ཏཱ་རེ་མི་འགྱུར་དགའ་ཚལ་སེམས་ཉིད་རང་གྲོལ་གླིང་གི་ངོ་སྤྲོད་མདོར་བསྡུས་རྒྱལ་ཡུམ་དགྱེས་པའི་མཆོད་སྤྲིན།
༄༅། ཏཱ་རེ་མི་འགྱུར་དགའ་ཚལ་སེམས་ཉིད་རང་གྲོལ་གླིང་གི་ངོ་སྤྲོད་མདོར་བསྡུས་རྒྱལ་ཡུམ་དགྱེས་པའི་མཆོད་སྤྲིན་བཞུགས།
དུས་གསུམ་རྒྱལ་བའི་སྤྱི་གཟུགས་པདྨ་འབྱུང་། །
གངས་ཅན་མིག་གཅིག་རྣམ་སྣང་ལོ་ཙཱ་བ། །
གཞན་ཕན་བཟང་པོ་ཆོས་དབྱིངས་རང་གྲོལ་སོགས། །
དཔལ་མགོན་བླ་མ་རྣམས་ལ་གུས་པས་འདུད།།
དེ་ལ་འདིར་གང་ཞིག་གླེང་བར་བྱ་བ་ནི། ཁྱབ་བདག་རྫོགས་ཆེན་པ་པདྨ་སྐལ་བཟང་རིན་པོ་ཆེས། ཕྱི་ལྟར་ཡིད་བཞིན་འདོད་འཇོ་གཏེར་གྱི་རི། །ནང་ལྟར་གཡུ་ལོ་བཀོད་པའི་ཞིང་ཁམས་ཏེ། །གསང་བ་དགའ་ཆེན་ཡེ་ཤེས་སྒྱུ་མའི་མཛོད། །ལྷ་ཡུལ་ལྷ་ལས་འཕགས་པའི་ཞིང་ཁམས་བསྔགས། །ཞེས་ཆེད་དུ་བརྗོད་པའི་དབེན་ཁྲོད། ཤར་རྒྱལ་མོ་ཚ་བ་རོང་གི་སའི་ཆར་གཏོགས་པ་གཡུའི་ཆུ་དབར་ཏཱ་རེའི་གནས་མཆོག་ལ་སྔོན་དུས་རབས་བརྒྱད་པའི་ནང་དུ་ལོ་ཆེན་བཻ་རོ་ཙ་ན་རྒྱལ་མོ་རོང་དུ་ཕེབས་པ་དང་དུས་མཚུངས་སུ། སློབ་དཔོན་པདྨ་འབྱུང་གནས་རྫུ་འཕྲུལ་གྱིས་བྱོན་ནས་ཁོང་དཔོན་སློབ་གཉིས་ཀྱིས་རྒྱལ་ཡུམ་འཕགས་མའི་གནས་འདི་སོགས་ཚ་བ་རོང་གི་གནས་ཆེན་སུམ་ཅུ་རྩ་བརྒྱད་ལ་གནས་ཆེན་བྱིན་དབབ་དང་ཆོས་ནོར་གྱི་གཏེར་ཁ་དུ་མ་སྦས་ནས་འབྲེལ་ཚད་དོན་ལྡན་དུ་བྱིན་གྱིས་བརླབས། དེ་ནས་རབ་བྱུང་བཅོ་ལྔ་པའི་ཆུ་སྦྲུལ་༼༡༨༩༣༽ལོར་དུས་རྟགས་དང་རྟེན་འབྲེལ་མངོན་དུ་གྱུར་པ་ན། སྤྲུལ་པའི་གཏེར་སྟོན་བསམ་གཏན་ཡེ་ཤེས་གླིང་པའམ་ཧོར་བླ་གཞན་ཕན་བཟང་པོས་ལྷ་དང་བླ་མའི་ལུང་བསྟན་ལྟར་གནས་སྒོ་ཕྱེས་ནས་ ཏཱ་རེ་མི་འགྱུར་ལྷུན་གྱིས་གྲུབ་པའི་དགའ ་ཚལ་ཞེས་མཚན་བཏགས། ཆུ་སྟག་༼༡༨༩༤༽ལོའི་ལོ་མཇུག་ཏུ་ ཏཱ་རེ་མི་འགྱུར་དགའ ་ཚལ་མདོ་སྔགས་བཤད་སྒྲུབ་གླིང་ཞེས་པའི་གཙུག་ལག་ཁང་གསར་དུ་ཕྱག་བཏབ་ནས་སྒོ་འཛུ་བླ་མ་རིག་གྲོལ། ལུང་རྟོགས་བསྟན་འཛིན། རིག་འཛིན་དངོས་གྲུབ། རས་པ་གསལ་སྟོང་། ཀློང་ཆེན་འོད་གསལ་རྡོ་རྗེ། སྒོ་སྤེས་བླ་མ་མཚོ་རྒྱལ་དང་། ཆོས་བདག་ཀརྨ་ཆོས་སྐྱོང་སོགས་བུ་ཆེན་རྣམས་ཀྱི་གཙོས་སློབ་ཚོགས་དུ་མ་ལ་དབང་ཁྲིད་ཟབ་ཆོས་གནང་བར་མཛད། དེ་ནས་བཟུང་འཁོར་གདོང་པདྨ་བཛྲ། རྒྱ་ཤུལ་ཆོས་དཔལ་རྒྱ་མཚོ། ཆ་ནང་མི་ཕམ་རྒྱ་མཚོ་བཅས་རིགས་གསུམ་མགོན་པོའི་རྣམ་སྤྲུལ་དུ་གྲགས་པའི་དམ་པའི་སྐྱེས་བུ་གསུམ་ཡང་གནས་འདིར་བྱོན་ནས་སྒྲུབ་པ་ཉམས་བཞེས་སོགས་མཛད། རྒྱལ་རོང་གཏེར་ཆེན་རིག་འཛིན་གསང་སྔགས་གླིང་པ། མདོ་མང་གཏེར་ཆེན་གར་གྱི་དབང་ཕྱུག གཟན་དཀར་རིན་པོ་ཆེ་པདྨ་དངོས་གྲུབ་རོལ་པའི་རྡོ་རྗེ་སོགས་ཀྱིས་ཀྱང་ཞབས་ཀྱིས་བཅགས་ཤིང་བྱིན་གྱིས་བརླབས་པར་མཛད། དེ་ལས་ཁྱད་པར་དུ་གྱུར་པ་རབ་བྱུང་བཅོ་ལྔ་པའི་ཆུ་སྤྲེལ་༼༡༨༧༢༽ལོར་ངེས་གསང་རྫོགས་པ་ཆེན་པོའི་རྣལ་འབྱོར་པ་གཡུ་ཁོག་བྱ་བྲལ་ཆོས་དབྱིངས་རང་གྲོལ་གྱི་མཚན་དཔེའི་མེ་ཏོག་གནས་འདི་ནས་བཞད་པས་ཐུན་མོང་མ་ཡིན་པའི་ཕྱག་དང་མཆོད་པའི་རྟེན་མཆོག་གཅིག་པུར་གྱུར། རབ་བྱུང་བཅུ་དྲུག་པའི་ནང་མཁན་པོ་རི་རྡོར་གྱིས་མི་ཉག་རྩ་ར་མཁན་ཆེན་ཆོས་ཀྱི་གྲགས་པ་གནས་འདིར་གདན་དྲངས་ནས་ལོ་དུ་མའི་རིང་མདོ་སྔགས་ཀྱི་ཆོས་ཚུལ་དུ་མ་ལ་འཆད་ཉན་མཛད། ཕྱིས་རྒྱལ་བསྟན་ཡང་དར་གྱི་སྐབས་སུ་ཆུ་དབར་ཁོག་གི་བླ་སྤྲུལ་སེར་སྐྱ་ཡོངས་ཀྱིས་ལྷ་ཁང་དང་རྟེན་གསུམ་བསྐྱར་གསོ་བྱས། ཁྱབ་བདག་པདྨ་སྐལ་བཟང་མཆོག་གིས། ཏཱ་རེ་སྒྲོལ་མ་གཡུ་ཡི་ལྷ་ཁང་ཞེས་མཚན་གསོལ་དང་སྦྲགས། ཁྱད་པར་སྔ་འགྱུར་རྫོགས་ཆེན་བརྒྱུད་པའི་སྲོལ། །སྙིང་ཐིག་སྙིང་པོའི་བསྟན་པ་རབ་དར་བའི། །བདེན་ཚིག་སྨོན་ལམ་དཀར་པོའི་དར་གྱི་མདུད། །ཕྱི་རབས་སྐྱེ་བོའི་མགུལ་བའི་རྒྱན་དུ་བཀོད། །ཅེས་སོགས་ཐུགས་སྨོན་བདེན་ཚིག་གནང་བ་དུས་སུ་སྨིན་ནས་སྔ་ཕྱིར་ཧོར་བླའི་ཡང་སྤྲུལ་རྟ་ཁྱུང་རོལ་པའི་རྡོ་རྗེ། གཟན་དཀར་མཆོག་སྤྲུལ་ཐུབ་བསྟན་ཉི་མ། རྫོགས་ཆེན་ཀུན་བཟང་སྤྲུལ་སྐུ། གཡུ་ཁོག་བྱ་བྲལ་བའི་ཡང་སྤྲུལ་མཉམ་མེད་རང་བྱུང་རྡོ་རྗེ་སོགས་དམ་པའི་སྐྱེས་ཆེན་དུ་མ་ཆེད་ཕེབས་ཀྱིས་ཟབ་རྒྱས་ཆོས་ཀྱི་འཁོར་ལོ་བར་མེད་དུ་བསྐོར་བར་མཛད། ཆུ་འབྲུག་(2012)ལོར་གཡུ་སྤྲུལ་མཉམ་མེད་རང་བྱུང་རྡོ་རྗེས་སྐུ་གོང་མ་གཡུ་ཁོག་བྱ་བྲལ་བའི་འཁྲུངས་གནས་ས་མིག་དངོས་ཐུགས་ཉམས་དང་རྨི་ལམ་ལ་བརྟེན་ཚུལ་གྱིས་ངོས་འཛིན་མཛད་ཅིང་མ་འོངས་པར་ས་འདི་རི་ཁྲོད་སྒྲུབ་གནས་ཤིག་ཏུ་འགྱུར་རྒྱུ་རེད་གསུངས། ཤིང་རྟ་(2014)ལོར་གངས་ལྗོངས་མཁས་པའི་དབང་ཕྱུག་མཁན་ཆེན་ཚུལ་ཁྲིམས་བློ་གྲོས་གཡུ་ཁོག་བྱ་བྲལ་བའི་འཁྲུངས་གནས་འདི་ཉིད་མཇལ་དུ་ཕེབས་ཚེ་གནས་འདི་ནས་སྒྲུབ་པ་ཉམས་ལེན་རེ་བྱེད་ཐུབ་ན་ཉམས་རྟོགས་ཀྱི་ཡོན་ཏན་སྐྱེ་སླ་རྒྱུ་རེད་གསུངས་ཤིང་སེམས་ཉིད་རང་གྲོལ་གླིང་ཞེས་མཚན་བཏགས་པར་མཛད། གཡུ་མཁར་དགོན་གྱི་བླ་སྤྲུལ་རྣམས་ཀྱི་ཐུགས་བཀོད་འོག་གནས་འདིའི་བླ་གྲྭ་ལྷག་བསམ་ཅན་རྣམས་ཀྱིས་གཙོ་འགན་བཞེས་པ་དང་། ཕྱོགས་ཀྱི་དད་ལྡན་རྣམས་ཀྱི་རྒྱབ་སྐྱོར་དང་རོགས་རམ་ལ་བརྟེན་ནས་གཡུ་ཁོག་བྱ་བྲལ་བའི་སྐུ་གདུང་མཆོད་རྟེན་དང་། མ་ཎི་དུང་མཁར་ཆེན་མོ། འཚོགས་ཁང་སོགས་གསར་བཞེངས་བྱས། མེ་སྤྲེལ་(2016)ལོ་ནས་བཟུང་སྨྱུང་གནས་དང་འབྲེལ་བའི་དགུན་ཆོས་སམ། ཞག་བརྒྱའི་བཅད་རྒྱ་ཆེན་མོ་ལོ་ལྟར་འཚོགས་དང་འཚོག་བཞིན་པ་ལགས་ན་སེར་སྐྱ་རིས་མེད་དལ་བའི་རྟེན་ལ་སྙིང་པོ་ལེན་པར་འདོད་པ་དག་གིས་ཐུགས་ལ་ཅི་ནས་ཀྱང་འཛིན་འཚལ། སྤྱིར་གནས་རི་བྱིན་ལྡན་རྣམས་སུ་སྒྲུབ་པ་ཉམས་ལེན་བྱས་ན་གནས་གཞན་ཕལ་བ་ལས་ཁྱད་དུ་འཕགས་ཚུལ་ནི། ཀུན་མཁྱེན་བསྟན་པའི་ཉི་མས། གནས་ཡུལ་བྱིན་ཅན་དང་། ཨོ་རྒྱན་ཆེན་པོ་སོགས་གྲུབ་ཐོབ་གོང་མའི་སྒྲུབ་གནས་རྣམས་ནི་མཆོག་ཏུ་བསྔགས་པ་ཡིན་ཏེ། དགོངས་འདུས་ལས། ཕལ་པའི་གནས་སུ་ལོ་གཅིག་བསྒྲུབ་པ་བས༔ འདི་དག་རྣམས་སུ་ཞག་གཅིག་སྒྲུབ་ཐག་ཉེ༔ཞེས་གསུངས་པ་ལྟ་བུ་དང་། བྱེ་བྲག་རྒྱལ་ཡུམ་རྗེ་བཙུན་སྒྲོལ་མའིྮ་་གནས་འདི་རུ་སྒྲུབ་པ་བྱས་པའི་ཕན་ཡོན་ནི། རིག་འཛིན་གཞན་ཕན་བཟང་པོས། འཇའ་དང་འོད་ལུས་གྲུབ་འདོད་གནས་འདི་རུ༔ གཉིས་མིན་གཅིག་པུས་སྒྲུབ་པ་ལྷུར་བླངས་ན༔ འཕོ་ཆེན་བུམ་སྐུ་བདེ་བླག་ཉིད་དུ་འགྲུབ༔ ཅེས་དང་། གནས་འདིར་ཞག་གཅིག་སྒོམ་སྒྲུབ་བྱས་ན་ཡང་༔ ཕྱི་མ་མཁའ་སྤྱོད་གཡུ་ལོ་བཀོད་པ་དང་༔ པདྨ་འོད་སོགས་བགྲོད་པར་ཐེ་མི་ཚོམ༔ ཞེས་གསུངས། ཁྱད་པར་མཆོག་གཟིགས་དམ་པའི་སྐྱེས་ཆེན་དག་སྐུ་འཁྲུངས་པའི་གནས་སུ་སྒྲུབ་པ་ཉམས་ལེན་བྱས་ན་བྱིན་རླབས་ཆེ་ཚུལ། འདུལ་བ་ལུང་ཕྲན་ཚེགས་ལས། དགེ་སློང་དག་གིས་ས་ཕྱོགས་འདི་བཞི་རིགས་ཀྱི་བུའམ་རིགས་ཀྱི་བུ་མོ་དད་པ་ཅན་རྣམས་ཀྱིས་ཇི་སྲིད་འཚོའི་བར་དུ་རྗེས་སུ་དྲན་པར་འགྱུར་བར་བྱའོ། །བཞི་གང་ཞེ་ན། བཅོམ་ལྡན་འདས་འདིར་ནི་འཁྲུངས་སོ། །བཅོམ་ལྡན་འདས་འདིར་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །བཅོམ་ལྡན་འདས་ཀྱིས་འདིར་ནི་ལན་གསུམ་དུ་བཟླས་ཏེ་ཆོས་ཀྱི་འཁོར་ལོ་རྣམ་པ་བཅུ་གཉིས་སུ་བསྐོར་ཏོ། །བཅོམ་ལྡན་འདས་འདིར་ནི་ཕུང་པོ་ལྷག་མ་མ་ལུས་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་པ་སྟེ། དགེ་སློང་དག་ང་འདས་པའི་འོག་ཏུ་འདིར་མཆོད་རྟེན་སྐོར་བ་དང་། མཆོད་རྟེན་ལ་ཕྱག་འཚལ་བ་འོང་གིས་དེ་དག་ལ་འདི་སྐད་ཅེས་བརྗོད་པར་བྱའོ། ཞེས་དང་། ཁ་ཅིག་ང་ལ་སེམས་དད་པས་དུས་བྱས་པ་དེ་ཐམས་ཅད་མཐོ་རིས་སུ་འགྲོའོ། །ཁ་ཅིག་ནི་ཕུང་པོའི་ལྷག་མ་དང་བཅས་པར་རོ། །དགེ་སློང་དག་ས་ཕྱོགས་འདི་བཞི་རིགས་ཀྱི་བུའམ། རིགས་ཀྱི་བུ་མོ་དད་པ་ཅན་རྣམས་ཀྱིས་ཇི་སྲིད་འཚོའི་བར་དུ་འགྲོ་བར་འགྱུར་བར་བྱའོ། །ཞེས་སོགས་གསུངས་པའི་ཤུགས་ཀྱིས་འུ་ཅག་སྙིགས་མའི་དུས་ཀྱི་བསོད་ནམས་ཆུང་ངུའི་སྐྱེ་བོ། གདོད་མའི་མགོན་པོ་མི་ཡི་རྣམ་པར་རོལ་བ་གཡུ་ཁོག་བྱ་བྲལ་བ་ལྟ་བུའི་མཐོང་གྲོལ་གསེར་ཞལ་དངོས་སུ་མ་མཇལ་བ་དག་གིས་མགོན་པོ་གང་གི་འཁྲུངས་གནས་དང་། གདན་ས་སོགས་དད་པས་མཇལ་བས་གང་ཉིད་དངོས་སུ་མཇལ་བའི་བསོད་ནམས་འཐོབ་པ་དང་། གནས་དེ་དག་ཏུ་སྒྲུབ་པ་བྱས་པས་གཞན་པའི་གནས་ལས་འགྲུབ་ཐག་ཤིན་ཏུ་ཉེ་བ་སོགས་ཕན་པའི་ཡོན་ཏན་ཚད་ལས་འདས་པ་ཤེས་པར་བྱའོ། །
རྒྱལ་ཡུམ་འཕགས་མ་ཏཱ༵་རེ༵་ཉེར་གཅིག་གི།།
མི༵་འགྱུ༵ར་ཐུགས་བསྐྱེད་དུས་སུ་སྨིན་པའི་གནས།།
ངེས་དོན་ཆོས་ཀྱི་དག༵འ་ཚ༵ལ་ཉམས་དགའ་བ།།
ས་ལ་སྤྱོད་པའི་ཞིང་མཆོག་ཨ་ཧོ་རྨད།།
ཡེ་ནས་རྣམ་དག་སེ༵མས་ཉི༵ད་རིག་པའི་གཤིས།།
འཁྲུལ་རྟོག་མཚན་མའི་སྦུབས་ལས་ར༵ང་གྲོ༵ལ་བའི།།
སྨིན་གྲོལ་གདམས་པ་འདོད་དགུར་འཇོ་བའི་གླི༵ང་།།
དར་ཞིང་རྒྱས་ལ་ཡུན་དུ་གནས་གྱུར་ཅིག །
ཅེས་ཆུ་དབར་ཏཱ་རེ་མི་འགྱུར་དགའ་ཚལ་སེམས་ཉིད་རང་གྲོལ་གླིང་གི་ངོ་སྤྲོད་མདོར་བསྡུས་རྒྱལ་ཡུམ་དགྱེས་པའི་མཆོད་སྤྲིན་ཞེས་བྱ་བ་འདི་ནི་ཐུན་མིན་ཆོས་ཀྱི་མཆེད་པོ་བླ་མ་ཡིད་འོང་ནོར་བུའི་གསུང་བསྐུལ་མི་ལྡོག་ཙམ་དུ་མུ་ཅོར་སྨྲ་བ་ཡི་དམ་རྡོ་རྗེར་འབོད་པས་ལྕགས་བྱི་ནག་པ་ཟླ་བའི་དམར་ཕྱོགས་མཁའ་འགྲོའི་དུས་ཆེན་ཉིན་བྲིས་པ་འགྲོ་ཀུན་ངེས་དོན་འཕགས་མའི་རང་ཞལ་མཇལ་བའི་རྒྱུར་གྱུར་ཅིག །