འགོང་བཀར་རྒབ་འདྲེ་མཐའ་བསྐྲད།
ཡང་ཟབ་སྒྲུབ་པའི་ཆ་ལག་ཏུ༔ འགོང་བཀར་རྒབ་འདྲེ་མཐར་བསྐྲད་བཞུགས༔ བཛྲ་པ་ཎི་ལ་ཕྱག་འཚལ་ལོ༔ ནོར་ལྷ་སྒྲུབ་པའི་སྔོན་རོལ་དུ༔ འགོང་པོ་བཀར་ཐབས་འདི་གལ་ཆེ༔ དཔེར་ན་རྒྱལ་པོ་མཛོད་ཕྱེ་ཡང༔ འདོད་སྲེད་ཅན་གྱི་རྐུན་ཤོམ་ལྟར༔ ནོར་ལྷ་བསྒྲུབ་པའི་གཡང་ནོར་ཡང༔ མེད་སྲི་འགོང་པོས་བླ་ལ་རློམ༔ དེ་ཕྱིར་དེ་དག་བཀར་བའི་ཐབས༔ སྡེར་ཆགས་སྣོད་དུ་འགོང་པོའི་གཟུགས༔ བསེ་རག་རྒྱལ་པོ་གཞོན་ནུ་འབར༔ ཞྭ་ལ་འཕྲུ་བཙུག་གཡུ་རྣ་རྒྱན༔ ལག་གཉིས་བཟེད་ཅིང་གད་མོ་དགོད༔ བང་རྩལ་ཅན་གྱི་རི་བོང་ཞོན༔ འཁོར་དུ་འགོང་པོ་སྤུན་དགུས་བསྐོར༔ ཡས་བདུན་ཆག་དགུ་དྲུག་བཅུ་བཅའ༔ རྣལ་འབྱོར་ལྷ་ཡི་ང་རྒྱལ་གྱིས༔ འགུག་གཞུག་ལན་གསུམ་སྔགས་ཀྱིས་བརླབས༔ དེ་ནས་གཞུང་གི་སྨྲེང་འདི་གྱེར༔ ཀྱཻ་འགོང་པོ་བཀར་བ་གར་སྲིད་ན༔ ཕ་ནི་གནམ་འགོང་ཆེན་པོ་དང༔ མ་ནི་ས་འགོང་ནག་མོ་གཉིས༔ དེ་གཉིས་ཡིད་ཀྱིས་བསྡེབས་པ་ལས༔ འགོང་པོ་དེ་ནི་སྤུན་དགུ་བྱུང༔ མི་ལ་འགོང་པོ་ཕྱུགས་ལ་འགོང་པོ་དང༔ ཞིང་ལ་འགོང་པོ་ནོར་ལ་འགོང་པོ་དང༔ ལྟས་ངན་འགོང་པོ་སྤུན་དགུ་དང༔ འགོང་འདྲེ་བསེ་རག་སྤུན་དགུ་རྣམས༔ ཁྱེད་ལ་མཐུན་པའི་རྫོངས་འདེབས་སོ༔ གོ་གསུམ་ཐལ་འཇིམ་མགོ་དགུ་དང༔ ར་དང་རི་བོང་སྲེག་པ་དང༔ ལྕམ་ཤ་མང་པོ་རམ་པ་དང༔ མདའ་ཆག་ཕོར་ཆག་སྡེར་ཆག་སོགས༔ ཆག་དགུ་དྲུག་བཅུ་ཁྱོད་ལ་བྱིན༔ ཕྱུགས་ཀྱི་གོད་རོ་ཞིང་གི་ལུད༔ སྐྱ་བཤལ་ཞོ་ལད་ཆང་གི་སྐྱུར༔ འགོང་ཡས་སྣ་ཚོགས་ཁྱོད་ལ་བསྔོ༔ བུ་ལོན་ལན་ཆགས་བྱང་གྱུར་ཅིག༔ ཕྱུགས་ལ་མ་རྐུ་གཡང་ལ་མ་འཇབ་ཅིག༔ ནོར་ལྷ་སྒྲུབ་པའི་ཕྱོགས་འདིར་མ་འཁོར་སོང༔ ཤར་ཕྱོགས་ལུས་འཕགས་གླིང་ཞེས་བྱ་བར་དེངས༔ བཀར་རོ་འགོང་པོ་སྤུན་དགུ་བཀར༔ ཕུད་དོ་འགོང་པོ་སྤུན་དགུ་ཕུད༔ མནན་ནོ་འགོང་པོ་སྤུན་དགུ་མནན༔ བསྐྲད་དོ་འགོང་འདྲེ་བསེ་རག་བསྐྲད༔ སོང་ཞིག་འགོང་པོ་སྤུན་དགུ་སོང༔ རང་རང་སོ་སོའི་གནས་སུ་སོང༔ གལ་ཏེ་མི་འགྲོ་འདུག་གྱུར་ན༔ གསང་བདག་ཕྱག་ན་རྡོ་རྗེ་དང༔ དབང་ཆེན་ཁྲོ་རྒྱལ་རྟ་མགྲིན་དང༔ རིག་འཛིན་རོལ་བ་ཐོད་ཕྲེང་རྩལ༔ འཇིགས་བྱེད་བྱ་ཁྱུང་ཁྲོས་ནས་ནི༔ མགོ་བོ་ཚལ་པ་བརྒྱ་རུ་བཀས༔ ལུས་ནི་དུམ་བུ་སྟོང་དུ་ཕྱེ༔ སེམས་ནི་ངན་སོང་གནས་སུ་འཚོད༔ དེ་བས་མ་སྡོད་གཞན་དུ་དེངས༔ མི་ནོར་ཕྱུགས་ཀྱི་འགོང་པོ་བཟློག༔ མ་རིག་ལྟ་བའི་མིག་འགོང་བཟློག༔ ཁ་ཡིས་བཤད་པའི་ཁ་འགོང་བཟློག༔ ལག་པས་བརྙབ་པའི་ལག་འགོང་ཟློག༔ སེམས་ཀྱིས་བསམ་པའི་འགོང་འདྲེ་བཟློག༔ མཐོན་པོས་བསྐྱབ་པའི་འགོང་འདྲེ་བཟློག༔ བར་བས་མཛའ་བའི་འགོང་འདྲེ་བཟློག༔ འོག་མས་བཀུར་བའི་འགོང་འདྲེ་བཟློག༔ ཚེ་ཆོས་སྲིད་ཀྱི་འགོང་པོ་བཟློག༔ མི་ཁ་བྲ་མཆུ་ཐམས་ཅད་བཟློག༔ བྱད་ཟོར་རྦོད་གཏོང་ཐན་ལྟས་བསྒྱུར༔ མཱ་ར་ཡ་བྷྱོ་བཟློག་སོད༔ ཅེས་བརྗོད་བདེན་པའི་སྟོབས་བདར་བཅས༔ གྲོང་སྡེ་ཟད་པའི་མཐའ་ལ་བསྐྱལ་ལོ༔ དེས་ནི་མི་མཐུན་འགོང་པོ་བཟློག༔ ཕྱྭ་གཡང་བདེ་ལེགས་བཀྲ་ཤིས་འབྱུང༔ རྩ་གསུམ་ནོར་ལྷའི་བྱིན་འོད་ཆགས༔ ས་མ་ཡཱ༔ རང་བྱུང་དགོངས་པའི་བརྡ་ཆོས་འདི༔ མ་འོངས་འགྲོ་བའི་དོན་ཆེད་དུ༔ པདྨ་ཐོད་ཕྲེང་རྩལ་གྱིས་གདམས༔ ནོར་ལྷ་བསྒྲུབ་པའི་ཆ་ལག་མཆོག༔ འདི་མེད་དཔའ་བོ་མཚོན་ཤོར་འདྲ༔ རྒྱས་པ་དབང་ཆོག་སྣ་སེལ་དུ༔ མེད་དུ་མི་རུང་ཁྱད་ཆོས་མཆོག༔ བསླུ་མེད་རྡོ་རྗེའི་བརྡ་ཚིག་ཡིན༔ ལོག་ལྟ་ཅན་ལ་གསང་ངོ་རྒྱ༔ སྐལ་ལྡན་བུ་ལ་གཏད་དོ་རྒྱ༔ ཞེས་པ་འདི་ཡང་མཁའ་འགྲོ་ནོར་ལྷའི་ཆ་ལག་ཏུ༔ སློབ་བུ་ཀི་གཤེས་གང་གི་བཞེད་སྐོང་དུ༔ རྣལ་འབྱོར་འཆོལ་སྤྱོད་ས་ར་ཧི་ཏས་བྲིས་པ་དགེ་ཞིང་བཀྲ་ཤིས་པར་གྱུར་ཅིག༔