གྲིབ་བསང་ཤེལ་གྱི་མེ་ལོང་།
༄༅༔ ༔དམ་ཆོས་བདེ་ཆེན་ལམ་མཆོག་ལས༔ གྲིབ་བསང་ཤེལ་གྱི་མེ་ལོང་བཞུགས༔ རྃ་ཡྃ་ཁྃ༔ ཀྱེ༔ ཡེ་གཞི་འཁོར་འདས་དབྱེར་མེད་ཀྱང་༔ རླུང་རིག་གཡོ་བའི་རང་རྩལ་སེམས༔ རང་གིས་མ་ཤེས་ལྷན་སྐྱེས་གྲིབ༔ ངོ་བོ་ཀ་ནས་དག་པས་བསང༔ ང་མེད་ང་རུ་བཟུང་བ་ལས༔ ཡུལ་དང་ཡུལ་ཅན་འཁྲུལ་སྣང་ཤར༔ ཀུན་བརྟགས་གཉིས་འཛིན་ལོག་རྟོག་གྲིབ༔ ལྷུན་གྲུབ་རང་ངོ་ཤེས་པས་བསང་༔ སྐྱེ་མེད་མདངས་ལས་འགག་མེད་རྩལ༔ རང་བྱུང་འོད་ལྔར་གཟུང་འཛིན་སྐྱོན༔ འཁོར་བ་ཐོག་མར་བཀོད་པའི་གྲིབ༔ ཡེ་ཤེས་ལྔ་ཡི་རྩལ་གྱིས་བསང་། འཁྲུལ་རྟོག་ལུགས་འབྱུང་འཐས་པའི་མཐུས༔ གཟུགས་མེད་གཟུགས་དང་འདོད་ཁམས་སོགས༔ རིམ་བཞིན་འཁྲུལ་བའི་བག་ཆགས་གྲིབ༔ རང་བྱུང་རིག་པའི་རྩལ་གྱིས་བསང་༔ ཉོན་མོངས་དུག་ལྔའི་རྒྱུ་རྐྱེན་ལས༔ འགྲོ་བ་རིགས་དྲུག་མངོན་རྟོགས་གཟུགསཿ སྡུག་བསྔལ་ཕུང་པོ་སྤུང་བའི་གྲིབཿ རྟེན་འབྲེལ་ལུགས་ལྡོག་མཐུ་ཡིས་བསང་ཿ བེམ་པོའི་རྟེན་ལ་སེམས་བརྟེན་ཞིང་༔ རང་དང་གཞན་གྱི་ཟླས་ཕྱེ་བའི༔ གྲིབ་དང་མི་གཙང་གཟུང་འཛིན་སྐྱོནཿ སྒྱུ་མའི་འཁྲུལ་འཁོར་ཞིག་བཞིན་བསང་༔ གཟུང་འཛིན་འཐས་པའི་རང་སྐྱོན་གྱིས༔ རང་གྲིབ་ཤ་ཟར་འཁྲུལ་བཞིན་དུ༔ རང་རང་རྣམ་རྟོག་དགྲར་ལངས་པའི༔ གྲིབ་རྣམས་རང་བཞིན་མེད་པར་བསང་༔ གཙང་དམེའི་གཟུང་འཛིན་སེམས་ཀྱིས་བྱས༔ དེ་ཉིད་བྱུང་གནས་འགྲོ་གསུམ་དང་༔ བྲལ་ཡང་ཐབས་མཁས་རྟེན་འབྲེལ་གྱིས༔ བསང་བྱ་བསང་གིས་དག་གྱུར་ཅིགཿ བཟང་ངན་གཙང་བཙོག་གཉིས་འཛིན་གྲིབ༔ གཉིས་མེད་ངང་དུ་བསང་ཞིང་སྦྱང་༔ གཅིག་དང་དུ་བྲལ་རིག་པའི་གཤིས༔ གཉིས་འཛིན་སྦུབས་ལས་གྲོལ་གྱུར་ཅིག༔ བསང་བྱཿ བསང་བྱེད་བསང་འབྲས་ཀུན༔ སྣང་ལ་རང་བཞིན་མ་གྲུབ་པས༔ རྟག་ཆད་བྲལ་བའི་དབྱིངས་སུ་འུབ༔ འགྲོ་རྣམས་བྱང་ཆུབ་རྒྱུར་བསྔོའོ༔ གྲིབ་དང་མི་གཙང་མཁའ་དབྱིངས་སུ༔ སྤྲིན་ཕུང་འདུས་པ་འཐོར་རླུང་གིས༔ བསྐྲད་བཞིན་བྱེར་ནས་དགའ་བདེ་ཡི༔ འོད་བརྒྱ་འབར་བའི་བཀྲ་ཤིས་ཤོག༔ ཅེས་ལག་ན་རྡོ་རྗེས་གདམས་པ་དགེ་བར་གྱུར་ཅིག༔ སརྦ་མངྒ་ལཾ༔ དགེའོ༔