ཞི་ཁྲོའི་བདག་དབང་།

ཀུན་བཟང་དགོངས་པ་ཀུན་འདུས་ལས་ཞི་ཁྲོའི་བདག་དབང་བཞུགས་སོ༔

དེ་ནས་རྡོ་རྗེ་སློབ་དཔོན་གྱིས་ཐོག་མར་རང་ཉིད་དབང་བསྐུར་ཞུ༔ ངག་ཏུ་འདི་སྐད་བརྗོད་པར་བྱ༔ ཧཱུྃ༔ རིག་རྩལ་ལྷུན་གྲུབ་ལྷ་ཚོགས་ནི༔ དུས་གསུམ་རྒྱལ་བའི་སྐུ་གསུང་ཐུགས༔ ཡོན་ཏན་ཕྲིན་ལས་ཞི་ཁྲོའི་སྐུ༔ མ་བསྐྱེད་ལྷུན་གྱིས་གྲུབ་པའི་ལྷ༔ བསྐལ་པ་སྔོན་ནས་ད་ལྟའི་བར༔ ཡེ་ནས་རང་དང་གཉིས་སུ་མེད༔ མ་རིག་དབང་གིས་ཞལ་མ་མཇལ༔ ད་ནི་རང་རིག་རྟོགས་པའི་ལྷ༔ ངོ་བོ་རང་བཞིན་ཐུགས་རྗེར་ལྡན༔ སྐུ་གསུམ་ཡེ་ཤེས་ལྔ་ཡི་བདག༔ དབང་བསྐུར་ཆེན་པོ་བདག་ལ་སྩོལ༔ ལྷ་དབང་ལུས་ལ་ཞུགས་པ་ཡིས༔ ལུས་ཀྱང་ཡེ་ཤེས་ལྔ་རུ་གྲོལ༔ སངས་རྒྱས་སྐུ་ཡི་དབང་ཐོབ་ཤོག༔ སྐུ་ཡི་བྱིན་རླབས་ངག་ལ་སྩོལ༔ གྲགས་སྟོང་ཨཱ་ལི་ཀཱ་ལིའི་སྒྲ༔ རང་བྱུང་ཆོས་ཀྱི་སྒྲ་དབྱངས་ལྡན༔ སངས་རྒྱས་གསུང་གི་དབང་ཐོབ་ཤོག༔ གསུང་སྒྲ་སེམས་ལ་ཞུགས་པ་ཡིས༔ བདེ་གསལ་མི་རྟོག་ཆོས་ཀྱི་དབྱིངས༔ ཀ་དག་ཆེན་པོ་ཡངས་པའི་ཀློང་༔ སངས་རྒྱས་ཐུགས་ཀྱི་དབང་ཐོབ་ཤོག༔ རྩ་སྔགས་མཐར། ཀཱ་ཡ་སིདྡྷི་ༀ༔ ཝཱཀྐ་སིདྡྷི་ཨཱཿཙིཏྟ་སིདྡྷི་ཧཱུྃ༔ ཞི་ཁྲོའི་གཙོ་བུམ་སྤྱི་བོ་མགྲིན་པ་སྙིང་གར་བཞག༔ དེས་ཡེ་ཤེས་སེམས་དཔའ་བདག་དམ་ཚིག་སེམས་དཔའ་ལ་བསྟིམ༔ ཏིང་ངེ་འཛིན་གྱིས༔ ༀ་ཨཱཿཧཱུྃཿགསུམ༔ བདག་གི་གནས་གསུམ་ལ་བསྟིམ་མོ༔ དེ་ནས་བདག་ཉིད་རྡོ་རྗེ་སེམས་དཔའ་རུ་ཝལ་གྱིས་བསྐྱེད་པ་ནི༔ བདག་ཉིད་དབང་ལྔན་རྒྱལ་པོར་འགྱུར་རོ༔ དེ་ལྟར་མི་ལྡན་དབང་བསྐུར་མི་རུང་ངོ་༔