སྙན་རྩོམ་ཐོར་བུའི་སྐོར། དྲུག་པ།

དྲུག་པ།

ཉག་ཅིག་ཞི་བའི་དབྱིངས་སུ་འཇུག་པའི་སྒོ། །

བདེན་གཉིས་ཆོས་ཚུལ་ཟབ་མོ་དྲི་མེད་ལམ། །

རིགས་གསུམ་གདུལ་བྱའི་ཚོགས་ལ་སྟོན་མཛད་པའི། །

མཁས་དབང་དགེ་འདུན་ཆོས་འཕེལ་གྱི་སྙན་རྩོམ་ཐོར་བུའི་སྐོར་ཚངས་སྲས་རྒྱུད་མངས།

277

སྐུ་བཞིའི་བདག་ཉིད་སངས་རྒྱས་དེ་ལ་འདུད། །

རྒྱུད་ལྔས་བསྡུས་པའི་འགྲོ་བ་མ་ལུས་པ། །

ཕྱིན་དྲུག་ཕ་རོལ་ཕྱིན་པའི་ལམ་བརྟེན་ཏེ། །

ནོར་བདུན་ཡོན་ཏན་ཚང་བའི་རྟེན་བརྒྱུད་ནས། །

མཐའ་བརྒྱད་སྤྲོས་པ་དག་པའི་སྐུ་ཐོབ་ཤོག །

ཤར་ནུབ་རྒྱ་མཚོའི་མཐའ་ལ་ཐུག་གི་བར། །

ལྷོ་ཕྱོགས་རྒྱ་གར་ཡུལ་དུ་བགྲོད་པའི་ཚུལ། །

ནུབ་ཀྱི་སྨག་ལ་སྒྲོན་མེ་བཏེག་འདྲ་འདི། །

བྱང་ཕྱོགས་བོད་ཀྱི་སྐྱེས་བུའི་དོན་དུ་འབྲི། །

རྒྱ་ཁྱོན་མཚོ་དང་འདྲ་བའི་གྲོང་ཁྱེར་དང་། །

རྒྱ་འཕང་རི་དང་འདྲ་བའི་མཆོད་རྟེན་སོགས། །

རྒྱ་ཆེའི་གཟིགས་མོ་མང་པོ་གཟིགས་པའི་སླད། །

རྒྱ་གར་ཡུལ་དུ་ལན་གཅིག་འབྱོན་པར་མཛོད། །