བཅོམ་ལྡན་འདས་ཐུགས་རྗེ་ཆེན་པོ་རྒྱལ་བ་རྒྱ་མཚོའི་བསྐང་བ་དངོས་གྲུབ་ཀུན་འབྱུང་ཡོན་ཏན་རྒྱ་མཚོ་ཕྲིན་ལས་ཀྱི་གཏེར་མཛོད།
བཅོམ་ལྡན་འདས་ཐུགས་རྗེ་ཆེན་པོ་རྒྱལ་བ་རྒྱ་མཚོའི་བསྐང་བ་དངོས་གྲུབ་ཀུན་འབྱུང་ཡོན་ཏན་རྒྱ་མཚོ་ཕྲིན་ལས་ཀྱི་གཏེར་མཛོད་ཅེས་བྱ་བ་བཞུགས་སོ།།
ན་མོ་གུ་རུ་ལོ་ཀི་ཤྭ་ར་ཡེ། བླ་མ་སྤྱན་རས་གཟིགས་ལ་ཕྱག་འཚལ་ལོ། །འདིའི་བསྐང་བཤགས་ཀྱི་ལུགས་ནི། ཐུགས་རྗེ་ཆེན་པོ་གསང་བ་འདུས་པའི་སྒྲུབ་ཆེན་ལས། སྐབས་འདིར་བསྐང་བཤགས་རྒྱས་པར་བྱས་རྗེས་སུ་བཟློག་པ་མང་དུ་བྱ། རྒྱུན་དུ་མ་ཚོར་བ་ཡང་ཉེས་པ་འབྱུང་བས་བཤགས་རྒྱུད་ནར་མར་འདོན་པའོ། །ཞེས་དང་། མི་ཏྲའི་གསང་སྒྲུབ་ལས། དེ་ཡང་ངུ་བ་དང་། བྲང་བརྡུང་བ་དང་། ཆས་གོས་ངན་པ་གྱོན་པ་དང་། སྤྲང་མོ་བྱུང་ན་དམ་ཚིག་ལ་ཆག་ཉམས་ཡོད་པས་བཤགས་པར་བྱའོ། །བཤགས་པ་དང་བསྐང་བ་བརྒྱ་རྩ་བརྒྱད་བྱེད། ཅེས་པ་དང་། བསྐང་ལུང་ལས། བསྙེན་སྒྲུབ་ལས་སྦྱོར་དུས་དག་གམ། །དུས་བཟང་ཚོགས་དང་གཏོར་མའི་དུས། །ཕྲིན་ལས་རྣམ་བཞིའི་
བཅོལ་བ་སོགས། །ཉམས་ཆག་བཤགས་པའི་དུས་སུ་བསྐང་། །ཞེས་དང་། ཨོ་རྒྱན་རིན་པོ་ཆེས་ཕྲིན་ལས་ཀྱི་བྱ་བ་གང་དང་གང་ལ་བརྩོན་པའི་དུས་སུ་བསྐང་བའི་ཆོ་ག་ལ་འཇུག་པར་བྱའོ། །ཞེས་གསུངས་པ་དང་། བསྐང་རྒྱུད་ལས། སེམས་ཅན་དུས་མིན་འཆི་བ་ལ། །བསྐང་བའི་ཆོ་གས་བཟློག་པར་བྱ། ཞེས་གསུངས་སོ། །དེ་ནས་བསྐང་རྫས་མཆོད་གཏོར་བཤམས་ལ་འདི་སྐད་དོ། །ཧཱུྃ། སྔོན་ཚེ་སངས་རྒྱས་བཅོམ་ལྡན་འདས། །སྣང་བ་མཐའ་ཡས་སྤྱན་སྔ་རུ། །ཐུགས་བསྐྱེད་རྣམ་དག་རྒྱ་ཆེན་གྱིས།། །ཐུགས་དམ་གཉན་པོ་ཞལ་བཞེས་པའི། །ཐུགས་རྗེ་ཆེན་པོ་གཤེགས་སུ་གསོལ། །སྤྱན་རས་གཟིགས་དབང་གཤེགས་སུ་གསོལ། །
འཇིག་རྟེན་དབང་ཕྱུག་གཤེགས་སུ་གསོལ། །གསུང་གི་དབང་ཕྱུག་གཤེགས་སུ་གསོལ། །གར་གྱི་དབང་ཕྱུག་གཤེགས་སུ་གསོལ། །དབང་གི་རྒྱལ་པོ་གཤེགས་སུ་གསོལ། །རྒྱ་གྲི་ཝ་གཤེགས་སུ་གསོལ། །པདྨ་སམ་བྷ་གཤེགས་སུ་གསོལ། །གསང་བ་ཡེ་ཤེས་གཤེགས་སུ་གསོལ། །རིགས་བཞི་ཡབ་ཡུམ་གཤེགས་སུ་གསོལ། །རིགས་བཞིའི་མཁའ་འགྲོ་གཤེགས་སུ་གསོལ། །སངས་རྒྱས་སྟོང་རྩ་གཤེགས་སུ་གསོལ། །མ་མགོན་ལྕམ་དྲལ་གཤེགས་སུ་གསོལ། །འཁོར་ཚོགས་རྒྱ་མཚོ་གཤེགས་སུ་གསོལ། །བཀའ་ཉན་ཕོ་ཉ་གཤེགས་སུ་གསོལ། །དམ་ཅན་སྲུང་མ་གཤེགས་སུ་གསོལ། །ཕྲིན་ལས་བསྒྲུབ་ཕྱིར་གཤེགས་སུ་གསོལ། །ཐུགས་དམ་བསྐང་ཕྱིར་གཤེགས་སུ་གསོལ། །སྔོན་གྱི་ཐུགས་དམ་རྗེས་དགོངས་ལ། །བསྒྲུབ་ཕྱིར་མཆོད་པའི་གནས་འདི་རུ། །དགྱེས་ཤིང་བརྟན་པར་བཞུགས་སུ་གསོལ། །ཁྱོད་ལ་ཕྱག་འཚལ་མཆོད་པ་འབུལ། །ཐུགས་དམ་གཉན་པོ་བསྐང་གྱུར་ཅིག །ཧཱུྃ། སྤྱན་གྱི་དབང་པོ་ཚིམ་པའི་ཕྱིར། །སྣ་ཚོགས་གཟུགས་ཀྱིས་ཐུགས་དམ་བསྐང་། །སྙན་གྱི་དབང་པོ་ཚིམ་པའི་ཕྱིར། །སྣ་ཚོགས་སྒྲ་ཡིས་
ཐུགས་དམ་བསྐང་། །ཤངས་ཀྱི་དབང་པོ་ཚིམ་པའི་ཕྱིར། །སྣ་ཚོགས་དྲི་ཡིས་ཐུགས་དམ་བསྐང་། །ལྗགས་ཀྱི་དབང་པོ་ཚིམ་པའི་ཕྱིར། །སྣ་ཚོགས་རོ་ཡིས་ཐུགས་དམ་བསྐང་། །སྐུ་ཡི་དབང་པོ་ཚིམ་པའི་ཕྱིར། །སྣ་ཚོགས་རེག་བྱས་ཐུགས་དམ་བསྐང་། །ཐུགས་ཀྱི་དབང་པོ་ཚིམ་པའི་ཕྱིར། །སྣ་ཚོགས་ཆོས་ཀྱིས་ཐུགས་དམ་བསྐང་། །ཕྱི་ནང་བར་ཆད་ཞི་བའི་ཕྱིར། །ཕྱི་ཡི་མཆོད་པས་ཐུགས་དམ་བསྐང་། །ཚེ་དབང་ལོངས་སྤྱོད་རྒྱས་པའི་ཕྱིར། །ནང་གི་མཆོད་པས་ཐུགས་དམ་བསྐང་། །སྣང་བ་དབང་དུ་སྡུད་པའི་ཕྱིར། །གསང་བའི་མཆོད་པས་ཐུགས་དམ་བསྐང་། །དགྲ་བགེགས་མ་ལུས་བསྒྲལ་བའི་ཕྱིར། །ཤ་ཁྲག་དམར་གྱིས་ཐུགས་དམ་བསྐང་། །སྒྲུབ་ལ་དངོས་གྲུབ་སྟེར་བའི་ཕྱིར། །བདུད་རྩི་སྨན་གྱིས་ཐུགས་དམ་བསྐང་། །དབང་དང་བྱིན་རླབས་འབེབས་པའི་ཕྱིར། །དམར་ཆེན་ར་ཀས་ཐུགས་དམ་བསྐང་། །སྣ་ཚོགས་ཕྲིན་ལས་རྒྱས་པའི་ཕྱིར། །དམ་རྫས་གཏོར་མས་ཐུགས་དམ་བསྐང་། །བསོད་ནམས་ཕུན་ཚོགས་ཐོབ་པའི་ཕྱིར། །ལོངས་སྤྱོད་ཚོགས་ཀྱིས་ཐུགས་དམ་བསྐང་། །ཧཱུཾ། འགྲོ་དྲུག་
ཐུགས་རྗེས་འདྲེན་པའི་ཕྱིར། །ཐུགས་རྗེ་ཆེན་པོའི་ཐུགས་དམ་བསྐང་། །ཡེ་ཤེས་ཕྱོགས་མེད་རྒྱས་པའི་ཕྱིར། །སྤྱན་རས་གཟིགས་ཀྱི་ཐུགས་དམ་བསྐང་། །འཁོར་འདས་ཆོས་ལ་དབང་སྒྱུར་ཕྱིར། །འཇིག་རྟེན་དབང་ཕྱུག་ཐུགས་དམ་བསྐང་། །གསུང་གི་རིགས་ལས་སྤྲུལ་པའི་ཕྱིར། །གསུང་གི་དབང་ཕྱུག་ཐུགས་དམ་བསྐང་། །གང་ལ་གང་འདུལ་སྟོན་པའི་ཕྱིར། །གར་གྱི་དབང་ཕྱུག་ཐུགས་དམ་བསྐང་། །ཁྱད་པར་དབང་གི་ལས་མཛད་ཕྱིར། །ཅུ་གྲྭ་བའི་ཐུགས་དམ་བསྐང་། །སྣང་སྲིད་ཟིལ་གྱིས་གནོན་པའི་ཕྱིར། །པདྨ་འབྱུང་གནས་ཐུགས་དམ་བསྐང་། །སྲིད་གསུམ་དབང་དུ་སྡུད་པའི་ཕྱིར། །གསང་བ་ཡེ་ཤེས་ཐུགས་དམ་བསྐང་། །གཟུགས་ཀྱི་ཕུང་པོ་གནས་དག་ཕྱིར། །རྣམ་པར་སྣང་མཛད་ཐུགས་དམ་བསྐང་། །རྣམ་ཤེས་ཕུང་པོ་གནས་དག་ཕྱིར། །རྡོ་རྗེ་སེམས་དཔའི་ཐུགས་དམ་བསྐང་། །ཚོར་བའི་ཕུང་པོ་གནས་དག་ཕྱིར། །རིན་ཆེན་འབྱུང་ལྡན་ཐུགས་དམ་བསྐང་། །འདུ་ཤེས་ཕུང་པོ་གནས་དག་ཕྱིར། །སྣང་བ་མཐའ་ཡས་ཐུགས་དམ་བསྐང་། །འདུ་བྱེད་ཕུང་པོ་གནས་དག་ཕྱིར། །དོན་ཡོད་གྲུབ་པའི་ཐུགས་དམ་བསྐང་།
ནམ་མཁའི་ངོ་བོ་གནས་དག་པའི། །དབྱིངས་ཕྱུག་མ་ཡི་ཐུགས་དམ་བསྐང་། །ས་ཡི་ངོ་བོ་གནས་དག་པའི། །སངས་རྒྱས་སྤྱན་མའི་ཐུགས་དམ་བསྐང་། །ཆུ་ཡི་ངོ་བོ་གནས་དག་ཕྱིར། །མ་མ་ཀཱི་ཡི་ཐུགས་དམ་བསྐང་། །མེ་ཡི་ཕུང་པོ་གནས་དག་པའི། །ན་བཟའ་དཀར་མོའི་ཐུགས་དམ་བསྐང་། །རླུང་གི་ངོ་བོ་གནས་དག་པའི། །དམ་ཚིག་སྒྲོལ་མའི་ཐུགས་དམ་བསྐང་། །ཞི་བའི་ལས་རྣམས་མཛད་པའི་ཕྱིར། །རྡོ་རྗེ་མཁའ་འགྲོའི་ཐུགས་དམ་བསྐང་། །རྒྱས་པའི་ལས་རྣམས་མཛད་པའི་ཕྱིར། །རིན་ཆེན་མཁའ་འགྲོའི་ཐུགས་དམ་བསྐང་། །དབང་གི་ལས་རྣམས་མཛད་པའི་ཕྱིར། །པདྨ་མཁའ་འགྲོའི་ཐུགས་དམ་བསྐང་། །དྲག་པོའི་ལས་རྣམས་མཛད་པའི་ཕྱིར། །ལས་ཀྱི་མཁའ་འགྲོའི་ཐུགས་དམ་བསྐང་། །བསྐལ་བཟང་མཛད་པ་མཐར་ཕྱིན་ཕྱིར། །སངས་རྒྱས་སྟོང་གི་ཐུགས་དམ་བསྐང་། །སངས་རྒྱས་བསྟན་པ་བསྲུང་བའི་ཕྱིར། །མ་མགོན་ལྕམ་དྲལ་ཐུགས་དམ་བསྐང་། །གཙོ་བོའི་བཀའ་བཞིན་བསྒྲུབ་པའི་ཕྱིར། །འཁོར་ཚོགས་རྒྱ་མཚོའི་ཐུགས་དམ་བསྐང་། །དཔལ་གྱི་བཀའ་སྡོད་ཡིན་པའི་ཕྱིར། །
བཀའ་ཉན་ལས་མཁན་ཐུགས་དམ་བསྐང་། །མི་ནད་ཕྱུགས་ནད་རྒྱུན་གཅོད་ཕྱིར། །དབང་ཕྱུག་མཁའ་འགྲོའི་ཐུགས་དམ་བསྐང་། །ཅི་བཅོལ་ཕྲིན་ལས་བསྒྲུབ་པའི་ཕྱིར། །དམ་ཅན་སྲུང་མའི་ཐུགས་དམ་བསྐང་། །བཀའ་དང་དམ་ལ་གནས་པའི་ཕྱིར། །ལྷ་སྲིན་སྡེ་བརྒྱད་ཐུགས་དམ་བསྐང་། །མཆོད་ན་དགེ་བའི་གྲོགས་མཛད་ཕྱིར། །ཡུལ་ལྷ་ཟོ་དོར་ཐུགས་དམ་བསྐང་། །ཁྱེད་ཀྱི་ཐུགས་དམ་བསྐངས་གྱུར་ནས། །བདག་ཅག་དཔོན་སློབ་ཡོན་མཆོད་འཁོར་བཅས་ཀྱི། །དམ་ཚིག་ཉམས་ཆག་བསྐང་བ་དང་། །ཆག་ཆེན་ཉམ་ང་མེད་པར་མཛོད། །སྔོན་གྱི་ལས་དང་འཕྲལ་གྱི་རྐྱེན། །མི་མཐུན་ཕྱོགས་རྣམས་ཞི་བར་མཛོད། །ཚེ་དབང་ལོངས་སྤྱོད་འཕེལ་བ་དང་། །འཁོར་དང་བསྟན་པ་རྒྱས་པར་མཛོད། །སྣང་བ་དབང་དུ་འདུ་བ་དང་། །བསམ་པ་ཡིད་བཞིན་འགྲུབ་པར་མཛོད། །ལུས་ངག་ཡིད་གསུམ་བསྲུང་བ་དང་། །ཕྱི་ནང་བར་ཆད་བཟློག་ཏུ་གསོལ། །བྱིན་རླབས་མཐུ་རྩལ་ཆེན་པོ་དང་། །དབང་དྲག་ཕྲིན་ལས་ཐོག་ལྟར་ཕོབ། །དགྲ་ལ་ཕོག་ན་དགྲ་དཔུང་ཆོམས། །བགེགས་ལ་བབ་ན་བགེགས་དཔུང་ཐུལ། །གདོན་ལ་བབ་ན་
གདོན་རྐུངས་ཕུད། །ལུས་གདོན་ནད་གདོན་རྩད་ནས་ཆོད། །གོད་འདྲེ་ཕུང་འདྲེ་ཡུལ་ནས་ཕྱུངས། །དམ་སྲི་ཕོ་མོ་ཚང་ནས་ཐོན། །ས་བདག་ཀླུ་གཉན་སྙིང་ནས་དྲོངས། །རྒྱལ་བསེན་འབྱུང་པོ་སྤྱི་ནས་ཆོམས། །གཟའ་གདོན་ཐལ་བ་རྡུལ་དུ་རློགས། །བྱད་མ་རང་གཤེད་རང་ལ་ཕོབ། །ནད་པ་ཡོད་ན་ཡོ་ནས་གསོས། །སྲིའུ་ཡོད་ན་ཚང་ནས་འཚོས། །ཤི་ཁ་ཆོད་ལ་གོད་ཁ་སྡོམས། །མི་ཁ་བསྒྱུར་ལ་ཡམས་ཁ་ཟློག །དུས་ལ་བབ་བོ་ས་མ་ཡ། །བཅོལ་བའི་ཕྲིན་ལས་འགྲུབ་པར་མཛོད། །ཧཱུྃ། གསང་སྔགས་གཉན་པོའི་སྒོར་ཞུགས་རྣལ་འབྱོར་པས། །ཤེས་བཞིན་མི་ལྡན་བག་མེད་དབང་གྱུར་ཏེ། །སྐུ་ཡི་དམ་ཚིག་ཉམས་པ་མཐོལ་ལོ་བཤགས། །གསུང་གི་དམ་ཚིག་ཉམས་པ་མཐོལ་ལོ་བཤགས། །ཐུགས་ཀྱི་དམ་ཚིག་ཉམས་པ་མཐོལ་ལོ་བཤགས། །རྩ་བའི་དམ་ཚིག་ཉམས་པ་མཐོལ་ལོ་བཤགས། །ཡན་ལག་དམ་ཚིག་ཉམས་པ་མཐོལ་ལོ་བཤགས། །སྡོམ་པ་སྤྱི་དང་འགལ་བ་མཐོལ་ལོ་བཤགས། །བཀའ་ལུང་དབང་དང་མི་ལྡན་མཐོལ་ལོ་བཤགས། །དམ་ཚིག་སྣོད་དང་མི་ལྡན་མཐོལ་ལོ་བཤགས། །མན་ངག་
བཅུད་དང་མི་ལྡན་མཐོལ་ལོ་བཤགས། །ཉམས་ལེན་གདེང་དང་མི་ལྡན་མཐོལ་ལོ་བཤགས། །ཡི་དམ་བླང་དོར་བྱས་པ་མཐོལ་ལོ་བཤགས། །བསྙེན་སྒྲུབ་བར་ཆད་བྱས་པ་མཐོལ་ལོ་བཤགས། །བསྐྱེད་རིམ་ཏིང་འཛིན་མི་གསལ་མཐོལ་ལོ་བཤགས། །རྫོགས་རིམ་དགོངས་པ་མ་རྟོགས་མཐོལ་ལོ་བཤགས། །བཟླས་བརྗོད་སྙིང་པོ་མ་དག་མཐོལ་ལོ་བཤགས། །ཕྲིན་ལས་གཞུང་བཞིན་མ་བསྲངས་མཐོལ་ལོ་བཤགས། །མཆོད་པ་ལོ་ཟླར་འདས་པ་མཐོལ་ལོ་བཤགས། །ཚོགས་དང་གཏོར་མ་ཆག་པ་མཐོལ་ལོ་བཤགས། །དུས་དང་དུས་ལས་འདས་པ་མཐོལ་ལོ་བཤགས། །དུས་མིན་ལས་ལ་སྦྱར་བ་མཐོལ་ལོ་བཤགས། །མཐོལ་ལོ་བཤགས་སོ་བླ་མ་ཡི་དམ་ལྷ། །གནོང་ངོ་འགྱོད་དོ་དཔའ་བོ་མཁའ་འགྲོའི་ཚོགས། །བཟོད་པར་གསོལ་ལོ་སྲུང་མ་དམ་ཚིག་ཅན། །ཚངས་པར་སྩོལ་ཅིག་བཛྲ་ས་མ་ཡ། །མཆོད་ཅིང་གསོལ་ལོ་བཛྲ་ཨ་ལ་ལ་ཧོ། །ཨོཾ་ས་མཱ་ཡ། ཨཱཿས་མཱ་ཡ། ཧཱུཾ་ས་མཱ་ཡ། ཨོཾ་ཨཱཿཧཱུྃ་ཧྲཱིཿ ཨོཾ་མ་ཎི་པདྨེ་ཧཱུྃ། དྷ་མ་གྷ་ཡེ་ན་མསྭཱ་ཧཱ། ཧ་རི་ནི་ས་ར་ཙ་ཧྲིཡ་ཧཱུྃ་ཛ༔ ཨོཾ་བཛྲ་སཏཱ་ས་མ་ཡ་སོགས་བཏགས་ལ་བརྗོད་དོ། །འདི་ཡི་ཕན་ཡོན་
བཀའ་བརྒྱད་མདངས་བསྐང་རྩ་བ་ལས། བསྐང་བའི་འབྲས་བུ་བསྟན་པ་ནི། །།མཆོག་དང་ཐུན་མོང་འབྱུང་བར་ངེས། །ཞེས་དང་། བསྐང་ལུང་ལས། འདི་ལྟར་བསྐངས་བའི་བྱིན་རླབས་ཀྱིས། །རྣལ་འབྱོར་ཕོ་མོའི་ཉམས་ཆག་བསྐང་། །དཀྱིལ་འཁོར་ལྷ་ཚོགས་དགྱེས་པས་བསྐང་། །ཚོགས་ཆེན་གཉིས་རྫོགས་སྒྲིབ་གཉིས་བྱུང་། །མཆོག་དང་ཐུན་མོང་དངོས་གྲུབ་ཐོབ། །གནས་སྐབས་རྣལ་འབྱོར་ཅི་བསམ་འགྲུབ། །ཅེས་དང་། བླ་མ་ཡི་དམ་མཁའ་འགྲོ་ཐམས་ཅད་ཀྱི། སྐུ་རྒྱུད་ཤེལ་གྱི་རི་བོ་ལས། །དེ་ལྟར་ཐུགས་དམ་བསྐང་བ་ཡིས། །འབྲས་བུ་མཆོག་དང་ཐུན་མོང་ཀུན། །ཡེ་ཤེས་ལྷ་དགྱེས་སྩོལ་བར་འགྱུར། །ཅེས་གསུངས་སོ། །བདེ་གཤེགས་བཀའ་བརྒྱད་ཀྱི་རྒྱུད་གསང་བ་འདུས་པ་ལས། ལེ་ལོའི་དུས་ཉམས་མཆོད་པ་སོགས། །ལྷ་དང་འཁོན་གཅུགས་སྦྱོང་བ་དང་། །བསོད་ནམས་ཚོགས་ཆེན་བསགས་བྱའི་ཕྱིར། །བསྐང་གསོའི་རིམ་པ་འདི་ལྟ་སྟེ། །ཞེས་དང་། དེ་རྣམས་རྫས་ཀྱི་སྤྱི་བསྐོང་ཡིན། །ལྷ་རྣམས་ཀུན་མཉེས་རྐྱེན་དབང་ཟློག །ནང་དུ་ཏིང་ངེ་འཛིན་གྱིས་བསྐང་། །རང་ཉིད་ཐུགས་ཀའི་ཧཱུྃ་འཕྲོས་ཏེ། །སྣོད་ཀྱི་འཇིག་རྟེན་གཞོང་པ་རུ། །བཅུད་ཀྱི་སེམས་ཅན་འདོད་ཡོན་སྤུངས། །རིག་པའི་ལྷ་མོ་སྤྲོས་ཏེ་བསྐང་། །གཟུགས་སྤྱན་སྒྲ་སྙན་དྲི་ཤངས་དང་། །རོ་མཆོག་ལྗགས་ལ་རེག་བྱ་ཆོས། །སྣང་སྲིད་ཆོས་ཀྱིས་ཐུགས་དམ་བསྐང་། །འདོད་ཡོན་དབང་པོ་ལྔ་ཐིམ་ནས། །ལྷ་མཉེས་ཕྲིན་ལས་བསྒྲུབ་པར་བསམ། །དེས་ནི་ལྷ་མཉེས་
དངོས་གྲུབ་སྟེར། །གསང་བ་གཉིས་མེད་ལྟ་བས་བསྐང་། །བསྐང་རྫས་ལྟ་སེམས་སྐོང་བྱེད་ཀྱི། །མཁན་པོ་དག་ཀྱང་རང་གི་སེམས། །བསྐང་བའི་རྫས་མཆོག་སེམས་ཡིན་པས། །སེམས་ཉིད་གཞི་རྩ་བྲལ་བ་ལ། །མཆོད་བྱ་མཆོད་བྱེད་གཉིས་མེད་པས། །གཉིས་མེད་དོན་གྱི་ཐུགས་དམ་བསྐང་། །ཡེ་ཤེས་ལྷ་ཚོགས་ཀུན་མཉེས་ནས། །མཆོག་གི་དངོས་གྲུབ་རྒྱུན་མི་ཆད། །ཅེས་བཀའ་སྩལ་ཏོ། །འདི་ནི་གྲུབ་ཆེན་ཀརྨ་པཀྵིའི་རྙིང་བསྐང་བཀྲ་ཤིས་སྒོ་མང་གི་ནང་དུ་རྒྱལ་བ་རྒྱ་མཚོ་ལྷ་དགུའི་བསྐང་བ་རྒྱས་པ་དང་། ཕྲིན་ལས་སྔགས་ཀྱིས་བསྟོད་པ་བསྐང་བར་བསྒྱུར་བའི་ཡིག་རྙིང་སོགས་ཀྱི་རྗེས་སུ་འབྲང་སྟེ། ཚིག་ཕལ་ཆེར་ཨོ་རྒྱན་རིན་པོ་ཆེས་གསུངས་པ་བྱིན་རླབས་ཆེ་བར་བསམས་ཏེ། ཨ་རཱ་གས་ལེགས་པར་བསྒྲིགས་པའོ། །འདི་ལ་ཉེས་པ་གང་མཆིས་རྒྱལ་བ་རྒྱ་མཚོའི་ཚོགས་ལ་བཤགས། །དགེ་བས་བདག་དང་མཁའ་མཉམ་སེམས་ཅན་ཀུན། །ཐུགས་རྗེ་ཆེན་པོ་མྱུར་དུ་འགྲུབ་ཕྱིར་བསྔོ། །སརྦ་མངྒ་ལཾ། ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།