས་བརྩམས་པ་ཡི། །ཐོས་བསམ་སྒོམ་པའི་ཤེད་མོང་དང། །རིགས་རུས་འབྱོར་པའི་སྤུན་མེད་ཕྱིར། །རྨི་ལམ་ན་ཡང་མ་སེམས་ཀྱང་། །མཚུངས་པ་མེད་པའི་རྣམ་དཔྱོད་ཅན། །བླ་མ་ཐེག་མཆོག་རབ་རྒྱས་ཀྱིས། །ནན་ཏན་ཆེན་པོའི་གསུང་བསྐུལ་དང་། །གཞན་འགས་ལེགས་སོས་དབུགས་དབྱུང་ཕྱིར། །བྲིས་ལ་ཉེས་པའི་ཆ་མཆིས་ན། །སྔོན་བསགས་སྡིག་དང་ལྷན་ཅིག་བཤགས། །དགེ་བས་ཟབ་གསང་བསྟན་པ་ལ། །འཇུག་ཅིང་ཕན་པའི་གྲོགས་བྱེད་ཤོག། བདག་བློ་ལས་བྱུང་མེ་སྒྲོན་གྱི། །སྣང་བ་འདིས་ཀྱང་ཟབ་ཆོས་འདི། །སྤྱོད་ལ་ཚེ་འདིར་དངོས་གྲུབ་མཆིས། །འགྲུབ་པར་རྒྱལ་བས་བྱིན་གྱིས་རློབས། །འདིར་འབད་དགེ་དང་དུས་གསུམ་དགེ་ཚོགས་ཆུ་ཀླུང་ཀུན། །བྱང་ཆུབ་མཆོག་གི་རྒྱ་མཚོར་ཡོངས་ཐིམ་བདག་གཞན་འགྲོ། །གདོད་མའི་མགོན་པོའི་གོ་འཕང་མཆོག་ལ་མ་རེག་བར། །མཆོག་གསང་བསྟན་པ་ཕྱོགས་མཐར་ཀུན་ཏུ་དར་རྒྱས་ཤོག། ཅེས་པ་འདི་ནི་ཐེག་མཆོག་འགྲོ་འདུལ་གླིང་གི་རིགས་པ་སྨྲ་བ་རྣམས་ཀྱི་ཐ་ཤལ་བ་པདྨ་དབང་ཕྱུག་གྲགས་པས་དུས་ཚེས་དགེ་བར་གྲུབ་པར་བགྱིས་པ་སརྦ་མངྒ་ལཾ།། །།