རྗེ་ཞྭ་དམར་ཅོད་པན་འཆང་བ་དྲུག་པ་གར་དབང་ཆོས་ཀྱི་དབང་ཕྱུག་རིན་པོ་ཆེའི་ཞབས་དྲུང་ནས། རང་གི་དབང་ལུང་གི་བཀའ་དྲིན་ལེགས་པར་ཐོབ་པའི་བླ་མ་བརྒྱུད་པ་རྣམས་ཀྱི་གསོལ་འདེབས་ཀྱི་རིམ་པ་མང་དག་གཅིག
རྗེ་ཞྭ་དམར་ཅོད་པན་འཆང་བ་དྲུག་པ་གར་དབང་ཆོས་ཀྱི་དབང་ཕྱུག་རིན་པོ་ཆེའི་ཞབས་དྲུང་ནས། རང་གི་དབང་ལུང་གི་བཀའ་དྲིན་ལེགས་པར་ཐོབ་པའི་བླ་མ་བརྒྱུད་པ་རྣམས་ཀྱི་གསོལ་འདེབས་ཀྱི་རིམ་པ་མང་དག་གཅིག་བཞུགས་སོ། །
སོ་ཐར་བརྒྱུད་པའི་གསོལ་འདེབས་ནི། ༈ ན་མོ་ཤཱཀྱ་མུ་ན་ཡེ། ཐུབ་དབང་ཤཱ་རིའི་བུ་དང་སྒྲ་གཅན་འཛིན། །ས་ར་ཧ་དང་འཕགས་མཆོག་ཀླུ་སྒྲུབ་ཞབས། །གསོལ་བ་འདེབས་སོ་ཐུགས་རྗེས་སྤྱན་གྱིས་གཟིགས། །ཚུལ་ཁྲིམས་ཉམས་པ་མེད་པར་བྱིན་གྱིས་རློབས། །ཡོན་ཏན་བློ་གྲོས་རིན་ཆེན་བཤེས་གཉེན་དང་། །ཆོས་ཀྱི་བཟང་པོ་ཡོན་ཏན་རྒྱ་མཚོའི་ཞབས། །གསོལ་བ་འདེབས་སོ་ཐུགས་རྗེས་སྤྱན་གྱིས་གཟིགས། །ཚུལ་ཁྲིམས་ཉམས་པ་མེད་པར་བྱིན་གྱིས་རློབས། །ཆོས་ཀྱི་ཕྲེང་བ་བློ་གྲོས་འབྱུང་གནས་སྦས། །པཎ་ཆེན་ཤཱཀྱ་ཤྲཱི་དང་བྱང་
ཆུབ་དཔལ། །གསོལ་བ་འདེབས་སོ་ཐུགས་རྗེས་སྤྱན་གྱིས་གཟིགས། །ཚུལ་ཁྲིམས་ཉམས་པ་མེད་པར་བྱིན་གྱིས་རློབས། །དབང་ཕྱུག་གྲགས་པ་གཞོན་ནུ་བྱང་ཆུབ་དང་། །གནས་བརྟན་ཡོན་རྒྱལ་ཡོན་ཏན་བློ་གྲོས་ཞབས། །གསོལ་བ་འདེབས་སོ་ཐུགས་རྗེས་སྤྱན་གྱིས་གཟིགས། །ཚུལ་ཁྲིམས་ཉམས་པ་མེད་པར་བྱིན་གྱིས་རློབས། །སེང་གེ་དཔལ་དང་རབ་འབྱོར་སེང་གེ་དང་། །ཆོས་གྲུབ་སེང་གེ་མཚུངས་མེད་དབྱངས་ཅན་བཟང་། །གསོལ་བ་འདེབས་སོ་ཐུགས་རྗེས་སྤྱན་གྱིས་གཟིགས། །ཚུལ་ཁྲིམས་ཉམས་པ་མེད་པར་བྱིན་གྱིས་རློབས། །
དཀོན་མཆོག་ཡན་ལག་དབང་ཕྱུག་རྡོ་རྗེ་དང་། །དཔལ་ལྡན་གར་དབང་ཆོས་ཀྱི་དབང་ཕྱུག་ཞབས། །གསོལ་བ་འདེབས་སོ་ཐུགས་རྗེས་སྤྱན་གྱིས་གཟིགས། །ཕམ་ལྷག་ལྟུང་བྱེད་སོར་བཤགས་ཉེས་བྱས་ཏེ། །ལྟུང་བ་སྡེ་ལྔས་གོས་པར་མི་འགྱུར་ཞིང་། །ཉེ་བ་འཁོར་ལྟར་ཚུལ་ཁྲིམས་མཐར་ཕྱིན་ནས། །ཐུབ་བསྟན་མཛེས་པའི་རྒྱན་དུ་བདག་གྱུར་ཅིག །ཅེས་པ་འདུལ་བ་ལུགས་ཀྱི་རང་ལོ་ཉི་ཤུ་པར། མཚུར་ཕུའི་གཙུག་ལག་ཁང་ཆེན་པོར། དོན་གྱིས་སླད་དུ་མཚན་ནས་སྨོས་ན་བདག་གི་མཁན་པོ་ཡོངས་རྫོགས་བསྟན་པའི་མངའ་བདག་དཔལ་ལྡན་གར་དབང་ཆོས་ཀྱི་དབང་ཕྱུག་རྡོ་རྗེ་དགའ་བ་དོན་ཀུན་ཡོངས་སུ་གྲུབ་པ་ཕྱོགས་ཐམས་ཅད་ལས་རྣམ་པར་རྒྱལ་བའི་ཞལ་སྔ་ནས་དང་། སློབ་དཔོན་ཟུར་རིའི་དྲུང་པ་བདེ་མཆོག་ཅེས་བགྱི་བའི་ཞལ་སྔ་ནས་དང་། ལས་སློབ་སྨྲ་སེང་གསང་སྟོན་དགེ་སློང་ཉི་མ་ཞེས་བགྱི་བ་དང་། དུས་འཛིན་པ་དགེ་སློང་ཆོས་རྒྱལ་ཞེས་བགྱི་བ་དང་། ཟུར་རིའི་དགེ་སློང་གནས་བརྟན་དང་བཅས་པའི་དྲུང་དུ། མགོ་ཟླ་བའི་དཀར་པོའི་བཅོ་ལྔ་དགེ་ཚུལ་ཞུས་པའི་མིང་ཀརྨ་སློབ་ལམ་དང་། ཆིག་རྫོགས་སུ་བསྙེན་པ་རྫོགས་པའི་མིང་། ཀརྨ་ཆགས་མེད་ཅེས་བྱ་སྟེ། དེ་ལྟར་རང་བྱུང་དང་བསྙེན་རྫོགས་ཞུས་པའི་མཁན་རྒྱུད་ལ་གསོལ་འདེབས་འདི། རང་ལོ་སོ་བཞི་པར་གཟའ་སྐར་བཟང་བའི་ཡར་གྱི་བཅུ་བཞི་ལ་བྲིས་པའོ། །ཀརྨ་ཨ་རཱ་གས་སོ།། ༈ གསོ་
སྦྱོང་བརྒྱུད་པའི་གསོལ་འདེབས་ནི། ན་མོ་མ་ཧཱ་ཀ་རུ་ཎི་ཀ་ཡེ། ཐུབ་དབང་བྱམས་པ་ཐོགས་མེད་དབྱིག་གི་གཉེན། །རྣམ་གྲོལ་སྡེ་དང་གྲོལ་སྡེ་མཆོག་གི་སྡེ། །འདུལ་སྡེ་རྣམ་སྣང་མཛད་དང་སེང་གེ་བཟང་། །ཀུ་ས་ལི་གཉིས་པཎ་ཆེན་གསེར་གླིང་པ། །རྒྱ་ཆེན་སྤྱོད་པའི་རྒྱུད་ལ་གསོལ་བ་འདེབས། །ཤེར་ཕྱིན་དེ་ཉིད་རྟོགས་པར་བྱིན་གྱིས་རློབས། །སངས་རྒྱས་འཇམ་དབྱངས་ཀླུ་སྒྲུབ་འཕགས་པ་ལྷ། །ཟླ་གྲགས་རིགས་པའི་ཁུ་བྱུག་ཆེ་ཆུང་སོགས། །ཟབ་མོ་ལྟ་བའི་བརྒྱུད་པ་ལ་གསོལ་བ་འདེབས། །མཐའ་བྲལ་དབུ་མ་རྟོགས་པར་བྱིན་གྱིས་རློབས། །ཤིང་རྟ་གཉིས་ཀྱི་ཆུ་བོ་འབབ་པའི་མཚོ། །དྷི་པཾ་ཀ་ར་ཤྲཱི་ཛྙཱ་ནའི་ཞབས། །འབྲོམ་སྟོན་ཚུལ་ཁྲིམས་འབར་དང་བྱ་ཡུལ་བ། །ཡེ་ཤེས་འབར་དང་རྡོ་རྗེ་སེང་གེ་དང་། །ལྕགས་རི་བ་དང་སྣེ་ཟུར་བ་ལ་སོགས། །བཀའ་གདམས་བརྒྱུད་པ་རྣམས་ལ་གསོལ་བ་འདེབས། །བྱང་ཆུབ་སེམས་གཉིས་འབྱོང་བར་བྱིན་གྱིས་རློབས། །བཀའ་ཕྱག་ཆུ་བོ་གཉིས་འདྲེས་རྒྱ་མཚོ་ཆེ། །རྒྱལ་བས་ལུང་བསྟན་དགེ་སློང་འཚོ་མཛད་ཅེས། །གངས་རིའི་ཁྲོད་འདིར་མཚུངས་མེད་ཟླ་བྲལ་བ། །དྭགས་
པོ་བཀའ་བརྒྱུད་གྲགས་ལ་གསོལ་བ་འདེབས། །ལྟ་སྤྱོད་ཟུང་དུ་འབྲེལ་བར་བྱིན་གྱིས་རློབས། །དུས་གསུམ་མཁྱེན་པ་རས་ཆེན་སྤོམ་བྲག་པ། །ཀརྨ་པ་དང་གཉེན་རས་རང་བྱུང་བ། །གཡུང་སྟོན་པ་དང་མགོན་པོ་རྒྱལ་མཚན་ཞབས། །རོལ་པའི་རྡོ་རྗེ་མཁའ་སྤྱོད་དྲི་མེད་དཔལ། །དེ་བཞིན་གཤེགས་པ་ཆོས་དཔལ་ཡེ་ཤེས་དང་། །མཐོང་བ་དོན་ལྡན་ཀུན་མཁྱེན་འཇམ་དཔལ་བཟང་། །དཔལ་འབྱོར་དོན་གྲུབ་ཆོས་གྲགས་རྒྱ་མཚོ་དང་། །བཀྲ་ཤིས་དཔལ་འབྱོར་མི་བསྐྱོད་དཀོན་མཆོག་འབངས། །དབང་ཕྱུག་རྡོ་རྗེ་དྲིན་ཆེན་ཆོས་རྗེ་དབང་། །རྫོགས་པའི་སངས་རྒྱས་ཕྲེང་བ་རྨད་བྱུང་བ། །ཀརྨ་བཀའ་བརྒྱུད་རྣམས་ལ་གསོལ་བ་འདེབས། །ཚེ་གཅིག་སངས་རྒྱས་འགྲུབ་པར་བྱིན་གྱིས་རློབས། །དེ་ལྟར་བློ་སྦྱོང་བརྒྱུད་པའི་བླ་མ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ནག་པོའི་ཆོས་བཞི་ནམ་ཡང་མི་སྤྱོད་ཅིང་། །དཀར་ནག་བླང་དོར་ཕྱེད་པར་བྱིན་གྱིས་རློབས། །མི་རྟག་འཆི་བས་བློ་སྣ་རབ་བསྐྱུངས་ནས། །ཚེ་འདིས་བྱ་བློ་མེད་པར་བྱིན་གྱིས་རློབས། །ཕྱི་རུ་དགྲ་འདྲེ་བརྡུང་བཏགས་མི་བྱེད་པར། །ནང་དུ་རང་རྒྱུད་འདུལ་
བར་བྱིན་གྱིས་རློབས། །ཚེ་འདིས་ཆེ་འབྱོར་བསྒྲུབ་ལ་མི་བརྩོན་པར། །བྱང་ཆུབ་བསྒྲུབ་ལ་བརྩོན་པར་བྱིན་གྱིས་རློབས། །ཐེག་དམན་ཞི་བདེའི་བསམ་པ་མི་སྐྱེ་བར། །ཚད་མེད་སྙིང་རྗེ་སྐྱེ་བར་བྱིན་གྱིས་རློབས། །འགྲོ་བའི་དོན་དུ་རྫོགས་པའི་བྱང་ཆུབ་ནི། །གེགས་མེད་མྱུར་དུ་ཐོབ་པར་བྱིན་གྱིས་རློབས། །ཞེས་པ་འདི་རང་ལོ་ཉི་ཤུ་པ་ཡི་དུས་ཤར་འོད་ཟེར་དམ་པའི་ཕོ་བྲང་གི་ཆོས་རའི་ཐོག་ཏུ། ༧ རྗེ་དྲིན་ཆེན་ཆོས་ཀྱི་དབང་ཕྱུག་གི་ཞལ་སྔ་ནས་བློ་སྦྱོང་ཚིགས་བཅད་བརྒྱད་མའི་འགྲེལ་པ་རྗེ་ཉིད་ཀྱིས་མཛད་པ་རྩ་བར་བྱས་ནས་ཞག་རེ་རེ་ལ་ཚིགས་བཅད་རེ་རེའི་ཁྲིད་ལྔགས་བཤད་ཤིན་ཏུ་རྒྱས་པ་དང་བཅས་ནས་ཞག་བརྒྱད་ལ་གསུངས་ཏེ། རྗེ་གླང་རི་ཐང་པ་ནི་སངས་རྒྱས་སྣང་བ་མཐའ་ཡས་ཀྱི་སྤྲུལ་པ་ཡིན་པར་བཤད་དེ། མཁས་གྲུབ་ཁྱུང་པོ་རྣལ་འབྱོར་རྒྱ་གར་རྡོ་རྗེ་གདན་གྱི་མཁན་པོ་ལ་བསྙེན་རྫོགས་ཞུས་པས་མཁན་པོའི་ངེད་ཀྱིས་ཁྱོད་ཀྱི་མཁན་པོ་མི་ཡོངས་ཁྱོད་འཕགས་པ་སྤྱན་རས་གཟིགས་ཀྱི་སྤྲུལ་པ་ཡིན་པར་འདུག །ཁྱོད་ཀྱི་མཁན་པོ་བོད་དུ་སངས་རྒྱས་འོད་དཔག་མེད་ཀྱིས་སྤྲུལ་པ་ཤིང་གླང་མའི་ཚལ་ན་རྡོ་རྗེ་སེང་གེ་བྱ་བ་བཞུགས་པས་དེ་ལ་གསུངས་ནས་ལུང་བསྟན་པ་ཡིན་ནོ། །དེས་ན་ཇོ་བོ་རྗེ་ཨ་ཏི་ཤ་དང་རྗེ་གླང་རི་ཐང་པོ་དང་། ༧ རྗེ་ཞྭ་དམར་ན་རིམ་རྣམས་ཐུགས་བརྒྱུད་གཅིག་ཅེས་གྲྭ་བསྒྲེས་མང་ཐོས་དཔྱོད་ལྡན་རྣམས་ཀྱིས་ཡང་ཡང་གསུངས་ཤིང་། ༧ རྗེ་ཉིད་ཀྱི་
ཁྲིད་འདི་རྩལ་དུ་སྟོན་པར་མཛད་པ་དང་བྱིན་རླབས་ཀྱི་བཀའ་བབས་སུ་སྣང་ངོ་། །ཁྲིད་འདི་གསུངས་པའི་ཚེ་དབུ་ཞྭ་བཀའ་གདམས་ཞྭ་མོ་ཆེ་དང་སྐུ་སྟོད་ཇོ་གོས་དང་། ན་བཟའ་ཆོས་སྒོ་རྣམ་གསུམ་མཛད་པས་རྒྱུན་པར་དང་མི་འདྲ་བར་སྐུ་ཤིན་ཏུ་ཟིལ་ཆེ་ཞིང་བག་ཆགས་པ་ཅིག་བྱུང་ཞེས་དགེ་འདུན་པ་ཀུན་མཐུན་སྣང་གྲུབ་སྟེ། བཀའ་བབས་ཀྱི་རྟེན་འབྲེལ་ཡིན་ནམ་བདག་རང་སྙམ་མོ། །དེ་ལྟར་སྔ་སོར་བཀའ་དྲིན་དུ་རྩལ་བའི་བློ་སྦྱོང་བརྒྱུད་པའི་གསོལ་འདི་ཕྱིས་༧ ཀརྨ་རཱ་ག་ཨ་སྱས་རང་ལོ་སོ་བཞི་པར་དཔལ་རི་ཁྲོད་དུ་བྲིས་པའོ།། ༈ ཕྱག་ཆེན་བརྒྱུད་པའི་གསོལ་འདེབས་ནི། ན་མོ་མ་ཧཱ་མུ་དྲ་ཡེ། རྡོ་རྗེ་འཆང་ཆེན་བློ་གྲོས་རིན་ཆེན་དང་། །བྲམ་ཟེ་ཆེན་པོ་ཀླུ་སྒྲུབ་ཤ་བ་རི། །མེ་ཏྲི་མར་པ་མི་ལ་སྒམ་པོ་པ། །གསོལ་བ་འདེབས་སོ་ཡེ་ཤེས་སྤྱན་གྱིས་གཟིགས། །རང་སེམས་ཆོས་སྐུར་རྟོགས་པར་བྱིན་གྱིས་རློབས། །དུས་གསུམ་མཁྱེན་པ་རས་ཆེན་སྤོམ་བྲག་པ། །ཀརྨ་པ་དང་ཨུ་རྒྱན་རང་བྱུང་བ། །གཡུང་སྟོན་པ་དང་རོལ་པའི་རྡོ་རྗེའི་ཞབས། །གསོལ་བ་འདེབས་སོ་ཡེ་ཤེས་སྤྱན་གྱིས་གཟིགས། །རང་སེམས་ཆོས་སྐུར་རྟོགས་པར་བྱིན་གྱིས་རློབས། །མཁའ་སྤྱོད་དབང་པོ་ཐུབ་ཆེན་དེ་བཞིན་གཤེགས། །རིན་ཆེན་བཟང་པོ་མཐོང་བ་དོན་ལྡན་དང་། །འཇམ་དཔལ་བཟང་པོ་
དཔའ་འབྱོར་དོན་གྲུབ་ཞབས། །གསོལ་བ་འདེབས་སོ་ཡེ་ཤེས་སྤྱན་གྱིས་གཟིགས། །རང་སེམས་ཆོས་སྐུར་རྟོགས་པར་བྱིན་གྱིས་རློབས། །ཆོས་གྲགས་རྒྱ་མཚོ་མཉན་པ་མི་བསྐྱོད་རྗེ། །དཀོན་མཆོག་ཡན་ལག་དབང་ཕྱུག་རྡོ་རྗེའི་ཞབས། །བཀའ་དྲིན་མཉམ་མེད་ཆོས་ཀྱི་དབང་ཕྱུག་ལ། །གསོལ་བ་འདེབས་སོ་ཡེ་ཤེས་སྤྱན་གྱིས་གཟིགས། །རང་སེམས་ཆོས་སྐུར་རྟོགས་པར་བྱིན་གྱིས་རློབས། །རབ་འབྱམས་དཀྱིལ་འཁོར་ཀུན་གྱི་དབང་ཕྱུག་གཙོ། །སྐལ་ལྡན་བྱིན་གྱིས་བརླབ་མཛད་རྣལ་འབྱོར་མ། །ཕྲིན་ལས་ཀུན་འགྲུབ་ནག་པོ་ལྕམ་དྲལ་ལ། །གསོལ་བ་འདེབས་སོ་ཡེ་ཤེས་སྤྱན་གྱིས་གཟིགས། །རང་སེམས་ཆོས་སྐུར་རྟོགས་པར་བྱིན་གྱིས་རློབས། །དེ་ལྟར་ཕྱག་ཆེན་བརྒྱུད་པའི་བླ་མ་ལ། །གསོལ་བ་འདེབས་སོ་ཡེ་ཤེས་སྤྱན་གྱིས་གཟིགས། །ཐ་སྙད་ཚིག་གི་བརྒྱུད་པར་མི་ཞུགས་པར། །ཀཾ་ཚང་དོན་བརྒྱུད་བསྙེག་པར་བྱིན་གྱིས་རློབས། །མ་གོ་གོ་བརྫུ་རང་ཉིད་མི་བསླུ་བར། །ངོ་སྤྲོད་རྡོ་རུས་གཏུགས་པར་བྱིན་གྱིས་རློབས། །ཚེ་འདིས་ཆེད་དུ་སྒོམ་སྒྲུབ་མི་བཤོལ་བར། །ཞེན་པ་ནང་ནས་ལོག་པར་བྱིན་གྱིས་རློབས། །
གེགས་སེལ་བོགས་འདོན་གཞན་ནས་མི་ཚོལ་བར། །གདུང་ཤུགས་གསོལ་བ་འདེབས་པར་བྱིན་གྱིས་རློབས། །བློ་བྱས་སྟོང་ཉིད་ཙམ་གྱིས་མི་ཚིམ་པར། །རང་སེམས་ངོ་བོར་ལྟ་བར་བྱིན་གྱིས་རློབས། །སྟོང་ལྟས་རྒྱུ་འབྲས་ཁྱད་དུ་མི་གསོད་པར། །སྡོམ་གསུམ་ཚུལ་བཞིན་བསྲུང་བར་བྱིན་གྱིས་རློབས། །བདེ་གསལ་མི་རྟོག་ཉམས་ཀྱིས་མི་འཆིང་བར། །གང་ཤར་སྤང་བླང་མེད་པར་བྱིན་གྱིས་རློབས། །བསྒོམ་ཡུལ་བཟང་ཡུལ་ང་རྒྱལ་མི་སྐྱེ་བར། །རང་སེམས་དམན་ས་འཛིན་པར་བྱིན་གྱིས་རློབས། །འབྲས་བུ་ཕྱི་དུས་ཡིད་སྨོན་མི་བྱེད་པར། །སྐུ་གསུམ་རང་ལ་རྙེད་པར་བྱིན་གྱིས་རློབས། །འཆི་ཚེ་བློས་བྱས་རྩབ་རྩུབ་མི་བསྒོམ་པར། །འོད་གསལ་ཆོས་སྐུར་འཕོ་བར་བྱིན་གྱིས་རློབས། །བར་དོ་འཇིགས་སྐྲག་སྣང་བ་ཤར་སྲིད་ན། །འཇིགས་མཁན་ངོ་བོ་རྟོགས་པར་བྱིན་གྱིས་རློབས། །ལོངས་སྐུའི་ཞིང་དུ་བརྫུས་ཏེ་སྐྱེས་ནས་ཀྱང་། །སྤྲུལ་པས་གཞན་དོན་བྱེད་པར་བྱིན་གྱིས་རློབས། །ཞེས་པ་འདི་སྔ་སོར་རང་ལོ་ཉི་ཤུ་པར་ཟ་དམ་པར་ཞེས། སྔོན་རྗེ་མི་ལ་རས་ཆེན་གྱིས་རླུང་བུམ་པ་ཅན་བཟུང་ནས་ལ་ཕྱི་ནས་སྔ་དྲོ་གཅིག་ལ། འཕན་ཡུལ་དུ་སླེབ་པར་མཛད་ནས་བྲག་ཕ་ཀིའི་སྟེང་དུ་ང་ཡི་བརྒྱུད་འཛིན་
ཞིག་གི་བསྟན་པ་དར་བར་འདུག །ཅེས་ལུང་བསྟན་པའི་གནས་སུ་ཡབ་སྲས་གསུམ་ཞལ་རྒྱས་དུས། ཐུབ་བསྟན་ཉིན་གླིང་གི་རབ་འབྱམས་པ་ཡང་མང་པོས་ཕྱག་ཆེན་གསུང་དགོས་ཞུས་པས། ཁྱེད་རྣམས་སོ་དཀར་ནས་མགོ་མ་དཀར་བར་དུ་ཕར་ཕྱིན་དབུ་མ་ལ་སློབ་གཉེར་བྱས་ནས་སླར་སེམས་ངོ་སྤྲད་དགོས་ཟེར་བ་བསྟན་པ་ལ་གནོད་པར་སྣང་། དབུ་ཕལ་ལས་ལྷག་པའི་ཕྱག་ཆེན་ང་ལ་མེད། འོན་ཀྱང་ཁྱེད་རྣམས་ཀྱིས་འཆད་མ་བྲ་བསམ་པར་འདུག་པས། འཆད་གསུངས་ནས་ཟླ་བ་ཧྲིལ་གཅིག་ཏུ་ཉི་མ་ཕྱེད་ཡོལ་ནས་ཉི་མ་མ་ནུབ་བར་དུ་ལྗགས་བཤད་རྒྱས་པ་དང་། གྲོལ་ཁ་དམིགས་པ་རེ་སྤྲད་པར་མཛད་དོ། །གྲྭ་རྒན་རྣམས་ཀྱིས་ལྷན་ཅིག་སྐྱེས་སྦྱོར་རྒྱས་པ་འདི་ལྟ་བུ་ནི་སློབ་དཔོན་གྱིས་སྔ་གང་དུ་ཡང་མ་འཆད་ཅེས་གླེང་ཕྱིས་ཞིང་བརྗེས་ནས་དེ་དུས་ཀྱི་ཁྲིད་ཟབ་པ་རྒྱས་པ་དེ། ཐུབ་པ་མྱ་ངན་ལས་འདས་ཁར་དཔལ་འབྲས་སྤུང་དུ་དཔལ་ལྡན་དུས་ཀྱི་འཁོར་ལོ་ཞལ་ཆེམ་གྱི་ཚུལ་དུ་གསུངས་པ་ལྟར། ཁྲིད་ཡང་རང་རེ་ལ་ཞལ་ཆེམ་གྱི་ཚུལ་དུ་གསུངས་པ་ལྟར་སྣང་ཞེས་གྲྭ་རྒན་རྣམས་གླེང་ངོ་། ༈ །ཕྱིས་རྗེ་ཉིད་ཀྱི་ཆིབས་ཆུང་བ་སྟག་ཚང་ཡང་དག་ཅེས་ལུས་ཧྲིལ་བུར་མར་མེར་དམིགས་ནས་ཤིང་བརྩིགས་ཆེན་པོར་མེ་སྦར་བའི་ནང་དུ་བསྲེགས་པས། མེས་ཅུང་ཟད་ཀྱང་མ་གནོད་ཅིང་ཕྱིས་ནས་ཆུ་བར་གྱིས་ཚོགས་ནས་ནམ་མཁར་འཕུར་ཏེ་མཁའ་སྤྱོད་དུ་གཤེགས་པ་དེ་དང་། ༧ ཉིན་གླིང་གི་རབ་འབྱམས་བ་སྐུ་སྐྱེ་ཞེས་པ་ཕྱིས་ཇོ་མོ་ཚེ་རིང་མའི་གངས་མགུར་ཕུག་པར་བསྒོམས་པས། གངས་ཀྱིས་
བཅད་དེ་ཟླ་བ་དྲུག་ལ་འཚོ་བ་ཅུང་ཟད་ཀྱང་མེད་པས། རྣ་བ་གཅིག་བཞོས་ཤི་ང་གསོལ་ནས་སྐུ་ཉམས་དང་ལྡན་པར་བཞུགས་པས་གྲུབ་ཐོབ་ཆེན་པོར་གྲགས་པ་དེ་དང་། གྲྭ་ཚང་གི་གྲྭ་པ་རྟོགས་ལྡན་ཤཱཀྱ་ཞེས་པ་གཡེར་པའི་ཟླ་བ་ཕུག་ཏུ་ཕྱེ་བྲེ་གསུམ་ཙམ་ལས་མེད་པར་ཕུག་པའི་སྒོ་བརྩིགས་ཏེ་ཟླ་བ་དྲུག་ཏུ་རླུང་གི་བཅུད་ལེན་མཛད་པས་སྐུ་གཟི་བརྗིད་དང་ལྡན་པར་བཞུགས་པ་དང་། རྒྱུན་པར་དབྱར་དགུན་མེད་པར་རས་གོས་རུལ་པ་གཅིག་ཀྱང་མཛད་ནས་གྲུབ་ཐོབ་ཆེན་པོར་གྲགས་པ་དེ་དང་། ཆོས་མཛད་རྣམས་རུ་བ་ཞེས་གྲྭ་ཚང་དུ་སློབ་གཉེར་མ་ཆག་པའི་ངོས་ནས་དབྱར་དགུན་མེད་པར་སྐུ་གཟན་ཅིག་ཀྱང་མཛད་ཅིང་ནམ་དུའང་དབུ་སྔས་སྤངས་བར་མཛད་ཅིང་ཕྱིས་འདུལ་ལུང་བཟུང་ནས་འདུལ་འཛིན་གྲགས་པ་དེ་བློདང་། དགེ་སློང་རྒྱལ་བ་ཞེས་དབུ་སྔས་སྤངས་བ་དང་ཡེང་མེད་རྒྱུན་དུ་མཛད་པ་དེ་དང་། དགེ་སློང་སྣང་མཐའ་ཞེས་ཤིན་ཏུ་དམན་ས་བཟུང་ནས་ངག་སློབ་དཔོན་གྱི་མཚན་སྔགས་དང་དང་ལུས་གཙུག་ལག་ཁང་གི་ཕྱག་དར་གཙོ་བོར་མཛད་པ་དེ་དང་། རིན་ཆེན་དཀོན་མཆོག་དཔལ་འབྱོར་དང་། རབ་འབྱམས་པ་བདེ་ཆེན་དང་འདྲ་བའི་དྲུང་རམ་པ་བྱིན་རླབས་དང་། ཕྱིས་ཆུ་བར་དུ་སྒྲུབ་པ་མཛད་པའི་རབ་འབྱམས་པ་དགའ་བ་དང་། དགེ་སློང་ཏའུ་ཀརྨ་བཀྲ་ཤིས་ལ་སོགས་པ་རྣམས་ཀྱང་ཁྲིད་དེའི་ཁོང་དུ་ཐུགས་དམ་གསལ་དུ་འཁྲུངས་པ་དང་བོགས་བྱུང་བར་གྱུར་པ་མངོན་ཏེ། ཁོང་རྣམས་ཀྱི་རྩ་བའི་བླ་མ་སློབ་དཔོན་རིན་པོ་ཆེ་དང་། ཆོས་ཕྱག་རྒྱ་ཆེན་པོ་ཡིན་ཅིང་། ལྷན་ཅིག་སྐྱེས་སྦྱོར་གྱི་ཁྲིད་རྒྱས་པ་ནི་དེ་དུས་
མ་གཏོགས་གསུངས་སྐད་མི་འདུག་པས་སོ། །བདག་ལྟ་བུ་བསོད་ནམས་ཆུང་བའང་རྒྱལ་བ་ཐམས་ཅད་མཁྱེན་པའི་དྲུང་ནས་ཁྲིད་ཟབ་ལ་རྒྱས་པ་དེ་འདྲ་བ་ཐོབ་ཨང་སྙམ་ནས་དགའ་བ་ཡང་ཡང་སྐྱེས་ཏེ། ༧ རཱ་ག་ཨ་སྱས་རང་ལོ་སོ་བཞི་པར་གསོལ་བ་བཏབ་པའོ། ༈ བདེ་མཆོག་ལྷ་ལྔའི་བརྒྱུད་འདེབས་བཞུགས་སོ།། ན་མོ་ཤི་ཙཀྲ་སཾ་ཝ་ར་ཡེ། རྡོ་རྗེ་འཆང་ཆེན་རྡོ་རྗེ་རྣལ་འབྱོར་མ། །དྲིལ་བུ་པ་དང་ཛ་ལེན་དྷ་ར་པ། །བརྟུལ་ཞུགས་སྤྱོད་པའི་ཞབས་དང་མ་ཏང་གི །གསོལ་བ་འདེབས་སོ་བདེ་ཆེན་དངོས་གྲུབ་སྩོལ། །རྣམ་པར་རྒྱལ་བའི་ཞབས་དང་ཏེ་ལོ་པ། །ནཱ་རོ་མར་པ་མི་ལ་སྒམ་པོ་པ། །དུས་མཁྱེན་རས་ཆེན་སྤོམ་བྲག་ཀརྨ་པ། །གསོལ་བ་འདེབས་སོ་བདེ་ཆེན་དངོས་གྲུབ་སྩོལ། །གཉན་རས་རང་བྱུང་ཞབས་དང་གཡུང་སྟོན་པ། །རོལ་པའི་རྡོ་རྗེ་མཁའ་སྤྱོད་དེ་བཞིན་གཤེགས། །རཏྣ་བྷ་དྲ་དོན་ལྡན་འཇམ་དཔལ་བཟང་། །གསོལ་བ་འདེབས་སོ་བདེ་ཆེན་དངོས་གྲུབ་སྩོལ། །དཔལ་འབྱོར་དོན་འགྲུབ་མ་ཕམ་མཉན་པ་རྗེ། །མི་བསྐྱོད་རྒྱལ་བ་གར་དབང་དཀོན་མཆོག་འབངས། །དབང་ཕྱུག་རྡོ་རྗེ་དྲིན་ཅན་ཆོས་ཀྱི་དབང་། །གསོལ་བ་འདེབས་སོ་བདེ་ཆེན་དངོས་གྲུབ་སྩོལ། །ཧེ་
རུ་ཀ་དང་གཉིས་མེད་རྣལ་འབྱོར་མ། །ཕྱོགས་བཞིར་མཁའ་འགྲོ་མཚམས་བཞི་ཐོད་པས་མཚན། །གཞལ་ཡས་དུར་ཁྲོད་པད་རྡོར་མེ་རི་བཅས། །གསོལ་བ་འདེབས་སོ་བདེ་། ཆེན་དངོས་གྲུབ་སྩོལ། །རྒྱུད་ཀྱི་སྲུང་མ་ནག་པོ་བྱ་རོག་མཚན། །སྐུ་གསུང་ཐུགས་དང་དམ་ཚིག་ཡེ་ཤེས་ལྔའི། །དཀྱིལ་འཁོར་སྐྱོང་མཛད་དཔའ་བོ་མཁའ་འགྲོའི་ཚོགས། །གསོལ་བ་འདེབས་སོ་བདེ་ཆེན་དངོས་གྲུབ་སྩོལ། །དེ་ལྟར་བདེ་མཆོག་བརྒྱུད་པའི་བླ་མ་དང་། །དཀྱིལ་འཁོར་སྲུང་མ་བཅས་ལ་གསོལ་བ་འདེབས། །ཕྱི་རུ་འཛམ་གླིང་གནས་མཆོག་ཉི་ཤུ་བཞི། །ནང་དུ་རྩ་རླུང་ཐིག་ལེ་ཡིག་འབྲུའི་གཟུགས། །གཞན་དུ་དཔའ་བོ་རྣལ་འབྱོར་དྲུག་ཅུ་གཉིས། །དབྱེར་མེད་གཅིག་ཏུ་ཤེས་པའི་བསྐྱེད་རིམ་གྱིས། །ཉེ་བའི་བའི་གནས་སོགས་བགྲོད་པར་བྱིན་གྱིས་རློབས། །རྩ་གསུམ་འཁོར་ལོ་ལྔ་པོ་གསལ་བའི་དབུས། །སྤྲུལ་པའི་གནས་སུ་འབར་བའི་རྣལ་འབྱོར་ལ། །བདེ་ཆེན་ཧེ་རུ་ཀ་དཔལ་རང་བཞུགས་ནས། །འཁོར་ལོ་ལྔ་ཡི་ལྷ་ཚོགས་མཉེས་བྱས་ཏེ། །མཆོག་ཏུ་མི་འགྱུར་འགྲུབ་པར་བྱིན་གྱིས་རློབས། །བསྐྱེད་རིམ་སྤྲུལ་སྐུ་འོད་གསལ་ཆོས་སྐུ་དང་། །ཟུང་
འཇུག་ལོངས་སྤྱོད་རྫོགས་སུ་གོམས་པའི་མཐུས། །འཆི་བ་ཆོས་སྐུ་བར་དོ་ལོངས་སྐུ་དང་། །སྐྱེ་བ་སྤྲུལ་པའི་སྐུ་རུ་རྟོགས་བྱས་ཏེ། རྒྱུད་ཀྱི་དགོངས་དོན་འགྲུབ་པར་བྱིན་གྱིས་རློབས། །འཆི་བ་ཞེས་བྱའི་རྣམ་རྟོག་ཤར་བའི་ཚེ། །འཁོར་ལོ་ལྔ་ཡི་དཔའ་བོ་ཌཱཀི་ཡིས། །གདུགས་དང་རྒྱལ་མཚན་བ་དན་རོལ་མོ་དང་། །གླུ་དང་གར་དང་འཇའ་འོད་མེ་ཏོག་ཆར། །སྣ་ཚོགས་མཆོད་པས་བདག་གི་སྡུན་བསུས་ནས། །བདེ་ཆེན་གནས་སུ་ཁྲིད་པར་བྱིན་གྱིས་རློབས། །ཞེས་ཟ་དམ་ཞེས་རྒྱལ་བས་ལུང་བསྟན་པའི་གནས་ཨོ་དནྟ་པུ་རིའི་ཀྱི་གཙུག་ལག་ཁང་དུ་རྗེ་ཆོས་ཀྱི་དབང་ཕྱུག་གི་ཞལ་སྔ་ནས་བདེ་མཆོག་ལྷ་ལྔ་ཚིགས་བཅད་མ་རྗེ་དུས་མཁྱེན་གྱི་ཐུགས་དམ་ལྔ་ཚན་དུ་གྲགས་པའི་དབང་བཞི་ཡོངས་རྫོགས་ཐོབ་པའི་བཀའ་དྲིན་དྲན་ནས་ཕྱིས་རང་ལོ་སོ་བཞི་པར་། ༧ ཀརྨ་ཨ་རཱ་གས་གསོལ་བ་བཏབ་པའོ།། ༈ །སྙན་བརྒྱུད་ལྷན་ཅིག་སྐྱེས་མ་ལྷ་ལྔ་བརྒྱུད་པའི་གསོལ་འདེབས་ནི། ན་མོ་གུ་རུ་བཛྲ་ཝཱ་ར་ཧི་ཡེ། རྡོ་རྗེ་འཆང་ཆེན་ཡེ་ཤེས་མཁའ་འགྲོ་མ། །ཏེ་ལོ་ནཱ་རོ་མར་པ་མི་ལ་རྗེ། །དྭགས་པོ་དུས་གསུམ་མཁྱེན་དང་རས་ཆེན་པ། །སྤོམ་བྲག་པ་དང་སྐྱེས་མཆོག་ཀརྨ་པ། །གཉེན་རས་རང་བྱུང་ཞབས་དང་གཡུང་སྟོན་
པ། །རོལ་པའི་རྡོ་རྗེ་ཡན་ཆད་གཅིག་བརྒྱུད་དུ། །སྙན་དུ་བརྒྱུད་པ་རྣམས་ལ་གསོལ་བ་འདེབས། །ད་ཕྱིན་རྒྱ་ཆེན་སྤེལ་ན་འགྲོ་དོན་ཆེ། །ཞེས་པའི་གནང་བ་ཕག་མོས་རབ་གནང་ནས། །འགྲོ་དོན་རླབས་ཆེན་མཛད་པའི་མཁའ་སྤྱོད་དབང་། །དེ་བཞིན་གཤེགས་པ་རཏྣ་བྷ་དྲ་དང་། །དོན་ལྡན་འཇམ་དཔལ་བཟང་པོ་གོ་ཤྲི་པ། །རང་བྱུང་མཚོ་སྐྱེས་མཉན་པ་མི་བསྐྱོད་རྗེ། །དཀོན་མཆོག་འབངས་དང་དབང་ཕྱུག་རྡོ་རྗེའི་ཞབས། །མཚུངས་མེད་བཀའ་དྲིན་སྩོལ་མཛད་ཆོས་ཀྱི་དབང་། །སྙན་བརྒྱུད་བླ་མ་རྣམས་ལ་གསོལ་བ་འདེབས། །བདག་མེད་མ་དང་རྡོ་རྗེ་རྣལ་འབྱོར་མ། །རྡོ་རྗེ་བདེ་མ་དེ་བཞིན་སྣ་ཚོགས་ཡུམ། །དོན་གྲུབ་མ་དང་ཁྲོས་མ་དབུ་བཅད་མ། །ཞལ་བཞི་ཞལ་གཉིས་མཁའ་སྤྱོད་དཀར་དམར་སོགས། །མཚན་དང་སྐུ་ཡི་རྣམ་འགྱུར་མཐའ་ཡས་ཀྱང་། །ཀུན་འདུས་ཀུན་གྱི་བདག་ཉིད་ཞལ་གཅིག་མ། །ཕྱོགས་བཞིར་རིགས་བཞིའི་ཆོས་འབྱུང་གཞལ་ཡས་ཁང་། །པད་ཀོར་ཐོད་ར་རྡོ་རྗེ་མེ་རིའི་གུར། །དཀྱིལ་འཁོར་ལྷ་དང་བཅས་ལ་གསོལ་བ་འདེབས། །ལས་ཀྱི་མཁའ་འགྲོ་འཇིག་རྟེན་མཁའ་འགྲོ་དང་། །ཤ་ཟ་མཁའ་འགྲོ་
མཁའ་འགྲོ་ཕོ་ཉ་སོགས། །ཆོས་བདག་སྲུང་མར་བཅས་ལ་གསོལ་བ་འདེབས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །ཕྱི་རུ་འབྱུང་ལྔ་རིགས་ལྔ་ཁ་དོག་ལྔ། །ནང་དུ་ཕུང་ལྔ་ཁམས་ལྔ་ཉོན་མོངས་ལྔ། །དག་པ་སྐུ་ལྔ་ཡེ་ཤེས་སངས་རྒྱས་ལྔ། །སྦྱང་གཞི་སྦྱོང་བྱེད་ཤེས་པའི་བསྐྱེད་རིམ་གྱིས། །མཁའ་འགྲོ་ལྔ་པོ་འགྲུབ་པར་བྱིན་གྱིས་རློབས། །ལྟོགས་ན་ཟས་དང་འཁྱག་ན་གོས་དང་ནི། །འཇིགས་ལས་སྐྱོབ་སོགས་རྟེན་འབྲེལ་སྣ་ཚོགས་དང་། །འབར་བ་གསུམ་དང་འདུ་བ་རྣམ་པ་གསུམ། །དྲོད་ཚད་གསུམ་དང་བརྟུལ་ཞུགས་ངར་ལྡན་པ། །ཐུན་མོང་དངོས་གྲུབ་ཐོབ་པར་བྱིན་གྱིས་རློབས། །ལྟེ་བར་ཆོས་འབྱུང་སྔགས་བཅས་འཁོར་བའི་འོད། །དྷུ་ཏིའི་ལམ་ནས་ཕག་ཞལ་སྨིན་ཕྲག་ཏུ། །བདེ་བའི་གཡུང་དྲུང་བར་མེད་འཁོར་བའི་མཐུས། །རྒྱལ་བ་ཀུན་གྱི་བྱིན་རླབས་རབ་བསྡུས་ནས། །མཆོག་ཐུན་དངོས་གྲུབ་ཐོབ་པར་བྱིན་གྱིས་རློབས། །རྟག་ཆད་འགྲོ་འོང་བྲལ་བ་ཆོས་ཀྱི་སྐུ། །སུས་ཀྱང་མ་བྱས་གདོད་ནས་རྣམ་པར་དག །ཀུན་ཁྱབ་ཀུན་གྱི་རང་བཞིན་གདོད་མའི་མགོན། །སྨྲ་བརྗོད་ཡིད་དཔྱོད་ལས་འདས་རྒྱལ་བའི་
ཡུམ། །དོན་གྱི་ཕག་མོ་རྟོགས་པར་བྱིན་གྱིས་རློབས། །སྤྲུལ་པའི་འཁོར་ལོ་ཨ་ཡིག་ཐུང་ངུའི་གཟུགས། །རབ་ཏུ་འབར་བས་ཕུང་ཁམས་སྐྱེ་མཆེད་སྦྱངས། །བདེ་ཆེན་འཁོར་ལོ་ཧཾ་ཡིག་ཞུ་བའི་རྒྱུན། །རྩ་འཁོར་ཀུན་བཀང་བདེ་སྟོང་དབྱེར་མེད་པ། །བརྡ་ཡི་ཕག་མོ་འགྲུབ་པར་བྱིན་གྱིས་རློབས། །ཆོས་སྐུ་མཁའ་འགྲོ་སེམས་ལ་རབ་རྟོགས་ཏེ། ལོངས་སྐུ་མཁའ་འགྲོ་བསྙེན་ཅིང་བསྒྲུབ་པའི་མཐུས། །རྩ་རླུང་ལས་སུ་རུང་བའི་བརྟུལ་ཞུགས་ཀྱིས། །སྤྲུལ་སྐུ་མཁའ་འགྲོ་བདེ་བས་མཆོད་བྱས་པས། །ཚེ་གཅིག་འཇའ་ལུས་འགྲུབ་པར་བྱིན་གྱིས་རློབས། །ལྷག་མེད་འཇའ་ལུས་ཚེ་འདིར་མ་འགྲུབ་ཀྱང་། །ཕུང་པོ་ལྷག་མ་སྐུ་གཟུགས་རིང་བསྲེལ་དང་། །ས་གཡོས་འཇའ་འོད་མེ་ཏོག་ཆར་དང་བཅས། །བར་དོའི་རྣམ་ཤེས་མཁའ་འགྲོས་རབ་བསུས་ནས། །བདེ་བ་ཅན་དུ་འཁྲིད་པར་བྱིན་གྱིས་རློབས། །ཞེས་པ་འདི། ༧ རཱ་ག་ཨ་སྱས་རང་ལོ་ཉི་ཤུ་པར་གནས་སྟོད་ལུང་མཚུར་ཕུ་ཞེས་ས་རྡོ་རི་བྲག་ཐམས་ཅད་དཔལ་བདེ་མཆོག་ཡབ་ཡུམ་གྱི་སྐུ་ཁོ་ན་སྣང་བས། ༈ རྗེ་དུས་མཁྱེན་གྱི་རྗེས་སུ་ཡང་མ་རྙེད་པར་གྲགས་པའི་གནས་དེར། ༈ ཞྭ་དམར་དྲུག་པའི་ཞལ་སྔ་ནས་སྙན་བརྒྱུད་ལྷན་ཅིག་སྐྱེས་མ་ལྷ་ལྔའི་དབང་བཞི་ཡོངས་རྫོགས་དབང་རྫས་ཕྱག་
གིས་འགྲིམ་པ་དང་། སླར་ཡང་འོད་ཟེར་དམ་པའི་གཙུག་ལག་ཏུ་དབང་བཞི་ཡོངས་རྫོགས་དབང་རྫས་རྣམས་ཕྱག་གིས་ལན་དུ་མར་འགྲིམ་པ་ཞིག་ཐོབ་པས་བཀའ་དྲིན་དྲན་པས་ཕྱིས་གསོལ་འདེབས་འདི་ངོམ་སྟོད་ཀྱི་རི་ཁྲོད་དུ་བྲིས་པའོ། །རྗེ་བཙུན་མ་འདི་རྗེ་ནཱ་རོ་ནས་ད་ཕན་ཞལ་གཟིགས་ཀྱི་རྒྱུན་མ་ཆད་ཅིང་། རྗེ་འདི་ཕས་ཀྱང་བྱང་ངམ་རིང་ཕྱོགས་སུ་ཞལ་གཟིགས་པར་སྣང་བས་བྱིན་རླབས་རྒྱུན་གཞན་དང་མི་འདྲ་བ་གཅིག་ཡོད་པར་སྣང་ངོ་། །ལྷག་པར་ཀར་ལུགས་འདི་ལ་བཀའ་བབ་པའི་ལོ་རྒྱུས་དུ་མ་སྣང་ཞིང་བདེ་མཆོག་རྒྱུད་ཀྱི་གྲྭ་ཚན་གཅིག་ཡིན་སྣང་ལགས་སོ། ། ༈ རྒྱ་ཆེན་བརྒྱུད་པའི་བརྒྱུད་རིམ་གསོལ་འདེབས་ནི། ན་མོ་ཨཱཿརྱ་མཻ་ཏྲི་ཡེ། དང་པོ་བྱང་ཆུབ་མཆོག་ཏུ་ཐུགས་མཆོག་བསྐྱེད། །བར་དུ་ཕ་རོལ་ཕྱིན་བཅུ་མཐར་ཕྱིན་མཛད། །ད་ལྟ་རྒྱལ་ཚབ་འགྲོ་བའི་མགོན་གྱུར་པ། །དགའ་ལྡན་བཞུགས་པ་དེ་ལ་གསོལ་བ་འདེབས། །སྔོན་ཚེ་བྱམས་པ་ཞེས་བྱའི་དགེ་སློང་གྱུར། །ལོ་གྲངས་དུ་མར་བྱམས་པ་བསྒོམས་པའི་མཐུས། །སྐྱེ་བ་ཀུན་ཏུ་བྱམས་པའི་མཚན་ལྡན་ཞིང་། །མ་འོངས་བྱམས་པར་གྱུར་དེར་གསོལ་བ་འདེབས། །དམ་པ་ཏོག་དཀར་འཛམ་གླིང་གཤེགས་པའི་ཚེ། །ཁོ་བོའི་འདི་ནས་འཛམ་བུའི་གླིང་དུ་འགྲོ། །ཁྱོད་ཀྱིས་ལྷ་རྣམས་བག་མེད་གཉིད་ལས་
སློངས། །ཞེས་གསུངས་ཅོད་པན་བཅིང་དེར་གསོལ་བ་འདེབས། །སྔོན་ཚེ་ཐོགས་མེད་ཅེས་བྱའི་པཎྜི་ཏས། །བཞི་གསུམ་ལོ་གྲངས་བར་དུ་ཁྱེད་བསྒྲུབ་ཚེ། །དངོས་སུ་ཞལ་བསྟན་ལྷ་ཡུལ་ཁྲིད་མཛད་ནས། །བྱམས་ཆོས་གསུངས་མཛད་དེ་ལ་གསོལ་བ་འདེབས། །བདེ་བ་ཅན་ན་རྒྱལ་བ་འོད་དཔག་མེད། །དགའ་ལྡན་གནས་ན་རྒྱལ་སྲས་མ་ཕམ་པ། །གངས་རིའི་ཁྲོད་འདིར་ཞྭ་དམར་ཅོད་པན་ཅན། །སྤྲུལ་མང་སྣ་ཚོགས་སྟོན་དེར་གསོལ་བ་འདེབས། །ངོ་བོ་གཅིག་ཀྱང་སྣང་ཚུལ་ཐ་དད་ཡང་། །དགའ་ལྡན་བྱམས་པ་གླིང་གི་ཆོས་གྲྭ་རུ། །ཆོས་ཀྱི་དབང་ཕྱུག་ཆོས་འཁོར་བསྐོར་བའི་ཚེ། །དངོས་སུ་ཞལ་སྟོན་མཛད་པར་གསོལ་བ་འདེབས། །བྱམས་ཆོས་དངོས་ཀྱིས་རྗེས་སུ་བཟུང་བའི་མཐུས། །ལྷ་ཡི་ཁྲོད་དུ་སྐད་ཅིག་ཆོས་ཉན་ནས། །འཛམ་བུའི་གླིང་འདིར་བྱམས་ཆོས་དར་མཛད་པ། །སློབ་དཔོན་ཐོགས་མེད་ཞབས་ལ་གསོལ་བ་འདེབས། །དེ་ལས་བྱུང་བ་རྒྱ་ཆེན་སྤྱོད་པའི་ཆུ། །གདུལ་བྱའི་ཡུལ་དུ་འདྲེན་མཛད་ཤིང་རྟ་མཆོག །པཎྜི་ཏ་དང་སྐད་གཉིས་སྨྲ་བ་སོགས། །བརྒྱུད་པའི་བླ་མ་རྣམས་ལ་གསོལ་བ་འདེབས། །གྲུབ་ཐོབ་ཀརྨ་པཀྵིའི་
ལུང་བསྟན་ལས། །ང་ཡི་རྣམ་འཕྲུལ་སྐྱེ་བ་ཉེར་གཅིག་པ། །བྱམས་པའི་བསྟན་པ་རྒྱས་པར་བྱེད་གསུངས་ལྟར། །ཞྭ་དམར་ཉེར་གཅིག་འབྱོན་ལ་གསོལ་བ་འདེབས། །མི་བསྐྱོད་རྗེ་དང་ཆོས་དབྱིངས་རྡོ་རྗེ་སོགས། །ཡེ་ཤེས་སྤྱན་ལྡན་སྐྱེས་བུ་དུ་མ་ཡིས། །བྱམས་ཆེན་དངོས་ཀྱི་སྤྲུལ་པར་མངའ་གསོལ་བ། །ཆོས་ཀྱི་དབང་ཕྱུག་ཞབས་ལ་གསོལ་བ་འདེབས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །བྱམས་མགོན་བླ་མས་རྟག་ཏུ་རྗེས་བཟུང་སྟེ། །བྱམས་པ་ཆེན་པོར་སྐྱེ་བར་བྱིན་གྱིས་རློབས། །འཕགས་བཞི་བསྐྱེད་ཡུམ་རྟོགས་པར་བྱིན་གྱིས་རློབས། །ཕ་རོལ་ཕྱིན་བཅུ་རྫོགས་པར་བྱིན་གྱིས་རློབས། །ཞེས་པ་འདི་སྔ་སོར། ༧ རྗེ་ཆོས་ཀྱི་དབང་ཕྱུག་གི་ཞབས་དྲུང་ནས། རྒྱན་གཉིས་འབྱེད་གཉིས་བླ་མར་བཅས་པ་ཐོབ་ཅིང་རྗེའི་འདས་མཆོད་ཀྱི་ཚེ། ༧ རྒྱལ་བའི་དབང་པོའི་བཀའ་བཀོད་ཤོག་དྲིལ་དུ་བྱས་ཏེ་ཚོགས་ལ། ༧ སི་ཏུ་རིན་པོ་ཆེས་ཀློག་པ་ལས། བྱང་ཆུབ་སེམས་དཔའ་བྱམས་པ་ཉིད་བསམ་བཞིན་དུ་མི་ཡིས་སྲིད་པ་ཉེ་བར་བཟུང་སྟེ། ཆོས་ཀྱི་འཁོར་ལོ་བསྐོར་ནས་སེམས་ཅན་མ་བསྒྲལ་བ་རྣམས་བསྒྲལ། མ་གྲོལ་བ་རྣམས་དགྲོལ། དབུགས་མ་དབྱུང་བ་རྣམས་དབུགས་དབྱུང་། ཕུང་པོ་ཡོངས་སུ་མྱ་ངན་ལས་འདས་པ་རྣམས་ཡོངས་སུ་མྱ་ངན་ལས་
བཟླས་ནས། རིང་པོར་མ་ལོན་པ་མྱ་ངན་ལས་འདས་པའི་ཚུལ་བསྟན་ཞེས་དང་། འདི་ཡི་ཚེ་བཟང་སྤྱོད་དང་། ལྷག་པར་བྱམས་སྨོན་ཁོ་ན་འདོན་དགོས་གསུངས་པས། བྱམས་པ་དངོས་ཡིན་པར་ཐག་ཆོད་ནས། རང་གི་ཡང་ལོ་བཅུ་ཙམ་ཞིག་ལ་བྱམས་སྨོན་མ་ཆག་པར་བྱས་ཤིང་ཕྱིས་གསོལ་འདེབས་འདི་བྱས་ཏེ། བྱམས་པ་དངོས་ལས་བྱམས་ཆོས་ཐོབ་ཨང་སྙམ་པ་ཡང་ཡང་བྱུང་བས། ཨ་རཱ་གས་སོ། ། ༈ །བྱང་ཆུབ་ལམ་སྒྲོན་གྱི་བརྒྱུད་པའི་གསོལ་འདེབས་ནི། ན་མོ་དྷི་པཾ་ཀ་ར་ཤྲཱི་ཛྙཱ་ན་ཡེ། སྣང་བ་མཐའ་ཡས་ཐུགས་རྗེའི་མཁའ་ལམ་ནས། །མར་མེ་མཛད་དཔལ་འགྲོ་བའི་དཔལ་དུ་ཤར། །བྱང་ཆུབ་སྤྱོད་པའི་འོད་སྟོང་རབ་འཕྲོ་བ། །ཇོ་བོ་ལྷ་གཅིག་ཞབས་ལ་གསོལ་བ་འདེབས། །བྷ་གྷ་ལ་རུ་རྒྱལ་བའི་སྲས་སུ་འཁྲུངས། །རྒྱལ་སྲིད་སྤང་ནས་རྒྱལ་བའི་བསྟན་ལ་ཞུགས། །རྒྱུད་སྡེ་ཀུན་ལ་མཁས་ཤིང་གྲུབ་པ་བརྙེས། །དྷི་པཾ་ཀ་རའི་ཞབས་ལ་གསོལ་བ་འདེབས། །འཕགས་པའི་ཡུལ་དུ་རིག་པའི་གནས་ལྔ་སྦྱངས། །ཤེས་བྱ་ཀུན་ལ་མཁས་པའི་མཁྱེན་པ་རྒྱས། །ལྔ་བརྒྱའི་གཙུག་རྒྱན་པཎྜི་ཏ་རུ་གྲགས། །དཔལ་ལྡན་ཨ་ཏི་ཤ་ལ་གསོལ་བ་འདེབས། །སྒྲོལ་མས་ལུང་བསྟན་བོད་ཡུལ་དབུས་སུ་ཁྱབ། །མཁའ་འགྲོས་ལུང་བསྟན་རྒྱལ་ཆོས་
གཏེར་ནས་བཏོན། །ཐེག་ཆེན་གདམ་པས་བོད་ཡུལ་མུན་པ་སེལ། །ཇོ་བོ་བཀའ་དྲིན་ཅན་ལ་གསོལ་བ་འདེབས། །ཁུ་རྔོག་འབྲོམ་གསུམ་རྒྱལ་སྲས་སྐུ་མཆེད་གསུམ། །བརྒྱུད་འཛིན་སྐྱེས་བུ་རྣམས་ལ་གསོལ་བ་འདེབས། །འབྲོམ་སྟོན་ཉིད་ཀྱི་སྤྲུལ་པ་ལུང་བསྟན་པར། །གྲགས་པའི་མིང་ཅན་བདུན་རྒྱུད་འབྱུང་གསུངས་ལྟར། །བཀའ་གདམས་ཆོས་ཚུལ་ལྷད་མེད་འཛིན་མཛད་པ། །གྲགས་པ་དོན་གྲུབ་ཞབས་ལ་གསོལ་བ་འདེབས། །བདེ་ཆེན་ཞིང་དུ་མགོན་པོ་ཚེ་དཔག་མེད། །འཕགས་པའི་ཡུལ་ན་པཎ་ཆེན་མར་མེ་མཛད། །གངས་རིའི་ལྗོངས་འདིར་ཞྭ་དམར་ཅོད་པན་ཅན། །ཆོས་ཀྱི་དབང་ཕྱུག་ཞབས་ལ་གསོལ་བ་འདེབས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །མཐའ་མེད་འཁོར་བའི་འཇིགས་པ་ཆེན་པོ་ལས། །ཐར་འདོད་ངེས་འབྱུང་སྐྱེ་བར་བྱིན་གྱིས་རློབས། །མ་རྒན་སྡུག་བསྔལ་རྒྱ་མཚོར་བྱིང་བ་ལས། །བསྒྲལ་འདོད་བྱམས་སེམས་སྐྱེ་བར་བྱིན་གྱིས་རློབས། །གནས་སྐབས་བཞི་པོ་འགྲུབ་པར་གྱུར་པ་ལས། །སྨིན་གྲོལ་གདམས་པ་ཐོབ་པར་བྱིན་གྱིས་རློབས། །སྡོམ་གསུམ་མི་འགལ་སུམ་ལྡན་
རྡོ་རྗེ་འཛིན། །ཕྱི་རུ་ཉན་ཐོས་ནང་དུ་བྱང་ཆུབ་སེམས། །གསང་བ་རྡོ་རྗེ་ཐེག་པའི་དོན་རྟོགས་ནས། །ཇོ་བོའི་བཞེད་པ་འགྲུབ་པར་བྱིན་གྱིས་རློབས། །ཞེས་པ་འདི་སྔ་སོར་རྗེ་ཞྭ་དམར་ཅོད་པན་འཆང་བ་དྲུག་པའི་ཞལ་སྔ་ནས། བྱང་ཆུབ་ལམ་གྱི་སྒྲོན་མེའི་གཞུང་དང་དེ་ཡི་འགྲེལ་རྒྱན་རྒྱལ་ཚབ་གྲགས་པ་དོན་གྲུབ་ཀྱིས་བསྒྲིགས་པ་དེ་ཐོབ་ཅིང་། ཇོ་བོ་དངོས་ལ་ཐོབ་པ་དང་འདྲ་བར་སེམས་ནས། ༧ རཱ་ག་ཨ་སྱས་ཕྱིས་གསོལ་བ་བཏབ་པའོ།། ༈ །བྱང་ཆུབ་སྤྱོད་འཇུག་གི་བརྒྱུད་པའི་གསོལ་འདེབས་ནི། ན་མོ་ཤིན་ཏང་དེ་ཝ་ཡེ། སོ་སྐྱེར་ཞལ་གྱིས་བཞེས་ཀྱང་འཕགས་པ་ཉིད། །ཁྱོད་ཀྱི་རྣམ་ཐར་ངོ་མཚར་གཏམ་བདུན་ལྡན། །རྒྱས་པ་བསླབ་བཏུས་བསྡུས་པ་མདོ་ཀུན་བཏུས། །སྤྱོད་འཇུག་མཛད་པ་དེ་ལ་གསོལ་བ་འདེབས། །ལྷོ་ཕྱོགས་རྒྱལ་པོའི་སྲས་སུ་འཁྲུངས་གྱུར་ཅིང་། །འཇམ་དཔལ་རྣོན་པོ་བསྒྲུབས་པས་ཞལ་མཐོང་ཞིང་། །ལུང་བསྟན་རྒྱལ་སྲིད་སྤངས་ནས་ནཱ་ལེནྡྲར། །རབ་ཏུ་བྱུང་བ་དེ་ལ་གསོལ་བ་འདེབས། །ནང་དུ་འཕགས་པར་ཆོས་གསན་བསྙེན་པར་རྫོགས། །བསྟན་བཅོས་ཟབ་མོ་རྩོམ་པར་མཛད་མོད་ཀྱང་། །ཕྱི་རུ་འདུ་ཤེས་གསུམ་པའི་ཟ་ཉལ་འགྲོ་གསུམ་མཆན། བརྟུལ་ཞུགས་བཟུང་། །བྷུ་སུ་ཀུ་
པར་གྲགས་ལ་གསོལ་བ་འདེབས། །ནཱ་ལེནྡྲ་པས་ཉམས་ཚད་བྱས་པའི་ཚེ། །ཁྲི་མཐོན་ཕྱག་གི་མནན་ཏེ་མི་མངོན་གཤེགས། །སྔར་མ་གྲགས་པའི་བྱང་ཆུབ་སྤྱོད་འཇུག་གསུངས། །ཤེར་ལེའུ་དངོས་དང་དངོས་མེད་ཞེས་པ་ནས། །ནམ་མཁར་ཇེ་མཐོར་གཤེགས་ལ་གསོལ་བ་འདེབས། །ཤར་ཕྱོགས་འཁྲུག་རྩོད་རྫུ་འཕྲུལ་དག་གིས་བསྡུམ། །མུ་སྟེགས་ལྔ་བརྒྱ་འཚོ་བ་ཆད་པ་ལས། །འབྲས་ཆེན་ལྷུང་བཟེད་གང་གིས་ཚིམ་པར་མཛད། །དད་ནས་ནང་པར་བཙུད་ལ་གསོལ་བ་འདེབས། །སྤྲང་པོ་ལྔ་བརྒྱའི་འཚོ་བ་ཉམས་པ་གསལ། །རྒྱལ་པོའི་སྐུ་སྲུང་མཛད་ཚེ་རྗེ་བཙུན་གྱིས། །ཤིང་གི་རལ་གྲི་འོད་ཟེར་རབ་འཕྲོས་ནས། །རྒྱལ་པོའི་དྲེགས་པ་བཅོམ་ལ་གསོལ་བ་འདེབས། །མུ་སྟེགས་སྟོན་པས་ནམ་མཁར་དབང་ཕྱུག་གིས། །དཀྱིལ་འཁོར་བྲིས་ལ་བཤིག་པར་མ་ནུས་ལན། །ནང་པ་ཐམས་ཅད་ཕྱི་པར་བཙུད་གྲགས་ཚེ། །བཤིག་ཅིང་ནང་པར་བཙུད་ལ་གསོལ་བ་འདེབས། །ཁྱོད་ཀྱིས་ཐུགས་བཅུད་བྱང་ཆུབ་སྤྱོད་འཇུག་ཅེས། །འཕགས་པའི་ཡུལ་ན་འབྲེལ་ཆེན་བརྒྱ་རྩ་བརྒྱད། །བོད་དུ་འགྱུར་བའི་རྒྱ་འགྲེལ་རྣམ་པ་བརྒྱད། །
ཁྱེད་གསུང་བདུད་རྩིའི་རྒྱུན་ལ་གསོལ་བ་འདེབས། །འགྲོ་བའི་མགོན་པོ་ས་སྐྱ་པཎྜི་ཏས། །བོད་དུ་འགྱུར་བའི་དམ་ཆོས་མཐའ་དག་ལས། །བྱང་ཆུབ་སྤྱོད་འཇུག་གཅིག་པུ་གདམས་ཞེས་གྲགས། །ཁྱེད་གསུང་མཚུངས་བྲལ་དེ་ལ་གསོལ་བ་འདེབས། །ཁྱེད་གསུངས་གདུལ་བྱའི་ཡུལ་དུ་འདྲེན་མཛད་པ། །ལོ་པཎ་མཁས་གྲུབ་བརྒྱུད་པའི་བླ་མ་དང་། །སྙིགས་དུས་འགྲོ་བའི་སྐྱབས་གནས་སྤྲུལ་པའི་སྐུ། །ཆོས་ཀྱི་དབང་ཕྱུགས་ཞབས་ལ་གསོལ་བ་འདེབས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །གཞན་གྱི་སྐྱོན་ལ་བྱ་ར་མི་བྱེད་པར། །རང་སྐྱོན་མཚང་ནས་འདོན་པར་བྱིན་གྱིས་རློབས། །བཟང་འདོད་ཡོན་ཏན་མཛུབ་མགོར་མི་ངོམས་པར། །ཉམས་རྟོགས་ཁོང་དུ་སྦས་པར་བྱིན་གྱིས་རློབས། །གོས་ལགས་མཆོད་ཆས་སྣང་ཤེས་མི་འགྱང་བར། །གང་བྱུང་ཧྲུལ་པོས་ཆོག་པར་བྱིན་གྱིས་རློབས། །ཆེ་འདོད་བཙན་འདོད་སྡིག་རྩ་མི་བསྒྲུབ་པར། །རང་སེམས་དམན་ས་འཛིན་པར་བྱིན་གྱིས་རློབས། །ཁེ་ཚོང་དོམ་སྐྱེད་ལོག་འཚོ་མི་སྒྲུབ་པར། །གང་བྱུང་ཆོག་ཤེས་སྐྱེ་བར་བྱིན་གྱིས་རློབས། །རྒྱལ་སྲས་སྤྱོད་དང་ནམ་ཡང་མི་འབྲལ་ཞིང་། །བྱང་ཆུབ་
གེགས་མེད་འགྲུབ་པར་བྱིན་གྱིས་རློབས། །ཞེས་པ་འདི་ཡུལ་བྱང་ཕྱོགས་རྒྱུད་ཀྱི་པཎྜི་ཏ། འཇམ་དབྱངས་བླ་མ་ཆོས་ཀྱི་སྣང་བ་ཅན་ཞེས་ཡི་དམ་ལྷའི་མཚན་གསོལ་བའི་ཞལ་སྔ་ནས་བྱང་ཆུབ་སེམས་པའི་སྤྱོད་པ་ལ་འཇུག་པ་ལེགས་པར་ཐོབ་པ་འདི་ནི་མདོ་ཕྱོགས་ཀྱི་ཆོས་ཐམས་ཅད་ཀྱི་སྙིང་པོར་འདུག་པས་བཀའ་དྲིན་དྲན་ནས། ཀརྨ་ཨ་རཱ་གས་ཕྱིས་གསོལ་བ་བཏབ་པའོ།། ༈ དབུ་མ་ལ་འཇུག་པའི་བརྒྱུད་པའི་གསོལ་འདེབས་ནི། ན་མོ་མ་ཧཱ་ཀཱ་ལ་ཡ། སངས་རྒྱས་རིགས་གསུམ་མགོན་དང་འཕགས་པ་ཀླུ། །ཨཱཿརྱ་དེ་ཝ་ཟླ་གྲགས་མ་ཏང་གི །ཏེ་ལོ་ནཱ་རོ་རྗེ་བཙུན་ལྷོ་བྲག་པ། །དབུ་མའི་དོན་བརྒྱུད་རྣམས་ལ་གསོལ་བ་འདེབས། །ནཱ་རོ་མེ་ཏྲིའི་བུ་གཅིག་ལྷོ་བྲག་པ། །སྤྲོས་མེད་དོན་གྱི་རྣལ་འབྱོར་མི་ལ་རྗེ། །དབུ་མའི་དོན་བརྒྱུད་རྣམས་ལ་གསོལ་བ་འདེབས། །ཀླུ་སྒྲུབ་ཨཱཿརྱ་དེ་ཝ་དཔལ་ལྡན་ཟླ་བ་གྲགས། །རིག་པའི་ཁུ་བྱུག་གཉིས་དང་མར་མེ་མཛད། །འབྲོམ་སྟོན་སྤྱན་སྔ་བ་དང་བྱ་ཡུལ་བ། །དབུ་མའི་དོན་བརྒྱུད་རྣམས་ལ་གསོལ་བ་འདེབས། །བརྒྱུད་པ་གཉིས་ཀྱི་ཆུ་བོ་ལེགས་བརྡོལ་ཞིང་། །རྒྱལ་བས་ལུང་བསྟན་དགེ་སློང་འཚོ་མཛད་ཅེས། །མཐའ་བྲལ་ལྟ་བའི་བཀའ་བབས་འགྲན་བྲལ་པ། །དྭགས་པོ་
བཀའ་བརྒྱུད་དེ་ལ་གསོལ་བ་འདེབས། །གཞན་ཡང་པོ་ཏོ་བ་དང་ཤ་ར་བ། །མཐའ་བྲལ་ཅི་བཞིན་གཟིགས་མཛད་དུས་གསུམ་མཁྱེན། །དབུ་མའི་དོན་བརྒྱུད་རྣམས་ལ་གསོལ་བ་འདེབས། །རས་ཆེན་སྤོམ་བྲག་པ་དང་ཀརྨ་པ། །ཨུ་རྒྱན་པ་དང་རང་བྱུང་རྒྱལ་བ་གཡུང་། །རོལ་པའི་རྡོ་རྗེ་མཁའ་སྤྱོད་དེ་བཞིན་གཤེགས། །རཏྣ་བྷ་དྲ་དོན་ལྡན་འཇམ་དཔལ་བཟང་། །ཆོས་གྲགས་རྒྱ་མཚོ་མཉན་པ་མི་བསྐྱོད་རྗེ། །དཀོན་མཆོག་འབངས་དང་དབང་ཕྱུག་རྡོ་རྗེའི་མཚན། །ཆོས་ཀྱི་དབང་ཕྱུག་ཞབས་ལ་གསོལ་བ་འདེབས། །མཐའ་བྲལ་ཇི་བཞིན་རྟོགས་པར་བྱིན་གྱིས་རློབས། །གཞན་ཡང་ཟླ་བ་གྲགས་དང་འཇམ་དཔལ་གྲགས། །དེ་བ་ཙན་ཏྲ་རིན་ཆེན་རྡོ་རྗེ་དང་། །ས་ར་ཧ་སྟེ་ཧ་སུ་ལ་ཏི་དང་། །པ་ཚབ་ལོ་ཙཱ་ཆོས་རྗེ་དུས་གསུམ་མཁྱེན། །དབུ་མའི་དོན་བརྒྱུད་རྣམས་ལ་གསོལ་བ་འདེབས། །མཐའ་བྲལ་མངོན་སུམ་རྟོགས་པར་བྱིན་གྱིས་རློབས། །པ་ཚབ་ལོཙྪ་ཞང་སྟོན་ཐང་པཱག་པ། །དབང་ཕྱུག་གྲགས་པ་ཤེས་རབ་རྡོ་རྗེ་དང་། །བསྟན་ཚུལ་གྲགས་ལྡན་མཆེད་གཉིས་བདེ་བའི་ལྷ། །ཇོ་བཙུན་དབུ་ར་བ་དང་ཤེས་རབ་དཔལ། །དར་མ་ཤེས་
རབ་བང་སྟོན་ཤེས་རིན་དང་། །བསོད་ནམས་སེང་གེ་བང་སྟོན་བསམ་བཟང་བ། །བང་སྟོན་གཞོན་བསམ་ཐང་ནག་བཀྲས་སེང་ཞབས། །གཞོན་ནུ་བཟང་པོ་ཆོས་གྲགས་གཞོན་རྒྱལ་དང་། །རོང་སྟོན་ཆེན་པོ་བྱམས་ཆེན་རབ་འབྱམས་པ། །འབུམ་ཕྲག་གསུམ་པ་ཀརྨ་ཕྲིན་ལས་ཞབས། །མི་བསྐྱོད་ཞབས་དང་རྒྱལ་བ་དཀོན་མཆོག་འབངས། །དབང་ཕྱུག་རྡོ་རྗེ་སྨྲ་བའི་སེང་གེའི་ཞབས། །འཇམ་དབྱངས་བླ་མ་ཆོས་ཀྱི་སྣང་བ་ཅན། །དབུ་མའི་བཤད་བརྒྱུད་རྣམས་ལ་གསོལ་བ་འདེབས། །དེ་ལྟར་དབུ་མའི་བཤད་སྒྲུབ་བརྒྱུད་པ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །རྟག་ཆད་འགྲོ་འོང་གཅིག་དང་དུ་མ་དང་། །བདག་དང་གཞན་དང་གཉིས་མེད་གཉིས་མིན་དང་། །རྟོག་པས་བཏག་པའི་ལྟས་ངན་ཀུན་སྤངས་ནས། །མཐའ་བྲལ་དབུ་མ་རྟོགས་པར་བྱིན་གྱིས་རློབས། །དངོས་ཀུན་ངོ་བོས་སྟོང་ཚེ་རང་སྟོང་དང་། །གཞན་གྱི་རྐྱེན་གྱིས་སྟོང་ཚེ་གཞན་སྟོང་སྟེ། །དེ་གཉིས་མི་འགལ་གདོད་ནས་ཟུང་འཇུག་ཉིད། །འཐའ་བྲལ་དབུ་མ་རྟོགས་པར་བྱིན་གྱིས་རློབས། །གཞན་གྱི་མཐའ་ཀུན་རིག་པས་ལེགས་
བཀག་ནས། །རང་ཉིད་མཐའ་བྲལ་གྲུབ་མཐའ་བཞག་མེད་པ། །ཚིག་དང་དཔེ་ཡི་མི་མཚོན་ཆེས་ཕྲ་བ། །མཐའ་བྲལ་དབུ་མ་རྟོགས་པར་བྱིན་གྱིས་རློབས། །ཞེས་པ་འདི་སྔ་སོར་ཞྭ་དམར་ཅོད་པན་འཛིན་པ་འཇམ་དབྱངས་གསལ་དུ་བཞད་པའི་ཞལ་སྔ་ནས། དབུ་མ་ལ་འཇུག་པའི་ཚིག་ལེའུ་བྱས་པ་ལེགས་པར་ཐོབ་ཅིང་། རང་གི་ཡང་ཀུན་ཆུབ་པར་བྱས་ནས་ཚོགས་ཆེན་ལ་སྐྱོར་བ་དང་། ལོ་ཡ་ཟུང་དུ་ཁ་ཐོན་དུ་བྱས་པའི་ཚེ་ཤིག་གཏན་ནས་མེད་པ་བྱུང་ཞིང་། རབ་འབྱམས་སྨྲ་བ་ཀརྨ་འཇིགས་མེད་ཀྱི་དྲུང་ནས་འབྲུ་སྦྱོར་ཅུང་ཟད་རེ་དང་། རྗེ་དབང་ཕྱུག་རྡོ་རྗེའི་བཀའ་ཊིག་ཆུང་བ་ཡང་ཅུང་ཟད་བག་ཆགས་བཞག་ཅིང་ཕྱིས་བརྒྱུད་རིམ་གསོལ་འདེབས་འདི། ༧ རཱ་ག་ཨ་སྱས་བྲིས་པའོ།། ༈ དམ་ཆོས་དགོངས་པ་གཅིག་པའི་གཞུང་འགྲེལ་གྱི་བརྒྱུད་པའི་གསོལ་འདེབས་ནི། ན་མོ་གུ་རུ་ལོ་ཀ་ན་ཐ་ཡེ། འདས་པའི་སངས་རྒྱས་ཀླ་རིགས་སྒྲོན་མེ་ཞེས། །འཕགས་པའི་ཡུལ་ན་འགྲན་མེད་མགོན་པོ་ཀླུ། །གངས་རིའི་ཁྲོད་འདིར་འཇིག་རྟེན་གསུམ་མགོན་ཞེས། །བསྟན་པའི་མངའ་བདག་དེ་ལ་གསོལ་བ་འདེབས། །ད་ལྟའི་མཁན་པོ་བྷོ་ཏི་སཏྭ་ཁྱོད། །མ་འོངས་འབྲི་ཞེས་བྱ་བའི་ས་ཕྱོགས་སུ། །འཇིག་རྟེན་གསུམ་མགོན་ཞེས་བྱར་འགྱུར་རོ་ཞེས། །པདྨས་ལུང་བསྟན་ཁྱེད་ལ་
གསོལ་བ་འདེབས། །ཟླ་བའི་གླིང་ན་གནས་པའི་དགྲ་བཅོམ་གྱིས། །ཁྱོད་ཉིད་ཀླུ་སྒྲུབ་སྤྲུལ་པ་ལུང་བསྟན་ཅིང་། །ཁ་ཆེའི་པཎ་ཆེན་ཤཱཀ་ཤཱི་མཆེད་གཉིས་ལ། །མེ་ཏོག་སྐྱེས་སུ་བཀུར་ལ་གསོལ་བ་འདེབས། །མི་མཇེད་བདག་པོ་ཚངས་པ་གདོང་བཞི་ཡིས། །གསེར་གྱི་འཁོར་ལོ་ཕུལ་ནས་ཁྱོད་ཉིད་ལ། །ཆོས་ཀྱི་འཁོར་ལོ་བསྐོར་བར་གསོལ་བཏབ་པས། །དམ་ཆོས་དགོངས་གཅིག་གསུངས་ལ་གསོལ་བ་འདེབས། །དྲི་ཟའི་རྒྱལ་པོ་ས་བརྒྱད་གནས་པ་ཡི། །ཁྱོད་ལ་ཕྱག་འཚལ་དམ་ཆོས་ཡང་ཡང་ཞུས། །ཚུལ་འདིས་ཁྱོད་ཉིད་ས་བཅུའི་སེམས་པར་ངེས། །གསུངས་ནས་ཀུན་གྱིས་བསྔགས་དེར་གསོལ་བ་འདེབས། །གཅུང་དང་གླིང་པ་གྲགས་པ་བྱང་ཆུབ་སོགས། །དགེ་འདུན་འདུས་པ་ཁྲི་ཕྲག་བཅོ་བརྒྱད་དེ། །ཀུན་ཀྱང་རྫུ་འཕྲུལ་མཁའ་ལ་གཤེགས་བཞུགས་མཛད། །དགེ་འདུན་མངའ་བདག་དེ་ལ་གསོལ་བ་འདེབས། །གནས་མཆོག་གསུམ་དུ་ལྔ་ཁྲི་ལྔ་སྟོང་དང་། །ལྔ་བརྒྱ་བརྫངས་ཀྱང་འདུས་པ་ཉུང་མ་གྱུར། །གསོ་སྦྱོང་མཛད་ཚེ་ནམ་མཁའི་མདོག་གྱུར་པའི། །བརྒྱུད་འཛིན་སློབ་མའི་ཚོགས་ལ་གསོལ་བ་འདེབས། །བསྟན་པ་
མི་རྟག་མུན་ནག་གློག་དང་འདྲ། །གསེར་གྱི་དཀོན་མོ་ཙམ་ཞིག་མི་འཆད་ཅེས། །ལབ་ཀྱི་སྒྲོན་མས་ལུང་བསྟན་མཛད་པ་ལྟར། །ཆོས་བརྒྱུད་རིམ་པར་བྱོན་ལ་གསོལ་བ་འདེབས། །སྐྱུ་ར་རིན་པོ་ཆེ་ཡིས་བཀས་བསྐུལ་ནས། །སྐྱོབས་པའི་བསྟན་པ་སླར་ཡང་གསལ་བའི་ཕྱིར། །དགོངས་གཅིག་ཀར་ཊིཀ་གསར་དུ་རྩོམ་མཛད་པ། །མི་བསྐྱོད་རྡོ་རྗེའི་ཞབས་ལ་གསོལ་བ་འདེབས། །དེ་ཉིད་བཞད་པ་ཅི་བཞིན་ཐུགས་ཆུད་ནས། །རྡོ་རྗེའི་གསུང་རྣམས་ཚིགས་སུ་བཅད་མཛད་ནས། །གངས་རིའི་ཁྲོད་འདིར་རྒྱ་ཆེར་སྤེལ་མཛད་པ། །དཀོན་མཆོག་ཡན་ལག་ཞབས་ལ་གསོལ་བ་འདེབས། །སྐྱུ་རའི་རིགས་འཁྲུངས་དགོངས་གཅིག་ཅི་བཞིན་གཟིགས། །བཞེད་དགོངས་རྣམས་ལ་མང་པོའི་མི་འགལ་བའི་བར། །སེང་གེ་སྒྲ་སྒྲོགས་རྗེས་འཇུག་དབུགས་འབྱིན་པ། །ཆོས་ཀྱི་དབང་ཕྱུག་ཞབས་ལ་གསོལ་བ་འདེབས། །ཡི་དམ་འཁོར་ལོ་སྡོམ་དང་ཆོས་སྐྱོང་བ། །བྱ་རོག་མཚན་ཅན་ཁྱད་པར་རིགས་རྒྱུད་དང་། །ཆོས་རྒྱུད་སྲུང་མཛད་ཨ་ཕྱི་ཆོས་སྒྲོན་མ། །གསོལ་བ་འདེབས་སོ་བྱིན་རླབས་དངོས་གྲུབ་སྩོལ། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །
ཐེག་པ་ཆེ་ཆུང་མདོ་སྔགས་མི་འགལ་བར། །གཅིག་གྲོགས་གཅིག་ཏུ་ཤེས་པར་བྱིན་གྱིས་རློབས། །བསྐྱེད་རྫོགས་མི་འགལ་ཟུང་འཇུག་དོན་རྟོགས་ནས། །ཚེ་གཅིག་སངས་རྒྱས་འགྲུབ་པར་བྱིན་གྱིས་རློབས། །ཞེས་པ་འདི་ཟ་དམ་པ་རྡོ་རྗེའི་གདན་དུ་འབྲི་གུང་སྐྱུ་རའི་གདུང་རིགས་དྲི་མ་མེད་པར་འཁྲུངས་ཤིང་། ཆོས་ཀྱི་མཛོད་འཛིན་པ་༧ རྗེ་ཆོས་ཀྱི་དབང་ཕྱུག་གི་དྲུང་ནས་དགོངས་གཅིག་གི་གཞུང་གི་ལུང་དང་། །འགྲེལ་པ་ཉིད་ཀྱིས་མཛད་པ་ལྗགས་བཤད་ཀྱིས་བརྒྱན་པ་ཤིན་ཏུ་རྒྱས་པ་དང་། སླར་གཙང་རྒྱལ་མཁར་གྱི་སྐྱེལ་དུ་ཡང་འགྲེལ་པ་དེ་འཆད་དགོས་ཞེས། རྗེ་ཆོས་དབྱིངས་རྡོ་རྗེའི་བཞེད་བསྐུལ་བར་བསྟན་ནས་སྟོད་ཆ་རེའི་བཤད་པ་གསུངས་པའི་ཚེ། ༧ རྒྱལ་བའི་དབང་པོ་རྒྱལ་ཚབ་པ་སོགས་དབུ་མཛད་ཚོགས་པ་སྟོང་ར་ཅན་ཡོད་པའོ། །འབྲི་གུང་གི་གདུང་རིགས་འདི་གཞན་མ་གཏོགས་སངས་རྒྱས་བྱང་སེམས་ཁོ་ན་ཡིན་ཞེས་བསྟོད་བསྔགས་ཆེན་པོ་མཛད་ཅིང་། རིགས་རྒྱུད་ཁོ་ནར་མ་ཟད་ཆོས་མང་དུ་ཡབ་ལ་གསན་ནས་ཆོས་བརྒྱུད་རྣམ་པར་དག་པའི་གསང་མཛོད་འཛིན་པའི། སྲུང་མ་ཨ་ཕྱི་མ་ཡང་ཕྱི་བཞིན་དུ་འབྲང་སྟེ་དྲུང་པ་རྒྱལ་ཚབ་པའི་བཀའ་སྲུང་རྫིང་བཙན་པ་བབ་ནས་སྐུ་གཞོག་ནས་སོང་དུས། ཁོས་ཁྱེད་ལ་སྐུ་གོང་མ་དུས་མེད་པའི་བུད་མེད་འཇིགས་སུ་རུང་བ་འདི་སུ་ཡིན་ཞེས་ཞུས་པའི་ལོ་རྒྱུས་སྣང་ཞིང་། རང་རེ་གྲྭ་སློབ་ལ་ཡང་མགོན་ནས་ཟ་དམ་མགོན་ཁང་དུ་ལོགས་བྲིས་ཀྱི་སྐུ་བཞེངས། གཏོར་བསྔོས་
བྱེད་པ་ཡང་དེ་ཚུགས་ཡིན་པར་སྣང་ཞིང་། དེ་བས་ན་རང་རེ་འཇིག་རྟེན་གསུམ་མགོན་གྱི་ཆོས་བརྒྱུད་དུ་སོང་བར་གདའ་སྙམ་ནས། ༧ རཱ་ག་ཨ་སྱས་ཕྱིས་གསོལ་བ་བཏབ་པའོ། །སྔ་སོར་ཉིན་གླིང་དུ་ཡང་གཞུང་འདི་ཚོགས་སུ་བསྐྱེད་ཅིང་། ལོ་ཡ་ཟུང་ཁ་ཐོན་བྱས་ལ་ད་ལྟའང་མདོ་སྔགས་ཀྱི་གནད་གསང་གི་གོ་བ་ལེན་ཡུལ་འདི་རང་ལ་བྱེད་པའོ།། ༈ སོ་སོར་ཐར་པའི་མདོ་དང་འདུལ་བའི་མཁན་བརྒྱུད་ལ་གསོལ་བ་འདེབས་པ་ནི། ན་མོ། བདུད་སྡེ་བཅོམ་ནས་ཐམས་ཅད་མཁྱེན་བརྙེས་ཏེ། །དྲང་སྲོང་ལྷུང་བ་རི་དྭགས་ནགས་ཚལ་དུ། །འཁོར་གྱི་ཐོག་མ་ལྔ་སྡེ་བཟང་པོ་ལ། །བདེན་བཞི་གསུངས་མཛད་དེ་ལ་གསོལ་བ་འདེབས། །ལུང་གི་གཞི་དང་ལུང་རྣམ་འབྱེད་པ་དང་། །དགེ་སློང་མ་ཡི་རྣམ་འབྱེད་ལུང་ཕྲན་ཚིག །འདུལ་བ་ལུང་སྡེ་བཞི་ཞེས་ཡོངས་གྲགས་པའི། །ཁྱེད་གསུང་བདུད་རྩི་དེ་ལ་གསོལ་བ་འདེབས། །ཁྱེད་སྲས་དགྲ་བཅོམ་ཆོས་ཀྱིས་ཚོང་དཔོན་ཞེས། །དེ་མཛད་དགེ་སློང་ཕ་མའི་སོ་ཐར་མདོ། །འདུལ་བའི་སྡེ་ཡིག་བསྟན་པའི་སྒྲོན་མེ་སྟེ། །དམ་ཆོས་ཁྱད་འཕགས་དེ་ལ་གསོལ་བ་འདེབས། །ང་ནི་འདི་ནས་མྱ་ངན་འདས་འོག་ཏུ། །འདི་ནི་ཁྱོད་ཀྱིས་སྟོན་པ་ཡིན་ནོ་གསུངས། །སྟོན་པ་ང་ནི་དམ་ཆོས་གཞི་མཐུན་པ། །
དམ་ཆོས་འདུལ་བ་དེ་ལ་གསོལ་བ་འདེབས། །མདོ་དང་བརྒྱུད་དང་མངོན་པའི་བསླབ་བྱ་སོགས། །བྱང་སེམས་དགྲ་བཅོམ་རྣམས་ཀྱིས་སྨྲ་བར་ནུས། །འདུལ་བའི་གནང་བཀག་རྒྱལ་བ་ཁོ་ནའི་ཡུལ། །དཔག་དཀའི་དམ་ཆོས་དེ་ལ་གསོལ་བ་འདེབས། །ཡིད་བདེ་བསོད་སྙོམས་བསླབ་ཅིང་སྐྲག་སེམས་མེད། །འཆི་ཚེ་འགྱོད་མེད་ལྷ་དང་མི་རུ་སྐྱེ། །མཐར་ཐུག་སྡུག་བསྔལ་ཀུན་ལས་ངེས་གྲོལ་བ། །དམ་ཆོས་འདུལ་བ་དེ་ལ་གསོལ་བ་འདེབས། །རྒྱལ་བའི་བསྟན་པ་ལྔ་བརྒྱ་ཕྲག་བཅུ་ལས། །ད་ལྟ་འདུལ་བའི་ལེའུ་ཡིན་པར་མངོན། །དེ་ན་དུས་ལ་བབས་པའི་དམ་ཆོས་ཏེ། །བྱིན་ལྡན་དམ་ཆོས་དེ་ལ་གསོལ་བ་འདེབས། །སོ་ནམ་སེན་མོའི་སྟེང་དུ་བྱེད་གྱུར་ཅིག །འབྲུ་དང་མུ་ཏིག་མཉམ་བརྗེད་བྱེད་གྱུར་ཀྱང་། །ང་ཡི་ཉན་ཐོས་འཚོ་བས་མི་ཕོངས་གསུངས། །འདོད་འབྱུང་འདུལ་བའི་ཆོས་ལ་གསོལ་བ་འདེབས། །རྣམ་དག་སྡོམ་པ་ཆོས་ལ་སྨིན་མཛད་པ། །མཁན་པོ་རྒྱལ་བ་ཐམས་ཅད་མཁྱེན་པ་དང་། །སློབ་དཔོན་ལས་སློབ་གསང་སྟོན་དུས་འཛིན་པ། །འདུལ་བའི་བླ་མ་ལྔ་ལ་གསོལ་འདེབས། །དེ་ལྟར་གསོལ་བ་བཏབ་པའི་བྱིན་
རླབས་ཀྱིས། །ལོ་བརྒྱའི་བར་དུ་འདུལ་ཁྲིམས་སྐྱོན་མེད་པར། །གནས་བརྟན་ཆེན་པོར་འགྱུར་བར་བྱིན་གྱིས་རློབས། །འདུལ་བའི་ཤོ་ལོ་འབུམ་ཕྲག་བློར་ཆུད་ནས། །འདུལ་འཛིན་ཆེན་པོར་འགྱུར་བར་བྱིན་གྱིས་རློབས། །ལྔ་ཕྲག་ཉེར་ལྔ་གང་རུང་རབ་ལྡན་ནས། །མཁན་པོ་ཆེན་པོར་འགྱུར་བར་བྱིན་གྱིས་རློབས། །བཅུ་བདུན་བཞི་ཡིས་དེ་ཉིད་རབ་ཤེས་ནས། །འདུལ་བ་གསལ་བར་ནུས་པར་བྱིན་གྱིས་རློབས། །འཆི་དུས་འགྱོད་སེམས་སྐྲག་པ་མི་དགོས་པར། །སྡོམ་པ་མཐའ་རུ་ཕྱིན་པར་བྱིན་གྱིས་རློབས། །ཞེས་པ་འདི་སྔ་སོར་མཁན་པོ་སློབ་དཔོན་ཐམས་ཅད་མཁྱེན་པའི། ཆགས་ཕྱིར་ལོ་གཉིས་འབྲིང་དུས་གསོ་སྦྱོང་ཆག་མེད་མཛད་པའི་སྟབས་ཀྱིས། སོ་སོར་ཐར་པའི་མདོ་འདོན་པ་དང་པོ་གཉིས་པ་དང་། ཡོངས་སུ་རྫོགས་པར་འདོན་པ་ལན་ཉི་ཤུ་རྩར་དྲུག་བདུན་ཙམ་ཞལ་སྔ་ནས་ཐོབ་པའི་བཀའ་དྲིན་དྲན་ནས་༧ ཨ་རཱ་གས་ཕྱིས་གསོལ་བ་བཏབ་པའོ།། ༈ ས་ལུ་འཇང་བའི་མདོ་ཡི་བརྒྱུད་པའི་གསོལ་འདེབས་ནི། ན་མོ་དྷརྨ་ཤྭ་ར་ཡེ། ཚོགས་གཉིས་རྒྱ་མཚོ་ལས་འཁྲུངས་ཤིང་། །ཀུན་མཁྱེན་ཡེ་ཤེས་འདབ་སྟོང་བཞད། །མཚན་དཔེས་ཟེའུ་འབྲུའི་ཕྲེང་བ་ཅན། །ཐུབ་དབང་དེ་ལ་གསོལ་བ་འདེབས། །ཁྱེད་གསུང་དམ་ཆོས་
སུས་ཐོབ་པ། །ཆོས་མཁན་སྡིག་དང་དོན་མེད་སྤངས། །མྱ་ངན་འདས་པ་ཐོབ་འགྱུར་བའི། །དམ་པའི་ཆོས་ལ་གསོལ་བ་འདེབས། །མ་ཐོས་ཐོས་དང་ཐོས་པ་བྱང་། །སེམས་ཉིད་སྤང་དང་ལྟ་བ་དག །སྨྲ་མཁས་ཟབ་མོའི་དོན་རྟོགས་འདི། །དམ་པའི་ཆོས་ལ་གསོལ་བ་འདེབས། །དད་པ་བསྐྱེད་ཅིང་ཚུལ་ཁྲིམས་དག །གདུང་བ་སེལ་ཞིང་ཡང་སྲིད་ཞི། །བྱང་ཆུབ་ཚོགས་རྣམས་འཕེལ་མཛད་པ། །དམ་པའི་ཆོས་ལ་གསོལ་བ་འདེབས། །རང་རྒྱུད་སྨིན་ཞིང་ཉོན་མོངས་བསྲེགས། །འཁོར་བའི་འཇིགས་པས་སྐྲག་བྱེད་ཅིང་། །ཐེ་ཚོམ་ལམ་ངན་སྤང་བྱེད་པ། །དམ་པའི་ཆོས་ལ་གསོལ་བ་འདེབས། །ཚུལ་ཁྲིམས་དྲི་མེད་འདོད་སྲིད་ནི། །བསམ་གཏན་མངོན་ཤེས་རྣམ་ཐར་ཐོབ། །འཇིགས་ཚོགས་སྤངས་ནས་ཞི་ཐོབ་པ། །དམ་པའི་ཆོས་ལ་གསོལ་བ་འདེབས། །དཀོན་མཆོག་གསུམ་ལ་སྐྱབས་སོང་ཡང་། །སྐྱོབ་བྱེད་དམ་ཆོས་ཁོ་ནར་གསུངས། །དེ་ཕྱིར་སྐྱབས་ཀྱི་དམ་པ་སྟེ། །དམ་པའི་ཆོས་ལ་གསོལ་བ་འདེབས། །དམ་ཆོས་བདུད་རྩི་འབྱུང་བའི་གནས། །ཅུང་ཟད་ཕུལ་ཀྱང་དོན་ཆེ་བ། །དྲིན་ཐོབ་བཤེས་གཉེན་འགྲོ་བའི་
དམིགས། །དགེ་འདུན་རྣམས་ལ་གསོལ་བ་འདེབས། །གསོལ་བ་བཏབ་པའི་བྱིན་རླབས་ཀྱིས། །རྫོགས་སངས་རྒྱས་ལ་སྐྱབས་ཞུས་ཏེ། །དམ་པའི་ཆོས་ཀྱི་ལེགས་སྐྱབས་ནས། །དགེ་འདུན་ཉིད་དུ་བྱིན་གྱིས་རློབས། །ཞེས་པ་འདི་རྒྱལ་བ་མཆོག་གི་སྤྲུལ་སྐུའི་དྲུང་ནས། ས་ལུ་འཇང་པའི་མདོ་ལེགས་པར་ཐོབ་ནས། ཕྱིས་ཆོས་ཐོབ་པའི་ཡོན་ཏན་རྗེས་སུ་དྲན་ནས་གསོལ་བ་བཏབ་པའོ།། ཅེས་པ་༧ ཀརྨ་ཨ་རཱ་གས་སོ།། གནས་བརྟན་གྱི་ཆོ་གའི་ལུང་གི་བརྒྱུད་པའི་གནས་བརྟན་གྱི་གསོལ་འདེབས་ནི། ན་མོ་ཤཱཀྱ་མུ་ན་ཡེ། གང་གིས་མཚན་མཆོག་དྲན་པས་ཀྱང་། །མནར་མེད་གནས་ནས་མྱུར་ཐར་ནས། །མངོན་མཐོའི་ངེས་ལེགས་ཐོབ་མཛད་པ། །སྐྱོན་དག་ཡོན་ཏན་ཀུན་གྱི་གཏེར། །ཤཱཀྱ་ཐུབ་ལ་གསོལ་བ་འདེབས། །བསྟན་པ་རྒྱས་པར་བྱིན་གྱིས་རློབས། །ཤཱ་རིའི་བུ་སོགས་ཉན་ཐོས་ནི། །མཆོག་ཆེན་བརྒྱད་ལ་གསོལ་བ་འདེབས། །བསྟན་པ་རྒྱས་པར་བྱིན་གྱིས་རློབས། །འདི་གསར་འཛུད། ཁྱོད་མཚན་ཐོས་དང་དྲན་པས་ཀྱང་། །ཚུལ་ཁྲིམས་རྣམ་དག་ཉོན་མོངས་སེལ། །ཡན་ལག་འབྱུང་ལ་གསོལ་བ་འདེབས། །བསྟན་པ་རྒྱས་པར་བྱིན་གྱིས་རློབས། །མཐོང་དང་ཐོས་དང་དྲན་པས་
ཀྱང་། །ཡོན་ཏན་མ་ལུས་འཕེལ་མཛད་པ། །མ་ཕམ་པ་ལ་གསོལ་བ་འདེབས། །བསྟན་པ་རྒྱས་པར་བྱིན་གྱིས་རློབས། །གནས་བརྟན་ཆེན་པོ་ནགས་ལ་གནས། །གནོད་པ་ཐམས་ཅད་ཞི་མཛད་པ། །འཕགས་པ་དེ་ལ་གསོལ་བ་འདེབས། །བསྟན་པ་རྒྱས་པར་བྱིན་གྱིས་རློབས། །གང་ཞིག་ཁྱོད་མཚན་དྲན་པས་ཀྱང་། །འཁོར་བཟང་འདུ་ཞིང་སྤངས་རྟོགས་ཐོབ། །དུས་ལྡན་ལ་ཡང་གསོལ་བ་འདེབས། །བསྟན་པ་རྒྱས་པར་བྱིན་གྱིས་རློབས། །དོན་རྣམས་ཐམས་ཅད་འགྲུབ་མཛད་པ། །འཕགས་པའི་གནས་བརྟན་ཆེན་པོ་སྟེ། །རྡོ་རྗེ་མོའི་བུ་ལ་གསོལ་བ་འདེབས། །བསྟན་པ་རྒྱས་པར་བྱིན་གྱིས་རློབས། །དོན་རྣམས་ཅི་བཞིན་རྟོགས་འགྱུར་ཞིང་། །ཏིང་ངེ་རྒྱུའཛིན་རྣམས་འགྲུབ་མཛད་པ། །གནས་བརྟན་བཟང་པོར་གསོལ་བ་འདེབས། །བསྟན་པ་རྒྱས་པར་བྱིན་གྱིས་རློབས། །ཆོས་རྣམས་མི་བརྗེད་གཟུངས་ཐོབ་ཅིང་། །སློབ་པ་ཕུན་སུམ་ཚོགས་མཛད་པ། །གསེར་བེའུ་དེ་ལ་གསོལ་བ་འདེབས། །བསྟན་པ་རྒྱས་པར་བྱིན་གྱིས་རློབས། །གང་གིས་ཁྱེད་མཚན་ཐོས་པས་ཀྱང་། །ངན་སོང་གནས་ནས་
སྒྲོལ་མཛད་པ། །བྷ་ར་དྷ་ཛར་གསོལ་བ་འདེབས། །བསྟན་པ་རྒྱས་པར་བྱིན་གྱིས་རློབས། །ཁྱོད་ལ་བསྟོད་ཅིང་གསོལ་བཏབ་ན། །འབྱོར་པ་ཕུན་སུམ་ཚོགས་མཛད་པ། །བ་ཀུ་ལ་ལ་གསོལ་བ་འདེབས། །བསྟན་པ་རྒྱས་པར་བྱིན་གྱིས་རློབས། །ཆོས་རྣམས་ཀུན་གྱི་དོན་རྟོགས་ཤིང་། །ཉེས་པའི་སྐྱོན་རྣམས་ཞི་མཛད་པ། །སྒྲ་གཅན་འཛིན་ལ་གསོལ་བ་འདེབས། །བསྟན་པ་རྒྱས་པར་བྱིན་གྱིས་རློབས། །ཉོན་མོངས་པ་དང་སྡུག་བསྔལ་ཀུན། །མ་ལུས་ཀུན་ནས་ཞི་མཛད་པ། །ལམ་ཕྲན་བསྟན་ལ་གསོལ་བ་འདེབས། །བསྟན་པ་རྒྱས་པར་བྱིན་གྱིས་རློབས། །གང་གིས་མཐོང་ཐོས་དྲན་རེག་པས། །སྡུག་བསྔལ་ཐམས་ཅད་ཞི་མཛད་པ། །བསོད་སྙོམས་ལེན་ལ་གསོལ་བ་འདེབས། །བསྟན་པ་རྒྱས་པར་བྱིན་གྱིས་རློབས། །ཆོས་ཀྱིས་སྤོབས་པ་བསྐྱེད་མཛད་ཅིང་། །བློ་གྲོས་རབ་ཏུ་འཕེལ་མཛད་པ། །ལམ་བསྟན་ལ་ཡང་གསོལ་བ་འདེབས། །བསྟན་པ་རྒྱས་པར་བྱིན་གྱིས་རློབས། །སྡུག་བསྔལ་མ་ལུས་རབ་ཞི་ཞིང་། །འདོད་དགུ་ཡིད་བཞིན་འགྲུབ་མཛད་པ། །ཀླུ་ཡི་སྡེ་ལ་གསོལ་བ་འདེབས། །བསྟན་པ་རྒྱས་པར་བྱིན་གྱིས་
རློབས། །རིག་པའི་གནས་ལྔ་མ་ལུས་པ། །མཁས་པའི་མཁྱེན་པ་སྩོལ་མཛད་པ། །སྦེད་བྱེད་དེ་ལ་གསོལ་བ་འདེབས། །བསྟན་པ་རྒྱས་པར་བྱིན་གྱིས་རློབས། །དོན་རྣམས་ཅི་བཞིན་རབ་འགྲུབ་ཅིང་། །སྡིག་ཞི་བདེ་ལེགས་འབྱུང་བ་པོ། །མི་ཕྱེད་པ་ལ་གསོལ་བ་འདེབས། །བསྟན་པ་རྒྱས་པར་བྱིན་གྱིས་རློབས། །ཁྱེད་ལ་གུས་ཤིང་གསོལ་བཏབ་པས། །གདུལ་བྱ་སྨིན་གྲོལ་འབྱུང་མཛད་པ། །དྷརྨ་ཏ་ལ་གསོལ་བ་འདེབས། །བསྟན་པ་རྒྱས་པར་བྱིན་གྱིས་རློབས། །ཕྱོགས་བཞིའི་དགྲ་རྣམས་ཞི་བ་དང་། །ལོངས་སྤྱོད་ཕུན་སུམ་ཚོགས་མཛད་པ། །རྒྱལ་ཆེན་བཞི་ལ་གསོལ་བ་འདེབས། །བསྟན་པ་རྒྱས་པར་བྱིན་གྱིས་རློབས། །སྟོན་པ་གནས་བརྟན་བཅུ་དྲུག་དང་། །གནས་བརྟན་རྣམས་ཀྱི་འཁོར་གྱུར་པ། །དགྲ་བཅོམ་ཁྲི་དང་དྲུག་སྟོང་ལ། །གསོལ་བ་འདེབས་སོ་བྱིན་གྱིས་རློབས། །སྤྱིར་དུ་ཐུབ་བསྟན་རྒྱས་པ་དང་། །སྒོས་སུ་བདག་ཅག་འཁོར་སློབ་བཅས། །ཚུལ་ཁྲིམས་ཉམས་པ་མེད་པ་ནས། །དར་ཞིང་རྒྱས་པར་བྱིན་གྱིས་རློབས། །ཞེས་པ་འདི་སྔ་སོར་མཁན་པོ་༧ རྗེ་རྒྱལ་བ་ཐམས་ཅད་མཁྱེན་པ་དྲུག་པའི་ཞལ་སྔ་ནས་ཉིད་ཀྱིས་
བསྩལ་བའི་གནས་བརྟན་ཆོ་ག་རྒྱས་པ་ལོ་རྒྱུས་སྒྲུབ་ཐབས་དང་བཅས་པ། སྡེབ་མ་མདའ་ཚད་མའི་སྡེབ་མ་བདུན་ཅུ་ཙམ་ཡོད་པ་ཅིག་ཐོབ་ཅིང་། སྔོན་དགོན་པ་གཅིག་དམག་གིས་བསྐོར་བ་ལས། ཆུ་ཆད་ནས་གནས་ཆོག་བྱས་པས། བཙུན་པ་ངོ་མི་ཤེས་པ་བྱུང་ནས་འདི་རྐོས་དང་ཆུ་ཡོད་ཟེར་ནས་བསྐོས་པས་ཆུ་བྱུང་སྟེ། དམག་གི་འཇིགས་པ་ལས་ཐར་བའི་ལོ་རྒྱུས་མང་པོ་དང་། དོན་འགྲུབ་པར་འདོད་ན་རྡོ་རྗེ་མོའི་བུ་མཚན་ཐོག་མར་བྱ། དེས་འགྲེལ་གནས་བརྟན་བཅུ་དྲུག་ལ་ལས་ཚོགས་བཅུ་དྲུག །ད་ལྟ་ཡན་ལག་འབྱུང་ཐོག་མར་བྱེད་པ་ནི། ཚུལ་ཁྲིམས་གཙང་བའི་ཆེད་དུ་ཡིན་སོགས་གསུངས་ཤིང་རང་གིས་ཡང་ཆོ་ག་དེ་ཀུན་ཆུབ་པར་བྱས་ནས་ལོ་ཁ་ཡར་བཏོན་ཅིང་། ཕྱིས་སུ་ཡོན་ཏན་དེ་དག་དྲན་ནས་གསོལ་བ་བཏབ་པའོ། །རཱ་ག་ཨ་སྱས་སོ།། ལས་རྟེན་ཅིང་འབྲེལ་བར་འབྱུང་བའི་མདོ་དང་པོ་དང་གཉིས་པའི་བརྒྱུད་རིམ་གསོལ་འདེབས་ནི། ན་མོ་ཤཱཀྱ་མུ་ན་ཡེ། ཆོས་རྣམས་ཐམས་ཅད་རྟེན་འབྱུང་དུ། །ངེས་ཞེས་བདེན་པ་བཞི་པོ་ཡིས། །འཁོར་ལོ་རབ་ཏུ་བསྐོར་མཛད་པ། །ཐུབ་དབང་དེ་ལ་གསོལ་བ་འདེབས། །མ་རིག་པ་ལས་འདུ་བྱེད་འབྱུང་། །དེ་བཞིན་རྒ་ཤི་མྱ་ངན་བར། །ལུགས་འབྱུང་སྲིད་པའི་འཁོར་ལོ་ཞེས། །སྟོན་མཛད་དེ་ལ་གསོལ་བ་འདེབས། །མ་རིག་འགགས་པས་འདུ་བྱེད་འགགས། །དེ་བཞིན་རྒ་ཤིའི་
བར་འགགས་ཞེས། །ཐར་པའི་འཁོར་ལོ་སྟོན་མཛད་པ། །བཅོམ་ལྡན་དེ་ལ་གསོལ་བ་འདེབས། །སྡུག་བསྔལ་ཤེས་ཤིང་ཀུན་འབྱུང་སྤོང་། །འགོགས་པ་སྟོན་དང་ལམ་མངོན་བྱ། །ཞེས་གསུངས་བདེན་པ་བཞི་སྟོན་པ། །ཐུབ་ཆེན་དེ་ལ་གསོལ་བ་འདེབས། །གང་གིས་བློ་གྲོས་བུམ་པ་ཆེ། །ལུང་དང་རིག་པའི་ཆུས་བཀང་ནས། །གདུལ་བྱའི་དྲི་མ་སེལ་མཛད་པ། །ལོ་པཎ་རྣམས་ལ་གསོལ་བ་འདེབས། །གང་གིས་མཁྱེན་བརྩེའི་ཚ་གཟེར་གྱིས། །ཐུབ་བསྟན་པད་མོ་འབྱེད་མཛད་ཅིང་། །གདུལ་བྱའི་བློ་། མུན་སེལ་མཛད་པ། །འཇམ་དབྱངས་བླ་མར་གསོལ་བ་འདེབས། །དེ་ལྟར་གསོལ་བཏབ་བྱིན་རླབས་ཀྱིས། །ལུགས་འབྱུང་སྲིད་པའི་འཁོར་ལོ་ལ། །སྐྱོ་བ་སྐྱེ་བར་བྱིན་གྱིས་རློབས། །ལུག་ལྡོག་ཐར་པའི་འཁོར་ལོ་ལ། །མོས་པ་སྐྱེ་བར་བྱིན་གྱིས་རློབས། །འཁོར་བ་སྡུག་བསྔལ་བདེན་པ་ལ། །ཞེན་པ་ལོག་པར་བྱིན་གྱིས་རློབས། །ཉོན་མོངས་ཀུན་འབྱུང་བདེན་པ་ལ། །གཉེན་པོ་བརྟེན་པར་བྱིན་གྱིས་རློབས། །བསམ་གཏན་འགོག་པའི་བདེན་པ་ལ། །བརྩོན་འགྲུས་བསྐྱེད་པར་བྱིན་གྱིས་རློབས། །འབྲས་བུ་ལམ་གྱི་
བདེན་པ་ཉིད། །མངོན་དུ་བྱེད་པར་བྱིན་གྱིས་རློབས། །ཞེས་པ་འདི་མཁན་པོ་ཐམས་ཅད་མཁྱེན་པའི་ཞལ་སྔ་ནས། རྟེན་ཅིང་འགྲེལ་བར་འབྱུང་བ་དང་པོ་དང་གཉིས་པའི་མདོ་ལེགས་པར་ཐོབ་པའི་བཀའ་དྲིན་དྲན་ནས། རཱ་ག་ཨ་སྱས་གསོལ་བ་བཏབ་པའོ།། ཕ༈ སེང་ཧ་མུ་ཁའི་བརྒྱུད་པའི་གསོལ་འདེབས་ནི། ན་མོ་བཛྲ་ཌཱ་ཀི་སོ་ཧ་མུ་ཁ་ཡེ། །སྔོན་ཚེ་བཅོམ་ལྡན་རྡོ་རྗེ་རྣལ་འབྱོར་མས། །ཤ་ཟ་མཁའ་འགྲོ་སྡེ་བརྒྱད་འདུལ་བའི་ཕྱིར། །ཐུགས་བསྐྱེད་སྨོན་ལམ་དམོད་པ་བོར་བའི་མོད། །སེང་གེའི་གདོང་མར་གྱུར་ལ་གསོལ་བ་འདེབས། །དྲེགས་པ་དབང་བསྡུས་སྲོག་གི་སྙིང་པོ་བླངས། །རི་རབ་སོ་གཉིས་རྡུལ་མཉམ་མཁའ་འགྲོ་ཡི། །སྲོག་སྙིང་བསྡུས་ནས་ཡིག་འབྲུ་བཅུ་བཞི་པོ། །ཉིད་ཀྱི་ཐུགས་ཀར་བཀོད་དེར་གསོལ་བ་འདེབས། །ཀྱེ་ཡི་རྡོ་རྗེ་གོའུ་རིའི་ལེའུར་གྲགས། །དུས་ཀྱི་འཁོར་ལོའི་རྡོ་རྗེའི་ལུས་སྲུང་དང་། །སྒེལ་རྒྱུད་དྲག་མོ་ཐོག་གི་རྒྱུད་ཅེས་གྲགས། །རྩོད་མེད་རྒྱུད་མཆོག་མངའ་དེར་གསོལ་བ་འདེབས། །རྫུ་འཕྲུལ་སྟོབས་ཀྱིས་ཨོ་རྒྱན་གནས་སུ་བྱོན། །ཀྱེ་རྡོར་འབུམ་ཕྲག་སུམ་ཅུའི་བཅུད་བསྡུས་ནས། །མཁའ་འགྲོའི་སྒྲུབ་ཐབས་མི་ཡུལ་སྣང་མཛད་པ། །དཔལ་
ལྡན་ཀླུ་སྒྲུབ་ཞབས་ལ་གསོལ་བ་འདེབས། །བདུད་འདུལ་མཁའ་འགྲོས་ཆོས་ཀྱི་སྒྲོམ་ཕུལ་ནས། །དྲག་མོའི་རྒྱུད་མཆོག་ཐུགས་སུ་ཆུད་པའི་མཐུས། །མུ་སྟེགས་ལྔ་བརྒྱ་ཐོག་གིས་བསྒྲལ་མཛད་པ། །པད་འབྱུང་འཆི་བ་མེད་དེར་གསོལ་བ་འདེབས། །ཡེ་ཤེས་མཁའ་འགྲོ་མངོན་སུམ་ཞལ་མཐོང་ནས། །སྒྲོམ་བུ་དགུ་བསྐོར་གཏེར་ཁ་གཏད་པའི་མཐུས། །མུ་སྟེགས་སྐལ་ལྡན་རྒྱལ་པོ་བསྒྲལ་མཛད་པ། །བ་རི་ལོ་ཙཱའི་ཞབས་ལ་གསོལ་བ་འདེབས། །ཡེ་ཤེས་ཌཱཀྐིས་དུས་གསུམ་བྱིན་གྱིས་བརླབས། །བཻ་རོའི་།སྦས་པའི་རྡོ་རྗེ་མཁའ་འགྲོ་ཡི། །སྒྲུབ་སྐོར་གཏེར་ནས་ཕྱུངས་ཏེ་སྤེལ་མཛད་པ། །དུས་གསུམ་མཁྱེན་པའི་ཞབས་ལ་གསོལ་བ་འདེབས། །ཟམ་བུ་ལུང་དང་མཁའ་འགྲོའི་གསང་ཕུག་ཏུ། །ལོ་གསུམ་བར་དུ་ཡེངས་མེད་སྒྲུབ་པའི་མཐུས། །མཛེས་གསལ་ཞལ་གཟིགས་འཇའ་ལུས་ཆོས་སྐུ་ཐོབ། །སངས་རྒྱས་མགོན་པོའི་ཞབས་ལ་གསོལ་བ་འདེབས། །དབང་གིས་རབ་སྨིན་རྒྱུད་གཞུང་གདམས་པ་རྟོགས། །བསྙེན་ཅིང་བསྒྲུབས་པས་དྲོད་རྟགས་མངོན་དུ་ཕྱུངས། །སྣོད་ལྡན་བུ་ལ་གདམས་ངག་རྗེས་སུ་བསྟན། །བརྒྱུད་པའི་བླ་མ་
རྣམས་ལ་གསོལ་བ་འདེབས། །གདོད་ནས་མཁའ་འགྲོའི་དབང་ཕྱུག་དཀྱིལ་འཁོར་གཙོ། །བརྟན་གཡོའི་བདག་པོ་དཔལ་ལྡན་ཧེ་རུ་ཀ །ཁྲག་འཐུང་རྒྱལ་པོ་དྷརྨེ་ཤྭ་རེ་ཞེས། །རྡོ་རྗེ་སློབ་དཔོན་དེ་ལ་གསོལ་བ་འདེབས། །རི་རབ་སུམ་ཅུ་གཉིས་དང་རྡུལ་ཕྲན་དང་། །གྲངས་མཉམ་ཡེ་ཤེས་ལས་དང་འཇིག་རྟེན་གྱི། །སྲུང་མ་མཁའ་འགྲོའི་ཚོགས་ལ་གསོལ་བ་འདེབས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །དཀར་མོའི་ཏིང་འཛིན་འབྲུ་བརྒྱད་གསང་སྔགས་ཀྱི། །སྒྲུབ་པའི་བར་ཆད་བསྲུང་བར་བྱིན་གྱིས་རློབས། །ནག་མོའི་ཏིང་འཛིན་བཅུ་ཡི་གསང་སྔགས་ཀྱིས། །ལུས་སྲོག་བར་ཆད་བཟློག་པར་བྱིན་གྱིས་རློབས། །ཨེ་ཡིག་ཏིང་འཛིན་བཅུ་ཡི་བསད་སྔགས་ཀྱིས། །རྒྱལ་བའི་བསྟན་པ་བསྲུང་བར་བྱིན་གྱིས་རློབས། །རྩ་གསུམ་འཁོར་ལོ་བཞི་ཡི་ཏིང་འཛིན་གྱིས། །སྲོག་རྩོལ་བརྟན་པ་ཐོབ་པར་བྱིན་གྱིས་རློབས། །ལྟེ་དབུས་ཌཱཀྐི་དམར་མོའི་ཏིང་འཛིན་གྱིས་།ལུས་ལ་བདེ་དྲོད་འབར་བར་བྱིན་གྱིས་རློབས། །སྤྱི་བོའི་ཌཱཀྐི་དཀར་མོའི་ཏིང་འཛིན་གྱིས། །སེམས་ལ་བདེ་སྟོང་འཆར་བར་བྱིན་གྱིས་རློབས། །འཆི་ཚེ་མཁའ་འགྲོ་
རྣམས་ཀྱིས་རབ་བསུས་ནས། །བདེ་བ་ཅན་དུ་སྐྱེ་བར་བྱིན་གྱིས་རློབས། །ཞེས་པ་འདི་དཔལ་ཧེ་རུ་ཀ་དང་ཐ་མི་དད་པ་རྗེ་ཆོས་ཀྱི་དབང་ཕྱུག་གི་ཞལ་སྔ་ནས། སེང་གདོང་མའི་ཟློག་པའི་་ལུང་ལེགས་པར་ཐོབ་པའི་བཀའ་དྲིན་དྲན་ནས་བཀའ་བབས་ཀྱི་བླ་མ་རྣམས་ལ་གསོལ་བ་བཏབ་པའོ། །ཨ་རཱ་གས་སོ།། ༈ ཟབ་མོ་ནང་དོན་གྱི་བརྒྱུད་པའི་གསོལ་འདེབས་ནི། ན་མོ་གུ་རུ་སཏཱ་སོ་ཡཾ་བྷ་བཛྲ་ཡེ། རིགས་ཀུན་ཁྱབ་བདག་དཀྱིལ་འཁོར་གཙོ། །སྣང་སྲིད་ཀུན་གྱི་བྱེད་པ་པོ། །ཆོས་རྣམས་ཀུན་གྱི་བདག་ཉིད་དེ། །རྡོ་རྗེ་འཆང་ལ་གསོལ་བ་འདེབས། །གསང་བ་གསུམ་གྱི་མཛོད་འཛིན་ཅིང་། །རྒྱུད་ཀུན་སྡུག་ཅིང་སྤེལ་མཛད་པ། །སེམས་དཔའ་མཁས་གྲུབ་ལོ་པཎ་དང་། །བརྒྱུད་པའི་བླ་མར་གསོལ་བ་འདེབས། །ཁྱད་པར་མཁས་རྒྱུ་མཆོག་འཛམ་གླིང་རྒྱན། །རྒྱུད་ཀུན་ཇི་བཞིན་དོན་གཟིགས་ནས། །བསྟན་ཆོས་ནང་དོན་རྩོམ་མཛད་པ། །རང་བྱུང་རྗེ་ལ་གསོལ་བ་འདེབས། །རིགས་ཀུན་བདག་མེད་རྡོ་རྗེ་འཆང་། །པདྨ་གར་དབང་རྟ་མཆོག་རྒྱལ། །འཇིག་རྟེན་དབང་ཕྱུག་དབྱེར་མེད་སྐུ། །ཞྭ་དམར་རྗེ་ལ་གསོལ་བ་འདེབས། །ཀྱེ་རྡོར་བདུད་རྩི་ཐོད་པ་སོགས། །ཁྱོད་ཀྱི་ནང་
དུ་འདུས་པར་གསུངས། །དེ་ཕྱིར་རྒྱུད་ཀྱི་རྒྱལ་པོ་སྟེ། །འཁོར་ལོ་སྡོམ་ལ་གསོལ་བ་འདེབས། །དམར་ནག་གདོང་དྲུག་འཇིགས་བྱེད་དགྲ་ནག་སོགས། །ཁྱོད་ཀྱི་ནང་དུ་འདུས་པའི་ཕྱིར། །རྒྱུད་ཀྱི་རྒྱལ་པོ་ཡིན་པར་རྟོགས། །གསང་བ་འདུས་ལ་གསོལ་བ་འདེབས། །རྣལ་འབྱོར་རྒྱུད་ཀུན་དེར་འདུས་ཤིང་། །བྱ་སྤྱོད་ཁྱོད་ཀྱི་ཡན་ལག་ཕྱིར། །རྒྱུད་ཀྱི་རྒྱལ་པོ་ཆེན་པོ་སྟེ། །དུས་ཀྱི་འཁོར་ལོར་གསོལ་བ་འདེབས། །ཕྱག་བཞི་པ་དང་གདོང་བཞི་པ། །ཐ་བྷི་ར་དང་གྲི་ཐོད་ཅན། །ཆོས་དང་གང་ཟག་སྐྱོངས་བ་པོ། །རྒྱུད་སྲུང་རྣམས་ལ་གསོལ་བ་འདེབས། །དེ་ལྟར་གསོལ་བཏབ་བྱིན་རླབས་ཀྱིས། །མ་དག་སེམས་ཅན་རྣམས་ཀྱི་ཁམས། །ཅུང་ཟད་དག་པ་ལམ་གྱི་སྐབས། །ཤིན་ཏུ་རྣམ་པ་དག་རྒྱལ་བའི་སྐུ། །ཀུན་ཀྱང་བདེར་གཤེགས་སྙིང་པོའི་རྩལ། །རང་སེམས་རྟོགས་པར་བྱིན་གྱིས་རློབས། །ཕྱི་རུ་འཇིག་རྟེན་ཆགས་གནས་འཇིག །ནང་དུ་མི་ལུས་སྐྱེས་གནས་འཆི། །དཀྱིལ་འཁོར་བསྐྱེད་ཅིང་གནས་པ་དང་། །བསྡུས་ཏེ་རྫོགས་པའི་རིམ་པ་དང་། །སྦྱང་གཞི་སྦྱོང་བྱེད་སྦྱངས་ཚུལ་རྣམས། །ཇི་བཞིན་རྟོགས་པར་བྱིན་གྱིས་
རློབས། །གཉིད་ནས་ཆོས་སྐུའི་རྨི་ལམ་ནས། །ལོངས་སྐུ་སད་མ་སྤྲུལ་པའི་སྐུ། །སྙོམས་པར་འཇུག་པ་ཡེ་ཤེས་སྐུ། །སྦྱང་གཞི་སྦྱོང་བྱེད་རབ་སྦྱངས་ནས། །གནས་སྐབས་བཞི་ཡི་འཁྲུལ་པ་བསལ། །སྐུ་བཞི་ཐོབ་པར་བྱིན་གྱིས་རློབས། །ཀུན་གཞི་དཔལ་ལྡན་ཧེ་རུ་ཀ །རྩ་དང་རླུང་དང་ཐིག་ལེ་རྣམས། །དྲུག་ཅུ་རྩ་གཉིས་ལྷ་ཡི་ཚོགས། །སྦྱང་གཞི་སྦྱོང་བྱེད་རབ་སྦྱངས་ཏེ། །དེ་ཉིད་བཅུ་བཞིའི་རབ་གོམས་པས། །བདེ་མཆོག་འགྲུབ་པར་བྱིན་གྱིས་རློབས། །ཕུང་པོ་ཁམས་དང་སྐྱེ་མཆེད་དང་། །ཡན་ལག་ཚིགས་སོགས་བཅས་པ་རྣམས། །རིགས་ལྔ་ཡུམ་དང་སེམས་དཔའི་ཚོགས། །ཁྲོ་བོ་བཅུ་དང་བཅས་པ་ཡིས། །སྦྱང་གཞི་སྦྱོང་བྱེད་རབ་ཤེས་ནས། །གསང་འདུས་འགྲུབ་པར་བྱིན་གྱིས་རློབས། །ཕྱི་རུ་ལོ་ཟླ་ཞག་དང་དུས། །ནང་དུ་ཡིག་འབྲུ་རླུང་གི་གྲངས། །གཞན་ཏུ་རྒྱུ་སྐར་དཀྱིལ་འཁོར་ཅན། །དག་པ་དུས་འཁོར་ལྷ་ཡི་ཚོགས། །དབྱེར་མེད་སྦྱར་ཚུལ་ཤེས་བྱས་ཏེ། །དུས་འཁོར་འགྲུབ་པར་བྱིན་གྱིས་རློབས། །དེ་ལྟར་ལམ་ལ་རབ་བརྩོན་ནས། །ཚེ་འདི་ཉིད་ལ་རྡོ་རྗེ་འཆང་། །སྐུ་གསུང་
རྒྱན་འཁོར་ལྔ་ཡི་བདག །གེགས་མེད་མྱུར་དུ་འགྲུབ་གྱུར་ནས། །སྐལ་ལྡན་རྗེས་སུ་འཛིན་བྱེད་པ། །འགྲུབ་པར་བྱིན་གྱིས་བརླབ་ཏུ་གསོལ། །ཅེས་པ་འདི་རྗེ་རྡོ་རྗེ་འཆང་ཆོས་ཀྱི་དབང་ཕྱུག་གི་དྲུང་ནས། ཟབ་མོ་ནང་གི་དོན་ལེགས་པར་ཐོབ་ཅིང་། ཀུན་ཆུབ་པར་བྱས་ནས་རྒྱལ་བ་ཉིད་ཀྱི་ཕྱག་ཏུ་དཔེ་བསྣམས་ནས་ལེའུ་གཉིས་ཙམ་ཞིག་འཚོགས་ཆེན་དང་། གཞན་སྒར་ཆོས་སྡེ་སོགས་འདུས་པ་སྟོང་ར་ཅན་དང་ཡང་བརྒྱ་ལྷག་ཙམ་གྱི་དྲུང་དུ་བསྐྱོར་བ་དང་། སྐུ་ཟིལ་གྱིས་ཞད་པ་ཚད་མེད་པ་བྱུང་བས་དེ་དུས་སྒྲིབ་པ་མི་དག་སྙམ་པ་ཙམ་བྱུང་། འཕྲོ་ཡང་རྗེས་ནས་རྫོགས་པར་སྐྱོར་ཞིང་རང་གིས་ལོ་འགའ་ལ་ཁ་ཐོན་དུ་བྱས་ཤིང་། ཕྱིས་བསམས་པས་འདི་བདེ་དགྱེས་གསང་གསུམ་དུས་འཁོར་དང་བཅས་པའི་རྒྱུད་ཚིག་རྣམས་བསྡུས་པར་སྣང་བས། རྒྱུད་དེ་དག་ཐམས་ཅད་ཀྱང་ཐོབ་པར་དོན་གྱི་འགྱུར་བར་གདའ་སྙམ་ནས། བཀའ་དྲིན་དྲན་ནས་གསོལ་འདེབས་འདི་ཡང་། ཨ་རཱ་གས་བྱས་སོ།། ༈ བླ་མ་ལྔ་བཅུ་པ་ཡི་བརྒྱུད་རིམ་གསོལ་འདེབས་ནི། ན་མོ་གུ་རུ་ཡེ། ཕྱོགས་བཅུའི་འཇིག་རྟེན་ཐམས་ཅད་ནས། །རྒྱལ་བ་ཀུན་གྱིས་ཕྱག་མཛད་པ། །རབ་ཏུ་བསྟོད་ཅིང་བསྔགས་མཛོད་ལ། །བླ་མ་རྣམས་ལ་གསོལ་བ་འདེབས། །བསྐལ་པ་བྱེ་བ་དུ་མ་རུ། །འབད་པར་བྱས་ཀྱང་རྙེད་དཀའ་བའི། །བྱང་ཆུབ་ཚེ་འདིར་སྩོལ་མཛད་པ། །
བླ་མ་རྣམས་ལ་གསོལ་བ་འདེབས། །མ་འོངས་སྙིགས་མའི་དུས་དག་ཏུ། །ང་ཉིད་སློབ་དཔོན་ཚུལ་དུ་འོང་། །དེ་ཚེ་དེ་ལ་གུས་བྱོས་ཞེས། །ལུང་བསྟན་ཐོབ་དེར་གསོལ་བ་འདེབས། །བསྐལ་པ་བྱེ་བར་སངས་རྒྱས་ནས། །ཁྱོད་མཆོད་བསོད་ནམས་འཕེལ་ཞེས་གསུངས། །ཞིང་མཆོག་དམ་པ་རྒྱལ་བའི་སྲས། །བླ་མ་རྣམས་ལ་གསོལ་བ་འདེབས། །གསོལ་བ་བཏབ་པའི་བྱིན་རླབས་ཀྱིས། །བླ་མ་དམ་པས་རྗེས་བཟུང་སྟེ། །འཁྲུལ་མེད་ལམ་བཟང་དེར་བསྒྲོད་ནས། །བྱང་ཆུབ་མྱུར་དུ་ཐོབ་མཛད་གསོལ། །ཅེས་པ་འདི་རྒྱལ་བ་ཐམས་ཅད་མཁྱེན་པའི་དྲུང་ནས་བླ་མ་ལྔ་བཅུ་པ་ལེགས་པར་ཐོབ་པའི་བཀའ་དྲིན་དྲན་ནས་བླ་མ་སྤྱི་ལ་གསོལ་བ་བཏབ་པའོ།། མ།ལ་སྨན་བླའི་དབང་ཆོག་གི་བརྒྱུད་པའི་གསོལ་འདེབས་ནི། ན་མོ་བྷི་ཥ་ཛུ་མ་ཧཱ་རཱ་ཛ་ཡེ། བསོད་ནམས་ཡོན་ཏན་རྒྱ་མཚོའི་གཏེར་མངའ་ཞིང་། །བསམ་གྱིས་མི་ཁྱབ་ཐུགས་རྗེའི་བྱིན་རླབས་ཀྱིས། །འགྲོ་བའི་སྡུག་བསྔལ་གདུང་བ་ཞི་མཛད་པ། །བཻཌཱུརྱ་ཡི་འོད་ལ་གསོལ་བ་འདེབས། །ཤིན་ཏུ་སེར་སྣ་དྲག་པོས་རབ་བཅིངས་པས། །ཡི་དྭགས་གནས་སུ་སྐྱེ་བའི་སྐྱེ་བོ་ཡིས། །ཁྱོད་མཚན་ཐོས་ན་
མིར་སྐྱེ་སྦྱིན་པར་དགའ། །བཅོམ་ལྡན་སྨན་གྱི་བླ་ལ་གསོལ་བ་འདེབས། །ཚུལ་ཁྲིམས་འཆལ་དང་གཞན་ལ་གཤེ་བརྩོན་པས། །དམྱལ་བར་སྐྱེ་བའི་འགྲོ་བ་འདི་དག་གིས། །ཁྱོད་མཚན་ཐོས་ན་མཐོ་རིས་སྐྱེ་བར་གསུངས། །སྨན་གྱི་རྒྱལ་པོ་དེ་ལ་གསོལ་བ་འདེབས། །གང་དག་དབྱེན་དང་ཕྲ་མ་དུ་མ་ཡིས། །རབ་ཏུ་འབྱེད་ཅིང་ལུས་སྲོག་ཕྲལ་བ་དག ཁྱོད་མཚན་ཐོས་ན་དེ་དག་འཚེ་མི་ནུས། །སྨན་པའི་རྒྱལ་པོ་དེ་ལ་གསོལ་བ་འདེབས། །མཚན་ལེགས་གསེར་བཟང་དྲི་མེད་སྣང་བ་དང་། །མྱ་ངན་མེད་མཆོག་དཔལ་དང་ཆོས་བསྒྲགས་དབྱངས། །མངོན་མཁྱེན་རྒྱལ་པོ་སྒྲ་དབྱངས་རྒྱལ་པོ་དང་། །ཤཱཀྱའི་རྒྱལ་པོ་རྣམས་ལ་གསོལ་བ་འདེབས། །འཇམ་དཔལ་སྐྱབས་གྲོལ་ཕྱག་ན་རྡོ་རྗེ་འཛིན། །ཚངས་དབང་བརྒྱ་བྱིན་ཕྱོགས་བཞིའི་རྒྱལ་པོ་བཞི། །གནོད་སྦྱིན་སྡེ་དཔོན་ཆེན་པོ་བཅུ་གཉིས་སོགས། །དཀྱིལ་འཁོར་ཡོངས་སུ་རྫོགས་ལ་གསོལ་བ་འདེབས། །དེ་བཞིན་གཤེགས་པ་བདུན་གྱི་སྨོན་ལམ་མདོ། །སྨན་གྱི་ལྷ་ཡི་མདོ་སྡེ་ཉིད་དང་ནི། །མཁན་ཆེན་ཞི་བ་འཚོས་མཛད་གཞུང་ལ་སོགས། །དམ་ཆོས་གླེགས་བམ་ཚོགས་ལ་གསོལ་བ་
འདེབས། །བོ་དྷི་སཏྭ་ཁྲི་སྲོང་ལྡེའུ་བཙན་སོགས། །ལོ་པཎ་རྒྱལ་བློན་བྱང་ཆུབ་སེམས་དཔའ་དང་། །བརྒྱུད་པའི་བླ་མ་དམ་པ་ཐམས་ཅད་དང་། །ཆོས་ཀྱི་དབང་ཕྱུག་སོགས་ལ་གསོལ་བ་འདེབས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །གནས་སྐབས་ནད་དང་འཇིགས་པ་སྣ་ཚོགས་ཞི། ་།འཆི་ཚེ་ངན་སོང་འཇིགས་པ་ཀུན་ཞི་ནས། །བདེ་བ་ཅན་དུ་སྐྱེ་བར་བྱིན་གྱིས་རློབས། །ཞེས་པ་འདི་སྔ་སོར་རྗེ་སྤྲུལ་པའི་སྐུ་དྲུག་པའི་ཞལ་སྔ་ནས། དེ་བཞིན་གཤེགས་པ་བདུན་མཆོད་པའི་ཆོ་ག་རྗེ་གྲགས་པ་དོན་གྲུབ་ཀྱིས་མཛད་པ་དང་། དེའི་དབང་བྱིན་རླབས་དང་བཅས་པ་ལེགས་པར་ཐོབ་པས། ཕྱིས་མཚན་ཐོས་པའི་ཕན་ཡོན་དྲན་ནས། ཨ་རཱ་གས་གསོལ་བ་བཏབ་པའོ།། ༈ ཤེས་རབ་སྙིང་པོའི་བརྒྱུད་པའི་གསོལ་འདེབས་ནི། ན་མོ་པྲཛྙཱ་པཱ་ར་མི་ཏ་ཡེ། སེང་ཁྲི་པདྨ་ཟླ་བའི་སྟེང་། །གསེར་མདོག་ས་གནོན་མཉམ་བཞག་མཛད། །ཆོས་གོས་གསུམ་གསོལ་སྐྱིལ་ཀྲུང་བཞུགས། །རྫོགས་སངས་རྒྱས་ལ་གསོལ་བ་འདེབས། །ཤེས་རབ་རྫུ་འཕྲུལ་ཆེ་བའི་མཆོག །ཉེ་རྒྱལ་དང་ནི་སང་ནས་སྐྱེས། །ཉོན་མོངས་གཡུལ་ལས་རབ་རྒྱལ་བའི། །ཉན་ཐོས་གཉིས་ལ་ཕྱལ་འཚལ་ལོ། །རང་གི་
སྙིང་ཁར་ཟླ་བའི་སྟེང་། །ཤེས་རབ་སྙིང་པོ་ཟབ་པའི་མདོ། །ཡིག་འབྲུ་དཀར་ཞིང་རབ་གསལ་བའི། །དམ་ཆོས་དེ་ལ་གསོལ་བ་འདེབས། །གསོལ་བ་བཏབ་པའི་བྱིན་རླབས་ཀྱིས། །ཤེས་རབ་ཕ་རོལ་ཕྱིན་པ་ཡི། །རྟོགས་པ་རྒྱུད་ལ་སྐྱེ་བ་དང་། །འཕེལ་ཞིང་བརྟན་པར་བྱིན་གྱིས་རློབས། །ཁྱོད་ཀྱི་མཛོད་སྤུའི་འོད་ཟེར་གྱིས། །སྣོད་བཅུད་བདག་དང་བཅས་པ་ཀུན། །མེ་ལོང་ནང་གི་གཟུགས་བརྙན་ལྟར། །སྣང་སྟོང་རྟོགས་པར་བྱིན་གྱིས་རློབས། །ཕུང་པོ་ཁམས་དང་སྐྱེ་མཆེད་མེད། །བདེན་པ་བཞི་དང་རྟེན་འབྱུང་མེད། །སྐྱེ་འགག་འགྲོ་འོང་ཀུན་མེད་པ། །བདག་མེད་རྟོགས་པར་བྱིན་གྱིས་རློབས་། །སྔོན་ཚེ་བདུད་ཀྱི་དཔུང་གཡོས་ཚེ། །དབང་པོའི་ཡུལ་དོན་རབ་བསྒོམ་མཐུས། །ལོག་འདྲེན་དཔུང་ཆེན་བཟློག་པ་ལྟར། །རྐྱེན་ངན་བཟློག་པར་བྱིན་གྱིས་རློབས། །ཞེས་པ་འདི་སྔ་སོར་རྒྱལ་བ་མཆོག་གི་སྤྲུལ་པའི་སྐུ་དྲུག་པའི་ཞབས་དྲུང་ནས་མདོ་ཤེར་སྙིང་ལེགས་པར་ཐོབ་པས། ཕྱིས་དེའི་སྒྲུབ་ཐབས་མཐུན་པའི་གསོལ་འདེབས་འདི་༧ ཨ་རཱ་གས་སྦྱར་བའོ།། ཡ། སྒྲོལ་དཀར་ཡིད་བཞིན་འཁོར་ལོའི་བཀའ་བབས་གསོལ་འདེབས་ནི། ན་མོ་ཨཱཿརྱ་ཏཱ་རེ་ཡེ། རྒྱུད་རྒྱལ་གསུངས་
མཛད་བཅོམ་ལྡན་ཤཱཀྱ་ཐུབ། །འདུས་པའི་འཁོར་དང་ཞུ་སྤོབས་འཇམ་པའི་དབྱངས། །མངོན་པར་འབྱུང་དང་སྣ་ཚོགས་ལས་བྱུང་རྒྱུད། །སྟོན་འཁོར་ཆོས་དང་བཅས་ལ་གསོལ་བ་འདེབས། །འཕགས་མ་ཉིད་དང་དེ་ཡིས་རྗེས་བཟུང་ནས། །འཆི་བསླུའི་བསྟན་བཅོས་མཛད་པོ་ངག་དབང་ཕྱུག །བསྟན་བཅོས་རྒྱས་པའི་ལས་མཛད་ངག་དབང་གྲགས། །དེ་སྲས་ཐུ་བོ་རྣམས་ལ་གསོལ་བ་འདེབས། །སྒྲུབ་ཐབས་བརྒྱ་རྩ་མཛད་པ་རྡོ་རྗེ་གདན། །མན་ངག་བོད་དུ་སྣང་མཛད་བ་རི་པ། །སླེ་ནག་པ་དང་སྒྲེ་པ་ཟུར་ཁ་པ། །བཀའ་བབས་བརྒྱུད་པ་རྣམས་ལ་གསོལ་བ་འདེབས། །པཎ་ཆེན་གསེར་གླིང་པ་དང་ཨ་ཏི་ཤ །འབྲོམ་སྟོན་རྗེ་དང་རྒྱལ་སྲས་སྤྱན་སྔ་པ། །འཕགས་མས་དངོས་སུ་རྗེས་བཟུང་སྒྲེ་པའི་ཞབས། །ཞལ་གཟིགས་བརྒྱུད་པ་རྣམས་ལ་གསོལ་བ་འདེབས། །མ་འོངས་རྒྱལ་བ་བདུན་པ་ཤཱཀྱའི་སྲས། །གནས་ལྔ་མཁས་པའི་པཎ་ཆེན་དཱ་ན་ཤཱི། །བཙན་ཐང་བླ་མ་ཀ་པ་ལ་ལ་སོགས། །བྱིན་རླབས་བརྒྱུད་པ་རྣམས་ལ་གསོལ་བ་འདེབས། །དྭགས་པོ་ཕག་གྲུ་རྒྱལ་བ་སྟག་ལུང་པ། །བ་ལམ་པ་དང་ཤཱཀྱ་གཞོན་ནུ་དང་། །
གྲགས་པ་སེང་གེ་དར་རྒྱལ་མཁའ་སྤྱོད་དབང་། །བརྒྱུད་པའི་བླ་མ་རྣམས་ལ་གསོལ་བ་འདེབས། །གཞན་ཡང་གཡུང་སྟོན་རྡོ་རྗེ་དཔལ་ལ་སོགས། །དབང་གིས་རབ་སྨིན་རིམ་གཉིས་མཐར་སོན་ནས། །འཕགས་མའི་རྒྱུད་གཞུང་ཆུ་བོ་རྒྱས་མཛད་པ། །ངོ་མཚར་བརྒྱུད་པ་དྲུག་ལ་གསོལ་བ་འདེབས། །བསོད་ནམས་འབུམ་དང་བླ་མ་རྒྱལ་མཚན་དང་། །ཆོས་ཀྱི་གྲགས་པ་མཉན་པ་མི་བསྐྱོད་རྗེ། །དཀོན་མཆོག་འབངས་དང་ཞྭ་ནག་དགུ་པའི་ཞབས། །བརྒྱུད་པའི་བླ་མ་རྣམས་ལ་གསོལ་བ་འདེབས། །འཕགས་མ་ཡང་ཡང་ཞལ་གཟིགས་ལུང་བསྟན་ཐོབ། །གནས་ལྔ་མཁས་པའི་བྱང་ཕྱོགས་པཎྜི་ཏ། །འཇམ་དབྱངས་བླ་མ་ཆོས་ཀྱི་སྣང་བ་ཅན། །རྩ་བའི་བླ་མའི་ཞབས་ལ་གསོལ་བ་འདེབས། །ཚེ་དཔག་མེད་ཡུམ་བཅོམ་ལྡན་གོས་དཀར་མོ། །བསྒོམ་དང་བཟླས་པས་འཇིགས་པ་ཀུན་སྐྱོབས་ཤིང་། །ཚེ་དཔལ་ཡོན་ཏན་ཡེ་ཤེས་རྒྱས་མཛད་མ། །ཡི་དམ་འཕགས་མའི་ཞབས་ལ་གསོལ་བ་འདེབས། །འཕགས་མའི་རྗེས་འབྲངས་ནོར་འཆང་གནོད་སྦྱིན་མ། །སྤྲུལ་པའི་ལྷ་མོ་ལྕགས་སྤྱང་སྔོན་མོ་སོགས། །སྒྲོལ་མའི་རྒྱུད་གཞུང་གང་ཟག་སྲུང་མཛད་
པ། །ཆོས་བདག་སྲུང་མའི་ཚོགས་ལ་གསོལ་བ་འདེབས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །ཡིད་བཞིན་འཁོར་ལོ་གཡས་སྐོར་འོད་ཟེར་གྱིས། །ཉོན་མོངས་སྒྲིབ་གཉིས་བྱང་བར་བྱིན་གྱིས་རློབས། །ནུས་ལྡན་གསང་སྔགས་གཡོན་སྐོར་ཏིང་འཛིན་གྱིས། །ཚེ་དཔལ་ཡེ་ཤེས་འཕེལ་བར་བྱིན་གྱིས་རློབས། །འཁོར་ལོ་འོད་ཟེར་རིམ་དྲུག་ཏིང་འཛིན་གྱིས་། །འཇིགས་པ་ཀུན་ལས་སྐྱོབས་པར་བྱིན་གྱིས་རློབས། །སྣ་ཚོགས་སྔགས་དང་ཏིང་འཛིན་འཁྲུལ་འཁོར་གྱིས། །འགྲོ་བའི་རེ་་འདོད་བཀང་བར་བྱིན་གྱིས་རློབས། །ཆོས་ཀུན་སྒྱུ་མ་མེ་ལོང་གཟུགས་བརྙན་ལྟར། །རྒྱལ་ཡུམ་དགོངས་པ་རྟོགས་པར་བྱིན་གྱིས་རློབས། །འཆི་ཚེ་རྣམ་ཤེས་ཏཱཾ་ཡིག་མདའ་འཕང་བཞིན། །བདེ་བ་ཅན་དུ་སྐྱེ་བར་བྱིན་གྱིས་རློབས། །ཞེས་པ་འདི་ཁ་ཆེ་པཎྜི་ཏ་ཉི་མ་སྦས་པ་ནས་ཉེ་བར་བཟུང་སྟེ་སྐྱེ་བ་ཐམས་ཅད་དུ་འཕགས་མས་རྗེས་སུ་བཟུང་ནས་གཏམ་རྒྱུད་མཐའ་ཡས་པ་མངའ་ཞིང་སྐུ་སྐྱེ་བ་འདི་ལའང་ལན་དུ་མར་ཞལ་གཟིགས་ཤིང་ལུང་བསྟན་པ་ཐོབ་པའི་ཚུལ་བསྟན་པ་རྗེ་ཆོས་ཀྱི་དབང་ཕྱུག་གི་ཞལ་སྔ་ནས་འཕགས་མའི་སྤྲུལ་པ་རྒྱ་བཟའ་དང་ཁྲི་བཙུན་གཉིས་ཡུན་རིང་དུ་བཞུགས་པའི་གནས་ཤར་འོད་ཟེར་དམ་པའི་ཕོ་བྲང་དུ་སྒྲོལ་
མ་ཡིད་བཞིན་འཁོར་ལོའི་རྗེས་གནང་གི་རིམ་པ་ཇོ་བོ་རྗེའི་ལུགས་སུ་ཐོབ་པས་རཱ་ག་ཨ་སྱས་བརྒྱུད་རིམ་ལ་གསོལ་བ་བཏབ་པའོ།། ༈ བྱམས་ཆོས་བརྒྱུད་པའི་གསོལ་འདེབས་ནི། ན་མོ་པྲཛྙཱ་པཱ་ར་མི་ཏ་ཡེ། བརྗོད་བྲལ་སྐྱེ་འགགས་མེད་པ་སྟེ། །དངོས་བྲལ་དངོས་ཀུན་བདག་ཉིད་ཅན། །འཕགས་བཞི་བསྐྱེད་བྱེད་རྒྱལ་བའི་ཡུམ། །ཕ་རོལ་ཕྱིན་ལ་གསོལ་བ་འདེབས། །སྐྱོན་རྣམས་ཀུན་བྲལ་ཡོན་ཏན་གཏེར། །མཚན་བཟང་སུམ་ཅུ་སོ་གཉིས་དང་། །དཔེ་བྱེད་བརྒྱད་ཅུས་རབ་བརྒྱན་པ། །ཐུབ་དབང་དེ་ལ་གསོལ་བ་འདེབས། །བྱེ་བ་ཕྲག་བརྒྱ་འབུམ་ཕྲག་བརྒྱ། །སྟོང་ཕྲག་བརྒྱ་དང་ཉི་ཤུ་ལྔ། །ཁྲི་པ་བརྒྱད་སྟོང་པ་ལ་སོགས། །དམ་ཆོས་རྣམས་ལ་གསོལ་བ་འདེབས། །ཤར་ཕྱོགས་འོ་མའི་རྒྱ་མཚོ་ལས། །བཅུད་བསྡུས་མངོན་རྟོགས་རྒྱན་བརྩམས་ནས། །འགྲོ་བའི་སྡུག་བསྔལ་ཞི་མཛད་པ། །མ་ཕམ་མགོན་ལ་གསོལ་བ་འདེབས། །ལྔ་བརྒྱ་སྙིགས་མའི་དུས་འདི་རུ། །མཁས་གྲུབ་པཎ་ཆེན་ཚུལ་བཟུང་ནས། །བྱམས་ཆེན་བཞད་པ་གསལ་མཛད་པ། །ཞྭ་དམར་འཆང་ལ་གསོལ་བ་འདེབས། །གསོལ་བ་བཏབ་པའི་བྱིན་རླབས་ཀྱིས། །དོན་ནི་རྣམ་པ་བདུན་ཅུ་དང་། །
དངོས་པོ་བརྒྱད་ཀྱི་དོན་རྟོགས་ནས། །ཡུམ་དོན་མངོན་དུ་གྱུར་ནས་ཀྱང་། །བྱམས་བཞད་བསྐང་བར་བྱིན་གྱིས་རློབས། །ཤེས་རབ་ཕ་རོལ་ཕྱིན་པ་ཡི། །ཤོ་ལོ་འབུམ་ཕྲག་བློར་ཆུད་ནས། །མདོ་སྡེ་འཛིན་པར་བདག་གྱུར་ཏེ། །རྒྱལ་བསྟན་གསལ་བར་བྱིན་གྱིས་རློབས། །གཞི་ཤེས་ལམ་ཤེས་རྣམ་མཁྱེན་དང་། །འབྲས་བུ་ཆོས་སྐུའི་དོན་རིག་ནས། །བྱམས་པའི་བཞེད་པ་བདག་བསྐངས་ནས། །བྱང་ཆུབ་ཐོབ་པར་བྱིན་གྱིས་རློབས། །ས་གསེར་ཟླ་བ་མེ་ལ་སོགས། །སེམས་བསྐྱེད་ཉི་ཤུ་རྩ་གཉིས་པོ། །རིམ་བཞིན་བདག་ལ་ལེགས་སྐྱེས་ནས། །རྣམ་མཁྱེན་ཐོབ་པར་བྱིན་གྱིས་རློབས། །ཚངས་པ་ལྷ་ཡི་རྔ་བོ་ཆེ། །ནོར་བུ་དཔག་བསམ་ཤིང་བཞིན་དུ། །འབད་རྩོལ་མེད་པར་འགྲོ་བའི་དོན། །བདག་གིས་འགྲུབ་པར་བྱིན་གྱིས་རློབས། །ཞེས་པ་འདི་བྱམས་པ་ཉིད་ཀྱི་སྤྲུལ་པ་རྗེ་ཆོས་ཀྱི་དབང་ཕྱུག་གི་ཞལ་སྔ་ནས། བྱམས་ཆོས་ལྔ་དང་ཁྱད་པར་མངོན་པར་རྟོགས་པའི་རྒྱན་ལེགས་པར་ཐོབ་སྟེ་རང་གིས་ཡང་བཟུང་ནས་ཚོགས་ལ་ཡང་བསྐྱོར་བ་དང་། ལོ་ཁ་ཡར་ལ་ཁ་ཐོན་བྱས་ཤིང་འབྲུ་སྦྱོར་དང་ཁྱབ་པ་ཡང་འགའ་རེ་བསླབ་ཅིང་ཕྱིས་བསམ་པ་ལ། རྗེ་ཉིད་བསྙུངས་ནས་སྐུ་རིམ་མང་ཇ་སྤྱི་སྒེར་མང་དུ་བྱུང་དུས་ང་
ཡི་རིམ་གྲོ་བསམས་ནས་མངོན་རྟོགས་རྒྱན་ཁོ་ན་ཐོན་གསུངས་པ་དང་། རྒྱབ་རི་རིགས་གསུམ་མགོན་པོའི་རྩེར་བྱམས་པའི་ལྷ་ཁང་དང་བྱམས་ཆོས་འདོན་མཁན་བཞི་རེ་ཐ་ནའང་མ་ཆད་དགོས་པའི་ཞལ་བཀོད་མཛད་པའི་སྟབས་ཀྱིས། གྲྭ་ཚང་ན་བྱམས་ཆོས་སྡེ་ལྔ་པ་མང་དུ་བྱུང་བ་དང་། དགེ་རྩ་དང་རིམ་གྲོ་སོགས་ལ་བྱམས་ཆོས་པ་ཟུར་དུ་ཚོགས་པའི་སྲོལ་ཆེན་པོ་བྱུང་སོང་བ་དྲན་ནས། ༧ རཱ་ག་ཨ་སྱས་ཕྱིས་གསོལ་བ་བཏབ་པའོ།། ༈ བློ་སྦྱོང་དོན་བདུན་མའི་ཁྲིད་ཀྱི་བརྒྱུད་པའི་གསོལ་འདེབས་ནི། ཤཱཀ་ཐུབ་བྱམས་པ་ཐོགས་མེད་ཞི་བ་ལྷ། །གསེར་གླིང་པ་དང་ཇོ་བོ་མར་མེ་མཛད། །འབྲོམ་སྟོན་སྤྱན་སྔ་བ་དང་རྒྱ་སྒོམ་པ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །དྭགས་པོ་དུས་མཁྱེན་རས་ཆེན་སྤོམ་བྲག་པ། །ཀརྨ་པ་དང་རང་བྱུང་རྒྱལ་བ་གཡུང་། །རོལ་པའི་རྡོ་རྗེ་མཁའ་སྤྱོད་དེ་བཞིན་གཤེགས། །རིན་ཆེན་བཟང་པོ་དོན་ལྡན་འཇམ་དཔལ་བཟང་། །ཆོས་གྲགས་རྒྱ་མཚོ་མཉན་པ་མི་བསྐྱོད་རྗེ། །དཀོན་མཆོག་ཡན་ལག་མི་ཕམ་ཆོས་དབང་ཕྱུག །གྲངས་མེད་བསྐལ་པའི་སྔོན་ནས་བྱང་ཆུབ་ཀྱང་། །འགྲོ་བའི་དོན་དུ་སླར་ཡང་སེམས་བསྐྱེད་ནས། །མ་དག་གདུལ་བྱའི་སྣང་ངོར་སེམས་དཔའི་ཚུལ། །ཆོས་ཀྱི་དབང་ཕྱུག་ཞབས་ལ་གསོལ་
བ་འདེབས། །སྐྱབས་གནས་ཐུབ་པ་ཡི་དམ་སྤྱན་རས་གཟིགས། །འཇིགས་པ་ཀུན་ལས་སྒྲོལ་མཛད་རྗེ་བཙུན་མ། །བར་ཆད་བདུད་དཔུང་ཟློག་བྱེད་མི་གཡོ་བ། །བཀའ་གདམས་ལྷ་བཞིར་གྲགས་ལ་གསོལ་བ་འདེབས། །བསྟན་པ་སྲུང་མཛད་ཏྲག་ཤད་བྲག་ལྷ་མགོན། །ཀླུ་ཆེན་བཞི་དང་བརྟན་མ་བཅུ་གཉིས་སོགས། །བཀའ་བབས་ཆོས་དང་བརྒྱུད་འཛིན་སྐྱོངས་བ་སོགས། །ཆོས་བདག་སྲུང་མའི་ཚོགས་ལ་གསོལ་བ་འདེབས། །གསེར་གླིང་བླ་མའི་ཐུགས་བཅུད་བདུད་རྩིའི་རྒྱུན། །རྒྱལ་བའི་ཉེ་རྒྱུ་བྱང་ཆུབ་སེམས་གཉིས་ཞེས། །མི་ཉིད་རྒྱལ་སྲས་བྱེད་པའི་གསེར་འགྱུར་རྩི། །བློ་སྦྱོང་དམ་ཆོས་དེ་ལ་གསོལ་བ་འདེབས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །ཆོས་ཀུན་རྨི་ལམ་ལྟ་བུར་རྟོགས་བྱས་ནས། །རང་རིག་མངོན་དུ་རྟོགས་པར་བྱིན་གྱིས་རློབས། །བདག་གིས་གཞན་ཚིམས་གཞན་སྡིག་བདག་སྨིན་པའི། །གཏོང་ལེན་དམིགས་པ་འབྱོངས་བར་བྱིན་གྱིས་རློབས། །སྣོད་བཅུད་མི་སྲུན་སྡིག་པས་གང་བའི་ཚེ། །ལེ་ལེན་རང་ལ་བདའ་བར་བྱིན་གྱིས་རློབས། །གཞན་ཕྱོགས་སྐྱོན་ལ་ནམ་ཡང་མི་བསམ་
ཞིང་། །ཀུན་ལ་བཤེས་གཉེན་ལྟ་བར་བྱིན་གྱིས་རློབས། །འགྱུར་ལྡོག་ངན་ཤག་འཕང་རྒྱུག་རབ་སྤངས་ནས། །ཡེངས་སྐྱ་ཐུབ་པར་འབྱོངས་པར་བྱིན་གྱིས་རློབས། །བདག་ནི་འཆི་ཚེ་བྱང་སེམས་མི་འབྲལ་ཞིང་། །བདེ་བ་ཅན་དུ་སྐྱེ་བར་བྱིན་གྱིས་རློབས། །འགྲོ་བའི་དོན་ཕྱིར་རྒྱལ་བ་ཆོས་ཉན་ཏེ། །ས་བཅུ་མྱུར་དུ་བསྒྲོད་པར་བྱིན་གྱིས་རློབས། །གྲངས་མེད་སྤྲུལ་ནས་གྲངས་མེད་རྒྱལ་བ་ལ། །མཆོད་ཅིང་དམ་ཆོས་ཐོབ་པར་བྱིན་གྱིས་རློབས། །མཐའ་ཡས་སྤྲུལ་པས་མཐའ་ཡས་འགྲོ་བ་རྣམས། །བྱང་ཆུབ་ལམ་ལ་བཀོད་པར་བྱིན་གྱིས་རློབས། །མདོར་ན་བླ་མ་སྤྱན་རས་གཟིགས་དབང་གིས། །ཕྲིན་ལས་བསྒྲུབ་པའི་ཐུ་བོར་བྱིན་གྱིས་རློབས། །ཞེས་པ་འདི་ནི་ཤར་འོད་ཟེར་དམ་པའི་ཕོ་བྲང་གི་ཆོས་རའི་སྟེང་དུ་བློ་སྦྱོང་དོན་བདུན་མའི་ཁྲིད། ཇོ་བོ་ཆེན་པོ་གསེར་གླིང་པའི་ལུགས། ཇོ་བོ་ཨ་ཏི་ཤ་ཡི་ཐུགས་དམ་ཡི་དོན་རེ་རེ་ལ་ཉིན་རེ་མཛད་པས་ཕྱེད་ཙམ་འགྲུབ་ནས་གསུང་འཕྲོ་དེ་བཞག་ནས། སྒར་ཆེན་གཙང་ཕྱོགས་སུ་བཏེགས་པས་དེ་ཕྱིན་ཆད་སྐུ་སྐྱེ་བ་དེ་ལ་ཟ་དམ་དུ་མ་ཕེབ་ཅིང་། ཕྱིས་གཙང་ཕྱོགས་སུ་ཡང་ཆོས་དེ་ཡི་འཕྲོ་མ་གནང་སྟེ། ཕྱིས་བསམ་པ་ཟ་དམ་གྱི་གནས་དེར་མཛད་པས་ཕྲིན་ལས་ཀྱི་ཁྱད་ཙམ་ཞིག །སྐུ་སྐྱེ་བ་ཕྱི་མས་མཛད་དགོས་པའི་བརྡའམ་རྟེན་འབྲེལ་དུ་སྣང་
སྟེ། ཉིད་ཀྱིས་བཀོད་ཡིག་ལྟར་ནའང་གཙུག་ལག་ཁང་ཕྱེད་ཙམ་ལས་ད་ལྟ་མ་འགྲུབ་པ་དང་། སྟག་ཚང་རོང་གི་རྟོགས་ལྡན་རྩ་རླུང་ལ་རང་དབང་ཐོབ་པ་ཞིག་གིས། རི་བོ་རྩེ་ལྔ་ནས་ཟངས་ཀྱི་གའུ་ཤོག་སེར་གྱིས་གང་བ་ཞིག་གཏེར་ནས་བཏོན་ཏེ། རྒྱལ་བའི་དབང་པོ་དགུ་པ་ལ་ཕུལ་བའི་ནང་ན་ཟ་དམ་གྱི་བཀོད་པ་དང་དགེ་འདུན་གྱི་ཁ་གྲངས་ལ་སོགས་གསལ་བར་ལུང་བསྟན་ཡོད་པར་སྣང་སྟེ། དེ་ལྟར་ན་ཟ་དམ་གོང་འོག་གཉིས་ལ་༧ ཞྭ་དམར་བདུན་པ་དང་བརྒྱད་པས་དགོན་རེ་རེ་བསྒྲིགས། ཚོགས་པ་སྟོང་ར་ཅན་ཚོགས་བོད་ཀྱི་རབ་འབྱམས་ཀྱི་གྲྭ་སྐོར་དེར་བྱེད་པ་འོང་ངོ་སྣང་སྐད། གྲུབ་ཐོབ་དེ་དངོས་དང་གྲ་རྒན་འགའ་རེས་མཇལ་བར་གོས་སྐུ་བཞེངས་ན་ཐོག་མར་བཤམས་དུས་དགུན་ལ་འབྲུག་ཆེན་གྲགས་ཟེར་བ་ཡོད་ཨེ་བྱུང་གསུངས་དེ་བྱུང་སྐད། ལྷོ་ཕྱོགས་རྒྱ་བལ་ལྟ་བུའི་གྲོང་ཁྱེར་དང་ཚོང་དུས་ཆེན་པོ་ཡང་འབྱུང་བ་དང་། བྲག་ཅིག་གི་མཐའ་དེར་མཚོ་ཡིས་བསྐོར་བར་གཏེར་ཡིག་དེར་ཡོད་སྐད། རྗེ་ཉིད་ཀྱི་ཞལ་ནས་བྲག་འདི་རྣམ་སྲས་དམར་པོའི་ཕོ་བྲང་དུ་སྣང་བས་ལོངས་སྤྱོད་ཆེན་པོ་འོང་ཞེས་དང་། ལུང་བསྟན་མགུར་བཞེངས་པ་ལས། གོས་དར་ཟབ་གྱོན་ཀྱང་རྩུབ་རྩུབ་འདྲ། །ཟས་བུར་སྦྲང་ཟོས་ཀྱང་ཁ་ཁ་འདྲ། །ཞེས་ལོངས་སྤྱོད་ཆེན་པོ་ལུང་བསྟན་པས། དེ་རྣམས་སླད་ནས་འབྱུང་བར་སྣང་ངོ་། །དེ་ལྟར་བློ་སྦྱོང་དོན་བདུན་མའི་ཁྲིད་ཕྱེད་ཙམ་ཐོབ་པའི་བརྒྱུད་རིམ་ལ་ཕྱིས་གསོལ་བ་བཏབ་པ་སྟེ། ༧སླར་ཡང་སྤྲུལ་སྐུ་བདུན་པས་བཀའ་ཆོས་ཀྱི་འཕྲོ་སྐྱོངས་བར་གྱུར་ཅིག །ཅེས་
པ་འདི་རྣམས་༧ ཀརྨ་ཨ་རཱ་གས་བྲིས་པའོ། །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།