ཡུལ་ཅན་བློའི་རྣམ་བཞག་དང༌།

ཡུལ་ཅན་བློའི་རྣམ་བཞག་དང༌།

ཡུལ་གྱི་རྣམ་བཞག་གི་སྐོར་གཉིས། ཡུལ་ཅན་བློའི་རྣམ་བཞག་དང༌། ཡུལ་གྱི་རྣམ་བཞག་གི་སྐོར་གཉིས། དང་པོ་ལ། མཚན་ཉིད་དང་དབྱེ་བ་བཤད་པའི་མཐའ་དཔྱད་པ་གཉིས། དང་པོ་མཚན་ཉིད་བཤད་པའིསྐབས་ཀྱི་མཐའ་དཔྱད་པ་ནི། བློ་རིག་ལས། རང་རིག་ཆོས་ཅན། རང་ཡུལ་གྱི་རྣམ་པ་མ་ཤར་བར་ཐལ། ཡུལ་ཡུལ་ཅན་གྱི་གཉིས་སྣང་ནུབ་པའི་བློ་ཡིན་པའི་ཕྱིར་ན་མ་ཁྱབ། ཅེསགསུངས་པ་ལ། རང་རིག་ཆོས་ཅན། རང་ཡུལ་གྱི་རྣམ་པ་མ་ཤར་བར་ཐལ། རང་ཡུལ་གྱི་རྣམ་པ་དེ་རང་དང་གཅིག་ཏུ་མ་ཤར་བ་གང་ཞིག ཐ་དད་དུ་མ་ཤར་བའི་ཕྱིར། དང་པོ་མ་གྲུབ་ན། རང་རིག་ཡིན་ན་རང་ཡུལ་གྱི་རྣམ་པ་དེ་རང་དང་གཅིག་ཏུ་ཤར་བས་ཁྱབ་པར་ཐལ། འདོད་པའི་ཕྱིར། འདོད་ན། ཀུན་རྫོབ་གསར་བྱུང་གི་རྣམ་མཁྱེན་ཉམས་སུ་མྱོང་བའི་རང་རིག་ཆོས་ཅན། དེར་ཐལ། དེའི་ཕྱིར། འདོད་ན། དེ་ཆོས་ཅན། སྣང་ཚུལ་ལ་འཁྲུལ་བར་ཐལ། སྣང་གནས་མི་མཐུན་པའི་ཤེས་པ་ཡིན་པའི་ཕྱིར་ཏེ། དེའི་སྣང་ཡུལ་ཀུན་རྫོབ་གསརབྱུང་གི་རྣམ་མཁྱེན་དེ་དེ་དང་གཅིག་མ་ཡིན་པ་གང་ཞིག དེ་རང་དང་གཅིག་ཏུ་སྣང་བའི་ཕྱིར། རྟགས་དང་པོ་སླ། གཉིས་པ་ཁས། གོང་དུ་འདོད་མི་ནུས་ཏེ། སངས་རྒྱས་ས་ན་འཁྲུལ་བ་མི་མངའ་བའི་ཕྱིར་ཏེ། དབུ་མ་སྒོམ་རིམ་ལས། འཕགས་པས་འཁྲུལ་བ་མ་གཟིགས་ཕྱིར། །ཞེས་གསུངས་སོ། །ཡང་དེ་ཆོས་ཅན། འཁྲུལ་བར་ཐལ། དོན་ལ་མེད་པའི་ཀུན་རྫོབ་ཁམས་གསུམ་པ་སྣང་བའི་ཕྱིར། ཁྱབ་སྟེ། བདེན་གཉིས་གསལ་བའི་ཉི་མ་ལས། འཁྲུལ་བ་སྣང་བར་ཐལ། དོན་ལ་མེད་པའི་ཀུན་རྫོབ་ཁམས་གསུམ་པ་སྣང་བའི་བློ་ཡིན་པའི་ཕྱིར། ཁྱབ་པ་ཡོད་དེ། ཞེས་དང༌། ཡང་དེ་ཉིད་ལས། སངས་རྒྱས་ཀྱི་ཡེ་ཤེས་ཆོས་ཅན། ཕྱིན་ཅི་ལོག་ཏུ་ཐལ། ཀུན་རྫོབ་ཁམས་གསུམ་པ་སྣང་བའི་ཕྱིར། ཁྱབ་པ་ཡོད་དེ། ཞེས་དང༌། ཡང་དེ་ལས། རྣམ་མཁྱེན་ཆོས་ཅན། རྣམ་པར་མི་རྟོག་པའི་ཡེ་ཤེས་མིན་པར་ཐལ། ཀུན་རྫོབ་ཁམས་གསུམ་སྣང་བའི་ཕྱིར། ཁྱབ་པ་ཡོད་དེ། ཞེས་དང༌། ཡང་དེ་ལས། རྣམ་མཁྱེན་ཆོས་ཅན། འཁྲུལ་བ་གཟིགས་པར་ཐལ། རྣམ་རྟོག་དང་མ་བྲལ་བར་ཐལ། མ་རིག་བག་ཆགས་མ་བཅོམ་པར་ཐལ། མ་དག་པའི་མུན་པ་ཡོད་པར་ཐལ། ཀུན་རྫོབ་ཁམས་གསུམ་སྣང་བའི་ཕྱིར། ཞེས་གསུངས་པའི་ཕྱིར། གོང་དུ་རྣམ་མཁྱེན་མྱོང་བའི་རང་རིག་ལ་རྣམ་མཁྱེན་དེ་རང་དང་ཐ་དད་པའི་ཚུལ་གྱིས་ཤར་ཟེར་ན། འོ་ན་དེ་ཆོས་ཅན། ཁྱོད་ལ་ཡུལ་ཡུལ་ཅན་གྱི་གཉིས་སྣང་ཡོད་པར་ཐལ། རང་ཡུལ་རྣམ་མཁྱེན་དེ་རང་དང་ཐ་དད་པའི་ཚུལ་དུ་སྣང་བའི་ཕྱིར། རྟགས་ཁས། འདོད་མི་ནུས་ཏེ། དབུ་མ་རྒྱན་ལས། དེ་ཡི་རང་གི་རིག་པ་ནི། །བྱ་དང་བྱེད་པའི་དངོས་པོ་མིན། །ཞེས་གསུངས་པའི་ཕྱིར། འདོད་ན། དེ་འདྲའི་རང་རིག་ཆོས་ཅན། རང་ཡུལ་སྣང་བ་མ་ཡིན་པར་ཐལ། བློས་ཡུལ་དེ་སྣང་ཚུལ་ལ་གཅིག་དང་ཐ་དད་གང་རུང་ལས་མེད་པ་གང་ཞིག དེ་གང་གི་ཚུལ་གྱིས་མ་སྣང་བའི་ཕྱིར། རྟགས་དང་པོ་ཚད་གྲུབ། ཕྱི་མ་ཁས། འདོད་མི་རིགས་ཏེ། རང་ཡུལ་སྣང་བའི་རིག་པ་བློའི་མཚན་ཉིད་ཡིན་པའི་ཕྱིར་ཏེ། བསྡུས་གྲྭའི་སྤྱི་དོན་༢༧༣ལས། རང་ཡུལ་སྣང་བའི་རིག་པ་བློའི་མཚན་ཉིད། ཅེས་གསུངས་པའི་ཕྱིར། འདོད་ན། རང་རིག་ཡིན་ན་རང་ཡུལ་སྣང་བས་ཁྱབ་པར་ཐལ། དེ་ཡིན་ན་བློ་ཡིན་པས་ཁྱབ་པའི་ཕྱིར། ཁྱབ་པ་ཁས། འདོད་ན་སྔོ་འཛིན་མིག་ཤེས་ཉམས་སུ་མྱོང་བའི་རང་རིག་ཆོས་ཅན། དེར་ཐལ། དེའི་ཕྱིར། འདོད་ན། དེ་ཆོས་ཅན། རང་ཡུལ་གྱི་རྣམ་པ་སྣང་བར་ཐལ། རང་ཡུལ་སྣང་བའི་ཕྱིར། མ་ཁྱབ་ཟེར་ན། དེ་ཆོས་ཅན། རང་ཡུལ་གྱི་རྣམ་པ་སྣང་བར་ཐལ། རང་ཡུལ་གྱི་རྣམ་པ་ཤར་བའི་སྒོ་ནས་རྟོགས་པའི་ཕྱིར། མ་གྲུབ་ན། དེར་ཐལ། རང་ཡུལ་དངོས་སུ་རྟོགས་པའི་ཕྱིར། ཁྱབ་སྟེ། བློ་དེ་ལ་ཡུལ་དེའི་རྣམ་པ་ཤར་བའི་སྒོ་ནས་རྟོགས་པ་དེ་བློ་དེས་ཡུལ་དེ་དངོས་སུ་རྟོགས་པའི་དོན་ཡིན་པའི་ཕྱིར་ཏེ། བསྡུས་གྲྭའི་སྤྱི་དོན་༤༦༣ལས། བློ་དེ་ལ་ཡུལ་དེའི་རྣམ་པ་ཤར་བའི་སྒོ་ནས་རྟོགས་པ་དེ། བློ་དེས་ཡུལ་དེ་དངོས་སུ་རྟོགས་པའི་མཚན་ཉིད། ཅེས་གསུངས་པའི་ཕྱིར། འདོད་ན། སྔོ་འཛིན་མིག་ཤེས་ཉམས་སུ་མྱོང་བའི་རང་རིག་ཆོས་ཅན། རང་ཡུལ་གྱི་རྣམ་པ་སྣང་བར་ཐལ། རང་ཡུལ་གྱི་རྣམ་པ་ཤར་བའི་སྒོ་ནས་རྟོགས་པའི་ཕྱིར། རྟགས་ཁྱབ་ཁས། འདོད་མི་ནུས་ཏེ། རང་རིག་ལ་ཡུལ་དེའི་རྣམ་པ་ཤར་ཡང་ཡུལ་གྱི་རྣམ་པ་མི་འཆར་བའི་ཞིབ་ཆ་འབྱེད་དགོས་པའི་ཕྱིར་ཏེ། བསྡུས་གྲྭའི་སྤྱི་དོན་༤༦༤ལས། རང་རིག་ལ་ཡུལ་དེའི་རྣམ་པ་ཤར་བ་ཡོད་ཀྱང་ཡུལ་གྱི་རྣམ་པ་ཤར་བ་མེད་དོ། །ཞེས་ས་པའི་ཕྱིར། འདོད་མི་ནུས་ཏེ། རང་རིག་ལ་རང་ཡུལ་གྱི་རྣམ་པ་ཤར་བ་ཡོད་པའི་ཕྱིར་ཏེ། ཡུལ་གཟུང་རྣམ་ཤར་བ་གང་ཞིག གཟུང་རྣམ་དེ་བློ་དེ་ཡུལ་གྱི་རྣམ་ལྡན་དུ་སྐྱེས་པའི་འདྲ་རྣམ་ལ་བྱེད་དགོས་པའི་ཕྱིར། རྟགས་དང་པོ་གྲུབ་སྟེ། བསྡུས་གྲྭའི་སྤྱི་དོན་༤༦༤ལས།རང་རིག་ལ་ཡུལ་གཟུང་རྣམ་དེའི་རྣམ་པ་ཤར་བ་ཡིན་པའི་དོན་གྱིས་རང་རིག་ལ་ཡུལ་དེའི་རྣམ་པ་ཤར་བ་ཡིན། ཞེས་གསུངས་པའི་ཕྱིར། རྟགས་ཕྱི་མ་གྲུབ་སྟེ། བསྡུས་གྲྭའི་སྤྱི་དོན་༤༦༣ལས། དེ་ཡང་དེའི་རྣམ་པ་ཤར་ཞེས་པ་ནི་དཔེར་ན་ཡུལ་བུམ་པའི་རྣམ་པ་ནི་བུམ་འཛིན་ཤེས་པ་དེ་བུམ་པའི་རྣམ་པ་རུ་སྐྱེས་པ་དེ་ཡིནཔས་བུམ་འཛིན་ཤེས་པའི་གཟུང་རྣམ་དེ་ཡིན་ནོ། །ཞེས་གསུངས་པའི་ཕྱིར། འདོད་མི་ནུས་ཏེ། རང་ཡུལ་སྣང་ཡང་རང་ཡུལ་གྱི་རྣམ་པ་མ་སྣང་བའི་ཞིབ་ཆ་འབྱེད་དགོས་པའི་ཕྱིར་ཏེ། བསྡུས་གྲྭའི་སྤྱི་དོན་༢༥༤ལས། རང་ཡུལ་ཤར་ཡང་རང་ཡུལ་གྱི་རྣམ་པ་ཤར་མི་དགོས་པའི་ཕྱིར་རོ། །ཞེས་གསུངས་པའི་ཕྱིར། ཡང་བསྡུས་གྲྭའི་སྤྱི་དོན་༣༤༠ལས། འོ་ན་རང་རིག་ལ་རང་ཡུལ་གྱི་རྣམ་པ་ཤར་བར་ཐལ། རང་ཡུལ་སྣང་བའི་ཕྱིར་ཞེ་ན། མ་ཁྱབ་སྟེ། རང་ཡུལ་ཤར་ཡང་རང་ཡུལ་གྱི་རྣམ་པ་ཤར་མི་དགོས་པའི་ཕྱིར་རོ། །རང་ཡུལ་གྱི་རྣམ་པ་ནི་འདྲ་རྣམ་སྟེ་ཡུལ་གྱི་རྣམ་ལྡན་དུ་སྐྱེས་པ་ལ་བྱེད་པ་ཡིན་པས་རང་རིག་ནི་རིག་བྱ་རིག་བྱེད་གཉིས་མེད་པ་ཡིན་པས་ཡུལ་གཞན་གྱི་རྣམ་ལྡན་སྐྱེ་བ་མེད་དོ། །ཞེས་འདྲ་རྣམ་མ་ཤར་གསུངས་པ་ལ་འདྲ་རྣམ་གཞན་རིག་གི་ཤེས་པ་ཡིན་ན་དེ་ཉམས་སུ་མྱོང་བའི་རང་རིག་གིས་མྱོང་མིན་སོགས་ཀྱིས་དཔྱད་དོ། །བློ་རིག་ལས། གཉིས་པ་རང་ལུགས་བཞག་པ་ལ། རང་ཡུལ་སྣང་བའི་རིག་པ་དེ། བློའི་མཚན་ཉིད། ཅེས་དང༌། རྣམ་འགྲེལ་ལས། དེ་ལྟར་བློ་ལ་བློ་འདོད་ན། །བློ་ནི་རང་ཉིད་རིགཔར་གྲུབ། །ཅེས་དང༌། རིན་ཕྲེང་༣༦༤ལས། ཚུལ་དེ་བློ་ཕྱི་མ་ལ་སྔ་བློའི་རྣམ་པར་སྣང་བརའདོད་ན་དེ་ཡི་ཕྱིར། རང་ཉིད་རིག་པར་གྲུབ་པར་ཐལ་ལོ། །ཞེས་གསུངས་པ་ལ་རང་ཡུལ་སྣངབའི་རིག་པ་དེ། བློའི་མཚན་ཉིད་མ་ཡིན་པར་ཐལ། རིག་པ་བློའི་མཚན་ཉིད་ཡིན་པའི་ཕྱིར་ཏེ། བསྡུས་གྲྭའི་སྤྱི་དོན་༢༧༣ལས། བློ་དང་ཤེས་པ་གཉིས་མཚོན་བྱ་དང༌། རིག་པ་དང་གསལ་བ་གཉིས་ནི་རིམ་བཞིན་སྔ་མ་གཉིས་ཀྱི་མཚན་ཉིད་ཡིན་ནོ། །ཞེས་གསུངས་པའི་ཕྱིར། འདོད་ན། རིག་པ་ཆོས་ཅན། མཚན་མཚོན་གཉིས་ཀ་ཡིན་པར་ཐལ། མཚན་ཉིད་ཡིན་པ་གང་ཞིག མཚོན་བྱ་ཡིན་པའི་ཕྱིར། རྟགས་མ་གྲུབ་ཟེར་ན། རྟགས་གྲུབ་པར་ཐལ། རྟགས་དང་པོ་གྲུབ་པ་གང་ཞིག ཕྱི་མ་གྲུབ་པའི་ཕྱིར། རྟགས་དང་པོ་ཁས་བླངས་ཤིང་ཕྱི་མ་གྲུབ་སྟེ། མྱོང་བར་སྐྱེས་པ་དེ་རིག་པའི་མཚན་ཉིད་ཡིན་པའི་ཕྱིར་ཏེ། གཏན་ཚིགས་དོན་བསྡུས་ལས། དང་པོ་ལ་བེམ་རིག་གཉིས་སོ། །མཚན་ཉིད་རིམ་པ་ལྟར་རྡུལ་དུ་གྲུབ་པ་དང༌། མྱོང་བར་སྐྱེས་པའོ། །ཞེས་གསུངས་པའི་ཕྱིར། འདོད་ན། རིག་པ་ཆོས་ཅན། མཚན་མཚོན་གཉིས་ཀ་ཡིན་པར་ཐལ། མཚན་ཉིད་ཡིན་པ་གང་ཞིག མཚོན་བྱ་ཡིན་པའི་ཕྱིར། རྟགས་རེ་རེ་ནས་ཁས། འདོད་མི་ནུས་ཏེ། མཚན་མཚོན་གཉིས་འགལ་བ་ཡིན་པའི་ཕྱིར། དེར་ཐལ། མཚན་ཉིད་ཡིན་པ་ལ་མཚོན་བྱ་གཏན་མ་ཡིན་ཞིང་མཚན་ཉིད་ཁོ་ན་ཡིན་པ་ཞིག་དགོས་པའི་ཕྱིར་ཏེ། བསྡུས་གྲྭའི་སྤྱི་དོན་༡༥ལས། བློ་ཡུལ་དུ་བྱ་རུང་ཆོས་ཅན། སྤྱིར་མཚན་ཉིད་ཡིན་ཏེ། སྤྱིར་ཞེས་པ་ཁྱོད་མཚོན་བྱ་གཏན་མ་ཡིན་ཞིང་མཚན་ཉིད་ཁོ་ན་ཡིན་ཞེས་པ་ཡིན་ལ། ཞེས་དང༌། ཡང་དེ་ཉིད་༡༦ལས། མཚན་ཉིད་དང་མཚོན་བྱ་གཉིས་འགལ་བ་ཡིན་ཏེ། ཞེས་གསུངས་པའི་ཕྱིར། ཟེར་ན་དཔྱད། ཡང་བློ་ཆོས་ཅན། མཚན་ཉིད་གཉིས་ཀྱི་མཚོན་བྱ་ཡིན་པར་ཐལ། རང་ཡུལ་སྣང་བའི་རིག་དང་རིག་པ་གཉིས་ཀ་ཁྱོད་ཀྱི་མཚན་ཉིད་ཡིན་པའི་ཕྱིར། རྟགས་ཁས། འདོད་མི་རིགས་ཏེ། མཚན་ཉིད་གཉིས་ཀྱིས་མཚོན་ན་མཚོན་བྱ་དེ་ཡང་གཉིས་སུ་འགྱུར་བའི་ཕྱིར་ཏེ། རིགས་གཏེར་ལས། མཚན་ཉིད་གཉིས་ཀྱིས་མཚོན་ན་ནི། །མཚོན་བྱ་དེ་ཡང་གཉིས་སུ་འགྱུར། །ཞེས་དང༌། བསྡུས་གྲྭའི་སྤྱི་དོན་༡༨ལས། མཚོན་བྱ་ཡིན་ན་མཚན་ཉིད་གཅིག་གི་མཚོན་བྱ་ལས་མ་ཡིན་པས་ཁྱབ། མཚན་ཉིད་ཡིན་ན་མཚོན་བྱ་གཅིག་གི་མཚན་ཉིད་ལས་མ་ཡིན་པས་ཁྱབ་བོ། །ཞེས་གསུངས་པའི་ཕྱིར། འདོད་མི་ནུས་ཏེ། མཚོན་བྱ་ཚད་མ་གཅིག་པུ་ལ་རིགས་པའི་དབང་ཕྱུག་ཆོས་ཀྱི་གྲགས་པས་མཚན་ཉིད་གཉིས་གསུངས་པའི་ཕྱིར། དེར་ཐལ། ཀུན་བཏུས་ས་འགྲེལ་༤༢ལས། རིགས་པའི་དབང་ཕྱུག་ཉིད་ཀྱིས་མཚོན་བྱ་དང་ཚད་མ་གཅིག་ལ་མཚན་ཉིད་མི་བསླུ་བའི་ཤེས་པ་དང་མ་རྟོགས་དོན་གྱི་གསལ་བྱེད་གཉིས་གསུངས་པའིཕྱིར་དང༌། ཞེས་གསུངས་པའི་ཕྱིར་རོ། །ཡང་བློ་དེས་ཡུལ་དེ་རིག་པའི་དོན་བློ་དེས་ཡུལ་དེ་སྣང་བ་ལ་བྱེད་ཟེར་ན། སྒྲ་མི་རྟག་པ་རྟོགས་པའི་རྗེས་དཔག་ཚད་མ་ཆོས་ཅན། སྒྲ་རྟག་སྟོང་མ་རིག་པར་ཐལ། སྒྲ་རྟག་སྟོང་མི་སྣང་བའི་ཕྱིར། ཡང་ཀུན་རྫོབ་གསར་བྱུང་གི་རྣམ་མཁྱེན་ཆོས་ཅན། ཆོས་ཐམས་ཅད་རིག་པ་མ་ཡིན་པར་ཐལ། ཆོས་ཐམས་ཅད་མི་སྣང་བའི་ཕྱིར། དེར་ཐལ། ཀུན་རྫོབ་ཀྱི་ཆོས་མི་སྣང་བའི་ཕྱིར། དེར་ཐལ། ཆོས་ཉིད་སྣང་བའི་ཕྱིར། ཁྱབ་སྟེ། ཆོས་ཉིད་རྣམ་འབྱེད་ལས། དེ་སྣང་ཆོས་ཉིད་མི་སྣང་ཞིང༌། །དེ་མི་སྣང་བའི་ཆོས་ཉིད་སྣང༌། །ཞེས་གསུངས་པའི་ཕྱིར། ཡུལ་རིག་པའི་དོན་རྟོགས་པ་ལ་བྱེད་ཟེར་ན། སྒྲ་རྟག་འཛིན་རྟོག་པ་ཆོས་ཅན། རིག་པ་མ་ཡིན་པར་ཐལ། ཡུལ་གང་ཡང་མ་རྟོགས་པའི་ཕྱིར། རིག་པའི་དོན་ཡུལ་སྣང་པ་དང་རྟོགས་པ་གང་རུང་ལ་བྱེད་ཟེར་ན། སྐྱེས་བུ་ཆོས་ཅན། རིག་པ་ཡིན་པར་ཐལ། ཡུལ་སྣང་པ་དང་རྟོགས་པ་གང་རུང་ཡིན་པའི་ཕྱིར་ཟེར་ན་དཔྱད། བློ་རིག་ལས། གསལ་བའི་བེམ་མིན་དེ། རང་ཤེས་པ་ཡིན་པའི་མཚན་ཉིད་ཅེས་དང༌། རྣམ་འགྲེལ་ལས། དེའི་ཕྱིར་ངེད་ཀྱི་བློ་རང་ཉིད། །གསལ་བའི་ངོ་བོ་རབ་གསལ་ཞིང༌། །ཞེས་དང༌། རིན་ཕྲེང་༣༦༥ལས། ངེད་ཀྱི་ལུགས་ལ་བློ་ཆོས་ཅན། རང་ཉིད་རབ་ཏུ་གསལབ་ཡིན་ཏེ། གསལ་བའི་ངོ་བོ་སྟེ་རིག་པ་ཡིན་པས་སོ། །ཞེས་གསུངས་པའི་གསལ་བ་དེ་རང་གི་ངོ་བོ་གསལ་བ་ལ་བྱེད་པ་མ་ཡིན་པ་གང་ཞིག ཡུལ་གསལ་བ་ལ་བྱེད་པ་མ་ཡིན་པའི་ཕྱིར་ཟེར་ན། དེ་ཡང་བསྡུས་གྲྭའི་སྤྱི་དོན་༢༠༦ལས། གསལ་བ་ཞེས་པ་ནི་གྲོགས་ལ་མ་ལྟོས་པར་རང་གི་ངོ་བོ་ཡུལ་གསལ་བའི་རང་བཞིན་ཅན་ཡིན་པ་གང་ཞིག་ཅེས་དང༌། ཡངན་བསྡུས་གྲྭའི་སྤྱི་དོན་༢༧༣ལས། རང་ཡུལ་གསལ་བའི་བེམ་མིན་ཤེས་པའི་མཚན་ཉིད་ཅེས་གསུངས་པའི་ཕྱིར། འདོད་ན། རྟོག་བཅས་ཀྱི་ཤེས་པ་ཆོས་ཅན། རང་ཡུལ་གསལ་བའི་བེམ་མིན་ཡིན་པར་ཐལ། ཤེས་པ་ཡིན་པའི་ཕྱིར། འདོད་ན། དེ་ཆོས་ཅན། རང་ཡུལ་གསལ་བར་སྣང་བ་ཡིན་པར་ཐལ། རང་ལ་རང་ཡུལ་གསལ་ཚུལ་ཡོད་པའི་ཕྱིར། འདོད་ན། དེ་ཆོས་ཅན། རྟོག་མེད་ཤེས་པ་ཡིན་པར་ཐལ། རང་ཡུལ་གསལ་བར་སྣང་བའི་ཤེས་པ་ཡིན་པའི་ཕྱིར། ཁྱབ་སྟེ། རྣམ་འགྲེལ་ལས། གསལ་བར་སྣང་བ་ཅན་བློ་གང༌། །དེ་ནི་དེ་ལ་རྟོག་མེད་འདོད། །ཅེས་གསུངས་པའི་ཕྱིར་ཟེར་ན་ཡུལ་གསལ་ཚུལ་དེ་གཉིས་མི་འདྲཟེར་དགོས་སམ་དཔྱད། ཡང་གསལ་བའི་བེམ་མིན་ཆོས་ཅན། ཁྱོད་ཤེས་པའི་མཚན་ཉིད་མ་ཡིན་པར་ཐལ། ཤེས་པ་སྒྲུབ་པ་ཡིན་པ་གང་ཞིག ཁྱོད་དགག་པ་ཡིན་པའི་ཕྱིར། ཁྱབ་སྟེ། ཆོས་དེ་གཉིས་མཚན་མཚོན་ཡིན་ན། ཆོས་དེ་གཉིས་དགག་སྒྲུབ་ཀྱི་རྣམ་པ་མཚུངས་དགོས་པའི་ཕྱིར་ཏེ། མིང་དོན་གྱི་འབྲེལ་བ་ངེས་པའི་རྟོག་པ་གཅིག་གི་ངོར་དེ་གཉིས་ཀྱི་རྣམ་པ་འཆར་ཚུལ་མཚུངསདགོས་པས། དགག་རྟོག་དང་སྒྲུབ་རྟོག་མི་འགལ་བར་ཐལ་བའི་སྐྱོན་ཡོད་པའི་ཕྱིར། དཔེརན། ལྟོ་ལྡིར་ཞབས་ཞུམ་ཆུ་སྐྱོར་གྱི་དོན་བྱེད་ནུས་པ་རྟོག་ངོར་ཤར་བ་ན། དེ་ལ་བུམ་པའོ་སྙམ་པའི་མིང་དོན་སྦྱོར་བའི་ངེས་ཤེས་ལྷག་པོ་དྲངས་པ་ཙམ་གྱིས་བུམ་པའི་ཐ་སྙད་རྟོགས་ཚུལ་རྫོགས་ཤིང༌། བུམ་པའི་རྣམ་པ་ཟུར་བ་འཆར་རྒྱུ་མེད་པ་གང་ཞིག དེ་དང་མཚུངསཔའི་ཕྱིར། དེ་ལྟར་མིན་ན། སྐྱེས་པ་མི་རྟག་པའི་མཚན་ཉིད་དུ་ཁས་བླངས་པ་ལ། གནོད་བྱེད་གང་ཡང་མེད་པར་འགྱུར་མིན་དཔྱད། བློ་རིག་ལས། ཁ་ཅིག་གིས། ཚད་མིན་གྱི་བློ་ལ་བཅད་ཤེས་ལོག་ཤེས་ཐེ་ཚོམ་སྣང་ལ་མ་ངེས་པ་བཞིར་ངེས་ཟེར་ན། ཞེས་ཚད་མིན་གྱི་བློ་ལ་བཅད་ཤེས་ལོག་ཤེས་ཐེ་ཚོམ་སྣང་ལ་མ་ངེས་པ་བཞིར་ངེས་པར་འདོད་པའི་ཕྱོགས་སྔ་མ་ས་སྐྱ་པཎྜི་ཏ་ཡིན་ཟེར་མཁན་ཡོད་ཀྱང་དེ་མི་འཐད་པར་ཐལ། ས་སྐྱ་པཎྜི་ཏས་ཡིད་དཔྱོད་མི་བཞེད་པ་བདེན་ཡང་ཚད་མིན་གྱི་བློ་ལ་བཅད་ཤེས་ལོག་ཤེས་ཐེ་ཚོམ་སྣང་ལ་མ་ངེས་པ་བཞིར་ངེས་པར་མི་བཞེད་པའི་ཕྱིར། དེརཐལ། ཚད་མབཅད་ཤེས་དང་སྣང་ལ་མ་ངེས་པ་གཉིས་མི་བཞེད་པའི་ཕྱིར། དང་པོ་བཅད་ཤེས་མི་བཞེད་དེ། རིགས་གཏེར་ལས། བཅད་ཤེས་རིགས་པས་མཐའ་བཅད་ན། །མ་རྟོགས་པ་དང་ལོག་རྟོག་དང༌། །ཡང་ན་ཚདིན་ལ་མ་ཉིད་འགྱུར་གྱི། །དེ་ལས་གཞན་པའི་བློ་མི་སྲིད། །ཅེས་གསུངས་པའི་ཕྱིར། སྣང་ལ་མ་ངེས་པ་མི་བཞེད་དེ། རིགས་གཏེར་ལས། གལ་ཏེ་སྣང་ལ་མ་ངེས་པ། །ཚད་མ་མིན་ན་མངོན་སུམ་ཀུན། །ཚད་མར་མིན་འགྱུར་མངོན་སུམ་ལ། །ངེས་པ་ཉིད་ནི་བཀག་ཕྱིར་རོ། །ཞེས་གསུངས་པའི་ཕྱིར། ཡང་ས་སྐྱ་པཎྜི་ཏས་ཚད་མིན་ལ་གསུམ་དུ་ངེས་པར་བཞེད་པའི་ཕྱིར་ཏེ། རིགས་གཏེར་ལས། མ་རྟོགས་ལོག་རྟོག་ཐེ་ཚོམ་སྟེ། །ཚད་མའི་འགལ་ཟླ་རྣམ་པ་གསུམ། །ཞེས་གསུངས་པའི་ཕྱིར། དེ་འདོད་ན་ས་སྐྱ་པཎྜི་ཏའི་ལུགས་གཞིར་བཞག་རྒྱུ་མཚན་ལ་མ་བརྟེན་པར་སྒྲ་མཐའ་གཅིག་ཏུ་མི་རྟག་པར་འཛིན་ཡང་དེ་ལ་ཚད་མས་ངེས་པ་མ་རྙེད་པའི་ཚད་མིན་གྱི་བློ་ཞིག་འདོད་དགོས་པ་གང་ཞིག དེ་དེ་གསུམ་གང་ཡང་མ་ཡིན་པའི་ཕྱིར། རྟགས་དང་པོ་གྲུབ་སྟེ། ཚད་མ་མདོ་ལས། དོན་གོ་རྣམ་གཉིས་མཐའ་གཅིག་ཏུ། །ཞེས་གསུངས་པའི་ཕྱིར། ཁོང་གི་ལུགས་ལ་རྟགས་ཕྱི་མ་མ་གྲུབ་ཟེར་དགོས་པའི་ཕྱིར་ཏེ། དེ་འདྲ་བའི་བློ་དེ་ཐེ་ཚོམ་ཡིན་པར་འདོད་པའི་ཕྱིར་ཏེ། རིགས་གཏེར་ལས། ཡིད་དཔྱོད་རྟགས་ལ་གཏན་མི་ལྟོས། །དམ་བཅའ་ཙམ་ཡིན་ཐེ་ཚོམ་འགྱུར། །ཞེས་དང༌། རིགས་གཏེར་རང་འགྲེལ་དུ་གྲགས་པ་ལས། རྟགས་མི་འགོད་པར་ཡོད་ཅེས་དམ་བཅའ་རྐྱང་པ་ནི་ཐེ་ཚོམ་དུ་སྔར་བཤད་ཟིན་ལ་ཞེས་གསུངས་པའི་ཕྱིར། འདོད་ན། རྒྱུ་མཚན་ལ་མ་བརྟེན་པར་སྒྲ་མཐའ་གཅིག་ཏུ་མི་རྟག་པར་འཛིན་ཡང་དེ་ཚད་མས་ངེས་པ་མ་རྙེད་པའི་ཚད་མིན་གྱི་བློ་དེ་ཆོས་ཅན། ཐེ་ཚོམ་མ་ཡིན་པར་ཐལ། ཡུལ་གཏན་ལ་མ་ཕབ་པར་ཡིད་གཉིས་སུ་འཇུག་པ་མ་ཡིན་པའི་ཕྱིར། ཁྱབ་སྟེ། འཇམ་དཔལ་རྩ་རྒྱུད་ལས། དད་ལྡན་ཡིད་གཉིས་ཐེ་ཚོམ་ནི། །ཞེས་དང༌། སློབ་དཔོན་མཁས་པ་དཔལ་སྦྱང་དཀའ་བའི་ཟླ་བས་མཛད་པའི་ཀཽ་མུ་དི་ཞེས་བྱ་བའི་དཀའ་འགྲེལ་སྡེ་བསྟན་ག་པོད་ན་བཞུགས་པ་ལས། ཐེ་ཚོམ་དུ་གྱུར་ཅེས་བྱ་བ་ནི་སོམ་ཉིར་གྱུར་པའོ། །ཡིད་གཉིས་ནི་དེའི་ཐེ་ཚོམ་མ་བཅད་པའི་ཕྱིར། ཡིད་གཉིས་ཉིད་དུ་གྱུར་པས་ཞེས་དང༌། སློབ་དཔོན་འཇམ་དཔལ་གྲགས་པས་མཛད་པའི་ཐེག་པ་ཆེན་པོའི་མདོའི་འགྲེལ་པ་གྲགས་པའི་ཕྲེང་བ་ཞེས་བྱ་བ་སྡེ་སྟན་ཉི་པོད་ན་བཞུགས་པ་ལས། ཡིད་གཉིས་ནི་ཐེ་ཚོམ་མོ། །ཞེས་གསུངས་པའི་ཕྱིར། རྩ་བའི་ཁ་ཅིག་དེས་ཚད་མིན་གྱི་བློ་ཡིན་ན་བཅད་ཤེས་ལོག་ཤེས་ཐེ་ཚོམ་སྣང་ལ་མ་ངེས་པ་བཞི་བོ་གང་རུང་ཡིན་པས་ཁྱབ། དེ་བཞི་གང་ཡང་མ་ཡིན་པའི་ཚད་མིན་གྱི་བློ་ཡིད་དཔྱོད་ཟེར་བ་ཞིག་མེད་ཅེས་གསུངས་པ་ཨེ་རེད། དེ་ཡིན་ན་དེ་ལ་ཆོས་དེའི་དོན་གོ་ཡང་ཐེ་ཚོམ་མ་ཆོད་པ་ཞིག་དང་ཆོད་ཟིན་པ་གཉིས་མེད་པར་ཐལ། ཚད་མིན་གྱི་བློ་ཡིན་ན་དེ་བཞི་གང་རུང་ཡིན་པས་ཁྱབ་པའི་ཕྱིར། རྟགས་ཁས། འདོད་མི་ནུས་ཏེ། མདོ་ལས། དོན་གོ་རྣམ་གཉིས་མཐའ་གཅིག་ཏུ། །ཞེས་དང། དེའི་རང་འགྲེལ་ལས། མཐའ་གཅིག་ཏུ་ངེས་པ་དང། མཐའ་གཅིག་ཏུ་མ་ངེས་པའོ། །ཞེས་དང། མཐའ་ཅིག་ཏུ་མ་ངེས་པ་ཅན་ཉིད་ཀྱི་དོན་གྱི་གོ་བ་ནི་ཚད་མ་མ་ཡིན་ཏེ། ཐེ་ཚོམ་གྱི་རྒྱུ་ཡིན་པའི་ཕྱིར། ཞེས་གསུངས་པའི་ཕྱིར་ཟེར་ན་ཕྱོགས་སྔ་མ་དེའི་ལུགས་ལ་དོན་གོ་ཡང་མཐའ་གཅིག་ཏུ་མ་གོ་བའི་ཚད་མིན་གྱི་བློ་ཞིག་ངེས་པར་ཁས་ལེན་དགོས་ལ། དེས་ན་དེ་འདྲའི་ཚད་མིན་གྱི་བློ་དེ་ཆོས་ཅན། ཚད་མིན་བཞི་བོ་གང་རུང་ཡིན་པར་ཐལ། ཚད་མིན་གྱི་བློ་ཡིན་པའི་ཕྱིར། འདོད་མི་རིགས་པར་ཐལ། དེ་བཅད་ཤེས་མ་ཡིན་པ་གང་ཞིག ལོག་ཤེས་མ་ཡིན། ཐེ་ཚོམ་མ་ཡིན། སྣང་ལ་མ་ངེས་པའི་བློ་མ་ཡིན་པའི་ཕྱིར། དང་པོ་གྲུབ་སྟེ། དེ་རང་འདྲེན་བྱེད་ཀྱི་ཚད་མ་སྔ་མས་རྟོགས་ཟིན་པའི་དོན་ལ་བསྣན་ནས་འཇུག་པའི་ཤེས་པ་མ་ཡིན་ཕྱིར། ཁྱབ་སྟེ། ཚད་མ་མདོ་ལས། ཡང་ཡང་ཤེས་པ་མ་ཡིན་ཏེ། །ག་པ་མེད་འགྱུར་དྲན་སོགས་བཞིན། །ཞེས་གསུངས་པའི་ཕྱིར། གོང་གི་རྟགས་གཉིས་པ་གྲུབ་སྟེ། རང་གི་འཛིན་སྟངས་ཀྱི་ཡུལ་ལ་འཁྲུལ་བའི་རིག་པ་མ་ཡིན་པའི་ཕྱིར། ཁྱབ་སྟེ། ཚད་མ་རྣམ་འགྲེལ་ལས། ཡོན་ཏན་སྤྱི་གནས་གཅིག་པ་ལ། །འཁྲུལ་བའི་ལོག་པས་ཤེས་པར་འགྱུར། །ཞེས་གསུངས་པའི་ཕྱིར། གོང་གི་རྟགས་གསུམ་པ་གྲུབ་སྟེ། རང་ཡུལ་ལ་རྩེ་གཉིས་སུ་འཇུག་པ་མ་ཡིན་ཕྱིར། ཁྱབ་སྟེ། འཇམ་དཔལ་རྩ་རྒྱུད་ལས། དད་ལྡན་ཡིད་གཉིས་ཐེ་ཚོམ་ནི། །རྣམ་བྲལ་ཆོས་ལ་མཉེས་གཤིན་པ། །བདེ་བར་གཤེགས་ལ་དད་བསྐྱེད་ནས། །ཞེས་དང༌། མདོ་སྡུད་པ་ལས། དེ་ལ་ངེས་པར་གྱུར་པའི་བར་དུ་གཅོད་པའི་ཐེ་ཚོམ་གང་ཞེ་ན། ཐེ་ཚོམ་གང་གིས་ངེས་པར་གྱུར་པ་ལ་མི་འཇུག་པ་སྟེ། ངེས་པའི་ས་ཁོང་དུ་ཆུད་པར་མི་འགྱུར་བ་འདི་ནི་ངེས་པར་གྱུར་པའི་བར་དུ་གཅོད་པའི་ཐེ་ཚོམ་སྟེ། ཞེས་གསུངས་པའི་ཕྱིར། གོང་གི་རྟགས་བཞི་བ་གྲུབ་སྟེ། རང་གི་འཇུག་ཡུལ་གསལ་བར་སྣང་བ་ཡང་ཡིན་རང་ཡུལ་མ་ངེས་པ་ཡང་ཡིན་པའི་གཞི་མཐུན་པ་མ་ཡིན་པའི་ཕྱིར་ཟེར་ན་དཔྱད་དོ། །