སྤྱན་ལྔ་བཤད་པ།
སྤྱན་ལྔ་བཤད་པ། གཉིས་པ་ལམ་ཁྱད་པར་ཅན་སྒྲུབ་པར་གདམས་པ་ལ་གཉིས། སྒྲུབ་པ་ལ་རང་དབང་དུ་འཇུག་པའི་རྒྱུ་སྤྱན་ལྔ་ལ་གདམས་པ། སྒྲུབ་པ་མྱུར་དུ་རྫོགས་པའི་རྒྱུ་མངོན་ཤེས་དྲུག་ལ་གདམས་པའོ། དང་པོ་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། ཤཱ་རིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཤའི་མིག་གིས་དཔག་ཚད་བརྒྱ་མཐོང་བ་ཡོད་དོ་ཞེས་སོགས་ཀྱི་ཡུམ་བར་མའི་མདོ་ཆོས་ཅན། ཁྱོད་ཀྱིས་སྒྲུབ་པ་ལ་རང་དབང་དུ་འཇུག་པའི་རྒྱུ་སྤྱན་ལྔ་ལ་འདོམས་པ་ཡིན་ཏེ། ཁྱོད་ཀྱིས་སྤྱན་ལྔའི་ཡུལ་ཡུལ་ཅན་རྣམས་དེ་བཞིན་ཉིད་དུ་རོ་གཅིག་པ་ཉིད་དུ་གྲུབ་བོ་ཞེས་སློབ་པ་ལ་འདོམས་པ་ཡིན་པའི་ཕྱིར། སྤྱན་ལྔ་སོ་སོའི་ངོ་བོ་ཡོད་དེ། ཤའི་སྤྱན་གྱིས་གྲངས་ཇི་ལྟ་བ་བཞིན་དུ་དངོས་པོ་སོ་སོར་ངེས་
པ། དཔག་ཚད་བརྒྱ་ནས་སྟོང་གསུམ་ཚུན་ཆད་ཀྱི་གཟུགས་ཕྲ་རགས་རྣམས་མཐོང་བ་དང་། སྔོན་དགེ་བ་ཟག་བཅས་ཀྱི་ལས་ཀྱི་རྣམ་པར་སྨིན་པ་ལས་བྱུང་བའི་ལྷའི་སྤྱན་ནི། སེམས་ཅན་ཐམས་ཅད་ཀྱི་འཆི་འཕོ་བ་དང་། སྐྱེ་བ་ཇི་ལྟ་བ་བཞིན་དུ་ཤེས་པ་དང་། ཤེས་རབ་ཀྱི་སྤྱན་ནི་ཆོས་ཐམས་ཅད་ལ་བདེན་པར་རྣམ་པར་མི་རྟོག་པ་བདེན་མེད་མངོན་སུམ་དུ་རྟོགས་པ་དང་། ཆོས་ཀྱི་སྤྱན་ནི་འཕགས་པའི་གང་ཟག་དབང་པོ་རྣོ་རྟུལ་ཐམས་ཅད་རྟོགས་པ་དང་། སངས་རྒྱས་ཀྱི་སྤྱན་ནི་གྲངས་ཇི་ལྟ་བ་བཞིན་དུ་ཆོས་ཐམས་ཅད་རྣམ་པ་ཐམས་ཅད་དུ་མངོན་པར་རྫོགས་པར་བྱང་ཆུབ་པའི་ཡུལ་ཅན་གྱི་བྱེད་པ་དང་ལྡན་པ་ཡིན་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས། དང་པོ་ལ། ཁ་ཅིག །སྤྱན་ལྔའི་ནང་ཚན་གང་ཞིག །རང་གི་བདག་རྐྱེན་དུ་གྱུར་པའི་ཤའི་མིག་ལ་བརྟེན་ནས་བྱུང་ཞིང་། སྟོང་གསུམ་ཚུན་ཆད་ཀྱི་གཟུགས་ཕྲ་རགས་མངོན་སུམ་དུ་མཐོང་བ་དེ་ཤའི་སྤྱན་གྱི་མཚན་ཉིད་ཟེར་ན། དཔག་ཚད་བརྒྱ་ཚུན་ཆད་ཙམ་ལས་མི་མཐོང་བའི་ཤའི་སྤྱན་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། དེ་འདྲ་ཡོད་པའི་ཕྱིར། དེར་ཐལ། མདོ་ལས། བྱང་ཆུབ་སེམས་དཔའ་སེམས་དཔའ་ཆེན་པོ་ཤའི་མིག་གིས་དཔག་ཚད་བརྒྱ་མཐོང་བ་ཡོད་དོ། །ཞེས་པའི་ལུང་དོན་གྲུབ་པའི་ཕྱིར། ཁ་ཅིག །རང་གི་བདག་རྐྱེན་དུ་གྱུར་པའི་བསམ་གཏན་གྱི་དངོས་གཞི་ལ་བརྟེན་ནས་སེམས་ཅན་ཐམས་ཅད་ཀྱི་འཆི་འཕོ་བ་དང་སྐྱེ་བ་ཇི་ལྟ་བ་བཞིན་དུ་ཤེས་པའི་ཡུལ་ཅན་དེ་ལྷའི་སྤྱན་གྱི་མཚན་ཉིད་ཟེར་ན། ལྷའི་སྤྱན་ནུས་པ་མཐུ་ཆེ་ཆུང་གི་ཁྱད་པར་མེད་པར་ཐལ། དེ་ཡིན་ན་སེམས་ཅན་ཐམས་ཅད་ཀྱི་སྐྱེ་བ་དང་འཆི་འཕོ་བ་མངོན་སུམ་དུ་རྟོགས་པས་ཁྱབ་པའི་ཕྱིར། གཞན་ཡང་། སེམས་ཅན་ཐམས་ཅད་སྐྱེ་བ་ལེན་པར་ཐལ། ལྷའི་སྤྱན་གྱི་སེམས་
ཅན་ཐམས་ཅད་སྐྱེ་བ་ལེན་པ་མངོན་སུམ་དུ་མཐོང་བའི་ཕྱིར། འདོད་ན། བྱང་སེམས་རྒྱུན་མཐའ་བ་སྐྱེ་བ་ལེན་པར་ཐལ། འདོད་པའི་ཕྱིར། འདོད་ན། མི་ལེན་པར་ཐལ། དེ་མ་རིག་བག་ཆགས་ཀྱི་ས་དང་། ཟག་མེད་ཀྱི་ལས་ལ་བརྟེན་ནས་སྐྱེ་བ་ཡང་མི་ལེན། ལས་ཉོན་གྱིས་སྐྱེ་བ་ཡང་མི་ལེན་པའི་ཕྱིར། དང་པོ་དེར་ཐལ། དེ་འདྲའི་སངས་འཕགས་མེད་པའི་ཕྱིར། ཕྱི་མ་མ་གྲུབ་ན། བྱང་སེམས་རྒྱུན་མཐའ་བ་ཆོས་ཅན། ལས་ཉོན་གྱིས་སྐྱེ་བ་མི་ལེན་པར་ཐལ། བྱང་འཕགས་ཡིན་པའི་ཕྱིར། བྱས་པ་ལ། ཁོ་ན་རེ། སངས་འཕགས་སེམས་ཅན་ཐམས་ཅད་སྡུག་བསྔལ་ལས་བསྒྲལ་འདོད་ཀྱི་སྙིང་རྗེ་ཅན་མ་ཡིན་པར་ཐལ། སེམས་ཅན་ཐམས་ཅད་སྡུག་བསྔལ་དང་མི་ལྡན་པའི་ཕྱིར། ཟེར་ན། འདོད་ལན་བཏབ་ཚེ་སྒྲུབ་བྱེད་མི་འབྱུང་ངོ་། །ཁ་ཅིག །སྤྱན་ལྔའི་ནང་ཚན་གང་ཞིག །བདག་མེད་ཕྲ་རགས་གང་རུང་མངོན་སུམ་དུ་རྟོགས་པ་ཤེས་རབ་ཀྱི་སྤྱན་གྱི་མཚན་ཉིད་ཟེར་ན། ཐེག་ཆེན་གྱི་མཐོང་ལམ་བར་ཆད་མེད་ལམ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། བདག་མེད་ཕྲ་རགས་གང་རུང་ཁྱོད་ཀྱི་དངོས་གཞལ་ཡིན་པར་ཐལ། འདོད་པའི་ཕྱིར། འདོད་ན། བདག་མེད་ཕྲ་རགས་གང་རུང་ཆོས་ཅན། སྟོང་ཉིད་ཡིན་པར་ཐལ། དེའི་དངོས་གཞལ་ཡིན་པའི་ཕྱིར། སྤྱན་ལྔའི་ནང་ཚན་གང་ཞིག །རང་དང་རྒྱུད་ཚོད་མཉམ་པའི་འཕགས་པའི་གང་ཟག་གི་དབང་པོ་རྣོ་རྟུལ་ཇི་ལྟ་བ་བཞིན་དུ་རྟོགས་པའི་ཡུལ་ཅན་དེ་ཆོས་ཀྱི་སྤྱན་གྱི་མཚན་ཉིད་ཟེར། སངས་འཕགས་ཀྱི་རྒྱུད་ཀྱི་ཆོས་ཀྱི་སྤྱན་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། རང་དང་རྒྱུད་ཚོད་མཉམ་པའི་འཕགས་པའི་གང་ཟག་དབང་པོ་རྟུལ་པོ་རྟོགས་པར་ཐལ། འདོད་པའི་ཕྱིར། འདོད་ན། སངས་འཕགས་ཆོས་
ཅན། ཁྱོད་དང་རྒྱུད་ཚོད་མཉམ་པའི་དབང་རྟུལ་ཡོད་པར་ཐལ། ཁྱོད་ཀྱི་རྒྱུད་ཀྱི་ཆོས་ཀྱི་སྤྱན་དེས་དེ་རྟོགས་པའི་ཕྱིར། ཁ་ཅིག །ཤའི་སྤྱན་གྱི་མ་མཐའི་ས་མཚམས་ཐེག་ཆེན་གྱི་ཚོགས་ལམ་དང་། ལྷའི་སྤྱན་སྦྱོར་ལམ་དང་། ཤེས་རབ་ཀྱི་སྤྱན་ཐེག་ཆེན་གྱི་མཐོང་ལམ་མཉམ་གཞག་དང་། ཆོས་ཀྱི་སྤྱན་ཐེག་ཆེན་གྱི་མཐོང་ལམ་རྗེས་ཐོབ་དང་། སངས་རྒྱས་ཀྱི་སྤྱན་སངས་རྒྱས་ཀྱི་ས་དང་ས་བརྒྱད་པ་ན་ཡོད་ཟེར་ན། ཤའི་སྤྱན་དང་ལྷའི་སྤྱན་ཆོས་ཅན། ཁྱོད་ཐོབ་པའི་གང་ཟག་ཡིན་ན་ལམ་ཞུགས་ཡིན་དགོས་པར་ཐལ། འདོད་པའི་ཕྱིར། འདོད་ན། མི་འཐད་པར་ཐལ། ལམ་མ་ཞུགས་ན་དེ་ཡོད་པའི་ཕྱིར། དེ་ན་བསམ་གཏན་དང་པོའི་དངོས་གཞི་ཐོབ་པ་ཡོད་པའི་ཕྱིར། གཞན་ཡང་། ཤེས་རབ་ཀྱི་སྤྱན་དང་ཆོས་ཀྱི་སྤྱན་གཉིས་ཐོབ་པའི་གང་ཟག་ཡིན་ན་ཐེག་ཆེན་འཕགས་པ་ཡིན་དགོས་པར་ཐལ། འདོད་པའི་ཕྱིར། འདོད་ན། དེ་གཉིས་ཐོབ་པའི་ཉན་ཐོས་མཐོང་ལམ་པ་ཆོས་ཅན། དེར་ཐལ། དེའི་ཕྱིར། དེར་ཐལ། དེ་ཡོད་པའི་ཕྱིར། དེར་ཐལ། ཉན་ཐོས་ཀྱི་མཐོང་ལམ་མཉམ་གཞག་ནས་ཤེས་རབ་ཀྱི་སྤྱན་འཐོབ་པ་གང་ཞིག །རྗེས་ཐོབ་ནས་ཆོས་ཀྱི་སྤྱན་འཐོབ་པའི་ཕྱིར། དང་པོ་དེར་ཐལ། དེ་ནས་གང་ཟག་གི་བདག་མེད་མངོན་སུམ་དུ་རྟོགས་པའི་མཁྱེན་པ་འཐོབ་པའི་ཕྱིར། ཁ་ཅིག །ཤའི་སྤྱན་ཡིན་ན་མིག་དབང་ཡིན་པས་ཁྱབ། བྱས་པ་ལ་མི་འཐད་པར་ཐལ། དེ་གཟུགས་ཅན་མ་ཡིན་པའི་ཕྱིར། དེར་ཐལ། དེ་ཡུལ་ཅན་ཡིན་པའི་ཕྱིར་ན་མ་ཁྱབ། དེར་ཐལ། དེ་དཔག་ཚད་བརྒྱ་ལ་སོགས་པའི་གཟུགས་མཐོང་བའི་ཡུལ་ཅན་ཡིན་པའི་ཕྱིར། ཁོ་ན་རེ། མིག་གིས་གཟུགས་མཐོང་བར་ཐལ། དེ་ལྟར་འཇིག་རྟེན་ན་གྲགས་པའི་ཕྱིར་ན་མ་ཁྱབ། འོ་ན། སའི་ཁ་དོག་ས་ཡིན་པར་ཐལ། དེ་ལྟ་འཇིག་རྟེན་གྲགས་པའི་ཕྱིར། ཁྱབ་པ་ཁས། འདོད་ན། དེ་ཆོས་ཅན། རེག་
བྱའི་སྐྱེ་མཆེད་ཡིན་པར་ཐལ། འདོད་པའི་ཕྱིར། ཁྱབ་ཡོད་དེ། མེ་ཡིན་ན་རེག་བྱའི་སྐྱེ་མཆེད་ཡིན་དགོས་པའི་ཕྱིར། དེར་ཐལ། དེ་ཡིན་ན་ཚ་ཞིང་སྲེག་པ་ཡིན་དགོས་པའི་ཕྱིར། དཔེར་ན། སྲེག་པར་བྱེད་པ་མ་ཡིན་ཕྱིར། མེ་མ་ཡིན་ཞེས་བྱ་བ་བཞིན། ཞེས་གསུངས་པའི་ཕྱིར། ཁ་ཅིག །ཤའི་སྤྱན་དང་ལྷའི་སྤྱན་གྱི་ས་མཚམས་སྔར་ལྟར་ལ། ཤའི་སྤྱན་དང་ལྷའི་སྤྱན་སོགས་དབང་ཤེས་ཡིན་ཟེར་བ་འགལ་ཏེ། སྟོང་ཉིད་ལ་རྩེ་གཅིག་ཏུ་མཉམ་པར་བཞག་པའི་ཐེག་ཆེན་སྦྱོར་ལམ་པའི་རྒྱུད་ལ་ལྷའི་སྤྱན་ཡོད་པར་ཐལ། ཐེག་ཆེན་གྱི་སྦྱོར་ལམ་ཐོབ་ན་ལྷའི་སྤྱན་ཐོབ་པས་ཁྱབ་པའི་ཕྱིར། ཁྱབ་པ་ཡོད་དེ། ཐེག་ཆེན་གྱི་སྦྱོར་ལམ་དྲོད་ཀྱི་ཡེ་ཤེས་སྐད་ཅིག་དང་པོ་ལ་གནས་པའི་གང་ཟག་ཡིན་ན་སྟོང་ཉིད་ལ་རྩེ་གཅིག་ཏུ་མཉམ་པར་བཞག་པའི་གང་ཟག་ཡིན་དགོས་པའི་ཕྱིར། འདོད་ན། དེའི་རྒྱུད་ལ་དབང་ཤེས་ཡོད་པར་ཐལ། དེའི་རྒྱུད་ལ་ལྷའི་སྤྱན་ཡོད་པའི་ཕྱིར། ཁྱབ་པ་ཁས། འདོད་ན། དེ་ཆོས་ཅན། ཁྱོད་ཀྱི་རྒྱུད་ལ་དབང་ཤེས་མེད་པར་ཐལ། ཁྱོད་སྟོང་ཉིད་ལ་རྩེ་གཅིག་ཏུ་མཉམ་པར་བཞག་པའི་མཉམ་གཞག་ཡེ་ཤེས་ལ་གནས་པའི་སེམས་དཔའ་ཡིན་པའི་ཕྱིར། ཁ་ཅིག །སྔར་ལྟར་སྨྲ་བ་དང་། ཐེག་ཆེན་མཐོང་ལམ་བར་ཆད་མེད་ལམ་པའི་རྒྱུད་ལ་ཀུན་རྫོབ་སེམས་བསྐྱེད་མེད་པར་འདོད་པ་འགལ་ཏེ། དེའི་རྒྱུད་ཀྱི་མཁྱེན་པ་ཡིན་ན་བར་ཆད་མེད་ལམ་ཡིན་དགོས་པར་ཐལ། དེའི་རྒྱུད་ལ་ཀུན་རྫོབ་སེམས་བསྐྱེད་མེད་པའི་ཕྱིར། འདོད་ན། སྟོང་ཉིད་ལ་རྩེ་གཅིག་ཏུ་མཉམ་པར་བཞག་བཞིན་པའི་བྱང་སེམས་སྦྱོར་ལམ་པའི་མཁྱེན་པ་ཡིན་ན། སྟོང་ཉིད་ལ་རྩེ་གཅིག་ཏུ་མཉམ་པར་བཞག་པའི་ཡེ་ཤེས་ཡིན་དགོས་པར་ཐལ། འདོད་པའི་ཕྱིར། འདོད་ན། སྟོང་ཉིད་ལ་རྩེ་གཅིག་ཏུ་མཉམ་པར་
བཞག་པའི་བྱང་སེམས་སྦྱོར་ལམ་པའི་རྒྱུད་ཀྱི་ལྷའི་སྤྱན་ཆོས་ཅན། དེར་ཐལ། དེའི་ཕྱིར། དེར་ཐལ། དེ་ཡོད་པའི་ཕྱིར། དེར་ཐལ། ཐེག་ཆེན་ཚོགས་ལམ་གྱི་གནས་སྐབས་སུ་དེ་མ་ཐོབ་ལ། ཐེག་ཆེན་གྱི་སྦྱོར་ལམ་དྲོད་ཐོབ་པ་དང་དུས་མཉམ་དུ་ལྷའི་སྤྱན་ཐོབ་པའི་གང་ཟག་ཡོད་པའི་ཕྱིར། དེར་ཐལ། ཁྱོད་ཀྱི་དམ་བཅའ་འཐད་པའི་ཕྱིར། ཡང་ཁ་ཅིག །ཤའི་སྤྱན་མིག་དབང་གཟུགས་ཅན་པ་ཡིན་པར་ཐལ། ལྷའི་སྤྱན་དེ་ཡིན་པའི་ཕྱིར། དེར་ཐལ། ལྷའི་མིག་དེ་ཡིན་པའི་ཕྱིར། རྣམ་བཤད་ལས། ཚེ་འདིར་བསམ་གཏན་བསྒོམས་པའི་མངོན་པར་འདུ་བྱེད་པ་ལས་བྱུང་བའི་ལྷའི་མིག་ནི། བསྐལ་བ་དང་མ་བསྐལ་བའི་གཟུགས་ཕྲ་རགས་ཐམས་ཅད་མཐོང་བ་བསྒོམས་པ་ལས་བྱུང་བའི་མཉམ་པར་བཞག་པའི་སས་བསྡུས་ཀྱི་གཟུགས་ཅན་དང་བ་ཡིན་ལ། མངོན་ཤེས་ནི་དེའི་བདག་རྐྱེན་ལ་བརྟེན་པ། ཆོས་གཉིས་དང་མཚུངས་པར་ལྡན་པའི་ཡིད་ཀྱི་ཤེས་པའོ། །ཞེས་གསུངས་པའི་ཕྱིར་ན་མ་ཁྱབ་སྟེ། ལྷའི་མིག་དབང་དེས། དེ་ལྟ་བུའི་གཟུགས་ཕྲ་རགས་མཐོང་བའི་མངོན་ཤེས་ཀྱི་བདག་རྐྱེན་བྱེད་པ་ལ་དགོངས་པའི་ཕྱིར། གཞན་ཡང་། དེ་མི་འཐད་པར་ཐལ། ཤའི་སྤྱན་ཡིད་ཤེས་ཡིན་པའི་ཕྱིར། དེར་ཐལ། ལྷའི་མིག་གི་མངོན་ཤེས་དེ་དེ་ཡིན་པའི་ཕྱིར། གཞན་ཡང་། བར་དུ་ཆོད་པའི་གཟུགས་མཐོང་བའི་སོ་སྐྱེའི་དབང་ཤེས་ཡོད་པར་ཐལ། སོ་སྐྱེའི་རྒྱུད་ཀྱི་ཤའི་སྤྱན་དེ་དབང་ཤེས་ཡིན་པའི་ཕྱིར། རྟགས་ཁས། འདོད་ན། རྣམ་འགྲེལ་ལས། བར་ཆོད་ལ་སོགས་ཡོད་ན་ཡང་། །དབང་སྐྱེས་བློ་ནི་སྐྱེ་བར་འགྱུར། །ཞེས་གསུངས་པ་མི་འཐད་པར་ཐལ་ལོ། །གཉིས་པ་རང་ལུགས་ནི། སྤྱན་ལྔ་པོ་གང་རུང་ཡང་ཡིན། རང་ཡུལ་དུ་གྱུར་པའི་སྟོང་གསུམ་ཚུན་ཆད་ཀྱི་གཟུགས་ཅི་རིགས་པ་མཐོང་བ་ཡང་ཡིན་པའི་གཞི་མཐུན་པར་གྱུར་པའི་ཡིད་བློ་དེ་ཤའི་སྤྱན་གྱི་
མཚན་ཉིད། དེ་ཡང་ཡིན་རང་ཡུལ་དུ་གྱུར་པའི་སེམས་ཅན་འཆི་འཕོ་བ་དང་སྐྱེ་བ་ཅི་རིགས་མཐོང་བ་ཡང་ཡིན་པའི་གཞི་མཐུན་པར་གྱུར་པའི་ཡིད་བློ་དེ་ལྷའི་སྤྱན་གྱི་མཚན་ཉིད། དེ་ཡང་ཡིན། རང་ཡུལ་དུ་གྱུར་པའི་བདག་མེད་ཕྲ་རགས་གང་རུང་མངོན་སུམ་དུ་རྟོགས་པ་ཡང་ཡིན་པའི་གཞི་མཐུན་པར་གྱུར་པའི་ཡིད་བློ་ཤེས་རབ་ཀྱི་སྤྱན་གྱི་མཚན་ཉིད། དེ་ཡང་ཡིན། རང་ཡུལ་དུ་གྱུར་པའི་འཕགས་པའི་གང་ཟག་གི་དབང་པོའི་རིམ་པ་མངོན་སུམ་དུ་རྟོགས་པ་ཡང་ཡིན་པའི་གཞི་མཐུན་པར་གྱུར་པའི་འཕགས་པའི་མཁྱེན་པ་ཆོས་ཀྱི་སྤྱན་གྱི་མཚན་ཉིད། དེ་ཡང་ཡིན། ཆོས་ཐམས་ཅད་མངོན་སུམ་དུ་རྟོགས་པ་མཐར་ཕྱིན་པ་ཡང་ཡིན་པའི་གཞི་མཐུན་པར་གྱུར་པའི་ཡེ་ཤེས་དེ་སངས་རྒྱས་ཀྱི་སྤྱན་གྱི་མཚན་ཉིད། གསུམ་པ་རྩོད་པ་སྤོང་བ་ལ། ཁོ་ན་རེ། མིག་གིས་གཟུགས་མཐོང་བར་ཐལ། དེས་གཟུགས་ལ་བལྟ་བའི་ཕྱིར། དེར་ཐལ། ཤེས་རབ་སྒྲོན་མེ་ལས། མིག་ཆོས་ཅན། དོན་དམ་པར་གཟུགས་ལ་མི་བལྟ་སྟེ། དབང་པོ་ཡིན་པའི་ཕྱིར། དཔེར་ན་རྣ་བའི་དབང་པོ་བཞིན། ཞེས་པའི་རྟགས་སྦྱོར་འགོད་པ་ན། དོན་དམ་པར་ཞེས་པའི་ཚིག་སྦྱར་བ་ལ་དགོས་པ་ཡོད་པའི་ཕྱིར་ན། མ་ཁྱབ་སྟེ། དངོས་བསྟན་ལ་དེ་ཙམ་ལས་མེད་ན་ཡང་། དོན་དུ་མིག་གི་རྣམ་ཤེས་ཆོས་ཅན་དུ་བཟུང་ནས། རྟགས་སྦྱོར་འགོད་པར་བཞེད་པའི་ཕྱིར། ཡང་ཁོ་ན་རེ། ལྷའི་མིག་ཡིན་ན། དེའི་སྤྱན་ཡིན་པས་མ་ཁྱབ་པར་ཐལ། འདོད་ལྷའི་སྐྱེས་བུ་རེ་རེ་བའི་མིག་གི་དབང་པོ་གཟུགས་ཅན་པ་ལྷའི་མིག་ཡིན་པའི་ཕྱིར། དེར་ཐལ། འདོད་ལྷའི་སྐྱེས་བུའི་མིག་ཡིན་པའི་ཕྱིར་ན་མ་ཁྱབ། འདོད་ན། དེ་ལྷའི་སྤྱན་ཡིན་པར་ཐལ། དེ་འདོད་ལྷའི་སྐྱེས་བུའི་སྤྱན་ཡིན་པའི་ཕྱིར། ཁྱབ་པ་ཁས། དེར་ཐལ། དེའི་སྤྱན་ཡོད་པའི་ཕྱིར། ཡང་ཁོ་ན་
རེ། ཐེག་ཆེན་གྱི་མཐོང་ལམ་བར་ཆད་མེད་ལམ་ཆོས་ཅན། མཚན་ཉིད་དེར་ཐལ། ཆོས་ཀྱི་སྤྱན་ཡིན་པའི་ཕྱིར། དེར་ཐལ། ཆོས་ཀྱི་མིག་ཡིན་པའི་ཕྱིར། དེར་ཐལ། མདོ་ལས། འདོད་པ་དང་གཟུགས་ཀྱི་ལྷའི་བུ་བྱེ་བ་ཕྲག་དུ་མ་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་པ་ཐོབ་བོ། །ཞེས་གསུངས་པའི་ཆོས་ཀྱི་མིག་དེ་མཐོང་ལམ་ལ་བྱེད་རིགས་པའི་ཕྱིར་ཟེར་ན་ཡང་མ་ཁྱབ་བོ། །འདི་ལྟར་འཆད་པར་བྱེད་མོད། གསེར་ཕྲེང་དང་སྙིང་པོ་རྒྱན་གཉིས་ཀར་ལྷའི་མིག་གཟུགས་ཅན་དང་བར་བཤད་པ་ལ་བསྙོན་པར་མི་ནུས་སོ། །